« គំនិតសម្រាប់ការរៀនសូត្រ និងការបង្រៀនចេញពីសន្និសីទទូទៅ » គំនិតសម្រាប់ការរៀនសូត្រ និងការបង្រៀនចេញពីសន្និសីទទូទៅ ( ឆ្នាំ២០២០ )

« គំនិតសម្រាប់ការរៀនសូត្រ និងការបង្រៀនចេញពីសន្និសីទទូទៅ » គំនិតសម្រាប់ការរៀនសូត្រ និងការបង្រៀនចេញពីសន្និសីទទូទៅ

គំនិតសម្រាប់ការរៀនសូត្រ និងការបង្រៀនចេញពីសន្និសីទទូទៅ

នៅក្នុងសន្និសីទដំបូងនៃសាសនាចក្រដែលបានស្តារឡើងវិញ ព្រះអម្ចាស់បានធ្វើការសន្យាពិសេសមួយទៅដល់អ្នកដែល « ទទួល » និង « ស្ដាប់តាម » ពាក្យសម្ដីនៃពួកព្យាការីរបស់ទ្រង់ ។ « ដ្បិតដោយសារការធ្វើការទាំងនេះហើយ ទ្វារស្ថាននរកនឹងពុំដែលឈ្នះអ្នកឡើយ មែនហើយ ហើយព្រះអម្ចាស់ដ៏ជាព្រះ ទ្រង់នឹងកម្ចាត់អំណាចនៃសេចក្ដីងងឹតចេញពីអ្នកទៅ ហើយនឹងបណ្ដាលឲ្យផ្ទៃមេឃញាប់ញ័រ ដើម្បីសេចក្ដីល្អដល់អ្នក និងសិរីល្អដល់ព្រះនាមរបស់ទ្រង់ » ( គោលលទ្ធិ និង សេចក្ដីសញ្ញា ២១:៤–៦ ) ។

ចាប់តាំងពីសន្និសីទលើកដំបូងនោះមក សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានទន្ទឹងរង់ចាំស្តាប់ព្រះសូរសៀងរបស់ព្រះអម្ចាស់តាមរយៈពួកអ្នកបម្រើរបស់ទ្រង់ ។ សូមពិចារណាពីរបៀបដែលបងប្អូនអាចទទួលបាន និងស្ដាប់តាមសារលិខិតដែលបងប្អូនទទួលមកពីព្យាការីរបស់ព្រះអម្ចាស់ និងថ្នាក់ដឹកនាំសាសនាចក្រផ្សេងទៀតនៅក្នុងសន្និសីទទូទៅបានកាន់តែពេញលេញជាងមុន ។

ខាងក្រោមនេះគឺជាគំនិតមួយចំនួនសម្រាប់បងប្អូន ដើម្បីពិចារណា នៅពេលបងប្អូនរៀនពីសារលិខិតសន្និសីទទូទៅដោយផ្ទាល់ខ្លួន ជាមួយគ្រួសាររបស់បងប្អូន និងនៅក្នុងថ្នាក់ ឬកិច្ចប្រជុំសាសនាចក្រទាំងឡាយ ។

