Mga Calling sa Misyon
7. Apendiks

7

Apendiks

7.0

Pasiuna

Kon gikinahanglan ug kon tukma alang sa imong misyon ug mga kahimtang, sunda ang dugang nga mga lagda nga gilatid dinhi niining appendix.

7.1

Pagpangulo nga mga Responsibilidad sa Batan-ong Misyonaryo

Ang mga buluhaton ug mga responsibilidad sa mga lider nga batan-ong misyonaryo gilakip apan mahimong dili limitado niadtong nalista sa ubos.

Senior nga Kompanyon

Ang usa sa misyonaryo sa matag parisan nga managkompanyon gitahasan isip senior nga kompanyon. Ang senior nga kompanyon:

  • Mangulo sa managkompanyon aron matuman ang buhat diha sa gitahas nga area nga tudloan.

  • Moawhag sa managkompanyon nga magtuon, mag-ampo, mosunod sa eskedyul sa kada-adlaw, ug maghimo og tukma nga mga rekord.

  • Motabang sa iyang kompanyon nga mamahimong mas maayo nga misyonaryo.

  • Moila ug motumbok sa epektibo nga mga kahanas, mga talento, ug mga paningkamot sa iyang kompanyon.

  • Mopakita unsaon ang epektibong pagtrabaho uban sa lokal nga mga lider ug mga miyembro aron masabutan ang misyonaryo nga mga paningkamot.

Tigbansay

Usa ka misyonaryo maoy tahasan nga moserbisyo isip tigbansay ug senior nga kompanyon alang sa matag bag-ong misyonaryo. Ang usa ka tigbansay:

  • Makigtambayayong ug mobansay sa bag-ong misyonaryo inubanan sa gugma, pailub, gugmang putli, ug masinabtanon nga pagbati.

  • Morespeto sa mga kontribusyon ug mga panglantaw sa bag-ong misyonaryo isip patas nga managkompanyon.

  • Mogahin og dugang nga panahon sa pagbansay matag adlaw diha sa pagtuon sa managkompanyon (tan-awa sa “Alang sa Bag-ong mga Misyonaryo: Dugang nga Pagtuon Kauban ang Kompanyon” sa “Pasiuna: Unsay Akong Buhaton Aron Magamit Nako Pag-ayo ang Isangyaw ang Akong Ebanghelyo?” diha sa Isangyaw ang Akong Ebanghelyo [2018], ix–x).

  • Magtuon sa mga sumbanan dinhi niining tamdanan nga basahon uban sa iyang kompanyon kada adlaw.

  • Bansayon ang bag-ong misyonaryo sa mga hilisgutan nga makita diha sa Mga Pag-amping sa Paggamit sa Teknolohiya ug Pag-adjust ngadto sa Misyonaryo nga Kinabuhi nga mga kapanguhaan.

  • Mopakita kon unsaon ang epektibong pagpakigsabot sa misyonaryo nga mga paningkamot uban sa lokal nga mga lider ug mga miyembro.

Lider sa District

Usa ka elder tahasan sa pagserbisyo isip usa ka lider sa district, nga gilangkuban sa daghang dapit nga katudloan kon diin sila nagtudlo. Ang lider sa district:

  • Mangulo, mobansay, ug makigtambag sa mga misyonaryo sa sinemana nga mga konseho sa district.

  • Mopahigayon og mga interbyu alang sa bunyag (tan-awa sa 2.3.6).

  • Mopahigayon og panagbaylo sa managkompanyon sa mga elder sa iyang district (tan-awa sa 2.3.1).

  • Makigtambayayong sa lokal nga mga lider ug mga miyembro aron masabutan ang misyonaryo nga mga paningkamot.

  • Direktang moreport ngadto sa lider sa zone.

Mga Lider sa Pagbansay sa mga Sister ug mga Lider sa Zone

Duha ka sister gitahasan nga moserbisyo diha sa usa ka panagkompanyon isip tigbansay nga mga lider sa usa o mas daghang zone. Sila ang responsable sa pagbansay ug sa kaayohan sa mga sister nga misyonaryo nga gitahas ngadto nila. Sakop usab sila sa mga district ug mga zone ug motabang sa presidente sa misyon, mga lider sa zone, ug mga lider sa district diha sa mga miting sa pagbansay ug sa mga komperensya sa zone.

Duha ka mga elder ang gitahasan sa pagserbisyo nga managkompanyon isip mga lider sa zone sa usa ka zone. Sila ang responsable sa pagbansay ug sa kaayohan sa tanang misyonaryo nga nadestino sa ilang zone. Motabang usab sila sa presidente sa misyon sa mga miting sa pagbansay ug sa mga komperensya sa zone.

Mga lider sa pagbansay sa mga sister ug mga lider sa zone:

  • Mangulo, mobansay, ug mopahigayon og panagbaylo og mga kompanyon sa mga misyonaryo sa zone o mga zone diin sila gidestino. Ang mga lider sa pagbansay sa mga sister mopahigayon og panagbaylo sa managkompanyon nga mga sister, ug ang mga lider sa zone mopahigayon og panagbaylo sa mga elder.

  • Makigtambayayong sa lokal nga mga lider ug mga miyembro aron masabutan ang misyonaryo nga mga paningkamot.

  • Moapil sa konseho sa pagpangulo sa misyon.

  • Direktang mo-report ngadto sa presidente sa misyon.

Ang mga lider sa zone mopahigayon usab og mga interbyu alang sa bunyag (tan-awa sa 2.3.6).

Mga Kaabag sa Presidente

Duha ka elder ang tahasan nga moserbisyo nga managkompanyon isip mga kaabag sa presidente sa misyon. Mga Kaabag:

  • Mopahigayon og mga panagbaylo og managkompanyon uban sa mga lider sa zone ug sa ubang mga elder (tan-awa sa 2.3.1).

  • Mohatag og pagbansay diha sa mga konseho sa pagpangulo sa misyon ug sa mga komperensya sa zone kon hangyoon sa presidente sa misyon.

  • Mahimong mohatag og tambag kalabut sa pagbalhin sa misyonaryo o mga buluhaton sa pagpangulo, apan dili sila ang mohimo sa katapusang desisyon.

  • Direktang mo-report ngadto sa presidente sa misyon.

7.2

Mga Lagda alang sa Pagserbisyo

Sunda ang mga lagda sa pagserbisyo nga gilatid diha sa mosunod nga mga subseksyon.

7.2.1

Pormal nga Giorganisar nga mga Kalihokan sa Pagserbisyo

Makakita ka og mga oportunidad sa pagserbisyo pinaagi sa mga organisasyon sama sa JustServe.org (kon anaa), sumala sa pagdumala sa imong mga lider sa misyon.

Kon nag-apil diha sa usa ka giorganisar nga kalihokan sa pagserbisyo, hunahunaa kini nga mga sumbanan:

  • Limitahi ang pagserbisyo sa mga oras lamang nga adlawan pa.

  • Likayi ang pagserbisyo atol sa labing mabungahon [productive] nga panahon sa pagpangita ug sa pagtudlo gawas kon gisugo sa imong presidente sa misyon.

  • Salmot sa mga proyekto sa pagserbisyo sa komunidad kon mahimo.

  • Likayi ang mga kalihokan sa pagserbisyo sa adlaw sa pagpangandam o atol sa mga panahon nga adunay mga konseho sa district o mga komperensya sa zone.

  • Ayaw ikansela o usaba ang natakda nga eskedyul sa pagtudlo tungod sa mga proyekto sa pagserbisyo gawas kon gisugo sa imong presidente sa misyon.

  • Mag-uban permi sa imong kompanyon samtang nagserbisyo kamo.

  • Itaud ang imong name tag kon itugot ug tukma, bisan kon nagsul-ob ka og pangtrabaho nga sinina.

  • Ayaw pag-apil og mga kalihokan nga makagasto ka og kwarta o kaha bayaran ka.

