Japta 12: Helpem Ol Pipol blong Rere from Baptaes mo Konfemesen
“Japta 12: Helpem Ol Pipol blong Rere from Baptaes mo Konfemesen,” Prijim Gospel blong Mi: Wan Gaed blong Serem Gospel blong Jisas Kraes (2023)
“Japta 12,” Prijim Gospel blong Mi
Pikja
Jon Baptaes I Stap Baptaesem Jisas, i kam lon Greg K. Olsen
Japta 12
Helpem Ol Pipol blong Rere from Baptaes mo Konfemesen
Tingting long Hemia
?Olsem wanem nao bae mi helpem ol pipol blong rere from baptaes mo konfemesen?
?Olsem wanem nao mi save kondaktem wan intaviu blong baptaes?
?Olsem wanem nao oli mekem plan mo kondaktem wan gudfala seves blong baptaes?
?From wanem i impoten blong finisim mo sendemaot Fom blong Baptaes mo Konfemesen?
?Olsem wanem nao mi save givim sapot long ol niu memba?
Baptaes i wan glad odinens blong hop we i karem paoa blong God i kam long laef blong wan man. Paoa ia wan i kasem tru long presen ia we i Tabu Spirit. Bae i gohed blong kam taem wan i stanap strong kasem en blong kipim kavenan blong baptaes.
Stamba tingting blong tijing blong yu i blong helpem ol narawan oli developem fet blong olgeta long Jisas Kraes, sakem sin blong olgeta, mo kasem baptaes wetem wan tru tingting blong folem Kraes. Olsem we Momon i bin tijim, “fasfala frut blong fasin blong sakem sin i baptaes” (Moronae 8:25). Taem ol pipol we yu tijim olgeta oli kipim komitmen we yu givim long olgeta blong mekem, bae oli rere blong mekem mo kipim ol kavenan wetem God mo glad long ol blesing we Hem i promesem.
Baptaes mo konfemesen tufala i no en blong wanem yumi stap go from. Be, ol odinens ia oli get we ol pikinini blong God oli go insaed long hem blog stap long kavenan rod. Rod ia i lid i go long ol odinens, ol kavenan, mo ol blesing blong tempol we i mekem man i glad—mo long en i go long laef we i no save finis (luk long 3 Nifae 11:20–40).
Ol Kwalifikesen blong Baptaes mo Konfemesen
God i invaetem evri pikinini blong Hem blong kam long Hem tru long baptaes mo Konfemesen (luk long 2 Nifae 26:33; 3 Nifae 27:20). Ol kwalifikesen blong baptaes oli semmak long evri man.
Putum tingting blong yu i stap daon long fored blong God.
Mas wantem blong baptaes.
Kam long fored wetem wan hat we i fulap wetem sore mo wan spirit we i wantem blong sakem sin.
Sakem sin mo prea blong kasem fogivnes.
Stap wantem blong tekem long yuwan nem blong Kraes.
Gat wan strong tingting blong wantem blong givim seves long Kraes kasem en.
Soem long wok blong yu se yu kasem Spirit blong Kraes blong stap klin aot long ol sin blong yu.
I kam long ol Fas Presidensi mo Kworom blong Olgeta twelef Aposol:
Ansa gud long ol intaviu kwestin blong baptaes.
Kasem evri misinari lesen.
Mitim presiden blong kworom blong ol elda, presiden blong Rilif Sosaeti, mo bisop.
Atendem sam sakramen miting.
Ol kwalifikesen ia oli ol saen blong talemaot ol fasin long saed blong spirit blong wan i stap long rod blong jenisim laef. Taem ol pipol i mitim ol kwalifikesen ia, oli rere blong kasem ol tabu odinens blong baptaes mo konfemesen.
Wetaem nao wan i setemap wan deit blong baptaes we i konfem:
Lukluk gud bakegen long rekod blong hem long ap blong Prijim Gospel blong Mi blong mekem sua se yu bin tijim olgeta stret doktrin mo ol komanmen we oli nidim.
Krietem wan taem tebol blong ol taem we i nid blong rere blong baptaes mo kasem konfemesen. Tokbaot taem tebol ia wetem man o woman ia.
