Titiraki Aika Bwainaki n te Intawiu ibukiia Mitinare aika a Tauraoi

Bitiobi ao beretitenti n te titeiki a kaoaki bwa a na “karaua ni karaoa, te kakae ma te tamnei, ao te intawiu ae kaunganano” ma naake a tauraoi n tatabemaniia ni kabongai titiraki aikai (taraa Aeniboki ni Kabuta, 24.4.2).

1. Iai am onimaki inanom ao am koaua iroun te Atua, te Tama ae Akea Tokina; Natina, Iesu Kristo; ao te Tamnei ae Raoiroi?

2. Iai am koaua ibukin Ana Mwakuri ni Kamaiu Iesu Kristo ao n Ana beku ngkai am Tia Kamaiu ao te Tia Kabooira?

   Taiaoka tibwaua am koaua ma ngai. E kanga ana Mwakuri ni Kamaiu Iesu Kristo ni karikirakea maium?

3. Iai am koaua ibukin Kaokan ana euangkerio Iesu Kristo ao koauan ana Boki Moomon?

   E kanga am atatai n ana euangkerio Iesu Kristo ae tia ni kaokaki ao am kamatebwai n ana Boki Moomon n kakorakora reitakim ma Iesu Kristo?

4. Ko kamatoa te Beretitenti n ana Ekaretia Iesu Kristo ibukiia Aika Itiaki ni Boong aika Kaitira bwa te burabeti, te tia mamata, te tia karekei kaotioti ao bon tii ngaia te aomata i aon te aonaaba ae e kariaiakaki ni kamwakuri kiingin te nakoanibonga ni kabane?

   Ko kamatoaia kaain te Moan Beretitentii ao te Kooram n Abotoro n te Tengaun ma Uoman bwa burabeti, taan mamata, ao taan karekei kaotioti?

   Ko kamatoaia Mataniwi ni Kabuta ake tabeman ao mataniwi n te tabo n te Ekaretia?

5. E a tia te Uea n taekinna bwa bwaai nako ana bane ni “karaoaki n te itiaki” i Matana (Reirei ao Berita aika Tabu 42:41).

   E na kanga ukoran te itiaki imatan te Atua n irekereke ma kararoaan tamnei aika tangako?

   Man ootam, tera e nanonaki n maiuakinan tuan te itiaki?

   Ko kekeiaki ibukin ataakin te itiaki n am iango ao n anuam?

   Ko kawakina tuan te itiaki?

6. Ko iriira ana reirei ana Ekaretia Iesu Kristo n anuam aika aki noraki ao aika noraki ma am utu ao tabeman?

7. Ko boutokai ao ni kaungai taian reirei, mwakuri, ke koaua aika a kaitara ma ake n ana Ekaretia Iesu Kristo ibukiia Aika Itiaki ni Boong aika Kaitira?

8. Ko kekeiaki ni kawakina te bong ae te Taabati n tabuia, ni mweengam ao n te taromauri, n kaekaei am bootaki, ni katauraoiko nakon ao ni kororaoi n anaa te toa; ao ni maiuakina maium ni kabooraoia ma tuua ao tuan te euangkerio?

9. Ko kekeiaki bwa ko na kokoaua ni bwaai ni kabane aika ko karaoi?

10. Ko kakabwaka am kabwianibwai n ae e bwanin?

11. Man ootam, tera ae e nanonaki n maiuakinan Tuan te Mauri?

    Ko kawakina Tuan te Mauri?

12. Ngkai te mitinare ngkoe ae bwanin ana tai ko kona ni maiu ni kaineti ma kainiaire aika a tia ni maroroakinaki?

13. (E katukaki te titiraki aio ngkana e karaoaki te intawiu ibukin te membwa are e tuai n entaau.) Ko kawakin am berita aika tabu ake ko karaoi inanon te tembora?

14. (E katukaki te titiraki aio ngkana e karaoaki te intawiu ibukin te membwa are e tuai n entaau.) Ko karinea tibwangam ae tabu ni bwaina te kamenti n aron ae baireaki inanon te moan waaki ibukin taian otenanti? (Wareka te rongorongo “Bwainakin te Kaamenti n te Tembora”, ae e kaairaki inano, nakoia membwa n tatabemaniia nako).

15. Tera ae nanonaki iroum n te rairannano, n raonaki ma kaotan buure aika rawawata nakoia aika iai te kariaiakaki irouia n te nakoanibonga?

    Iai am bure aika a kakaiaki inanon maium ae ko riai ni kaitiaki ma mataniwi n te nakoanibonga bwa mwakoron am rairannano?

16. Ko iangoia i bon iroum bwa ko tau n tei ibukin Iesu Kristo ao Ana Ekaretia ae e a tia ni kaokaki bwa te mitinare?

Bwainakin te Kaamenti n te Tembora

“Te kaamenti ibukin te nakoanibonga ae tabu e kauringiira ibukin te rabuna n te tembora, ao te rabuna anne bon te kanikinaa ibukin Iesu Kristo. Ngkana ko bwaina te kaamenti, ko katokaa iaom te kanikinaa ae tabu ibukin Iesu Kristo. Bwainakina bon kaotana mai itinanikum am motinnano inanom ni kan Iriiria. Te kaamenti bon te kauring naba ibukin am berita aika tabu n te tembora. Ko riai ni bwaina te kaamenti n te ngaina ao n te bong ni maium ae bwanin. Ngkana e na riai buutakina ibukin waaki ni kakukurei aika e aki riai kabonganakin kaamenti iai, taraia bwa ko na manga bwainna n te tai ae waekoa. Ngkai ko kawakin am berita aika tabu, n raonaki ma arom ae tabu ni bwaina te kaamenti n aron ae baireaki i nanon moan wakinan taian otenanti, ko na waekoa ni karekea ana nanoanga, kamanomano, kakorakora, ao mwaakan te Tia Kamaiu”(Aeniboki ni Kabuta, 26.3.3.2).