  • Ayaw og pasalig sa pag-apil sa mga proyekto nga dugay mahuman kon walay pagtugot gikan sa imong mga lider sa misyon.

7.2.2

Seguridad atol sa mga Kahigayunan sa Pagserbisyo

Alang sa imong seguridad atol sa mga oportunidad sa pagserbisyo, gamita ang sentido komon ug sunda ang mga pag-aghat sa Espiritu Santo ug ang mosunod nga mga lagda:

  • Buhata lang ang mga kalihokan nga mahimo sa imong lawas.

  • Ayaw paggamit og mga de-kuryente nga mga himan o mopadagan o mosakay og bisan unsang makinarya (sama sa mga traktor, mga trailer, o mga truck bed).

  • Pagsul-ob og tukma nga sapot (sama sa gwantes o taas og buktonan nga kamisin).

  • Ayaw pagtrabaho sa dapit nga taas ang mahagbungan (sama sa atop o sa mga kahoy).

  • Ayaw pagtrabaho sa dapit nga lagmit matanggong ka o maangol sa sirado nga mga luna (sama sa lawom nga lungag).

  • Ayaw pagserbisyo sa mga eskwelahan, mga day care center, o sa bisan asang dapit nga mag-inusara ka uban sa mga bata, lakip diha sa Primary o sa nursery (tan-awa sa 3.5.2).

Tan-awa kining video alang sa dugang impormasyon mahitungod sa paghatag og serbisyo.

7.3

Pagtahud sa Uban

Tratara kanunay ang uban diha sa pagkamabination ug pagtahud. Sunda usab ang dugang nga mga lagda dinhi niining seksyon.

7.3.1

Mga Hilisgutan sa Panag-istorya nga Likayan

Sa pagpakita og pagtahud sa uban ug sa pagpanalipod sa imong seguridad, likayi ang lagmit problemadong mga hilisgutan sa panag-istoryahanay. Ang mga hilisgutan nga angayng likayan naglakip sa lokal ug nasyonal nga politika sa mga area diin ka nag-alagad; likayi usab ang paghimo og mga pribado o mga politikanhong pamahayag sa publiko. Dugang pa, dili gayud:

  • Magpasiaw mahitungod sa terorismo o mga buhat sa terorismo.

  • Mosugyot nga ang mga tawo mobalhin ngadto sa laing nasud—bisan alang pa sa pagtrabaho o pag-eskwela.

  • Motanyag o mohimo og saad mahitungod sa pinansyal o motabang sa visa alang sa tawo diha sa imong area sa misyon, lakip sa trabaho, pag-eskwela, pinuy-anan, o mga pagsagop.

7.3.2

Lokal nga mga Balaod ug Kultura

Tumana ang lokal nga mga balaod mahitungod sa pagpang-apud-apud sa mga materyal, mga regulasyon sa custom ug mga utlanan, ug mga kinahanglanon sa pasaporte ug visa. Kon dili ka sinati sa lokal nga mga balaod, mga tradisyon, ug sa mga naandan nga mga pamatasan, pangayo og tabang sa imong mga lider sa misyon.

Tan-awa kining video alang sa dugang impormasyon mahitungod sa tukma nga pamatasan.

7.4

Pagtambong sa Templo

Kon motambong ka sa templo, hinumdumi ang mosunod:

  • Mag-uban pirmi sa imong kompanyon.

  • Moapil sa bisan unsang mga ordinansa nga gihimo sulod sa templo. Hinoon, aron malikayan nga masaypan sa pagsabut ang espirituhanon nga mga pagbati isip romantikong pagbati, ayaw pag-proxy alang sa usa ka bana o asawa diha sa seremonya sa pagsilyo o isip usa ka saksi sa usa ka session sa endowment.

  • Ayaw kabalaka mahitungod sa pagkuha og igsusul-ob sa templo; ang igsusul-ob sa templo ipagamit ra ngadto sa misyonaryo nga walay bayad.

  • Mosunod sa maayong pamatasan diha sa telepono. Mahimo nimong dad-on ang imong telepono sulod sa templo aron sa pagprinta og mga kard sa ordinansa. Apan, kinahanglan dili gayud nimo gamiton ang imong kamera, makig-istorya diha sa telepono, o magpadala og mga message samtang anaa sa sulod sa templo.

  • Ayaw pagdala og mga kamera o materyal nga basahunon, lakip sapatriyarkal nga mga panalangin, aron gamiton sulod sa templo.

  • Dili magpundok pundok isip mga misyonaryo o moluhod sa pag-ampo diha sa celestial nga lawak.

Hinumdumi nga kanunayng magsul-ob sa garment sa templo sumala sa gitudlo. Kon aduna kay mga pangutana mahitungod sa pagsul-ob og garment o mahitungod sa pagtambong sa templo, pangutana sa imong mga lider sa misyon.

7.5

Teknolohiya

Sunda ang mga sumbanan sa teknolohiya nga gilatid sa mosunod nga mga subseksyon.

7.5.1

Pagsunod sa Kinatibuk-ang mga Sumbanan sa Teknolohiya

Tutoki ang panginahanglan sa mga tawo, dili ang teknolohiya. Kon makig-atubang sa pakighimamat, ihatag sa tawo ang imong tibuok nga pagtagad. Ang pagsusi sa email, pagtubag sa mga text, o pagtan-aw diha sa social media kon kauban ka sa ubang tawo makabalda ug dili matinahuron.

Mahimo kang mogamit sa:

  • Wi-Fi sa mga meetinghouse ug sa ubang mga pasilidad sa Simbahan.

  • Sa pampublikong mga computer, sama niadtong anaa sa mga librarya ug mga internet cafe.

  • Sa pribadong computer sa usa ka tawo alang sa pagtudlo kon ang tawo mohatag sa iyang pagtugot.

  • Ang mga headphone mahimong gamiton alang sa giaprobahan nga mga kalihokan sa misyonaryo, sama sa pagpakig-istorya sa pamilya o pagtuon og mga kurso sa misyonaryo.

Ayaw pagdumala og mga account sa local ward o teknolohiya sa stake, mga website, mga blog, o mga social media.

Tan-awa kining video alang sa dugang impormasyon mahitungod sa paggamit sa mga mobile device sa misyonaryo nga buhat.

7.5.2

Luwas nga Paggamit sa Teknolohiya

Kinahanglan imong makompleto ang online nga kurso sa Mga Pag-amping sa Paggamit sa Teknolohiya samtang ikaw anaa pa sa missionary training center. Ang mosunod nga mga sumbanan makatabang usab nimo sa luwas nga paggamit sa teknolohiya ug nga adunay katuyoan sa misyonaryo:

  • Gamita ang teknolohiya nga dunay tumong. Pagplano og mga kalihokan nga makatabang nimo sa pagdapit sa uban sa pagduol kang Kristo.

  • Ayaw gamita ang teknolohiya sa pagpawala sa kakapoy o kalaay.

  • Paminawa ug sunda ang mga pag-aghat sa Espiritu Santo. Ang lig-on nga koneksyon sa Espiritu sa Ginoo mao ang labing maayong depensa batok sa dili tukma nga paggamit sa teknolohiya.

  • Kanunayng mopahimutang sa dapit diin ikaw ug ang imong kompanyon makakita sa inyong tagsa-tagsa ka screen. Ayaw paggamit og mga mobile device kon nag-inusara ka, pananglit kon samtang anaa sa banyo.

  • Pakigtambayayong sa imong kompanyon kon mangita o mag-online sa pagtudlo. Ribyuha ang matag komentaryo ug mensahe sa usag usa sa dili pa ninyo i-post o ipadala ang usa ka mensahe aron kamong duha makapaambit og mga ideya ug mahimong may tulubagon sa sangputanan sa panag-istorya. Pahinumdom: Walay labot niini ang mga komunikasyon uban sa imong pamilya (tan-awa sa 3.9.1), sa opisina sa misyon, o sa presidente sa misyon.

