ការបំពាក់បំប៉នវគ្គសិក្សាមូលដ្ឋានគ្រឹះ
សូមស្វាគមន៍
សូមស្វាគមន៍មកកាន់ការបង្រៀនវគ្គសិក្សាមូលដ្ឋានគ្រឹះថ្នាក់វិទ្យាស្ថាន ! សូមអរគុណចំពោះការព្រមទទួលយកឱកាស ដើម្បីជួយសិស្សរបស់អ្នកឲ្យមានការផ្លាស់ប្រែចិត្តជឿកាន់តែជ្រាលជ្រៅទៅលើព្រះយេស៊ូវគ្រីស្ទ និងដំណឹងល្អរបស់ទ្រង់ដែលបានស្តារឡើងវិញ ។
ពីមុនការបង្រៀន
ពីមុនការបង្រៀន អ្នកនឹងចង់ ៖
-
សូមរំឭក « សេចក្ដីណែនាំខ្លីៗ » សម្រាប់ការបង្រៀនវគ្គសិក្សាមូលដ្ឋានគ្រឹះ ។
-
សូមសិក្សាបុព្វកថានៅក្នុង ឯកសារគ្រូបង្រៀន ដោយយកចិត្តទុកដាក់ ។
-
សូមរៀបចំពេលវេលាដើម្បីជួបជាមួយអ្នកសម្របសម្រួល ឬនាយកថ្នាក់វិទ្យាស្ថាន ដើម្បីពិភាក្សាអំពីកិច្ចការរបស់អ្នក សិស្ស វគ្គសិក្សា និងសំណួរណាមួយដែលអ្នកមាន ។
-
សូមអធិស្ឋានសម្រាប់ការណែនាំដើម្បីជួយសិស្សរបស់អ្នកឲ្យមករកព្រះគ្រីស្ទ និងកាន់តែប្រែក្លាយដូចជាទ្រង់ ។
កម្មវត្ថុនៃការបំពាក់បំប៉នបុគ្គលិក
មានគោលការណ៍ និងជំនាញជាច្រើនដែលសំខាន់សម្រាប់ការបង្រៀនដ៏មានប្រសិទ្ធភាព ។ អ្នកអាចបន្ដសិក្សាគោលការណ៍ទាំងឡាយ ហើយអនុវត្តជំនាញដែលបានបង្រៀននៅក្នុងសៀវភៅក្បួនខ្នាតថ្នាក់សិក្ខាសាលា និងថ្នាក់វិទ្យាស្ថាន ។ សម្រាប់គោលបំណងនៃការបំពាក់បំប៉នបុគ្គលិកនេះ នោះយើងនឹងកំណត់ ដាក់ជាគំរូ និងអនុវត្តជំនាញគន្លឹះពីរបី ដែលទាក់ទងនឹងការបង្រៀនវគ្គសិក្សាមូលដ្ឋានគ្រឹះថ្នាក់វិទ្យាស្ថាន ដើម្បីជួយតម្រង់ទិសអ្នកមកកាន់វគ្គសិក្សា និងកម្មវិធីសិក្សានេះ ។ ជំនាញទាំងនេះអាចជួយអ្នកឲ្យផ្ដល់បទពិសោធន៍ដែលស្អាងឡើង និងប្រែចិត្តជឿដល់សិស្សទាំងឡាយ កាលអ្នកព្យាយាមជួយពួកគេឲ្យ រៀបចំខ្លួន, ចូលរួម និង ធ្វើសកម្មភាព ដើម្បីជួយពួកគេឲ្យក្លាយដូចជាព្រះអង្គសង្គ្រោះព្រះយេស៊ូវគ្រីស្ទ ។
-
រៀបចំខ្លួន ៖ លើកកម្ពស់ការរៀបចំខ្លួនរបស់សិស្សតាមរយៈការអញ្ជើញ ។
-
ចូលរួម ៖ ឲ្យសិស្សចូលរួមដោយផ្អែកលើការរៀបចំខ្លួនរបស់ពួកគេ ។
-
ធ្វើសកម្មភាព ៖ សង្កត់ធ្ងន់លើការអនុវត្ត ។
ជំនាញ ៖ លើកកម្ពស់ការរៀបចំខ្លួនរបស់សិស្សតាមរយៈការអញ្ជើញ
តើអ្នកនឹងលើកកម្ពស់ការរៀបចំខ្លួនរបស់សិស្សអ្នក ដើម្បីកែលម្អបទពិសោធន៍របស់ពួកគេនៅក្នុងថ្នាក់រៀនដោយរបៀបណា ?
