« ២៨. ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( ឆ្នាំ ២០២០ ) ។
« ២៨. ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន » ក្បួនខ្នាតទូទៅ ។
២៨.
ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន
២៨.០
សេចក្តីផ្ដើម
ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ចគឺជាផ្នែកមួយនៃកិច្ចការនៃសេចក្តីសង្គ្រោះ និងភាពតម្កើងឡើង ( សូមមើល ១.២ ) ។ ពិធីបរិសុទ្ធដែលធ្វើឡើងនៅក្នុងព្រះវិហារបរិសុទ្ធ អាចធ្វើឲ្យក្រុមគ្រួសារនៅជាមួយគ្នាអស់កល្បជានិច្ច និងដកពិសោធន៍នូវភាពពោរពេញនៃសេចក្ដីអំណរនៅក្នុងវត្តមានរបស់ព្រះ ។
ដើម្បីឲ្យបុត្រាបុត្រីរបស់ព្រះវរបិតាសួគ៌ត្រឡប់ទៅកាន់ទ្រង់វិញ ពួកគេម្នាក់ៗត្រូវតែប្រែចិត្ត មានភាពស័ក្ដិសមដើម្បីទទួលពិធីបរិសុទ្ធនៃសេចក្តីសង្រ្គោះ និងភាពតម្កើងឡើង ហើយគោរពតាមសេចក្ដីសញ្ញាទាំងឡាយដែលទាក់ទងនឹងពិធីបរិសុទ្ធនីមួយៗ ។ ពិធីបរិសុទ្ធនៃសេចក្តីសង្រ្គោះ និងភាពតម្កើងឡើងរួមមាន ៖
-
ពិធីបុណ្យជ្រមុជទឹក ។
-
ពិធីបញ្ជាក់ និងអំណោយទាននៃព្រះវិញ្ញាណបរិសុទ្ធ ។
-
ការប្រគល់បព្វជិតភាពម៉ិលគីស្សាដែក និងការតែងតាំងឲ្យមានតំណែងមួយ ( សម្រាប់បុរស ) ។
-
អំណោយទានពិសិដ្ឋក្នុងព្រះវិហារបរិសុទ្ធ ។
-
ការផ្សារភ្ជាប់ក្នុងព្រះវិហារបរិសុទ្ធ ។
ព្រះវរបិតាសួគ៌បានត្រាស់ដឹងថា បុត្រាបុត្រីរបស់ទ្រង់ជាច្រើននឹងមិនបានទទួលពិធីបរិសុទ្ធទាំងនេះអំឡុងជីវិតរមែងស្លាប់របស់ពួកគេនោះទេ ។ ទ្រង់បានប្រទានរបៀបមួយទៀតដើម្បីឲ្យពួកគេអាចទទួលបានពិធីបរិសុទ្ធ ហើយចុះសេចក្តីសញ្ញាទាំងឡាយជាមួយទ្រង់បាន ។ នៅក្នុងព្រះវិហារបរិសុទ្ធ ពិធីបរិសុទ្ធទាំងឡាយអាចត្រូវបានធ្វើឡើងដោយអ្នកជំនួស ។ នេះមានន័យថា មនុស្សដែលនៅរស់ទទួលពិធីបរិសុទ្ធទាំងឡាយជំនួសឲ្យនរណាម្នាក់ដែលបានស្លាប់ហើយ ។ នៅក្នុងពិភពវិញ្ញាណ មរណជនអាចជ្រើសរើសដើម្បីទទួល ឬបដិសេធពិធីបរិសុទ្ធទាំងឡាយដែលបានធ្វើសម្រាប់ពួកគាត់បាន ( សូមមើល គោលលទ្ធិ និង សេចក្តីសញ្ញា ១៣៨:១៩, ៣២–៣៤, ៥៨–៥៩ ) ។
ពិធីបរិសុទ្ធនៃសេចក្តីសង្រ្គោះ និងភាពតម្កើងឡើងមិនតម្រូវឲ្យធ្វើឡើងសម្រាប់អ្នកទាំងឡាយដែលមិនអាចទទួលខុសត្រូវនៅក្នុងជីវិតនេះនោះទេ ( សូមមើល ១៨.១, ២៨.៣.៤ និង ២៨.៣.៥ ) ។
