“27. Ol Tempol Odinens blong Olgeta we Oli Laef,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“27. Ol Tempol Odinens blong Olgeta we Oli Laef,” Jeneral Hanbuk.
27.
Ol Tempol Odinens blong Olgeta we Oli Laef
27.0
Fas Toktok
Stat long ol taem bifo, taem we i bin gat wan fetful pipol long wol ia, God i bin blesem olgeta wetem ol kavenan mo odinens blong tempol. Samtaem, Hem i bin letem blong oli mekem ol tabu odinens blong Hem aotsaed long ol tempol, long ol ples we i no gat tempol we oli bin dediketem (luk long Jenesis 28:12–22; Eksodas 24; Eksodas 25:8–9; Ita 3). Be, long eni taem we Lod i bin stanemap Jos blong Hem, Hem i bin givim komanmen blong ol pipol blong Hem oli mas bildim wan haos we bae i tekem nem blong Hem. Insaed long tempol ia, Hem i stap talemaot, tru long revelesen, ol odinens mo ol glori blong kingdom blong Hem, mo i stap tijim rod blong fasin blong sevem man. (Luk long 2 Kronikel 3–5; 2 Nifae 5:16; Doktrin mo Ol Kavenan 97:10–16; 124:29–39.)
Tempol hem i haos blong Lod. Hem i poenem yumi i go long Sevya, Jisas Kraes. Insaed long ol tempol, yumi tekpat long ol tabu odinens mo mekem ol kavenan wetem Papa long Heven; ol odinens ia oli joenem yumi long Hem mo long Sevya blong yumi. Ol kavenan mo ol odinens ia oli mekem yumi rere blong gobak long ples we Papa long Heven i stap long hem mo blong yumi sil tugeta olsem ol famli long taem we i no save finis.
Insaed long tempol, i gat ol bigfala blesing oli stap blong ol fetful pikinini blong God long laef ia. Tru long ol kavenan mo odinens blong tempol, “paoa we i olsem hemia blong God, i kamaot” (Doktrin mo Ol Kavenan 84:20). Tempol i wan tabu ples, we insaed long hem, ol memba oli save wosip, oli lanem samting, mo oli kasem advaes mo kamfot (luk long Doktrin mo Ol Kavenan 109:13–16). Olgeta we oli kam long tempol, oli save kam blong yusum paoa ia blong God blong help blong mekem wok ia blong Hem i kamtru (luk long Doktrin mo Ol Kavenan 109:22–23; luk tu long 3.5 insaed long hanbuk ia).
Ol odinens mo kavenan blong tempol oli tabu. Ol simbol we oli go wetem ol kavenan blong tempol, oli no mas tokbaot aotsaed long tempol. Mo tu, yumi no mas toktok raon long tabu infomesen we yumi mekem spesel promes insaed long tempol, se bae yumi no talemaot. Be, yumi save toktok raon long ol besik stamba tingting mo doktrin blong kavenan mo odinens blong tempol, mo filing ia long saed blong spirit we yumi gat insaed long tempol.
Ol lida blong wod mo stek oli toktok raon long infomesen insaed long japta ia wetem ol memba we oli stap rere blong kasem endaomen blong olgeta, o oli stap rere blong kasem ol siling odinens blong olgeta.
27.1
Stap Kasem Ol Odinens blong Tempol
27.1.1
Stap Rere blong Kasem Ol Odinens blong Tempol
Ol memba oli mas mekem olgeta oli rere long saed blong spirit blong oli kasem ol odinens blong tempol, mo blong oli mekem mo givim ona long ol kavenan blong tempol.
Ol papa mo mama oli gat fasfala responsabiliti ia blong helpem ol pikinini blong olgeta blong oli kasem ol odinens blong tempol. Ol lida blong stek mo wod, ol givhan brata mo sista, mo ol nara memba blong famli oli sapotem ol papa mo mama long rol ia blong olgeta.
Ol lida blong wod mo stek, oltaem oli leftemap tingting blong ol memba blong oli stap rere blong kasem ol tempol odinens blong olgetawan. Ol lida oli talem bigwan tu, hamas fasin blong givim ona long ol kavenan blong tempol, mo fasin blong gohed blong stap klin inaf blong kasem mo gat wan tempol rekomen.