គំនិតយោបល់សម្រាប់ការសិក្សាផ្ទាល់ខ្លួន

ស្ដាប់តាមព្រះវិញ្ញាណ ។ ការសិក្សាសារលិខិតសន្និសីទអញ្ជើញវិវរណៈ ។ ពេលដែលបងប្អូនសិក្សា សូមយកចិត្តទុកដាក់ចំពោះគំនិត និងអារម្មណ៍មកពីព្រះវិញ្ញាណ ទោះបីជាអារម្មណ៍ទាំងនោះមិនមានអ្វីទាក់ទងនឹងសារលិខិតនៃសន្និសីទក៏ដោយ ។ ចំណាប់អារម្មណ៍ទាំងនោះអាចជារឿងសំខាន់ដែលព្រះសព្វព្រះទ័យឲ្យបងប្អូនដឹង ។
សួរសំណួរទាំងឡាយ ហើយរកមើលចម្លើយ ។ ស្វែងយល់ពីអត្ថន័យស៊ីជម្រៅនៅក្នុងសារលិខិតសន្និសីទ ដោយការសួរសំណួរដែលជួយបងប្អូនពិចារណាពីអ្វីដែលសារលិខិតនោះបង្រៀន ។ បងប្អូនអាចសួរសំណួរដូចជា « តើសារលិខិតនេះពង្រឹងសេចក្ដីជំនឿរបស់ខ្ញុំលើព្រះយស៊ូវគ្រីស្ទដោយរបៀបណា » ?
កត់ត្រាចំណាប់អារម្មណ៍របស់បងប្អូន ។ មានរបៀបជាច្រើនដើម្បីកត់ត្រាចំណាប់អារម្មណ៍របស់បងប្អូន ។ ឧទាហរណ៍ បងប្អូនអាចមានកំណត់ហេតុនៃការយល់ដឹងរបស់បងប្អូន ឬធ្វើការកត់ចំណាំនៅរឹមទំព័រនៃសារលិខិតសន្និសីទ ។
អនុវត្តសារលិខិតទៅលើខ្លួនឯង ។ សូម្បីតែសារលិខិតសន្និសីទដែលមានការបំផុសគំនិតបំផុតក៏មានគុណតម្លៃមានកំណត់ដែរ ប្រសិនបើយើងមិនអនុវត្ដវានៅក្នុងជីវិតរបស់យើង និងអនុញ្ញាតឲ្យវាដឹកនាំការគិត និងការសម្រេចចិត្ដរបស់យើងទេនោះ ។ តើព្រះវរបិតាសួគ៌មានព្រះទ័យឲ្យខ្ញុំរៀនអ្វីខ្លះមកចេញពីសារលិខិតនេះ ?
រកមើលឯកសារយោង ។ ដើម្បីបង្កើនការយល់ដឹងរបស់បងប្អូនចំពោះសារលិខិតរបស់អ្នកឡើងនិយាយ សូមរកមើលបទគម្ពីរ និងការបង្រៀនរបស់ព្យាការីដែលយោងទៅនឹងសារលិខិតនោះ និងនៅក្នុងកំណត់ចំណាំនៅចុងបញ្ចប់ ។
រកមើល … មានអ្វីជាច្រើនដែលបងប្អូនអាចរកមើល នៅពេលបងប្អូនសិក្សាសារលិខិតសន្និសីទទូទៅ ។ ពេលបងប្អូនសិក្សា សូមពិចារណារកមើលដូចខាងក្រោម ៖
- ព្រះយេស៊ូវគ្រីស្ទ ។ ស្វែងរកទីបន្ទាល់អំពីព្រះអង្គសង្គ្រោះ និងការពិពណ៌នាអំពីព្រះជន្មរបស់ទ្រង់ ការបង្រៀនរបស់ទ្រង់ ដង្វាយធួនរបស់ទ្រង់ និងព្រះចេស្ដាដែលទ្រង់អាចប្រទានឲ្យដល់អស់អ្នកដែលដើរតាមទ្រង់ ។
- ពាក្យ និងឃ្លាដែលបំផុសគំនិត ។ គូសសម្គាល់ ឬសរសេរនូវគំនិតរបស់បងប្អូនអំពីពាក្យ និងឃ្លាដែលបំផុសគំនិតបងប្អូន សំខាន់ចំពោះបងប្អូន ឬលើកទឹកចិត្ដបងប្អូន ។
- គោលការណ៍ និងគោលលទ្ធិទាំងឡាយ ។ សូមសួរខ្លួនឯង « តើគោលការណ៍ ឬគោលលទ្ធិអ្វីខ្លះដែលបានបង្រៀននៅក្នុងសារលិខិតនេះ » ? ពេលខ្លះ គោលការណ៍ និង គោលលទ្ធិ គឺបានថ្លែងចំៗ ហើយពេលខ្លះគោលការណ៍ និងគោលលទ្ធិទាំងនោះបានបង្ហាញតាមរយៈដំណើររឿង ឬឧទាហរណ៍ ។
- បញ្ជី ។ ពេលខ្លះអ្នកឡើងនិយាយនឹងផ្ដល់នូវបញ្ជីគំនិត ការស្នើសុំ ឬសេចក្ដីពិត ។ បងប្អូនក៏ប្រហែលជាទទួលបាននូវចំណាប់អារម្មណ៍ដើម្បីបង្កើតបញ្ជីផ្ទាល់ខ្លួនរបស់បងប្អូនអំពីអ្វីដែលបងប្អូនកំពុងរៀនផងដែរ ។
- ការអញ្ជើញ និងពរជ័យ ។ ស្វែងរកការអញ្ជើញឲ្យធ្វើសកម្មភាព និងពរជ័យដែលបានសន្យា ។ កំណត់ពីរបៀបដែលបងប្អូននឹងធ្វើតាមការអញ្ជើញទាំងនោះ ។
បង្កើតតំណភ្ជាប់ ។ នៅក្នុងបណ្ណាល័យដំណឹងល្អ បងប្អូនអាចបង្កើតតំណភ្ជាប់រវាងសារលិខិតសន្និសីទ ព្រះគម្ពីរ និងមាតិកាផ្សេងទៀត ។
រៀបចំតាមប្រធានបទ ។ នៅក្នុងបណ្ណាល័យដំណឹងល្អ បងប្អូនអាចរៀបចំមាតិកាតាមប្រធានបទដោយប្រើប្រាស់ « ស្លាក » និង « សៀវភៅកត់ចំណាំ » ។ ការណ៍នេះអាចមានប្រយោជន៍នៅពេលក្រោយ នៅពេលបងប្អូនរៀបចំការឡើងនិយាយ ឬមេរៀន ។
ដាក់កាលវិភាគ ។ នៅក្នុង បណ្ណាល័យដំណឹងល្អ បងប្អូនអាចបង្កើតផែនការសិក្សាមួយ ដែលជួយបងប្អូនតាមដានការរីកចម្រើនរបស់បងប្អូន ក្នុងការសិក្សាសារលិខិតនៃសន្និសីទបន្ទាប់នាពេលខាងមុខ ។ បងប្អូនក៏អាចកំណត់ការរំឭកផងដែរ ដើម្បីជួយបងប្អូនសម្រេចគោលដៅការសិក្សារបស់បងប្អូន ។

