“3. Dagiti Pagbatayan iti Priesthood,” Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw (2020).
“3. Dagiti Pagbatayan iti Priesthood,” Sapasap a Handbook.
3.
Dagiti Pagbatayan iti Priesthood
3.0
Pakauna
Ti priesthood isu ti turay ken bileg ti Dios. Kanayon nga adda daytoy ken agtultuloyto nga adda daytoy nga awanan iti panungpalan (kitaen iti Alma 13:7–8; Doktrina ken Katulagan 84:17–18). Babaen ti priesthood, ipatungpal ti Nailangitan nga Ama ti aramidna a “mangipatungpal iti saan nga ipapatay ken agnanayon a biag ti tao” (Moises 1:39). Mangted ti Dios iti turay ken bileg kadagiti annakna a lallaki ken babbai iti daga tapno makatulong a mangipatungpal iti daytoy nga aramid (kitaen iti kapitulo 1).
3.1
Pannakaisubli ti Priesthood
Ti Simbaan ni Jesucristo dagiti Santo iti Ud-udina nga Aldaw ti kakaisuna nga organisasion iti daga nga addaan iti turay ti priesthood. Inawat ni Propeta Joseph Smith ti Aaronic Priesthood ken dagiti tulbekna manipud ken ni Juan Bautista (kitaen iti Doktrina ken Katulagan 13:1). Inawatna ti Melchizedek Priesthood ken dagiti tulbekna manipud kada Apostol Pedro, Santiago, ken Juan (kitaen iti Doktrina ken Katulagan 27:12–13).
Iti Templo ti Kirtland, nagparang da Moises, Elias, ken Elijah ken ni Joseph Smith ket inkumitda kenkuana ti ad-adu pay a turay a kasapulan a mangipatungpal iti aramid ti Dios iti ud-udina nga aldaw (kitaen iti Doktrina ken Katulagan 110:11–16).
-
Inkumit ni Moises dagiti tulbek ti panaguummong ti Israel (kitaen iti Pangiwanwan iti Nasantuan a Kasuratan, “Israel”).
-
Inkumit ni Elias ti dispensasion ti ebanghelio ni Abraham. Iraman daytoy ti pannakaisubli ti katulagan ni Abraham (kitaen iti Abraham 2:9–11; Pangiwanwan iti Nasantuan a Kasuratan, “Katulagan ni Abraham”).
-
Inkumit ni Elijah dagiti tulbek ti bileg a pangilantip (kitaen iti Pangiwanwan iti Nasantuan a Kasuratan, “Ilantip, Panaglantip”). Mangipaay dagitoy a tulbek ti turay a mangpalugod kadagiti ordinansa a maannong iti daga tapno maibegkes iti sumaruno a biag (kitaen iti Doktrina ken Katulagan 128:9–10).
Iggem ti tunggal miembro ti Umuna a Panguluen ken Korum dagiti Sangapulo-ket-dua nga Apostol amin dagitoy a tulbek ti priesthood iti agdama. Ti laeng Presidente ti Simbaan, nga isu ti senior nga Apostol, ti napusgan a mangaramat iti amin kadagitoy a tulbek. Awagan ken pusgan dagitoy a lider ti dadduma pay a miembro ti Simbaan tapno mangusar iti turay ken bileg ti priesthood a tumulong iti aramid ti pannakaisalakan ken pannakaitan-ok.
Para iti impormasion maipapan kadagiti tulbek ti priesthood, kitaen iti 3.4.1.
3.2
Dagiti Bendision ti Priesthood
Babaen dagiti katulagan ken ordinansa ti priesthood, inaramid ti Dios a sidadaan a magun-od dagiti naindaklan a bendision iti amin nga annakna. Iraman dagitoy a bendision:
-
Ti panagbuniag ken kinamiembro iti Ti Simbaan ni Jesucristo dagiti Santo iti Ud-udina nga Aldaw.
-
Ti sagut ti Espiritu Santo.
-
Ti pannakiranud iti sakramento.
-
Ti turay ken bileg nga agserbi kadagiti takem ken naidutok nga aramiden iti Simbaan.
-
Panangawat kadagiti bendision ti patriarka ken dadduma pay a bendision ti priesthood iti pannakapaimbag, pannakaliwliwa, ken pannarabay.
