“36. Kateakin, Bitakin, ao Aranakin Iunite aika Boou,” Aeniboki ni Kabuta: Te beku n Ana Ekaretia Iesu Kristo ibukiia Aika Itiaki ni Boong aika Kaitira (2025).
“36. Kateakin, Bitakin, ao Aranakin Iunite aika Boou,” Aeniboki ni Kabuta.
36.
Kateakin, Bitakin, ao Aranakin Iunite aika Boou
36.0
Moantaeka
A kaina te taromauri kaain te ekaretia n te tabo are a maeka iai (taraa Motiaea 25:17–24). Taabo n taromauri aikai a kakawaki ibukin bairean ao karaoakin ana mwakuri te Ekaretia iaan te kariaiakaki n te nakoanibonga. Taan kairiiri n te taromauri anganaki kiingin te nakoanibonga ni kariaia karaoakin otenanti n te nakoanibonga. A ibuobuoki naba kaain te taromauri ni kakorakorai aia onimaki ngkana a taromauriia te Atua, n reiakin ana reirei Iesu Kristo, ao n ibuobuoki.
Bootaki n taromauri (aranaki naba bwa iunite) n raonaki ma titeiki, mwakoro, uoote, ao mwaanga. A kateaki, a bitaki, ke ni katokaki ti ngkana e kainnanoaki.
Taan kairiiri a mwakuri ni kakorakoraia membwa n tamneia imwain ae ana bubuti katean te iunite ae boou ke ni bita tian te iunite. A riai iunite aika boou ni kateaki ti ngkana iunite aika ngkai a tau korakoraia.
Ibukin te ibuobuoki n te United States ao Canada, tareboniia 1-801-240-1007. Itinanikun te United States ao Canada, tareboniia aobitin te aono.
36.1
Katean ke Bitakin Titeiki ao Mwakoro
A kateaki titeiki man mwakoro ke man kamaenakoan titeiki aika iai ngkai. Te beretitenti n te titeiki ke n te mition a kona ni bubuti katean te titeiki ae boou. E na kakoaua moa bwa iai irouia bwaai aika kainnanoaki aika oti n te taibora aei.
Bwaai aika Kainnanoaki ibukin Katean te Titeiki
A kateaki mwakoro man mwaanga inanon te mition ke n te titeiki ae iai ngkai. Akea te mwaiti ae kataua ni mwaitiia membwa ke mwaanga aika kainnanoaki ni katean te mwakoro.
E na riai te mwakoro n iai korakorana ae kainnanoaki ibukin te titeiki inanon onoua te namwakaina imwain ae na kona te beretitenti n te mition ni bubuti bwa e na riki bwa te titeiki.
Tiaia titeiki ke te mwakoro a na irii tiaia iunite ake a mena inanona. Ni bubuti te bitaki n te tia n te titeiki ke te mwakoro ke kaibibitan te iunite nakon titeiki ke mwakoro aika irarikiiaa, beretitenti n te titeiki ke n te mition a na karaoa te babaire ao ni babairea te rekomenteition.
A moana te bubuti ae boou te beretitenti n te titeiki ke te mition n te “Mwaake ao aia Tabeka taan Kairiiri.” Ngkana e aki kona ni kabongana te aonraain tititem, e kona n taunrountin booma n te beeba man taonakin te bwatin iaon te ringke anne.
Kariaiakan te bubuti ibukin te bitaki n te titeiki e roko man te Moan Beretitentii ao te Kooram n te Tengaun ma Uoman. Ni bon arona, a karaoaki babaire inanon waniua te wiiki imwiin reken te bubuti are e a bwanin.
36.2
Karekean ke Bitakin Uoote ao Mwaanga inanon Titeiki
Uoote ao mwaanga inanon titeiki a karekeaki man iunite aika a waaki ngkai. Te beretitenti n te titeiki e kona ni bubuti katean te uoote ae boou ke te mwaanga inanon te titeiki. E kakoaua moa bwa te iunite ae boou e na kona ni kaitarai bwaai aika s kainnanoaki aika a kaotaki inanon taibora aikai.
Bwaai aika a Kainnanoaki ni Katean te Uoote ke te Mwaanga n te Titeiki
Te beretitenti n te titeiki e kona ni bubuti bitakin te mwaanga nakon te uoote ngkana te iunite anne iai irouna bwaai aika kainnanoaki ao n tia ni kinaa te tia rineaki ae kona n riki bwa te bitiobi.