សមាជិកសាសនាចក្រត្រូវបានលើកទឹកចិត្តឲ្យស្វែងរកសាច់ញាតិដែលបានស្លាប់ ដែលពុំទាន់បានទទួលពិធីបរិសុទ្ធនៃសេចក្ដីសង្គ្រោះ និងភាពតម្កើងឡើងនៅឡើយ ។ បន្ទាប់មក សមាជិកធ្វើពិធីបរិសុទ្ធទាំងឡាយជំនួសឲ្យសាច់ញាតិទាំងនោះ ។ ( សូមមើល ម៉ាឡាគី ៤:៥–៦; កូរិនថូស ទី១ ១៥:២៩; គោលលទ្ធិ និង សេចក្ដីសញ្ញា ២:១–៣; ១២៨:១៥–១៨; សូមមើលផងដែរ ២៥.១ នៅក្នុងក្បួនខ្នាតនេះ ) ។
ប្រសិនបើសមាជិកមិនបានរៀបចំឈ្មោះរបស់គ្រួសារសម្រាប់កិច្ចការព្រះវិហារបរិសុទ្ធទេ ( សូមមើល ២៨.១.១ ) នោះឈ្មោះរបស់មរណជនដែលត្រូវការពិធីបរិសុទ្ធទាំងឡាយ នឹងត្រូវបានផ្ដល់ឲ្យនៅឯព្រះវិហារបរិសុទ្ធ ។
សមាជិកទាំងឡាយត្រូវបានលើកទឹកចិត្តឲ្យចូលរួមព្រះវិហារបរិសុទ្ធ ញឹកញាប់តាមដែលកាលៈទេសៈរបស់ពួកគេអនុញ្ញាតឲ្យ មិនថាពួកគេធ្វើពិធីបរិសុទ្ធជំនួសសម្រាប់សាច់ញាតិរបស់ពួកគេផ្ទាល់ ឬសម្រាប់បុគ្គលដែលត្រូវគេផ្ដល់ឈ្មោះឲ្យនៅព្រះវិហារបរិសុទ្ធនោះទេ ។
សមាជិកសាសនាចក្រទទួលបានពរជ័យ នៅពេលពួកគេធ្វើពិធីបរិសុទ្ធនៃព្រះវិហារបរិសុទ្ធសម្រាប់មរណជន ។ ពេលធ្វើពិធីបរិសុទ្ធជំនួស ពួកគេអាចសញ្ជឹងគិតអំពីសេចក្ដីសញ្ញាព្រះវិហារបរិសុទ្ធរបស់ពួកគេផ្ទាល់ និងការប្ដេជ្ញាចិត្តរបស់ពួកគេចំពោះសេចក្ដីសញ្ញាទាំងនោះ ។
ប្រធានស្តេក និងប៊ីស្សពជួយសមាជិកឲ្យរៀបចំខ្លួន ដើម្បីមានបទពិសោធន៍វិជ្ជមាននៃការធ្វើពិធីបរិសុទ្ធនៃព្រះវិហារបរិសុទ្ធ ។ ពួកគាត់ធ្វើការនេះដោយបង្រៀនគោលលទ្ធិគ្រឹះនៃកិច្ចការព្រះវិហារបរិសុទ្ធ ហើយធ្វើឲ្យប្រាកដថា សមាជិកយល់ពីសេចក្តីណែនាំសម្រាប់កិច្ចការនេះ ។ សូមមើល ជំពូកទី ២៥ សម្រាប់ព័ត៌មានបន្ថែមទៀត ។
២៨.១
សេចក្តីណែនាំទូទៅសម្រាប់ការធ្វើពិធីបរិសុទ្ធជំនួស
មរណជនអាយុ ៨ ឆ្នាំឡើងនៅពេលដែលពួកគេបានស្លាប់ អាចទទួលពិធីបរិសុទ្ធជំនួសបាន ។ នៅក្នុងស្ថានភាពភាគច្រើនបំផុត សមាជិកអាចធ្វើពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន ភ្លាមៗក្រោយរយៈពេលមួយឆ្នាំបន្ទាប់ពីកាលបរិច្ឆេទមរណភាពកន្លងផុតទៅ ( សូមមើល ២៨.១.១ និង ២៨.៣ ) ។
២៨.១.១
ការរៀបចំឈ្មោះរបស់មរណជនសម្រាប់ពិធីបរិសុទ្ធនៃព្រះវិហារបរិសុទ្ធ
មានធនធានជាច្រើនដើម្បីជួយសមាជិកឲ្យស្វែងរកសាច់ញាតិដែលបានស្លាប់របស់ពួកគេ ដែលត្រូវការពិធីបរិសុទ្ធជំនួស ( សូមមើល ២៥.៤ និង ២៨.៣ ) ។ ថ្នាក់ដឹកនាំខាងក្រោមនេះជួយសមាជិកឲ្យរៀនពីរបៀប ដើម្បីរៀបចំឈ្មោះសមាជិកគ្រួសារដែលបានស្លាប់សម្រាប់ពិធីបរិសុទ្ធនៃព្រះវិហារបរិសុទ្ធ ៖
-
គណៈប្រធានកូរ៉ុមអែលឌើរ និងគណៈប្រធានសមាគមសង្រ្គោះវួដ ( សូមមើល ២៥.២.២ )
-
អ្នកដឹកនាំខាងព្រះវិហារបរិសុទ្ធ និងពង្សប្រវត្តិវួដ ( សូមមើល ២៥.២.៣ )
