Taimua o le Ola Tutoatasi

Aoaoga Faavae ma Mataupu Faavae o le Ola Tutoatasi

O le ola faalagolago o le tagata ia te ia lava “o le tomai, tautinoga, ma le taumafaiga e saunia mea faaleagaga ma faaletino e manaomia o le olaga mo le tagata lava ia ma le aiga. A ola faalagolago tagata o le Ekalesia ia i latou lava, o le a sili atu ona lelei lo latou auauna atu ma tausia isi” (Tusitaulima 2, 6.1.1). E tolu ni aoaoga autu e mafai ona fesoasoani e faamalamalama ia i tatou le auala e ola ai i ni olaga ola tutoatasi:

Muamua, o le ola tutoatasi o se poloaiga taua i le fuafuaga o le faaolataga. Na aoao mai Peresitene Spencer W. Kimball: “Ua poloaiina le Ekalesia ma ona tagata e le Alii ina ia ola faalagolago le tagata ia te ia lava ma tutoatasi. (Tagai i le MF&F 78:13–14.) O le matafaioi a le tagata lava ia mo le soifua manuia i fegalegaleaiga, lagona, faaleagaga, faaletino, po o le tamaoaiga ua pau muamua atu lava lea i ona luga, lona lua o lona aiga, ma lona tolu o le Ekalesia pe afai o se tagata faamaoni o ia” (Aoaoga a Peresitene o le Ekalesia: Spencer r W. Kimball [2006], 116).

Lua,E mafai e le Atua ma o le a saunia se ala mo Lana fanau amiotonu ina ia ola tutoatasi ai. “Ma o lou faamoemoe o le faia lea o mea mo lau au paia, aua o mea uma e a au” (MF&F 104:15).

Tolu, o mea uma, e aofia ai popolega faaletino, o mea ia faaleagaga i le Atua (tagai MF&F 29:34). A’o tatou tautino atu ia ola atoatoa i le talalelei, e mafai ona tatou ola tutoatasi atili faaletino ma faaleagaga. Na aoao mai Peresitene Dieter F. Uchtdorf: “O poloaiga sili e lua—ia alofa atu i le Atua ma o tatou tuaoi—o se tuufaatasiga lea o le faaletino ma le faaleagaga. … E pei o itu e lua o se tupe, o le faaletino ma le faaleagaga e le mafai ona tuueseeseina” (Dieter F. Uchtdorf, “O Le Faia i le Ala a le Alii,” Ensign po o le Liahona, Nov. 2011, 53).

O nisi o mataupu faavae o le talalelei e mafai ona fesoasoani ia i tatou ina ia saga ola tutoatasi e aofia ai le faateleina o le faatuatua i le Tama Faalelagi ma Iesu Keriso, ia usiusitai atili, salamo mai a tatou measese, faaaoga le tatou filifiliga saoloto ma le amiotonu, ma auauna atu i isi. Mo nisi faamatalaga, tagai i le tamaitusi O Lo’u Faavae mo le Ola Tutoatasi.

“O le ola tutoatasi o le tumutumuga lea o a tatou galuega, ma e faavae ai isi galuega uma faaleuelefea …. . ‘Ia tatou galulue mo mea tatou te manaomia. Ia tatou ola faalagolago ia i tatou lava ma ia tutoatasi. E leai lava se isi mataupu e mafai ona maua ai le faaolataga.’”

Thomas S. Monson (na sii mai ia Marion G. Romney), “O Mataupu Taiala o Filifiliga Patino ma Faaleaiga,” Ensign, Sept. 1986, 3

O le Ta’imua mo le Ola Tutoatasi e Taitaiina e Taitai Perisitua.

O siteki a Siona o ni nofoaga ia o le saogalemu e puipuia ai i latou uma o e ulu atu i ai. O le faamoemoega o le siteki ina ia avea ma “se puipuiga, ma … se sulufaiga mai le afa, ma mai le toasa pe a sasaa mai … i luga o le lalolagi atoa” (MF&F 115:6). O siteki o ni nofoaga ia e potopoto ai ma e mafai ai e tagata o le Ekalesia ona auauna atu ai ma faamalosia e le tasi le isi, tuufaatasia ai, ma maua sauniga o le perisitua ma aoaoga o le talalelei (Tusitaulima 1, faatomuaga).

