35.

’Atu’atura’a ’e fa’a’ohipara’a i te mau fare purera’a

35.1

Fā

Tē hōro’a nei te ’Ēkālesia i te mau fare purera’a ’ia nehenehe i te feiā ato’a e tomo mai i roto :

• ’Ia rave ’e ’ia fa’a’āpī i te mau fafaura’a nā roto i te mau ’ōro’a mo’a (hi’o Te Ha’api’ira’a Tumu ’e te mau Fafaura’a 20:75 ; 59:9–12).

• ’Ia ha’aputuputu ’āmui (hi’o 3 Nephi 18:22–23).

• ’Ia ha’amori ’e ’ia pure ’āmui (hi’o Mosia 18:25 ; Moroni 6:9).

• ’Ia ha’api’i ’e ’ia aupuru i te tahi ’e te tahi (hi’o Moroni 6:4–5).

• ’Ia fa’aō mai i roto i te tahi atu mau fa’a’ohipara’a tei fāri’ihia, mai tei fa’ata’ahia i roto i teie pene.

’Ua rau te huru hāmanira’a o te hō’ē fare purera’a ’ia au i te mau tupura’a ’ohipa ’e i te mau hina’aro o te fenua iho. E nehenehe e riro ’ei hō’ē vāhi patuhia ’aore rā hō’ē vāhi tei ho’ohia mai e te ’Ēkālesia, te fare o te hō’ē melo, te hō’ē fare ha’api’ira’a ’aore rā te hō’ē pū ’āmuira’a nā te ’oire, te hō’ē vāhi i tārahuhia ’aore rā te hō’ē atu vāhi tei ha’amanahia.

35.2

Te mau ti’ara’a ’e te mau hōpoi’a

35.2.1

Te tuha’a fa’atere o te mau fare purera’a

Nā te Tuha’a Fa’atere o te mau Patura’a Fare Purera’a e vai nei i te Pū rahi a te ’Ēkālesia, e ha’amau i te mau parau tumu ’e te mau arata’ira’a nō te fāna’ora’a ’e nō te ’atu’atura’a i te mau vāhi ha’amorira’a. Tē pairati nei teie tuha’a fa’atere i raro a’e i te arata’ira’a a te ’Episekōpora’a Peresideni.

E hōpoi’a nā te mau rave ’ohipa nō te mau Patura’a Fare Purera’a i te fāna’ora’a ’e i te ’atu’atura’a i te mau fare purera’a ’e i te tahi atu mau fare a te ’Ēkālesia. E ravehia te reira i raro a’e i te arata’ira’a a te peresidenira’a o te ārea ’e te upo’o fa’atere o te ārea nō te mau ’ohipa i te pae tāhuti nei.

35.2.2

Te ti’a’au nō te mau fare a te ’Ēkalesia

Nā te ti’a’au nō te mau fare a te ’Ēkālesia tei tihepuhia e tauturu i te titi tāta’itahi ’ia fa’atere i te mau fare purera’a. E fa’anaho ’oia i te mau tātā’īra’a rarahi, te tamāra’a hōhonu ’e te ’atu’atura’a i matarohia.

’Ia hina’arohia, e tauturu te tia’au nō te mau fare i te ha’api’i atu i te mau ti’a ha’apa’o i te mau fare a te titi ’e a te pāroita, e nāhea ’ia tāmā i te fare ’e ’ia rave i te tahi mau ’ohipa ri’i. Nāna e hōro’a i te mau arata’ira’a, te mau mātēria ’e te mau tauiha’a.

E ’ohipa te ti’a’au nō te fare ’e te ti’a ha’apa’o i te mau fare a te titi nō te fa’atere i teie mau ’ohipa ’e te tā’āto’ara’a o te ’atu’atura’a o te mau fare purera’a. E nehenehe ato’a ’oia e hi’o fa’ahou i te mau ha’amāu’ara’a ’e te mau ’episekōpora’a.

35.2.3

Te Hitu ’Ahuru ārea

E ’ohipa piri roa atu te Hitu ’Ahuru ārea i fa’auehia ’e te mau peresideni titi i roto i te fa’anahora’a nō te ’ōpuara’a rahi (hi’o 35.3).

35.2.4

Peresidenira’a titi

E arata’i te peresidenira’a titi i te mau ’episekōpo i roto i te fa’a’ohipara’a, te atu’atura’a ’e te pārurura’a i te mau fare purera’a. E fa’aue rātou i te hō’ē melo nō te ’āpo’ora’a teitei ’ia riro ’ei ti’a ha’apa’o nō te titi (hi’o 35.2.5). E tau’aparau rātou ’e ’ōna nō te hi’o maite i te mau hina’aro ’e i te mau ’ōpuara’a e tū’ati.

Mai te mea e hina’aro te mau melo i te hō’ē vāhi rahi a’e nō te ha’amori, e hōro’a atu te peresidenira’a titi i te ha’amāramaramara’a i te Hitu ’Ahuru ārea. E ravehia te reira nā roto i te fa’anahora’a o te ’ōpuara’a rahi (hi’o 35.3).

