Iralaud 3: Padahk 2—Sapwellimen Sahm Nanleng Koasoandi en Komouro
“Iralaud 3: Padahk 2—Sapwellimen Sahm Nanleng Koasoandi en Komour,” Kalohngki ahi Rongamwahuo: Mehn Kaweid en Ehukihwei Rongaamwahu en Sises Krais (2023)
“Iralaud 3: Padahk 2,” Padahki ahi Rongamwahu
Iralaud 3: Padahk 2
Sapwellimen Sahm Nanleng Koaosandi en Komouro
Kilel
Sansal Takai en Kristus
Aramas kak Medemedewe
Ia kahrepen mour wet?
Ia wasa I kohsang ie?
Mie Koht emen me kesempwal kinie? Ia mwomwen ahi kak kehn me E kesempwal kinie?
Ia mwomwen ahi kak kamehlele Koht ni soahng suwed tohto wihwiawi?
Dahme kahrehda mour kin apwal ekei pak? Ia mwomwen ahi kak diar kehlepei nan soangen ansou duwehte mepwukat?
Ia mwomwen ahi kak wiahla aramas mwahula men?
Dahme pahn wiawi mwurin ahi pahn mehla?
Rongamwahu kopwurpwurdo en Sises Krais kin sewesei kitail en sapengala peidek kesempwal akan en mour. Pwehki Rongamwahuo, kitail esehla udahn ihs kitail oh dahme kitail kak wiahla ni atail wia Sapwellimen Koht serihkan. Rongamwahuo kin kiong kitail koapwoaroapwoar oh seweseikitail en diarada meleilei, peren, oh kahrepeh kan. Momourki rongamwahuo kin seweseikitail en keirda oh diar kehlapatail ansou kitail kin sohpai kasongsong kan en mourwet.
Koht kupwurki dahme keieu mwahu ong Sapwellime serih kan oh inengieng en kiong kitail Sapwellime kapai laud kan, me iei mour poatoapoat oh mour soutuk (kilang Moses 1:39; Doctrine and Covenants 14:7). Pwehki Ah ketin poakohng kitail, E ketin wiahda koasoandi ehu ong kitail en alehdi kapai pwukat. Nan pwuhk sarawi kan, e kahdaneki koasoandi en komour, koasoandi lap en peren, oh koasoandi en tohnmeteio (kilang Alma 42:5, 8, 11, 13, 15, 16, 31).
Nan Sapwellimen Koht koasoandio, emen emen kitail momour mwohn mourwet, ipwidi, nan mourwet, mehla, oh mour mwurin mehla. Koht ketin kaunopada soahng koaros me kitail anahne nan seiloak wet pwe mwurin atail pahn mehla, kitail kak oudahte pwurala Reh oh alehda popohl unseko.
Sises Krais iei me poahsoan en Sapwelllimen Koht koasoandi wet. Sang ni Sapwellime Tomwo oh Iasadao, Sises ketin kamangaiala ong emen emen kitail en alehda mour unsek oh mour soutuk.
Erein atail momour pohn sampah, kitail sohte taman atail mour mwohn mourwet. Kitail pil sohte wehwehki unsek duwen mour mwurin mehla. Ahpw, Koht ketin kasalehiong kitailehr soahng mehlel tohto me pali pwukat en atail seiloak en mour poatoapoat. Mehlel pwukat kiong kitail mehn kamarain me itarong kitail en wewekihla kahrepen mour, en alehda popohlo, oh koapworopworki me soahng mwahu kan pahn kohdo. Mehn kamarain wet wia mehn kaweid kesempwal sarawi ehu ni atail mihmi sampah wet.
Iren kaweid kan ohng Padahk
Pali wet mie mehn sawas pwehn kaunop uhk ohng padahk. E pil iangahki karasepen peidek kan oh luhk kan me ke kak doadoahki.
Ni ahmw pahn kaunopadahn padahk, kapakapki oh medewe mwahu dahme arail irair oh anahn en pali ngenirail kan. Medewehda dahme udahn pahn kak sawas pwe ken padahki. Kaunopada pwe ken kak kawewehda lepin lokaiahkan me aramas akan sohte wewehki. Koasoanehdi iawen ansou me ke pahn ahneki, tamataman kihda kaweid mwotomwot.
Pilada iren pwuhk sarawih kan me ke pahn doadoahki ansoun padahk. “{Poahsoan en Padahk” iren mehn kaskuhl wet iangahki tohto iren pwuhk sarawi me kak wia mehn sawas.
Medewe mwahu mehnia peidek ke pahn idek ansou me ke padahk. Koasoanehdi luhk kan ke pahn kapahwei me pahn kangoange emen emen aramas en wia.