Na fetalai mai le Alii i taitai perisitua, “Ua Ou tuu ia te outou … ki … mo le galuega a le auaunaga ma le faaatoatoaina o la’u au paia” (MF&F 124:143). Na aoao mai Peresitene Dieter F. Uchtdorf: “O le ala a le Alii e ola faalagolago ai le tagata ia te ia lava e aofia ai se ala paleni o le tele o elemene o le olaga, e aofia ai aoaoga, soifua maloloina, galuega, mea tau tupe a le aiga, ma le malosi faaleagaga. … O le uiga o lenei mea e faapea, i se fuataga tele, o le a e fuafuaina lava e oe. E eseese uma aiga, faapotopotoga, ma nofoaga uma o le lalolagi” (“O Le Faia i le Ala a le Alii,” Ensign po o le Liahona, Nov. 2011, 55).

O le ta’imua mo le ola tutoatasi o se meafaigaluega lea e mafai ona faaaoga e peresitene o siteki ma epikopo e fesoasoani i o latou tiutetauave atofaina paia e tausia ai e matitiva ma e le tagolima.

“E le manaomia se faatulagaga fou ina ia tausia ai tulaga manaomia i nei tagata. E na o le tasi lava le mea e tatau ona fai, o le faagaoioi lea o le perisitua a le Atua.”

Harold B. Lee, “Timaiga mo le Perisitua a le Atua,” Ensign, Jan. 1973, 104

Komiti mo le Ola Tutoatasi a le Siteki

Ina ia malamalama ma tali atu i manaoga o le ola tutoatasi i a latou siteki, e mafai ona faatulaga e le au peresitene o le siteki se komiti a le siteki mo le ola tutoatasi e avea ma se vaega o le aufono a le siteki. O le komiti mo le ola tutoatasi e taitaifono ai se sui o le au peresitene o le siteki ma fono soo e iloilo ma fuafua manaoga o le ola tutoatasi i totonu o le siteki. O komiti mo le ola tutoatasi e uunaia le galuega ma le aufono o le uelefea a le epikopo e iloilo ma taulimaina na manaoga.

O le komiti o le ola tutoatasi a le siteki e aofia ai se sui o fautua maualuga, o se sui o le au peresitene o le Aualofa a le siteki, o le taitaifono a le aufono o le uelefea a epikopo, ma le tagata tomai faapitoa o le siteki mo le ola tutoatasi. O nisi tagata o le komiti e ono aofia ai sui o au peresitene o Alii ma Tamaitai Talavou o le siteki, nisi tagata tomai faapitoa a le siteki, ma faifeautalai.

Matafaioi a le Komiti mo le Ola Tutoatasi

I le iloiloina ma le fuafuaina o manaoga o tagata taitoatasi ma aiga i le siteki, ua mafaufau ai le komiti i mea nei:

O le aoaoina o epikopo ma aufono a le uarota e uiga i le aoaoga faavae o le ola tutoatasi ma le lagolagoina o i latou ma o latou tiute.
O le atiaeina o se fuafuaga faigofie e lagolago ai epikopo ma tuuina atu ai ni mea e manaomia o le ola tutoatasi a le siteki. Tagai i “Fesili mo Komiti e Mafaufau ai” i le faaiuga o lenei taiala a le taitai.
O le faia soo o faigalotu mo le ola tutoatasi ma le faatulagaina o vaega o le ola tutoatasi.
Sauniaina o aoaoga faifaipea mo tagata e faagaoioia pe a manaomia.
Asiasi atu i fonotaga faalevaega a le ola tutoatasi ma faasoa atu ni manatu faaalia i epikopo ma aufono a le uarota e uiga i le alualu i luma o tagata.
Aoina mai ma le fesootai atu o punaoa i le lotoifale o loo maua i le alalafaga ma mai le Ekalesia. O punaoa e ono aofia ai igoa o tagata o e mafai ona fesoasoani, polokalama faalemalo, avanoa faigaluega, ma isi. E mafai foi ona tuuina atu le taitaiga a le pule a le Tautua mo le Ola Tutoatasi i le lotoifale i auala e ao mai ai ma faasoa atu ai punaoa a le nuu po o alalafaga.

matafaioi a le komiti o le ola tutoatasi

“E masani ai lava o se aoaoga taua mo tagata o le Au Paia o Aso e Gata Ai, o se lotu e leai se malosi e faasaoina ai tagata i le faaletino ma maua ai e i latou le manuia ma le fiafia iinei, e le mafai ona faalagolago i ai e faasaoina ai i latou faaleagaga, ma faaeaina i latou i le olaga a sau.”

