« តួនាទី » កុមារ និងយុវវ័យនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៖ បុព្វកថាណែនាំសម្រាប់ឪពុកម្ដាយ និងថ្នាក់ដឹកនាំ ( ឆ្នាំ ២០១៩ )
« តួនាទី »
តួនាទី
គេហដ្ឋាន និងឪពុកម្ដាយ
តើតួនាទីរបស់ខ្ញុំគឺជាអ្វី ?
សូមធ្វើជាគំរូដ៏សុចរិតដល់កូនចៅរបស់អ្នក ។ បង្រៀនពួកគេពីរបៀបរីកចម្រើនឡើងក្នុងគ្រប់ផ្នែកទាំងអស់នៃជីវិតរបស់ពួកគេ ។ ស្វែងរករបៀបដើម្បីជួយពួកគេឲ្យរៀនពីក្ដីអំណរក្នុងការកាន់តាមសេចក្ដីសញ្ញា ការស្វែងរកទេពកោសល្យថ្មីៗ និងការធ្វើរឿងដែលពិបាកៗ ។ ជួយគ្រួសាររបស់អ្នកឲ្យកាន់តែខិតទៅជិតព្រះវរបិតាសួគ៌ និងព្រះយេស៊ូវគ្រីស្ទ ហើយរស់នៅតាមដំណឹងល្អក្នុងជីវិតប្រចាំថ្ងៃ ។
តើខ្ញុំត្រូវធ្វើអ្វី ?
សូមឲ្យកូនៗរបស់អ្នកដឹងថា អ្នកស្រឡាញ់ពួកគេខ្លាំងប៉ុណ្ណា ។ ចូលរួមក្នុងជីវិតរបស់ពួកគេ ។ អធិស្ឋានរកមើលតម្រូវការផ្ទាល់ខ្លួនរបស់ពួកគេ ហើយដាក់ផែនការសិក្សាដំណឹងល្អ និងសកម្មភាពនានាដើម្បីដោះស្រាយតម្រូវការទាំងនោះ ។ ចែកចាយទីបន្ទាល់របស់អ្នកជាមួយពួកគេឲ្យបានទៀងទាត់ ។ និយាយជាមួយថ្នាក់ដឹកនាំអំពីរបៀបដែលពួកគេអាចជួយគាំទ្រដល់កូនចៅរបស់អ្នក ។
តើខ្ញុំត្រូវចាប់ផ្ដើមនៅត្រង់ណា ?
សូមបន្ដនិយាយ និងស្ដាប់កូនចៅរបស់អ្នក ។ អធិស្ឋានអំពីរបៀបដែលអ្នកអាចគាំទ្រដល់ពួកគេ ។ ជួយពួកគេឲ្យស្វែងរក និងចាប់ផ្ដើមពង្រឹងផ្នែកនៃការរៀនសូត្រ ដែលពួកគេចាប់អារម្មណ៍ ។ ចាប់ផ្ដើម ឬបន្ដការអធិស្ឋានជាគ្រួសារ ការសិក្សាដំណឹងល្អ ឱកាសបម្រើ និងសកម្មភាពនានាដើម្បីជួយកូនចៅរបស់អ្នកឲ្យរីកចម្រើនឡើង ។
ថ្នាក់ដឹកនាំ និងគ្រូបង្រៀនអង្គការបឋមសិក្សា
តើតួនាទីរបស់ខ្ញុំគឺជាអ្វី ?
ចូរស្រឡាញ់ និងពង្រឹងកូនចៅ ។ សូមជួយឪពុកម្ដាយក្នុងការជួយកូនចៅឲ្យមានអារម្មណ៍ពីសេចក្ដីស្រឡាញ់របស់ព្រះវរបិតាសួគ៌សម្រាប់ពួកគេ យល់ពីដំណឹងល្អរបស់ព្រះយេស៊ូវគ្រីស្ទ ទទួលអារម្មណ៍ និងទទួលស្គាល់ព្រះចេស្ដានៃព្រះវិញ្ញាណបរិសុទ្ធ ហើយរៀបចំចុះ និងរក្សាសេចក្ដីសញ្ញាដ៏ពិសិដ្ឋ ។
តើខ្ញុំត្រូវធ្វើអ្វី ?
