Mai, pe’e mai

Ha’api’i ’e ’apo mai ’e fa’a’ohipa i te mau a’ora’a nō te ’āmuira’a rahi

E ’ohipa faufa’a rahi tā te mau pupu peresibutero ’e tā te mau Sōtaiete Tauturu i roto i te ’ohipa nō te fa’aorara’a ’e te fa’ateiteira’a. I roto i tā rātou mau rurura’a i te sābati, e tāu’aparau rātou e nāhea i te fa’a’ohipa i te mau ha’api’ira’a i roto i te mau a’ora’a o te ’āmuira’a rahi i tupu iho nei, nō tā rātou mau tauto’ora’a i roto i teie ’ohipa. E mā’iti mai te mau peresidenira’a o te pupu peresibutero ’e o te Sōtaiete Tauturu i te hō’ē a’ora’a nō te ’āmuira’a rahi, nō te ’apo mai i te mau ha’api’ira’a i roto, i roto i te mau rurura’a tāta’itahi i te sābati, mai te au i te mau hina’aro o te mau melo ’e te arata’ira’a a te Vārua. E nehenehe te ’episekōpo ’aore rā te peresideni titi e hōro’a ato’a mai i tō rāua mana’o nō te a’ora’a e tuatāpapa atu. I te rahira’a taime, e mā’iti nā mua te feiā fa’atere i te mau a’ora’a a te mau melo nō te Peresidenira’a Mātāmua ’e a te pupu nō te Tino ’Ahuru Ma Piti ’āpōsetolo. Terā rā, e nehenehe te mau a’ora’a ato’a o te ’āmuira’a i tupu iho nei e tāu’aparauhia.

E fa’atumu te mau ’orometua i ni’a i te rāve’a nō te tauturu i te mau melo ’ia fa’a’ohipa i te mau ha’api’ira’a o te mau a’ora’a o te ’āmuira’a rahi i roto i tō rātou orara’a. E ’imi te feiā fa’atere ’e te mau ’orometua i te mau rāve’a nō te fa’aitoito i te mau melo ’ia tuatāpapa i te a’ora’a i mā’itihia hou ’a haere mai ai i te rurura’a.

Nō te mau ha’amāramaramara’a hau atu nō ni’a i te mau rurura’a a te pupu peresibutero ’e a te Sōtaiete Tauturu, hi’o Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 8.2.1.2, 9.2.1.2, ChurchofJesusChrist.org.

Fa’anaho i te ha’api’ira’a

E tauturu te mau uira’a i muri nei i te mau ’orometua ’a fa’anaho ai rātou i te tuatāpapara’a o te a’ora’a o te ’āmuira’a rahi nō te ha’api’i i te ta’ata. ’Ia hina’arohia, e paraparau atu te mau ’orometua i te peresidenira’a pupu peresibutero ’aore rā i te peresidenira’a Sōtaiete Tauturu, ’a feruri ai rātou i teie mau uira’a.

