“Pulong sa Kaalam,” Mga Hilisgotan ug mga Pangutana (2023)
Giya sa Pagtuon sa Ebanghelyo
Pulong sa Kaalam
Ang balaod sa Ginoo sa kahimsog nga nagpanalangin nato sa pisikal ug sa espirituwal nga paagi
Ang lawas sa tawo usa ka milagro. Ang matag usa kanato hinimo sa mga selyula, mga tisyu, mga organ, ug komplikado nga mga sistema nga magtambayayong ang tanan aron molihok. Hunahunaa lang—ang kasingkasing sa tawo mopitik sobra sa 100,000 ka higayon sa usa ka adlaw. Ang utok nagkontrolar sa mga hunahuna, pagginhawa, ug panan-aw, kauban sa daghang laing mga proseso. Ug ang lawas makaayo gani sa iyang kaugalingon ug makigbatok sa mga impeksyon.
Apan sa ka milagroso niining tanan, ang labing talagsaong butang mahitungod sa lawas sa tawo mao nga ang matag tawo gilalang diha sa imahe sa Dios (tan-awa sa Moises 2:27). Ang atong mga lawas mga gasa gikan sa Dios. Nagtabang kini nato sa pagtuman sa atong mahangtorong katuyoan aron mahimong mas sama sa Dios kon mopili kita sa pagsunod sa Iyang mga sugo. Makatahod kita Kaniya tungod niining bililhong gasa sa atong mga lawas pinaagi sa pag-amuma ug pagtahod niini. Usa ka importante nga paagi nga mahimo nato kini mao ang pagsunod sa Pulong sa Kaalam—gipadayag nga mga baroganan sa maayong kahimsog nga mopanalangin nato sa pisikal ug sa espirituwal nga paagi.
Unsa Ang Pulong sa Kaalam?
Ang Pulong sa Kaalam usa ka pagpadayag nga gihatag sa Ginoo ngadto ni Propeta Joseph Smith niadtong 1833, karon narekord sa Doktrina ug mga Pakigsaad 89. Ang Pulong sa Kaalam nagtudlo nato sa pagkaon og mga butang sama sa mga lugas, mga prutas, ug mga hilba ug sa paglikay sa mga butang sama sa tabako, alkohol, tsa, ug kape. Agig og dugang, ang mga propeta mitudlo nga kinahanglan kitang maglikay gikan sa ubang “mga butang nga makadaot, supak sa balaod, o makapaadik o makaapekto sa paghukom.” Ang Pulong sa Kaalam ug ang mga lider sa Simbahan wala mohingalan sa tanang butang o mga praktis nga makadaot kanato—giawhag kita sa paggamit og “kaalam ug mainampoong paghukom sa paghimo og mga pagpili” nga makaapekto sa atong kahimsog.
Bisan og ang Pulong sa Kaalam orihinal nga gihatag nga “dili pinaagi sa sugo o pagpugos” (Doktrina ug mga Pakigsaad 89:2), ang mga sulugoon sa Ginoo gitudloan na sa una nga ang pagsunod sa Pulong sa Kaalam usa ka panginahanglanon alang sa pagdawat sa hingpit nga mga panalangin sa gipahiuli nga ebanghelyo, lakip sa bunyag, misyonaryo nga pagserbisyo, ug mga ordinansa sa templo.
Kinatibuk-ang pagpasabot sa hilisgotan: Pulong sa Kaalam
May kalabotan nga mga giya sa pagtuon sa ebanghelyo: Mga Sugo, Conversion [Pagkakabig], Pagkamasulundon
Seksiyon 1
Ang Pulong sa Kaalam Mao ang Balaod sa Ginoo sa Kahimsog
Ang kamatuoran nga ang Ginoo mohatag og pagpadayag sama sa Pulong sa Kaalam nag-ingon nga adunay butang nga importante mahitungod Kaniya—ug mahitungod kanato. Ang uban tingali nagdahom sa relihiyon nga magpakabana lamang sa espirituwal nga mga butang ug nga ang atong pisikal nga mga lawas dili kaayo importante. Apan sa ebanghelyo ni Jesukristo, gitudloan kita nga sa mga mata sa Dios, ang atong pisikal nga mga lawas sagrado, ug ang pisikal ug espirituwal konektado kaayo. Ang Pulong sa Kaalam mao ang usa ka timailhan sa gugma sa Dios—Gihatag Niya kini nato tungod kay gusto Niya nga kita magmahimsog ug magmalipayon, sa pisikal ug sa espirituwal.
Mga butang nga angayang hunahunaon
-
Ang Pulong sa Kaalam dinasig, ang kabahin niini, tungod sa kabalaka ni Emma Smith. Basaha ang mahitungod niini “Ang Pulong sa Kaalam” sa Kinatibuk-ang Saysay sa mga Pagpadayag. Dayon, samtang basahon ninyo ang pagpadayag sa Doktrina ug mga Pakigsaad 89, pangitaa ang mga kamatuoran nga gipadayag sa Dios nga milapas pa gani sa pagtubag sa kabalaka ni Emma. Unsa ang gitudlo niini nga pagpadayag kaninyo mahitungod sa Ginoo ug sa paagi sa Iyang pagtudlo sa Iyang mga Anak?
