Taro ni Vakatataro vei ira na Vakarau lai Kaulotu

Era sa sureti na bisopi kei na peresitedi ni iteki me ra “vakayacora na veivakatarogi matailalai, vakasaqaqara vakayalo, ka veivakauqeti” vei ira yadua na daukaulotu ena kena vakayagataki na taro oqo (raica na iVoladusidusi Raraba, 24.4.2).

1. O vakabauta ka vakadinadinataka na Kalou, na Tamada Tawamudu; Na Luvena, o Jisu Karisito; kei na Yalo Tabu?

2. E tiko na nomu ivakadinadina ni Nona Veisorovaki o Jisu Karisito kei na Nona itavi vaka nomu iVakabula ka Dauveivueti?

   Yalovinaka wasea vei au na nomu ivakadinadina. Sa bau veivakauqeti vakacava ki na nomu bula na Veisorovaki nei Jisu Karisito?

3. E tiko na nomu ivakadinadina me baleta na Vakalesui mai ni kosipeli i Jisu Karisito kei na dina ni iVola i Momani??

   Sa vakayaco ka beka vakacava na nomu kila na kosipeli vakalesui mai i Jisu Karisito kei na nomu vakadinadinataki Jisu Karisito, na nomu vulica na iVola iMomani?

4. O tokona na Peresitedi ni Lotu i Jisu Karisito ni Yalododonu Edaidai ni parofita, daurairai, ka dauvakatakila ka sa ikoya duadua ga na tamata e vuravura e vakadonui me vakayagataka na idola kece sara ni matabete?

   O tokoni ira beka na lewe ni Mataveiliutaki Taumada kei na Kuoramu ni Apositolo Le Tinikarua ni ra parofita, daurairai, ka daunivakatakila?

   O tokoni ira na Vakaitutu Raraba kei ira na iliuliu ni Lotu ena noda vanua?

5. Sa kaya na Turaga ni veika kece me “caka vakasavasava” e Matana (Vunau kei na Veiyalayalati 42:41).

   Na cava na vuna ena okati kina na sasaga ni savasava ena mata ni Kalou na dro tani mai na iyaloyalo vakasisila?

   Mai na nomu kila, na cava na ibalebale ni kena bulataki na lawa ni tiko savasava?

   O tovolea me savasava na nomu vakasama kei na itovo?

   O talai rawarawa tiko kina lawa ni tiko savasava?

6. O muria tiko na ivakavuvuli ni Lotu i Jisu Karisito ena nomu bula kei na nomu veimaliwai kei ira na nomu lewe ni vuvale kei ira tale eso?

7. O tokona se tutaka na ivakavuvuli, ivalavala, se ivunau e veisaqasaqa kei na kena ena Lotu i Jisu Karisito ni Yalododonu Edaidai?

8. O tovolea tiko mo vakatabuya na Siga ni Vakacecegu, e vale kei ivalenilotu; tiko ena nomu veisoqoni; vakavakarau ka bula kilikili mo vakaivotavota ena sakaramede; ka bulataka na nomu bula me salavata kei na lawa kei na ivakaro ni kosipeli?

9. O tovolea mo dau dina ena veika kece o cakava?

10. O dau sauma vakadodonu na katini?

11. Mai na nomu kila, na cava na ibalebale ni vakamareqeta na Vosa ni Vuku?

    O na muria beka na Vosa ni Vuku?

12. Me vaka o dua na daukaulotu tudei o na bulataka beka na ivakatagedegede oqo eda sa veivosakitaka?

13. (Na taro oqo me kua ni tarogi vei ira na lewenilotu sega ni vakaedaumeni.) O dau maroroya na veiyalayalati o cakava ena valetabu?

14. (Na taro oqo me kua ni tarogi vei ira na lewenilotu sega ni vakaedaumeni.) O dau rokova na nomu madigi tabu mo daramaka na qameni me vaka e dusimaki ena cakacaka vakalotu ni inisitori? (Wilika na itukutuku ni “Daramaki ni Qameni ni Valetabu,” sa toka e ra, vei ira yadua na lewenilotu).

15. Na cava na kena ibalebale vei iko na veivutuni, oka kina na vakatusa na ivalavala ca bibi vei ira na vakailesilesi ni matabete?

    E tu beka eso na ivalavala ca bibi ena nomu bula ka dodonu me tusanaki vei ira na matabete vakatulewa me tiki ni nomu veivutuni?

16. O nanuma beka ni o sa kilikili mo matataki Jisu Karisito kei na Nona Lotu vakalesui mai me vaka e dua na daukaulotu?

Daramaki ni Qameni ni Valetabu

“Na qameni ni matabete tabu e vakananuma vei keda na ilati ena valetabu, na ilati oya e ivakatakarakara ni Jisu Karisito. Ni o dara na nomu qameni, o sa daramaka tiko na ivakatakarakara tabu i Jisu Karisito. Ni da daramaka eda vakaraitaki ni da yalataka me da muri Koya. Na qameni e ivakananumi ni nomu veiyalayalati ni valetabu. E dodonu mo daramaka na qameni ena siga kei na bogi ena nomu bula taucoko. Gauna e dodonu me luvati kina ena vuku ni itaviqaravi e sega rawa ni vakayacori ena kena daramaka na qameni, tovolea mo daramaka tale ena kena gauna totolo. Nio rokova na nomu veiyalayalati, oka kina na itavi tabu mo dara na qameni me vaka e vakaroti ena cakacaka vakalotu ni inisitori, ena levu cake na nomu rawata na loloma veivueti, veitaqomaki, igu, kei na kaukauwa” (iVoladusidusi Raraba, 26.3.3.2).