សូមអានផ្នែកទាំងនេះ ហើយធ្វើតាមការណែនាំ ។
កំណត់
នៅក្នុងវគ្គសិក្សាមូលដ្ឋានគ្រឹះ ឯកសាររៀបចំសម្រាប់ថ្នាក់មានគោលបំណងដើម្បីឲ្យអ្នក និងសិស្សរបស់អ្នកសិក្សាដើម្បីរៀបចំខ្លួនសម្រាប់ថ្នាក់រៀន ។ ឯកសាររៀបចំមាននូវការអញ្ជើញដើម្បីលើកកម្ពស់ការរៀបចំខ្លួនរបស់សិស្ស និងគ្រូបង្រៀនតាមរយៈសំណួរ និងសកម្មភាពនានា ដែលមានបំណងជួយពង្រីកដល់ការរៀនសូត្រទាំងនៅក្នុង និងនៅក្រៅថ្នាក់រៀន ។ ការអញ្ជើញនីមួយៗទាំងនេះមានអមដោយរូបតំណាង ដើម្បីជួយអ្នកឲ្យមើលឃើញពីរបៀប និងពេលវេលាដែលត្រូវប្រើការអញ្ជើញទាំងនេះ ព្រមទាំងរបៀបដែលអ្នកអាចផ្អែកលើការអញ្ជើញទាំងនេះបាននៅក្នុងថ្នាក់រៀន ។
គំរូ
នេះជាឧទាហរណ៍ពីរបីនៃការអញ្ជើញឲ្យរៀបចំខ្លួនទាំងនេះ ដែលអ្នកអាចរកឃើញនៅក្នុងកម្មវិធីសិក្សានេះ ៖
សញ្ជឹងគិតនៅក្នុងការរៀបចំសម្រាប់ថ្នាក់
ឧទាហរណ៍ ៖ « តើបទពិសោធន៍អ្វីខ្លះដែលបានជួយអ្នកឲ្យដឹងថា ព្រះគម្ពីរមរមនគឺជាព្រះបន្ទូលរបស់ព្រះ ? »
សិក្សានៅក្នុងការរៀបចំសម្រាប់ថ្នាក់
ឧទាហរណ៍ ៖ « ព្យាការីអាលម៉ាបានបង្រៀនប្រជាជនអំពីដង្វាយធួនរបស់ព្រះអង្គសង្គ្រោះ ។ សូមអាន អាលម៉ា ៧:១១–១៣ » ។
កត់ត្រាគំនិតរបស់អ្នក
ឧទាហរណ៍ ៖ « នៅក្នុងសៀវភៅកំណត់ហេតុរបស់អ្នក ឬនៅចន្លោះដែលផ្ដល់ឲ្យ សូមសរសេរសេចក្ដីពិតពីរបីដែលអ្នកចាប់អារម្មណ៍ចេញពីវគ្គបទគម្ពីរ និងការបង្រៀននានានៅក្នុងផ្នែកនេះ ព្រមទាំងគំនិត និងសំណួរផ្សេងៗទៀតដែលអ្នកមានផងដែរ ។ សូមមកកាន់ថ្នាក់រៀនដោយបានរៀបចំខ្លួនចែកចាយសេចក្ដីពិត ដែលបងប្អូនបានរកឃើញ និងការយល់ដឹងនានា » ។
ពិភាក្សានៅក្នុងការរៀបចំសម្រាប់ថ្នាក់
ឧទាហរណ៍ ៖ « ដោយមានជំនួយពីសមាជិកគ្រួសារ ឬមិត្តម្នាក់ សូមរកមើលការអនុវត្តនាពេលថ្មីៗនេះមួយចំនួនស្ដីពីគោលការណ៍ ដែលអ្នកបានរកឃើញពីខគម្ពីរទាំងនេះ ។ សូមមកកាន់ថ្នាក់រៀនដោយបានរៀបចំខ្លួនចែកចាយអ្វីដែលអ្នកបានរៀន » ។