Ol risos blong helpem ol memba blong oli stap rere blong kasem ol tempol odinens oli stap long temples.ChurchofJesusChrist.org
Ol memba we oli stap rere blong kasem ol endaomen blong olgetawan, o blong oli sil long hasban o waef blong olgeta, oli stap leftemap tingting blong olgeta blong tekpat long wan kos blong stap rere blong go long tempol (luk long 25.2.8).
Ol memba oli mit wetem bisop mo stek presiden blong olgeta blong kasem wan rekomen blong kasem ol odinens blong wan we i stap laef; oli kasem hemia taem:
-
Oli kasem endaomen blong olgeta bakegen.
-
Oli sil long hasban o waef.
Blong kasem infomesen abaot fasin blong givimaot ol tempol rekomen long ol situesen ia, luk long 26.1 mo 26.3.1
27.1.2
Putum Taem blong Ol Odinens blong Tempol
Ol memba we oli stap plan blong kasem endaomen blong olgeta bakegen, o blong oli sil o mared insaed long tempol, oli mas putum taem blong kasem odinens ia bifo taem wetem tempol ia we oli plan blong stap go long hem. Luk long temples.ChurchofJesusChrist.org blong kasem kontak infomesen blong wanwan tempol.
27.1.3
Ol Memba we Oli Gat Disabiliti long Bodi
Ol memba we oli klin inaf, we oli gat ol disabiliti long bodi, oli save kasem evri odinens blong tempol (luk long 38.2.5). Ol memba ia, oli stap leftemap tingting blong olgeta blong go long tempol wetem ol famli, o ol fren we oli sem jenda, we bae oli save helpem olgeta. Olgeta ia we bae oli help, oli mas gat wan tempol rekomen we i laef i stap. Sapos ol memba oli no save go long tempol wetem wan memba blong famli, o wan fren, oli save ringim tempol bifo taem blong luk wanem plan oli save mekem. Luk long temples.ChurchofJesusChrist.org blong kasem kontak infomesen blong wanwan tempol.
Ol seves dog mo ol animol we oli stap givim sapot long saed blong filing, oli no letem olgeta blong go insaed long ol tempol. Ol stek presiden oli save kontaktem Tempol Dipatmen long TempleDepartment@ChurchofJesusChrist.org sapos oli gat ol kwestin.
27.1.4
Translesen o Intepretesen Help
Sapos ol memba oli nidim translesen o intepretesen help, oli mas kontaktem tempol bifo taem blong luk sapos i gat kaen help ia. Luk long temples.ChurchofJesusChrist.org blong kasem kontak infomesen blong wanwan tempol.
27.1.5
Ol Klos blong Werem blong Go long Wan Tempol
Taem ol memba oli stap go long wan tempol, oli mas werem kaen klos ia we oli stap werem blong go long sakramen miting. Oli mas traem blong oli no werem ol klos we oli werem evri dei, o klos we i no kavremap gamen blong tempol. Oli mas stap longwe blong werem ol klos we i tumas, olsem ol taksedo (flas ful sut). Instraksen ia, ol papa mo mama nao oli tijim i gud moa; ol givhan brata mo sista, ol lida blong wod mo stek oli givhan taem ol memba oli rere blong wosip insaed long tempol.
Luk long 27.3.2.6 blong kasem sam infomesen abaot ol klos blong werem blong stap long wan tempol mared o siling.
Luk long 38.5 blong kasem sam moa infomesen long saed blong:
-
Ol klos blong werem long taem blong endaomen o ol siling odinens.
-
Fasin blong kasem, werem, mo kea long ol klos blong seremoni blong tempol mo ol gamen.
27.1.6
Lukaotem Pikinini
I mas gat wan bigman o bigwoman we i stap lukaot long ol pikinini sapos oli stap long graon blong tempol. Ol wokman blong tempol oli stap ia blong lukaotem ol pikinini taem i gat ol situesen ia:
-
Sapos oli stap rere blong sil long papa mo mama
-
Sapos oli stap luk siling blong brata o sista blong olgeta we i laef i stap, blong ol step brata mo sista, mo blong ol haf brata mo sista, wetem papa mo mama blong olgeta.