-
អ្នកប្រឹក្សាយោបល់ខាងព្រះវិហារបរិសុទ្ធ និងពង្សប្រវត្តិវួដ ( សូមមើល ២៥.២.៤ )
នៅកន្លែងណាដែលមាន ព័ត៌មានដែលកំណត់អត្តសញ្ញាណសមាជិកគ្រួសារដែលបានស្លាប់ គួរតែត្រូវបញ្ចូលទៅក្នុងគេហទំព័រ FamilySearch.org មុនពេលធ្វើពិធីបរិសុទ្ធនៃព្រះវិហារបរិសុទ្ធ ( សូមមើល ២៥.៤.២ ) ។
២៨.១.១.១
ការដាក់បញ្ជូនឈ្មោះសមាជិកគ្រួសារ
ពេលដាក់បញ្ជូនឈ្មោះសម្រាប់ធ្វើពិធីបរិសុទ្ធនៃព្រះវិហារបរិសុទ្ធជំនួស នោះជាទូទៅ សមាជិកគួរតែដាក់បញ្ចូលតែឈ្មោះបុគ្គលទាំងឡាយដែលពួកគេជាប់សាច់ញាតិប៉ុណ្ណោះ ។ លើកលែងតែដូចបានកំណត់សម្គាល់នៅក្នុង ២៨.៣ ពិធីបរិសុទ្ធជំនួសអាចត្រូវបានធ្វើឡើងបន្ទាប់ពីមរណភាពរបស់បុគ្គលនោះបានកន្លងផុតទៅមួយឆ្នាំ ប្រសិនបើចំណុចណាមួយនៅខាងក្រោមត្រឹមត្រូវ ៖
-
សាច់ញាតិជិតដិតម្នាក់របស់មរណជន ( ប្ដី ឬប្រពន្ធដែលមិនបានលែងលះគ្នា កូនមជ្ឈិមវ័យ ឪពុក ឬម្ដាយ ឬបងប្អូនបង្កើត ) ដាក់បញ្ជូនឈ្មោះនោះដើម្បីធ្វើពិធីបរិសុទ្ធនៃព្រះវិហារបរិសុទ្ធ ។
-
ការអនុញ្ញាតឲ្យធ្វើពិធីបរិសុទ្ធ ត្រូវទទួលបានមកពីសាច់ញាតិជិតដិតម្នាក់របស់មរណជន ( ប្ដី ឬប្រពន្ធដែលមិនបានលែងលះគ្នា កូនមជ្ឈិមវ័យ ឪពុក ឬម្ដាយ ឬបងប្អូនបង្កើត ) ។
ប្រសិនបើលក្ខខណ្ឌខាងលើមិនអនុវត្តទេ នោះពិធីបរិសុទ្ធនៃព្រះវិហារបរិសុទ្ធអាចធ្វើឡើងនៅ ១១០ ឆ្នាំ បន្ទាប់ពីមរណជនបានកើត ។
សម្រាប់ព័ត៌មានបន្ថែមទៀត សូមមើលអត្ថបទខាងក្រោមនៅក្នុងកម្មវិធីស្រាវជ្រាវក្រុមគ្រួសារ ៖
២៨.១.១.២
ការដាក់បញ្ជូនឈ្មោះរបស់បុគ្គលល្បីៗ និងក្រុមដែលគ្មានការអនុញ្ញាត
ជាទូទៅ សមាជិកសាសនាចក្រមិនគួរដាក់បញ្ជូនឈ្មោះទៅគេហទំព័រ FamilySearch.org ដែលមាននៅក្នុងក្រុមដូចខាងក្រោមនេះទេ ៖
-
បុគ្គលល្បីល្បាញ
-
ឈ្មោះដែលប្រមូលបានពីគម្រោងទាញយកដែលមិនមានការយល់ព្រម
-
ជនរងគ្រោះនៃការប្រល័យពូជសាសន៍ជីហ្វ
សម្រាប់ព័ត៌មានបន្ថែមទៀត សូមមើលអត្ថបទខាងក្រោមនៅក្នុងកម្មវិធីស្រាវជ្រាវក្រុមគ្រួសារ ៖ « តើខ្ញុំអាចធ្វើកិច្ចការព្រះវិហារបរិសុទ្ធសម្រាប់ជនរងគ្រោះនៃការប្រល័យពូជសាសន៍ជីហ្វបានដែរឬទេ ? »
២៨.១.២
អ្នកដែលអាចចូលរួមក្នុងពិធីបរិសុទ្ធសម្រាប់មរណជន
សមាជិកទាំងអស់ដែលមានប័ណ្ណចូលព្រះវិហារបរិសុទ្ធដែលមានសុពលភាព អាចចូលរួមក្នុងពិធីបុណ្យជ្រមុជទឹក និងពិធីបញ្ជាក់សម្រាប់មរណជនបាន ។ សមាជិកដែលបានទទួលអំណោយទានពិសិដ្ឋរួចហើយ ដែលកាន់ប័ណ្ណចូលព្រះវិហារបរិសុទ្ធដែលមានសុពលភាព អាចចូលរួមនៅក្នុងពិធីបរិសុទ្ធទាំងអស់ ។ សូមមើល ២៦.៣ ។
