Library
Iosefa Samita

“Iosefa Samita,” Autu ma Fesili (2023)

Iosefa Samita

Taiala mo le Suesueina o le Talalelei

Iosefa Samita

perofeta filifilia a le Atua e toefuatai mai le talalelei a Iesu Keriso

Sa faataunuuina e le Perofeta o Iosefa Samita ni mea ofoofogia i lona soifuaga puupuu. I le avea ai ma perofeta filifilia a le Atua, sa ia faaliliuina le Tusi a Mamona “e ala i le meaalofa ma le mana o le Atua” (Faatomuaga o le Tusi a Mamona), mauaina faaaliga vaaia ma faaaliga, ma faatulagaina le Ekalesia a Iesu Keriso i le lalolagi. Atonu e foliga mai e le mafai e se tagata se toatasi ona faia le tele o mea. Ae sa i ai se misiona paia a Iosefa e toefuatai mai le talalelei a Iesu Keriso, ma sa saunia e le Alii se auala mo ia e faataunuu ai Lana galuega.

Ona o le Perofeta o Iosefa Samita, ua tatou iloa ai e alofa le Atua ia i tatou ma o loo fetalai mai pea ia i tatou i aso nei. Ua tatou iloa o loo i ai Sana fuafuaga mo Lana fanau ma ua saunia se auala mo i latou e toe nonofo faatasi ai ma Ia. Ma ua tatou iloa o lenei o “[Lana] galuega ma [Lona] mamalu lenei—ia aumaia le tino ola pea ma le ola faavavau o le tagata” (Mose 1:39).

O Ai Iosefa Samita?

Na fanau mai Iosefa Samita le Itiiti i Vermont, ISA i le 1805. Na valaauina e le Atua ia Iosefa e avea ma perofeta ma toefuatai mai le talalelei a Iesu Keriso i o tatou aso. O ia o le Peresitene muamua o Le Ekalesia a Iesu Keriso o le Au Paia o Aso e Gata Ai. Na maua e le Perofeta o Iosefa Samita faaaliga vaaia paia ma faaaliga. Sa faaali atu le Atua le Tama ma Iesu Keriso ia te ia. Sa ia mauaina le pule o le perisitua mai avefeau faalelagi ma faaliliuina le Tusi a Mamona ma isi tusitusiga paia anamua e ala i le meaalofa ma le mana o le Atua. Sa masani ona sauaina Iosefa ona o lana molimau, ae sa tumau lona faamaoni i ai seia oo i le iuga o lona soifua, ina ua fasiotia o ia ma lona uso o Ailama e se vaega o tagata faatupu vevesi i le 1844.

Vaaiga aoao o le autu: Iosefa Samita

Taiala e faatatau i le suesueina o le talalelei: Perofeta, Toefuataiga o le Talalelei, Uluai Faaaliga, Tusi a Mamona, Toefuataiga o le Perisitua

Vaega 1

O Iosefa Samita o se Molimau Tuuto a le Atua le Tama ma Iesu Keriso

O Iosefa Samita i le Falepuipui o Liperate

Ina ua na o le 14 tausaga o Iosefa Samita, sa ia vaai i le Atua le Tama ma Lona Alo, o Iesu Keriso (tagai Iosefa Samita—Talafaasolopito 1:15–17). O lenei mea na tupu ua lauiloa o le Uluai Faaaliga ma ua faailogaina ai le amataga o le Toefuataiga o le talalelei. A o faaauau pea ona faaalia mai le Toefuataiga, sa molimau atu Iosefa i le Tama Faalelagi ma Iesu Keriso i isi faaaliga ma molimau atu e uiga ia i La’ua (tagai Mataupu Faavae ma Feagaiga 76:19–24; 137:1–3).

Sa feagai Iosefa ma le tele o tofotofoga ma sa sauaina o ia ona o le mea sa ia iloa e moni. Ae e tusa lava po o le a le tele o ona puapuaga, na te le faafitia lana molimau i le Atua ma Iesu Keriso pe na valaauina o ia i le galuega a le Alii (tagai Iosefa Samita—Talafaasolopito 1:25). I le faaiuga o lona soifua, na faamauina ai e le Perofeta lana molimau i lona toto ina ua faamaturoina o ia i le Falepuipui o Karefasi (tagai Mataupu Faavae ma Feagaiga 135:1–3; tagai foi i le Au Paia, 1:542–52). O lona faamaoni i le galuega a le Alii na fesoasoani e toe aumai ai le talalelei i fanau a le Atua i le lalolagi (tagai Mataupu Faavae ma Feagaiga 136:37–38).