សូមធានាថា ថ្នាក់អង្គការបឋមសិក្សា និងពេលវេលាច្រៀងជួយកុមារឲ្យមានអារម្មណ៍អំពីព្រះវិញ្ញាណ បង្កើនសេចក្ដីជំនឿ និងមានអំណរចំពោះដំណឹងល្អរបស់ព្រះយេស៊ូវគ្រីស្ទនៅក្នុងជីវិតរបស់ពួកគេ ។ ដោយមានផ្នែកនៃការរីកចម្រើនដែលបានស្នើនៅក្នុង លូកា ២:៥២ ទុកជាសេចក្ដីណែនាំ សូមគ្រោងសកម្មភាពរីករាយ និងការបម្រើ ក៏ដូចជាសកម្មភាពទាក់ទាញនានា ដែលស្ថាបនាទីបន្ទាល់ ពង្រឹងដល់ក្រុមគ្រួសារ ព្រមទាំងចិញ្ចឹមបីបាច់សាមគ្គីភាព និងការរីកចម្រើនផ្ទាល់ខ្លួន ។
តើខ្ញុំត្រូវចាប់ផ្ដើមនៅត្រង់ណា ?
សូមស្គាល់កូនចៅ និងក្រុមគ្រួសាររបស់ពួកគេ ហើយបម្រើតាមតម្រូវការរបស់ពួកគេ ។ ក្នុងនាមជាគណៈប្រធានថ្នាក់អង្គការបឋមសិក្សា សូមអធិស្ឋានសួរពីរបៀបដែលអ្នកអាចជួយគ្រូបង្រៀនរបស់អ្នក អ្នកដឹកនាំតន្ដ្រី និងអ្នកដឹកនាំសកម្មភាព ដើម្បីជួយកុមារឲ្យធ្វើតាមព្រះអង្គសង្គ្រោះ ។
ថ្នាក់ដឹកនាំក្រុមយុវនារី
តើតួនាទីរបស់ខ្ញុំគឺជាអ្វី ?
សូមជួយឪពុកម្ដាយ និងគណៈប៊ីស្សពក្នុងការណែនាំ និងបំផុសគំនិតដល់យុវនារីឲ្យយល់ពីអត្តសញ្ញាណរបស់ពួកគេជាបុត្រីរបស់ព្រះ រៀបចំសម្រាប់សេចក្ដីសញ្ញាក្នុងព្រះវិហារបរិសុទ្ធ និងបំពេញតាមគោលបំណងដ៏ទេវភាពរបស់ពួកគេ ។ ណែនាំដល់គណៈប្រធានថ្នាក់ នៅពេលពួកគេដឹកនាំ ផ្ដល់ការងារបម្រើ និងបម្រើដល់សមាជិកក្នុងថ្នាក់របស់ពួកគេ ។
តើខ្ញុំត្រូវធ្វើអ្វី ?
សូមធ្វើជាគំរូមួយក្នុងនាមជាសិស្សរបស់ព្រះយេស៊ូវគ្រីស្ទ ។ ណែនាំគណៈប្រធានថ្នាក់ នៅពេលពួកគេដាក់គម្រោងប្រកបដោយការអធិស្ឋាន និងជួយបង្រៀនមេរៀនមកពី ចូរមកតាមខ្ញុំ—សម្រាប់យុវនារី ។ លើកទឹកចិត្តពួកគេឲ្យដឹកនាំតាមការគ្រោង និងធ្វើការបម្រើ និងសកម្មភាពនានាដែលនឹងជួយយុវនារីឲ្យរីកចម្រើនក្នុងគ្រប់ផ្នែកនៃជីវិតរបស់ពួកគេ ។ ផ្ដល់ការគាំទ្របន្ថែមដល់យុវនារីដែលត្រូវការវា ។
តើខ្ញុំត្រូវចាប់ផ្ដើមនៅត្រង់ណា ?
សូមរៀនស្គាល់យុវនារីម្នាក់ៗ ។ និយាយជាមួយយុវនារី ឪពុកម្ដាយរបស់ពួកគេ និងគណៈប៊ីស្សពអំពីរបៀបដែលអ្នកអាចគាំទ្រដល់ការរីកចម្រើនរបស់យុវនារី ។ អធិស្ឋានដើម្បីដឹងរបៀបដែលអ្នកអាចជួយគណៈប្រធានថ្នាក់របស់អ្នកឲ្យជោគជ័យក្នុងការហៅបម្រើរបស់ពួកគេ ។
ថ្នាក់ដឹកនាំបព្វជិតភាពអើរ៉ុន
តើតួនាទីរបស់ខ្ញុំគឺជាអ្វី ?