២៨.១.៣
ការចូលរួមដោយសមាជិកដែលមានពិការភាពខាងរាងកាយ ឬខាងបញ្ញា
សមាជិកដែលពិការអាចធ្វើកិច្ចការព្រះវិហារបរិសុទ្ធសម្រាប់មរណជនបាន ប្រសិនបើពួកគេ ៖
-
មានប័ណ្ណចូលព្រះវិហារបរិសុទ្ធដែលមានសុពលភាព ( សូមមើល ២៨.១.២ ) ។
-
មានសមត្ថភាពខាងបញ្ញាគ្រប់គ្រាន់ដើម្បីយល់ពីពិធីបរិសុទ្ធនោះ ។
-
អាចថែទាំខ្លួនឯងបាន ឬត្រូវបានអមដំណើរដោយសាច់ញាតិ ឬមិត្តភក្ដិម្នាក់ដែលមានភេទដូចគ្នា ដែលមានប័ណ្ណចូលព្រះវិហារបរិសុទ្ធ និងអាចផ្ដល់ជំនួយបានប្រសិនបើត្រូវការ ។
២៨.១.៤
ការដាក់កាលវិភាគ
សមាជិកអាចត្រូវធ្វើការណាត់ ពីមុនធ្វើពិធីបរិសុទ្ធសម្រាប់មរណជន ។ សូមមើលនៅលើគេហទំព័រ temples.ChurchofJesusChrist.org សម្រាប់ព័ត៌មានទំនាក់ទំនងរបស់ព្រះវិហារបរិសុទ្ធនីមួយៗ និងតម្រូវការសម្រាប់ការដាក់កាលវិភាគ ។
២៨.១.៥
ជំនួយខាងការបកប្រែ
សូមមើល ២៧.១.៤ ។
២៨.១.៦
សម្លៀកបំពាក់ដើម្បីពាក់ទៅកាន់ព្រះវិហារបរិសុទ្ធ
សូមមើល ២៧.១.៥ ។
២៨.១.៧
តំហែទាំកុមារ
សូមមើល ២៧.១.៦ ។
២៨.២
ការធ្វើពិធីបរិសុទ្ធនៃព្រះវិហារបរិសុទ្ធសម្រាប់មរណជន
វគ្គខាងក្រោមនេះពន្យល់ពីពិធីបរិសុទ្ធទាំងឡាយ ដែលត្រូវធ្វើដោយអ្នកជំនួសសម្រាប់មរណជននៅក្នុងព្រះវិហារបរិសុទ្ធ ។ ពេលធ្វើពិធីបរិសុទ្ធជំនួស សមាជិកម្នាក់អាចធ្វើជាអ្នកជំនួសបានតែសម្រាប់មរណជន ដែលមានភេទកំណើតដូចគ្នានឹងសមាជិកនោះប៉ុណ្ណោះ ។
២៨.២.១
ពិធីបុណ្យជ្រមុជទឹក និងពិធីបញ្ជាក់សម្រាប់មរណជន
សមាជិកណាដែលមានប័ណ្ណចូលព្រះវិហារបរិសុទ្ធដែលមានសុពលភាព អាចត្រូវបានអញ្ជើញឲ្យបម្រើនៅក្នុងការចាត់តាំងពិធីបុណ្យជ្រមុជទឹក ។ ការចាត់តាំងមួយចំនួនអាចរួមមាន ៖
-
ធ្វើជាអ្នកជំនួសសម្រាប់ធ្វើពិធីបុណ្យជ្រមុជទឹក និងពិធីបញ្ជាក់ ។
-
ធ្វើជាសាក្សីសម្រាប់ធ្វើពិធីបុណ្យជ្រមុជទឹកជំនួស ។
-
ធ្វើជាជំនួយការដល់អ្នកធ្វើការក្នុងព្រះវិហារបរិសុទ្ធ ។
-
ចែកសម្លៀកបំពាក់ និងកន្សែង ។
-
ជួយកត់ត្រាពិធីបុណ្យជ្រមុជទឹក និងពិធីបញ្ជាក់នៅក្នុងប្រព័ន្ធកុំព្យូទ័រ ។
អ្នកកាន់បព្វជិតភាពម៉ិលគីស្សាដែក និងពួកសង្ឃនៅក្នុងបព្វជិតភាពអើរ៉ុន អាចត្រូវបានអញ្ជើញឲ្យធ្វើពិធីបុណ្យជ្រមុជទឹកសម្រាប់មរណជន ។ អ្នកកាន់បព្វជិតភាពម៉ិលគីស្សាដែកក៏អាចត្រូវបានអញ្ជើញឲ្យធ្វើជាអធិបតីនៅក្នុងពិធីបញ្ជាក់សម្រាប់មរណជនផងដែរ ។
មានតែបុរសដែលបានទទួលអំណោយទានពិសិដ្ឋហើយប៉ុណ្ណោះ ដែលត្រូវបានអញ្ជើញឲ្យ ៖