35.2.5

Te ti’a ha’apa’o i te mau fare a te titi

E tauturu te ti’a ha’apa’o i te mau a te titi e turu i te peresidenira’a titi i roto i te fa’a’ohipara’a, te atu’atura’a ’e te pārurura’a i te mau fare purera’a, nā roto i :

• Te ha’api’ira’a i te mau ti’a’au ti’ahapa nō te pāroisa i tā rātou mau hōpoi’a (hi’o 35.2.9).

• Te ’ōperera’a i te mau tāviri i te feiā fa’atere o te ’āmuira’a.

• Te paraparaura’a i te ti’a’au nō te mau fare a te ’Ēkālesia nō ni’a i te ’atu’atura’a ’e i te mau hina’aro e fa’atupuhia o te mau fare.

35.2.6

Te mau tahu’a ihi anoa ha’a o te titi ’e o te pāroita

E tauturu te mau tahu’a ihi anoa ha’a o te titi ’e o te pāroita i te ha’amau ’e i te ’atu’atu i te ihi anoa ha’a i roto i te mau fare. ’Ia hina’arohia e ha’amau i te mau tauiha’a ’āpī, e fa’anaho rātou te reira ’e te ti’a’au o te mau fare. Nō te tahi atu ā ha’amāramaramara’a nō ni’a i teie mau pi’ira’a, hi’o 33.10 (hi’o ato’a mhtech.ChurchofJesusChrist.org).

35.2.7

Te ’episekōpora’a

E ha’api’i te ’episekōpora’a (’aore rā te ti’a ha’apa’o o te pāroita) i te mau melo e nāhea ’ia fa’a’ohipa, ’ia ’atu’atu ’e ’ia pāruru i te fare. E ’ōpere ato’a te ’episekōpora’a i te mau tāviri o te fare i te feiā fa’atere o te pāroita.

E ara rātou ’ia fa’atere-maita’i-hia te mau ’ātivite i roto i te fare ’e i roto i te ’āua, ma te pāruruhia (hi’o 20.7).

E paraparau rātou ’e te ti’a’au nō te mau fare a te ’Ēkālesia nō ni’a i te mau hina’aro nō te ’atu’atura’a ’e te fa’a’ohipara’a. E nehenehe ato’a rātou e hi’o fa’ahou i te mau ha’amāu’ara’a ’e te ti’a’au nō te mau fare a te ’Ēkālesia.

35.2.8

Te ’episekōpo ti’a’au

Mai te mea ’ua hau i te hō’ē pāroita e putuputu nei i roto hō’ē fare, e mā’iti te peresidenira’a titi i te hō’ē ’episekōpo ha’apa’o nō te fa’aau i te tuhara’a ’ohipa ’e te tahi atu mau ’episekōpo. I roto i teie mau tuhara’a ’ohipa, tē vai ra te tārenara’a, te tāmāra’a ’e te pārurura’a i te fare. E fa’a’ohu tāmau te peresidenira’a titi i teie hōpoi’a i rotopū i te mau ’episekōpo o te mau pāroita e putuputu nei i roto i te fare.

35.2.9

Te ti’a ha’apa’o fare o te pāroita

E fa’aoti te ’episekōpora’a e pi’i ānei i te hō’ē ti’a ha’apa’o fare o te pāroita. Mai te mea e fa’aoti rātou e fa’arahi i teie pi’ira’a, e nehenehe te ’episekōpora’a e pi’i i te hō’ē tāne ’aore rā i te hō’ē vahine ta’ata pa’ari melo. Mai te mea ’aita te hō’ē ti’a ha’apa’o nō te pāroita e pi’ihia, e nehenehe te ’episekōpo e hōro’a i teie hōpoi’a i te hō’ē o tōna nā tauturu, i te tauturu pāpa’i parau o te pāroita ’aore rā i te pāpa’i parau fa’atere.

E fa’anaho te ti’a ha’apa’o fare o te pāroita i te mau melo ’e i te feiā tāmoni-’ore nō te tāmā ’e nō te ’atu’atu i te fare. E ha’api’i ’oia ia rātou e nāhea ’ia rave i te ’ohipa tāta’itahi ma te mau mātēria ’e te mau tauiha’a e vai ra.

Mai te mea e hina’arohia, e fāri’i ’oia i te arata’ira’a nā roto mai i te ti’a ha’apa’o o te titi, nō ni’a i te fa’aterera’a i te mātēria fa’aro’o, te mātini ha’ave’ave’a ’e fa’ato’eto’e ’e te tahi atu mau mātini o te fare.

35.2.10

Te mau melo

I raro a’e i te arata’ira’a a te ’episekōpo, e fa’aitoito te feiā fa’atere o te feia pa’ari ’e te feiā ’āpī i te mau melo ’ia tauturu i te tāmāra’a ’e i te ’atu’atura’a i te fare. E fa’atano te ’episekōpora’a ’e te ti’a ha’apa’o o te pāroita i te mau ’ohipa ’ia au i te ’aravihi ’e te ’ite o te feiā e rave ra i te ’ohipa. E tauturu te ’atu’atura’a tāmau a te mau melo ’ia vai maoro atu ā te mau mātēria a te ’Ēkālesia.