  • Regular nga motamud sa Mga Pag-amping sa Paggamit sa Teknolohiya diha sa personal ug sa managkompanyon nga pagtuon.

7.5.3

Paglikay sa Pornograpiya

Ang pornograpiya mahimong maanaa sa daghang matang. Ang pagplano daan ug paghimo og matarung nga mga pagpili makatabang nimo nga makalikay sa pornograpiya (tan-awa sa Mga Pag-amping sa Paggamit sa Teknolohiya). Kon imo kining masugatan, likay, palunga ang device, o biyai ang sitwasyon. Sa ubos mao ang pipila ka mga sugyot aron makatabang nimo sa paglikay sa pornograpiya:

  • Likayi ang mga website, mga materyal, ug mga dapit diin dunay kalagmitan nga imong madungog, mabasa, o makita ang makapadani o pornograpiya nga mga materyal.

  • Pagkat-on sa pag-ila sa mga higayon nga matintal ka pag-ayo sa sayop nga paggamit sa teknolohiya, sama sa higayon nga ikaw gikapoy o gilaay.

  • Pagplano hinuon kon unsay imong buhaton. Ang imong mga lider sa misyon makatabang. Imo usab nga makita ang impormasyon sa ChurchofJesusChrist.org/addressing-pornography.

Si bisan kinsa nga magtinguha sa paglikay o pagbuntog sa pornograpiya makakaplag og tabang ug kaayohan pinaagi sa Pag-ula ni Jesukristo. Kon ikaw nanglimbasug, pakig-istorya sa imong presidente sa misyon, kinsa makahatag og mahigugmaong pag-abag, tambag, ug tabang.

7.5.4

Pagtudlo gamit ang Teknolohiya

Sa dapit diin aprobado, gamit sa online nga teknolohiya uban sa mga miyembro ug sa mga tawo nga inyong gitudloan aron makakonektar ngadto nila, makatabang nila, ug makapaambit sa mga mensahe sa ebanghelyo diha kanila.

  • Tabangi ang uban nga makat-on og epektibong mga paagi sa pagpaambit sa ebanghelyo, ug moabag sa mga miyembro samtang mogamit sila sa teknolohiya diha sa ilang misyonaryo nga mga paningkamot.

  • Mag-online sa pakigtambayayong sa mga tawo nga inyong gitudloan kinsa nagpuyo gawas sa area nga kamo nadestino, ug tabangi sila sa tibuok nilang pagkakabig.

  • Kon magtudlo kamo og tawo kinsa nagpuyo gawas sa inyong area, pakigtambayayong gayud sa mga misyonaryo kinsa nadestino sa area diin nagpuyo ang tawo nga gitudloan. Magtinabangay sa pagtabang niana nga tawo nga mas maduol ngadto sa Langitnong Amahan ug ni Jesukristo.

  • Paggamit ug mga litrato, mga video, ug ubang mga media gikan sa Simbahan Media Library ug laing opisyal nga mga site sa Simbahan diha sa inyong mga paningkamot sa pagtudlo kon tukma. Sa inyong mga pakig-istorya, ayaw paggamit og mga media nga dili aprobado sa Simbahan (pananglitan, mga video nga hinimo sa mga miyembro o sa lokal nga mga unit).

  • Kon mag-post diha sa social media, ipaambit ang mga mensahe mahitungod sa ebanghelyo ug ang inyong misyonaryo nga kasinatian kay sa tutokan ang kabahin sa inyong mga pagbiyahe.

Sunda ang mosunod nga mga lagda aron sa pagpanalipod sa pagkapribado ug sa personal nga impormasyon sa mga tawo:

  • Hibaloi ang tibuok ngalan, mga litrato (tan-awa sa 3.7), impormasyon sa pagkontak, ug ang personal nga mga sitwasyon sa mga tawo nga inyong gitudloan nga kompidensyal. Ang pagpaambit o pag-post niining impormasyon makalapas sa mga balaod sa pagkapribado sa datos. Partikular nga magmaampingon sa unsay imong isulat ngadto sa mga sakop sa pamilya, tungod kay malagmit sila nga mo-post sa imong mga sulat ug mga mensahe sa online.

  • Pangayo og pagtugot gikan ni bisan kinsa nga makita diha sa litrato o video sa dili pa mopaambit niini ngadto ni bisan kinsa o mo-post niini sa online. Pagkuha og permiso sa ginikanan sa dili pa mopaambit og mga litrato o video sa mga bata (tan-awa sa 3.7).

Tan-awa kining video alang sa dugang impormasyon mahitungod sa pagpanalipod sa pagkapribado sa uban.

7.5.5

Paggamit sa Email

Atol sa imong misyon, ikaw hatagan og usa ka email account nga gamiton imbis ang ubang mga personal nga mga email account. Gamita kining email account alang sa tanang komunikasyon gawas sa imong sinemana nga sulat ngadto sa presidente sa misyon, nga imong ipadala pinaagi sa Missionary Portal.

7.5.6

Paggamit sa Social Media

Ang social media mahimong magamit sa pagpaambit sa ebanghelyo. Siguroa nga imong gamiton lamang ang mga site sa social media nga aprobado sa imong misyon, gumikan kay ang mga balaod sa social media mahimong dunay kalahian gikan sa usa ka nasud ngadto sa laing nasud.

Sunda ang bisan unsa nga mga piho nga sumbanan sa misyon mahitungod sa social media ingon man ang mosunod nga mga sumbanan:

  • Siguroa nga ang imong mga account sa social media mopakita sa imong katuyoan ug calling isip usa ka misyonaryo.

  • Ipaniguro nga ang imong profile nga litrato ug sa mga indibidwal ug mga grupo nga imong gisundan magpakita nga ikaw usa sa mga misyonaryo sa Ginoo.

  • Ayaw paghimo og ikaduha nga account diha sa site sa social media aron malikayan ang pag-usab sa nahimo na nga account. Usa kini ka kalapasan sa kasabutan sa tiggamit alang sa daghang site sa social media.

  • Ayaw paggamit sa titulo nga “Elder” o “Sister” sa inyong ngalan sa account. Ang mga titulo nga sama niini wala itugot sa pipila ka mga platform sa social media.

  • Tutuki ang makahuluganon, tinagsa-tagsa nga pakig-interaksyon imbis sa pagkuha og mga “like” o sa pagpaambit sa imong mga mensahe sa online.

  • Ayaw pag-implikar nga ang imong mga gi-post mao ang opisyal nga komunikasyon sa Simbahan.

  • Panalipdi ang imong kaugalingon nga pagkapribado. Pagmainampingon kon magpaambit sa imong iskedyul ug lokasyon sa online. Pagmainampingon mahitungod sa mga tawo nga imong gidawat ngadto sa imong social network; ang ubang mga indibidwal mopahimulos sa mga misyonaryo.

  • Panalipdi ang pagkapribado sa uban. Kon gusto ka nga mag-post og butang mahitungod sa tawo nga nagkigtambayayong nimo, kinahanglan ka nga mananghid kaniya (mahimong pinaagi sa sulti o sa sulat) sa dili pa mag-post og bisan unsang butang nga maghisgut sa iyang ngalan o maglakip sa iyang litrato (tan-awa sa 3.7). Tungod sa lokal nga mga balaod sa pagkapribado, sa ubang mga misyon ang mga misyonaryo wala tugoti nga mopaambit sa mga litrato niadtong ilang gitudloan diha sa publiko.

Tan-awa kining video alang sa dugang impormasyon mahitungod sa pagpanalipod sa pagkapribado sa uban.

7.6

Malisud nga mga Sitwasyon

Sunda ang mga lagda sa ubos sa pag-atubang sa malisud nga mga sitwasyon.