គំនិតយោបល់សម្រាប់ការសិក្សាជាគ្រួសារ

ដាក់បង្ហាញសម្រង់សម្ដីមួយ ។ សូមជ្រើសរើសសម្រង់សម្ដីមួយដែលបងប្អូនយល់ថាមានអត្ថន័យ ហើយដាក់បង្ហាញសម្រង់នេះនៅកន្លែងដែលសមាជិកគ្រួសារនឹងមើលឃើញវា ។ ⁠បងប្អូនក៏អាចចែកចាយតាមអេឡិចត្រូនិចបានផងដែរ ។ សមាជិកគ្រួសាររបស់បងប្អូនអាចឆ្លាស់វេនគ្នាដើម្បីជ្រើសរើសអត្ថបទមួយដើម្បីបង្ហោះបាន ។ បងប្អូនអាចជ្រើសរើសដើម្បីទន្ទេញសម្រង់នោះឲ្យចាំជាលក្ខណៈគ្រួសារ ។
បង្កើតអ្វីមួយ ។ សមាជិកគ្រួសាររបស់បងប្អូនអាចរីករាយនឹងការបង្កើតអ្វីមួយ ដូចជាគំនូរ ឬវត្ថុស៊កចំណាំសៀវភៅ ដែលមានការបំផុសគំនិតមកពីអ្វីដែលបានបង្រៀននៅក្នុងសារលខិតសន្និសីទ ។ គ្រប់គ្នាអាចចែកចាយអ្វីដែលពួកគេបានបង្កើត ។
រំឭកដំណើររឿងឡើងវិញ ។ ស្វែងរកដំណើររឿងនៅក្នុងសារលិខិតសន្និសីទដែលនឹងជួយគ្រួសាររបស់បងប្អូនរៀនពីគោលការណ៍ដំណឹងល្អ ។ សមាជិកគ្រួសាររបស់បងប្អូនអាចឆ្លាស់វេនគ្នាប្រាប់ដំណើររឿងដែលពួកគេចូលចិត្ត ឬបងប្អូនអាចសម្ដែងដំណើររឿងទាំងនេះបាន ។
អនុវត្តការបង្រៀន ។ បន្ទាប់ពីសិក្សាសារលិខិតសន្និសីទជាមួយគ្នា សូមពិភាក្សាអំពីរបៀបផ្សេងៗដែលការបង្រៀនទាំងនោះទាក់ទងនឹងបទពិសោធន៍ដែលគ្រួសាររបស់បងប្អូនកំពុងមាន ។ បន្ទាប់មកសម្រេចចិត្តជាគ្រួសារនូវអ្វីដែលបងប្អូននឹងធ្វើ ដើម្បីរស់នៅតាមអ្វីដែលបងប្អូនបានរៀន ។
ចែកចាយការបង្រៀន ។ វាមានអត្ថប្រយោជន៍ក្នុងការអានសារលិខិតសន្និសីទដោយផ្ទាល់ខ្លួន ហើយបន្ទាប់មកចែកចាយការយល់ដឹង និងផ្នែកដែលបំផុសគំនិតរួមគ្នា ។ នេះអាចជាវិធីដ៏ល្អមួយដើម្បីរៀនពីគ្នាទៅវិញទៅមក ។
សួរសំណួរ ។ ប្រសិនបើសមាជិកក្នុងគ្រួសាររបស់បងប្អូនមានសំណួរអំពីប្រធានបទដំណឹងល្អ សូមចំណាយពេលស្វែងរកចម្លើយនៅក្នុងសារលិខិតសន្និសីទអំពីប្រធានបទនោះ ( សូមមើលផ្ទាំង « Topics » នៅក្នុងកម្មវិធី បណ្ណាល័យដំណឹងល្អ ) ។
សិក្សាសារលិខិតរបស់ព្យាការី ។ ជាគ្រួសារ សូមពិចារណាសិក្សាសារលិខិតជាច្រើនដោយប្រធាននៃសាសនាចក្រ ( សូមមើលផ្ទាំង « Speakers » នៅក្នុងកម្មវិធី បណ្ណាល័យដំណឹងល្អ ) ។