27.1.7
Stap Mit Wetem Ol Memba afta we Oli Kasem Ol Odinens blong Tempol
Ol memba, plante taem, oli gat ol kwestin afta we oli kasem ol tempol odinens. Ol famli we oli ol memba we oli endao, bisop, ol nara lida blong wod, mo ol givhan brata mo sista oli save mit wetem ol memba blong toktok raon long tempol eksperiens blong olgeta.
Ol lida tu oli leftemap tingting blong ol memba blong lukaotem ol ansa long kwestin blong olgeta tru long insperesen we i kam tru long Tabu Spirit. Insaed long tempol, Spirit i save givim ol ansa long fulap long ol kwestin we ol memba oli save gat abaot eksperiens blong olgeta long tempol.
Ol risos blong helpem ol memba blong ansarem ol kwestin, oli stap long temples.ChurchofJesusChrist.org.
27.2
Endaomen
Toktok ia endaomen i minim “wan presen.” Endaomen blong tempol, hem i wan presen ia nao we i kam long God; tru long presen ia Hem i stap blesem ol pikinini blong Hem. Endaomen ia, oli kasem olgeta insaed long ol tabu tempol. Samfala long ol presen ia we ol memba oli kasem tru long endaomen blong tempol, i gat:
-
Moa save long saed blong ol stamba tingting mo ol tijing blong Lod.
-
Paoa blong mekem evri samting we Papa long Heven i wantem ol pikinini blong Hem blong oli mekem.
-
Daereksen we i kam long heven taem we wan i givim seves long Lod, famli blong olgeta, mo ol narawan.
-
Hop, kamfot mo pis we i kam moa bigwan oltaem.
Evri blesing blong endaomen ia, oli laef fulwan, tugeta, long laef ia long wol ia, mo long taem we i no save finis. Blong ol blesing ia oli kamtru, bae i dipen long hamas nao wan i fetful long gospel ia blong Jisas Kraes.
Endaomen ia, oli kasem long tu pat. Long fas pat, wan i kasem wan fasfala odinens we oli singaotem odinens blong mekem rere. Odinens ia blong mekem rere i gat tri odinens: blong wasem, anoentem, mo putum klos (luk long Eksodas 29:4–9). Hem i tekem ol spesel blesing we i go wetem tabu fasin mo ful paoa we wan i save kasem.
Long taem blong odinens blong mekem rere, memba i mekem kavenan blong werem gamen blong tempol. Gamen ia, i ripresentem rilesensip we hem i gat wetem God, mo komitmen ia blong obei ol kavenan we hem i mekem insaed long tempol. Taem we ol memba oli stap fetful long ol kavenan blong olgeta, mo oli werem gamen long stret fasin truaot long laef blong olgeta, nao gamen ia hem i stap tu olsem wan proteksen. Blong gat sam infomesen abaot fasin blong stap werem mo kea long gamen, luk long 38.5.5.
Long seken pat blong endaomen, oli tijim plan blong fasin blong sevem man, we i tekem Kriesen, Foldaon blong Adam mo Iv, Atonmen blong Jisas Kraes, Apostasi, mo Restoresen. Mo tu, ol memba oli kasem instraksen abaot wei blong gobak long ples we Lod i stap long hem.
Long taem blong endaomen, oli stap invaetem ol memba blong mekem ol tabu kavenan olsem we i stap ia:
-
Laef folem loa blong stap obei mo stap traehad blong obei ol komanmen blong Papa long Heven.
-
Obei long loa blong sakrifaes, we i minim, blong sakrifaes long sam samting blong sapotem wok blong Lod, mo blong stap sakem sin wetem wan hat we i gat sore mo wan spirit we i wantem sakem sin.
-
Obei long loa blong gospel blong Jisas Kraes, we i minim:
-
Stap eksasaesem fet long Jisas Kraes.
-
Stap sakem sin evri dei.
-
Stap mekem ol kavenan wetem God taem yumi kasem ol odinens blong fasin blong sevem man, mo fasin blong kam olsem wan god.
-
Stap strong kasem en taem yumi kipim ol kavenan.
-
Stap traehad blong laef folem tufala bigfala komanmen. Hemia hem i blong “lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu” (Matiu 22:37, 39).
-
-
Kipim loa blong jastiti we i minim blong, no gat eni rilesen long saed blong seks aotsaed long wan mared folem loa bitwin wan man o wan woman, we i folem loa blong God.