7.6.1

Pag-atubang sa Negatibo nga mga Sitwasyon

Sama sa Manluluwas, sa mga propeta, ug sa daghang mga misyonaryo nga nag-una nimo, ikaw makasinati og pagsalikway ug tingali pa gani ubang matang sa kawalay pagtahud isip usa ka misyonaryo. Ang mosunod nga mga lagda motabang nimo sa pagsulbad sa pagsalikway:

  • Ayaw ibaliwala ang imong mga emosyon.

    • Hunahunaa nga OK ra ang mopadayag og kasagmuyo ug kawalay paglaum ngadto sa imong kompanyon, sa batang-ong mga lider nga misyonaryo, sa mga lider sa misyon, ug sa suod nga mga sakop sa pamilya.

    • Sabta nga usahay ang pag-istoya mahitungod sa usa ka negatibo nga sitwasyon makatabang sa pagpalabay sa pagbati.

    • Ayaw og ihambin ang negatibo nga sitwasyon o tugutan kini nga mousab sa imong kinaiya sa taas nga panahon.

  • Ibutang ang pagsalikway diha sa panglantaw.

    • Hibaloi nga ang negatibo nga mga sitwasyon dili maoy motino kon si kinsa ka, kon unsay tuyo sa pagtawag nimo, o kon unsa kamaayo ang imong pagtrabaho.

    • Likayi ang magpalabi og sulti sama sa “Ang mga tawo dili gayud maminaw.”

    • Sabta nga ang kabubut-on nagtugot sa mga indibidwal sa pagdawat o pagsalikway sa imong mensahe.

    • Hunahunaa nga ang mga kinabuhi sa mga tawo ug mga kahimtang mausab. Ang pagsalikway dili kanunayng nagpasabut nga ang tawo dili na gayud mainteresado sa gipahiuli nga ebanghelyo.

  • Tagda ang imong kaugalingon ug ang uban sa kapuangod.

    • Magtinguha og kahupayan diha sa pag-ampo. Hinumdumi nga ang Ginoo nasayud nimo, sa imong sitwasyon, ug sa imong mga panginahanglan.

    • Ayaw panaway sa imong kaugalingon, sa sitwasyon, o sa tawo nga nalambigit.

    • Buhata ang imong labing maayo aron mahimo kang positibo.

  • Pagkat-on gikan sa kasinatian. Ikonsiderar kon unsay lagmit nimong buhaton nga lahi sa sunod higayon.

7.6.2

Pag-atubang sa mga Tawo nga Makig-away

Lagmit ikahinagbo nimo ang mga tawo kinsa mga negatibo o agresibo. Kon ang usa ka tawo walay batasan, pagmatinahuron ug biya sa sitwasyon. Kon makabatyag ka og peligro, biya dihadiha dayon. Ang seguridad nimo ug sa imong kompanyon mao ang imong unang prayoridad (tan-awa sa 4.5).

Ang mga tawo nga makiglalis ug negatibo ang pakig-inter-aksyon makaluya. Paghimo og lakang nga imong gikinahanglan sa pag-atubang sa kaluya (tan-awa sa 4.3) ug sa pag-atiman sa imong kaugalingon sa emosyonal ug espirituwal nga paagi.

Hibaloi nga ang bisan unsang matang sa sulti, emosyon, o pisikal nga pag-abuso gumikan ni bisan kinsang tawo, lakip sa kompanyon, dili madawat. Mahimong maglakip kini sa mga pulong, mga sinyas, o mga buhat nga makapaalarma o makaabuso sa laing tawo.

Diha-diha dayon kontaka ang imong presidente sa misyon, ang iyang asawa, o laing lider nga kasaligan kon ikaw makasinati, makakita, o makadungog og mahitungod sa bisan unsang sekswal nga pagpangsamok, pangatake, o pagpanghulga (tan-awa sa 7.8.2–7.8.4).

7.7

Mga Kabalaka sa Pisikal ug Mental nga Kahimsog

Sunda ang mga lagda sa kahimsog nga gilatid diha sa mosunod nga mga subseksyon.

7.7.1

Pagkontak sa Opisina sa Misyon mahitungod sa Medikal nga mga Kabalaka

Ayaw pagsalig sa mga pagdayagnos sa kaugalingon o sa mga opinyon sa uban. Bisan og ang tambag medikal gikan sa imong kompanyon, sa ubang mga miyembro sa Simbahan, pamilya, o mga higala mahimong mapuslanon, kontaka ang imong medikal nga koordinitor sa misyon kon ikaw adunay bisan unsang mga pangutana o mga problema, ilabi na mahitungod sa grabe nga kaangol o mga problema sa kahimsog. Ang imong presidente sa misyon makig-istorya uban sa imong presidente sa stake ug sa imong pamilya mahitungod sa grabe nga kaangol ug mga problema sa kahimsog.

Kontaka ang medikal nga koordinitor sa misyon kon makasinati ka sa bisan hain sa mosunod nga mga problema sa kahimsog:

  • Sakit nga labaw pa sa normal nga mga trangkaso ug ginagmay nga mga simtoma.

  • Grabe nga kaangol.

  • Paspas nga pagpitik sa pulso (molapas sa100-ka pitik kada minuto) kon wala ka nag-ehersisyo.

  • Hilanat nga taas pa sa 101°F (38.3°C), hilanat nga 101°F (38.3°C) molapas na sa duha ka adlaw, o hilanat nga dili maminaw og tambal.

  • Paspas o hilabihan nga paghugo o pagsaka sa timbang.

  • Naghinubra nga kauhaw o pagpangihi.

  • Kanunayng pagsuka, mga paglabad sa ulo, pagkalipong, ubo, o panurok.

  • Pagpanghupong sa mga tiil, batiis, tiyan, o nawong.

  • Pagkunhod sa dugo o itom nga hugaw [stool].

  • Pagtubol o pagkalibanga nga molapas sa duha ka adlaw.

  • Pagpanakit sa ngipon.

  • Kuko nga mitubo sa ilawom.

7.7.2

Pag-atiman sa Pisikal nga Kahimsog

Makaangkon ka og mas makalipay nga kasinatian sa misyon ug mahimong mas maayong makaserbisyo sa Ginoo kon imong atimanon ang imong pisikal nga kahimsog. Pagmakugihon sa imong misyonaryo nga mga paningkamot, apan ayaw pugsa ang imong kaugalingon og sobra sa angay nimong buhaton.

Aron matabangan ka sa pagmintinar sa imong pisikal nga kahimsog, siguroa ang:

  • Regular nga pag-ehersisyo.

  • Matulog og sakto.

  • Pagkaon og himsog nga pagkaon uban sa daghang mga utanon, mga prutas, ug mga lugas.

  • Pag-inom og daghang tubig.

  • Regular nga paghugas sa imong mga kamot.

  • Pamaghid og sunscreen ug pangontra sa insekto kon gikinahanglan.

  • Pagpangita og mga paagi nga makarelaks.

  • Pagsinati og maayong paglingaw-lingaw sa mga adlaw sa pagpangandam.

7.7.3

Pag-atiman sa Kahimsog sa Pangisip

Normal ra ang mobati og panagsa nga kaguol, kabalaka, kamingaw, ug kawalay kadasig samtang magserbisyo sa misyon. Apan,ang mga emosyon ug mga pamatasan nga makapugong kanimo sa epektibong paglihok kinahanglan nga maatiman. Kini nga mga kondisyon mahimong maglakip sa:

  • Pag-usab-usab sa taras [Mood swings].

  • Paghinubra sa pagkabalaka o pagbati nga sad-an.

  • Pagkamasulub-on.

  • Dili himsog nga pagdumdom sa pagkaon.

  • Kalisud sa pagdumala sa sekswal nga mga pagbati.

