Malumalu

E faamanuiaina i tatou a o tatou tapuai i le maota o le Alii

Mafaufau i nofoaga e sili ona matagofie ma filemu sa e i ai. O a mea na e fiafia i ai e uiga ia i latou? Na faape’i ou lagona e uiga i ai? Pe a mafai ona tatou asiasi atu pe o i totonu o se malumalu o le Alii, e mafai foi ona tatou lagonaina le filemu. Ae e le o le mafuaaga autu lena e taua ai ia i tatou. E le pei malumalu o se isi lava nofoaga i le lalolagi aua o le maota o le Alii. I totonu o le malumalu e mafai ona tatou osia ai feagaiga ina ia latalata atili atu ai ia te Ia ma saunia ai mo le ola e faavavau.

Na saunoa Peresitene Jeffrey R. Holland: “Matou te alolofa ma faapelepele i o tatou malumalu faapaiaina ma sauniga taua ma le faaeaga o loo faatinoina ai iina. Matou te faafetai i le lagi ona o le tele o na mea ua fausia, ua tuuina mai ai ia i tatou taitoatasi le avanoa sili atu e maua ai. O malumalu o le Alii o ni fale moni e sili ona paia, ma sili ona paia i le malo o le Atua.”

O A Malumalu?

O le malumalu o le maota moni lava o le Alii. I nei fale paia, e auai ai tagata agavaa o le Ekalesia i sauniga paia ma osia feagaiga ma le Alii. Mo se faataitaiga, o le sauniga o le faamauga e mafai ai ona tatou faatasi ma o tatou aiga mo le faavavau pe afai tatou te tausia a tatou feagaiga. I totonu o malumalu e mafai foi ona tatou maua ai sauniga e fai ma sui o tuaa ua maliliu. E asiasi mai le Alii i Ona malumalu, ma o nisi ia o nofoaga aupito paia i le lalolagi.

Vaaiga aoao i le Autu: Malumalu

Taiala e faatatau i le suesueina o le talalelei: Feagaiga ma Sauniga, Sauniga o Faaeega Paia ma Faamauga, Auai i Galuega o Malumalu ma Talafaasolopito o Aiga, Sauniga Sui mo e ua Maliliu

Vaega 1

Ua Poloaiina e le Atua Ona Tagata ina ia Fausia Malumalu

Ua poloaiina e le aunoa e le Atua Ona tagata e fausia malumalu. O malumalu o le Ekalesia i aso nei e tele mea e tutusa ai ma malumalu o loo i tusitusiga paia anamua ma o loo maua i le tele o atunuu i le salafa o le lalolagi. E ese mai falelotu o le Ekalesia, aua o nofoaga ia tatou te osia ai feagaiga faapitoa ma auai ai i sauniga paia. I totonu o malumalu paia, e mafai foi e tagata o le Ekalesia ona faatinoina sauniga e ala i le sui mo o latou tuaa ua maliliu ma isi tagata o e sa lei maua se avanoa e maua ai i lenei olaga. Ona mafai lea e le ua maliu ona filifili e talia nei sauniga ma maua le faaolataga ma le faaeaga.

O mea uma lava i le maota o le Alii e aoaoina ai i tatou e uiga i le Tama Faalelagi, lo tatou Faaola o Iesu Keriso, ma le ata o le faaolataga a le Atua. O malumalu o nofoaga ia e mafai ona tatou faalatalata atu ai i le Atua le Tama ma Lona Alo. O ni nofoaga paia ua vaetofia mo tapuaiga ma aoaoga. I totonu o le malumalu, e mafai ona tatou lagona ai le Agaga o le Atua ma Lona alofa.