ធ្វើសកម្មភាពតាមអ្វីដែលអ្នកបានរៀន
ឧទាហរណ៍ ៖ « តើអ្នកនឹងធ្វើអ្វីខ្លះនៅប៉ុន្មានថ្ងៃ និងសប្ដាហ៍ខាងមុខនេះ ដើម្បីបម្រើមនុស្សដទៃដូចជាព្រះយេស៊ូវគ្រីស្ទ ? »
ឥឡូវ ដោយសារអ្នកបានឃើញពីរបៀបដែលកម្មវិធីសិក្សានេះ លើកកម្ពស់ដល់ការរៀបចំខ្លួនរបស់សិស្សតាមរយៈការអញ្ជើញហើយ សូមអនុវត្តស្វែងរក និងប្រើប្រាស់ការអញ្ជើញទាំងនេះនៅក្នុងកម្មវិធីសិក្សា ។
អនុវត្ត
សូមធ្វើតាមជំហានខាងក្រោមនេះដើម្បីអនុវត្តស្វែងរក និងប្រើប្រាស់ការអញ្ជើញទាំងនេះ ដើម្បីលើកកម្ពស់ដល់ការរៀបចំខ្លួនរបស់សិស្ស ។
-
សូមចូលទៅមេរៀនមួយនៅក្នុងឯកសារគ្រូបង្រៀន ក្នុងវគ្គសិក្សាដែលអ្នកកំពុងបង្រៀន ឬនឹងបង្រៀន ហើយរកមើលការអញ្ជើញឲ្យរៀបចំខ្លួនដែលបានបង្ហាញឡើងទាំងឡាយ ។
-
សូមជ្រើសយកការអញ្ជើញមួយ ។
-
សូមពិចារណាថា តើការធ្វើសកម្មភាពនេះអាចមានសភាពយ៉ាងណានៅក្នុងការរៀបចំរបស់សិស្ស ។ សូមគិតអំពីឥទ្ធិពលដែលការប្រើប្រាស់ការអញ្ជើញឲ្យរៀបចំខ្លួននេះ អាចមានលើបទពិសោធន៍របស់សិស្សមុនពេល និងអំឡុងពេលបង្រៀន ។ សូមគិតអំពីរបៀបដែលអ្នកអាចអញ្ជើញសិស្សឲ្យរៀបចំខ្លួនសម្រាប់ម៉ោងរៀនលើកក្រោយ ដោយការជួយសិស្សឲ្យរកមើលការអញ្ជើញឲ្យរៀបចំខ្លួនទាំងនេះ ។
-
សូមរកមើលការអញ្ជើញឲ្យរៀបចំខ្លួនផ្សេងទៀត ហើយអនុវត្តវាសាឡើងវិញ ។
ការស្គាល់ និងការធ្វើឲ្យមានប្រសិទ្ធភាពក្នុងការប្រើប្រាស់ការអញ្ជើញឲ្យរៀបចំខ្លួន នឹងជួយអ្នកឲ្យផ្ដោតលើសិស្ស និងលើកកម្ពស់ការរៀបចំខ្លួនរបស់ពួកគេ ដើម្បីមានបទពិសោធន៍រៀនសូត្រកាន់តែជ្រាលជ្រៅមួយ ។
រួមបញ្ចូល
នៅពេលអ្នកខិតខំលើកកម្ពស់ការរៀបចំខ្លួនរបស់សិស្សតាមរយៈការអញ្ជើញ សូមពិចារណាពីសំណួរដូចតទៅនេះ ៖
-
នៅពេលអ្នកបង្រៀន តើអ្នកនឹងរួមបញ្ចូលអ្វីដែលអ្នកបានរៀនពីការអនុវត្តទាំងនេះដោយរបៀបណា ?
-
តើអ្នកអាចធ្វើអ្វីខ្លះ ដើម្បីបន្តអនុវត្តជំនាញនេះ ដើម្បីអ្នកអាចធ្វើជាគ្រូបង្រៀនដែលកាន់តែប្រសើរម្នាក់ ?
