Mga Ideya alang sa Pagkat-on ug Pagtudlo gikan sa Kinatibuk-ang Komperensiya

Sa unang komperensiya sa gipahiuli nga Simbahan, ang Ginoo mihimo og talagsaon nga mga saad niadtong kinsa “modawat” ug “mopatalinghog ngadto” sa mga pulong sa Iyang mga propeta. “Kay pinaagi sa pagbuhat niining mga butanga ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahom sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (Doktrina ug mga Pakigsaad 21:4–6).

Sukad nianang unang komperensiya, ang mga miyembro sa Ang Simbahan ni Jesukristo sa mga Santos sa Ulahing mga Adlaw nagpaabot nga maminaw sa tingog sa Ginoo pinaagi sa Iyang mga sulugoon. Ikonsiderar sa unsang paagi nga kamo hingpit nga modawat ug mopatalinghog sa mga mensahe nga inyong nadawat gikan sa mga propeta sa Ginoo ug sa ubang mga lider sa Simbahan sa kinatibuk-ang komperensiya.

Sa ubos mao ang pipila ka ideya nga inyong ikonsiderar samtang magkat-on kamo gikan sa mga mensahe sa kinatibuk-ang komperensiya sa personal, kauban sa inyong pamilya, ug sa mga klase o mga miting sa Simbahan.

Mga Ideya alang sa Personal nga Pagtuon

• Paminaw sa Espiritu. Ang pagtuon sa mga mensahe sa komperensiya nagdapit og pagpadayag. Samtang magtuon kamo, hatagi og pagtagad ang mga hunahuna ug mga pagbati gikan sa Espiritu bisan og kini walay labot sa mensahe sa komperensiya. Kadto nga mga impresyon tingali mao gayod ang mga butang nga gusto sa Dios nga inyong mahibaloan.

• Pangutana ug pangita og mga tubag. Diskobreha ang mas lawom nga kahulogan sa usa ka mensahe sa komperensiya pinaagi sa pagpangutana nga motabang ninyo sa pagpamalandong unsa ang gitudlo sa mensahe. Mahimo kamong mangutana sama “Sa unsang paagi nga kini nga mensahe nakapalig-on sa akong pagtuo diha ni Jesukristo?” o “Sa unsang paagi kini motabang nako nga mahimong mas maayo nga disipulo?”

• Irekord ang inyong mga impresyon. Adunay daghang paagi sa pagrekord sa inyong mga impresyon. Pananglitan, makahimo kamo og journal sa inyong mga panabot o makabutang og mubo nga mga sulat sa kilid sa mensahe sa komperensiya.

• Gamita ang mensahe sa inyong kaugalingon. Bisan ang labing makadasig nga mensahe sa komperensiya adunay limitado nga bili kon dili nato gamiton kini sa atong mga kinabuhi ug motugot niini nga mogiya sa atong mga hunahuna ug mga desisyon. Unsay gusto sa Langitnong Amahan nga akong buhaton tungod niini nga mensahe?

• Pangitaa ang mga pakisayran. Sa pagpalawom sa atong pagsabot sa mensahe sa mamumulong, pangitaa ang mga kasulatan ug ang propetikanhong mga pagtulun-an nga gigamit sa tibuok mensahe ug sa mubo nga mga sulat sa kataposan.

• Pagpangita sa … Adunay daghang butang nga inyong mapangita samtang magtuon kamo sa mga mensahe sa kinatibuk-ang komperensiya. Samtang magtuon kamo, ikonsiderar ang pagpangita sa mosunod:

  • Jesukristo. Pangitaa ang mga pagpamatuod bahin sa Manluluwas ug ang mga paghulagway sa Iyang kinabuhi, Iyang mga pagtulun-an, Iyang Pag-ula, ug ang gahom nga Iyang mahatag niadtong kinsa mosunod Kaniya.

  • Makadasig nga mga pulong ug hugpong sa mga pulong. Timan-i o isulat ang inyong mga hunahuna mahitungod sa mga pulong ug hugpong sa mga pulong nga nakapadasig ninyo, gibati nga importante ninyo, o miawhag ninyo.

  • Mga baroganan ug mga doktrina. Pangutan-a ang inyong kaugalingon, “Unsa nga mga baroganan o mga doktrina ang gitudlo niini nga mensahe?” Usahay ang mga baroganan ug mga doktrina direkta nga gipahayag, ug usahay gihulagway kini pinaagi sa istorya o ehemplo.

  • Mga lista. Usahay ang usa ka mamumulong mohatag og lista sa mga ideya, mga kagamitan, o mga kamatuoran. Tingali kamo mobati usab nga nadasig nga mohimo sa inyong kaugalingon nga lista sa mga butang nga inyong nakat-onan.