សម្រាប់គំនិតជាក់លាក់សម្រាប់ក្រុមគ្រួសារដែលមានកូនតូចៗ សូមមើល « Activities for Children » ( ChurchofJesusChrist.org ) ។

គំនិតសម្រាប់ការបង្រៀនថ្នាក់ទាំងឡាយក្នុងសាសនាចក្រ

ការរៀបចំការអញ្ជើញ ។ បងប្អូនទំនងជាមានការពិភាក្សាដ៏មានអត្ថន័យអំពីសារលិខិតសន្និសីទ ប្រសិនបើសមាជិកបានសិក្សាសារលិខិតនោះជាមុន ។ ស្វែងរកវិធីដើម្បីជូនដំណឹងដល់ពួកគេអំពីអ្វីដែលនឹងត្រូវពិភាក្សា ។ បងប្អូនក៏អាចផ្ដល់ដល់ពួកគេនូវសំណួរមួយ ឬពីរដើម្បីជញ្ជឹងគិតដើម្បីជួយពួកគេរៀបចំខ្លួន ។
ពិភាក្សាជាក្រុម ។ ការពិភាក្សាជាក្រុមតូចអាចឲ្យមនុស្សជាច្រើនចូលរួមក្នុងការពិភាក្សានោះ ។ ពិចារណាបែងចែកសមាជិកទៅជាក្រុមតូចៗ ហើយចាត់តាំងក្រុមនីមួយៗឲ្យអាន និងពិភាក្សាផ្នែកផ្សេងគ្នានៃសារលិខិតសន្និសីទ ។ បន្ទាប់មក បងប្អូនអាចសុំឲ្យក្រុមនីមួយៗចែកចាយសេចក្ដីពិតមួយដែលពួកគេបានរៀន ។ ឬបងប្អូនអាចបង្កើតក្រុមថ្មីជាច្រើនដែលមានសមាជិកដែលបានសិក្សាវគ្គផ្សេងគ្នា ហើយចូរឲ្យពួកគេចែកចាយជាមួយគ្នានូវអ្វីដែលពួកគេបានរៀន ។
ឆ្លើយសំណួរ ។ ការផ្ដល់នូវសំណួរបែបទាំងនេះអាចបង្កើតឲ្យមានការពិភាក្សាដ៏មានអត្ថន័យអំពីសារលិខិតសន្និសីទ ៖ តើសេចក្ដីពិតនៃដំណឹងល្អអ្វីខ្លះដែលយើងរកឃើញនៅក្នុងសារលិខិតនេះ ? តើយើងអាចអនុវត្តសេចក្ដីពិតទាំងនេះតាមរបៀបណា ? តើមានការអញ្ជើញ និងពរជ័យដែលបានសន្យាអ្វីខ្លះដែលបានផ្ដល់ឲ្យ ? តើសារលិខិតនេះបង្រៀនយើងអ្វីខ្លះអំពីកិច្ចការដែលព្រះសព្វព្រះទ័យឲ្យយើងធ្វើ ?
ចែកចាយការដកស្រង់ ។ វាអាចជាការបំផុសគំនិតមួយដើម្បីស្ដាប់គ្នាចែកចាយទៅវិញទៅមក អំពីរបៀបដែលសារលិខិតសន្និសីទធ្វើឲ្យយើងរំជួលចិត្ដ និងស្អាងយើងឡើង ។ លើកទឹកចិត្តសមាជិកឲ្យចែកចាយផ្នែកដែលមានអត្ថន័យចេញពីសារលិខិតសន្និសីទ ហើយសុំឲ្យពួកគេពិចារណាពីរបៀបដែលពួកគេអាចចែកចាយសម្រង់សម្ដីទាំងនេះ ដើម្បីប្រទានពរដល់នរណាម្នាក់ដែលពួកគេស្គាល់ ។