35.3

Te fāna’ora’a i te mau fare purera’a

’Ua rau te ’ā’ano ’e te hāmani o te mau fare purera’a ’ia au i te mau hina’aro ’e te mau tupura’a o te fenua. E nehenehe e riro ’ei hō’ē vāhi patuhia ’aore rā hō’ē vāhi tei ho’ohia mai e te ’Ēkālesia, te fare o te hō’ē melo, te hō’ē fare ha’api’ira’a ’aore rā te hō’ē pū ’āmuira’a nā te ’oire, te hō’ē vāhi i tārahuhia ’aore rā te hō’ē atu vāhi tei ha’amanahia.

E tūtava te feiā fa’atere nō te ārea ’e nō te fenua iho i te fa’a’ohipa hope maita’i i te mau fare purera’a e vai ra ’e ’ia vai te pa’ari i roto i tā rātou tītaura’a i te tahi atu ā māhora. E pe’e rātou i « Te mau parau tumu ’e te mau arata’ira’a nō te fāna’ora’a i te mau fare purera’a » (Te mau arata’ira’a nō te fa’anahora’a rahi o te mau fare purera’a [2021]).

E fa’aineine te feiā fa’atere i te mau fa’anahora’a rahi matahiti ma te fa’a’ohipa i Te mau arata’ira’a nō te fa’anahora’a rahi o te mau fare purera’a (2021) nō te ha’apāpū ē, ’ua tano te māhora i ravehia nō te fare purera’a. E fa’a’ohipa ato’a te feiā fa’atere i te mau fa’anahora’a rahi nō te fāito i te mau hina’aro nō a muri a’e nō te tu’u mai i te hō’ē māhora ’āpī ’aore ra nō te fa’arahi atu i te fare purera’a, tōna aura’a te ho’ora’a mai ïa ’aore rā ’ia fa’ati’ahia te tahi atu ā mau fa’a’ohipara’a nō te mau fare purera’a ’e te fenua i fatuhia.

Hi’o « Te fāna’ora’a i te mau fare purera’a ’e te tahi atu mau vāhi ha’amorira’a » (Te fāna’ora’a i te mau fare purera’a ’e te tahi atu mau vāhi ha’amorira’a) nō te tahi atu mau ha’amāramaramara’a.

35.3.1

Te mau ’ōro’a tāpūra’a repo ’e te ha’amo’ara’a i te mau fare

E fa’atupuhia te ’ōro’a tāpūra’a repo hou te patura’a. ’Ia oti te reira i te ravehia, e ha’amo’a-’oi’oi-hia te mau fare ’āpī ’e te tahi atu mau fa’arahira’a. E ha’amo’a-ato’a-hia te mau vāhi i ’aitārahuhia.

Hi’o i te mau tuha’a « Te mau ’ōro’a tāpūra’a repo » ’e « Te ha’amo’ara’a i te mau fare » i roto i « Te fāna’ora’a i te mau fare purera’a ’e te tahi atu mau vāhi ha’amorira’a » (Te fāna’ora’a i te mau fare purera’a ’e te tahi atu mau vāhi ha’amorira’a) nō te tahi atu ā ha’amāramaramara’a.

35.4

Te ’atu’atura’a i te mau fare purera’a

35.4.1

Te tāmāra’a ’e te ’atu’atura’a i te mau fare purera’a

E hōpoi’a nā te feiā fa’atere o te fenua ’e nā te mau melo, tei roto ato’a te feiā ’āpī, ’ia tāpe’a mā noa i te fare tāta’itahi ’e i roto i te hō’ē fāito maita’i. E tauturu te reira :

• ’Ia fa’aherehere i te nāturara’a mo’a o te fare ’ei vāhi i reira te Vārua e pārahi ai.

• ’Ia fa’aitoito i te fa’aturara’a.

• ’Ia fa’a’ite i te hō’ē hōho’a nō te ti’a mā ’e te tura.

• ’Ia roa atu ā te pu’e mahana o te fare e ti’a ai.

’Eiaha te tārena tāmāra’a ’ia riro ’ei ’ohipa teimaha nō te mau melo. ’Ei hi’ora’a, mai te mea e mea fifi te tere i te fare purera’a, e nehenehe te mau melo e tāmā ’ia oti te mau ’ohipara’a o te hepetoma, mai te mea tei reira a’e na rātou.

Hi’o « ’Atu’atura’a i te mau fare purera’a » (Te fāna’ora’a i te mau fare purera’a ’e te tahi atu mau vāhi ha’amorira’a) nō te tahi atu ā mau ha’amāramaramara’a.

35.4.2

Anira’a i te mau tātā’ira’a

E nehenehe te mau melo o te ’āpo’ora’a pāroita ’e o te titi e fa’aho’i i te parau nō ni’a i te tītaura’a ’ia tātā’i i te mau ti’ahapa. E nehenehe e ravehia ma te fa’a’ohipa i te mauiha’a Parau fa’a’ite nō te mau fifi o te fare (FIR). E fa’ati’a te FIR i te feiā fa’atere ’ia hāpono, ’ia hi’opo’a i te nu’ura’a ’e ’ia hōro’a i te parau fa’a’ite nō ni’a i te mau tātā’ira’a ’e te tahi atu mau tītaura’a. E nehenehe ato’a te mau melo o te ’āpo’ora’a e fārerei i te ti’a’au o te mau fare nō te ani i te tauturu.