-
បម្រើជាអ្នកកត់ត្រានៅខាងមុខ ។
-
បម្រើជាអ្នកកត់ត្រាពិធីបញ្ជាក់ ។
ក្រុមដែលបានរៀបចំដូចជាក្រុមគ្រួសារ វួដ និងស្តេក ដែលមានបំណងចង់ចូលរួមពិធីបរិសុទ្ធក្នុងពិធីបុណ្យជ្រមុជទឹក ជាធម្មតាត្រូវដាក់កាលវិភាគជាមួយព្រះវិហារបរិសុទ្ធជាមុនសិន ( សូមមើល ២៨.១.៤ ) ។ មជ្ឈិមវ័យមួយរូប ឬច្រើនជាងនោះ ដែលមានប័ណ្ណចូលព្រះវិហារបរិសុទ្ធដែលមានសុពលភាព គួរតែអមដំណើរក្រុមទាំងនេះ ។
២៨.២.២
ពិធីលាងជម្រះ និងអំណោយទានពិសិដ្ឋ
នៅពេលធ្វើពិធីអំណោយទានពិសិដ្ឋជំនួសសម្រាប់មរណជន នោះផ្នែកពិធីលាងជម្រះនៃអំណោយទានពិសិដ្ឋត្រូវបានធ្វើឡើង និងកត់ត្រាទុកដោយឡែក ( សូមមើល ២៧.២ ) ។ រាល់សមាជិកដែលបានទទួលអំណោយទានពិសិដ្ឋដែលមានប័ណ្ណចូលព្រះវិហារបរិសុទ្ធមានសុពលភាព អាចធ្វើជាអ្នកជំនួសដើម្បីទទួលពិធីបរិសុទ្ធទាំងនេះបាន ។
២៨.២.២.១
ការបញ្ជាក់ពីពិធីបរិសុទ្ធចាំបាច់ទាំងឡាយ ដើម្បីទទួលពិធីអំណោយទានពិសិដ្ឋ
មរណជនគួរតែត្រូវបានជ្រមុជទឹក និងបញ្ជាក់ ទោះពេលនៅរស់ ឬដោយជំនួសក្ដី មុនពេលធ្វើអំណោយទានពិសិដ្ឋជំនួសឲ្យគាត់ ឬនាង រួមទាំងផ្នែកលាងជម្រះផងដែរ ។
ជួនកាល បន្ទាប់ពីមរណជនបានទទួលអំណោយទានពិសិដ្ឋដោយជំនួស គេបានរកឃើញថា ពិធីបុណ្យជ្រមុជទឹក និងពិធីបញ្ជាក់ដែលគាត់ ឬនាងបានទទួលពេលនៅរស់នោះពុំអាចបញ្ជាក់ផ្ទៀងផ្ទាត់បាន ។ នៅក្នុងករណីនោះ បុគ្គលនោះត្រូវតែត្រូវបានជ្រមុជទឹក និងបញ្ជាក់ដោយអ្នកជំនួស ។ វាមិនចាំបាច់ដើម្បីធ្វើពិធីអំណោយទានពិសិដ្ឋម្តងទៀតទេ ក្រោយពីធ្វើពិធីបុណ្យជ្រមុជទឹក និងពិធីបញ្ជាក់ជំនួសនោះ ។
២៨.២.៣
ការផ្សារភ្ជាប់ជាមួយនឹងស្វាមី ឬភរិយា និងការផ្សារភ្ជាប់កូនៗជាមួយនឹងឪពុកម្តាយ
នៅក្នុងព្រះវិហារបរិសុទ្ធ មរណជនអាចត្រូវបានផ្សារភ្ជាប់ជាមួយនឹងស្វាមី ឬភរិយា ដែលពួកគេបានរៀបការជាមួយនៅពេលនៅរស់ ( សូមមើល ៣៨.៤.១.៣ ប្រសិនបើស្វាមី ឬភរិយានៅរស់នៅឡើយ និងសូមមើល ៣៨.៤.១.៧ ប្រសិនបើទាំងស្វាមីទាំងភរិយាបានស្លាប់ហើយ ) ។ មរណជនក៏អាចផ្សារភ្ជាប់ទៅនឹងកូនៗដែលនៅរស់ និងដែលស្លាប់បានផងដែរ ( សូមមើល ៣៨.៤.២.២ ) ។ សមាជិកដែលបានទទួលអំណោយទានពិសិដ្ឋដែលមានប័ណ្ណចូលព្រះវិហារបរិសុទ្ធមានសុពលភាព អាចធ្វើជាអ្នកជំនួសសម្រាប់ពិធីបរិសុទ្ធនៃការផ្សារភ្ជាប់ ។