Nō te aha te peresidenira’a pupu peresibutero ’aore rā te peresidenira’a Sōtaiete Tauturu i mā’iti ai i teie a’ora’a ? E aha tā rātou e tīa’i nei i muri a’e i te ’āparaura’a nō ni’a i teie a’ora’a ’ia ’ite te mau melo ’e ’ia rave rātou ?
E aha tā te ta’ata a’o e hinaʼaro i te mau melo ’ia māramarama ? E aha te mau parau tumu o te ’evanelia tāna e ha’api’i nei ? Nō te aha teie mau parau tumu e tano ai i ni’a i tā’u pupu peresibutero ’aore rā i ni’a i tā’u Sōtaiete Tauturu ?
E aha te mau pāpa’ira’a mo’a tā te ta’ata a’o i fa’a’ohipa nō te turu i tāna a’ora’a ? Tē vai ra ānei te tahi atu mau ’īrava pāpa’ira’a mo’a tā te mau melo e nehenehe e tai’o nō te fa’ahōhonu atu ā i tō rātou māramaramara’a ? (E ’ite mai paha ’oe i te tahi i roto i te mau fa’ata’ara’a i te pae hope’a o te a’ora’a ’aore rā, i roto i te Arata’i nō te mau pāpa’ira’a mo’a [scriptures.ChurchofJesusChrist.org].)
E aha te mau uira’a tā’u e nehenehe e ui atu, nō te tauturu i te mau melo ’ia feruri hōhonu ’e ’ia fa’a’ohipa i te mau ha’api’ira’a i roto i te a’ora’a ? E aha te mau uira’a e tauturu ia rātou ’ia ’ite i te faufa’a o teie mau ha’api’ira’a i roto i tō rātou orara’a, tō rātou ’utuāfare ’e i roto i te ’ohipa a te Fatu ?
E aha tā’u e nehenehe e rave nō te tītau manihini i te Vārua i roto i tā mātou rurura’a ? E aha tā’u e nehenehe e fa’a’ohipa nō te ha’amaita’i atu ā i te ’āparaura’a, mai te mau ’ā’amu, te mau fa’ahōho’ara’a, te pehe ’aore rā te ’ohipa anoihi ? E aha tā te ta’ata a’o i rave nō te tauturu i te mau melo ’ia hāro’aro’a i tāna a’ora’a ?
’Ua tu’u mai ānei te ta’ata a’o i te tahi mau tītaura’a manihini ? Nāhea vau e nehenehe ai e tauturu i te mau melo ’ia roa’a te hina’aro ’ia pe’e i teie mau tītaura’a ?

Mau mana’o ’ātivite

’Ua rau te mau rāve’a a te mau ’orometua nō te tauturu i te mau melo ’ia ’apo mai i te ha’api’ira’a ’e ’ia fa’a’ohipa i te mau a’ora’a o te ’āmuira’a rahi. Teie te tahi mau hi’ora’a ; pēnei a’e e roa’a mai i te mau ’orometua te tahi atu ā mana’o e tano maita’i nā tā rātou pupu peresibutero ’aore rā nō te Sōtaiete Tauturu.