-
Kipim loa blong konsekresen, i minim se ol memba oli dediketem o givim fulwan, taem, ol talen, mo evri samting we Lod i blesem olgeta wetem, blong bildimap Jos blong Jisas Kraes long wol ia.
Long nara saed, Papa long Heven i promesem se olgeta we oli gohed blong stap fetful long ol tempol kavenan blong olgeta, bae Hem i kavremap olgeta “wetem paoa we i kam long heven” (Doktrin mo Ol Kavenan 38:32, 38; luk tu long Luk 24:49; Doktrin mo Ol Kavenan 43:16).
27.2.1
Huia I Save Kasem Endaomen
Evri adalt memba blong Jos we oli akaontebol, oli stap invaetem olgeta blong oli rere from endaomen mo oli rere blong kasem stret endaomen blong olgetawan bakegen. Evri odinens we i mas hapen fastaem, bae ol memba oli mas mekem mo oli mas rekodem olgeta bifo ol memba oli save kasem endaomen (luk long 26.3.1). Luk long 27.2.2 blong kasem ol infomesen abaot fasin blong disaed wetaem blong kasem endaomen.
27.2.1.1
Ol Niu Memba we Oli Jes Baptaes
Ol niu adalt memba we oli klin inaf, oli save kasem endaomen blong olgeta afta wan ful yia (luk long 26.5.2).
27.2.1.2
Ol Memba we Oli Gat Hasban o Waef we I No Endao
Wan memba we i klin inaf, we hasban o waef blong hem i save kasem stret endaomen blong hemwan bakegen taem hem i mekem folem olgeta kondisen ia:
-
Hasban o waef ia we i no endao i givim raet blong hem.
-
Memba, bisop mo stek presiden oli gat tras ia se responsabiliti we i kam wetem ol kavenan blong tempol, bae i no mekem wan problem long mared ia.
Ol kondisen ia oli laef i nomata se waef o hasban i wan memba blong Jos o nogat.
27.2.1.3
Ol Brata we Oli Gat Disabiliti long Tingting
Ol memba we oli gat ol disabiliti long tingting oli save kasem endaomen blong olgetawan, sapos:
-
Oli kasem evri fasfala odinens we oli mas kasem bifo long endaomen (luk long 26.3.1).
-
Tingting blong olgeta i inaf blong andastanem, mekem mo kipim ol kavenan we oli kam wetem.
Bisop i toktok wetem memba, mo, taem we i gat, papa mo mama blong hem. Hem i wok anda long daereksen blong Spirit. Hem i kaonsel wetem stek presiden. Stek presiden i save askem ol kwestin blong hem long Ofis blong Fas Presidensi sapos i nid. Luk long 38.2.4.
27.2.2
Jekem Ol Odinens Bifo Wan I Kasem Endaomen
Desisen ia blong kasem endaomen, i wan desisen we i blong wanwan man o woman, mo desisen ia, wan i mas mekem wetem prea. Endaomen hem i wan blesing blong paoa mo revelesen long evriwan we bae i rere blong kasem endaomen ia. Ol memba oli save jusum blong kasem endaomen blong olgeta taem oli mekem evri samting ia we oli askem:
-
Oli mas gat 18 yia i go antap.
-
Oli mas finisim, o oli nomo go long hae skul, o sekendri skul, o wan level blong skul we i semmak.
-
Wan ful yia i pas, stat long taem ia we oli kasem konfemesen.
-
Oli filim se oli wantem kasem mo givim ona long ol tabu kavenan blong tempol long ful laef blong olgeta.
Ol memba we oli kasem wan koling blong go long misin, o oli stap rere blong oli sil insaed long tempol, oli mas kasem endaomen ia. Bisop i kaonsel tu wetem ol nara adalt memba we oli wantem blong kasem endaomen.