Mea e mafaufau i ai

  • O le molimau mamana a Iosefa Samita ia Iesu Keriso o loo tusi faamaumauina i tusitusiga paia. Faitau lana molimau i le Mataupu Faavae ma Feagaiga 76:22–24 ma le Mataupu Faavae ma Feagaiga 110:1–4. Mafaufau i mea ua e aoaoina e uiga ia Iesu Keriso i nei fuaiupu. Ona mafaufau loloto lea i lau lava molimau i le Faaola (tagai i le 2 Nifae 31:18). Na faapefea ona uunaia oe lava e le molimau a le Perofeta o Iosefa Samita ia Iesu Keriso? Atonu foi e te manao e faamaumau lau molimau po o isi aafiaga patino na e latalata atili ai i le Alii.

Gaoioiga mo le aoao faatasi ma isi

  • I le 14 o ona tausaga, na molimau muamua ai Iosefa Samita i le Tama Faalelagi ma Iesu Keriso. Aoao e uiga i lenei molimau e ala i le faitauina faatasi o le Iosefa Samita—Talafaasolopito 1:14–20 . O le a se mea e mafai ona tatou aoao ai e uiga i le Tama Faalelagi ma Iesu Keriso mai lenei tala? Na faapefea ona suia le lalolagi ona o le molimau a Iosefa? Faasoa atu ou manatu ona matamata lea o se vaega o le vitio “#HearHim: Faalogo i le Siufofoga o Iesu Keriso” (1:47). E faapefea ona e faalogo i le siufofoga o le Faaola? (tagai foi Mataupu Faavae ma Feagaiga 6:22–24; 8:2–3; 9:8–9; 11:12–13). Talanoaina ou manatu ona talanoa lea e uiga i le aafiaga e mafai ona i ai lau molimau i isi a o e faalogo i le Faaola e pei lava ona sa faia e Iosefa.

  • O le molimau a Iosefa i le Faaola o loo aofia ai i le “O Le Keriso Soifua: O Le Molimau a Aposetolo.” Faitau faatasi le molimau a le Perofeta i le tautinoga ma talanoaina le talaaga faasolopito mo faaaliga na ia mauaina. E mafai foi ona outou galulue i le taulotoina o le molimau a le Perofeta o se vaega. Atonu e mafai ona e taulotoina leotele upu ma faaaoga ata mai le Potutusi o Ala o Faasalalauga a le Ekalesia pe fatu foi isi mea faitino e fesoasoani ia te oe. Talanoa e uiga i le auala e mafai ai e le taulotoina o le molimau a le Perofeta ona faateleina lou lava faatuatua ia Iesu Keriso ma avea ai o se punavai o le mana, uunaiga, musumusuga, ma le faamafanafanaga.

Aoao atili

Vaega 2

Sa Filifilia Iosefa Samita e le Atua e Toefuatai mai le Talalelei a Iesu Keriso

Iosefa Samita o loo tootuli i le Togavao Paia

Na filifilia e le Atua le Perofeta o Iosefa Samita e toefuatai mai le atoatoaga o le talalelei a Iesu Keriso i le lalolagi (tagai Mataupu Faavae ma Feagaiga 1:17; 27:13; “O Le Toefuataiga o le Atoatoa o le Talalelei a Iesu Keriso: O Se Folafolaga e Lua Selau Tausaga i le Lalolagi,” Potutusi o le Talalelei). E ala i le mana o le Atua, na faaliliu ai e Iosefa le Tusi a Mamona ma aumai ai ni mau faaopoopo (tagai i le faatomuaga o le Tusi a Mamona; Mataupu Faavae ma Feagaiga 135:3). Sa ia faatulagaina Le Ekalesia a Iesu Keriso o le Au Paia o Aso e Gata Ai, maua le pule o le perisitua, ma saunia le Au Paia e faatuina Siona (tagai Mataupu Faavae ma Feagaiga 20:1; Au Paia, 1:108–9).