E kona te beretitenti n te titeiki ni bubuti manga rinanoan ke katokakin uoote ao mwaanga ngkana bon iai kainnanoakina ae mataata.
Te beretitenti n te titeiki e na moana te bubuti ae boou n te “Mwaake ao aia Tabeka taan Kairiiri.” Ngkana e aki kona ni kabongana te tititem iaonrain, e kona n taunroute boomwa n te beeba man taonakin te bwatin n tomatoma anne.
Bitaki ibukin kariaiakan ana bubuti te uoote ke te mwaanga a roko man te Moan Beretitentii. Ni bon arona, a karaoaki babaire inanon onoua te wiiki imwiin reken te bubuti are e a bwanin.
36.3
Karaoan ke Bitakin Mwaanga inanon Mition
Te beretitenti e kona ni bubuti katean mwaanga n te mition aika boou. Bon akea raoi mwaitin te membwa ae katauaki ni katean te mwaanga n te mition. E ngae n anne, mwaanga aika boou a riai n iai aman aika iai irouia te nakoanibonga. E riai ni iai temanna ae kakaonimaki, ae kakabwaka ana kabwianibwai ae bwanin ae kaain te nakoanibonga ae te Merekitereka.
Te beretitenti n te mition e na moana ana bubuti ae boou n te “Mwaake ao aia Tabeka taan Kairiiri.” Ngkana e aki kona ni kabongana te tititem iaonrain, e kona n taunroute boomwa n te beeba man kotean te rinke.
Te Beretentii n te Aono e kona n anga te kabanea ni kariaia ke n aki butimwaea ana bubuti te beretitenti n te mition ni:
-
Karaoa ao n arana te mwaanga n te mition ae boou.
-
Katoka te mwaanga inanon te mition.
-
Bitii tian mwaanga n te mition ngkana te bitaki e aki roota te titeiki, te mwakoro, ke te mition riki teuana.
Te Beretitentii n te Aono e riai ni kanakoa te kariaia n te bubuti nakon te etukuata n te Ekaretia ibukin rinanoana imwain ae kona ni kateaki te mwaanga ke te bitaki n ana tititem te Ekaretia.
Te Beretentii n te Aono e kona n anga te kariaia ma e na aki anga te kabanea ni kariaia n ana bubuti te bereitenti n te mition ni:
-
Bita te mwaanga nakon te titeiki riki teuana, mwakoro, ke te mition.
-
Bita aran te mwaanga n te mition ae bwainaki ngkai.
-
Bita tian te mwaanga n te mition ngkana te bitaki e na roota te titeiki, te mwakoro, ke te mition riki teuana.
-
Karaoa ke bita te mwaanga n te mition ibukiia kairake ake a tuai iein ke ikawai aika a tuai iein; membwa aika aki kona n taetae n taetaen te aba; membwa aika a kabongana te taetae n te kanikinaa; membwa ake a mena n te tienta n tararua, burokuraem n te bwainaoraki, ke n te karabuti; ke membwa n te taanga ni buaka.
N aekaki ni waaki aikai, e na rinanon te bubuti te Beretitentii n te Aono, ao ngkana a kariaia, ana kanakoa ibukin kariaiakana. Bitaki ibukin kariaiakan ana bubuti te uoote ke te mwaanga a roko mairoun te Moan Beretitentii. Ni bon arona, a karaoaki babaire inanon onoua te wiiki imwiin reken te bubuti are e a bwanin.
36.4
Aranakin Iunite n te Ekaretia
E riai aran te iunite ni buokia ni kinaia naake a maeka n te aono. N ae tataneai te aba iai, aran iunite aika iai ngkai aki riai ni bitaki.
Ngkana e kainnanoaki aran te iunite bwa e na bitaki ibukin manga rinanoan te tia, te beretitenti n te titeiki ke te mition ana moana te bubuti ae boou man kabonganakin te aonrain tititem n te Mwaake ao aia Tabeka taan Kairiiri. Ngkana e aki kona ni kabongana te tititem iaonrain, e kona n taunroute boomwa n te beeba man kotean te bwatin n te bwai n tomatoma anne.
Ti te Moan Beretitentii ae kona ni kariaia bubuti aikai.
Beretitentii n te Aono a na kariaia bubuti ni katei ao n aran mwaanga aika boou n taian mition (taraa 36.3).
