Librarya
Pagpuasa

“Pagpuasa,” Mga Hilisgotan ug mga Pangutana (2023)

pamilya nga nag-ampo

Giya sa Pagtuon sa Ebanghelyo

Pagpuasa

Pagpaduol ngadto sa Dios ug pagtabang niadtong nanginahanglan

Ang dili pagkaon mora og magpagutom, ug kana mahimong tinuod. Apan ang dili pagkaon ug pag-inom tungod kay nagsunod kita sa balaod sa puasa, wala lang kita molak-ang og tingkaon; nagtuman kita sa usa sa mga sugo sa Dios nga makatabang nato nga espirituwal nga makapaduol ngadto Kaniya.

Pinaagi sa pagpuasa ug pag-ampo, atong gipadaplin ang pipila ka butang nga pisikal natong gisaligan ug hinuon mipili sa pagsalig sa Dios. Nagsimba kita Kaniya ug nagtinguha sa Iyang mga panalangin sa kahupayan, giya, ug kalig-on. Magpuasa ug mag-ampo usab kita alang sa uban kon nagmasakiton sila o nanginahanglan og piho nga mga panalangin. Sa atong pagdawat sa imbitasyon sa Ginoo sa pagpuasa, mahimo kitang mas maluluy-on, mas mahigugmaon, mas mapainubsanon, ug mas andam sa pagserbisyo—mas sama ni Jesukristo.

Unsa ang Pagpuasa?

Ang pagpuasa sa kasagaran naglakip sa “pag-ampo, dili mokaon ug moinom sulod sa 24 ka oras (kon sa pisikal nga paagi makahimo), ug mohatag og ubay-ubay nga halad sa puasa.” Ang mga Santos sa Ulahing mga Adlaw gidapit sa pagpuasa dili mominos makausa sa usa ka bulan ug boluntaryong moamot sa kantidad sa kwarta nga gastohon unta nila sa pagkaon atol sa ilang pagpuasa aron itabang sa uban nga nanginahanglan. Ang mga indibidwal ug mga grupo makapuasa. Ang pagpuasa mas labaw pa kay “magpagutom lang”—usa kini ka paagi sa “pagbayaw sa atong mga kasingkasing, sa atong mga hunahuna, ug sa atong mga tingog sa pagkalawat kauban sa atong Langitnong Amahan” ug magtinguha sa Iyang kabubut-on ug sa Iyang mga panalangin.

Kinatibuk-ang pagpasabot sa hilisgotan: Pagpuasa

May kalabotan nga mga giya sa pagtuon sa ebanghelyo: Pag-ampo, Pagpadayag, Caring for Those in Need [Pag-atiman Niadtong Nanginahanglan]

Seksiyon 1

Ang Dios Miestablisar sa Balaod sa Puasa ug sa mga Halad sa Puasa aron sa Pagpanalangin sa Iyang mga Anak

mga batan-ong lalaki nangolekta og mga halad sa puasa

Ang mga tawo sa Dios nagsunod sa balaod sa puasa sa karaang panahon (tan-awa sa Exodo 34:28; Esther 4:16; Mateo 6:16–18; Alma 45:1). Gipaila pag-usab sa Ginoo kini nga balaod sa atong panahon (tan-awa sa Doktrina ug mga Pakigsaad 88:76). Ang mga Santos sa Ulahing mga Adlaw magpuasa pinaagi sa dili pagkaon ug pag-inom sulod sa 24 oras kon sa pisikal nga paagi makahimo sila. Kadtong dili makahimo sa pagpuasa gikan sa pagkaon ug pag-inom sulod sa 24 ka oras mahimong mohukom unsa ang angay nga puasa aron sa pagtabang nila nga mahinumdom ni Jesukristo.

Ang mga miyembro sa Simbahan kanunay nga magdungan sa pagpuasa, sa kasagaran sa unang Igpapahulay sa matag bulan. Boluntaryo usab silang mohatag og kwarta nga donasyon, nga gitawag og halad sa puasa, dili mominos pareha sa bili sa pagkaon nga wala nila kan-a atol sa ilang pagpuasa. Ang ilang donasyon nagtabang sa paghatag og pagkaon, kapuy-an, sinina, ug ubang mga importante alang niadtong nanginahanglan. Ang pagpuasa maghatag usab og espirituwal nga mga panalangin. Si Presidente Dallin H. Oaks mitudlo, “Ang atong pagpuasa aron pagtabang sa gigutom usa ka buhat sa kaluoy ug, kon buhaton sa putli nga tumong, usa kini ka espirituhanon nga pagbusog.”