Kawewehda mwahu Sapwellimen Koht inou en kapai kan, oh ehukiong irail ahmw kadedeh me pid dahme ke padahki.
Kilel
misineri kan padahk ong peneinei
Dahme Ke Kak Padahkiheng Aramas nan erein minit 15–25 [eisek limau lel rieisek limau]
Pilada ehu de ekei ire sang nan oaralap en koasoandi en komouro pwehn padahki. Poahsoan en padahk ong ehu ehu oaralap miehier mwurin dahme koasoandi.
Mour mwohn Mourwet: Sapwellimen Koht Kahrepe oh Koasoandi ong Kitail
Kitail koaros wia sapwellimen Koht seri ngehn kei. E ketin kapikada emen emen kitail duwehte Pein Ih.
Kitail kin kousoan rehn Koht mwohn atail ipwidiong sampah wet. Kitail wia kisehn Sapwellime peneinei. E ketin mwangih oh poakong emen emen kitail.
Koht ketin ketkihdo koasoandi ehu ohng atail peren oh keirda nan mourwet oh nan mour soutuk.
Nan atail mour mwohn mourwet, kitail piladahr en idawehn Saapwellimen Koht koasoandio. Met wehwehki kitail kohdohng sampah pwe kitail en kak alehda ehu dake nan atail keirda kolahng mour soutik.
Sises Krais iei me poahsoan en Sapwelllimen Koht koasoandi wet. E ketin kamangaiala kitail en kak ahneki mour kohkohlahte oh mour soutik.
Kepikipiko
Pahn Sapwellimen Koht kaweid, Sises Krais kapikadahr sampah.
Pwupwulahn Adam oh Ihp
Adam oh Ihp iei tepin Sapwellimen Koht seri ngehn me kohdo sampah. Koht ketin kapikadahr palin wararahkan oh koasoneiradiong nan Mwetuwel en Ihden.
Adam oh Ihp wiahdahr dihp, ira pokousang nan mwetuwelo, oh katohrohrasangehr mwohn Koht. Kemwekid wet kahdaniki Pwupwilao.
Mwurin Pwupwilao, Adam oh Ihp kakehr mehla. Ni ara aledahr palinwar, ira kakehr esehla, kekeirda, oh naineki seri. Ira pil lelohngehr pahtou, dihp, oh mehla.
Nan Sapwellimen Koht koasoandio, kitail anahne kohdo sampah pwehn alehda palinwar, kaskuhl, oh keirda.
Pohn sampah, kitail esehla weweid wei ni pwoson. Ahpw, Samatail Nanleng sohte keseikitaila. E ketkihdohr kisakis tohto oh mehn kaweid kan pwehn seweseikitail pwurala Reh.
Tomwpen Sises Krais
Kitail koaros kin dihp, oh kitail koaros pahn mehla. Pwehki Koht ketin poakong kitail, E ketikihdohr Sapwellime Iehros, Sises Krais, pohn sampah pwehn doareikitail sang dihp oh mehla.
Pwehki sapwellimen Sises tomwpen tohnmetei, kitail kak ale mahk oh mwakelekelda sang dipatail kan. Atail mohngiong kan kak wekila oh mwamwahula sang ni atail koluhla. Met kamangaieng kitail en pwurala rehn Koht oh ahniki popohl unsek.
Sises Krais kin ketkihdo koaloalamwahu, koapwoaroapwoar, oh kamwahula. Sapwellime tomwpen tohnmeteio wia kasalepe kaselel en Sapwellime limpoak. Mehkoaros me sapahrek nan mour kak kapwungpwungla sang ni Tomwpen Sises Krais.
Sapwen Ngehn
Ni ansou me palinwaratail kin mehla, palingehnitail kin wie momourte nan sapwen ngehn. E wiahte wasahn keiru ehu en esehla oh kaunopada mwohn Iasadao.
Rongamwahu en Sises Krais pil kin kalohk nan sapwen ngehno, oh kitail kak doula kekeirda oh mwamwahula.
Iasadao, Komouro, oh Lapalapala
Mwurin atail ansou nan sapwen ngehn, Iasadao me wia ehu kahk ong nan seiloak en mour soutuk.
Iasadao wia kapwurepenehn pali ngehn oh paliwaratail. Emen emen kitail pahn iasada oh alehda paliwar unsek. Kitail pahn momour kokolahte. Met kak wiawi sang ni sapwellimen Sounkomouro Tomwo oh Iasadao.
Kadeik oh Wehi kan en Klohri
Ansou me kitail pahn iasada, Sises Krais me pahn wia atail sounkopwung. Me malaulau me sohte pahn iang alahlda, sapwellimen Koht seri koaros pahn mie dewarail nan wehin klohri kan.