ពិភាក្សា
សូមកត់ត្រាទុកនូវអ្វីដែលអ្នកបានរៀនពីបទពិសោធន៍នេះ ។
ជំនាញ ៖ ឲ្យសិស្សចូលរួមដោយផ្អែកលើការរៀបចំខ្លួនរបស់ពួកគេ
តើអ្នកនឹងឲ្យសិស្សរបស់អ្នកចូលរួមដោយរបៀបណា ដោយផ្អែកលើអ្វីដែលពួកគេបានសិក្សា រៀនសូត្រ និងទទួលអារម្មណ៍ អំឡុងពេលរៀបចំខ្លួនរបស់ពួកគេសម្រាប់ថ្នាក់រៀន ?
សូមអានផ្នែកទាំងនេះ ហើយធ្វើតាមការណែនាំ ។
កំណត់
ពេញមួយវគ្គសិក្សាមូលដ្ឋានគ្រឹះនេះ កម្មវិធីសិក្សាអាចជួយអ្នកឲ្យទុកចិត្ត និងផ្អែកលើការរៀបចំខ្លួនរបស់សិស្សបាន ។ ឯកសារគ្រូបង្រៀនមាននូវការបំផុសគំនិតឲ្យចូលរួមជាច្រើន ដើម្បីអញ្ជើញសិស្សឲ្យរំឭក ចងចាំ ភ្ជាប់ ចែកចាយពីការរៀបចំខ្លួនរបស់ពួកគេ ជាដើម ដើម្បីរំឭក និងលើកទឹកចិត្តអ្នកឲ្យប្រើប្រាស់ការយល់ដឹង និងការរៀបចំខ្លួនរបស់សិស្សដើម្បីដឹកនាំបទពិសោធន៍នៅក្នុងថ្នាក់រៀន ។
គំរូ
នេះជាឧទាហរណ៍ពីរបីនៃការបំផុសគំនិតឲ្យចូលរួមទាំងនេះ ដែលអ្នកអាចរកឃើញនៅក្នុងកម្មវិធីសិក្សានេះ ៖
-
« សូមអញ្ជើញសិស្សឲ្យប្រាប់ពីអ្វីដែលពួកគេចាំអំពីស្ថានភាពនេះ ចេញពីការរៀបចំខ្លួនរបស់ពួកគេសម្រាប់ថ្នាក់ » ។
-
« សូមរំឭកសិស្សថា នៅក្នុងឯកសាររៀបចំ ពួកគេត្រូវបានអញ្ជើញឲ្យគូសចំណាំសេចក្ដីពិតនានា ដែលពួកគេបានចាប់អារម្មណ៍ ។ សូមផ្ដល់ពេលខ្លះឲ្យសិស្សរំឭកវគ្គបទគម្ពីរ និងការបង្រៀនរបស់ព្យាការី ដែលពួកគេបានគូសចំណាំទុកក្នុងផ្នែកនេះ ។ សូមឲ្យពួកគេចែកចាយអ្វីដែលពួកគេបានរៀនសូត្រជាមួយសិស្សក្នុងថ្នាក់ » ។
-
« សូមអនុញ្ញាតឲ្យសិស្សពិភាក្សាគ្នាជាក្រុមតូចៗរយៈពេលពីរបីនាទី ពីរបៀបដែលពួកគេនឹងប្រើប្រាស់អ្វីដែលពួកគេបានរៀនសូត្រនៅក្នុងការរៀបចំខ្លួន ដើម្បីជួយដល់មិត្តភក្ដិរបស់ពួកគេ » ។