សូមជួយឪពុកម្ដាយ និងគណៈប៊ីស្សពក្នុងការរៀបចំយុវជនសម្រាប់ការតែងតាំងទៅតំណែងបព្វជិតភាព សេចក្ដីសញ្ញាក្នុងព្រះវិហារបរិសុទ្ធ បេសកកម្ម និងតួនាទីដ៏ទេវភាព ។ បំផុសគំនិតពួកគេឲ្យយល់ពីគោលបំណង និងអត្តសញ្ញាណរបស់ពួកគេក្នុងនាមជាបុត្រារបស់ព្រះ ។ ណែនាំដល់គណៈប្រធានកូរ៉ុម នៅពេលពួកគេដឹកនាំ ផ្ដល់ការងារបម្រើ និងបម្រើដល់សមាជិកក្នុងកូរ៉ុមរបស់ពួកគេ និងនៅពេលពួកគេបម្រើក្នុងពិធីបរិសុទ្ធសាក្រាម៉ង់ ។
តើខ្ញុំត្រូវធ្វើអ្វី ?
សូមធ្វើជាគំរូមួយក្នុងនាមជាសិស្សរបស់ព្រះយេស៊ូវគ្រីស្ទ ។ ណែនាំគណៈប្រធានកូរ៉ុម នៅពេលពួកគេអនុវត្តកូនសោរបស់គេ បម្រើក្នុងពិធីបរិសុទ្ធសាក្រាម៉ង់ និងដាក់គម្រោងប្រកបដោយការអធិស្ឋាន ព្រមទាំងជួយបង្រៀនមេរៀនមកពី ចូរមកតាមខ្ញុំ—សម្រាប់យុវជន ។ ជួយពួកគេឲ្យដាក់គម្រោង និងធ្វើការបម្រើ និងសកម្មភាពនានាដែលនឹងជួយយុវជនឲ្យរីកចម្រើនក្នុងគ្រប់ផ្នែកនៃជីវិតរបស់ពួកគេ ។ ឲ្យពួកគេដឹកនាំ ។ ផ្ដល់ការគាំទ្របន្ថែមដល់យុវជនដែលត្រូវការវា ។
តើខ្ញុំត្រូវចាប់ផ្ដើមនៅត្រង់ណា ?
សូមចំណាយពេលជាមួយយុវជន ។ រៀនស្គាល់ និងស្រឡាញ់ពួកគេម្នាក់ៗ ។ និយាយជាមួយគណៈប៊ីស្សព យុវជន និងឪពុកម្ដាយរបស់ពួកគេដើម្បីកំណត់ពីរបៀបដែលអ្នកអាចគាំទ្រពួកគេ កាលពួកគេរីកចម្រើនហើយក្លាយដូចជាព្រះអង្គសង្គ្រោះ ។ អធិស្ឋានដើម្បីដឹងរបៀបដែលអ្នកអាចជួយគណៈប្រធានកូរ៉ុមរបស់អ្នកឲ្យអនុវត្តកូនសោរបស់ពួកគេ និងទទួលបានជោគជ័យក្នុងការហៅបម្រើរបស់ពួកគេ ។
គ្រូបង្រៀនថ្នាក់សាលាថ្ងៃអាទិត្យ
តើតួនាទីរបស់ខ្ញុំគឺជាអ្វី ?
សូមខិតខំជួយយុវវ័យឲ្យមករកព្រះគ្រីស្ទ តាមរយៈការរៀនសូត្រ និងធ្វើតាមគោលលទ្ធិរបស់ទ្រង់ ។ បង្រៀនយុវវ័យឲ្យយល់ដឹង ចែកចាយ និងរស់នៅតាមដំណឹងល្អរបស់ព្រះយេស៊ូវគ្រីស្ទ ។
តើខ្ញុំត្រូវធ្វើអ្វី ?
សូមធ្វើជាគំរូមួយក្នុងនាមជាសិស្សរបស់ព្រះយេស៊ូវគ្រីស្ទ ហើយជួយយុវវ័យឲ្យស្ថាបនាសេចក្ដីជំនឿរបស់ពួកគេ ។ លើកទឹកចិត្តពួកគេឲ្យសិក្សាបទគម្ពីរនៅគេហដ្ឋាន—ដោយផ្ទាល់ខ្លួន និងជាមួយនឹងក្រុមគ្រួសាររបស់ពួកគេ ។ ជួយពួកគេឲ្យរៀបចំ និងបង្រៀនគោលការណ៍នានានៃគោលលទ្ធិ ។ អញ្ជើញពួកគេឲ្យអនុវត្តអ្វីដែលពួកគេកំពុងរៀនដើម្បីមានការអភិវឌ្ឍផ្ទាល់ខ្លួនរបស់ពួកគេ ។
តើខ្ញុំត្រូវចាប់ផ្ដើមនៅត្រង់ណា ?