Bifo oli givimaot tempol rekomen blong wan memba i kasem endaomen, bisop mo stek presiden oli mas filim se, man o woman ia, i rere blong andastanem mo kipim ol tabu kavenan blong tempol. Blong talem se wan i rere blong go long tempol, oli mekem folem hamas wanwan i rere. Ol lida oli no mas yusum ol jeneral mak, olsem olgeta we oli stap daon ia, taem oli stap disaed se wan i rere o no blong kasem endaomen:
-
I olfala finis
-
I lego hom blong go long yunivesiti, i go wok, o go long ami
-
I wantem luk siling long tempol blong wan memba blong famli o wan fren
27.2.3
Stap Mekem Plan mo Putum Taem blong Kasem Endaomen
27.2.3.1
Stap Kasem Wan Rekomen blong Ol Odinens blong Taem Wan I Laef
Wan memba i mas kasem wan rekomen blong ol odinens we oli mekem blong wan i laef yet i stap; hem i kasem rekomen ia blong go insaed long wan tempol, mo kasem endaomen. Blong kasem moa infomesen abaot ol rekomen ia, luk long 26.5.1.
27.2.3.2
Stap Kontaktem Tempol
Ol memba we oli stap plan blong kasem endaomen blong olgeta, oli mas kontaktem tempol bifo taem, blong putum wan dei mo taem blong kasem odinens ia (luk long 27.1.2). Tempol bae i givim ol instraksen, wetem infomesen long saed blong klos blong tempol, long taem we bae oli putum dei mo taem blong apoenmen.
27.2.3.3
Olgeta we Oli Helpem Ol Memba we Oli Stap Kasem Endaomen
Ol memba we oli stap kasem endaomen blong olgeta bakegen, oli save invaetem wan memba we i endao finis, we i sem jenda olsem hem, blong i stap blong helpem hem long taem blong endaomen sesen. Hem we i help ia, hem tu i mas gat wan tempol rekomen we i laef i stap. Tempol i save givim wan blong help sapos i nid.
27.3
Siling blong Hasban mo Waef
“Famli, God nao i odenem. Mared bitwin wan man mo wan woman, i wan mas long plan ia we i no save finis” (“Famli: Wan Ofisol Toktok I Go long Wol”) Wan tempol siling i joenem wan hasban mo wan waef tugeta blong taem naoia mo blong evri taem we i no save finis. Ol kapol, we oli sil insaed long wan tempol, oli promesem tufala blong kasem glori mo glad truaot long taem we i no save finis (luk long Doktrin mo Ol Kavenan 132:19–20 Bae tufala i kasem ol blesing ia sapos tufala i fetful long ol kavenan blong tufala, we tufala i mekem insaed long tempol. Tru long odinens ia, ol pikinini blong tufala oli save pat blong wan famli we i no save finis.
Ol lida blong Jos oli leftemap tingting blong ol memba blong oli kwalifae blong mared insaed long tempol, mo sil insaed long wan tempol. Long ol ples we, folem loa, oli no luksave ol tempol mared, ol lida oli save mekem ol sivil o gavman mared, mo afta, mekem wan tempol siling (luk long 38.3). Paten ia, oli save folem rod ia tu taem we tempol mared bae i mekem se ol papa mo mama, o ol stret memba blong famli oli filim se oli no pat blong mared ia from se oli no save kam long tempol seremoni ia.
27.3.1
Hu Nao I Save Sil Insaed long Wan Tempol
Evri memba blong Jos we oli no mared, mo oli akaontebol, oli stap invaetem olgeta blong rere from wan tempol siling. Olgeta we oli mared folem loa blong kantri, oli leftemap tingting blong olgeta blong oli sil blong taem long laef ia mo blong taem we i no save finis insaed long tempol, stret afta we oli rere. Ol memba oli mas endao bifo oli save sil (luk long 27.2).
Ol kapol we oli stap sil long tempol, oli mas (1) mared folem loa blong kantri bifo oli sil, o (2) oli mared mo sil long semfala tempol seremoni ia. Luk long 27.3.2.
27.3.1.1
Ol Memba we Oli Bin Sil long Wan Hasban o Waef Bifo
Luk long 38.4.1.
27.3.1.2
Ol Brata we Oli Gat Disabiliti long Tingting
Ol memba we oli gat ol disabiliti long tingting oli save sil long hasban o waef blong olgeta, o boefren o gelfren blong olgeta sapos:
-
Oli kasem evri fasfala odinens we oli mas kasem bifo long endaomen (luk long 27.2.1.3).
-
Tingting blong olgeta i inaf blong andastanem, mekem mo kipim ol kavenan we oli kam wetem.