Mendahte kitail koaros pahn iasada, kitail koaros sohte pahn ale soangen klohri soutik ehute. Sises pahn ketin kadeik kitail sang ni atail pwoson, doadoahk kan, oh koluhla nan mourwet oh pil nan sapwen ngehn. Kitail kak pwurala oh kousoanla rehn Koht ma kitail pwoson.
Peidek kan me Ke Kak Idek rehn Aramas
Peidek pwukat wia karasepen dahme ke kak idek rehn aramas. Peidek pwukat kak sewese ahmw koasoakoasoai kan en katapan oh ken kak wehwehki ahn aramaso anahn kan oh lamalam.
Dahme ke pehm me wia kahrepen mour?
Dahme kin kiong uhk peren?
Soangen songosong dah me ke men Koht en sewesehkin uhk?
Dahme ke esehlahr sang ni songosong kan me ke sohpaier?
Dahme ke ese me pid duwen Sises? Ia mwomwen Sapwellime mour oh pwukoah kesempwal ah doadoahk nan ahmw mour?
Luhk kan me Ke Anahne Kihla
Ke kak peki rehn Koht ni kapakap en seweseiuk ken ese ma dahme se padahki me mehlel? (Kilang “Padahk Loal: Kapakap” Ni lahs en iralaud en mehn kaskuhl 1.)
Ke kak iang kit sarawi Rahnsarawiet ken esehla pil ekei me pid dahme se padahkiher?
Ke kak wadek Pwuhk en Mormon oh kapakapki ken kak ese me iei e wia mahsen en Koht? (Ke kak kaweidki ekei iralaud de iretikitik kan.)
Koht me wia Pahpahn ngenitail kan. Kitail udahn Sapwellime seri, kepikipikda duwehte Ih. Emen emen kitail mie atail sohso sarawi ni duwen atail wia seri en Koht. Marain wet kak sewesei kitail ansou apwal kan oh kak kamarainih kitail en wia wen atail kak koaros.
Kitail kousoanehr rehn Koht ni atail wia Sapwellime seri ngehn kei mwohn atail ipwidi sampah. Kitail wia kisehn Sapwellime peneinei.
Kilel
Preseden M. Russell Ballard
“Met wia kilel sansal kesempwal ehu me kitail koaros ehukipene ansou wet oh pil pahn kokolahte, ehu me sohte pahn kak salongasang kitail, oh ehu me kitail udahn anahne kapingki. Me iei ke wia oh erein pahn wia sapwellimen Koht pwutak oh serepein me tepsang ngehn oh pil pahn poatoapoat kokolahte.
“… Esehla me mehlel wet—inenen wehwehki oh alehda—pahn wekidala mour. E kiheng uhk kilel kesempwal sansal ehu me sohte emen kak kihsang uhk. Ahpw me laudsang mwo, e anahne kiong uhk pepehm laud ehu en kesempwal oh ese me ke wia sapwellimen Koht. Ni imwailahu, e pahn kiong uhk soaromw, lapalap, oh pereperenki kahrepen mourwet” (M. Russell Ballard, “Sapwellimen Sahm Nanleng Seri” [Brigham Young University devotional, Mar. 3, 2020], 2, speeches.byu.edu).
Kitail Piladahr en Kohdo Sampah
Samatail Nanleng poakong kitail oh kupwurki kitail en duwehla Ih. E ketin lapalap oh kahlepe me lingan.
Atail mour mwohn mourwet, kitail esehla me mie sapwellimen Koht koasoandi ong kitail pwe kitail en kak duwehla Ih. Ehu kisehn Sapwellime koasoandio iei me kitail pahn mweselsang nanleng oh kohdo sampah pwe kitail en alehda paliwaratail kan. Kitail pil anahne koahiekla oh kalaudehla atail pwoson erein ansou me kitail sohte mihmi rehn Koht. Kitail pahn sohte tamataman atail mihmi rehn Koht. Ahpw, E pahn ketkiong kitail dahme kitail anahne pwe kitail en kak pwurala kousoanla Reh.
Saledek en pilipil, de saledek oh kak en pilada wia ire kesempwal ong kitail nan sapwellimen Koht koasoandio. Atail mour mwohn mourwet, emen emen kitail pilada en idawehn sapwellimen Koht koasoandio oh kohdo sampah pwe kitail en alehdi ehu dake nan atail keirda soutik. Kitail esehier me ni atail mihmi wasaht, soahng tohto me kapw kitail anahne wia pwe kitail en keirda oh diarada popohl. Kitail esehier me kitail pahn sohpai kailok. Kitail pahn lelohng kasongsong, kahpwal, weirek, oh mehla.
Ni atail pilada kohdo sampah, kitail likih sapwellimen Koht limpoak oh sawas. Kitail likiher Sapwellime koasoandi ong atail mour.
Sahm Nanleng ketin piladahr Sises Krais en wia atail Sounkomour.