Sapos i nid, invaetem man o woman ia blong atendem wan seves blong baptaes bifo long baptaes blong hem.
Skripja Stadi
Stadi ol skripja ia. ?Olsem wanem nao yu save helpem olgeta we yu stap tijim, oli rere from baptaes mo konfemesen? Rekodem wanem yu stap lanem long stadi blong yu.
Gudfala Man blong Hilim Laef, i kam long Greg K. Olsen
Helpem ol Pipol i Rere from Baptaes Intaviu blong Olgeta
Intaviu blong baptaes i wan impoten step blong mekem sua se wan man i mitim ol kwalifikesen we Lod i wantem blong kasem baptaes. Plan blong mekem wan intaviu blong baptaes nomo taem wan man i rere.
Helpem ol pipol oli rere blong pas tru long intaviu ia blong oli filim gud long intaviu ia. Eksplenem wanem bae i hapen long intaviu ia. Talem long olgeta se bae oli gat intaviu ia wetem wan nara misinari we i olsem yu.
Eksplenem stamba tingting blong intaviu ia. Hem i wan janis blong olgeta blong oli witnesem se oli bin “sakem evri sin blong olgeta [mo] soemaot tru long ol wok blong olgeta se oli bin kasem Spirit blong Kraes blong kam klin aot long sin blong olgeta” (Doktrin mo Ol Kavenan 20:37).
Serem ol kwestin we man blong mekem intaviu bae i askem (luk daon ia). Hemia bae i helpem man o woman ia blong i rere blong ansarem olgeta.
Mekem sua se man o woman ia i andastanem wanem yu bin tijim mo kavenan we bae hem i mekem long baptaes. Kavenan ia i blong:
I wantem blong tekem long hemwan nem blong Jisas Kraes.
Serem testemoni blong yu abaot ol bigfala blesing we bae i kam tru long baptaes mo kasem konfemesen mo kipim kavenan blong baptaes. Olgeta blesing ia i gat, blong kam klin aot long ol sin mo presen ia we i Tabu Spirit.
Kondaktem Intaviu blong Baptaes
Wanwan man o woman we i wantem blong kasem baptaes i mas pas long wan intaviu tru long wan prishud lida we oli givim raet long hem. Long wan misin, man ia i wan distrik o son lida. Hem i mekem ol intaviu blong:
Olgeta we oli gat 9 yia i go antap, we oli neva bin baptaes o kasem konfemesen bifo.
Ol pikinini we oli gat 8 yia i go antap we papa mo mama oli no memba blong Jos.
Ol pikinini we oli gat 8 yia i go antap, we papa o mama tu oli kasem baptaes mo konfemesen.
Ol gaedlaen blong mekem intaviu i stap daon ia.
Holem ol intaviu long ol ples we i gud, wan praevet ples we yu save filim spirit i stap.
Taem intaviu i blong wan pikinini, yut, o woman, kompanion blong hem we i stap mekem intaviu i mas stap kolosap long wan rum we i joen nomo, long holwei o long ples blong sidaon aotsaed. Sapos hem we oli stap intaviu long hem i wantem oli save invaetem wan nara adalt blong stap long intaviu. Ol misinari oli mas stap longwe long ol situesen we i save mekem man i no save andastanem.
Stat wetem Prea
Helpem man o woman ia i filim gud.
Mekem intaviu i kam wan gudfala eksperiens.
Mekem sua se man o woman ia i andastanem stamba tingting blong intaviu.
Askem ol baptaes intaviu kwestin we oli stap daon ia. Arenjem gud ol kwestin folem yia blong man o woman ia, hamas i andastanem samting, mo situesen we hem i stap long hem sapos i nid.
Ansarem ol kwestin blong man o woman ia.
Lukluk bak long ol infomesen we oli stap long Baptaes mo Konfemesen Fom blong stretem. Sapos man o woman ia i wan we i no gat raet blong mekem samting blong hemwan yet, papa mo mama o wan we i lukaotem hem, i nid blong saenem fom ia bifo baptaes i tekem ples (lik long “Baptaes mo Konfemesen: Ol Kwestin mo Ol Ansa” seksen insaed long japta ia).