Mea e mafaufau i ai

O le Malumalu o Katelani o le malumalu muamua lea na fausia e le Au Paia o Aso e Gata Ai. Sa manaomia ai le tele o osigataulaga, ae sa folafola atu foi i le Au Paia le tele o faamanuiaga mo le faia o na osigataulaga. Faitau e uiga i nei folafolaga i le Mataupu Faavae ma Feagaiga 97:8–16. Ona mafai lea ona e faitau e uiga i nisi o aafiaga faaleagaga na maua e le Au Paia i le Malumalu o Katelani i le Mataupu Faavae ma Feagaiga 110 ma i le mataupu e 21 o le Au Paia: O Le Tala i le Ekalesia a Iesu Keriso i Aso e Gata Ai, vol. 1, O Le Tulaga Faatonuina o le Upumoni, 1815–1846 (2018), 232–43. E faapefea ona e lagonaina le Alii i totonu o Lona maota paia? O a isi faamanuiaga ua e mauaina ona ua fausia malumalu i o tatou aso? E mafai foi ona e mafaufau loloto po o a ni osigataulaga e mafai ona e faia ina ia maua ai faamanuiaga mai le Alii i Lona fale.
E ui e leai ni malumalu se lua e tutusa tonu lava, ae o malumalu taitasi e tutusa lava potu taua mo le mauaina o aoaoga, auai i sauniga paia, ma le osia o feagaiga. E mafai ona e aoao atili e uiga i le faamoemoega o nei potu e ala i le faitauina o le tusiga puupuu “I Totonu o Malumalu” (ChurchofJesusChrist.org). O le a se mea ua e aoaoina mai le tusiga lea e musuia ai oe e tapuai i le malumalu pe faia soo foi?

Gaoioiga mo le aoao faatasi ma isi

Afai e te mafaia, o faatasi i se malumalu lata ane. Atonu e mafai ona e savalivali filemu faataamilo i lotoa o le malumalu. Pe mafai ona e vaai i ata o malumalu. A o e faia, faitau pe usu lemu upu i le “Ou te Fia Vaai i le Malumalu.” Ona faasoa atu lea e le tasi i le isi soo se manatu po o ni lagona o loo ia te oe e uiga i le malumalu. E mafai ona outou talanoaina faatasi o se vaega le mafuaaga ua outou lagona ai ua poloaiina i tatou e le Alii e fausia malumalu i o tatou aso. O a ni auala ua faamanuiaina ai tagata taitoatasi, aiga, ma nuu i le fausiaina o nisi malumalu?

Aoao atili

Esoto 26–27; 40; 2 Nofoaiga a Tupu 5; 2 Nifae 5:16; Mataupu Faavae ma Feagaiga 88:119; 95:8–17; 124:38–42
“Aisea e Fausia ai e le Au Paia o Aso e Gata Ai ia Malumalu,” ChurchofJesusChrist.org
“Maliu Maia i le Maota o le Alii” (vitio), youtube.com
Autu o le Talafaasolopito o le Ekalesia, “Fausaga o Malumalu,” Potutusi o le Talalelei
Autu o Talafaasolopito o le Ekalesia, “Faapaiaina o Malumalu ma Tatalo o le Faapaiaga,” Potutusi o le Talalelei

Vaega 2

Ua Tatou Maua le Mana Faaleagaga ma le Taitaiga i le Maota o le Alii

Na aoao mai Peresitene Russell M. Nelson: “O le malumalu o se nofoaga o faaaliga. O iina e faaali atu ai ia te oe le auala e agai ai luma i se olaga faaselesitila. O iina o le a e latalata atili ai i le Faaola ma maua ai le avanoa sili atu e maua ai Lona mana. O iina e taialaina ai oe i le foiaina o faafitauli i lou olaga, e oo lava i ou faafitauli sili ona lavelave.” I totonu o le malumalu, e mafai ona e maua ai le fesoasoani faaleagaga ma le mana. E mafai ona e maua le mafanafana ma le malosi e agai ai i luma i taimi o luitau ma tofotofoga.