Ona o le misiona a Iosefa Samita, ua tatou iloa ai o loo i ai se fuafuaga a le Atua mo Ana fanau ma e mafai ona tatou maua sauniga ma osia feagaiga ma Ia i le maota o le Alii. O le galuega a Iosefa na faataatia ai le faavae mo le talalelei a Iesu Keriso i aso e gata ai, na faatagaina ai le Ekalesia e agai i luma i lalo o le taitaiga musuia a perofeta, tagatavaai, ma talifaaaliga (tagai i le Au Paia, 1:519–20).

Mea e mafaufau i ai

  • Na molimau mai Peresitene Jeffrey R. Holland: “Ou te iloa o Iosefa Samita, o le na faailoa mai e le atoatoa o ia, e ui i lea, o le meafaigaluega filifilia i le aao o le Atua e toefuatai mai ai le talalelei tumau-faavavau i le lalolagi. Ou te iloa foi o le faia o lena mea—aemaise o le faaliliuina o le Tusi a Mamona—ua ia aoaoina atili ai au i le alofa o le Atua, i le paia o Keriso, ma i le mana o le perisitua nai lo se isi lava perofeta ua ou faitau i ai, iloaina, pe faalogo i ai i se olaga atoa o la’u sailiga.” O le a se mea na aoaoina oe e le Perofeta o Iosefa Samita e uiga i le alofa o le Atua, le paia o Keriso, ma le mana o le perisitua e ala i le Toefuataiga o le talalelei a Iesu Keriso? E faapefea ona molimau atu na aoaoga ia te oe faapea na filifilia Iosefa Samita e le Atua? Tusi faamaumau soo se lagona e te maua.

Gaoioiga mo le aoao faatasi ma isi

  • Ua tatou olioli i le tele o faamanuiaga aua na toefuatai mai e le Atua le talalelei e ala mai ia Iosefa Samita. Taumafai faatasi o se vaega e fatu se lisi o na faamanuiaga. E mafai ona e amata i mea o loo ta’ua i le Mataupu Faavae ma Feagaiga 135:3. O upu nei mai ia Peresitene Russell M. Nelson e mafai foi ona tuuina atu ia te oe ni manatu: “[O Le Toefuataiga o le talalelei] o lona uiga e mafai ona faamauina faatasi oe ma lou aiga e faavavau! O lona uiga ona ua papatisoina oe e se tasi ua i ai le pule mai ia Iesu Keriso ma ua faamauina o se tagata o Lana Ekalesia, ua mafai ona e olioli i le mafutaga tumau a le Agaga Paia. O le a Ia taiala ma puipuia oe. O lona uiga o le a lē tuua lava oe e lē faamafanafanaina pe aunoa ma le mauaina o le mana o le Atua e fesoasoani ia te oe. O lona uiga e mafai e le mana o le perisitua ona faamanuiaina oe a o e mauaina sauniga taua ma osia feagaiga ma le Atua ma tausi i ai.” Ona talanoa lea e uiga i le auala e mafai ona e faaalia ai lou agaga faafetai mo mea ua tuuina mai e le Alii ia te oe e ala mai i Lana perofeta o Iosefa Samita.

  • Na e iloa o se isi perofeta e igoa ia Iosefa, o lē sa soifua anamua, na muai vaai i le misiona a Iosefa Samita? Faitau le 2 Nifae 3:6–15 e aoao ai po o le a le mea na valoia e Iosefa o Aikupito e uiga ia Iosefa Samita ma lana galuega taua. O a upu o loo faaaogaina e faamatala ai Iosefa Samita i nei fuaiupu? O le a se mea na finagalo le Atua na te faia? Talanoa le tasi i le isi e uiga i mea ua e maua. E mafai foi ona e talanoaina faamanuiaga ua folafola mai i lenei valoaga ma le auala na oo mai ai e ala i le Toefuataiga.