E roa’a ato’a te FIR ’ei fa’aaura’a rorouira i roto te Google Play ’e te Apple App Store. E roa’a te mau arata’ira’a nō te fa’a’ohipa i te FIR i roto te Pū Tauturu i ni’a te ChurchofJesusChrist.org.

35.4.3

Hi’opo’ara’a i te fare purera’a

E hi’opo’ahia te mau fare tāta’itahi i te mau matahiti ato’a e te ti’a’au o te mau fare. Te fā ’o te fa’ata’ara’a ïa i te mau hina’aro nō te patura’a tau roa ’e te mau tāta’ira’a. I muri iho, e ’āparau te ti’a’au o te mau fare i te mau hope’ara’a o te hi’opo’ara’a ’e te mau ’ohipa e hina’arohia nā muri i te ta’ata ha’apa’o o te titi ’aore rā te ti’a o te ’episekōpo

35.4.4

Te fa’ahereherera’a i te pape ’e te ito

Tē tūtava nei te ’Ēkālesia i te fa’aherehere i te pape, te ito, ’e te tahi atu mau maita’i. E fa’aitoito te feiā fa’atere i te mau melo ’ia fa’anava’i i te uira ’e te pape o te fare. ’Ei hi’ora’a, ’ia haere ana’e te mau melo i rāpae i te hō’ē piha, e tūpohe rātou i te mōrī, e tāmau i te mau rōpīnē, ’e tūpohe i te mau mātēria ha’ave’ave’ara’a ’e fa’ato’eto’era’a i fa’a’ohipahia i te taime putuputura’a ’e te ’ātivite. E fa’a’ite te mau melo i tō rātou feiā fa’atere i te mau mea ato’a e riro ’ei ha’amau’ara’a.

E nehenehe ato’a te mau melo e pāturu i te mau ’ōpuara’a nō te fa’aherehere i te ito ’e te pape tei turuhia e te ’oire. E fa’aiti mai teie mau tauto’ora’a i te aufaura’a i te ha’amāu’ara’a.

E nehenehe te feiā fa’atere ’e te mau melo e fārerei atu i te ti’a’au o te mau fare nō te tahi atu mau ha’amāramaramara’a nō ni’a i te fa’a’ohipara’a ’e te fa’ahereherera’a i te pape ’e te ito.

35.4.5

Te pārurura’a te fifi tīa’i-’ore-hia ’e te pārurura’a i mua te ’ohipa ’ino

E ti’a i te feiā fa’atere ’e i te mau melo :

• ’Ia vaiiho āteatea noa te mau ārea haerera’a, te mau ’ē’a, te mau haerera’a i rāpae ’e te mau piha vaira’a tauiha’a nō te pāruru i te mau tomora’a ’e te mau haerera’a i rāpae.

• ’Eiaha e fa’a’ohipa ’aore rā e ha’aputu i te mau mātēria ataata ’aore rā e ’ama haere noa i roto i te mau fare (hi’o ato’a 35.5.14).

• E ha’amau ’e ’ia ha’apa’o i te mau ravera’a nō te pōnaora’a i te mau fare.

• ’Ia pāruru i te mau tauiha’a a te ’Ēkālesia i te ’eiāra’a.

• ’Ia ’ite e nāhea ’ia tūpohe ’e ’ia tāmau i te mau vāhi ’ōperera’a i roto i te fare mai te pape, te uira ’e te māhu ’aore rā te mori ’ārahu.

Mai te mea e hina’arohia, e hōro’a te ti’a’au o te mau fare i te hō’ē puta fenua e fa’a’ite ra i te mau vāhi tūpohera’a auahi, te mau pūtē nō te mau tauturu mātāmua, ’e te mau vāhi nō te tāmau i te mau ’ōperera’a. Tē vai nei te tahi atu ā ha’amāramaramara’a nō ni’a i te pārurura’a i roto i te tuha’a « Te mau ravera’a nō te pārurura’a ’e te pōnaora’a » i roto « Te ’atu’atura’a i te mau fare purera’a » (Te fāna’ora’a i te mau fare purera’a ’e te tahi atu mau vāhi ha’amorira’a »). Hi’o ato’a 20.7.

35.5

Te mau fa’aturera’a nō ni’a i te fa’a’ohipara’a i te mau vāhi e fatuhia a te ’Ēkālesia

E fatu te ’Ēkālesia, e tārahu ’aore rā e fa’ati’a i te mau fare ato’a ’e te mau tauiha’a ’ia fa’a’ohipahia te reira e te mau pāroita o te fenua. E fa’a’ohipahia te mau fare ’e te mau tauiha’a a te ’Ēkālesia nō te ha’amori i te Atua, nō te ha’api’i i te ’evanelia, ’e nō te tahi atu mau ’ātivite a te ’Ēkālesia.