ឥឡូវ ដោយសារអ្នកបានឃើញពីរបៀបដែលកម្មវិធីសិក្សានេះ ជួយអ្នកឲ្យផ្អែកលើការរៀបចំខ្លួនរបស់សិស្ស សូមអនុវត្តស្វែងរកការបំផុសគំនិតឲ្យចូលរួមទាំងនេះនៅក្នុងកម្មវិធីសិក្សានេះ ។
អនុវត្ត
សូមធ្វើតាមជំហានខាងក្រោមនេះដើម្បីអនុវត្តស្វែងរក និងប្រើប្រាស់ការបំផុសគំនិតឲ្យចូលរួមទាំងប៉ុន្មានបែបនេះ ដើម្បីផ្អែកលើការរៀបចំខ្លួនរបស់សិស្ស ។
-
សូមចូលទៅមេរៀនមួយនៅក្នុងឯកសារគ្រូបង្រៀន ក្នុងវគ្គសិក្សាដែលអ្នកកំពុងបង្រៀន ឬនឹងបង្រៀន ហើយរកមើលការបំផុសគំនិតឲ្យចូលរួមដែលបានបង្ហាញឡើងទាំងឡាយ ។
-
សូមជ្រើសយកការបំផុសគំនិតមួយ ។
-
សូមពិចារណាថា តើការធ្វើសកម្មភាពនេះអាចមានសភាពយ៉ាងណានៅក្នុងថ្នាក់រៀន ។ សូមគិតអំពីឥទ្ធិពលដែលការប្រើប្រាស់ការបំផុសគំនិតឲ្យចូលរួមនេះ អាចមានលើបទពិសោធន៍របស់សិស្ស ។
-
សូមស្វែងរកការបំផុសគំនិតឲ្យចូលរួមផ្សេងទៀត ហើយធ្វើវាសាឡើងវិញ ។
ការស្គាល់ និងការធ្វើឲ្យមានប្រសិទ្ធភាពក្នុងការប្រើប្រាស់ការបំផុសគំនិតឲ្យចូលរួម នឹងជួយអ្នកឲ្យផ្ដោតលើសិស្ស និងឲ្យពួកគេចូលរួមក្នុងបទពិសោធន៍រៀនសូត្រដ៏ជ្រាលជ្រៅមួយ ។
រួមបញ្ចូល
នៅពេលអ្នកខិតខំបង្កើនឲ្យមានការចូលរួមនៅក្នុងថ្នាក់រៀន ដោយផ្អែកលើការរៀបចំខ្លួនរបស់សិស្ស សូមពិចារណាពីសំណួរដូចតទៅនេះ ៖
-
នៅពេលអ្នកបង្រៀន តើអ្នកនឹងរួមបញ្ចូលអ្វីដែលអ្នកបានរៀនពីការអនុវត្តទាំងនេះដោយរបៀបណា ?
-
តើអ្នកអាចធ្វើអ្វីខ្លះ ដើម្បីបន្តអនុវត្តជំនាញនេះ ដើម្បីអ្នកអាចធ្វើជាគ្រូបង្រៀនដែលកាន់តែប្រសើរម្នាក់ ?
ពិភាក្សា
សូមកត់ត្រាទុកនូវអ្វីដែលអ្នកបានរៀនពីបទពិសោធន៍នេះ ។
ជំនាញ ៖ សង្កត់ធ្ងន់លើការអនុវត្ត
តើអ្នកនឹងសង្កត់ធ្ងន់លើការអនុវត្តនៅក្នុងថ្នាក់របស់អ្នកយ៉ាងដូចម្តេច ? តើអ្នកនឹងធ្វើអ្វីខ្លះ ដើម្បីលើកទឹកចិត្តសិស្សរបស់អ្នកឲ្យធ្វើសកម្មភាពតាមអ្វីដែលពួកគេបានរៀនសូត្រ ?