  • Mga imbitasyon ug mga panalangin. Pangitaa ang mga imbitasyon sa paglihok ug ang mga panalangin nga gisaad. Tinoa kon unsaon ninyo sa paglihok niadto nga mga imbitasyon.

• Paghimo og mga link. Sa Librarya sa Ebanghelyo, makahimo ka og mga link tali sa mga mensahe sa komperensiya, mga kasulatan, ug ubang sulod.

• Paghan-ay pinaagi sa hilisgotan. Sa Librarya sa Ebanghelyo, mahimo ninyong iorganisar ang sulod pinaagi sa mga hilisgotan gamit ang “Tags” ug “Notebooks.” Mapuslanon kini unya kon kamo mag-andam og pakigpulong o leksiyon.

• Pagtakda og eskedyul. Sa Librarya sa Ebanghelyo, makahimo kamo og plano sa pagtuon nga motabang ninyo sa pagsubay sa inyong kauswagan sa pagtuon og una sa mga mensahe sa sunod nga komperensiya. Makatakda usab kamo og mga pahinumdom aron sa pagtabang ninyo sa paghuman sa inyong mga tumong sa pagtuon.

Mga Ideya alang sa Pagtuon sa Pamilya

• Ipakita ang usa ka kinutlo. Pagpili og usa ka kinutlo nga inyong nakita nga makahuloganon, ug i-post kini nga makita kanunay sa mga sakop sa pamilya. Mahimo usab ninyong ipakigbahin kini sa elektronik nga paagi. Ang mga sakop sa inyong pamilya magpuli-puli sa pagpili og usa ka tudling nga i-post. Mahimo usab nga mopili kamo nga sag-ulohon ang mga kinutlo isip pamilya.

• Paghimo og usa ka butang. Ang mga sakop sa inyong pamilya tingali malingaw nga maghimo og butang, sama sa usa ka drowing o timaan alang sa libro, nga nadasig sa butang nga gitudlo sa mensahe sa komperensiya. Ang tanan mahimong mopakigbahin unsay ilang nahimo.

• Pagrebyo sa mga istorya. Pangita og mga istorya sa mga mensahe sa komperensiya nga motabang sa inyong pamilya nga makat-on sa mga baroganan sa ebanghelyo. Ang mga miyembro sa inyong pamilya mahimong magpuli-puli sa pagsaysay sa ilang paborito nga mga istorya, o mahimo ninyo kining idrama.

• Paggamit sa mga pagtulun-an. Human magtuon og dungan sa mensahe sa komperensiya, hisgoti ang lain-laing mga paagi nga ang mga pagtulun-an may kalabotan sa mga kasinatian nga nasinati sa inyong pamilya. Dayon paghukom isip usa ka pamilya unsay inyong buhaton sa pagsunod unsay inyong nakat-onan.

• Pagpakigbahin sa mga pagtulun-an. Adunay mga benepisyo sa tagsa-tagsa nga pagbasa sa mga mensahe sa komperensiya ug dayon magpundok aron mopakigbahin og mga panabot ug makadasig nga mga tudling. Usa kini ka nindot nga paagi nga makat-on gikan sa usag usa.

• Pagpangutana. Kon ang mga sakop sa inyong pamilya adunay mga pangutana mahitungod sa hilisgotan sa ebanghelyo, paggahin og panahon sa pagpangita alang sa mga tubag diha sa mga mensahe sa komperensiya mahitungod niana nga hilisgotan (tan-awa sa “Mga Hilisgotan” nga tab diha sa Librarya sa Ebanghelyo nga app).

• Pagtuon sa mga mensahe sa propeta. Isip usa ka pamilya, ikonsiderar ang pagtuon sa pipila ka mensahe sa Presidente sa Simbahan (tan-awa sa “Speakers” nga tab diha sa Librarya sa Ebanghelyo nga app).

Alang sa piho nga mga ideya alang sa mga pamilya nga adunay gagmay nga mga anak, tan-awa sa “Activities for Children” (ChurchofJesusChrist.org).

Mga Ideya sa Pagtudlo sa mga Klase sa Simbahan

• Iawhag ang pagpangandam. Kalagmitan kamo adunay makahuloganon nga panaghisgotan mahitungod sa usa ka mensahe sa komperensiya kon ang mga miyembro nag-una og tuon sa mensahe. Pangita og mga paagi sa pagpahibalo kanila unsa ang hisgotan. Mahimong hatagan ninyo sila og usa o duha ka pangutana nga pamalandongan aron sa pagtabang nila nga mag-andam.