ចែកចាយមេរៀនដោយប្រើវត្ថុ ។ ប្រសិនបើបងប្អូនកំពុងស្វែងរកវិធីច្នៃប្រឌិតដើម្បីពិភាក្សាអំពីសារលិខិតសន្និសីទ សូមអញ្ជើញសមាជិកមួយចំនួនទុកជាមុន ឲ្យយកវត្ថុមកពីផ្ទះ ដែលពួកគេអាចប្រើដើម្បីបង្រៀនអ្វីមួយចេញពីសារលិខិតនោះ ។ សុំឲ្យសមាជិកពន្យល់ពីរបៀបដែលវត្ថុទាំងនេះទាក់ទងទៅនឹងផ្នែកជាក់លាក់នៃសារលិខិត ។
រៀបចំមេរៀនមួយដើម្បីបង្រៀននៅឯគេហដ្ឋាន ។ នេះជាវិធីមួយដើម្បីលើកទឹកចិត្តក្រុមគ្រួសារឲ្យរៀនពីសារលិខិតសន្និសីទនៅផ្ទះ ៖ សុំឲ្យសមាជិកធ្វើការជាគូដើម្បីរៀបចំផែនការមេរៀនសម្រាប់រាត្រីជួបជុំគ្រួសារដោយផ្អែកលើសារលិខិតសន្និសីទ ។ តើយើងអាចធ្វើឲ្យសារលិខិតនោះទាក់ទងនឹងក្រុមគ្រួសាររបស់យើងតាមរបៀបណា ?
ចែកចាយបទពិសោធន៍ ។ សេចក្តីថ្លែងការណ៍ និងដំណើររឿងចេញពីសារលិខិតសន្និសីទអាចជំរុញឲ្យសមាជិកចែកចាយបទពិសោធន៍របស់ពួកគេដែលទាក់ទង ឬឧទាហរណ៍ចេញមកពីបទគម្ពីរ ។ ឧទាហរណ៍ទាំងនេះអាចបង្ហាញ ឬពង្រឹងគោលលទ្ធិដែលបានបង្រៀននៅក្នុងសារលិខិតសន្និសីទ ។
រៀនអំពីបទគម្ពីរមួយ ។ សារលិខិតសន្និសីទភាគច្រើនមាននូវវគ្គបទគម្ពីរដែលពាក់ព័ន្ធ—នៅក្នុងសារលិខិតផ្ទាល់ ឬនៅក្នុងកំណត់ចំណាំនៅចុងបញ្ចប់ ។ សមាជិកអាចអានវគ្គបទគម្ពីរដែលបានយោងនៅក្នុងសារលិខិតសន្និសីទ ហើយពិភាក្សាពីរបៀបដែលការបង្រៀននៅក្នុងសារលិខិតជួយពួកគេយល់វគ្គបទគម្ពីរបានកាន់តែប្រសើរ ។
ស្វែងរកចម្លើយមួយ ។ សមាជិកនឹងរកឃើញអត្ថន័យស៊ីជម្រៅនៅក្នុងសារលិខិតសន្និសីទ ប្រសិនបើបងប្អូនសួរសំណួរដែលជំរុញឲ្យមានការជញ្ជឹងគិត ឬអនុវត្តគោលការណ៍ដំណឹងល្អដែលបានបង្រៀននៅក្នុងនោះ ( សម្រាប់ជំនួយ សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣១–៣២ ) ។ បងប្អូនអាចស្នើសុំសមាជិកឲ្យជ្រើសរើសសំណួរមួយ ហើយប្រើសារលិខិតដើម្បីសរសេរចម្លើយ ។ សូមអញ្ជើញពួកគេឲ្យពិភាក្សាពីចម្លើយរបស់ពួកគេជាក្រុមតូចៗ ។
ប្រើ សំឡេង ឬ វីដេអូ ។ វិធីដ៏ល្អបំផុតមួយដើម្បីជួយសមាជិកទទួលអារម្មណ៍នៃព្រះវិញ្ញាណនៅក្នុងសារលិខិត គឺការចាក់សំឡេង ឬវីដេអូខ្លីមួយនៃសារលិខិតនោះ ។