Fa’a’ohipa i te mau parau mau i roto i tō tātou orara’a. E ani i te mau melo ’ia tai’o i te a’ora’a o te ’āmuira’a ma te ’imi i te mau parau mau ’o tē tauturu ia rātou ’ia fa’aoti i te ’ohipa tā te Atua i hōro’a ia rātou, ’ei ta’ata hō’ē ’aore rā ’ei pupu peresibutero ’aore rā ’ei Sōtaiete Tauturu. ’Ei hi’ora’a, e aha tā tātou i ’apo mai ’o tē tauturu ia tātou ’ei feiā aupuru ? ’ei metua ? ’ei melo misiōnare ? E aha te fa’aitoitora’a a teie a’ora’a i ni’a i tō tātou ferurira’a, tō tātou ’ā’au ’e tā tātou mau ’ohipa ?
Te ’āparaura’a tāpupu. E vāhi i te mau melo ’ei pupu na’ina’i, ’e e hōro’a i te pupu tāta’itahi i te hō’ē tuha’a o te a’ora’a ’ia tai’o ’e ’ia tāu’aparau. I muri iho e ani i te pupu tāta’itahi ’ia fa’a’ite mai i te hō’ē parau mau tā rātou i ’ite mai ’e tōna tanora’a i ni’a ia rātou. ’Aore rā e hāmani ’oe i te mau pupu, i roto i te hō’ē pupu e ta’ata tei tuatāpapa i terā tuha’a ’e terā tuha’a o te a’ora’a, ’e e vaiiho ia rātou ’ia fa’a’ite i te tahi ’e te tahi i te mea tā rātou i ’apo mai.
’Imi te mau pāhonora’a i te mau uira’a. E ani i te mau melo ’ia pāhono mai i te mau uira’a mai teie i muri nei, nō ni’a i te a’ora’a o te ’āmuira’a : E aha te mau parau mau o te ’evanelia tā tātou ’apo nei i roto i teie a’ora’a ? Nāhea tātou i te fa’a’ohipa i teie mau parau mau ? E aha te mau tītaura’a manihini ’e te mau ha’amaita’ira’a i fafauhia mai ? E aha tā teie a’ora’a e ha’api’i nei ia tātou nō ni’a i te ’ohipa tā te Atua e hina’aro ’ia rave tātou ? ’Aore rā nā ’oe iho e hāmani i te tahi mau uira’a, ’o tē fa’aitoito i te mau melo ’ia feruri hōhonu i te a’ora’a ’aore rā ’ia fa’a’ohipa i te mau parau mau tā te reira e ha’api’i nei. E vaiiho i te mau melo ’ia mā’iti i te hō’ē o teie mau uira’a ’e ’ia ’imi mai i te mau pāhonora’a i roto i te a’ora’a.
Fa’a’ite i te mau fa’ahitira’a parau nō roto mai i te a’ora’a. E ani manihini i te mau melo ’ia fa’a’ite mai i te mau fa’ahitira’a parau nō roto mai i te a’ora’a o te ’āmuira’a, ’o tei fa’auru ia rātou ’ia rave fa’aoti i tā rātou mau hōpoi’a i roto i te ’ohipa nō te fa’aorara’a ’e te fa’ateiteira’a. E fa’aitoito ia rātou ’ia feruri, e nāhea rātou e fa’a’ite ai i teie mau fa’ahitira’a parau i te hō’ē ta’ata nō te ha’amaita’i iāna, mai te feiā here iti ’e te mau ta’ata tā rātou e aupuru nei.
Fa’a’ite i te hō’ē ha’api’ira’a tao’a. E ani ātea i te tahi mau melo ’ia ’āfa’i mai i te tahi mau tao’a nō te fare mai, ’o tā rātou e nehenehe e fa’a’ohipa nō te ha’api’i i te a’ora’a o te ’āmuira’a. I roto i te rurura’a, e ani i te mau melo ’ia fa’ata’a mai e aha te fa’aaura’a o teie mau tao’a ’e te a’ora’a, ’e nō te aha teie a’ora’a e tano ai i tō rātou orara’a.
Fa’aineine i te hō’ē ha’api’ira’a nō te ha’api’i i te fare. E ani i te mau melo ’ia ’ohipa ’āpipiti nō te fa’aineine i te hō’ē ha’api’ira’a nō te purera’a pō ’utuāfare, tei fa’atumuhia i ni’a i te a’ora’a o te ’āmuira’a. E nehenehe rātou e pāhono i te mau uira’a mai teie : Nāhea tātou ’ia fa’ariro i te a’ora’a ’ei mea faufa’a nō tō tātou ’utuāfare ? Nāhea tātou i te fa’a’ite atu i teie a’ora’a i te mau ta’ata tā tātou e tāvini nei ?
Fa’a’ite i te mau ’ohipa i tupu. E tai’o ’āmui i te tahi mau fa’ahitira’a i roto i te a’ora’a o te ’āmuira’a. E ani i te mau melo ’ia fa’a’ite mai i te tahi mau hi’ora’a i roto i te mau pāpa’ira’a mo’a ’e i roto i tō rātou orara’a ’o tē fa’ahōho’a nei ’aore rā ’o tē ha’apūai nei i te ha’api’ira’a tumu i ha’api’ihia i roto i teie mau fa’ahitira’a parau.
’Imi mai i te hō’ē parau. E ani i te mau melo ’ia ’imi mai i roto i te a’ora’a o te ’āmuira’a, i te mau parau faufa’a roa nō rātou. E ani ia rātou ’ia fa’a’ite mai i te reira mau parau ’e te mea tā rātou i ’apo mai i roto. E ani ia rātou ’ia fa’a’ite mai ē tē nāhea ra teie mau ha’api’ira’a i te tauturu ia rātou ’ia fa’atupu i te ’ohipa a te Fatu.

Nō te tahi atu mau mana’o nō ni’a i te tuatāpapara’a ’e te ha’api’ira’a i te ta’ata nā roto mai i te mau a’ora’a o te ’āmuira’a rahi, hi’o « Idées pour l’étude et l’enseignement de la conférence générale [Mau mana’o nō te ’apora’a i te ha’api’ira’a ’e nō te ha’api’ira’a i te ta’ata nā roto mai i te ’āmuira’a rahi] ». (Tāumi « Idées pour l’étude [Mau mana’o nō te tuatāpapara’a] » i raro a’e « Conférence générale [’Āmuira’a rahi] » i roto i te Vaira’a buka ’evanelia [reo farāni]).