Mga butang nga angayang hunahunaon

  • Sukad sa karaang panahon, ang balaod sa puasa nakapanalangin sa mga anak sa Dios. Basaha ang Isaias 58:6–11 aron makat-onan ang pipila niini nga panalangin. Dayon basaha ang Mateo 25:35–40. Unsa ang gitudlo niini nga mga bersikulo mahitungod sa kaimportante sa pagpuasa ug pag-atiman alang niadtong nanginahanglan? Tingali makonsiderar ninyo sa mainampoong paagi kini nga mga bersikulo sa sunod higayon nga kamo magpuasa o mohatag og halad sa puasa. Sa unsang paagi nga ang pagtutok diha ni Jesukristo makahimo sa inyong kasinatian sa balaod sa puasa nga mas makahuluganon?

  • Sa Simbahan, ang miting sa pagpuasa ug pagpamatuod himoon matag bulan. Basaha ang Alma 5:45–48 aron makat-on kon sa unsang paagi nga ang pagpuasa makapalig-on sa inyong pagpamatuod diha ni Jesukristo. Tingali mahimo ninyong rebyohon kini nga mga bersikulo sa dili pa ang sunod nga miting sa pagpuasa ug pagpamatuod nga inyong tambongan. Sa unsang paagi nga ang paghatag sa inyong pagpamatuod sa unsay inyong nahibaloan, gituohon, ug gibati mahitungod ni Jesukristo magdala og dugang katuyoan sa inyong pagpuasa? Sa unsang paagi kini makatabang sa uban nga nagpuasa? Mahimo usab nga inyong isulat ang espirituwal nga mga pag-aghat nga inyong nadawat samtang naminaw kamo sa mga pagpamatuod sa uban ug dayon buhaton kini.

Mga kalihokan alang sa pagkat-on kauban ang laing mga tawo

  • Ang pagpuasa usa ka sagrado nga pribilihiyo nga makadala og mga milagro. Tan-awa ang bidyo “Fast Offerings: Are We Not All Beggars” (2:31), ug dayon hisggoti ang mahitungod kon sa unsang paagi nga ang balaod sa puasa nagtabang nato sa pag-atiman ug paghigugma sa uban sama ni Jesus. Mahimo usab nga inyong basahon o kantahon pagdungan ang himno nga “Kay Gihatagan Ko og Daghan” . Hisgoti kon unsa ka manggihatagon ang Ginoo kaninyo samtang nagsunod kamo sa balaod sa puasa. Paghimo og lista o pagdrowing og mga litrato sa mga milagro nga inyong nasinati, ug hisgoti sa unsang paagi kini mipanalangin sa inyong kinabuhi.

  • Si President Henry B. Eyring mitudlo: “Ang inyong halad sa puasa daghan og mabuhat kay sa tabang sa pagpakaon ug pagbisti. Moayo ug mousab kini og mga kasingkasing.” Rebyoha pagdungan ang mensahe ni Presidente Eyring “Dili ba Mao Kini ang Pagpuasa nga Akong Napili?”. Dayon mahimo ninyong ipakigbahin kon sa unsang paagi nga ang paghatag o pagdawat og mga halad sa puasa miayo ug miusab sa inyong kasingkasing. Sa unsang paagi nga kini nga mga kasinatian nakadugang sa inyong gugma alang sa mga anak sa Dios? Sa unsang paagi nga mitabang sila kaninyo nga mobati sa gugma sa Ginoo alang kaninyo?

Pagkat-on pa og dugang

Seksiyon 2

Ang Pagpuasa ug ang Pag-ampo Nag-andam Nato alang sa mga Panalangin sa Dios

batan-ong babaye nga nag-ampo

Mga Santos sa Ulahing mga Adlaw magpuasa tungod sa daghang rason. Ang pagpuasa mao ang usa ka paagi sa pagtabang sa uban, pagsimba sa Dios, ug pagpakita og pasalamat alang Kaniya (tan-awa sa Alma 45:1). Makapuasa usab kita sa pagtinguha og personal nga pagpadayag gikan sa Dios o sa paghangyo Kaniya sa pagpanalangin sa masakiton ug nag-antos (tan-awa sa Salmo 35:13; Alma 5:46). Pinaagi sa pagpuasa, makaangkon kita og kusog sa pagbatok sa mga tentasyon ug makadawat og kahupayan panahon sa mga pagsulay (tan-awa sa Mateo 4:2–4; Alma 30:1–2). Agi og dugang, ang pagpuasa nagtabang nato nga mas mapainubsanon, kay kini nagpahinumdom nato sa atong hingpit nga pagsalig sa Dios (tan-awa sa Salmo 35:13).