Aoao atili

Vaega 3

E Mafai Ona E Maua Lau Lava Molimau O Iosefa Samita o le Perofeta a le Atua

o se tamaitiiti o loo tootuli i le tatalo

E musuia le mafaufau faapea a o tamaitiiti e 14 tausaga le matua, sa vaai Iosefa i le Tama Faalelagi ma Iesu Keriso. Ae o le a le mea na tupu a o lei mauaina e Iosefa le Uluai Faaaliga? Sa mafaufau loloto o ia i tusitusiga paia, manao i le poto mai le Atua, ma tatalo mo Lana taitaiga (tagai Iosefa Samita—Talafaasolopito 1:10–19). Ua faamanatu mai e le tala ia Iosefa ia i tatou e mafai foi ona tatou maua se molimau patino i le Faaola ma Lana talalelei—e aofia ai le valaauina o Iosefa Samita e toefuatai mai. E ui atonu e oo mai lenei molimau i le aluga o taimi nai lo se mea ofoofogia se tasi, ae e ala mai i le Agaga Paia e mafai ona tatou iloa ma le mautinoa le moni o mea uma (tagai Moronae 10:5).

Mea e mafaufau i ai

  • E tele auala e mafai ona tatou maua ai se molimau patino faapea o Iosefa Samita o se perofeta. Na saunoa mai Elder Neil L. Andersen: “Atonu e oo mai a o e tootuli e tatalo, ole atu i le Atua ina ia faamaonia mai o ia o se perofeta moni. E ono oo mai a o e faitau i le tala a le Perofeta i le Uluai Faaaliga. E mafai ona totoina se molimau i lou agaga a o e faitauina pea lava pea le Tusi a Mamona. E mafai ona oo mai a o e tuuina atu lau lava molimau e uiga i le Perofeta pe a o e tu i le malumalu ma iloaina ua toefuatai mai i le lalolagi le mana o faamauga e ala mai ia Iosefa Samita.” Mafaufau i lau molimau i le matafaioi a Iosefa Samita o se perofeta a le Atua. O le a se mea ua fesoasoani ia te oe e talitonu ai i lona valaauga paia? O le a se isi mea e mafai ona e faia e maua ai pe faamalosia ai lau molimau o ia o se perofeta?

Gaoioiga mo le aoao faatasi ma isi

  • O se molimau patino faapea o Iosefa Samita o le perofeta a le Atua e le na ona tupu ia i tatou—o se mea tatou te galulue ai. E mafai ona e faamalosia lau molimau patino i le valaauga o Iosefa e ala i le faasoaina atu o se mau mai le Tusi a Mamona i lau vaega ma talanoa e uiga i le auala na avea ai Iosefa ma se meafaigaluega i aao o le Atua e faaavanoa ai lena mau mo i tatou. Atonu foi e mafai ona e feauauai i le faamaumauina faatasi o le molimau a le Perofeta mai le Penina Tau Tele ona faalogologo lea i ai pe faasoa atu i isi. E faapefea e le Tusi a Mamona ma le molimau a Iosefa ona faamalosia lou faatuatua faapea na valaauina Iosefa e le Atua?

  • E mafai ona tatou faatupulaia la tatou molimau i le valaauga paia o Iosefa Samita i o tatou olaga atoa. Atonu o lau molimau i lana matafaioi e lagonaina le malosi i nisi taimi nai lo isi. E mafai ona outou faitau faatasi i le fautuaga lenei a Peresitene Dieter F. Uchtdorf: “Ou te valaaulia outou e toe laa i tua, vaai i lou olaga mai se tulaga maualuga atu, ma faafaigofie lau auala i le avea ai ma soo.” Mafaufau e suesue pe faapefea ona faatatau le fautuaga a Peresitene Uchtdorf i lau molimau faapea o Iosefa o le perofeta a le Atua e ala i le vaai i se ata o loo faateleina i se faamatalaga se tasi. Talanoa faatasi e uiga i foliga o lena ata. Ona vaai lea i le ata lava lea e tasi o loo faataamilo i fafo ina ia faaalia ai le ata atoa. E faapefea ona ese foliga o le ata mai le taimi muamua? O le a se mea ua aoao atu e lenei faataitaiga ia te oe e uiga i le auala e maua ai se molimau i le valaauga paia o le Perofeta o Iosefa Samita?

Aoao atili