Ngaahi Fehuʻi ʻInitaviu ki he Kau Teuteu Ngāue Fakafaifekaú

ʻOku fakaafeʻi ʻa e kau pīsopé mo e kau palesiteni siteikí ke “fakahoko ha ngaahi ʻinitaviu fakalaumālie fakaʻāuliliki, pea mo ha ʻinitaviu langaki moʻui” mo e kau faifekau takitaha ʻo fakaʻaongaʻi ʻa e ngaahi fehuʻi ko ʻení (vakai, Tohi Tuʻutuʻuni Fakakātoá, 24.4.2).

1. ʻOku ʻi ai haʻo tui mo ha fakamoʻoni ki he ʻOtua, ko e Tamai Taʻengatá; ki Hono ʻAlo ko Sīsū Kalaisí; pea mo e Laumālie Māʻoniʻoní?

2. ʻOku ʻi ai haʻo fakamoʻoni ki he Fakalelei ʻa Sīsū Kalaisí mo Hono tufakanga ko ho Fakamoʻui mo e Huhuʻí?

   Kātaki ʻo vahevahe mai hoʻo fakamoʻoní kiate au. Kuo tākiekina fēfē hoʻo moʻuí ʻe he Fakalelei ʻa Sīsū Kalaisí?

3. ʻOku ʻi ai haʻo fakamoʻoni ki hono Fakafoki Mai ʻo e ongoongolelei ʻo Sīsū Kalaisí pea mo e moʻoni ʻo e Tohi ʻa Molomoná?

   Kuo fakaloloto fēfē ʻe he mahino ʻokú ke maʻu ki he ongoongolelei ʻo Sīsū Kalaisi kuo fakafoki maí pea mo hoʻo ako ʻo e Tohi ʻa Molomoná hoʻo vā fetuʻutaki mo Sīsū Kalaisí?

4. ʻOkú ke poupouʻi ʻa e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e palōfita, tangata kikite, mo e tangata maʻu fakahā pea ko e tangata pē ia ʻe taha he māmaní ʻoku fakamafaiʻi ke ne ngāue ʻaki ʻa e ngaahi kī kotoa ʻo e lakanga fakataulaʻeikí?

   ʻOkú ke poupouʻi ʻa e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko e kau palōfita, kau tangata kikite, mo e kau tangata maʻu fakahā?

   ʻOkú ke poupouʻi mo e kau Taki Māʻolunga kehé pea mo e kau taki fakalotofonua ʻo e Siasí?

5. Kuo ʻosi folofola ʻa e ʻEikí ke “fai ʻa e meʻa kotoa pē ʻi he maʻa” ʻi Hono ʻaó (Tokāteline mo e Ngaahi Fuakava 42:41).

   Ko e hā ka fakakau ai ʻi hoʻo fāifeinga ke maʻa ʻi he ʻao ʻo e ʻOtuá ʻa e fakaʻehiʻehi mei he ponokalafí?

   Mei he mahino ʻokú ke maʻú, ko e hā ʻene ʻuhinga ke moʻui ʻaki ʻa e fono ʻo e angamaʻá?

   ʻOkú ke feinga ke moʻui maʻa ʻi hoʻo ngaahi fakakaukaú mo e tōʻongá?

   ʻOkú ke talangofua ki he fono ʻo e angamaʻá?

6. ʻOkú ke muimui ki he ngaahi akonaki ʻo e Siasi ʻo Sīsū Kalaisí ʻi hoʻo tōʻonga fakafoʻituituí pea ʻi hoʻo tōʻonga he kakaí mo e kau mēmipa ho fāmilí mo e niʻihi kehé?

7. ʻOkú ke poupouʻi pe taukaveʻi ha faʻahinga akonaki, angafai, pe tokāteline ʻoku fehangahangai mo ia ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?

8. ʻOkú ke feinga nai ke tauhi ʻa e ʻaho Sāpaté ke māʻoniʻoni, ʻi ʻapi pea mo e lotú fakatouʻosi; ʻalu ki hoʻomou ngaahi fakatahá; teuteu pea maʻu ʻi he tuʻunga taau ʻa e sākalamēnití; pea moʻui ʻo fakatatau mo e ngaahi fono mo e ngaahi fekau ʻo e ongoongoleleí?