E mafai ona faateleina lou tomai e maua ai le fesoasoani faaleagaga ma le taitaiga i le maota o le Alii a o e saunia oe lava ma saili ia i ai “lima mama, ma le loto mama” (Salamo 24:4). I lenei avanoa filemu, paia, ma tuuto, e masani lava ona faigofie atu ona lagona le latalata atu ia te Ia ma faalogo i uunaiga a Lona Agaga.

Mea e mafaufau i ai

Atonu e i ai sau fesili taua po o se luitau faigata. Pe ua e mafaufau e faaalu se taimi i le malumalu e saili ai le taitaiga a le Alii? Mafaufau pe faapefea e le auai i sauniga o le malumalu ona fesoasoani ia te oe e maua ai le manino e uiga i lau fesili po o le luitau. Afai e leai sau pepa faataga o le malumalu, atonu e mafai ona e savalivali faataamilo i lotoa o le malumalu ma faaalu sina taimi e tatalo ai ma mafaufau loloto ai iina. Mafaufau e tusi faamaumau soo se uunaiga faaleagaga e te maua.

Gaoioiga mo le aoao faatasi ma isi

Na aoao mai Peresitene Nelson: “O’u uso e ma tuafafine pele, ia outou taulai atu i le malumalu i auala tou te le’i taulai atu ai lava muamua. Ou te faamanuia ia te outou ia outou latalata atili i le Atua ma Iesu Keriso i aso uma.” Ina ia malamalama i le uiga o le taulai atu i le malumalu, e mafai ona e talanoa e uiga i meafaigaluega e fesoasoani ia i tatou e taulai atu ai la tatou vaaiga mamao. E mafai ona tou feauauai i le tilotilo atu i ipu malamalama, meavaai mamao, po o se meavaai o mea ninii (pe vaai i se ata o se tasi o nei aitema). Ona talanoa lea e uiga i le auala e mafai ona faateleina ai lou taulai atu i le malumalu i auala e te lei faia muamua. E mafai foi ona e mafaufau loloto ma faamaumau faamanuiaga e te mauaina a o e taulai atu i le malumalu i nai masina o sosoo ai.

Aoao atili

Mataupu Faavae ma Feagaiga 109:12–13, 20–23
Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93-96
Dale G. Renlund, “Mauaina o le Mana o le Atua e ala i Feagaiga,” Liahona, Me 2023, 35–37

Vaega 3

Ua Valaaulia e le Alii Tagata Uma e O Mai i le Malumalu

E finagalo le Alii ia o mai tagata uma i Lona fale paia ma osia feagaiga ma Ia. Ae e finagalo foi o Ia ia tatou saunia muamua. Na te silafia o le osia o na feagaiga ae tatou te lei saunia o le a faatapulaaina moni ai lo tatou gafatia e olioli ai i faamanuiaga o le malumalu. O le mafuaaga lena ua Ia faatulagaina ai tulaga faatonuina o sauniuniga faaleagaga mo le ulufale atu i le malumalu—o tulaga faatonuina ia ua Ia valaaulia ai tagata uma ina ia ola ina ia mafai e tagata uma ona maua Ana faamanuiaga.

Ina ia ulufale atu i le malumalu, e te manaomia se pepa faataga o le malumalu, lea e mafai ona e maua pe a uma se faatalanoaga ma ou taitai perisitua. O la latou taitaiga musuia e fesoasoani ia te oe e te iloa ai le auala e saunia ai e maua sauniga o le malumalu. O lau pepa faataga o le malumalu o se faailoga faaletino lea o lau sauniuniga patino e ulufale atu i le maota o le Alii. O se faailoga o loo e taumafai e usiusitai i poloaiga a le Atua. O lona uiga o oe, le Alii, ma Ona sui e “fautuaina” oe mo le ulufale atu i le maota o le Alii.