-
Ang Ginoo mitawag sa Pulong sa Kaalam nga “usa ka baroganan uban sa saad” (Doktrina ug mga Pakigsaad 89:3). Samtang magbasa kamo sa Doktrina ug mga Pakigsaad 89, mahimo ninyong ilista ang mga baroganan ug mga saad nga inyong makit-an. Kini nga kahulogan sa “baroganan” gikan ni Elder David A. Bednar makatabang: “Ang baruganan sa ebanghelyo usa ka lagda nga gibase sa doktrina alang sa matarong nga paggamit sa moral nga kabubut-on.” Human mahimo ninyo ang mga lista, pamalandongi unsay ipasabot sa pagsunod niini nga mga baroganan “uban ang pagmatngon ug pagpasalamat.” (bersikulo 11). Sa unsang paagi ninyo namatikdan nga ang Ginoo mituman sa Iyang mga saad kon kamo mosunod sa Pulong sa Kaalam?
Mga kalihokan alang sa pagkat-on kauban ang laing mga tawo
-
Basaha pagdungan ang “Ang Inyong Lawas Sagrado” gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Dayon paghimo og drama kon unsay isulti kon adunay mangutana ngano nga kita dili mobuhat sa mga butang sama sa pagpanigarilyo o pag-inom og alkohol, kape, o tsa. Sa inyong tubag, mahimo ninyong ilakip ang mga panalangin nga gisaad kanato sa pagsunod sa Pulong sa Kaalam ug sa pagpakigbahin ngano nga kini nga pagpadayag importante kaninyo sa personal nga paagi. Hisgoti unsay inyong nakat-onan gikan niini nga pagbansay ug sa unsang paagi ninyo magamit ang inyong mga tubag sa umaabot.
-
Ang makasaysayonong konteksto makatabang nato nga mas makasabot sa Pulong sa Kaalam ug ngano nga kita mosunod niini. Ang mga bidyo sama sa “Word of Wisdom: What Is It?” (5:09) o “The Word of Wisdom: Development and Practice” (5:05) makatabang nato nga makat-on mahitungod sa kaagi sa pagpadayag. Ang kabataan tingali malingaw motan-aw sa “The Word of Wisdom” (2:10) sa Doktrina ug mga Pakigsaad. Hisgoti ang mahitungod ngano nga importante alang sa Dios nga mopadayag og balaod sa panglawas sa panahon nga Iyang gihimo. Sa unsang paagi sa inyong hunahuna nga ang Pulong sa Kaalam nagpakita sa gugma sa Dios alang sa Iyang mga anak? Mahimo usab nga inyong hisgotan sa unsang paagi kini nga mga bidyo makatabang ninyo sa pagtubag sa mga pangutana sa uban mahitungod sa Pulong sa Kaalam.
Pagkat-on pa og dugang
-
Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 189–93
-
Mga Hisgotanan sa Kasaysayan sa Simbahan, “Pulong sa Kaalam (D&P 89),” Librarya sa Ebanghelyo
Seksiyon 2
Ang Pagsunod sa mga Baroganan sa Pulong sa Kaalam Makahatag Nato og Pisikal ug Espirituwal nga mga Panalangin
Bisan og ang Pulong sa Kaalam ingon sama sa usa ka pagpadayag mahitungod sa pisikal nga mga butang, mga panalangin kini sa pisikal ug espirituwal (tan-awa sa Doktrina ug mga Pakigsaad 89:18–21). Gipasabot ni Presidente Packer niining paagiha: “Akong nasayran … nga ang usa ka sukaranan nga katuyoan sa Pulong sa Kaalam may kalabotan sa pagpadayag. … Kon ang usa ka tawo nga ‘ubos sa impluwensya’ maglisod sa pagpaminaw sa yano nga pakig-istorya, unsaon man nila sa pagtubag sa espirituhanong mga pag-aghat nga motandog sa ilang labing malumo nga mga pagbati? Sama ka importante sa Pulong sa Kaalam ingon usab ang balaod sa kahimsog, nga kini mahimong mas importante ninyo sa espirituwal kay sa pisikal.” Ang pagtuman niini nga sugo makatabang nato nga makabaton sa Espiritu Santo isip atong kauban aron kita makadawat og pagpadayag ug kauswagan sa dalan paingon sa kinabuhing dayon.