Sabta nga walay angay ikaulaw diha sa pag-ila ug pagpatambal sa bisan unsang problema sa kahimsog, lakip na sa emosyonal ug mga problema sa panghunahuna. Kon imong gibati nga ikaw o ang imong kompanyon nagkinahanglan og tabang, pagkig-istorya sa imong presidente sa misyon, sa iyang asawa, o sa medikal nga koordinitor. Sila adunay access ngadto sa mga kapanguhaan sa kahimsog sa panghunahuna. Imo usab makaplagan ang mapuslanon nga tambag sa Pag-adjust ngadto sa Misyonaryo nga Kinabuhi.

7.7.4

Pag-atiman sa mga Pinaakan sa Hayop ug Insekto

Ang mga pinaakan sa hayop ug insekto mahimong hinungdan sa grabe ug usahay makamatay nga sakit. Kon ang pinaakan sa insekto mohubag, o mahimong dili kasagaran ang kasakit, tawaga dihadiha dayon ang opisina sa misyon.

Pagpakgang

Makatabang ka sa pagpakgang sa pulgas, lamok, ug ubang pinaakan sa insekto pinaagi sa pagsunod niining mga lagda:

  • Likayi ang nagpundo ug nag-urong nga tubig, diin maoy puy-anan kanunay sa mga lamok.

  • Paglikay sa mga agianan nga kakahoyan ug kasagbutan, diin maoy puy-anan sa mga pulgas.

  • Pagsul-ob og sinina nga makatabon sa imong mga bukton ug mga batiis, bisan sa maalimuot nga panahon.

  • Tan-awa ang video sa Pagpakgang sa mga Sakit nga Dala sa Lamok.

  • Panghaplas og pangontra diha sa panit nga mabantang ug usa ka insecticide sa gawas nga bahin sa sinina.

Pagtambal

Kon mapaakan ka o masamdan sa usa ka pulgas o lamok o laing insekto o hayop, sunda kini nga mga lagda:

  • Tambali og yelo ang gagmayng pinaakan sa insekto o medisina nga wala magkinahanglan og resita.

  • Pakigkita og usa ka medikal nga mga propesyunal aron luwas nga matangtang ang mga pulgas nga mitapot sa imong panit ug aron masuta alang sa sakit nga Pagpanglibagha [Lyme].

  • Hugasi ang pinaakan o samad hinungdan sa usa ka hayop gamit ang sabon og tubig (mas maayo sulod sa 15 minutos), ug tawaga ang opisina sa misyon. Tinoa ang tag-iya sa hayop, kon mahimo, aron nga ang opisina sa misyon makatabang sa pagwagtang sa posibilidad sa rabis o ubang mga seryuso nga mga sakit.

  • Kon ang usa ka pulgas o pinaakan sa hayop mohubag, mahimong dili kasagaran ang pagpanakit, o mobutoy o dunay pagpanurok, tawaga dayon ang opisina sa misyon.

Tan-awa kining video alang sa dugang impormasyon mahitungod sa pagpanalipod sa imong kaugalingon gikan sa pinaakan sa insekto ug sa laing mga mananap.

7.8

Peligro nga mga Sitwasyon

Sunda ang luwas nga mga lagda nga gilatid sa mosunod nga mga subseksyon.

7.8.1

Pagpangandam alang sa Peligro nga mga Sitwasyon

Ang mosunod nga mga lagda makatabang nimo nga makapangandam ug makalihok sa peligro nga mga sitwasyon:

  • Pag-ampo alang sa panalipod sa Ginoo sa kada adlaw.

  • Paminaw ug sunda ang mga pag-aghat sa Espiritu, nga mopahimangno kanimo sa peligro.

  • Sinatia ang emergency action plan sa imong misyon. Sunda ang mga lakang kon unsaon sa paglihok atol sa mga sitwasyon sa emerhensya.

  • Ibutang ang impormasyon sa mga kontakon sa emerhensya alang sa imong area ug nasud diha sa imong telepono. I-charge kanunay ang imong telepono ug dad-a sa tanang higayon.

  • Likayi ang mga dapit sa imong misyon nga nahibaloan nga peligro.

  • Ayaw paghatag og impresyon nga ikaw adunay butang nga bililhon (pananglitan, pinaagi sa pagdala og nagbagal nga bag).

  • Pagmabinantayon sa bisan unsang butang nga dili ordinaryo, sama sa adunay tawo nga nagtan-aw nimo og maayo, mangutana og personal nga mga pangutana, o mosunod-sunod kaninyo.

  • Paningkamot sa paggamit og mga linihokan nga magsulti nga masaligon ka ug wala mahadlok.

  • Pagbaton og sinyas nga pulong o hugpong sa mga pulong nga gamiton nimo uban sa imong kompanyon aron pagsinyas nga gusto ka na nga mobiya. Gamita kini kon mabutang ang imong kaugalingon sa usa ka sitwasyon nga imong gibati nga dili luwas.

Praktisa ang paggamit niining mga lagda sa kanunay, bisan kon ang uban (lakip sa ubang mga misyonaryo) mag-awhag nimo sa pagbutang sa imong seguridad diha sa risgo aron matuman ang imong misyonaryo nga buhat.

7.8.2

Pag-ila sa Peligro nga mga Sitwasyon

Kontaka dayon ang usa sa imong mga lider sa misyon o laing gisaligan nga lider kon ikaw makasinati, makasaksi, o makadungog og bisan unsang sayop nga gawi sa pisikal o sekswal sa bisan unsang matang. Kini mahimong maglakip sa pagpang-atake, pagpanghulga, o pagpangsamok. Bisan kon ang mosunod nga mga peligro mahimong lahi ang pagkahulagway sa lokal nga mga balaod, isumbong ang bisan unsang butang nga maoy hinungdan sa imong mga kabalaka:

  • Pagpang-atake naglakip sa bisan unsang pisikal o sekswal nga buhat nga ipugos diha sa usa ka tawo. Ang mga pananglitan naglakip sa bisan unsa nga wala magustuhi nga pagdapat sa lawas, dili tukma nga paghikap, o pisikal nga pagdagmal.

  • Pisikal nga pagpanghulga mahitabo kon ang usa ka tawo mabutang diha sa kahadlok sa pag-angol sa lawas o kamatayon. Ang mga pananglitan naglakip sa pagsulti og hulga o mahulgaon nga pamatasan sa bisan unsa nga matang.

  • Sekswal nga pagpangsamok naglakip sa law-ay nga mga pinulungan o linihukan, mohangyo og sekswal nga pabor, o bisan unsa nga sekswal nga mga aksyon. Ang mga pananglitan mahimong maglakip sa pagsunod-sunod (magsunod-sunod sa tuyo nga pag-alarma o pagpalagot) o pagpakita sa pribado nga mga bahin sa lawas.

7.8.3

Pag-atubang sa mga Pangatake, mga Pagpanghulga, o Pagpangsamok

Buhata ang mosunod kon ikaw o imong kompanyon gitulis:

  • Ihatag dayon ang imong mga butang. Mahimong tungod niini ang kawatan mobiya nga dili mopasakit kaninyo. Ang imong kinabuhi ug maayong kahimtang mas dako og bili kay sa imong mga butang.

  • Paningkamot nga dili moinit ang imong ulo o motubag sa negatibo nga paagi. Makapasamot kini sa kahimtang.

Buhata ang mosunod kon ikaw o ang imong kompanyon mobati nga nahulga o gisamok ug labaw pa sa imong mga butang anaa sa risgo:

  • Ikaw lang ang makadesisyon sa labing maayo nga pagresponde sa sitwasyon. Mahimo kang modagan, modepensa sa imong kaugalingon, o motuman. Pananglitan:

    • Kon modagan ka, lagmit imong malikayan ang pagpang-atake.

    • Kon imong depensahan ang imong kaugalingon, mahimong imong madepensahan ang imong lawas pinaagi sa pagsyagit, pagpanghampak, pagkamras, pagpamaak, pagpamatid, o pag-ampo.

    • Kon mokaging ka o mopili nga motuman, nga mahimong maoy normal nga lihok, palihug ayaw basola ang imong kaugalingon sa kaulahian.