Peresitene Iosefa F. Samita, Aoaoga a Peresitene o le Ekalesia: Iosefa F. Samita (2011), 163

Tagata Faapitoa a le Siteki mo le Ola Tutoatasi

Atonu e mafai ona auauna atu se tuafafine, uso, po o se ulugalii o se tagata faapitoa a le siteki (po o itu) mo le ola tutoatasi. Galulue soosootauau ma sui o le komiti, e vaavaaia e se tagata faapitoa mo le faagaoioia o le ola tutoatasi ma gaoioiga i totonu o le siteki. E auauna atu tagata faapitoa a le siteki o se punaoa mo epikopo ma isi taitai o uarota (Tusitaulima 2, 6.3.3) ma e mafai ona fesoasoani i tagata o i ai ni manaoga e pei o aoga, aoaoga faamasani, mea tautupe a le aiga, ma le Tupe Faaagaaga mo Aoga pe a talafeagai ai (Tusitaulima 2, 6.2.5). E mafai foi ona valaau e le epikopo ni tagata faapitoa mo le ola tutoatasi a le uarota pe a manaomia.

O tiutetauave a tagata faapitoa e ono aofia ai mea nei:

Aoao ma fesoasoani i epikopo ma aufono a uarota pe a talosagaina.
Galulue ma le komiti o le ola tutoatasi a le siteki e faamaopoopo faigalotu ma faatulaga ni vaega.
Tuuina atu ni aoaoga mo tagata e faagaoioia vaega o le ola tutoatasi, e faaaoga ai le tamaitusi o le Faagaoioia Vaega mo le Ola Tutoatasi (o loo maua i luga o le initoneti i le srs.lds.org/facilitator).
Ia matauina ma lagolagoina i lea taimi ma lea taimi ni vaega mo le ola tutoatasi.
Faasoa atu punaoa o alalafaga ma le Ekalesia o loo maua ma tagata o le ekalesia.
Ia mautinoa ua faamaeaina lipoti i le srs.lds.org/report.

“O le finagalo o le Atua ia avea i tatou o ni alii ma ni tamaitai saoloto e mafai ona tulai ae i o tatou gafatia atoatoa uma faaletino ma le faaleagaga, ia tatou saoloto mai faatapulaa faalumaina o le mativa ma le nofopologa i le agasala, ina ia tatou olioli i le faaaloalogia o oe lava ma le ola tutoatasi, ina ia tatou saunia i mea uma e auai ma Ia i Lona malo faaselesitila.”

D. Todd Christofferson, “Saoloto e Faavavau, e Galue mo i Latou Lava,” Ensign po o le Liahona, Nov. 2014, 19

Pe Faapefea ona Aoao ma Faatino e Tagata o le Ekalesia le Ola Tutoatasi

E amata i le mafaufau ma le agaga tatalo ia au epikopo ma aufono a le uarota ia i latou o i ai ni luitau e mafai ona manuia mai le saga ola tutoatasi. I se tulaga sili ona lelei, o se valaaulia patino e tuuina atu a le o le auai i se faigalotu (pe a ofoina atu) po o le auai sa’o atu lava i se vaega a le ola tutoatasi. E le gata i lea, mafaufau e valaaulia i latou o e mafai ona faamalosiau atu i isi i o latou taimi ma taleni ina ia auai (tagai MF&F 82:18–19).

Feiloai i Tagata o le Ekalesia i Vaega mo le Ola Tutoatasi

Na aoao mai le Faaola e faapea “o le mea e potopoto faatasi ai le toalua po o le toatolu i lo’u igoa, e faatatau i se mea e tasi, faauta, o iina o le a Ou i ai i le lotolotoi o i latou” (MF&F 6:32). O vaega o le ola tutoatasi o ni aufono toalaiti ma ola. Latou te feiloai faatasi e fesoasoani e atiae ia tomai ma le faatuatua o tagata auai taitasi. E mafai ona oo mai faaaliga faaletagata i taimi o fonotaga faalevaega mai le tele o punavai eseese. E ese mai tusi lesona, ua tofu tagata auai ma le malamalama, aafiaga, ma meaalofa e mafai ona fesoasoani i isi ia aoao ma tuputupu ae.