Sises Krais iei me poahsoan en Sapwelllimen Koht koasoandi wet. Mwohn atail kohdo sampah, kitail esehier me kitail sohte kak pein pwurala rehn Koht. Sahm Nanleng ketin pilada Sises Krais, Sapwellime Iehroso, pwe en kamangaiala kitail en kak pwurala Reh oh ahneki mour soutuk.
Sises ketin pwungkidahr. E ketin pwungkihda en kohdo sampah oh doaroikitaila sang ni Sapwellime tomw en tohnmeteio. Sapwellime Tomwo oh Iasadao me karehda sapwellimen Koht kahrepe kan ah pweida rehtail.
Mwesel sang nan Mwetuwel en Ihden, sang Sosep Brickey
Pwupwilahn Adam oh Ihp
Mwohn Pwupwilao
Adam oh Ihp me wia tepin sapwellimen Koht seri ngehn kan me kohdo sampah. Koht ketin kapikada paliwararahkan me duwehte pein Ih oh koasoneirahdi nan Mwetuwel en Ihden. Nan mwetuwelo ira me pwung, oh Koht ketkiong ira ara anahn akan.
Ansou me Adam oh Ihp mihmi nan mwetuwelo, Koht ketin kehkehlik ohng ira en dehr kang wahntuhkehn kehsehki aramas dahme mwahu oh dahme suwed. Ma ira peikiong kosonned wet, ira kak mihmi tohr nan mwetuwelo. Ahpw, ira sohte pahn kak keirda sang ni ara pahn esehla sang soahng kan me kin uhweng oh kasongsong kan en mourwet. Ira sohte pahn kak diar popohl pwe ira sohte kak kehn lokolok oh medek.
Sehdan kasongosongih Adam oh Ihp en kang wahntuhke keinepwio, oh ira pilada en wia met. Pwehki pilipil wet, ira pokous sang nan mwetuwelo oh katohrohrasang rehn Koht Kemwekid wet kahdaniki Pwupwilao.
Mwurin Pwupwilao
Mwurin Pwupwilao, Adam oh Ihp alehda palinwar. Ni ara solahr mihmi nan irair en mwakelekel, ira wehwehkilahr oh lelohngehr dahme mwahu oh suwed. Ira kakehr doadoahki ara saledek en pilipil en pilada ehu rehra. Pwehki Adam oh Ihp ara sohpaier kailok oh kasongsong kan, ira kakehr esehla oh keirda. Pwehki ara kenehr paht, ira pil kakehr kehn popohl. (Kilang 2 Nihpai 2:22–25.)
Mendahte ara kahpwal akan, Adam oh Ihp ahneki pepehm me kohdohng nan mourwet wia kapai laud ehu. Ehu kapai iei ira kakehr naineki seri. Met wiadahr ahl pwe sapwellimen Koht seri ngehn kan en ipwidi sampah oh alehda paliwararail kan.
Me pid kapai pwukat sang ni Pwupwilao, Adam oh Ihp perenkihda. Ihp koasoia, “Ma kita sohte wiahda dihp kita sohte kak naineki [seri], oh sohte pahn ese dahme mwahu oh suwed, oh popohl en komourpatahu, oh mour soutuk me Koht ketkiong irail me peik kan” (Moses 5:11; pil kilang ire tikitik 10).
Oaralap kan en Rongamwahu: “Pwupwilahn Adam oh Ihp,” “Saledek en Pilipil oh Pwukoah”
Atail Mour Pohn Sampah
Aramas tohto kin medemedewe, “Dahme I mihmihki pohn sampah?” Atail mour pohn sampah wia pali kesempwal ehu ong sapwelimen Koht pilahn en peren ansouet oh pil kohkohla. Atail kahrepe keieu laud iei kitail en kaunopada pwurala rehn Koht oh ahniki popohl unsek. Dahme sansal pah iei ekei ahl me mour en sampah kin kaunopadahng kitail.
Kilel
kisin pwutak kokouruhr
Alehda Paliwar
Ehu kahrepen atail kohdo sampah iei kitail en alehda paliwar me pali ngenitail pahn kousoan loale. Paliwaratail kat me sarawi, e wia sapwellimen Koht kepikipik kaselel. Pwehki paliwaratail kat, kitail kak wia, esehla, oh wia soahng tohto me ngehnitail sohte kak wia. Kitail kak keirda ni soangen ahl ekei me kitail sohte kak ni atail wia ngehn kei.
Pwehki paliwaratail kat momour sampah, kitail lelohng medek, soumwahu, oh soangen songosong teikan. Soahng pwukat koaros kak sewesei kitail en ahneki kanengamah, loalamwahu, oh soahng sarawi kan me sang rehn Kauno. Re kak wia kisehn atail ahl en diarada popohl. Pilada me pwungo ansou me apwal en wia iei ansou me pwoson, koapwoaroapwoar, oh limpoak unsek kin wiahla kisehn sohangkan me kasalehda soangen aramas dah kitail.
