Los, Nrog Kuv Mus

Qhia, Kawm, thiab Siv tej Zaj Lus Los ntawm lub Tuam Rooj Sab Laj

Tej pawg Txwj Laug thiab lub Koom Haum Niam Tsev yeej tseem ceeb nyob hauv txoj hauj lwm cawm seej thiab kev tsa nto. Thaum lawv muaj kev sib ntsib nyob rau Hnub Caiv, lawv sib tham txog txoj kev siv tej lus qhia los ntawm lub tuam rooj sab laj tej zaj lus thaum lawv ua txoj hauj lwm no. Pawg txwj laug thiab Koom Haum Niam Tsev tej pawg thawj tswj hwm xaiv ib zaj lus los ntawm lub tuam rooj sab laj kom kawm nyob hauv txhua txoj kev sib ntsib thaum Hnub Caiv, raws li cov mej zeej xav tau thiab tus Ntsuj Plig coj kev. Tej lub sij hawm, tus npisov los yog ceg txheem ntseeg tus thawj tswj hwm yuav qhia tias xav siv ib zaj lus. Feem ntau, cov thawj coj yuav tsum xaiv tej zaj lus los ntawm cov hauv Thawj Pawg Thawj Tswj Hwm thiab Pawg Kaum Ob tug Thwj Tim. Tiam sis, muaj cai siv zaj lus twg los ntawm lub tuam rooj sab laj uas nyuam qhuav tas los.

Cov neeg qhia tsom ntsoov rau kev pab cov mej zeej siv tej lus qhia los ntawm tej zaj lus ntawm lub tuam rooj sab laj nyob hauv lawv lub neej. Cov thawj coj thiab cov xib hwb yuav nrhiav kev kom yaum cov mej zeej kawm zaj lus ntawd ua ntej kev sib ntsib.

Yog xav tau xov xwm ntxiv txog pawg txwj laug thiab Koom Haum Niam Tsev tej kev sib ntsib, saib General Handbook: Serving in The Church of Jesus Christ of Latter-day Saints, 8.2.1.2, 9.2.1.2, ChurchofJesusChrist.org.

Kev Npaj Qhia

Tej lus nug no yuav pab cov xib hwb thaum lawv npaj siv ib zaj lus los ntawm lub tuam rooj sab laj thaum lawv qhia. Raws li xav tau, cov xib hwb nrog pawg txwj laug los sis Koom Haum Niam Tsev pawg thawj tswj hwm tham thaum lawv xav txog tej lus nug no.

Yog vim li cas pawg txwj laug los sis Koom Haum Niam Tsev pawg thawj tswj hwm xaiv thiab xav sib tham txog zaj lus no? Lawv cia siab tias cov mej zeej yuav paub thiab ua dab tsi tom qab lawv sib tham txog zaj lus no?
Tus uas hais lus xav kom cov mej zeej to taub txog dab tsi? Nws qhia txog tej ntsiab cai twg ntawm txoj moo zoo? Tej lub ntsiab cai no yuav pab kuv pawg txwj laug los sis lub Koom Haum Niam Tsev li cas?
Tus uas hais lus tau siv tej nqe vaj lug kub twg kom txhawb nqa nws zaj lus? Puas muaj lwm nqe vaj lug kub uas cov mej zeej nyeem tau uas yuav pab lawv to taub ntxiv? (Tej zaum koj yuav nrhiav tau nyob hauv tej lus cim ntawm zaj lus ntawd los sis nyob hauv Phau Qhia txog Vaj Lug Kub [scriptures.ChurchofJesusChrist.org].)
Kuv yuav nug tej lus twg kom pab cov mej zeej xav txog zaj lus no thiab siv tej lus qhia nyob haud? Tej lus nug twg yuav pab lawv pom tias tej lus qhia no muaj nqi rau lawv lub neej, nyob hauv lawv tsev neeg, thiab thaum ua tus Tswv txoj hauj lwm?
Kuv yuav ua dab tsi ntxiv kom caw tau tus Ntsuj Plig los koom peb txoj kev sib ntsib? Kuv yuav siv dab tsi kom pab txhawb nqa peb txoj kev sib tham, xws li zaj dab neeg, tej zaj lus piv txwv, tej zaj nkauj, thiab tej daim duab? Tus uas hais lus tau ua dab tsi kom pab cov mej zeej to taub nws zaj lus?
Tus uas hais lus puas tau caw peb ua dab tsi? Kuv yuav ua li cas pab cov mej zeej xav ua raws li tej yam uas nws caw lawv ua?

Tswv Yim txog Yam Ntxim Saib Ntxim Ua

Muaj ntau txoj kev uas pab tau cov mej zeej kawm los ntawm tej zaj lus ntawm lub tuam rooj sab laj. Ntawm no yog ob peb lub tswv yim; tej zaum koj yuav muaj lwm lub tswv yim uas zoo dua rau koj pawg pov thawj hwj los sis lub Koom Haum Niam Tsev.