-
Pannaka-endow iti bileg ti Dios iti templo.
-
Pannakailantip iti maysa kadagiti miembro ti pamilia para iti kinaagnanayon.
-
Ti kari ti agnanayon a biag.
Maawat dagiti annak ti Dios dagitoy a bendision ti priesthood ken mapadasanda ti naindaklan a rag-o bayat ti panagbiagda iti ebanghelio ni Jesucristo.
3.3
Melchizedek Priesthood ken Aaronic Priesthood
Iti Simbaan, adda dua a paset ti priesthood: ti Melchizedek Priesthood ken ti Aaronic Priesthood (kitaen iti Doktrina ken Katulagan 107:1).
3.3.1
Melchizedek Priesthood
Ti Melchizedek Priesthood isu “ti Nasantuan a Priesthood, babaen ti Urnos ti Anak ti Dios” (Doktrina ken Katulagan 107:3). Daytoy ti bileg a pakapagbalinan dagiti annak a lallaki ken annak a babbai ti Dios a kas Kenkuana (kitaen iti Doktrina ken Katulagan 84:19–21; 132:19–20).
“Iggem ti Melchizedek Priesthood ti karbengan ti panguluen.” Addaan daytoy iti “bileg ken panangituray kadagiti amin a pagakeman iti simbaan iti amin a tawen iti lubong, a mangannong kadagiti naespirituan a banag” (Doktrina ken Katulagan 107: 8). Babaen daytoy a turay, iturong ken imatonan dagiti lider ti Simbaan iti amin a naespirituan nga aramid ti Simbaan (kitaen iti Doktrina ken Katulagan 107:18). “Nayon iti daytoy a priesthood dagiti amin a dadduma pay a pagturayan wenno pagakeman [offices] iti simbaan” (Doktrina ken Katulagan 107:5).
Ti Presidente ti Simbaan isu ti mangimatmaton a high priest iti Melchizedek Priesthood (kitaen iti Doktrina ken Katulagan 107:65–67). Ti stake president isu ti mangimatmaton a high priest iti stake (kitaen iti Doktrina ken Katulagan 107:8, 10; kitaen met iti kapitulo 5 iti daytoy a handbook). Ti bishop isu ti mangimatmaton a high priest iti ward (kitaen iti Doktrina ken Katulagan 107:17; kitaen met iti kapitulo 7 iti daytoy a handbook).
Para iti impormasion maipapan kadagiti pagakeman [offices] ken pagrebbengan ti Melchizedek Priesthood, kitaen iti 8.1.
3.3.2
Aaronic Priesthood
Ti Aaronic Priesthood ket “mainayon iti … Melchizedek Priesthood” (Doktrina ken Katulagan 107:14). Iramanna dagiti tulbek:
-
Ti panagserserbi dagiti anghel.
-
Ti ebanghelio ti panagbabawi.
-
Ti panangannong kadagiti nababbaba nga ordinansa, agraman iti panagbuniag para iti pannakaugas ti basbasol.
(Kitaen iti Doktrina ken Katulagan 13:1; 84:26–27; 107:20.)
Ti bishop isu ti presidente ti Aaronic Priesthood iti ward (kitaen iti Doktrina ken Katulagan 107:15).
Para iti impormasion maipapan kadagiti pagakeman [offices] ken pagrebbengan ti Aaronic Priesthood, kitaen iti 10.1.3.
3.4
Turay ti Priesthood
Ti turay ti priesthood isu ti panangted iti turay a mangibagi iti Dios ken agtignay iti naganna. Iti Simbaan, maaramat ti amin a turay ti priesthood babaen ti panangiturong dagiti agiggem kadagiti tulbek ti priesthood.
Umawat dagiti maikari a lallaki a miembro ti Simbaan iti turay ti priesthood babaen ti panangi-confer iti priesthood ken pannakaordenda kadagiti pagakeman [offices] ti priesthood. Maaramat ti amin a miembro ti Simbaan ti naipakumit a turay no ma-set apart wenno madutokanda a tumulong iti panangipatungpal iti aramid ti Dios. Dagiti miembro ti agsungbat iti Dios ken kadagiti tinudinganna a mangidaulo no kasano nga aramatenda ti turayna (kitaen iti 3.4.4).