9. ʻOkú ke feinga ke faitotonu ʻi he ngaahi meʻa kotoa ʻokú ke fakahokó?

10. ʻOkú ke totongi vahehongofulu kakato?

11. Mei he mahino ʻokú ke maʻú, ko e hā ʻene ʻuhinga ke moʻui ʻaki ʻa e Lea ʻo e Potó?

    ʻOkú ke talangofua ki he Lea ʻo e Potó?

12. ʻI hoʻo hoko ko ha faifekau taimi kakató, te ke moʻui fakatatau nai ki he ngaahi tuʻunga moʻui kuó ta aleaʻí?

13. (ʻOku toʻo ʻa e fehuʻi ko ʻení ʻi he taimi ʻoku ʻinitaviu ai ha mēmipa ʻoku teʻeki maʻu ʻenitaumeni.) ʻOkú ke tauhi ʻa e ngaahi fuakava naʻá ke fai ʻi he temipalé?

14. (ʻOku toʻo ʻa e fehuʻi ko ʻení ʻi he taimi ʻoku ʻinitaviu ai ha mēmipa ʻoku teʻeki maʻu ʻenitaumeni.) ʻOkú ke fakaʻapaʻapaʻi nai ho faingamālie toputapu ke tui ʻa e kāmení ʻo hangē ko e founga ʻoku fakahinohino atu ʻi he ngaahi ouau ʻinisitolí? (Lau ʻa e fakamatala “Ko Hono Tui ʻo e Kāmeni Fakatemipalé” ʻoku ʻoatu ʻi laló, ki he mēmipa takitaha kotoa pē.)

15. Ko e hā ʻene ʻuhinga kiate koe ke fakatomala, ʻo kau ai hono vete ha ngaahi angahala mamafa ki he kau maʻu mafai lakanga fakataulaʻeikí?

    ʻOku ʻi ai ha faʻahinga angahala mamafa ʻi hoʻo moʻuí ʻoku fie maʻu ke fakaleleiʻi mo e kau maʻu mafai ʻo e lakanga fakataulaʻeikí ko ha konga ia ʻo hoʻo fakatomalá?

16. ʻOkú ke pehē ʻokú ke taau nai ke fakafofongaʻi ʻa Sīsū Kalaisi mo Hono Siasi kuo fakafoki maí ko ha faifekau?

Ko Hono Tui ʻo e Kāmeni Temipalé

“ʻOku fakamanatu mai ʻe he kāmeni ʻo e lakanga fakataulaʻeiki māʻoniʻoní ʻa e veili ʻi he temipalé, pea ko e veili ko iá ko e fakataipe ia ʻo Sīsū Kalaisi. ʻI hoʻo tui ho kāmení, ʻokú ke tui ai ha fakaʻilonga toputapu ʻo Sīsū Kalaisi. Ko hono tui iá ko hano fakahaaʻi fakatuʻasino ia hoʻo tukupā fakalaumālie ke muimui kiate Iá. ʻOku hoko foki ʻa e kāmení ko ha fakamanatu ʻo hoʻo ngaahi fuakava fakatemipalé. ʻOku totonu ke ke tui ʻa e kāmení ʻi he ʻaho mo e pō kotoa pē ʻi he kotoa hoʻo moʻuí. ʻI he taimi kuo pau ke toʻo ai koeʻuhí ko ha ngaahi ʻekitivitī he ʻikai lava ʻo fakahoko lelei lolotonga hono tui ʻo e kāmení, feinga ke toe tui ia ʻi he vave tahá. ʻI hoʻo tauhi hoʻo ngaahi fuakavá, kau ai ʻa e faingamālie toputapu ke tui ʻa e kāmení ʻo hangē ko ia kuo fakahinohino atu ʻi he ngaahi ouau ʻinisitolí, te ke maʻu lahi ange ai ʻa e ʻaloʻofa, maluʻi, ivi, mo e mālohi ʻo e Fakamoʻuí” (Tohi Tuʻutuʻuni Fakakātoá, 26.3.3.2).