Esehla Doadoahki ahmw Saledek en Pilipil ni pwung.
Ehu kahrepen mour wet iei kitail en esehla doadoahki ni pwung atail saledek en pilipil—en pilada dahme pwung. Esehla doadoahki atail saledek en pilipil ni pwung kesempwal ohng kitail en kak duwehla Koht.
Sahm Nanleng oh Sises Krais padahkiong kitail dahme pwung oh kiong kitail kosonned kan pwehn kaweid kitail ong peren poatopoat. Sehdan kin song kitail pwe kitail en kin wiahda sapwung, men kitail en duwehte ih me sarwaru. Kitail kin sohpai peirin nan pwungen mwahu oh suwed, me anahn ohng kitail en esehla doadoahki atail saledek en pilipil (kilang 2 Nipahi 2:11)
Ni atail kin peikiong Koht, kitail kin keirda oh alehdi Sapwellime kapai kan me E inoukiong kitail. Ma kitail kin sapekiong, kitail kin kadohwanla pein kitail sang Ih oh alehdi wahn dipatail kan. Mendahte e mwomwen me e sohte kin wiawi, dihp udahn pahn kahlwaikitail ong nan pahtou. Pak tohto kapai en peik—oh pweinen atail wiewia suwed kan—sohte kin mwadang sansalada de sansalla liki. Ahpw met mehlel, pwe Koht me kin pwung ansou koaros.
Mendahte ma kitail wia dahme keieu mwahu, kitail koaros dipan oh “dohsangehr sapwellimen Koht lingan” (Rom 3:23). Ni atail ese met, Sahm Nanleng kaunopadahr ahl ehu ong kitail en koluhla pwe kitail en kak pwurala Reh.
Koluhla kiong kitail manaman en atail Sounkomouro, Sises Krais, nan atail mour (tehk Ilemen 5:11). Ni atail pahn koluhla, kitail kin mwakelekelada sang ni tomw en tohnmetei en Sises Krais oh kisakis en Ngehn Sarawio (tehk 3 Nihpai 27:16–20). Sang ni koluhlahu, kitail kin diarada popohl. Ahl en pwuralahng Sahm Nanleng ritdahng kitailehr, pwehki Eh ketin mahkong kitail. (Kilang “Koluhla” nan mehn kaskuhl 3.)
Esehla Aluhki Pwoson
Ehu kahrepen mourwet iei en kalaudehla koahiek me pahn kak kohdo sangete atail katorohr sang Sahm Nanlengo. Pwehki atail sohte kin kilang Ih, kitail anahne esehla aluhki atail pwoson (tehk 2 Korint 5:6–7).
E sohte mweidohng kitail en kelehpw nan seiloak wet. E ketkiong kitail Ngehn Sarawio en kaweid, kakehlail, oh kasarawih kitailla. E pil ketkidohng kitail pwuhk sarawi kan, soukohp kan, kapakap, oh rongamwahu en Sises Krais.
Ire koaros en atail mour en sampah me kitail pahn esehla—popohl oh pahtou kan, pweida oh pil pwupwula kan—kak seweseikitail en keirda ni atail pahn kaunopada en pwurala rehn Koht.
Oaralap kan en Padahk: “Mour en sampah,” “Kahpwal”
Tomw en Sises Krais
Pwehki Pwupwilahn Adam Oh Ihp, kitail koaros wiadahr dihp oh pahn mehla. Kitail sohte kak pein powehdi dihp oh mehla. Nan sapwellimen Sahmo koasoandi en komour, E ketkiong kitailehr ahl en powehdi soahng kan me pahn karehda atail Pwupwila pwe kitail en kak pwurala Reh. Mwohn sampah ah kepikipikda, Eh ketin pilada Sises Krais pwehn wia atail Sounkomour oh Soundoar.
Sises Krais kelehpw kak doareikitail sang dihp oh mehla. Ih iei Sapwellimen Koht. Ah mour e sohte wiahda dihp, E ketin peikiong Semeo ni unsek. E ketin kaunopadahr oh inengiong en kapwaiada kupwuren Semeo.
Sapwellimen Sises Krais Tomwo iangahki Ah ketin lokolok nan Ketsemeni, Sapwellime lokolok oh pwoula ni lopwuo, oh Sapwellime Iasadao. E ketin lelohng lokolok laud—me inenen laud me kahrehda nta keredi sang nan pwoaren kili koaros (kilang Doctrine and Covenants 19:18).