ពិធីបរិសុទ្ធនៃពិធីបុណ្យជ្រមុជទឹក ពិធីបញ្ជាក់ ពិធីលាងជម្រះ និងពិធីអំណោយទានពិសិដ្ឋ ត្រូវតែបានធ្វើឡើង ទោះនៅក្នុងជីវិតនៅរស់ ឬដោយជំនួស មុនពេលដែលមរណជនអាចផ្សារភ្ជាប់ជាមួយនឹងស្វាមី ឬភរិយា ឬជាមួយនឹងឪពុកម្ដាយរបស់គាត់ ។ ទោះជាយ៉ាងណា មរណជនដែលបានស្លាប់មុនអាយុ ៨ ឆ្នាំ ឬដែលមិនអាចទទួលខុសត្រូវនៅក្នុងជីវិត ពុំចាំបាច់ទទួលពិធីបរិសុទ្ធណាផ្សេងទៀតមុនពេលផ្សារភ្ជាប់ជាមួយនឹងឪពុកម្ដាយរបស់គាត់ឡើយ ( សូមមើល ១៨.១, ២៨.៣.៤ និង ២៨.៣.៥ ) ។
២៨.៣
កាលៈទេសៈពិសេស
វគ្គនេះពន្យល់អំពីកាលៈទេសៈទាំងឡាយ ដែលគោលការណ៍ណែនាំមួយចំនួននៅក្នុង ២៨.១ អាចនឹងមិនអនុវត្ត ។
២៨.៣.១
សមាជិកដែលមិនអាចទៅព្រះវិហារបរិសុទ្ធមុនពេលទទួលមរណភាព
រយៈពេលរង់ចាំមួយឆ្នាំបន្ទាប់ពីមរណភាព សម្រាប់ពិធីបរិសុទ្ធជំនួសទាំងឡាយនៃព្រះវិហារបរិសុទ្ធ ( សូមមើល ២៨.១ ) មិនអនុវត្តចំពោះសមាជិកស័ក្ដិសមដែលបានជ្រមុជទឹក ដែលមានអាយុ ៨ ឆ្នាំឡើង ដែលគួរតែបានទៅព្រះវិហារបរិសុទ្ធ ប៉ុន្តែត្រូវបានរារាំងមិនឲ្យធ្វើដូច្នោះ ព្រោះតែមូលហេតុទាំងឡាយដែលហួសពីសមត្ថភាពគ្រប់គ្រងរបស់ពួកគេឡើយ ។ ការណ៍នេះអាចរួមមានទាំងសមាជិកដែលមិនបានទទួលអំណោយទានពិសិដ្ឋរបស់ពួកគេ ដោយសារតែពួកគេមិនទាន់ឈានចូលដល់អាយុសមរម្យផងដែរ ( សូមមើល ២៧.២.២ ) ។
សមាជិកគ្រួសារគួរតែទាក់ទងទៅព្រះវិហារបរិសុទ្ធជាមុន ដើម្បីដាក់កាលវិភាគសម្រាប់ពិធីបរិសុទ្ធទាំងនេះ ។ សមាជិកគ្រួសារត្រូវតែមានចំណុចមួយក្នុងចំណោមទាំងពីរខាងក្រោមនេះ ៖
-
បណ្ណ័ចូលព្រះវិហារបរិសុទ្ធរបស់មរណជនដែលមានសុពលភាពនៅពេលដែលស្លាប់នោះ ។
-
លិខិតមកពីប៊ីស្សពបញ្ជាក់ពីភាពស័ក្ដិសមរបស់មរណជននៅពេលដែលស្លាប់នោះ ។
ប័ណ្ណចូលព្រះវិហារបរិសុទ្ធ ឬលិខិតនេះគួរតែបង្ហាញនៅព្រះវិហារបរិសុទ្ធ ពីមុនពិធីបរិសុទ្ធនេះធ្វើឡើង ។
២៨.៣.២
សមាជិកដែលបានទទួលមរណភាព នៅអំឡុងពេលមួយឆ្នាំនៃពិធីបុណ្យជ្រមុជទឹក
ប្រសិនបើសមាជិកទទួលមរណភាពនៅអំឡុងពេលមួយឆ្នាំ បន្ទាប់ពីបានទទួលបុណ្យជ្រមុជទឹក នោះពិធីបរិសុទ្ធជំនួសទាំងឡាយនៃព្រះវិហារបរិសុទ្ធ អាចត្រូវបានធ្វើឡើងសម្រាប់បុគ្គលនោះ នៅរយៈពេលមួយឆ្នាំបានកន្លងផុតទៅ ចាប់តាំងពីកាលបរិច្ឆេទដែលគាត់បានទទួលពិធីបញ្ជាក់ ។
២៨.៣.៣
កូនដែលបានស្លាប់ពីមុនកំណើត ( កូនដែលស្លាប់ក្នុងពោះ ឬរលូត )
ពិធីបរិសុទ្ធនៃព្រះវិហារបរិសុទ្ធគឺពុំត្រូវការ ឬពុំត្រូវធ្វើសម្រាប់កូនដែលស្លាប់នៅក្នុងផ្ទៃនោះទេ ។ សម្រាប់ព័ត៌មានបន្ថែម សូមមើល ៣៨.៧.៣ ។
២៨.៣.៤
កុមារដែលស្លាប់ក្រោមអាយុប្រាំបីឆ្នាំ