Tei roto i teie tuha’a te mau fa’aturera’a nō ni’a i te fa’a’ohipara’a i te mau vāhi e fatuhia a te ’Ēkālesia. E roa’a te mau ha’amaramaramara’a hau atu i ni’a « Te tahi atu ā ha’amāramaramara’a nō ni’a i te mau fare purera’a » (Fāna’ora’a i te mau fare purera’a ’e te tahi atu mau vāhi ha’amorira’a). Tei roto i teie mātēria te ha’amāramaramara’a nō ni’a i te tauiha’a, te mau ha’amau’ara’a, te fa’a’ohipara’a i te mau vāhi e fatuhia vata a te ’Ēkālesia ’e te tahi atu mau tumu parau.

35.5.1

Te anoihi

’Ia ’itehia i ni’a i te mau fare purera’a te huru fa’aturara’a nō Iesu Mesia ’e ’ia fa’a’ite pāpū i te ti’aturira’a o te mau melo iāna. ’Ia tu’uhia te mau hōho’a anoihi nō Iesu Mesia i roto i te mau vāhi tomora’a o te fare purera’a nō te fa’a’ite i teie ti’aturira’a rahi. ’Eiaha te mau vāhi tomora’a o te fare purera’a ’ia riro ’ei vāhi tūrorira’a mana’o mai te ’āfata fa’a’ite’itera’a tauiha’a, te mau piara’a parau, te mau ’aira’amā’a ’e te mau turu vaira’a hōho’a. E tano tē hōho’a anoihi nō Iesu Mesia, te mau ’ā’amu o te pāpa’ira’a mo’a ’e te ’ā’amu nō te ’Ēkālesia, nō te mau ārea haerera’a ’e te mau piha ha’api’ira’a.

E mā’iti te peresideni titi ’aore rā te tahi atu feiā fa’atere nō te fenua i fa’ata’ahia, i te mau hōho’a anoihi i roto i te hō’ē buka hōho’a anoihi tei fa’ati’ahia e te ’Ēkālesia nō te mau fare purera’a. E nehenehe te ti’a’au o te mau fare e fa’a’ite i te buka hōho’a anoihi i te feiā fa’atere, ’ia hina’aro-ana’e-hia te hōho’a ’āpī. ’Aita te mau hōho’a anoihi nō te tahi atu buka e fa’ati’a-noa-hia. E ti’a i te mau anira’a o te tāhapera’a ’ia ravehia nā roto i te ti’a’au o te mau fare.

’Eiaha te hōho’a anoiho ’ia tu’uhia i roto i te fare purera’a ’aore rā i pīha’i iho i te vāhi bāpetizora’a. ’Aita te mau ti’i, te mau ’ōfa’i, te mau papa’i ha’amāna’ora’a ’e te mau hōho’a peni ’e te mau hōho’a tāpiripiri e fa’ati’ahia i roto ’aore rā i rāpae i te fare. ’Aita teie fa’aturera’a e fa’a’ohipahia nō te mau ’ohipa anoihi i fa’a’ite’itehia e rave rahi matahiti i teienei.

35.5.2

Te fa’a’ohipara’a i te fare ’o tei ’ore i fa’ati’ahia

35.5.2.1

Te fa’a’ohipara’a nō te tapiho’ora’a

E’ita te mau vāhia e fatuhia a te ’Ēkālesia e fa’a’ohipahia nō te mau ’ōpuara’a o te tapiho’ora’a. ’Ei hi’ora’a, ’eiaha ’ia fa’a’ohipahia nō te pāturu i te huru ’ohipa ’imira’a moni ato’a (hi’o 38.8.5). ’Aita te reira huru fa’a’ohipara’a e tū’ati i te mau fā o te mau vāhi e fatuhia a te ’Ēkālesia. E riro ato’a te reira i te ha’afifi i te mau ture o te fenua ’aore rā a te hau fenua, ’o tei fa’a’ore i te tute i ni’a i te mau vāhi e fatuhia a te ’Ēkālesia (hi’o 34.8.1).

Teie i muri nei te mau hi’ora’a nō te mau fa’a’ohipara’a tapiho’ora’a ’o tē ’ore e fa’ati’ahia :

• Te fa’a’aimamaura’a ’aore rā te turura’a i te mau ’ohipa ’imira’a moni ’aore rā fa’a’ohipara’a faufa’a.

• Tē ho’ora’a mai, tē ho’ora’a atu, ’aore rā, te fa’atīanira’a i te mau tao’a, te mau ’ohipa, te mau piara’a, ’aore rā te mau ’ohipa anoihi.

• Te fa’atupura’a i te mau ’ātivite aufaura’a moni ’aita i fa’ati’ahia (hi’o 20.6.5.)

• Te fāri’ira’a i te feiā a’o ’aore rā i te mau ’orometua e tihepu nei i te mau ta’ata, te mau hoani, ’aore rā ’o tei ’aufauhia ’a hōro’a ai rātou i te ha’api’ipi’ira’a, te mau ha’api’ira’a (tāhapehia te ha’api’ira’a unuma nō te ha’uti i te piāna ’aore rā i te hāmonia ; hi’o 19.7.2), te mau piha ha’api’ira’a ’e te tahi atu mau ’ātivite.