  • Ikonsiderar ang magpakitabang o kuhaa ang atensyon sa ubang tawo. Pananglitan:

    • Mahimo kang mangayo og tabang sa uban, ilabi na gikan sa tawo kinsa adunay awtoridad (sama sa drayber sa bus) nga imong gisakyan.

    • Kon anaa ka sa publiko nga lugar uban sa daghang tawo sa palibut ug dili makalingkawas gikan sa pisikal o sekswal nga pagpangatake (pananglitan, kon nagsakay sa pangpubliko nga transportasyon), ikonsiderar ang klaro nga pagsulti aron mapakgang ang tawo sa pagpadayon sa buhat o pagpangsamok. Pananglitan, mahimo kang mogamit og klaro nga linihokan sa lawas, motan-aw direkta sa malapason, ug mosulti og kusog kaayo. Mahimong imong atubangon ang tawo, isulti ang kawalay pamatasan, ug isulti unsay imong gusto nga buhaton sa tawo, sama sa, “Hoy, ikaw nga nagsul-ob og yellow, ayaw ko og hikapa. Palayo nako.”

    • Kon walay usa nga anaa sa duol, mahimo ka nga mosinggit, mosyagit, o maningkamot nga makakuha og pagtagad; lagmit adunay tawo nga makaalinggat nimo ug mahimong makatabang.

7.8.4

Pagreport sa mga Pangatake, mga Pagpanghulga, o Pagpangsamok

Kon ikaw nadagmalan, nahulga, o nasamok (tan-awa sa 7.8.2) pinaagi ni bisan kinsang tawo, kontaka dayon ang usa sa imong mga lider sa misyon, ang tawo nga anaa sa opisina sa misyon, o laing gisaligan nga lider. Ang imong mga lider sa misyon adunay mga kapanguhaan sa pag-abag kanimo sa medikal nga pagtagad, propesyunal nga pagtambag, pagbalhin, o laing gikinahanglan nga tabang. Hunahunaa nga lagmit makalitan ka human sa panghitabo ug mahimong makasinati ka usab og mga timailhan sa trauma. Sa higayon nga luwas na ang imong pamati, paningkamuti nga masulat nimo ang bisan unsa nga imong mahinumduman mahitungod sa insidente.

Sabta nga kon nadagmalan ka, bisan unsa pa man ang imong nabuhat, ang pagpangdagmal dili imong sayop. Sa kanunay ikaw adunay kapilian sa pagpakigtambag sa usa ka tawo nga imong gisaligan ug mobati og kakomportable, sama sa imong presidente sa misyon, sa iyang asawa, sa sibil nga mga awtoridad, o sa mga tawo sa panimalay. Imoha ang desisyon kon imo bang ilambigit ang pulis.

Normal lang nga makapangutana ka sa imong kaugalingon ug kon unsa kaha unta ang lahi nga butang nga nahimo nimo ug sa imong kompanyon. Salig nga imohang nahimo ang imong labing maayo niining kalisud. Ang mga tawo managlahi ang pagproseso sa makapatrauma nga mga kasinatian. Ang Ginoo motabang kanimo samtang magpaayo ka.

Tan-awa kining video alang sa dugang nga impormasyon mahitungod sa pagpangandam, pag-ila, ug pagdumala sa peligro nga mga sitwasyon ug mga hulga.

7.9

Siguridad sa Balay Kapuy-an

Sunda ang mga lagda sa ubos aron mapabilin nga pribado, luwas, ug limpyo ang inyong pinuy-anan.

7.9.1

Pagkapribado ug Siguridad

Buhata ang mosunod nga lagda aron masiguro nga ang inyong pinuy-anan mahimong pribado ug luwas:

  • Pagtaud ug pagmintinar og carbon monoxide ug mga detektor sa aso. Pagpahigayon ug mga pagsusi ug ilisdi ang mga bateriya sumala sa gi-iskedyul sa koordinitor sa pinuy-anan sa misyon. Ayaw i-disable kining mga makaluwas sa kinabuhi nga mga himan.

  • Ayaw pagdagkot ug mga kandila sa bisan unsang matang.

  • Trangkahi ang mga pultahan ug mga bintana sa gawas. Kon gikinahanglan, ang imong mga lider sa misyon mahimong mosugyot og mga opsyon aron makasulod ang hangin gikan sa gawas.

  • Kanunayng isirado ang mga kurtina o blinds human mongitngit na.

  • Ayaw ipaambit ang inyong pinuy-anan [address] sa publiko o sa mga tawo nga inyong gitudloan.

  • Ayaw pangabli sa pultahan kon wala ka makaila sa tawo nga naa sa gawas o kon imong gibati nga dili komportable kaniya.

  • Dili gayud magtudlo og mga tawo diha sa inyong pinuy-anan o modapit sa mga tawo sa sulod gawas kon sila mga misyonaryo o lokal nga mga lider kansang mga pagbisita aprobado sa inyong mga lider sa misyon.

  • Dili gayud mopuyo diha sa usa ka balay diin ang dili minyo nga mga tawo nga dili pareho og sekso nagpuyo o diin ang kapikas sa pareha ninyo og gender kanunayng wala diha.

  • I-report dayon ngadto sa opisina sa misyon ang bisan unsa nga mga problema sa seguridad, lakip sa bisan kinsang tawo kinsa nagtan-aw sa inyong pinuy-anan o makapahimo ninyong mobati nga dili luwas.

  • Tuguti lang ang ubang mga misyonaryo sa parehas nga gender sa giaprobahan nga panagbayloay sa pagpalabay sa kagabhion diha sa inyong pinuy-anan.

  • Mogasto sa gikinahanglan nga pundo aron mapabilin nga luwas ang inyong pinuy-anan. Pananglitan, pulihi ang mga napundir nga mga suga kon gikinahanglan.

7.9.2

Kalimpyo ug Pagmintenar

Ipabilin nga limpyo ug hapsay ang inyong pinuy-anan:

  • Panglimpyo sa adlaw sa pagpangandam (tan-awa sa 2.5.1) ug sa kada adlaw kon gikinahanglan.

  • Himoa ang mga lakang sa pagpakgang sa mga insekto (tan-awa sa 7.7.4) sulod sa inyong pinuy-anan.

  • Pagkat-on kon unsaon sa paggamit nga luwas ang mga kasangkapan [appliances], ilabi na ang mga stove ug mga heater.

  • Ayaw pagbuhi og bisan unsang matang sa hayop.

Ang inyong pinuy-anan regular nga pagasusihon aron masiguro nga kini hitsas, luwas, ug maayong pagkamintinar.

Tan-awa kining duha ka video alang sa dugang nga impormasyon mahitungod sa seguridad sa pinuy-anan.

7.10

Seguridad sa Transportasyon

Sunda ang luwas nga mga lagda nga gilatid sa mosunod nga mga subseksyon.

7.10.1

Paglakaw

Kon maglakaw:

  • Kon mahimo, lakaw sugat sa nagpadulong nga dagan sa trapiko.

  • Subay diha sa nahayagan nga mga dapit kon ngitngit.

  • Usab-usaba ang mga ruta ug kapila kamo moagi sa palibut sa inyong area. Sunda ang espirituhanon nga mga pag-aghat sa pag-usab sa inyong ruta o tulumanon.

Tan-awa kining video alang sa dugang impormasyon mahitungod sa seguridad kon maglakaw.

7.10.2

Pagsakay og mga Bisikleta

Kon magbisikleta:

  • Sunda ang mga balaod ug mga lagda sa seguridad sa pagbisikleta, lakip sa pagsul-ob og sertipikadong luwas nga helmet, paggamit og reflective gear, ug paggamit og mga sinyas sa kamot kon tukma.

  • Ayaw gayud pag-asumer nga ikaw anaa sa hustong dalan.