36.4.1
Aranakin Titeiki ao Mwakoro
Te moan n taeka n aran te titeiki ke te mwakoro bon teuana mai ibuakon aikai:
-
Te kaawa are e tei iai te titeiki ke te etukuata n te mwakoro
-
Te kaawa riki teuana inanon te titeiki ke te mwakoro ae rangi ni kinaaki nakoia membwa
-
Mwakoron te aba ae kakawaki n tiaia titeiki ke mwakoro
N te United States ao Canada, te kauoua n taeka bon te aba ke te aono are mena iai te titeiki ke te mwakoro. N aba tabeua, te kauoua n taeka bon aran te aba.
Ngkana e raka iaon teuana te titeiki ke te mwakoro a mena n te kaawa ae ti teuana, te kateniua n taeka bon kinakin manna inanon tian te iunite. Tabeua manna aika kariaiakaki ibukin araia titeiki ao mwakoro a kaotaki inano:
-
Te tabo ae kotoia te kambwati (meang, maiaki, mainiku, ke maeao)
-
Komiuniti ke kaain rarikim
-
Tein te aba
Tabeua manna aika kinaki aika aki kariaiakaki ibukin aara n te titeiki ao te mwakoro a kaotaki inano:
-
Taeka ake a kotea te tabo riki tabeua (te katooto, maiakimaeao)
-
Araia aomata
Ngkana ti tebo aran te kaawa n aron te titeite, burowinti, ke te aba, e aki kaokaki n te ara. Ibukin te katooto:
-
Idaho Falls Taylor Mountain Titeiki, tiaki Idaho Falls Idaho Taylor Mountain Titeiki
-
México City Azteca Titeiki, tiaki México City México Azteca Titeiki
36.4.2
Aranakin Uoote ao Mwaanga
E na aranaki te uoote ke te mwaanga imwiin atakin te kaokoro inanon taian tia. Tabeua kaokoro aika kariaiakaki ibukin aran te uoote ke te mwaanga a kaotaki inano:
-
Te Kaawa
-
Komiuniti ke kaain rarikim
-
Kaawa ae Bubura
-
Te Tabo ni Kamangang
-
Te Reirei
-
Tein te Aba
Tabeua manna aika kinaki aika aki kariaiakaki ibukin aara n te titeiki ao te mwakoro a kaotaki inano:
-
Te Tabo ae Kotoia te Kambwati (te katooto, mainiku ke meangmaeao)
-
Araia aomata
-
Aara aika boboto iaon te tabo (te katooto, Tarakina n te tabo are tei iai te Tembora, Tarakina man te Maunga, ke Tarakina man te Karaanga)
-
Ikotakin aara aika uoua ni karika te ara ae boou
Te ara ae ti teuana e kabonganaki n te uoote ke n aran te mwaanga. Ngkana e raka iaon teuana te uoote ke te mwaanga ma te ara ae ti te arona, e na karinaki te nambwa bwa mwakoron te ara, n aron Preston 1st Uoote ao Preston 2nd Uoote.
E riai aran te uoote ke te mwaanga ni koreaki n taetaen te aono. Ngkana te taetae e aki kamanena manin te reta n Rom, te rairai ni kamanenaan tein manin te reta n Rom e riai ni karinaki n te bubuti.
36.5
Karaoakin Bitaki aika Uotakirakeaki
36.5.1
Bitaki n te Titeiki ao n te Mwakoro
Te reta ae kariaiakaki ibukin karaoakin ke katokan te titeiki ke te mwakoro e kaota bongin namwakaina ae na karaoaki iai te bitaki. E na aki katanoataaki bongin te namwakaina ni karokoa are e a tia te Mataniwi ni Kabuta are e mwiokoaki ni maroroakin taekana ma te beretienti n te titeiki ke te mition. Bitaki ni koaua aki katanoataaki ni karokoa tain te maungatabu n te titeiki ke te mwakoro.
Beretitenti n titeiki ke mition a na kaongoa te etekuata n te Ekaretia ke aia aobiti n te aono imwiin ae a tia ni karaoaki bitaki.
36.5.2
Bitaki n te Uoote ao te Mwaanga
Imwiin are e a tia te beretitenti n te titeiki ke te mition ni karekea te kariaia ibukin bitakin te uoote ke te mwaanga, iai ana tai ae 90 te bong ni kaoti bitaki ake a na kariaiakaki irouia membwa. Ngkana e kainnanoia bwa e na taonna ni kakabwakia riki nakon 90 te bong, e na bubuti te kariaia man ana Aobiti te Moan Beretientii.