35.5.2.2

Te mau ’ōpuara’a politita

’Eiaha te mau vāhi e fatuhia a te ’Ēkālesia ’ia fa’a’ohipahia nō te mau ’ōpuara’a politita. Mai te fa’atupura’a i te mau rurura’a ’aore rā i te mau paraparaura’a politita. ’Aita tā te ’Ēkālesia e pupu politita (hi’o 38.8.29).

35.5.2.3

Te tahi atu mau fa’a’ohipara’a

Te tahi atu mau fa’a’ohipara’a i te mau vāhi e fatuhia a te ’Ēkālesia tei ’ore e fa’ati’ahia ’oia ho’i :

• Te fa’atupura’a i te mau ’ohipa tū’aro i fa’anahia ’aore rā te tahi atu mau ’ohipara’a tē ’ore e turuhia e te ’Ēkālesia. E riro ’ei tāhapera’a te mau pupu hīmene a te ’oire ’e te mau fa’aipoipora’a tīvira (hi’o 19.7.3 nō ni’a i te mau pupu hīmene ’e te 38.3.4 nō ni’a i te fa’aipoipora’a tīvira).

• Te fa’ati’ara’a ’ia pūhapa i te pō (tāhapehia nō te mau ’ohipa rū ; hi’o 35.5.4).

• Te pūhapara’a ’aore rā te tahi atu mau ’ātivite e ta’oto i reira nō te hō’ē pō.

’Aita te mau fa’a’ohipara’a i muri nei e fa’ati’a-mau-hia. E fārerei te feiā fa’atere o te fenua i te ti’a’au o te mau fare, mai te mea tē mana’o nei rātou ē, e mea faufa’a ’ia fa’ati’ahia te tāhapera’a.

• Te tārahura’a ’aore rā te ’aitārahura’a i te mau fare ’e te mau vāhi e fatuhia a te ’Ēkālesia

• Te fa’a’ohipara’a i te mau vāhi e fatuhia ’ei vahi tāpa’ora’a i’oa nō te feiā mā’iti politita ’aore rā ’ei mau piha mā’itira’a, e nehenehe te hō’ē tāhapera’a e hōro’ahia nā ni’a i te anira’a a te mau ti’a o te hau fenua mai te mea ’aita atu e rāve’a au maita’i, ’e e’ita te reira ’ohipa e fa’a’ino i te hōho’a ’aore rā i te ti’ara’a politita pae ’ore o te ’Ēkālesia (hi’o 35.5.8)

35.5.3

Te mau fa’a’una’una

E nehenehe e tu’u i te mau fa’anehenehera’a nō te mau ’ātivite o te fa’aeara’a ha’api’ira’a, te mau ’ōro’a fa’aipoipora’a ’e te tahi atu mau ’ohipara’a mai te reira te huru, nō te hō’ē tau poto noa i roto ’aore rā i rāpae i te fare. E’ita te tahi atu mau fa’anehenehera’a ta’a ’ē atu i te mau tiare e tu’uhia i roto i te fare purera’a i te taime nō te purera’a ’ōro’a mo’a. E’ita e tītauhia te mau fa’anehenehera’a i te vāhi tomora’a o te fare purera’a nō te tāpe’a i te rōtahi i ni’a i te fa’atura nō te Fa’aora.

’Ei mau fa’anehenehera’a ha’iha’i ’e te māmā e ti’a ai. ’Eiaha ’ia riro ’ei tumu e ’ama ai te auahi. ’Ia ha’apa’o-noa-hia te mau fa’aturera’a ’e te mau fa’auera’a o te fenua nō te tinai i te auahi ’e te pārurura’a.

35.5.4

Te mau ’ati rū

I te taime ’ati rū, e fa’aoti te peresideni titi e fa’atupu ānei i te mau rurura’a a te pāroita ’e a te titi. E nehenehe ato’a ’oia e fa’ati’a ’ia fa’a’ohipahia te mau fare ’e te mau faufa’a a te ’Ēkālesia, e te mau aupupu tauturu i roto i te ’ati rahi ’e nō te mau tauto’ora’a e ’āmui mai (hi’o 35.5.8). E ’ohipa ’oia i pīha’i iho i te ti’a’au o te mau fare a te ’Ēkālesia ’aore rā i te tahi atu mau ti’a o te ’Ēkālesia, ’o tē turu ato’a i te fa’aaura’a ’e te peresidenira’a ārea, mai te mea e hina’arohia (hi’o 22.9.1.3).

35.5.5

Te mau pūpuhi ’e te mau mauiha’a tama’i

’Aita e fa’ati’ahia te mau pūpuhi ’e te mau mauiha’a ha’apohe ta’ata i ni’a i te vāhi e fatuhia e te ’Ēkālesia. E tae noa atu i te mau mauiha’a tama’i huna. ’Aita teie fa’aturera’a nō te mau ’ōfitiē e pāruru nei i te ture.

35.5.6

Te mau reva

E nehenehe te reva ’ai’a ’e te reva o te hau e tāhiri i ni’a i te vāhi e fatuhia e te ’Ēkālesia mai te mea e ha’apa’ohia te mau arata’ira’a o te fenua. E nehenehe te reva ’ia tu’uhia i roto i te mau fare a te ’Ēkālesia ’ia tupu ana’e te mau ’ohipara’a ta’a ’ē. ’Aita te here ’ai’a e tītau nei ’ia tu’u-tāmau-noa-hia te reva ’ai’a ’e te reva o te hau i te mau vāhi ha’amorira’a.