Sapwellimen Sises Krais Tomwo me wia kemwekid keiou kopwuriamwei nan koaros poadoapoad en aramas. Sang ni Sapwellime tomw en tohnmeteio, Sises me karehda sapwellimen Sahmo koasoandio pweida. Kitail sohte kak ale sawas ma sohte Tomw en Sises Kraiso pwehki kitail sohte kak pein doareikitail sang dihp oh mehla (kilang Alma 22:12–15).
Ni ansou me Sises ketin pwoula pohn lohpwuo, Sapwellime ngehn tohrohrla sang kahlepeo. Ni rahn kesiluh, Sapwellime Ngehn oh Kahlepe pwurpene, oh sohte pahn pwurehng tohrohr peseng. E ketin pwarohng diren aramas, kasalehiong irail me kahlepe uduk oh nta me sohte pahn pwurehng mehla. Kopwurupwurpenehn paliwar oh pali ngehn iei me kahdaniki Iasada.
Ni atail ahneki paliwar, emen emen kitail pahn mehla. Ahpw, pwehki Sises Krais powehdier mehla, aramas koaros me ipwidiong sampah pahn iasada. Iasadao wia kisakis ehu sang rehn Koht ong kitail koaros, me kohsang ni sapwellimen Sounkomouro mahk oh kalahngan en soundoaro. Paliwar oh palingehnitail kan koaros pahn pwurpene, oh emen emen kitail pahn iasadahng nan paliwar me unsek, oh momour kokolahte. Ma sohte Sises Krais, mehla pahn kawuhdi koapworopwor koaros me kitail kak pwurala rehn Sahm Nanleng ehu rahn(tehk 2 Nipahi 9:8–12).
Sises Ketin Kamangaila pwe Kitail en Mwakelekelada sang Dipatail kan.
Kitail en kak esehla koapworopwor me kitail pahn alehsang rehn Krais, kitail anahne esehla kosonnedo. Kosonned wet sohte pahn wekila ihme pahn kasalehiong kitail wahn atail wiewia kan. Peikiong Koht kin wahdo wah mwahu, oh sapeik kin wahdo wah suwed. (Kilang Alma 42:14–18.) Ansou me kitail wiahda dihp, palingehnitail kin saminla, oh sohte mehkot samin kak kousoan rehn Koht (kilang 3 Nipahi 27:19).
Kilel
Sises Loulou nan Ketsemeni, sang Harry Anderson
Nan sapwellimen Sises Krais tomw en tohnmeteio, E welian kitaildi, lokolok, oh pwainla pweinen dipatail kan (kilang 3 Nihpai 27:16–20). Sapwellimen Koht koasoandi ketkiong Sises Krais manaman en welian kitaildi—kesinenda nan pwungen kitail oh kosonnedo (kilang Mosaia15:9). Pwehki sapwellimen Sises tomw en tohnmeteio, E kak ukihda Sapwellime pwuhng en mahk ong kitail ni atail pahn doadoahki pwoson oh koluhla (kilang Moronai 7:27; Doctrine and Covenants 45:3–5). “Ahpw mahko kak apwaliala koasoandien kosonnedo, oh pwoaleh kin [kitail] pene limeh kan” (Alma 34:16).
Sangete ni kisakis en sapwellimen Sounkomouro Tomwo oh atail koluhla me kitail kak pwurkihla oh kousoanla rehn Koht. Ni atail pahn koluhla, kitail pahn ale mahk oh palingehnitail pahn mwakelekelada. Kitail maiaudahsangehr katoutoupen dipatail kan. Olahn palingehnitail kan mwahulahr. Kitail direkilahr popohl (kilang Alma 36:24).
Mendahte kitail sohte unsek oh pahn pwurehng pwupwudi, mihmiete kalahngan, limpoak, oh mahk rehn Sises Krais laud sang sou pweida, sapwung kan, de dihp me mihmi loalatail. Ansou koaros Koht kin onohnop oh men pwoalei kitail pene ni ansou me kitail kin sohpeilahng Ih oh koluhla (kilang Luk 15:11–32). Sohte mehkot oh sohte emen “kak katohreikitail sang limpoak en Koht, me mihmi rehn Sises Krais atail Kaun” (Rom 8:39).
Oaralap kan en Rongamwahu: “Sises Krais,” “Tomwpen Sises Krais,” “Kalahngano”
Kilel
peneinei pwarek sousou
Sapwen Ngehn
Aramas tohto kin medewe, “Dahme pahn wiawi mwurin ahi mehla?” Koasoandi en komouro kiong kitail ekei pasapeng kesempwal ong peidek wet.
Mehla wia kisehn sapwellimen Koht “koasoandi en mahk” ong kitail (2 Nipahi 9:6). Kaidehn e wia ididi en atail seiloak dohng pohn sampah, ahpw mehla wia ehu kahk ong mour poatoapoat. Pwehn duwehla Koht, kitail udahn pahn keid nan ahl en mehla oh mwuri kitail ahpw pahn iasada, ohng paliwar unsek.