  • Likayi ang pagbiyahe sa bisikleta sa dautan nga panahon, sa baga nga trapik, o kon ngitngit. Likayi ang magsikit o dug-ol kaayo nga magbisikleta.

  • Distansya sa imong kompanyon apan duol ra sa panan-aw.

  • Himoa nga kanunayng anaa sa maayong kondisyon ang bisikleta, lakip ang suga sa atubangan, likod, ug ang mga reflector sa kilid ug luyo.

  • Trangkahi o isiguro ang imong bisikleta kon dili mosakay niini.

Tan-awa kining video alang sa dugang impormasyon mahitungod sa luwas nga pagbisikleta.

7.10.3

Paggamit og mga Sakyanan

Kon gitahasan ka sa pagdrayb atol sa imong misyon, mopadagan lang og mga sakyanan sa misyon. Aron makadrayb og sakyanan sa misyon, kinahanglan legal ka nga makalisensya sa nasud diin ka nagserbisyo, ipakita nga nakasabut ka sa mga sumbanan sa sakyanan sa misyon, ug pangayo og pagtugot gikan sa mga lider sa misyon. Sunda usab kining mga lagda:

  • Sabta nga ikaw ug ang imong kompanyon maoy responsable sa seguridad, dili igsapayan kinsa ang nagdrayb.

  • Itaud ang mga seat belt, depensa nga magdrayb, gamita ang mga suga sa atubangan adlaw ug gabii, ug pag-alisto ug pagmatngon mapasahero ka man o ang magdrayb.

  • Kon nagdrayb ka, ayaw pabalda sa bisan unsang paagi, lakip sa paggamit sa mobile device o sa audio system sa sakyanan.

  • Kon ikaw ang pasahero, abagi ang drayber nga mahimong alisto.

  • Kon ikaw ang pasahero, pagbarug diha sa luwas nga distansya gawas sa sakyanan aron magiyahan ang drayber kon mopaatras siya sa sakyanan.

  • Alang sa seguridad ug sa tulubagon nga mga rason, dili ka mopasakay ngadto ni bisan kinsa gawas sa laing full-time nga mga misyonaryo nga parehas nimo og sekso.

  • Limitahi ang pagdrayb ngadto sa mga gilay-on nga ikaw gitugutan.

  • Ayaw og usba ang odometer o bisan unsang mga himan sa seguridad nga gitaud diha sa sakyanan.

  • Ipabilin nga limpyo ang sakyanan ug diha sa maayong pagpaayo.

  • Kon ikaw maaksidente, tan-awa ang packet nga What to Do If You Have an Accident, [Unsay Buhaton Kon Ikaw Maaksidente] nga kinahanglan anaa sa glove compartment sa sakyanan. Kontaka ang koordinitor sa sakyanan sa misyon sa higayon nga luwas na ang paghimo sa ingon.

Tan-awa kining video alang sa dugang nga impormasyon mahitungod sa seguridad sa sakyanan.

7.10.4

Paggamit og Pangpubliko nga Transportasyon

Kon mogamit og pangpubliko nga transportasyon:

  • Sakay lang og pangpublikong transportasyon nga aprobado sa inyong misyon.

  • Sinatia ang mga ruta sa pangpubliko nga transportasyon ug mga dapit kon asa kamo mobiyahe.

  • Lingkod duol sa drayber kon mahimo. Ibutang ang inyong mga bag sa inyong atubangan kon mao kini ang luwas nga buhaton.

7.11

Mga Ordinansa ug mga Panalangin sa Pagkapari

Gamita kining kinatibuk-ang lagda alang sa pagpahigayon sa mga ordinansa ug mga panalangin sa pagkapari. Ang impormasyon dinhi niining seksyon mao ang minubo sa kapitulo 20 sa Handbook 2: Pagpangalagad sa Simbahan (2010).

Timan-i: Sumala sa gipasabut diha sa mosunod nga mga seksyon, ang pipila ka mga ordinansa kinahanglan gayud nga awtorisado sa tigdumalang awtoridad kinsa naghupot sa tukma nga mga yawe.

7.11.1

Pagpangalagad diha sa Pagkapari: Kinatibuk-ang Lagda alang sa Tighupot sa Melchizedek nga Pagkapari

Ang mga naghupot sa Melchizedek nga Pagkapari kinahanglan nga maningkamot kanunay nga mahimong takus ug magiyahan sa Espiritu Santo. Kinahanglan sila nga mopahigayon sa matag ordinansa ug panalangin pinaagi sa ligdong nga paagi, mosiguro nga kini nakatuman sa mosunod nga mga kinahanglanon:

  1. Kinahanglan nga kini ipahigayon pinaagi sa ngalan ni Jesukristo.

  2. Kinahanglan nga ipahigayon kini pinaagi sa awtoridad sa pagkapari.

  3. Kinahanglan nga ipahigayon kini sa bisan unsa nga gikinahanglan nga pamaagi, sama sa paggamit sa sakto nga mga pulong o paggamit sa gibalaan nga lana.

  4. Kinahanglan nga kini tugutan sa nangulong awtoridad kinsa naghupot sa tukma nga mga yawe (sa kasagaran ang bishop ug presidente sa stake, o presidente sa misyon), kon gikinahanglan sumala sa mga instruksyon niini nga seksyon.

Kadtong kinsa mohatag og panalangin sa pagkapari mamulong sa mga pulong sa panalangin (“Ako [o kami] mopanalangin kanimo nga …”) kay sa mag-ampo (“Langitnong Amahan, palihug panalangini kini nga tawo nga …”).

Kon pipila ka kaigsoonan moapil sa ordinansa o panalangin, ang matag usa gaan nga mopatong sa iyang tuong kamot sa ulo sa tawo (o sa ilawom sa bata nga gipanalanginan) ug ang iyang wala nga kamot sa abaga sa igsoong lalaki sa iyang wala.

Ang kaigsoonan lamang nga naghupot sa gikinahanglan nga pagkapari ug takus ang mahimong mopahigayon og usa ka ordinansa o panalangin. Ingon nga giniyahan sa Espiritu, ang mga bishop ug mga presidente sa stake adunay katungod sa pagdapit sa kaigsoonan sa pagkapari kinsa dili pa hingpit nga takus sa templo sa pag-apil sa mga ordinansa ug mga panalangin (tan-awa sa Handbook 2: Pagpangalagad sa Simbahan, 20.1.2).

Ang pagdapit og daghang sakop sa pamilya, mga higala, ug mga lider sa pagtabang sa usa ka ordinansa o panalangin wala gidasig tungod kay lagmit lain kining tan-awon ngadto sa uban ug mahimong salikwaot ang pagpahigayon sa ordinansa.

7.11.2

Pagbunyag

Ang presidente sa misyon naghupot sa mga yawe alang sa pagbunyag sa mga kinabig. Ubos sa direksyon sa nagdumalang awtoridad, ang usa ka takus nga priest o naghupot sa Melchizedek nga Pagkapari mahimong mopahigayon sa ordinansa sa bunyag. Sa paghimo sa ingon, siya:

  1. Motindog diha sa tubig uban sa tawo nga bunyagan.

  2. Gunitan ang tuo nga bukton sa tawo sa iyang wala nga kamot (alang sa kasayon ug seguridad); ang tawo kinsa bunyagan mogunit sa iyang wala nga kamot ngadto sa wala nga bukton sa naghupot sa pagkapari.

  3. Mopataas sa iyang tuo nga bukton nga pinaeskwala.

  4. Mosulti sa tibuok nga ngalan sa tawo ug moingon, “Ingon nga sinugo ni Jesukristo, ako mobunyag kanimo sa ngalan sa Amahan, ug sa Anak ug sa Espiritu Santo. Amen” (Doktrina ug mga Pakigsaad 20:73).

  5. Tugutan ang tawo nga gunitan sa iyang tuo nga kamot ang iyang ilong (alang sa kasayon). Ang naghupot sa pagkapari mobutang sa iyang tuo nga kamot diha sa ibabaw nga bahin sa bukobuko sa tawo ug kompleto nga ituslob ang tawo, lakip ang gisul-ob nga saput.