Bisop i toktok wetem memba, mo waef o hasban blong hem, o boefren o gelfren blong hem. Hem i wok anda long daereksen blong Spirit. Hem i kaonsel wetem stek presiden. Stek presiden i save askem ol kwestin blong hem long Ofis blong Fas Presidensi sapos i nid. Luk long 38.2.4.
27.3.2
Stap Mekem Plan mo Putum Taem blong Wan Tempol Mared o Siling
27.3.2.1
Stap Kasem Wan Rekomen blong Ol Odinens blong Taem Wan I Laef
Wan memba i mas kasem wan rekomen blong kasem ol odinens blong taem wan i laef, blong hem i save sil long hasban o waef blong hem. Blong kasem moa infomesen abaot ol rekomen ia, luk long 26.3.
27.3.2.2
Stap Kontaktem Tempol
Ol memba we oli stap plan blong oli mared o sil long hasban o waef blong olgeta, oli mas kontaktem tempol bifo taem blong putum taem blong kasem odinens ia (luk long 27.1.2). Tempol bae i givim ol instraksen taem bae oli putum dei mo taem blong apoenmen.
27.3.2.3
Stap Kasem wan Laesens blong Mared
Bifo oli mared, wan kapol i mas kasem wan mared laesens we i laef long ples ia we bae oli mekem mared. Sapos kapol ia i plan blong i mared, mo tu i sil long semfala seremoni ia, oli mas tekem wan mared laesens we i laef i stap, i kam long tempol.
Ol kapol we oli sil afta long wan sivil mared, oli no nid blong tekem wan mared laesens i kam long tempol. Be, oli givim deit mo taem we sivil o gavman mared blong tufala i bin tekem ples olsem pat blong jekem ol rekod we oli stap.
27.3.2.4
Olgeta we Oli Helpem Woman mo Man we Bae I Mared
Wan sista we i endao finis i save go wetem woman we bae i mared blong helpem hem insaed long rum blong dresap. Wan brata we i endao finis i save mekem semmak long man we bae i mared. Hem we i help ia, hem tu i mas gat wan tempol rekomen we i laef i stap. Tempol i save givim wan blong help sapos i nid.
27.3.2.5
Huia i Stap Mekem Wan Tempol Mared o Siling
Plante taem, wan tempol mared o siling, bae wan we i givim seves insaed long tempol we kapol bae i mared o sil nao, bae i mekem hemia. Sapos wan memba blong famli, o wan we yumi save gud hem i holem atoriti ia blong mekem siling, mo i kasem wok ia blong mekem wok long tempol ia we kapol bae i mared o sil long hem, oli save invaetem hem blong mekem mared o siling blong tufala.
Wan we i stap mekem ol siling, i save askem tu, raet ia, long Fas Presidensi, blong mekem wan siling blong olgeta we oli kamaot long laen blong hem (ol pikinini, ol apupikinini, mo ol smol apupikinini) insaed long wan tempol we i no hemia we hem i kasem wok blong wok insaed long hem. Hem i mas kasem wan leta we i givim raet long hem; leta ia i kam long Fas Presidensi, mo i mas gat wan blong wanwan siling we bae i hapen. Hem i presentem leta ia long tempol.
Oli no leftemap tingting blong ol memba blong askem wan long ol Jeneral Atoriti blong mekem tempol mared o siling blong olgeta.
27.3.2.6
Stret Klos blong Wan I Mared long Tempol o blong Siling
Dres blong Woman we Bae I Mared. Dres blong wan woman we bae i mared, we bae i werem insaed long tempol, bae i waet, stael blong hem i no go tumas, mo kaliko blong hem i simpol; i no gat tumas samting i flasem dres tumas. Dres ia i mas kavremap gamen blong tempol. Ol kaliko we oli tintin, bae oli mas aeanem olgeta.
Blong i semmak wetem ol nara dres we oli stap werem insaed long tempol, dres blong woman we bae i mared i mas gat longfala han, o tri kwota han. Dres blong woman we bae i mared i no mas gat wan longfala kaliko we i hang biaen, be nomo sapos oli save karemaot longfala kaliko ia bifo seremoni blong siling.
Tempol i save givim wan dres blong help sapos i nid, o sapos oli wantem.
Klos blong Man we Bae I Mared. Man we bae i mared i werem ol nomol klos blong tempol long taem blong mared o siling seremoni (luk long 38.5.1 mo 38.5.2). Hem i save werem ol nara nomol kala klos aotsaed long tempol blong save tekem ol foto afta long seremoni.