35.5.7

Te fa’ahereherera’a i te faufa’a tupuna

Nō te mau ha’amāramaramara’a nō ni’a i te fa’ahereherera’a i te mau vāhi e fatuhi ’aore rā i te mau fare a te ’Ēkālesia, hi’o « Fa’ahereherera’a i te faufa’a tupuna » (Te fāna’ora’a i te mau fare purera’a ’e te tahi atu mau vāhi ha’amorira’a). Nō te ha’amāramaramara’a nō ni’a i te fa’ahereherera’a i te mau hōho’a, te mau ’ohipa anoihi ’aore rā te mau pu’e parau, hi’o 33.7.2.

35.5.8

Te fa’a’ohipara’a tāmoni ’ore i te mau fatura’a a te ’Ēkālesia

I te anira’a a te peresideni titi, e nehenehe te ti’a’au o te mau fare e fa’ati’a ’ia fa’a’ohipahia te fare e te mau tā’atira’a o te ’āmuira’a ’oire ma te tāmoni ’ore, mai te mea e hina’arohia. E nā reira te ti’a’au o te mau fare ma te tu’urima i te parau fa’ati’a nō te fa’a’ohipara’a nō te taime poto (e vai nei i te piha tōro’a rētioni). E tītau-ato’a-hia te hō’ē parau fa’a’ite nō te pārurura’a, ’ia au i te mau fa’aturera’a o te fenua.

’Ia pe’ehia te mau arata’ira’a nō te fa’a’ohipara’a nō te taime poto i te vāhi e fatuhia e te ’Ēkālesia :

• E ti’a ato’a ’ia tae mai te hō’ē ti’a fa’atere o te fenua.

• E mana tō te feiā fa’atere o te ’Ēkālesia e ani i te hō’ē pupu ’ia fa’aea i te fa’a’ohipa i vāhi e fatuhia e te ’Ēkālesia, i te mau huru taime ato’a ’e nō te mau huru tumu ato’a.

• ’Ia tano te fa’a’ohipara’a i te mau fā o te fare ’e i te fana’ora’a o te fa’a’orera’a tute e mauhia nei e te ’Ēkālesia, mai te mea e nehenehe.

• ’Eiaha te fa’a’ohipara’a ’ia tito i te mau ’ātivite a te ’Ēkālesia i tārenahia.

• ’Ia fa’atura-noa-hia te mau fa’aturera’a a te ’Ēkālesia i ni’a i te vāhi i fatuhia.

• ’Eiaha te fa’a’ohipara’a i te mau rāve’a a te ’Ēkālesia ’ia ha’apēpē i te ta’ata e haere mai ’aore rā ’ia fa’a’ino i te mau fatura’a.

• ’Eiaha te fa’a’ohipara’a ’ia fa’arirohia ’ei hōpoi’a nā te ’Ēkālesia ’aore rā ’ia ha’ape’ape’a i te feiā e fa’aea ra nā pīha’i iho mai.

’Eiaha te tāpa’ora’a nō te mau pūhapa fa’a’oa’oara’a a te ’Ēkālesia i roto i te mau vāhi e fatuhia ’ia ’ia ravehia nā ni’a i te i’oa o te mau fa’anahonahora’a nā te ’oire, te mau taiete tapiho’ora’a ’e o te ta’ata nō te tahi atu mau ha’apa’ora’a fa’aro’o. Terā rā, e anihia i te mau melo o te ’Ēkālesia ’ia ani manihini atu i tō rātou mau hoa nō te tahi atu mau ha’apa’ora’a fa’aro’o ’ia fa’aō ato’a mai ia rātou.

35.5.9

Te vāhi tāpe’ara’a pere’o’o

E ti’a ’ia fa’a’ohipahia i te mau vāhi tāpe’ara’a pereo’o a te ’Ēkālesia ’ia au i te mau arata’ira’a i roto te 35.5.8. Hau atu, ’eiaha te vāhi tāpe’ara’a pere’o’o ’ia fa’a’ohipahia ’ei vāhi tāpe’ara’a nō te mau pere’o’o utara’a ta’ata, ’aore rā nō te tahi atu mau pupu, ’aore rā nō te tahi mau ta’ata ma te parau fa’ati’a ’ore a te ti’a fa’atere ārea nō te mau ’ohipa tāhuti nei. E nehenehe te feiā fa’atere e fārerei atu i te ti’a’au o te mau fare ma te mau anira’a. ’Eiaha te mau pere’o’o o te ta’ata ’e te tahi atu mau mauiha’a ’ia ha’aputuhia i ni’a i te vāhi e fatuhia e te ’Ēkālesia.

Nō te tahi atu ā mau ha’amāramaramara’a nō ni’a i te vāhi tāpe’ara’a pere’o’o ’e te tahi atu mau vāhi e nehenehe e tāpe’a i te pere’o’o, hi’o « Te mau vāhi tāpe’ara’a pereo’o o te mau fare purera’a » (Te fāna’ora’a i te mau fare purera’a ’e te tahi atu mau vāhi ha’amorira’a).