Invaetem man o woman ia blong talemaot testemoni blong hem o serem ol filing blong hem.
Talemaot tangkyu blong yu long hem from yu save mit wetem hem.
Ol Baptaes Intaviu Kwestin
Ol Baptaes Intaviu Kwestin oli stap olsem ia:
?Yu yu biliv se God i Papa blong yumi we I No Save Finis? ?Yu yu biliv se Jisas Kraes i Pikinini blong God mo Hem i Sevya mo i Ridima blong wol ia?
?Yu yu biliv se Jos Ia mo gospel blong Jisas Kraes i bin kambak tru long Profet Josef Smit? ?Yu yu biliv se [nem blong Presiden blong Jos we i laef i stap naoia] hem i wan profet blong God? ?Hemia i minim wanem long yu?
?Long yu, hem i minim wanem blong sakem sin? ?Yu yu filim se yu sakemaot ol sin blong yu blong bifo?
Oli bin tijim yu se blong kam memba insaed long Jos Ia blong Jisas Kraes blong Ol Lata-dei Sent i minim blong stap laef folem ol standet blong gospel. ?Wanem andastaning blong yu abaot ol standet ia? ?Yu yu glad mo wantem blong stap obei long olgeta standet ia?”
Loa blong jastiti, o loa blong fasin blong stap klin long saed blong seks, i blokem eni rilesen long saed blong seks aotsaed long mared we i folem loa, bitwin wan man mo wan woman
Loa blong taeting
Tok blong Waes
Stap kipim Sabat dei i tabu; we i minim tu blong tekem mo kakae sakramen evri wik mo stap givim seves long ol narafala man
?Yu yu bin mekem wan bigfala kraem bifo? Sapos yes, ?Yu yu stap folem probesen blong loa o yu aot long kalabus folem kondisen we kot i putum yu long hem?
?Yu bin tekpat o gat wan abosen bifo? (Luk long Jeneral Hanbuk, 38.6.1.)
Taem yu baptaes, yu mekem kavenan wetem God, se yu yu rere mo wantem tekem, long yuwan, nem blong Kraes, givim seves long ol narafala man, stanap olsem wan witnes blong God evri taem, mo obei long ol komanmen blong Hem truaot long laef blong yu. ?Yu yu rere blong mekem kavenan ia mo blong yu traehad blong stap fetful long kavenan ia?
Blong instraksen, sapos man o woman ia i ansa yes long kwestin 5 o 6, luk long Jeneral Hanbuk, 38.2.8.7 mo 38.2.8.8.
Kam blong save gud ol polisi mo gaedlaen we i tokbaot baptaes mo konfemesen long Jeneral Hanbuk, 38.2.8. Sam long ol polisi ia, oli lukluk long sam spesel situesen we yu save faenem.
Afta long intaviu, misinari ia mo man o woman ia tufala i joen wetem ol nara misinari. Sapos man o woman ia i rere blong baptaes, ol misinari oli eksplenem wanem bae i tekem ples long seves blong baptaes. Oli eksplenem tu se konfemesen i tekem ples long sakramen miting blong wod we man o woman ia i stap long hem.
Taem I Nid blong Muvum wan Baptaes
Samtaem wan baptaes i nid blong oli muvum from ol jalenj long saed blong testemoni o fasin blong stap klin inaf. Taem hemia i hapen yu kontrolem situesen ia wetem kea mo long praevet. Helpem man o woman ia blong andastanem olsem wanem blong i rere from baptaes long wan fiuja deit.
Leftemap tingting blong man o woman ia mo givim long hem hop long Kraes mo Atonmen blong Hem. Askem ol memba blong wod blong givim sapot blong stap olsem gudfala fren. Gohed blong tijim ol stamba prinsipol blong gospel kasem taem man o woman ia i rere blong kasem baptaes mo konfemesen. Wet kasem taem ia blong putum wan niufala deit blong baptaes.