O se vaega e masani lava ona aofia ai tagata e toa 8 i le toa 12 ma fono pe a ma le lua itula i vaiaso taitasi mo le 12 vaiaso.

O Le Faagaoioiga o Vaega

E Aoao Uma le Aoaoga Faavae ma Tomai o le Olaga

I taimi o fonotaga taitasi a vaega, e faaalu e tagata auai se taimi e iloilo ai mataupu faavae faaleaoaoga faavae o le ola tutoatasi, e aofia ai le taua o sauniga. Latou te aoaoina foi ni tomai autu e pei o le puleaina o mea tautupe a le tagata lava ia, mauaina o se galuega sili atu, faalauteleina le aotauina, po o le amataina ma le faaolaina o se tama’i pisinisi.

E Faia e Vaega ni Tautinoga ma Lipoti atu le latou Alualu i Luma

E amata fonotaga taitasi a vaega ma ni tagata o loo lipoti atu le alualu i luma i le vaega i a latou tautinoga mai le vaiaso ua tea. Ona fefautuaai faatasia lea o tagata auai ia faailoa ma foia ni faafitauli.

O vaega mo le ola tutoatasi e talanoaina mea e tolu na saunoa mai Peresitene Gordon B. Hinckley e manaomia e tagata liliu mai taitasi: “o se uo, o se tiutetauave, ma le faafaileleina i le ‘afioga lelei a le Atua’ (Moronae 6:4)” (“Converts and Young Men,” Ensign, May 1997, 47; tagai foi Moronae 6:3–9).

Fefaasoaai Tagata Auai ia Latou Aoaoga ma Tagata o le Aiga

O le tele lava o le aotauina e faia i fafo atu o fonotaga a vaega ao tausia e tagata o vaega a latou tautinoga i le faataitaia o ni tomai fou. Ua uunaia tagata auai e faasoa atu mea sa latou aoaoina i tagata o le aiga.

Faamalosia e Tagata Auai le Tasi ma le Isi O Ni “Soa Galue”

Ua talosagaina tagata auai e tuu atu le lagolago ma le faamalosiauga i se isi tagata o le vaega i vaiaso taitasi. O nei “soa galue” e fesoasoani le tasi i le isi e tausia a latou tautinoga e ala i fesootaiga ma le faamalosiauga e le aunoa.

“E leai se faafitauli i totonu o le aiga, uarota, po o le siteki e le mafai ona foia pe a tatou saili ni vaifofo i le ala a le Alii e ala i le fefautuaai—matua fefautuaai—o le tasi ma le isi.”

M. Russell Ballard, Counseling with Our Councils, rev. ed. (2012), 4

Taitaia e Tagata e Faagaoioia Fonotaga a Vaega Faalevaiaso

O vaega mo le ola tutoatasi e le taitaiina e se faiaoga ae ua taitaia e se tagata e faagaoioia. E le lauga atu ni tagata e faagaoioia ae e mulimuli i anomea o kosi ma valaaulia tagata uma o le vaega ina ia auai. E faia e tagata e faagaoioia se siosiomaga, lea e mafai ai e le Agaga Paia ona aoao atu tagata auai i mea uma e tatau ona [latou] faia“ (2 Nifae 32:5; tagai foi 2 Nifae 32:3).

Alualu i Luma Faifaipea

Afai e manaomia, e mafai ona tofia ni tagata faapitoa a le siteki, volenitia, po o faiaoga o aiga ma faiaoga asiasi e tulitataoina po o le faufautua ni tagata auai taitoatasi i le telefoni pe [faafesagai] ma le tagata. E mafai foi e komiti mo le ola tutoatasi a le siteki ona filifili i lea taimi ma lea taimi le faatulagaina o se faatasiga o ni vaega ua faauu mai le ola tutoatasi ina ia mafai e tagata auai ona faaauau pea le faauooga, faasoa aafiaga, ma iloilo mataupu faavae mai le O Lo’u Faavae mo le Ola Tutoatasi.

O Ai e Tatau ona Auai i Vaega?

E ono manuia tagata o le ekalesia o i tulaga nei: tagata o loo faaaogaina le taulaga anapogi, tagata e le o faigaluega pe leaga totogi, faifeautalai faatoa toe foi mai, tagata faatoa liliu mai, tagata e le toaaga mai, ma matua nofo toatasi.