• Paghisgot kauban sa mga grupo. Ang mas gagmay nga grupo nga mga panaghisgotan mas makapaapil sa mga tawo. Ikonsiderar ang pagbahin sa mga miyembro ngadto sa gagmay nga mga grupo ug pagsangon sa matag grupo sa pagbasa ug paghisgot og lain nga seksiyon sa mensahe sa komperensiya. Dayon mahimo ninyong hangyoon ang matag grupo sa pagpakigbahin og kamatuoran nga ilang nakat-onan. O mahimo kamong magporma og bag-ong mga grupo sa mga tawo nga nagtuon og laing mga seksiyon ug tugoti sila sa pagpakigbahin ngadto sa usag usa kon unsay ilang nakat-onan.

• Pagtubag sa mga pangutana. Ang paghatag og mga pangutana sama niini makahatag og makahuloganon nga mga panaghisgotan mahitungod sa mensahe sa komperensiya: Unsa nga mga kamatuoran sa ebanghelyo ang atong makit-an niini nga mensahe? Unsaon nato paggamit niini nga mga kamatuoran? Unsa nga mga pagdapit ug gisaad nga mga panalangin ang gihatag? Unsa ang gitudlo kanato niini nga mensahe mahitungod sa buhat nga gusto sa Dios nga atong buhaton?

• Pagpaambit og mga kinutlo. Makadasig ang pagpaminaw sa matag usa nga maghisgot mahitungod sa unsang paagi ang mensahe sa komperensiya nakatandog ug nakabayaw kanato. Awhaga ang mga miyembro sa pagpakigbahin og makahuloganon nga mga tudling gikan sa mensahe sa komperensiya, ug pangutan-a sila sa pagkonsiderar unsaon nila sa pagpakigbahin niini nga mga kinutlo sa pagpanalangin og usa ka tawo nga ilang nailhan.

• Pagpakigbahin og usa ka leksiyon nga naggamit og usa ka butang [object lesson]. Kon nangita ka og mamugnaong paagi sa paghisgot og usa ka mensahe sa komperensiya, dapita pagsayo ang pipila ka miyembro nga magdala og mga butang gikan sa panimalay nga magamit sa pagtudlo og usa ka butang gikan sa mensahe. Hangyoa ang mga miyembro sa pagpasabot sa unsang paagi nga kadto nga mga butang may kalabotan sa piho nga mga bahin sa mensahe.

• Pag-andam og leksiyon nga itudlo sa panimalay. Aniay usa ka paagi sa pag-awhag sa mga pamilya nga magkat-on sa mga mensahe sa komperensiya diha sa panimalay: Hangyoa ang mga miyembro nga magtinagurha sa pagplano og leksiyon sa home evening base sa mensahe sa komperensiya. Unsaon nato paghimo sa mensahe nga angay para sa atong mga pamilya?

• Pagpakigbahin og mga kasinatian. Ang mga pamahayag ug mga istorya gikan sa mga mensahe sa komperensiya makaaghat sa mga miyembro nga mopakigbahin sa ilang kaugalingong mga kasinatian nga may kalabotan o mga ehemplo gikan sa mga kasulatan. Kini nga mga ehemplo makahulagway o makapalig-on sa doktrina nga gitudlo sa mensahe sa komperensiya.

• Pagkat-on kabahin sa usa ka kasulatan. Kadaghanan sa mga mensahe sa komperensiya naglangkob og may kalabotan nga mga tudling sa kasulatan—diha sa mensahe mismo o diha sa mubo nga mga sulat sa kataposan. Ang mga miyembro mahimong mobasa og tudling sa kasulatan nga gipakisayran sa mensahe sa komperensiya ug mohisgot sa unsang paagi ang mga pagtulun-an diha sa mensahe makatabang nila nga mas makasabot sa mga tudling sa kasulatan.

• Pangita og tubag. Ang mga miyembro makakita og mas lawom nga kahulogan sa mga mensahe sa komperensiya kon ikaw mangutana og mga pangutana nga moaghat sa pagpamalandong o paggamit sa mga baroganan sa ebanghelyo nga gitudlo niini (alang sa tabang, tan-awa sa Pagtudlo Sumala sa Pamaagi sa Manluluwas, 31–32). Mahimo ninyong hangyoon ang mga miyembro sa pagpili og pangutana ug mogamit sa mensahe sa pagsulat og tubag. Dapita sila sa paghisgot sa ilang mga tubag sa gagmay nga mga grupo.

• Pagpatukar og audio o bidyo. Usa sa labing maayong mga paagi sa pagtabang sa mga miyembro nga mobati sa espiritu sa usa ka mensahe mao ang pagpatukar sa mubo nga audio o bidyo sa mensahe.