សូមព្យាយាមបង្រៀនដូចជាព្រះអង្គសង្គ្រោះបានធ្វើ ។ រៀនស្គាល់យុវវ័យម្នាក់ៗ ។ អធិស្ឋានដើម្បីដឹងរបៀបដែលអ្នកអាចជួយពួកគេឲ្យរីកចម្រើនឡើងហើយក្លាយដូចជាព្រះអង្គសង្គ្រោះកាន់តែខ្លាំង ។ ពង្រឹងសមាជិកថ្នាក់ និងឪពុកម្ដាយរបស់ពួកគេក្នុងកិច្ចខំប្រឹងដើម្បីរៀនសូត្រ និងបង្រៀនដំណឹងល្អនៅសាសនាចក្រ និងនៅឯគេហដ្ឋានរបស់ពួកគេ ។
គណៈប៊ីស្សព និងគណៈប្រធានកូរ៉ុម និងថ្នាក់
តើតួនាទីរបស់ពួកគេគឺជាអ្វី ?
គណៈប៊ីស្សពគឺជាគណៈប្រធាននៃបព្វជិតភាពអើរ៉ុននៅក្នុងវួដនេះ ហើយទទួលខុសត្រូវលើយុវនារី និងយុវជន ។ គណៈប្រធានកូរ៉ុមបព្វជិតភាពអើរ៉ុនធ្វើការដោយកូនសោ ដែលបានប្រគល់ដល់គេ នៅពេលប្រធានកូរ៉ុមត្រូវបានញែកចេញ ។ គណៈប្រធានថ្នាក់យុវនារីធ្វើការនៅក្រោមសិទ្ធិអំណាចបព្វជិតភាព បន្ទាប់ពីពួកគេត្រូវបានញែកចេញដោយសមាជិកម្នាក់នៃគណៈប៊ីស្សព ។
តើពួកគេធ្វើការងារអ្វី ?
គណៈប្រធានគួរតែខិតខំដើម្បីធ្វើជាសិស្សដ៏ពិតរបស់ព្រះយេស៊ូវគ្រីស្ទ នៅពេលពួកគេជួយសមាជិកក្នុងកូរ៉ុម ឬថ្នាក់ម្នាក់ៗឲ្យមានអារម្មណ៍នៃក្ដីស្រឡាញ់ និងស្វែងរកអំណរក្នុងការរស់នៅតាមដំណឹងល្អ ។ នៅក្រោមការដឹកនាំពីគណៈប៊ីស្សព គណៈប្រធានកូរ៉ុមដឹកនាំអ្នកកាន់បព្វជិតភាពអើរ៉ុន នៅពេលពួកគេបម្រើក្នុងពិធីបរិសុទ្ធសាក្រាម៉ង់ ។ ទាំងគណៈប្រធានកូរ៉ុម និងថ្នាក់ទាំងឡាយដឹកនាំការប្រមូលអ៊ីស្រាអែលដែលនៅទាំងសងខាងវាំងនន និងថែទាំដល់អ្នកដែលខ្វះខាត ។
តើពួកគេត្រូវចាប់ផ្ដើមនៅត្រង់ណា ?
គណៈប្រធានរៀនពីកាតព្វកិច្ចរបស់ពួកគេមកពីព្រះអម្ចាស់ និងថ្នាក់ដឹកនាំរបស់ពួកគេ ។ ពួកគេអធិស្ឋានសម្រាប់សមាជិកកូរ៉ុម ឬថ្នាក់ ហើយរៀនដឹងពីតម្រូវការរបស់ពួកគេ ។ ពួកគេគាំទ្រសមាជិកទាំងនោះឲ្យក្លាយជាសិស្សរបស់ព្រះយេស៊ូវគ្រីស្ទ ។ ពួកគេប្រឹក្សារួមគ្នាអំពីមេរៀន សកម្មភាព និងការបម្រើណាមួយដែលនឹងប្រទានពរ និងពង្រឹងដល់យុវវ័យ ហើយនាំឲ្យមានសាមគ្គីភាពដល់កូរ៉ុម ឬថ្នាក់របស់ពួកគេ ។