3.4.1
Dagiti Tulbek ti Priesthood
Dagiti tulbek ti priesthood isu ti turay a mangiturong iti pannakausar ti priesthood a maipaay kadagiti annak ti Dios. Ti panangusar iti amin a turay ti priesthood iti Simbaan ket iturong dagiti agiggem kadagiti tulbek ti priesthood (kitaen iti Doktrina ken Katulagan 65:2).
3.4.1.1
Dagiti Agiggem kadagiti Tulbek ti Priesthood
Iggem ni Jesucristo ti amin a tulbek ti priesthood. Babaen ti panangiturongna, maited dagiti tulbek ti priesthood kadagiti lallaki a mangusar kadagiti naipangpangruna a takem [calling] para iti panangipatungpal iti aramid ti Dios, a kas nailawlawag iti baba.
Intalek ti Apo iti tunggal maysa kadagiti Apostolna dagiti amin a tulbek a mainaig iti pagarian ti Dios iti daga. Dagiti senior a sibibiag nga Apostol, ti Presidente ti Simbaan, isu ti kakaisuna a tao iti daga a napusgan a mangaramat iti amin kadagita a tulbek ti priesthood (kitaen iti Doktrina ken Katulagan 81:1–2; 107: 64–67, 91–92; 132:7).
Babaen ti panangiturong ti Presidente ti Simbaan, maited kadagiti lider iti priesthood dagiti tulbek tapno mabalinda ti mangidaulo kadagiti tay-ak ti pagrebbenganda. Mairaman kadagitoy a lider:
-
Dagiti stake ken district president.
-
Dagiti bishop ken branch president.
-
Dagiti presidente ti korum ti Melchizedek ken Aaronic Priesthood.
-
Dagiti presidente ti templo.
-
Dagiti mission president ken presidente ti missionary training center.
-
Dagiti presidente ti disso a napnuan pakasaritaan ti Simbaan.
Awaten dagitoy a lider dagiti tulbek ti priesthood no ma-set apartda kadagiti takemda.
Saan a maited dagiti tulbek ti priesthood kadagiti dadduma, agraman dagiti mamagbaga kadagiti lider ti lokal a priesthood wenno presidente dagiti organisasion iti Simbaan. Ketdi, maikkan dagitoy a lider iti naipakumit a turay no ma-set apartda ken no umawatda kadagiti naidutok nga aramiden babaen ti panangiturong dagiti agiggem kadagiti tulbek ti priesthood. Dagiti presidente dagiti organisasion ti Simbaan ti mangidaulo babaen ti panangiturong dagiti agiggem kadagiti tulbek ti priesthood (kitaen iti 4.2.4).
3.4.1.2
Urnos iti Aramid ti Apo
Dagiti tulbek ti priesthood ti mangsigurado a maipatungpal ti aramid ti pannakaisalakan ken pannakaitan-ok iti siuurnos a wagas (kitaen iti Doktrina ken Katulagan 42:11; 132:8). Dagiti agiggem kadagiti tulbek ti priesthood ti mangiturong iti aramid ti Apo iti uneg dagiti tay-ak ti pagrebbenganda. Aramidenda daytoy iti ayat ken kinalinteg. Balido laeng daytoy a mangimatmaton a dadaulo para kadagiti naipangruna a pagrebbengan ti takem ti lider. No mai-release dagiti lider ti priesthood manipud kadagiti takemda, saandan nga agiggem pay kadagitoy a tulbek.
Mai-set apart wenno madutokan ti amin nga agserbi iti Simbaan babaen ti panangiturong ti maysa nga agiggem kadagiti tulbek ti priesthood. No mai-set apart wenno madutokan dagiti miembro, pusgan ida ti Dios nga agserbi iti aramidna.
3.4.2
Panangi-confer ken Panangorden iti Priesthood
Babaen ti panangiturong dagiti agiggem kadagiti tulbek ti priesthood, mai-confer ti Aaronic Priesthood ken ti Melchizedek Priesthood kadagiti maikari a lallaki a miembro ti Simbaan (kitaen iti Doktrina ken Katulagan 84:14–17). Kalpasan a nai-confer ti maitutop a priesthood, maordenan ti tao iti pagtakeman [office] iti dayta a priesthood, a kas iti deacon wenno elder. Aramaten ti maysa a priesthood holder ti priesthood a mayannurot kadagiti karbengan ken pagrebbengan iti dayta a pagtakeman [office] (kitaen iti Doktrina ken Katulagan 107:99).