កុមារតូចៗត្រូវបានប្រោសលោះតាមរយៈដង្វាយធួនរបស់ព្រះយេស៊ូវគ្រីស្ទ ហើយត្រូវបាន « សង្គ្រោះនៅក្នុងនគរសេឡេស្ទាលនៃស្ថានសួគ៌ » ( គោលលទ្ធិ និង សេចក្ដីសញ្ញា ១៣៧:១០ ) ។ ដោយសារមូលហេតុនេះហើយទើបគ្មានពិធីបុណ្យជ្រមុជទឹក ឬពិធីអំណោយទានពិសិដ្ឋត្រូវធ្វើឡើងសម្រាប់កុមារដែលស្លាប់មុនអាយុប្រាំបីឆ្នាំនោះទេ ។ ទោះជាយ៉ាងណា ការផ្សារភ្ជាប់ជាមួយឪពុកម្ដាយអាចត្រូវបានធ្វើឡើងសម្រាប់កុមារដែលមិនបានកើតនៅក្នុងសេចក្ដីសញ្ញា ឬពុំបានទទួលពិធីបរិសុទ្ធនោះពេលនៅរស់ ( សូមមើល ១៨.១ ) ។
២៨.៣.៥
មរណជនដែលមានអសមត្ថភាពផ្នែកបញ្ញា
ពិធីបរិសុទ្ធនៃព្រះវិហារបរិសុទ្ធអាចត្រូវបានធ្វើឡើងសម្រាប់មរណជន ដែលដឹងថា ជាបុគ្គលដែលមានការទទួលខុសត្រូវ ( សូមមើល គោលលទ្ធិ និង សេចក្ដីសញ្ញា ២០:៧១ ) ។ ពិធីបរិសុទ្ធនៃព្រះវិហារបរិសុទ្ធអាចត្រូវបានធ្វើឡើងផងដែរ សម្រាប់បុគ្គលទាំងឡាយដែលមិនដឹងថាអាចមានការទទួលត្រូវ ឬអត់នោះ ។
ប្រសិនបើបានដឹងយ៉ាងច្បាស់ថា មរណជនមានពិការភាពខាងបញ្ញា ហើយមិនអាចមានការទទួលខុសត្រូវទេ នោះពិធីបរិសុទ្ធតែមួយដែលត្រូវធ្វើឡើង គឺការផ្សារភ្ជាប់ជាមួយនឹងឪពុកម្ដាយ ( សូមមើល ៣៨.២.៤ ) ។ ការណ៍នេះត្រូវបានធ្វើឡើង ប្រសិនបើបុគ្គលនោះមិនបានកើតមកក្នុងសេចក្ដីសញ្ញា ឬមិនបានផ្សារភ្ជាប់ជាមួយឪពុកម្ដាយគាត់ពេលនៅរស់ប៉ុណ្ណោះ ។ ពុំត្រូវការ ឬពុំចាំបាច់ធ្វើពិធីបរិសុទ្ធនៃព្រះវិហារបរិសុទ្ធដទៃទៀតនោះទេ ប្រសិនបើបុគ្គលនោះបានរស់នៅដល់អាយុ ៨ ឆ្នាំ ឬចាស់ជាងនេះនោះ ។
២៨.៣.៦
បុគ្គលដែលសន្មតថាស្លាប់
ពិធីបរិសុទ្ធនៃព្រះវិហារបរិសុទ្ធអាចត្រូវបានធ្វើឡើងសម្រាប់បុគ្គលម្នាក់ ដែលត្រូវបានគេសន្និដ្ឋានថាបានស្លាប់ ។ ពិធីបរិសុទ្ធទាំងឡាយមិនអាចត្រូវបានធ្វើឡើងឡើយ រហូតដល់ ១០ ឆ្នាំបានកន្លងហួសទៅ តាំងពីពេលដែលបុគ្គលនោះត្រូវបានសន្និដ្ឋានថាបានស្លាប់ ឬត្រូវបានប្រកាសដោយផ្លូវច្បាប់ថាបានស្លាប់ ។ គោលនយោបាយនេះអនុវត្តចំពោះបុគ្គលទាំងឡាយណាដែល ៖
-
បាត់ខ្លួនក្នុងបេសកកម្មប្រយុទ្ធ ឬបាត់ខ្លួនក្នុងសមុទ្រ ។
-
បានបាត់ខ្លួនក្នុងស្ថានភាពដែលការស្លាប់គឺជាក់ស្ដែង ប៉ុន្តែរកសាកសពមិនឃើញ ។
ក្នុងគ្រប់ករណីដទៃទៀតទាំងអស់របស់បុគ្គលដែលបាត់ខ្លួន ពិធីបរិសុទ្ធទាំងឡាយនៃព្រះវិហារបរិសុទ្ធអាចត្រូវធ្វើឡើងក្នុងរយៈពេល ១១០ ឆ្នាំ បន្ទាប់ពីពេលដែលបុគ្គលនោះកើតមក ។
ប្រធានស្តេកអាចនឹងទាក់ទងទៅនាយកដ្ឋានព្រះវិហារបរិសុទ្ធ ប្រសិនបើគាត់មានសំណួរអំពីគោលនយោបាយនេះ ៖
អ៊ីម៉ែល ៖ TempleDepartment@ChurchofJesusChrist.org
២៨.៣.៧
បុគ្គលដែលសម្លាប់ខ្លួន