Ma o le taimi lava e te maua ai le faaeega paia ma isi sauniga o le malumalu, aua le taofia iina! Saunia e toe foi i le maota o le Alii ma aoao atili. Sa aoao mai Sister Silvia H. Allred, “Tatou te mauaina uma faatonuga tutusa, ae o lo tatou malamalama i le uiga o sauniga ma feagaiga o le a faateleina a o tatou foi atu e le aunoa i le malumalu ma le agaga o le aoaoina ma le mafaufau i upu moni e faavavau na aoaoina ai.”

Mea e mafaufau i ai

Mafaufau i se mea taua sa tatau ona e saunia ai, e pei o se suega i le aoga, se faatalanoaga o se galuega, po o se lesona i le lotu. Na faapefea ona e saunia? O le a se mea semanu e tupu pe ana e le saunia? Ona mafaufau loloto lea pe aisea e tatau ai ona tatou saunia e ulufale atu i le maota o le Alii. E mafai ona e faitauina le Esoto 40:7–15 ma mafaufau i mea na faia e Arona ma ona atalii e saunia ai e ulufale atu i le fale fetafai. E mafai foi ona e faitauina le Mataupu Faavae ma Feagaiga 97:15–16 ma mafaufau loloto po o le a le uiga ia te oe o le loto mama. Mafaufau pe i ai ni auala e mafai ona e taumafai ai ia mama atili le loto ma saunia atili faaleagaga e tapuai i le maota o le Alii.

Gaoioiga mo le aoao faatasi ma isi

Ina ua mavae le maliu ma le Toetu o le Faaola, sa asiasi atu o Ia i tagata i Amerika. O le nofoaga muamua na Ia faaali mai ai o le malumalu i Nuumau. Faitau le 3 Nifae 11:1–10, ma talanoa e uiga i le mafuaaga e te manatu na filifili ai le Alii e faaali atu i tagata i le nofoaga na Ia faaali ane ai. Na saunoa Peresitene Russell M. Nelson e uiga i lenei asiasiga: “E taua tele le filifili o le Faaola e faaali atu i tagata i le malumalu. O Lona maota lea. … Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e le mafai e se isi lava mea ona e manuia ai.” Talanoa e uiga i le mafuaaga e finagalo ai foi le Alii tatou te o i le malumalu. Afai sa e alu i le malumalu, mafaufau i faamanuiaga na e mauaina mo le alu. Afai e leai se malumalu e latalata ane pe le mafai foi ona e tapuai i le malumalu i le taimi nei mo isi mafuaaga, e mafai ona e talanoa e uiga i auala e mafai ai lava ona avea le malumalu ma se vaega taua o lou olaga, e pei o le mafaufau loloto e le aunoa i faamanuiaga tatou te maua mai le tapuai i le malumalu po o le manatuaina o au feagaiga o le malumalu.
E mafai ona e maua fesili o le faatalanoaga o le pepa faataga o le malumalu i le Mo Le Malosi o le Autalavou: O Se Taiala mo le Faia o Filifiliga (2022), itulau 36–37. Ina ia fesoasoani le tasi i le isi ia malamalama i tulaga faatonuina a le Alii mo le ulufale atu i le malumalu, e mafai e outou taitoatasi ona filifili se fesili se tasi e suesue ai. E mafai ona e faaaogaina le Taiala i Tusitusiga Paia ma isi mea e faaaoga e le Ekalesia e aoao atili ai e uiga i le autu o le fesili. Fesili ifo ia te oe lava, Aisea e avea ai lenei mea ma se vaega taua o le sauniuni mo le malumalu? Ona faasoa atu lea e le tasi i le isi mea ua e aoaoina.

Aoao atili

Salamo 122:1; Isaia 2:2–3
Ronald A. Rasband, “Fautuaina Atu i le Alii,” Liahona, Nov. 2020, 22–25
“Saunia mo le Maota o le Alii,” ChurchofJesusChrist.org
“Tusi Lesona o le Saunia e Ulufale Atu i le Malumalu Paia,” Potutusi o le Talalelei