Klos blong Olgeta we Oli Invaetem Olgeta. Olgeta we oli kam long wan mared o siling seremoni, oli mas werem klos we i semmak long wanem we bae oli werem i go long wan sakramen miting. Ol memba we oli kam long wan mared stret afta long wan endaomen sesen, oli save werem ol klos blong seremoni blong tempol.
Kapol ia, bae i mas serem infomesen ia wetem olgeta we oli invaetem olgeta; oli mekem hemia longtaem bifo long mared o long siling.
Ol Flaoa. Kapol ia, mo olgeta we tufala i invaetem olgeta, oli no mas werem o holem flaoa long taem blong mared o siling seremoni. Oli save werem o holem flaoa aotsaed long tempol blong save tekem ol foto afta long seremoni. Kapol ia, bae i mas serem infomesen ia wetem olgeta we oli invaetem olgeta; oli mekem hemia longtaem bifo long mared o long siling.
27.3.2.7
Jenjenisim Ol Ring Afta long Wan Tempol Mared o Siling
Blong stap jenjenisim ring, i no pat blong seremoni blong tempol siling. Be, ol kapol oli save jenjenisim ring afta long seremoni insaed long siling rum. Ol kapol oli no mas jenjenisim ring long eni nara taem o ples insaed long wan tempol, o long graon blong tempol. Sapos oli mekem olsem, i save spolem tingting mo nomo lukluk long seremoni.
Ol kapol we oli mared mo sil long semfala seremoni ia, oli save jenjenisim ol ring long wan nara taem blong mekem se ol memba blong famli, we oli no save kam insaed long tempol from tempol mared ia, oli gat wan janis blong luk hemia. Taem ia blong jenjenisim ring, i mas go wetem hamas respek we i stap long tempol mared blong tufala. Blong stap jenjenisim ring, i no mas kopi o ripitim eni pat blong tempol mared o siling seremoni ia. Kapol ia, oli no mas talem promes bakegen afta we tufala i bin mared o sil insaed long tempol.
Ol kapol we oli mared folem loa blong kantri bifo oli sil insaed long tempol, oli save jenjenisim ring long sivil seremoni blong tufala, long tempol siling blong tufala, o long tugeta seremoni.
27.3.3
Mared Insaed long Wan Tempol blong Taem blong Laef Ia Nomo
Stamba tingting blong gat tempol, hem i blong mekem ol odinens blong taem we i no save finis. From risen ia, ol mared blong taem naoia, o laef long wol ia nomo, oli nomo stap mekem olgeta insaed long ol tempol.
Long saed blong polisi blong silim wan kapol we oli bin mared finis insaed long tempol blong laef ia nomo, luk long 38.4.1.6.
27.3.4
Huia i Save Kam long Wan Tempol Mared o Siling
Ol kapol oli mas invaetem ol memba blong famli mo ol gudfala fren blong olgeta blong oli stap long tempol mared blong tufala o siling. Olgeta we oli akaontebol, oli mas endao finis mo oli mas gat wan tempol rekomen we i laef i stap blong atendem.
Sam memba we oli gat rekod, oli no baptaesem olgeta from disabiliti long saed blong tingting, mo sam oli baptaes be oli no endao from semmak risen. Stek presiden i save givim raet long olgeta i lukluk wan tempol mared o siling blong wan brata o sista blong hem, sapos i:
-
Gat 18 yia i go antap.
-
Save stap revren long taem blong seremoni.
Stek presiden i raetem wan leta we i talem se man o woman ia, i gat raet blong lukluk siling. Leta ia, oli presentem long tempol.
Ol memba oli mas endao mo gat wan tempol rekomen we i laef i stap blong save lukluk siling blong papa mo mama blong tufala.
27.3.5
Lafet blong Mared
Luk long 38.3.4 blong kasem ol infomesen long saed blong fasin blong holem lafet blong mared insaed long ol bilding blong Jos.
27.4
Stap Silim Ol Pikinini long Papa mo Mama
Ol pikinini we oli bon afta we mama blong olgeta i sil long wan hasban insaed long wan tempol, oli bon insaed long kavenan blong siling ia. Oli no nid blong oli kasem odinens blong silim olgeta long papa mo mama blong olgeta.