បុគ្គលដែលសម្លាប់ខ្លួន អាចទទួលបានពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់ពួកគេក្នុងរយៈពេលមួយឆ្នាំ បន្ទាប់ពីមរណភាព ( សូមមើល ៣៨.៦.២០ ) ។
២៨.៣.៨
បុគ្គលដែលត្រូវបានដកហូតសមាជិកភាពសាសនាចក្រ ឬដែលលាលែងសមាជិកភាព
ប្រសិនបើបុគ្គលទាំងឡាយ ដែលត្រូវបានដកហូតសមាជិកភាពសាសនាចក្រ ឬបានលាលែងពីសមាជិកភាព មុនពេលពួកគេបានស្លាប់ នោះការអនុម័តពីគណៈប្រធានទីមួយគឺតម្រូវឲ្យមាន មុនពេលពិធីបរិសុទ្ធនៃព្រះវិហារបរិសុទ្ធអាចធ្វើឡើងសម្រាប់ពួកគេបាន ។ សមាជិកគ្រួសារអាចស្វែងរកការអនុម័តនេះ នៅក្នុងលិខិតមួយទៅកាន់ការិយាល័យនៃគណៈប្រធានទីមួយ បន្ទាប់ពីរយៈពេលមួយឆ្នាំបានកន្លងផុតទៅ តាំងពីមរណភាពរបស់បុគ្គលនោះ ។ លិខិតនោះគួរតែពន្យល់ពីស្ថានភាពនោះ ។ មិនតម្រូវឲ្យមានទម្រង់បែបបទនោះទេ ។ ប៊ីស្សព ឬប្រធានស្តេកអាចជួយជាមួយនឹងសំណើនេះ ប្រសិនបើចាំបាច់ ។
២៨.៣.៨.១
ការចូលមកវិញរបស់មរណជនដែលមិនបានទទួលពិធីអំណោយទានពិសិដ្ឋ
មរណជនដែលមិនបានទទួលពិធីអំណោយទានពិសិដ្ឋ ប៉ុន្តែដែលបានដកហូតសមាជិកភាពសាសនាចក្រ ឬបានលាលែងពីសមាជិកភាព អាចត្រូវអនុញ្ញាតឲ្យចូលមកវិញ តាមរយៈពិធីបុណ្យជ្រមុជទឹក និងពិធីបញ្ជាក់ ។ តម្រូវឲ្យមានការអនុម័តរបស់គណៈប្រធានទីមួយ ដូចដែលបានកត់ចំណាំនៅក្នុង ២៨.៣.៨ ។ មរណជនទាំងនេះពុំត្រូវការការផ្សារភ្ជាប់ជាមួយនឹងឪពុកម្តាយរបស់ពួកគេម្ដងទៀតនោះទេ ប្រសិនបើពួកគេបានកើតនៅក្នុងសេចក្ដីសញ្ញា ឬបានផ្សារភ្ជាប់ទៅនឹងឪពុកម្ដាយរបស់ពួកគេពេលនៅរស់ ។
២៨.៣.៨.២
ការស្តារពរជ័យនៃព្រះវិហារបរិសុទ្ធឡើងវិញសម្រាប់បុគ្គលដែលបានទទួលពិធីអំណោយទានពិសិដ្ឋហើយ
មរណជនដែលបានទទួលអំណោយទានពិសិដ្ឋរួចហើយ ប៉ុន្តែត្រូវបានដកហូតសមាជិកភាពសាសនាចក្រ ឬដែលបានលាលែងសមាជិកភាព ហើយក្រោយមកត្រូវបានអនុញ្ញាតឲ្យចូលមកវិញតាមរយៈពិធីបុណ្យជ្រមុជទឹក និងពិធីបញ្ជាក់ អាចទទួលបព្វជិតភាព និងពរជ័យទាំងឡាយនៃព្រះវិហារបរិសុទ្ធរបស់ពួកគេបានវិញ តែតាមរយៈពិធីបរិសុទ្ធការស្តារឡើងវិញនៃពរជ័យទាំងឡាយប៉ុណ្ណោះ ។ បុគ្គលដូច្នេះមិនត្រូវបានតែងតាំងទៅតំណែងបព្វជិតភាពណាមួយ ឬទទួលអំណោយទានពិសិដ្ឋម្តងទៀតនោះទេ ពីព្រោះពរជ័យទាំងនេះត្រូវបានស្តារឡើងវិញតាមរយៈពិធីបរិសុទ្ធនេះ ។
ដូចដែលបានកត់ចំណាំនៅក្នុង ២៨.៣.៨ វាតម្រូវឲ្យមានការអនុម័តពីគណៈប្រធានទីមួយ ដើម្បីធ្វើពិធីបរិសុទ្ធនេះសម្រាប់មរណជន ។ សម្រាប់ព័ត៌មានអំពីការធ្វើពិធីបរិសុទ្ធនេះសម្រាប់អ្នកនៅរស់ សូមមើល ៣២.១៧.២ ។