Tunggal lalaki iti Simbaan ni Jesucristo nasken nga ikarigatanna ti agbalin a maikari nga umawat ken mangusar iti Melchizedek Priesthood nga agserbi kadagiti dadduma. No awaten ti maysa a lalaki daytoy a priesthood, aramidenna ti katulagan a sipupudno a mangipatungpal kadagiti pagrebbenganna iti priesthood. Awatenna pay manipud iti Dios ti maysa a sapata, wenno kari, nga addaan kadagiti agnanayon a bendision (kitaen iti Doktrina ken Katulagan 84:33–44; kitaen met iti Pangiwanwan iti Nasantuan a Kasuratan, “Sapata ken Katulagan ti Priesthood”).
Para iti ad-adu pay nga impormasion maipapan iti panangi-confer ken panangorden iti priesthood, kitaen iti 8.1.1, 10.6, 18.10, ken 38.2.5.
3.4.3
Panangipakumit iti Turay ti Priesthood nga Agserbi iti Simbaan
Ti turay ti priesthood nga agserbi iti Simbaan ket maipakumit kadagiti miembro iti sumaganad a wagwagas:
-
Babaen ti panang-set apart iti maysa nga takem [calling] iti Simbaan
-
Babaen ti naidutok nga aramiden manipud kadagiti mangimatmaton a lider ti Simbaan
3.4.3.1
Panang-set Apart
No mai-set apart dagiti lallaki ken babbai babaen ti panangiturong dagiti agiggem kadagiti tulbek ti priesthood, maited kadakuada ti turay manipud iti Dios tapno agtignay iti dayta a takem. No mai-release-da manipud iti maysa a takem, awanandan iti turay a mainaig iti daytoy.
Sumagmamano a takem [calling] ti adda pakainaiganna kadagiti pagtakeman [offices] ken korum ti priesthood. Kas pagarigan, ti maysa a lalaki nga addaan iti Melchizedek Priesthood ti mabalin a maawagan kas presidente ti elders quorum. No i-set apart isuna ti stake president, maited kenkuana dagiti tulbek ti priesthood, turay, ken pagrebbengan a mangiturong iti aramid ti elders quorum (kitaen iti 3.4.1).
Adu a dadduma pay a takem [calling] iti Simbaan ti saan a mainaig kadagiti pagtakeman [offices] ken korum ti priesthood. Ngem amin a miembro ti Simbaan a mai-set apart nga agserbi ket maikkan iti nadiosan a turay ken pagrebbengan nga agtignay kadagiti takemda. Kas pagarigan:
-
Ti maysa a babai nga awagan ken i-set apart ti bishop kas presidente ti Relief Society iti ward ket maikkan iti turay a mangiturong iti aramid ti Relief Society iti ward.
-
Ti maysa a lalaki wenno babai nga awagan ken i-set apart ti maysa a miembro ti bishopric kas maysa a Primary teacher ket maikkan iti turay a mangisuro kadagiti ubbing iti Primary iti ward.
Agserbi ti amin a maawagan ken mai-set apart babaen ti panangiturong dagiti mangidaulo kadakuada (kitaen iti 3.4.1.2).
Para iti ad-adu pay nga impormasion maipapan iti panangi-set apart kadagiti miembro para kadagiti takem [calling] iti Simbaan, kitaen iti 18.11.
3.4.3.2
Naidutok nga aramiden
Mabalin nga ipakumit dagiti mangimatmaton a lider ti Simbaan ti turay babaen ti naidutok nga aramiden. No awaten dagiti lallaki ken babbai dagitoy a naidutok nga aramiden, maikkanda iti turay manipud iti Dios tapno agtignay. Kas pagarigan:
-
Ti Umuna a Panguluen ken Korum dagiti Sangapulo-ket-dua nga Apostol ti mangipakumit iti turay kadagiti Pitupulo a napusgan a mangimaton kadagiti lugar a masakupan ken mangidaulo kadagiti komperensia iti stake.