Ua neej raws li qhov tseeb. Caw cov mej zeej nyeem zaj lus los ntawm lub rooj sab laj kom lawv nrhiav tej lus tseeb uas yuav pab lawv ua txoj hauj lwm uas Vajtswv tau muab rau lawv los sis tau muab rau pawg txwj laug los sis lub Koom Haum Niam Tsev. Piv txwv hais tias, peb kawm dab tsi uas yuav pab peb ua cov neeg txhawb pab? ua niam tsev txiv tsev? ua cov tub txib ntxhais txib? Ua li cas zaj lus no tshoov peb lub siab thiab hloov tej yam uas peb ua?
Faib ua pab ua pawg sib tham. Muab cov mej zeej faib ua pab ua pawg me me, thiab txib kom txhua pawg nyeem thiab sib tham txog ib feem ntawm ib zaj lus los ntawm lub rooj sab laj. Ces hais kom txhua pawg qhia txog ib yam tseeb uas lawv tau kawm thiab lawv yuav siv yam ntawd li cas. Los sis tej zaum koj yuav faib lawv ua pab uas pawg tom qab lawv nyias kawm nyias feem thiab cia lawv ib leeg qhia ib leeg tias lawv tau kawm dab tsi.
Nrhiav tej lus teb. Caw cov mej zeej teb tej lus nug xws li no txog zaj los ntawm lub rooj sab laj: Peb kawm txog qhov tseeb ntawm txoj moo zoo nyob hauv zaj lus no? Peb yuav siv tej yam tseeb no li cas? Nws caw peb ua dab tsi thiab cog lus tias peb yuav tau koob hmoov twg? Zaj lus no qhia dab tsi rau peb txog txoj hauj lwm uas Vajtswv xav kom peb ua? Los sis tsim ob peb txoj lus nug uas pab cov mej zeej xav txog zaj lus no lo sis siv tej lus tseeb uas qhia nyob hauv zaj lus no. Cia cov mej zeej xaiv ib txoj lus nug thiab nrhiav tej lus teb los ntawm zaj lus ntawd.
Qhia tej kab lus los ntawm zaj lus ntawd. Caw cov mej zeej qhia txog tej kab lus los ntawm zaj lus ntawm lub rooj sab laj uas tshoov lawv lub siab kom xav ua raws li lawv tej kev lav ris nyob hauv txoj hauj lwm cawm seej thiab kev tsa nto. Yaum kom lawv xav txog qhov uas lawv yuav ua li cas qhia tej kab lus no rau leej twg kom pab lawv, tsis hais cov uas lawv hlub thiab cov uas lawv txhawb pab tau.
Siv ib yam khoom qhia. Ua ntej, caw ob peb tug mej zeej nqa ib yam khoom los ntawm lawv lub tsev uas lawv siv tau kom qhia txog zaj lus ntawm lub rooj sab laj. Nyob hauv kev sib ntsib, thov cov mej zeej piav tias tej khoom no piv rau zaj lus ntawd li cas thiab lawv yuav siv zaj lus no li cas nyob hauv lawv lub neej.
Npaj ib zaj lus qhia hauv tsev. Thov kom cov mej zeej ua ib khub sib tham thiab npaj ib zaj lus qhia hauv tsev neeg hmo ua ke txog zaj lus ntawm lub rooj sab laj. Tej zaum lawv yuav xav teb tej ls nug zoo li no: Peb yuav ua li cas kom zaj no muaj nqi rau peb tsev neeg? Peb yuav ua li cas kom qhia zaj lus no rau cov neeg uas peb mus txhawb pab?
Qhia tej yam los ntawm lub neej. Nyeem ua ke txog ob peb kab lus los ntawm zaj lus ntawm rooj sab laj. Thov cov mej zeej hais tej yam los ntawm vaj lug kub thiab los ntawm lawv lub neej uas piav txog cov lus qhuab qhia los ntawm tej kab lus no.
Nrhiav ib kab lus. Caw cov mej zeej nrhiav hauv zaj lus los ntawm lub rooj sab laj nrhiav tej kab lus uas muaj nqis rau lawv. Thov kom lawv qhia lawv nrhiav tau tej kab lus twg thiab lawv tau kawm dab tsi txog tej kab lus ntawd. Thov kom lawv hais tias vim li cas tej lus qhia no tau pab lawv ua tus Tswv txoj hauj lwm.

Yog xav tau tswv yim ntxiv kom pab koj kawm thiab qhia los ntawm lub tuam rooj sab laj tej zaj lus, cia li saib “Tswv Yim txog Kev Kawm thiab Kev Qhia Los ntawm lub Tuam Rooj Sab Laj.” (Nias “Tej Tswv Yim rau Kev Kawm” nyob ntawm “Lub Tuam Rooj Sab Laj” nyob hauv Txoj Moo Zoo cov Ntawv.)