Ol pikinini we oli no bon insaed long kavenan oli save kam pat blong wan famli we i no save finis taem oli sil wetem stret papa mo mama we i bonem olgeta, o wetem papa mo mama we i adoptem olgeta. Ol pikinini ia oli kasem sem raet blong kasem ol blesing olsem olgeta we oli bon insaed long kavenan.
Luk long 38.4.2 blong kasem ol polisi abaot fasin blong silim ol pikinini long papa mo mama blong olgeta.
27.4.1
Stap Givim Wan Rekomen blong Silim Ol Pikinini we Oli Stap Laef I Stap i Go long Papa mo Mama blong Olgeta
Ol memba we oli akaontebol, we oli gat 8 yia i go antap, oli nidim wan rekomen blong oli silim olgeta long papa mo mama blong olgeta. Mo tu, oli nidim wan rekomen blong luk siling blong brata o sista blong olgeta we i laef i stap, blong ol step brata mo sista, mo blong ol haf brata mo sista, wetem papa mo mama blong olgeta (luk long 27.4.4). Ol pikinini we oli gat 8 yia i go antap, oli mas kasem baptaes mo konfemesen blong save kasem wan tempol rekomen. Olgeta we oli ol man, we oli gat 11 yia finis mo bae oli kasem 12 yia long yia ia we odinens bae i tekples, oli mas holem prishud.
Ol memba oli 21 yia i go antap, oli mas endao mo gat wan tempol rekomen we i laef i stap blong save sil long papa mo mama blong olgeta.
Stek presiden i save givim raet long olgeta we oli no bin baptaes o endao, from se oli gat ol disabiliti long tingting, blong oli sil long papa mo mama blong olgeta. Stek presiden i raetem wan leta we i talem se man o woman ia, i gat raet blong hem i sil. Leta ia, oli presentem long tempol.
Luk long 26.4.4 blong kasem ol infomesen abaot fasin blong givimaot ol rekomen long ol pikinini.
27.4.2
Stap Kontaktem Tempol
Wan kapol i we oli wantem se bae ol pikinini blong tufala i sil long tufala, o, ol pikinini we oli wantem blong oli sil long papa mo mama blong olgeta we tufala i ded finis, oli stap plan blong oli mared o sil papa mo mama we oli bin ded, oli mas kontaktem tempol bifo taem blong putum taem blong kasem odinens ia (luk long 27.1.2). Long sam kes, bae i nid blong kasem ol nara odinens blong tempol bifo siling ia i hapen.
27.4.3
Lukaotem Pikinini
Luk long 27.1.6.
27.4.4
Hu I Save Stap long Siling blong Ol Pikinini we Oli Stap Laef I Stap I Go long Papa mo Mama blong Olgeta
Blong save lukluk siling blong ol brata mo sista we oli laef, o blong ol haf brata mo sista we oli laef i go long papa mo mama blong olgeta, ol memba we oli no endao mo oli anda long 21 yia, oli mas bon insaed long kavenan o sil i go long papa mo mama blong olgeta. Antap long hemia, ol pikinini we oli gat 8 yia i go antap, oli mas kasem baptaes mo konfemesen, mo oli mas gat wan tempol rekomen we i laef (luk long 26.4.4). Olgeta we oli ol man, we oli gat 11 yia finis mo bae oli kasem 12 yia long yia ia we odinens bae i tekples, oli mas holem prishud.
Ol memba oli 21 yia i go antap, oli mas endao mo gat wan tempol rekomen we i laef i stap blong save lukluk ol siling ia.
Ol memba we oli mared we oli no kasem 21 yia yet, oli no nid blong kasem endaomen blong save lukluk ol siling ia. Be, oli mas gat wan tempol rekomen we i laef (luk long 26.4.4).
Stek presiden i save givim raet long wan we i no bin baptaes o endao from se oli gat ol disabiliti long tingting, blong oli save luk siling blong ol brata mo sista blong olgeta, ol step brata mo sista, o haf brata mo sista blong olgeta, we oli laef i stap, i go long papa mo mama blong olgeta. Stek presiden i raetem wan leta we i talem se man o woman ia, i gat raet blong lukluk siling. Leta ia, oli presentem long tempol.