-
Ipakumit ti mission president ti turay kadagiti misionario a lalaki ken babai a napusgan a mangidaulo ken mangsanay iti dadduma pay a misionario.
-
Maipakumit ti turay kadagiti miembro ti Simbaan tapno agserbi a kas ministering brother ken ministering sister. Mapasamak daytoy no pusgan ida ti presidente ti elders quorum wenno ti presidente ti Relief Society babaen ti panangiturong ti bishop.
Ti turay a naipakumit babaen ti naidutok nga aramiden ket limitado kadagiti naipangruna a pagrebbengan ken ti kaatiddog ti panagserbi iti naidutok nga aramiden.
Para iti ad-adu pay nga impormasion maipapan iti naidutok nga aramiden iti babaen ti panagipakumit, kitaen iti 4.2.5.
3.4.4
Panangaramat iti Turay ti Priesthood a Sililinteg
Usaren dagiti lider ken miembro ti Simbaan ti nai-confer wenno naipakumit a turay ti priesthood tapno mangbendision iti biag dagiti dadduma.
Mabalin nga usaren daytoy a turay laeng iti kinalinteg (kitaen iti Doktrina ken Katulagan 121:36). Maaramat daytoy babaen ti panangguyugoy, naunday a panagitured, kinaanus, kinapakumbaba, ayat, ken kinaimbag (kitaen iti Doktrina ken Katulagan 121:41–42). Makiinnuman dagiti lider kadagiti dadduma iti espiritu ti panagkaykaysa ken agkalikagum a gun-odenda ti pagayatan ti Apo babaen ti paltiing (kitaen iti Doktrina ken Katulagan 41:2). Para iti impormasion maipapan iti pannakiinnuman kadagiti dadduma, kitaen iti 4.4.3.
Saan nga ipapilit ti pagayatanda iti dadduma dagiti mangaramat iti turay ti priesthood. Saanda nga aramaten daytoy para kadagiti managimbubukod a panggep. No aramaten ti tao daytoy iti saan a nalinteg, “adaywan ida ti langit [ken] maldaangan ti Espiritu ti Apo” (Doktrina ken Katulagan 121:37).
Iraman ti sumagmamano a takem iti Simbaan ti maysa a pagrebbengan a mangidaulo. Para iti impormasion maipapan iti panangidaulo iti Simbaan, kitaen iti 4.2.4.
3.5
Bileg ti Priesthood
Ti bileg ti priesthood isu ti bileg a pangbendision ti Dios kadagiti annakna. Agayus ti bileg ti Dios iti priesthood iti amin a miembro ti Simbaan—babai ken lalaki—bayat ti panagtungpalda kadagiti katulagan nga inaramidda Kenkuana. Aramiden dagiti miembro dagitoy a katulagan no umawatda kadagiti ordinansa ti priesthood. (Kitaen iti Doktrina ken Katulagan 84:19–20.)
Mairaman kadagiti bendision ti bileg ti priesthood a maawat dagiti miembro ti:
-
Pannarabay para iti biagda.
-
Pammaregta a mangammo no kasano ti agserbi kadagiti miembro ti pamilia ken iti dadduma.
-
Pigsa nga agibtur ken mangparmek kadagiti karit.
-
Sagsagut ti Espiritu a mangpadur-as kadagiti kabaelanda.
-
Paltiing a mangammo no kasano a mangipatungpal iti aramid a nakaordenanda, nakai-set apartanda, wenno nakadutokanda nga aramiden.
-
Tulong ken pigsa nga agbalin nga ad-adda pay a kas ken ni Jesucristo ken ti Nailangitan nga Ama.
3.5.1
Dagiti Katulagan
Ti katulagan ket maysa a sagrado a kari iti nagbaetan ti Dios ken dagiti annakna. Mangted ti Dios kadagiti kondision para iti katulagan, ken umanamong dagiti annakna nga agtungpal kadagita a kondision. Ikari ti Dios a mangbendision kadagiti annakna no ipatungpalda ti katulagan.
Agaramid dagiti miembro kadagiti katulagan iti Dios no awatenda dagiti ordinansa ti pannakaisalakan ken pannakaitan-ok (kitaen iti 18.1). Amin nga agibtur agingga iti panungpalan a mangtungpal kadagiti katulaganda ket umawatdanto iti agnanayon a biag (kitaen iti 2 Nephi 31:17–20; Doktrina ken Katulagan 14:7). Ti panagibtur agingga iti panungpalan ket iramanna ti panangaramat iti pammati iti Nailangitan nga Ama ken ni Jesucristo ken panagbabawi iti inaldaw.