Ang pagpuasa ug pag-ampo mag-uban gayod. Ang pagpuasa makadugang og usa ka elemento sa katim-os ug pasalig sa atong mga pag-ampo, ug ang pag-ampo nagbayaw sa atong puasa gikan sa yanong pagsal-ang og mga pagkaon ngadto sa usa ka tinuod nga komunyon kauban sa Dios. Kon mag-uban, ang pagpuasa ug pag-ampo adunay gamhanan nga epekto sa atong pagkamapainubsanon ug hugot nga pagtuo diha ni Kristo (tan-awa sa Helaman 3:35).

Mga butang nga angayang hunahunaon

  • Usahay ang pagpuasa malisod apan makahatag usab kini og daghang espirituwal nga mga panalangin. Basaha ang Mateo 4:1–4, lakip ang Hubad ni Joseph Smith sa mga bersikulo 1 ug 2, alang sa usa ka ehemplo sa dihang nagpuasa si Jesukristo. Nganong importante alang ni Jesus nga makig-uban sa Dios niining higayona? Ikonsiderar sa unsang paagi nga ang pagpuasa ug pag-ampo makatabang ninyo nga mas mahiduol ngadto sa Dios. Sa unsang paagi nga inyong mahimo ang pag-ampo nga mas gituyo nga kabahin sa inyong pagpuasa? Buhata ang bisan unsang pag-aghat nga inyong madawat.

  • Ang pagpuasa ug pag-ampo makatabang ninyo nga mahimong instrumento sa mga kamot sa Ginoo. Basaha ang Alma 17:1–3, 9. Unsa nga espirituwal nga mga panalangin ang miabot ngadto sa mga anak ni Mosiah gikan sa pagpuasa ug pag-ampo nga nakatabang nila sa paghimo sa buhat sa Ginoo? Unsa ang inyong makat-on gikan sa ilang ehemplo samtang mangalagad kamo sa mga anak sa Dios, motuman sa inyong calling, ug mopakigbahin sa ebanghelyo?

Mga kalihokan alang sa pagkat-on kauban ang laing mga tawo

  • Sa iyang pakigpulong “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” si Presidente Russell M. Nelson mipakigbahin og usa ka istorya sa mga Santos sa Samoa, Fiji, Tahiti, ug Tonga nga nagpuasa ug nag-ampo alang sa usa ka milagro. Basaha kini nga istorya, ug dayon hisgoti ang mahitungod sa kabukiran, o mga hagit, sa inyong kaugalingong kinabuhi (tan-awa sa Mateo 17:14–21). Unsay inyong nakat-unan gikan sa mga pulong ni Presidente Nelson mahitungod sa unsang paagi nga ang pagpuasa ug pag-ampo makapadala sa gahom sa Ginoo sa inyong kinabuhi? Mahimo ninyong hisgotan ang inyong mga hunahuna human motan-aw sa mga litrato sa kabukiran o sa pagdungan og paglakawlakaw. Mahimo usab nga inyong hisgotan ang mahitungod sa mga panalangin ug mga oportunidad nga inyong nadawat samtang nagpuasa ug nag-ampo kamo inubanan sa hugot nga pagtuo.

  • Ang pagpuasa sa kasagaran nagpasabot nga dili mokaon o moinom, apan makaapil usab kita sa lainlaing mga matang sa mga pagpuasa. Sa sesyon sa kababayen-an sa Oktubre 2018 nga kinatibuk-ang komperensiya, si Presidente Nelson mitambag: “Ako kamong dapiton sa pag-apil sa 10 ka adlaw nga pagpuasa gikan sa social media ug gikan sa bisan unsa nga media nga makahatag og negatibo ug law-ay nga mga butang sa inyong hunahuna. Pag-ampo aron mahibalo hain nga mga impluwensya ang tangtangon atol sa inyong pagpuasa. Ang epekto sa inyong 10 ka adlaw nga pagpuasa makasurprisa kaninyo. Unsay inyong nabantayan human mohunong sa kalibutanong mga panglantaw [pagbasa o pag-post sa social media] nga dugay nang misamad sa inyong espiritu? Aduna bay kausaban kon asa na ninyo karon buot nga gamiton ang inyong oras ug kusog? Ang inyo bang mga prayoridad nausab—bisan og gamay lang? Awhagon ko kamo sa pagrekord ug buhaton ang matag impresyon.” Isip usa ka grupo, paghisgot mahitungod sa pipila ka butang nga mahimo kamong magpuasa nga tingali nakapugong ninyo nga mas mahiduol ngadto sa Dios. Dayon dawata ang hagit ni Presidente Nelson. Human sa inyong pagpuasa, hisgoti sa unsang paagi nga ang pag-ampo migiya sa inyong kasinatian ug sa unsang paagi kamo napanalanginan tungod sa pagpuasa niining paagiha.

Pagkat-on pa og dugang