  6. Motabang sa tawo sa pagkawas sa tubig.

Sumala sa gihulagway diha sa Handbook 2: Administering the Church [Tamdanan nga Basahon 2: Pagpangalagad sa Simbahan], 20.3.7, duha ka mga saksi mosiguro nga ang matag bunyag tukma nga gipahigayon. Ang bunyag kinahanglan nga usbon kon ang mga pulong wala masulti sa sakto sumala sa gihatag sa Doktrina ug mga Pakigsaad 20:73 o kon ang bahin sa lawas sa tawo o sinina wala matuslob sa hingpit.

7.11.3

Pagkumpirma

Ang presidente sa misyon naghupot sa mga yawe alang sa pagkumpirma sa mga kinabig. Hinuon, ang bishop modumala sa pagkahimo sa tanang kumpirmasyon. Siya mosiguro nga ang mga kinabig makumpirmahan sa sakrament miting sa ward diin sila nagpuyo, labing maayo sa Dominggo human sa ilang bunyag. Ang mga kinabig dili kumpirmahan diha sa serbisyo sa bunyag.

Usa o mas daghang mga naghupot sa Melchizedek nga Pagkapari ang mahimong moapil sa kumpirmasyon. Sila gaan nga mopatong sa ilang mga kamot sa ulo sa tawo. Dayon ang tawo kinsa nagpahigayon sa ordinasyon:

  1. Mosulti sa tibuok ngalan sa tawo.

  2. Mosulti nga ang ordinansa gipahigayon pinaagi sa awtoridad sa Melchizedek nga Pagkapari.

  3. Mokumpirma sa tawo nga usa ka miyembro sa Ang Simbahan ni Jesukristo sa mga Santos sa Ulahing mga Adlaw.

  4. Mogamit sa mga pulong “Dawata ang Espiritu Santo” (dili “Dawata ang gasa sa Espiritu Santo”).

  5. Mohatag sa panalangin sumala sa giya sa Espiritu.

  6. Motapos diha sa ngalan ni Jesukristo.

7.11.4

Pagbalaan sa Lana

Usa o daghan pang mga naghupot sa Melchizedek nga Pagkapari kinahanglan mobalaan sa lana sa oliba [olive oil] sa dili pa kini gamiton sa pagdihog sa masakiton o may balatian. Walay laing lana ang mahimong gamiton. Sa pagbalaan sa lana, ang usa ka naghupot sa pagkapari:

  1. Mogunit sa abli nga sudlanan sa lana sa oliba.

  2. Motawag sa Langitnong Amahan.

  3. Mosulti nga siya naglihok pinaagi sa awtoridad sa Melchizedek nga Pagkapari.

  4. Mobalaan sa lana (dili ang sudlanan) ug mogahin niini alang sa pagdihog ug sa pagpanalangin sa masakiton ug may balatian.

  5. Motapos diha sa ngalan ni Jesukristo.

7.11.5

Pagpangalagad sa Masakiton ug may mga Balatian

Si Jesus mihatag og awtoridad sa pagkapari ngadto sa Iyang mga Apostoles sa “pag-ayo sa mga sakit, ug sa pagpagulag mga yawa” (Marcos 3:15). Ang mga naghupot sa Melchizedek nga Pagkapari adunay sama nga awtoridad. Gamita kini nga gasa sa tukma nga paagi ug sa kanunay.

Ang mga naghupot sa Melchizedek nga Pagkapari mao lamang ang mangalagad sa masakiton o may balatian. Sa kasagaran duha o mas daghan nga naghupot sa pagkapari ang mangalagad sa masakiton, apan mahimo ra og usa ang mopahigayon sa pagdihog ug sa pagsilyo kon gikinahanglan.

Kon walay gibalaan nga lana, usa ka panalangin mahimong ihatag pinaagi sa awtoridad sa pagkapari nga wala ang pagdihog.

Ang usa ka takus nga bana o amahan nga naghupot sa Melchizedek nga Pagkapari sa kasagaran mangalagad sa masakiton nga mga sakop sa iyang pamilya.

Ang mga kaigsoonan kinahanglang mangalagad sa masakiton sumala sa paghangyo sa tawo nga masakiton o niadtong suod kaayo sa tawo aron ang mga panalangin mag-agad sa ilang hugot nga pagtuo. Ang mga naghupot sa Melchizedek nga Pagkapari nga mobisita sa mga ospital kinahanglan dili mohangyo nga hatagan og mga oportunidad sa pagpangalagad sa masakiton.

Kon ang usa ka tawo mohangyo og sobra sa usa ka panalangin sa mao ra gihapon nga sakit, wala na kinahanglana nga ang naghupot sa priesthood modihog pa niya sa lana human sa una nga panalangin. Hinoon, siya mohatag og panalangin pinaagi sa pagpandong sa mga kamot ug pinaagi sa awtoridad sa pagkapari.

Ang pagpangalagad ngadto sa masakiton adunay duha ka bahin: (1) pagdihog sa gibalaan nga lana ug (2) pagsilyo sa pagdihog.

Pagdihog sa Gibalaan nga Lana

Ang pagdihog sa lana himoon sa usa ka naghupot sa Melchizedek nga Pagkapari. Siya:

  1. Mobutang og usa ka tulo sa gibalaan nga lana sa ulo sa tawo.

  2. Mopatong nga gaan sa iyang mga kamot sa ulo sa tawo ug motawag sa tibuok ngalan sa tawo.

  3. Mosulti nga siya naglihok pinaagi sa awtoridad sa Melchizedek nga Pagkapari.

  4. Mosulti nga siya nagdihog gamit ang lana nga gibalaan alang sa pagdihog ug pagpanalangin sa masakiton ug may balatian.

  5. Motapos diha sa ngalan ni Jesukristo.

Pagsilyo sa Pagdihog

Kasagaran, duha o mas daghang naghupot sa Melchizedek nga Pagkapari ang mobutang sa ilang mga kamot diha sa ulohan sa tawo aron sa pagsilyo sa pagdihog; apan, mahimong usa ra ka naghupot sa Melchizedek nga Pagkapari ang mohatag sa panalangin, kon gikinahanglan. Kon magsilyo sa pagdihog, ang naghupot sa Melchizedek nga Pagkapari:

  1. Motawag sa tawo sa iyang tibuok nga ngalan.

  2. Mosulti nga siya nagsilyo sa pagdihog pinaagi sa awtoridad sa Melchizedek nga Pagkapari.

  3. Mohatag og mga pulong sa panalangin sumala sa giya sa Espiritu.

  4. Motapos diha sa ngalan ni Jesukristo.

7.11.6

Paghatag og mga Panalangin sa Kahupay ug Tambag

Ang mga naghupot sa Melchizedek nga Pagkapari mahimo usab nga mohatag og mga panalangin sa kahupayan ug tambag ngadto sa uban kinsa mohangyo niini. Alang niini nga mga panalangin, usa o mas daghan nga naghupot sa pagkapari ang mobutang sa ilang mga kamot diha sa ulohan sa tawo. Dayon ang naghupot sa pagkapari kinsa mohatag sa panalangin:

  1. Motawag sa tawo sa iyang tibuok nga ngalan.

  2. Mosulti nga ang panalangin gipahigayon pinaagi sa awtoridad sa Melchizedek nga Pagkapari.

  3. Mohatag og mga pulong sa panalangin sumala sa giya sa Espiritu.

  4. Motapos diha sa ngalan ni Jesukristo.

Ang mga misyonaryo nga mohatag og mga panalangin ngadto sa mga miyembro kinahanglan direktang mo-report sa panalangin ngadto sa bishop o pinaagi sa presidente sa korum sa mga elder o sa lider sa misyon sa ward, kinsa mosulti dayon sa bishop.