Ni ansou me palinwaratail kin mehla, palingehnitail kin wie momourte nan sapwen ngehn. Sampah wet wiahte sapwen keiru wasahn esehla oh kaunopada mwohn atail pahn Iasada oh Kadeik. Atail marain me sang mourwet pahn mihmite rehtail.
Nan sapwen ngehn aramas akan me alehda oh momourki rongamwahu en Sises Krais “pahn kohla nan wasa kaperen, me kahdaneki paradais” (Alma 40:12). Seri tikitik kan pahn pil kohla nan paradais ansou me re pahn mehla.
Ngehn akan nan paradais pahn saledek sang arail kapwunod oh kahpwal akan. Irail pahn pousehlahte kekeirdahn pali ngehnirail, wihwia sapwellimen Kauno doadoahk oh sewsewese mehteikan. Irail pahn padahkiong rongamwahuo irail kan me sohte alehda ansou me irail mihmi nan mourwet (tehk Doctrine and Covenants 138:32–37, 57–59).
Nan sapwen ngehn, aramas me sohte alehda rongamwahuo pohn sampah, de irail kan me pilada en dehr idawehn kosonned akan, arail esehla pahn tikitik (kilang Doctrine and Covenants 138:6–37; Alma 40:6–14). Ahpw, pwehki Koht me pwung oh mahk, irail pahn ahneki ansou mwahu en rong rongamwahu en Sises Krais. Me irail pahn alehda oh koluhla, irail pahn saledek sang diparail kan (tehk Doctrine and Covenants 138:58; pil kilang 138:31–35; 128:22). Irail pahn pidolong nan wasa meleilei nan paradais. Irail pahn alehdi ehu wasa nan wein klohri sang ni arail pilipil kan me irail wiahdahr ni arail momour oh nan sapwen ngehn.
Kitail pahn mihmi nan sapwen ngehn lao lel ansoun iasada.
Sapwellimen Koht koasoandio kamangaiong kitail en keirda oh alehda mour soutuk. Mwurin atail ansou nan sapwen ngehn, Iasadao wia ehu kahk en keirda.
Iasadao me pahn kapwurepene paliwaratail oh palingehnitail. Emen emen kitail pahn iasada. Met kak wiawi sang ni sapwellimen Sounkomouro Tomwo oh Iasadao. (KIlang Alma 11:42–44.)
Ansou me kitail iasada, kitail pahn iasadahng paliwar unsek, saledek sang medek oh soumwahu. Kitail pahn mihmi nan paliwar ehu, me pahn momour kokolahte.
Komour
Pwehki kitail koaros pahn iasada, kitail koaros pahn saledekla—de alehda komour— sang mehlahn paliwar. Kisakis wet kodohng kitail sang ni kalahngan en Sises Krais.
Kitail pil kak saledekla—de alehda komouro—sang ni kalokolok akan me wia anahnepen kosonned en pwungo. Kisakis wet pil kamangaila sang ni kalahngan oh mahk en Sises Krais ma kitail koluhla. (Kilang Alma 42:13–15, 21–25.)
Lapalapala
Lapalapala, de mour soutuk, iei wasa me keieu ileile ohng kaperen oh lingan nan wein Koht. Lapalapala iei kisakis en inou ehu. Preseden Rusell M. Nelson padahki, “Irail kan me kak alehdi soahng pwukat anahne pwoson Kauno, koluhla, pepdais, alehda kisakis en Ngehn Sarawi, oh kolokol tiahk sarawi oh inou sarawi kan en tehnpas sarawi” (“Salvation and Exaltation,” Ensign de Liahona, May 2008, 9).
Lapalapala wehwehki koukousoan rehn Koht kokolahte ni duwen peneinei soutik kan. Kitail anahne ese Koht oh Sises Krais, pwehn duwehla Ira, oh esehla soangen mour me Ira pereniki.
Ketemen: Ansou me ke pahn tepin padahki wehi kan en klohri, padahkihte mehkot me mengei ong en aramas anahn oh wehwe.
Ansou me kitail pahn iasada, Sises Krais me pahn wia atail sounkopwung me pwung oh mahk. Me malaulau me sohte pahn iang, emen emen kitail pahn alehdi dewe nan wehi en klohri. Mendahte kitail koaros pahn iasada, kitail sohte pahn kohla nan wehin klohri ehute (kilang Doctrine and Covenants 88:22–24, 29–34; 130:20–21; 132:5).