Baptaes mo Konfemesen: Ol Kwestin mo Ol Ansa
?Mi mi nidim blong askem raet blong save baptaesem wan we i no gat raet blong mekem samting blong hemwan yet? Jos i wari long gud laef blong ol pikinini mo gudfala rilesensip long hom blong olgeta, ples we oli stap laef long hem. Wan we i no gat raet blong mekem samting blong hemwan yet, olsem we ol lokol loa oli talem, i save kasem baptaes taem nomo oli folem tufala kondisen ia:
Papa, Mama, we i lukaot long hem, o ol pipol we oli gat raet blong lukaot long hem, oli raetem wan leta blong givim ful raet. Oli mas gat wan jeneral andastaning blong doktrin we bae oli tijim pikinini blong olgeta long hem olsem wan memba blong Jos. Mo tu, oli mas wantem blong sapotem pikinini blong olgeta blong mekem mo kipim kavenan ia blong baptaes.
Hem we i lidim intaviu i faenemaot tru long Spirit se pikinini ia i andastanem kavenan blong baptaes. Hem i mas filim gud long hemwan se pikinini ia i stap traehad blong kipim kavenan ia taem hem i stap obei long olgeta komanmen, mo tu, taem hem i stap atendem ol miting blong Jos.
? Mi mi nidim raet blong wan waef o hasban blong save baptaesem wan waef o hasban? Yes. Wan we i mared finis, i mas gat raet blong hasban o waef blong hem bifo hem i baptaes.
?Sapos papa o mama long wan famli i no rere blong baptaes, mi save baptaesem ol nara memba blong famli o wet kasem taem papa mo mama i rere? I moa gud blong ol memba blong famli oli baptaes tugeta. Be, sapos sam oli no rere, wanwan long ol memba blong famli i save baptaes sapos oli givim evri raet we i nid blong givim.
?Ol baptaes i save wet kasem taem papa i kasem Aronik Prishud mo hem i mekem ol baptaes ia hemwan? No. Ol brata we oli niu o oli jes kasem baptaes nomo, oli no kasem Aronik Prishud long sem dei we oli kasem baptaes. Fastaem, bisop i nidim blong mekem intaviu wetem hem, mo ol memba blong wod oli mas sastenem hem.
?Mi save tijim mo baptaesem wan man o woman we i risaen long membasip blong Jos o we membasip blong hem oli sakemaot? Ol pipol we oli risaen long Jos membasip blong olgeta o we oli sakemaot membasip blong olgeta oli save kam joen bakegen tru long baptaes mo konfemesen. Sapos oli wantem blong oli tijim olgeta, toktok wetem ol lokol prishud lida mo misin presiden blong yu abaot wanem yu save mekem.
Long wan stek, blong mekem wan i kam joen bakegen tru long baptaes i stap anda long daereksen blong bisop o stek presiden. Long wan misin, blong mekem wan i kam joen bakegen i stap anda long daereksen blong misin presiden. Ol lida ia bae oli kasem gaedens blong Fas Presidensi sapos i nid. Ol misinari oli no kontaktem ol intaviu blong baptaes ia o fulumap Baptaes mo Konfemesen Fom. Be, oli save invaetem wan misinari blong mekem baptaes.
Ol olfala memba blong Jos we oli joen bakegen oli no ol konvet. Be moa long hemia, samtaem ol misinari oli save gat wan impoten wok blong helpem olgeta oli glad long ol blesing blong membasip blong Jos bakegen.
?Wanem i hapen sapos wan man o woman i gat wan deit finis blong baptaes be i no stap kipim evri komitmen blong hem? Wet blong putum wan taem blong baptaes intaviu kasem taem we man o woman ia i kipim ol komitmen mo i mitim ol kwalifikesen blong kasem baptaes. Luk long “Taem I Nid blong Muvum Wan Baptaes” long japta ia.