Mga butang nga angayang hunahunaon
-
Samtang ang Pulong sa Kaalam nagtudlo nato sa paglikay sa pipila ka butang, nagtudlo usa b kini nato sa pagbuhat sa positibo nga mga butang alang sa atong kahimsog. Tan-awa ang bidyo “Word of Wisdom” (1:48) aron makat-onan sa unsang paagi ang usa ka tawo miusab sa iyang kinabuhi pinaagi sa pagsunod sa Pulong sa Kaalam. Si Elder Richard G. Scott mitudlo, “Ang ehersisyo, hustong katulog, maayong paagi sa pagkaon modugang sa atong kapasidad sa pagdawat ug pagsabot sa pagpadayag.” Pamalandongi unsaon nga kamo makapalambo sa paagi sa inyong pagsunod sa Pulong sa Kaalam. Sa unsang paagi nga kadto nga mga kausaban makabenepisyo kaninyo sa espirituwal nga paagi ug makatabang ninyo pagdawat og pagpadayag?
-
Si Presidente Russell M. Nelson mitudlo: “Ang inyong lawas … talagsaong nilalang sa Dios. Mao kini ang tabernakulo sa unod—usa ka templo alang sa inyong espiritu.” Pamalandongi kini nga mga pulong samtang inyong basahon ang 1 Mga Taga Corinto 6:19–20 ug Doktrina ug mga Pakigsaad 89:18–21. Hunahunaa sa unsang paagi ang lawas ug ang espiritu konektado. Unsa nga pisikal ug espirituwal nga mga panalangin ang inyong nadawat tungod sa pagsunod sa Pulong sa Kalaam? Mahimo ninyong pamalandongan sa unsang paagi nga ang Pulong sa Kaalam makapahimo ninyo sa “busa gamita ang inyong lawas alang sa himaya sa Dios” (1 Mga Taga Corinto 6:20). Irekord ang bisan unsa nga mga impresyon nga moabot ninyo, ug dayon buhata kini.
Mga kalihokan alang sa pagkat-on kauban ang laing mga tawo
-
Ang mga panalangin nga atong madawat kon kita motuman sa Pulong sa Kaalam tingali dili moabot kanunay sa panahon o sa paagi nga atong gipaabot. Basaha pagdungan ang mensahe sa komperensiya ni Presidente Dieter F. Uchtdorf “Ipadayon ang Pagpailub” aron makahibalo giunsa niya kini sa pagdiskobre alang sa iyang kaugalingon. Dayon makahisgot kamo sa unsang paagi ang Dios mipanalangin kaninyo sa pisikal ug sa espirituwal nga paagi tungod sa pagtuman sa Pulong sa Kaalam ug sa unsang paagi Siya mopanalangin kaninyo sa umaabot.
-
Sa piho nga mga sitwasyon, mahimong mobati kita nga mapugos sa dili pagsunod sa Pulong sa Kaalam. Basaha pagdungan ang Daniel 1, ug obserbahi giunsa ni Daniel ug sa iyang mga higala pagtubag ang susama nga sitwasyon. Dayon basaha kini nga mga pulong gikan ni Elder Dieter F. Uchtdorf: “Si Daniel gipadako isip sumusunod ni Jehova. Mituo ug misimba siya sa Dios ni Abraham, Isaac, ug Jacob. Gitun-an niya ang mga pulong sa mga propeta, ug nasayod siya sa pakiglambigit sa Dios ngadto sa tawo.
Apan karon, sa bata pa kaayong edad, usa siya ka binilanggo nga estudyante sa Babelon. Ang pagpamugos kaniya hilabihan kagrabe nga biyaan ang iyang karaang gituohan ug modawat niadtong sa Babelon. Apan nagpabilin siyang matinud-anon sa iyang tinuohan—sa pulong ug sa buhat.…
“Ug ang Ginoo mipanalangin ni Daniel. Bisan kon ang iyang pagtuo gihagit ug gitamay, nagpabilin siyang matinud-anon sa unsay iyang nahibaloan pinaagi sa iyang kasinatian kon unsay husto.”
Giunsa sa Ginoo pagtabang si Daniel ug ang iyang mga higala sa ilang sitwasyon? (tan-awa sa Daniel 1:9). Sa unsang paagi Siya mipanalangin nila tungod sa pagtuman sa ilang pasalig? (tan-awa sa Daniel 1:15, 17–20). Hisgoti unsaon nga kamo mahisama ni Daniel kon hagiton ang inyong pasalig sa pagsunod sa Pulong sa Kaalam.
Pagkat-on pa og dugang
-
Levitico 10:9; 1 Mga Taga-Corinto 6:10; Doktrina ug mga Pakigsaad 49:18–21
-
Quentin L. Cook, “Kon Ipakita ang Daotan isip Maayo ug Ipakita ang Maayo isip Daotan,” Liahona, Mar. 2018, 18–25
-
David A. Bednar, “Ang mga Baroganan sa Akong Ebanghelyo,” Liahona, Mayo 2021, 123–24
-
Boyd K. Packer, “The Word of Wisdom: The Principle and the Promises,” Ensign, May 1996, 17–19
-
“Vaping, Coffee, Tea, and Marijuana,” New Era, Aug. 2019, 28