Aramas akan me sohte alehdi ansou mwahu en wehwehkihla mehlel oh peikiong sapwellimen Koht kosonned akan ni ansou re momour sampah pahn mie arail ansou mwahu me pahn kohieng irail nan sapwen ngehn. Sises pahn kadeik emen emen aramas sang ni wen arail pwoson, doadoahk, ineng kan, oh koluhla nan mour wet oh pil nan sapwen ngehn (kilang Doctrine and Covenants 138:32–34, 57–59).
Pwuhk Sarawi kan padahki duwen wehin klohri kan en selesdiel, deresdriel, oh delesdiel. Ehu ehu mepwukat wia kisehn sapwellimen Koht limpoak, pwung, oh mahk.
Irail kan me nantihong doadoahki arail pwoson Sises Krais, kolukihla diparail kan, alehda tiahk sarawi en rongamwahuo, kolokol inou sarawi kan, alehda Ngehn Sarawi, oh dadaurete lel imwi pahn saledekla nan wehin selesdiel. Irail kan me sohte ahneki ansou mwahu en alehda rongamwahuo nan mour wet kak iang pedelong nan wehio ahpw irail “udahn pahn alehda sang nan arail mohngiong kan” oh e pil pahn wia nan sapwen ngehn (Doctrine and Covenants 137:8; pil kilang ire tikitik 7). Seri kan me mehla mwohn arail lel sounpar en pwukoahki pein irail (sounpar waluh) pil pahn komourla nan wein selesdiel (kilang Doctrine and Covenants 137:10).
Aramas me momourki mour wahun “me sohte alehdi arail kadehde en Sises ni pali uduk, ahpw alehda mwuhr” pahn alehdi dewe nan wehin deresdriel (Doctrine and Covenants 76:74). Met pil pahn wiawihiong irail kan me sohte pahn eimahki kadehde en Sises. Wehi wet rasohng klohri en maram. (Kilang Doctrine and Covenants 76:71–80.)
Irail akan me kin doulahte nan diparail kan oh sohte koluhla nan mour wet de alehda rongamwahu en Sises Krais nan sapwen ngehn pahn alehdi dewerail nan wehin delesdiel. Wehi wet rasehng klohri en usu kan. (Kilang Doctrine and Covenants 76:81–86.)
Koasoandihn Padahk Mwotomwot lel me Ekis mwotomwot
Koasoandi wet wia kasalepen dahme ke kak padahki ohng emen ma ahmw ansou mwotomwot. Ansou me ke pahn doadoahki koasoandi wet, pilada ehu de ekei padahk me ke pahn padahki. Poahsoan en Padahk ong ehu ehu padahk mihier nan mehn kaskuhlo.
Ni ahmw pahn padahk, wia peidek kan kowe rong. Kiong irail luhk me pahn kak seweseirail esehla ia mwomwen arail pahn karanihla Koht. Ehu luhk kesempwal iei aramaso en kak pwurehng tuhweng uhk. Wen reirei en kaskuhlo pahn ohng ahmw peidek kan oh ia mwomwen ahmw rongorong.
Dahme ke kak padahkiheng aramas nan erein minit 3-10
Kitail koaros wia sapwellimen Koht seri ngehn kei. Kitail wia kisehn Sapwellime peneinei. E ketin mwangih oh poakohng emen emen kitail.
Koht ketin ketkihdo koasoandi ehu ohng atail peren oh keirda nan mourwet oh nan mour soutuk.
Nan Sapwellimen Koht koasoandio, kitail anahne kohdo sampah pwehn alehda palinwar, esehla, oh keirda.
Sises Krais me poahsoan en Sapwelllimen Koht koasoandi wet. E ketin kamangaila ong kitail en alehdi mour soutuk.
Pahn sapwellimen Koht kaweid, Sises ketin kapikada sampah.
Dahme kitail esehla pohn sampah me pahn kak seweseikitail en kaunopada pwuralahng rehn Koht.
Kitail koaros kin wiahda dihp, oh kitail koaros pahn mehla. Pwehki Koht ketin poakong kitail, E ketikihdo Sapwellime Iehros, Sises Krais, pohn sampah pwehn doareikitail sang dihp oh mehla.
Mehkoaros me sapahrek nan mour kak kapwungpwungla sang ni Tomwpen Sises Krais.
Ni ansou me paliwaratailkan kin mehla, ngehno kin doulahte wie momour. Ni imwilao kitail koaros pahn iasada. Met wehwehki me palin waratail oh palingenitail pahn pwurpene, oh emen emen kitail pahn iasada, oh momour kokolahte ni palinwar unsek.
Ansou me kitail pahn iasada, Sises Krais me pahn wia atail sounkadeik. Me malaulau sohte pahn iang alahlda, ahpw sapwellimen Koht seri koaros pahn mie dewarail nan wein klohri. Kitail kak pwurala oh kousoanla rehn Koht ma kitail pwoson.