?Wanem i hapen sapos wan kapol i wantem blong baptaes be tufala i stap laef tugeta? Wan kapol we i stap laef tugeta aotsaed long wan mared loa bitwin wan man mo woman, kapol ia i no save baptaes kasem taem tufala i laef folem loa blong jastiti. Hemia i minim blong nomo stap laef tugeta—nomata olsem wan kapol blong man mo woman o wan sem-seks kapol—o blong wan man mo wan woman, i minim blong mared. I minim tu blong putum long praktis fet long fasin blong sakem sin Doktrin mo Ol Kavenan 20:37. Mared bitwin wan man mo wan woman i impotem tumas long plan blong God.
Kwestin 5 mo 6 long baptaes intaviu i askem sapos wan man o woman i komitim series kraem o i tekem pat long wan abosen (fasin blong spolem bebi taem i stap yet long bel blong mama). Wanem nao bae mi mekem sapos wan i ansa “yes” long wan long tufala kwestin ia? Sapos yu kam blong faenemaot wan long tufala situesen ia long taem blong baptaes intaviu, yu no askem abaot ol ditel. Yu no promes se bae oli apruvum hem blong kasem baptaes. B, talemaot lav blong yu mo wetem kaen fasin eksplenem se wan we i gat moa eksperiens mo save bae i toktok wetem mo helpem man o woman ia.
Sendem wan baptaes intaviu rikwes i go long misin presiden blong yu. Hem o wan long ol kaonsela blong hem bae i mit wetem man o woman ia. Luk long Jeneral Hanbuk, 38.2.8.7 mo 38.2.8.8.
?Bae mi mekem wanem sapos oli bin rekodem wan membasip bifo mi sabmitim Baptaes mo Konfemesen Fom? Kontaktem misin presiden blong yu blong kasem instraksen.
Stadi blong Yuwan
Tingting abaot olsem wanem yu save filim sapos oli intaviu long yu. Tingting long ol kwestin we i stap ia mo rekodem ol filing mo tingting blong yu.
Long lukluk blong yu, ?olsem wanem nao intaviu bae i save mekem yu fraet smol? ?Wanem nao man we i mekem intaviu i mekem o talem blong mekem yu harem gud?
?Olsem wanem nao yu wantem man we i mekem intaviu i mas mekem o talem long yu?
?Olsem wanem nao yu wantem man we i mekem intaviu i ansa taem yu no andastanem o soemaot se yu gat tu tingting o sapos yu talemaot wan series sin?
Pikja
baptaes
Seves blong Baptaes
Seves blong baptaes mo konfemesen i mas stap olsem wan gudfala taem blong glad blong wan niu memba. Taem wan man o woman i mitim ol kwalifikesen blong baptaes, no tekem longfala taem, putum deit blong seves blong baptaes long taem ia nao. Eksplenem wanem i stap long plan mo from wanem. Tokbaot ol klos blong werem, mo tu se bae oli givim ol waet klos blong werem blong baptaes.
Ol seves blong baptaes blong ol konvet oli plan anda long gaedens blong ol bisoprik. Wod misin lida (sapos i gat wan we oli singaotem) o wan memba blong presidensi blong kworom blong ol elda we i lidim misinari wok i mekem plan mo kondaktem ol seves ia. Hem i kodinetem wetem ol ful-taem misinari. Seves blong baptaes i wan seves we i simpol, sot, mo i leftemap spirit blong man.
Invaetem wan memba blong bisoprik, wan memba blong Rilif Sosaeti presidensi, mo wan memba blong presidensi blong kworom blong ol elda (sapos hem i no kondaktem seves) blong atendem seves blong baptaes. Sapos i stret, invaetem ol nara oganaesesen lida, ol lida blong yut, mo ol givhan brata mo sista (sapos oli gat we oli asaenem olgeta). Wok wetem man o woman we i baptaes blong invaetem ol fren mo famli blong atendem seves blong baptaes mo konfemesen.
Tingting blong invaetem ol nara pipol we yu stap tijim olgeta. Ol eksperiens ia bae i helpem olgeta blong filim Spirit mo lanem moa abaot gospel. Afta long seves, folemap mo toktok raon long ol eksperiens blong olgeta mo invaetem olgeta blong oli save tijim olgeta.