Beretitenti n te titeiki ke mition a karin bubuti inanon te LCR n te tai are a tia ni karaoaki iai taian bitaki. Ibukin te ibuobuoki n te United States ao Canada, tareboniia 801-240-6243 ke imeeri oiservices@ChurchofJesusChrist.org. Ibukin te ibuobuoki Itinanikun te United States ao Canada, kaongoa aobitin te aono. Mwaabe ao iunite aki tuangaki ni karokoa ae a tia n tauaki mwiia man a na etukuata te Ekaretia.
36.6
Ana Moan Burokuraem te Iunite
E a tia te Ekaretia ni karaoa Ana Moan Burokuraem te Iunite ibukin kabonganakina irouia tabeua mwaanga aika uarereke ke aia bobotaki membwa ae uarereke ae a tia ni kariaiakaki, ae ataaki bwa taian kurubu (taraa 37.7 ibukin rongorongoia riki kurubu). Te Beretitentii n te Aono e kona ni kariaia kamanenaan Ana Moan Burokuraem taian kurubu ke mwaangae ke kurubu ngkana iai tabeua tabeaianga n aron aikai:
-
Te Ekaretia e a bon tibwa moana ana waaki.
-
Membwa a uamaenako iaon te aba.
-
Mwaitiia membwa e bon uarereke, ao te waaki ni kairiiri e a tibwa moana rikirakena.
-
Iai kainnanoia membwa ae onoti n te taetae.
-
Membwa ake a mena n te taanganibuaka (taraa 38.9.4 bukin katean aia mwakuri n ibuobuoki membwa n te kurubu).
-
Membwa ake a mena n tienta n tararua, burokuraem n te bwainaoraki, ke n te karabuti.
Beretitentii n te Aono ao tabeman riki taan kairiiri a na katereterea raoi bwa iunite ake a kabongana te Moan Burokuraem n te Iunite a riai n aki kananaua te bootaki, boowi, ao burokuraem n te tai ae waekoa. E ribanaaki raoi aron te nakoa ni kairiiri ngkana bwaai n ibuobuoki man te Ekaretia a kabonganaaki n te aro ae baeranti n aia kangaanga membwa ao kainnanoia.
A tibwai moan tua aikai taan kairiiri ma kurubu ao mwaanga ake a kaobngana te Moan Burokuraem n te Iunite:
-
Ukora ana kairi te Tamnei n ataia bwa tera ae kona karaoia ao ko na kanga ni karaoia.
-
Angareirei iaon tua ao reirein te euangkerio.
-
Buokiia membwa (1) n ataa ao ni karekei otenanti n te nakoanibonga aika a kakawaki ao (2) karaoi ao kawakin berita aika tabu aika a irekereke.
Iunite aikai a kona ni karaoi bootakin te Tabati inanon te mweenga, te kateitei ae kakabwakaaki boona, ke ana kateitei te Ekaretia (taraa 35.3). Te mition, beretitentii n te titeiki, ke n te mwakoro a kona ni katauraoi rongorongo iaon karekean ao kateimatoaakin te tabo ni bootaki ibukin te kurubu ke te mwaanga.
Ngkana aki rangi ni mwaiti kaain te kurubu ke te mwaanga, a na tii booa te bootaki n toa ao tain reiakinan kaetieti ibukin te euangkeiro ibukiia membwa ni kabane. Ibukin kaetieti iaon te euangkerio, menmbwa a kabonganai booki aika tabu ao Nakomai, Iriirai—Ibukin te Mweenga ao te Taromauri. Ngkana a tuai rairaki booki aika tabu nakon aia taetae membwa, a riai membwa ni kabongana te Gospel Fundamentals manual ibukin kaetieti iaon te euangkerio. Ngkai e rikirake te Ekaretia, e na mwaiti riki karaoan te mwakuri n rairairi iaon booki aika tabu, anene n taromauri ao kuuna, ao ana maekatiin te Ekaretia a na bon tauraoi.
Ngkai e rikirake te iunite, a riai taan kairiiri n te Ekaretia ni baronga aia kooram unimwaane ao te Bootaki n Aine (taraa 8.3.3 ao 9.3.2). Ngkai e tabe n rikirake mwaitiia taan kairiiri aika a konabwai, e na kona te beretitenti n te mwaanga ni baronga kooram ibukin te Nakoanibonga ae te Aaron ao te Bootaki n Ataeinnaine, Moanrinan, ao Bootaki ibukin te Reirei n Tabati (taraa 10.3, 11.3.2, 12.3.2, ao 13.2.2).