សូមអានផ្នែកទាំងនេះ ហើយធ្វើតាមការណែនាំ ។
កំណត់
ការរៀបចំខ្លួនដ៏មានប្រសិទ្ធភាពរបស់សិស្ស និងគ្រូបង្រៀនពីមុនថ្នាក់រៀន អាចអនុញ្ញាតឲ្យមានពេលវេលាបន្ថែមទៀតនៅក្នុងថ្នាក់ ដើម្បីជួយសិស្សឲ្យកំណត់ពីរបៀបដើម្បីរស់នៅតាមសេចក្ដីពិត ដែលពួកគេបានរកឃើញនៅក្នុងមេរៀននេះ ។ ឯកសារគ្រូបង្រៀនត្រូវបានរៀបចំឡើងដើម្បីស្ថាបនាលើការរៀបចំខ្លួនរបស់សិស្ស ហើយជួយបង្កើនអំណាច និងសមត្ថភាពរបស់សិស្សដើម្បីធ្វើសកម្មភាពតាមរបៀបមួយ ដែលនឹងជួយពួកគេឲ្យប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។
គំរូ
នេះជាឧទាហរណ៍ពីរបីនៃការពិភាក្សា និងការអញ្ជើញដោយផ្អែកលើការអនុវត្ត ដែលអ្នកអាចរកឃើញនៅក្នុងកម្មវិធីសិក្សាមូលដ្ឋានគ្រឹះនេះ ៖
-
« សូមសួរសំណួរដូចតទៅនេះទៅកាន់សិស្ស ៖ តើអ្នក និងគ្រួសាររបស់អ្នកបានចូលរួមក្នុងកិច្ចការពង្សប្រវត្តិ និងការបម្រើក្នុងព្រះវិហារបរិសុទ្ធតាមរបៀបណាខ្លះ ? តើអ្នកទទួលបានពរជ័យអ្វីខ្លះមកពីការធ្វើដូច្នោះ ? អ្នកអាចអញ្ជើញសិស្សឲ្យគិតពីនរណាម្នាក់ ដែលពួកគេអាចសូមឲ្យជួយបង្រៀនពួកគេធ្វើកិច្ចការពង្សប្រវត្តិ ។ ប្រសិនបើសិស្សមួយចំនួន មានជំនាញចេះធ្វើកិច្ចការពង្សប្រវត្តិហើយ សូមអញ្ជើញពួកគេឲ្យបង្រៀនសិស្សផ្សេងទៀតនៅក្នុងថ្នាក់ » ។
-
« សូមឲ្យសិស្សមានពេលខ្លះពិចារណា និងកត់ត្រាគំនិតរបស់ពួកគេអំពីសំណួរដូចតទៅនេះ ៖ តើខ្ញុំអាចកាន់តែសកម្មនៅក្នុងព្រះវិហារ និងជួយសម្រេចបានគោលបំណងរបស់សាសនាចក្រតាមរបៀបណា ? »
-
« សូមបង្ហាញសំណួរដូចតទៅនេះ ៖ តើខ្ញុំនឹងធ្វើអ្វីខ្លះ ដើម្បីយាងព្រះចេស្ដានៃព្រះយេស៊ូវគ្រីស្ទមកក្នុងជីវិតរបស់ខ្ញុំឲ្យកាន់តែពេញលេញ ? សូមផ្ដល់ពេលឲ្យសិស្សសញ្ជឹងគិតពីសំណួរនេះប្រកបដោយការអធិស្ឋាន ហើយសរសេរចម្លើយក្នុងសៀវភៅកំណត់ហេតុ ឬសៀវភៅកត់ចំណាំរបស់ពួកគេ ។ កាលពួកគេកំពុងសញ្ជឹងគិត សូមពិចារណាបង្ហាញសម្ដីដកស្រង់មួយមកពីព្យាការីថ្ងៃចុងក្រោយម្នាក់ ដើម្បីលើកទឹកចិត្តពួកគេតាមរបៀបជាក់លាក់នានា ឲ្យយាងអញ្ជើញព្រះចេស្ដារបស់ព្រះអង្គសង្គ្រោះមកក្នុងជីវិតរបស់ពួកគេ » ។
ឥឡូវ ដោយសារអ្នកបានឃើញពីរបៀបដែលកម្មវិធីសិក្សានេះ ជួយអ្នកឲ្យសង្កត់ធ្ងន់លើការអនុវត្តរបស់សិស្សហើយ សូមអនុវត្តរកមើលសកម្មភាពបង្រៀននៅក្នុងកម្មវិធីសិក្សានេះ ។
អនុវត្ត