Wan seves blong baptaes i save gat ol samting ia:
Wan fas miusik
Wan sot welkam toktok we i kam long prishud lida we i stap kondaktem seves (wan memba blong bisoprik i nid blong prisaed sapos i posibol)
Wan fas hym mo prea
Wan o tu sot toktok long saed blong ol topik blong gospel, olsem baptaes mo presen we i Tabu Spirit.
Wan spesel miusik namba
Baptaes
Wan taem blong stap revren taem we olgeta we oli bin tekpat long baptaes oli go jenis mo werem ol drae klos. (Oli save plei o singsing long ol hym o ol Praemeri singsing long taem ia. O ol misinari oli save givim wan sot gospel presentesen.)
Ol niu memba oli save talem testemoni blong olgeta sapos oli wantem.
Wan las hym mo prea
Las miusik
Sapos yu putum plan blong gat wan baptaes long wan Sandei, jusum wan taem we bae i no go wetem ol nomol miting blong Sandei.
Pikja
konfemesen
Konfemesen
Wan man o woman i kasem odinens blong konfemesen afta hem i bin baptaes (luk long Doktrin mo Ol Kavenan 20:41). Wan niu konvet i kam wan memba blong Jos afta we ol odinens blong baptaes mo konfemesen tugeta i finis mo oli rekodem gud.
Ol konfemesen oli stap anda long daereksen blong bisop. Be, hem i no mekem wan seperet intaviu blong konfemesen.
Wok kolosap wetem bisop mo wod misin lida (sapos oli singaotem wan) blong mekem sua se niu konvet i kasem konfemesen. Konfemesen i mas tekem ples kolosap nomo afta long baptaes, nekis Sandei bae i gud. Be, bisop i save letem konfemesen i tekem ples long taem blong seves blong baptaes, sapos i gat wan nid (luk long Jeneral Hanbuk, 18.8).
Ol konvet, oli stap konfemem olgeta long sakramen miting insaed long wod we oli stap laef long hem. Bisop i invaetem ol misinari elda we oli stap givim seves long wod blong tekem pat long konfemesen. Sapos wan misinari i mekem konfemesen, hem i nidim tu apruvol blong misin presiden (luk long Jeneral Hanbuk, 18.8.1). I gud blong wan long ol memba blong bisoprik i tekem pat.
Komplitim Fom blong Baptaes mo Konfemesen
Hem i impoten blong krietem wan membasip rekod stret afta nomo taem wan man o woman i baptaes mo kasem konfemesen. Tokbaot ol kaen rekod olsem, long dei blong hem, Moronae i raetem se ol niu memba “oli kaontem olgeta wetem ol pipol blong jos ia blong Kraes; mo oli tekem ol nem blong olgeta, blong oli save tingbaot olgeta mo fidim olgeta wetem gudfala toktok blong God, blong holemtaet olgeta i stap long stret rod” (Moronae 6:4)
Taem yu tijim wan we i rere blong kasem baptaes, stat blong fulmap Baptaes mo Konfemesen Fom insaed long Prijim Gospel blong Mi ap. Eksplenem se bae oli yusum fom ia blong krietem wan membasip rekod. Rekod ia bae i karem impoten infomesen abaot ol odinens we man o woman ia i kasem. Taem ol memba blong Jos oli muv, oli sendem membasip rekod blong olgeta i go long niufala wod blong ol lokol lida mo ol memba i save sapotem olgeta.
Stret afta nomo we niu memba i kasem baptaes mo konfem, apdeitem fom ia wetem infomesen abaot wanwan odinens, wetem huia i mekem odinens ia. Taem yu fulmap finisim fom ia, rekodem infomesen ia long Prijim Gospel blong Mi ap mo sabmitim i go long wod klak tru long imel. Stret afta we klak i kasem fom ia, hem i lukluk bak long hem mo krietem wan membasip rekod.
Afta we oli krietem wan membasip rekod, wan klak i rere wan Baptaes mo Konfemesen Setifiket. Setifiket ia, bisop i saenem mo i givim long man, woman o pikinini ia.
Nem mo seks long membasip rekod mo setifiket i mas stret folem bon setifiket, bon setifiket we i stap long sivil rejista, o i folem nem we i stap folem loa.