Dagiti nagannak, lider ti Simbaan, ken dadduma pay ti mangtulong kadagiti tao nga agsagana nga agaramid kadagiti katulagan no umawatda kadagiti ordinansa ti ebanghelio. Siguraduenda a maawatan ti tao dagiti katulagan nga aramidennanto. Kalpasan nga agaramid iti katulagan ti maysa a tao, tumulongda kenkuana a mangtungpal iti daytoy. (Kitaen iti Mosiah 18:8–11, 23–26.)
3.5.2
Dagiti Ordinansa
Ti ordinansa ket maysa a sagrado nga aramid a maannong babaen ti turay ti priesthood. Kanayon a paset ti ebanghelio ni Jesucristo dagiti ordinansa. Naannong dagiti umuna nga ordinansa iti daga kadagidi aldaw da Adan ken Eva (kitaen iti Genesis 1:28; Moises 6:64–65).
Iti adu nga ordinansa, agaramid dagiti tao ti katulagan iti Dios. Mairaman kadagiti pagarigan ti panagbuniag, ti sakramento, ti endowment, ken ti pangilantip nga ordinansa iti kallaysa. Iti dadduma pay nga ordinansa kas kadagiti bendision ti patriarka wenno bendision iti masakit, saan nga agaramid dagiti tao iti katulagan, ngem umawatda iti pannarabay ken pigsa nga agtungpal kadagiti katulagan.
Addaan dagiti ordinansa iti simboliko a kaipapanan a mangitudo kadagiti tao iti Nailangitan nga Ama ken ni Jesucristo. Kadagiti ordinansa a mangiraman iti katulagan, makatulong ti simbolismo kadagiti tao a makaawat kadagiti kari nga aramidenda ken dagiti bendision a maawatda babaen ti kinapudnoda.
Tunggal ordinansa ket mangpalugod kadagiti tao nga umawat kadagiti nabaknang a naespirituan a bendision. Impalgak ti Apo, “Kadagiti ordinansa [ti priesthood], naipakita ti bileg ti kinadios” (Doktrina ken Katulagan 84:20). Napateg iti agnanayon a biag dagiti ordinansa ti pannakaisalakan ken pannakaitan-ok. Para iti ad-adu pay nga impormasion, kitaen iti 18.1.
Umawat dagiti sibibiag a tao kadagiti ordinansa ti pannakaisalakan ken pannakaitan-ok para iti bagbagida. Iti lugar a mabalin, agsublida kalpasanna iti templo tapno agannong kadagitoy nga ordinansa para kadagiti pimmusayen. Para iti ad-adu pay nga impormasion maipapan iti panangannong kadagiti ordinansa para kadagiti natay, kitaen iti kapitulo 28.
3.6
Ti Priesthood ken ti Pagtaengan
Amin a miembro ti Simbaan nga agtungpal kadagiti katulaganda—babbai, lallaki, ken ubbing—ket mabendisionan iti bileg ti priesthood ti Dios iti pagtaenganda tapno mapapigsa ti bagbagida ken dagiti pamiliada (kitaen iti 3.5). Daytoy a bileg ti tumulongto kadagiti miembro iti panangaramid iti trabaho ti Dios iti pannakaisalakan ken pannakaitan-ok iti bukodda a biag ken dagiti pamiliada (kitaen iti 2.2).
Mabalin dagiti lallaki nga addaan iti Melchizedek Priesthood ti mangted iti pammendision ti priesthood kadagiti miembro ti pamilia tapno mangted iti pangiturong, panagagas, ken liwliwa. No kasapulan, mabalin met dagiti miembro ti Simbaan ti agkiddaw kadagitoy a bendision manipud kadagiti kabagian a miembro, ministering brother, wenno dagiti lokal a lider ti Simbaan. Para iti ad-adu pay nga impormasion maipapan kadagiti bendision ti priesthood, kitaen iti 18.13 ken 18.14.
Para iti impormasion maipapan iti panangidaulo iti pamilia, kitaen iti 2.1.3.