35.5.10

Te mau hōho’a ’e te mau haruharura’a video i te taime o te purera’a ’ōro’a

E mea mo’a te mau purera’a ’ōro’a. Nō te reira tumu, e ’ōpanihia e pata i te hōho’a ’aore rā ’ia haruharu i te mau purera’a ōro’a.

Nō te mau ha’amāramaramara’a nō ni’a i te ha’apurorora’a ’aore rā te ha’apurorora’a tāmau o te purera’a ’ōro’a ’e te tahi atu mau rurura’a, hi’o 29.7.

35.5.11

Te fatura’a i te mau vāhi fa’a’oa’oara’a

Nō te mau ha’amāramaramara’a hau atu nō ni’a i te fa’aterera’a i te mau pūhapa fa’a’oa’oara’a ’aore rā te hō’e fenua, hi’o « Te mau pūhapa fa’a’oa’oara’a » (Te fāna’ora’a i te mau fare purera’a ’e i te tahi atu mau vāhi ha’amorira’a). Nō te tāpa’o i te hō’ē pūhapa fa’a’oa’oara’a ’aore rā i te hō’ē vāhi fenua, hi’o camping.ChurchofJesusChrist.org.

35.5.12

Te mau vāhi ravera’a mā’a

E nehenehe te mau mā’a ’e i te mau ’amu’amura’a e ’ōperehia i te fare purera’a. Terā rā, ’eiaha te mā’a ’ia fa’aineinehia ’aore rā ’ia tunuhia i roto i te mau piha tūtu ’e te mau vāhi ’ōperera’a. ’Ia fa’aineinehia rā te mā’a i te tahi atu vāhi ’e ’a ’āfa’i mai ai i te fare purera’a. E nehenehe e fa’a’ohipa i te piha tūtu ’e te mau vāhi ’ōperera’a nō te tāpe’a i te māhanahana ’aore rā i te to’eto’e. E fa’aiti mai teie mau arata’ira’a i te fifi o te auahi ’e e tauturu ’ia ha’apa’o i te mau arata’i nō te ravera’a i te mā’a. Nō te mau ha’amāramaramara’a hau atu ā, hi’o ChurchofJesusChrist.org.

Te fa’a’ite’itera’a nō te fa’aineinera’a i te mā’a ’o te reira ana’e te tāhapera’a o te arata’ira’a, nō ni’a i te fa’aineinera’a ’e te tunura’a i te mā’a i roto i te piha tūtu ’e i te mau vāhi ’ōperera’a o te fare purera’a.

35.5.13

Te mau tāpa’o fare

Mai te mea e mau uira’a tā te hō’ē peresideni titi nō ni’a i te mau tāpa’o o te mau fare a te ’Ēkālesia, e fārerei atu ’oia i te ti’a’au o te mau fare.

35.5.14

Te ha’aputura’a tauiha’a

Te mau mauiha’a ana’e nō te ’atu’atura’a ’e te mau tauiha’a tei fa’ati’ahia, te nehenehe e ha’aputu i roto i te mau fare. E nehenehe ato’a te mau tauiha’a nō te ea e ha’aputuhia i roto i te mau fare purera’a, nō te mau taime rū (hi’o 35.5.4). E nehenehe te feiā fa’atere e fārerei atu i te ti’a’au o te mau fare a te ’Ēkālesia nō te mau uira’a.

35.5.15

Te mau fa’aipoipora’a ’e te mau tāmā’ara’a

E nehenehe te fa’aipoipora’a ’aore rā te tāmā’ara’a e fa’atupuhia i roto i te hō’ē fare purera’a i roto i te mau huru i muri nei :

• E ti’a ’ia ha’apa’ohia te reira i ni’a i te mau fa’aturera’a a te ’Ēkālesia (hi’o 20.2.3).

• ’Eiaha te reira ’ia ha’afifi i te tārena o te mau rurura’a a te ’Ēkālesia.

• ’Eiaha te tāmā’ara’a ’ia fa’atupuhia i roto i te piha e fa’atupuhia te purera’a, maori rā e vāhi i fa’ata’ahia nō te mau ’ohipara’a rau.

• E’ita te mau fa’aipoipora’a ’e te mau tāmā’ara’a e fa’atupuhia i te mahana sābati ’e ’aore rā i te pō monirē.

• E ti’a i te mau ta’ata ha’apa’o i te fa’aipoipora’a ’aore rā i te tāmā’ara’a ’ia tāma i te mau vāhi tā rātou i fa’a’ohipa.

Nō te tahi atu ā ha’amāramaramara’a, hi’o 38.3.4.

E’ita te mau fare purera’a ’e te mau vāhi i fatuhia e te ’Ēkalesia ’ia fa’a’ohipahia nō te hō’ē noa atu fā e tu’ati atu i te fa’aipoipora’a tāneatāne, vahine rau, e ’ōpanihia e te ture, ’aore rā te tahi atu mau fa’aipoipora’a ’aita e tano i ni’a i te ha’api’ira’a tumu ’aore rā i te ture a te ’Ēkālesia.