Stadi blong Yuwan o Kompanion Stadi
Stadi long Mosaea 6:1–3 mo Moronae 6:1–4. ?Ol ves ia oli konek olsem wanem wetem blong stap kipim ol stret rekod blong ol baptaes mo konfemesen?
Afta long Baptaes mo Konfemesen
Gohed blong Givhan
Gohed blong mekem frensip mo sapotem ol niu memba afta oli we oli kasem baptaes mo konfemesen. Helpem olgeta oli atendem jos mo bildim rilesensip wetem ol memba. Ridim Buk blong Momon wetem olgeta, mo helpem olgeta oli serem gospel wetem famli mo fren. Soem smol buk ia blong Kavenan Rod blong Mi long olgeta. Gohed blong yusum Prijim Gospel blong Mi ap blong rekodem progres blong olgeta, olsem atendens blong olgeta blong sakramen miting mo lesen we oli kasem.
Pikja
tu man i stap hag
Afta long konfemesen, tijim ol misinari lesen bakegen. Yu yu lidim tijing. Be, wok tugeta wetem ol wod lida blong mekem se ol misinari o ol nara memba oli tekem pat. Taem yu tij, leftemap tingting blong ol niu memba blong kipim evri komitmen insaed long ol lesen.
Long ol kodinesen miting blong evri wik, kaonsel abaot olsem wanem ol memba oli save sapotem ol niu konvet mo helpem olgeta blong oli stap aktiv long wok blong Jos. Mekem plan blong huia bae i soemaot olgeta long kworom o ol oganaesesen lida. Lidim olsem wanem ol nara memba oli tekem pat taem yu tijim ol lesen bakegen. Askem blong oli singaotem ol givhan brata (mo givhan sista blong ol woman).
Afta we wan man i kasem konfemesen, hem i save kasem Aronik Prishud sapos hem i gat 12 yia o bae i kasem 12 yia long en blong yia ia. Aronik Prishud odinesen i stap anda long daereksen blong bisop (luk long Jeneral Hanbuk, 38.2.9.1).
Sapos i gud, toktok wetem olgeta we yu bin tijim olgeta truaot long laef blong yu. Sapotem olgeta blong kasem evri blesing blong gospel blong Jisas Kraes.
Pikja
Elda Gerrit W. Gong
“Taem yumi kam wetem ol hat we oli gat sore mo spirit we i wantem sakem sin, yumi save luksave voes blong Jisas Kraes mo fulap long andastaning blong Hem blong sevem yumi. Ol tabu odinens oli givimaot kavenan mo ‘paoa we i olsem hemia blong God’ blong mekem insaed blong yumi mo aksen blong yumi i kam tabu [Doktrin mo Ol Kavenan 84:20]. Wetem lav mo kaen fasin blong Hem blong gat longfala tingting, Jos blong Hem i kam Hotel blong yumi” (Gerrit W. Gong, “Rum long Hotel,” Liahona, Mei 2021, 27).
Helpem Ol Niu Memba Oli Tekem Pat long Ol Blesing blong Tempol
Ol niu memba we yia blong olgeta i stret oli save kasem wan tempol rekomen we i letem olgeta blong baptaes blong ol memba blong famli blong olgeta we oli ded finis (luk long Jeneral Hanbuk, 26.4.2). Oli kasem rekomen ia long bisop. Leftemap tingting mo helpem ol niu memba blong kasem wan tempol rekomen folem stret taem blong save kasem wan. Sapos wan tempol i kolosap, tingting blong givim wan invitesen long wan taem blong ol niu memba blong mekem ol baptaes blong ol bubu we oli ded finis.
Long ol kodinesen miting blong evri wik, mekem plan blong huia nao bae i soemaot ol niu memba long tempol mo famli histri lida. Lida ia i save helpem olgeta i rere blong kasem ol blesing blong tempol taem oli stap mekem ol kavenan blong olgetawan.
Ol Aedia blong Stadi mo Yusum
Stadi blong Yuwan
Mekem lis blong ol jalenj we wan we i blong kasem baptaes i save kasem. ?From wanem hem i impoten blong wan man o woman i filim lav mo frensip blong ol memba blong Jos?