សូមធ្វើតាមជំហានខាងក្រោមនេះដើម្បីអនុវត្តស្វែងរក និងប្រើប្រាស់សកម្មភាពបង្រៀនទាំងឡាយ ដើម្បីសង្កត់ធ្ងន់លើការអនុវត្តរបស់សិស្ស ។
-
សូមចូលទៅមេរៀនមួយនៅក្នុងឯកសារគ្រូបង្រៀន ក្នុងវគ្គសិក្សាដែលអ្នកកំពុងបង្រៀន ឬនឹងបង្រៀន ហើយរកមើលសកម្មភាពបង្រៀនដែលបានបង្ហាញឡើងទាំងឡាយ ។
-
សូមជ្រើសយកសកម្មភាពបង្រៀនមួយ ហើយសូមអានដោយយកចិត្តទុកដាក់កាន់តែខ្លាំងលើសកម្មភាព និងសំណួរនានាដែលទាក់ទងនឹងការអនុវត្ត ។
-
សូមគិតអំពីឥទ្ធិពលដែលសកម្មភាពបង្រៀននេះ ឬសំណួរទាំងនេះ អាចមានលើបទពិសោធន៍របស់សិស្ស ។
-
សូមអនុវត្តវាសាឡើងវិញ តាមរយៈការជ្រើសយកមេរៀនមួយផ្សេងនៅក្នុងឯកសារគ្រូបង្រៀន ហើយរកមើលសកម្មភាពបង្រៀនដែលជួយសង្កត់ធ្ងន់លើការអនុវត្ត ។
ការស្គាល់ និងការធ្វើឲ្យមានប្រសិទ្ធភាពក្នុងការប្រើប្រាស់ការពិភាក្សាដោយផ្អែកលើការអនុវត្ត នឹងជួយអ្នកឲ្យផ្ដោតលើសិស្ស ហើយអាចជួយពួកគេឲ្យប្រែក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។
រួមបញ្ចូល
នៅពេលអ្នកខិតខំលើកទឹកចិត្តសិស្ស និងសង្កត់ធ្ងន់លើការអនុវត្ត សូមពិចារណាពីសំណួរដូចតទៅនេះ ។
-
នៅពេលអ្នកបង្រៀន តើអ្នកនឹងរួមបញ្ចូលអ្វីដែលអ្នកបានរៀនពីការអនុវត្តទាំងនេះដោយរបៀបណា ?
-
តើអ្នកអាចធ្វើអ្វីខ្លះ ដើម្បីបន្តអនុវត្តជំនាញនេះ ដើម្បីអ្នកអាចធ្វើជាគ្រូបង្រៀនដែលកាន់តែប្រសើរម្នាក់ ?
ពិភាក្សា
សូមកត់ត្រាទុកនូវអ្វីដែលអ្នកបានរៀនពីបទពិសោធន៍នេះ ។
សេចក្ដីសង្ខេប
សូមអរគុណចំពោះការព្រមទទួលយកឱកាស ដើម្បីជួយសិស្សរបស់អ្នកឲ្យមានការផ្លាស់ប្រែចិត្តជឿកាន់តែជ្រាលជ្រៅទៅលើព្រះយេស៊ូវគ្រីស្ទ និងដំណឹងល្អរបស់ទ្រង់ដែលបានស្តារឡើងវិញ ។
សូមចងចាំ ៖
-
ព្រះអម្ចាស់នឹងណែនាំអ្នក នៅពេលអ្នកព្យាយាមជួយសិស្សរបស់អ្នកឲ្យមករកព្រះគ្រីស្ទ និងកាន់តែប្រែក្លាយដូចជាទ្រង់ ។
-
អ្នកសម្របសម្រួល ឬនាយកថ្នាក់វិទ្យាស្ថានរបស់អ្នកអាចជួយអ្នកឆ្លើយនឹងសំណួរ ឬកង្វល់ណាមួយដែលអ្នកមានបាន ។
-
ជំនាញដែលត្រូវបានកំណត់ ដាក់ជាគំរូ និងអនុវត្តនៅក្នុងការបំពាក់បំប៉ននេះ អាចជួយអ្នកឲ្យកាន់តែមានប្រសិទ្ធភាពក្នុងការប្រើប្រាស់កម្មវិធីសិក្សាដើម្បីផ្ដល់ពរជ័យដល់សិស្សរបស់អ្នក ។ ជំនាញទាំងនេះអាចជួយអ្នកឲ្យផ្ដល់បទពិសោធន៍ដែលស្អាងឡើង និងប្រែចិត្តជឿដល់សិស្សទាំងឡាយ កាលអ្នកព្យាយាមជួយពួកគេឲ្យរៀបចំខ្លួន ចូលរួម និងធ្វើសកម្មភាព ដើម្បីក្លាយដូចជាព្រះអង្គសង្គ្រោះព្រះយេស៊ូវគ្រីស្ទ ។