Mga Pangutana sa Pag-interbiyo alang sa Umaabot nga mga Misyonaryo

Ang mga bishop ug mga presidente sa stake gidapit nga “mopahigayon og ganid, espirituwal nga pagsiksik, ug makapabayaw nga mga interbiyo” sa matag kandidato nga misyonaryo gamit ang mosunod nga mga pangutana (tan-awa sa Kinatibuk-ang Tamdanan nga Basahon, 24.4.2).

1. Ikaw ba adunay pagtuo ug pagpamatuod sa Dios, ang Amahan sa Kahangtoran; sa Iyang Anak, si Jesukristo; ug sa Espiritu Santo?

2. Ikaw ba adunay pagpamatuod sa Pag-ula ni Jesukristo ug sa Iyang tahas isip imong Manluluwas ug Manunubos?

   Palihog ipakigbahin ang imong pagpamatuod kanako. Sa unsang paagi ang Pag-ula ni Jesukristo nakaimpluwensya sa imong kinabuhi?

3. Ikaw ba adunay pagpamatuod sa Pagpahiuli sa ebanghelyo ni Jesukristo ug sa kamatuoran sa Basahon ni Mormon?

   Sa unsang paagi nga ang imong pagsabot sa gipahiuli nga ebanghelyo ni Jesukristo ug ang imong pagtuon sa Basahon ni Mormon nakapalawom sa imong relasyon uban ni Jesukristo?

4. Ikaw ba nagpaluyo sa Presidente sa Ang Simbahan ni Jesukristo sa mga Santos sa Ulahing mga Adlaw isip propeta, manalagna, ug tigpadayag ug isip mao ang bugtong tawo sa yuta nga gitugotan sa pagdumala sa tanang yawe sa pagkapari?

   Ikaw ba nagpaluyo sa Unang Kapangulohan ug sa Korum sa Napulog Duha ka Apostoles isip mga propeta, mga manalagna, ug mga tigpadayag?

   Ikaw ba nagpaluyo sa ubang Kinatibuk-ang mga Awtoridad ug sa lokal nga mga lider sa Simbahan?

5. Ang Ginoo miingon nga ang tanang butang “buhaton sa kalimpyo” sa Iyang atubangan (Doktrina ug mga Pakigsaad 42:41).

   Ngano man nga ang pagpaningkamot nga magmalimpyo sa atubangan sa Dios naglakip sa paglikay sa pornograpiya?

   Sa imong panabot, unsay ipasabot sa pagsunod sa balaod sa kaputli?

   Ikaw ba naningkamot alang sa moral nga kalimpyo sa imong mga hunahuna ug kinaiya?

   Ikaw ba nagsunod sa balaod sa kaputli?

6. Ikaw ba nagsunod sa mga pagtulun-an sa Ang Simbahan ni Jesukristo diha sa imong pribado ug publiko nga kinaiya kauban sa mga sakop sa imong pamilya ug sa uban?

7. Ikaw ba nagsuporta o nag-awhag og bisan unsa nga mga pagtulun-an, mga binuhatan, o doktrina nga nahisupak niadtong gidawat sa Ang Simbahan ni Jesukristo sa mga Santos sa Ulahing mga Adlaw?

8. Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takos nga pag-ambit sa sakramento; ug sa pagpakabuhi subay sa mga balaod ug mga kasugoan sa ebanghelyo?

9. Ikaw ba naningkamot nga magmatinuoron sa tanan nimong gibuhat?

10. Ikaw ba hingpit nga tigbayad og eksakto nga ikapulo?

11. Sa imong panabot, unsay ipasabot sa pagsunod sa Balaod sa Kaalam?

    Nagsunod ka ba sa Pulong sa Kaalam?

12. Isip full-time nga misyonaryo magpakabuhi ka ba sumala niini nga mga sumbanan nga atong gihisgotan?

13. (Kini nga pangutana laktawan ra kon mag-interbiyo og usa ka miyembro nga wala pa matugahi.) Gituman ba nimo ang mga pakigsaad nga imong gihimo sa templo?

14. (Kini nga pangutana laktawan ra kon mag-interbiyo og usa ka miyembro nga wala pa matugahi.) Imo bang gitahod ang imong sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory? (Basaha ang pamahayag sa “Pagsul-ob sa Garment sa Templo,” nga gilakip sa ubos, ngadto sa matag miyembro).

15. Alang nimo unsay ipasabot sa paghinulsol, lakip na ang pagkompisal sa bug-at nga mga sala ngadto sa mga awtoridad sa pagkapari?

    Aduna bay bug-at nga mga sala sa imong kinabuhi nga kinahanglang iresolbar uban sa mga awtoridad sa pagkapari isip kabahin sa imong paghinulsol?

16. Gikonsiderar ba nimo ang imong kaugalingon nga takos nga morepresentar ni Jesukristo ug sa Iyang gipahiuli nga Simbahan isip usa ka misyonaryo?

Pagsul-ob sa Garment sa Templo

“Ang garment sa balaan nga pagkapari nagpahinumdom kanato sa tabil diha sa templo, ug kana nga tabil nagsimbolo ni Jesukristo. Sa higayon nga imong isul-ob ang imong garment, imong gisul-ob ang usa ka sagrado nga simbolo ni Jesukristo. Ang pagsul-ob niini usa ka panggawas nga pagpahayag sa imong kinahiladman nga pasalig sa pagsunod Kaniya. Ang garment usa usab ka pahinumdom sa imong mga pakigsaad sa templo. Kinahanglan nimong isul-ob ang garment matag adlaw ug gabii sa tibuok nimong kinabuhi. Kon gikinahanglan kining huboon alang sa mga kalihokan nga dili makataronganon nga mabuhat samtang nagsul-ob sa garment, paninguha sa pagsul-ob og balik niini sa labing daling panahon. Samtang ikaw maghupot sa imong mga pakigsaad, lakip ang sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory, ikaw adunay mas dako nga akses sa kaluoy, proteksiyon, kalig-on, ug gahom sa Manluluwas” (Kinatibuk-ang Tamdanan nga Basahon, 26.3.3.2).