Stadi long Moronae 6 mo Doktrin mo Ol Kavenan 20:68–69. ?Wanem nao yu save lanem aot long ol ves ia we i abaot helpem ol pipol oli rere blong kasem baptaes mo konfemesen? Raetemdaon wanem we yu lanem. Serem ol tingting blong yu wetem kompanion blong yu long taem blong kompanion stadi.
Kompanion Stadi mo Jenjenisim Kompanion
Presiden Henry B. Eyring i eksplenem from wanem ol gospel standet oli impoten. Toktokraon abaot ol kaonsel ia. ?Olsem wanem nao yu save leftemap tingting blong ol pipol blong oli gat strong tingting blong mitim ol standet ia?
“Lod i putum ol standet blong Hem blong Hem i save blesem yumi. Tingbaot ol blesing ia: Hem i promesem olgeta we oli mitim ol standet ia, blong kasem help blong Tabu Spirit. Hem i promesem pis blong yuwan. Hem i promesem janis blong kasem ol tabu odinens insaed long haos blong Hem. Mo Hem i promesem olgeta we oli stanap strong blong laef folem ol standet blong Hem se bae oli kasem laef we i no save finis. …
“From se yumi lavem olgeta we yumi stap givim seves long olgeta, evriwan long yumi i wantaem blong mekem i gud moa blong leftemap ol pikinini blong Papa blong yumi long Heven i go long fet mo fasin blong stap klin gud we oli nidim blong kasem evri blesing blong Lod. …
“… Yu stat wetem wan fasin blong holemtaet ol standet blong Lod folem wan klia fasin we i nogat tingting blong talem sore from wan samting. Mo moa wol ia i stap gowe long ol standet ia mo stap jikim olgeta, bae yumi mas stanap strong blong laef folem olgeta” (“Standards of Worthiness,” First Worldwide Leadership Training Meeting, Jan. 2003, 10–11).
Lukluk bak long ol baptaes intaviu kwestin. Tingting blong olsem wanem yu save gat kontrol long ol situesen olsem olgeta we i stap ia:
Man o woman ia i no bin talem long yu se hem i stap pas long kot from wan kraem.
Man o woman ia i no kasem wan ansa blong prea se Josef Smit i wan profet.
Man o woman ia i smok long wan sigaret tu(2) dei i pas.
Man o woman ia i no sua se i kasem wan ansa long ol prea blong hem.
Ol famli oli filim se ol fren oli fos tumas mekem se oli no save se oli rere blong baptaes o no.
Luklukbak long Baptaes mo Konfemesen Fom. ?From wanem ol infomesen we yu givim oli mas stret mo i finis gud?
Distrik Kaonsel, Ol Son Konfrens, mo Misin Lidasip Kaonsel
Luklukbak long from wanem baptaes intaviu i impoten. Tokbaot olsem wanem ol misinari oli save helpem ol pipol blong rere from intaviu.
Tokbaot olsem wanem blong yusum ol seves blong baptaes mo ol konfemesen olsem ol janis blong faenem ol man.
Ol Misin Lida mo Ol Misin Kaonsela
Wok wetem ol lokol prishud mo ol oganaesesen lida blong mekem sua se oli stap yusum gud Kavenan Rod Progres ripot.
Tijim ol distrik lida, ol son lida, ol sista trening lida olsem wanem blong mekem rere ol pipol blong kasem baptaes intaviu. Invaetem olgeta blong trenem ol nara misinari blong mekem rere ol pipol from intaviu ia.
Tijim ol distrik mo son lida olsem wanem blong kondaktem ol baptaes intaviu.
Tijim olsem wanem blong ansa long wan baptaes intaviu taem wan man o woman i talemaot se hem i mekem wan sin we i bigwan tumas.
Sapos i posibol atendem ol baptaes seves blong ol niu memba. Toktok long ol niu memba mo lanem abaot ol eksperiens blong olgeta abaot olsem wanem laef blong olgeta i jenis i kam long Kraes. Serem wanem yu lanem wetem kompanion blong yu mo wetem ol misinari.