26.

Parau fa’ati’a nō te hiero

26.0

’Ōmuara’a

E ha’amaita’ira’a mo’a te tomora’a i roto i te hiero. E fa’aitoito te feiā fa’atere o te pāroita ’e o te titi i te mau melo ato’a ’ia ti’a-mā ’e ’ia fāri’i i te hō’ē parau fa’ati’a mana nō te hiero, noa atu ē, ’aita rātou e ora ra i pīha’i iho i te hō’ē hiero.

’Ia rave te feiā fa’atere o te ’Ēkālesia i te mau tauto’ora’a ato’a nō te hi’o ē, e mea ti’a-mā te mau ta’ata ato’a e tomo i roto i te hiero nō te rave i te reira (hi’o Salamo 24:3–5). Nā te feiā fa’atere o te autahu’ara’a tei ha’amanahia e fa’atere te mau uiuira’a nō te parau fa’ati’a nō te hiero ’e e hōro’a i te parau fa’ati’a nō te hiero i te mau melo e pāhono ti’a i te mau uira’a ma te ateate (hi’o 26.3). ’Ua fafau mai te Fatu ē, mai te mea e mea mā te feiā e tomo i roto i te hiero, tei reira ’oia (hi’o Te Ha’api’ira’a Tumu ’e te mau Fafaura’a 97:15–16).

Tītauhia i te mau melo ’ia fāri’i i te hō’ē parau fa’ati’a mana nō te hiero, nō te tomo atu i roto. Te mau tamari’i i raro mai i te 8 matahiti ’o tē tā’atihia ra i tō rātou nā metua ’aore rā, ’o tē hi’o ra i te tā’atira’a o tō rātou mau taea’e ’e mau tuahine i tō rātou nā metua, ’aita e tītauhia nō rātou te parau fa’ati’a (hi’o 26.4.4).

Tei roto i teie pene te mau arata’ira’a nō te feiā fa’atere ’o tē hōro’a atu i te parau fa’ati’a nō te hiero. E fārerei atu te ’episekōpo ’e tōna peresideni titi mai te mea e mau uira’a tāna nō ni’a i te parau fa’ati’a nō te hiero, ’o tā teie pene e ’ore e pāhono. E nehenehe te peresideni titi e fārerei atu i te piha tōro’a a te Peresidenira’a Mātāmua ’e te mau uira’a.

26.1

Mau huru parau fa’ati’a nō te hiero

E fa’ati’a te parau fa’ati’a mana nō te hiero i te hō’ē melo ’ia tomo i roto i te mau hiero ato’a. ’Ia pāpū i te feiā fa’atere o te autahu’ara’a ē, ’ua fāri’i te mau melo i te parau fa’ati’a tano nō tō rātou huru tupura’a. Tē vai ra e toru huru parau fa’ati’a :

1. Parau fa’ati’a nō te hiero nā te mau melo tei ’ore i rave i tō rātou iho ’ōro’a hiero. Teie mau parau fa’ati’a nō te mau melo tei ’ore i rave i tō rātou iho ’ōro’a hiero, ’o tē tā’atihia i tō rātou nā metua ’aore rā ’o tē rave nā roto i te monora’a i te mau bāpetizora’a ’e te mau ha’amaura’a. E hōro’ahia te reira nā roto Te mau rāve’a tauturu nā te feiā fa’atere ’e te pāpa’i parau (DDG). Nō te mau ha’amāramaramara’a hau atu, hi’o 26.4.

2. Parau fa’ati’a nō te hiero nō te mau ’ōro’a o te feiā ora. Teie mau parau fa’ati’a nō te mau melo ïa e fāri’i i tō rātou iho ’ōro’a hiero ’aore rā e tā’atihia i tō rātou hoa fa’aipoipo. E hōro’ahia te reira nā roto i te buka parau fa’ati’a 2. ’Ua tā’amuhia te parau fa’ati’a o te mau ’ōro’a nō te feiā ora i te parau fa’ati’a tāmau nō te hiero nō te mau melo tei rave i tō rātou iho ’ōro’a hiero (mai tei fa’ata’ahia i raro nei). E tāpe’a te hiero i te pae o te parau fa’ati’a o te ’ōro’a nō te feiā ora, ’ia rave-ana’e-hia te ’ōro’a. E tāpe’a te melo i te parau fa’ati’a tāmau ’e e fa’a’ohipa ’oia i te reira ’ia ho’i fa’ahou ’oia i te hiero.

3. Parau fa’ati’a nō te hiero nō te mau melo tei rave i tō rātou ’ōro’a hiero. Teie mau parau fa’ati’a nō te mau melo ïa tei fāri’i a’ena i tō rātou ’ōro’a hiero. E hōro’ahia te reira nā roto te DDG. E fa’ati’a te reira i te hō’ē melo ’ia ’āmui i roto i te mau ’ōro’a ato’a o te hiero nō te feiā tei pohe. E fa’a’ohipa-ato’a-hia te reira, ’ia tā’ati-ana’e-hia te hō’ē melo tei rave i tōna ’ōro’a hiero i nā metua ’aore rā i te mau tamari’i e ora ra ’aore rā tei pohe. Nō te mau ha’amāramaramara’a hau atu, hi’o 26.3.

26.2

Pārurura’a i te mau parau fa’ati’a nō te hiero

26.2.1

Te pārurura’a te feiā fa’atere o te autahu’ara’a i te mau parau fa’ati’a nō te hiero

E ti’a i te feiā fa’atere o te autahu’ara’a tei fa’ati’ahia ’ia fāri’i i te mau buka o te mau parau fa’ati’a nō te hiero, ’ia pāruru māite i te reira. ’Aita te ta’ata ’ē atu e ti’a ’ia fāri’i i te reira. ’Ia fa’a’āpī ana’e te ’Ēkālesia i te mau buka nō te mau parau fa’ati’a nō te hiero, e ha’amou te feiā fa’atere i te mau buka tahito.

’Ia ara ato’a te feiā fa’atere o te autahu’ara’a ē, ’eiaha roa te feiā ’o tei ’ōpanihia ’ia tomo atu i roto i te ha’amāramaramara’a nō te parau fa’ati’a nō te hiero i ni’a te DDG.

26.2.2

Te ha’amoura’a i te mau parau fa’ati’a o te hiero tei hope

E ani te peresidenira’a titi ’e misiōni i te mau parau fa’ati’a tahito o te hiero i te mau melo, ’ia uiui ana’e rātou i te mau melo nō te hō’ē parau fa’ati’a ’āpī. E ha’amou rātou i te mau parau fa’ati’a tahito.

26.2.3

Te mo’era’a ’aore rā ’ua ’eiāhia te parau fa’ati’a

E ani te ’episekōpo i te mau melo ’ia fa’aara ’oi’oi atu iāna, ’ia mo’e noa atu ’aore rā ’ia ’eiāhia te parau fa’ati’a. E fa’a’ohipa ’oia ’aore rā te hō’ē tauturu i fa’auehia ’aore rā te pāpa’i parau te DDG nō te fa’a’ore ’oi’oi i te parau fa’ati’a. Mai te mea ’aita e vai ra teie fa’anahora’a, e fārerei atu te ’episekōpo i te piha tōro’a o te hiero nō te fa’a’ore i te parau fa’ati’a.

I muri noa mai te fa’a’orera’a i te parau fa’ati’a tei mo’e ’aore rā tei ’eiāhia, e fa’atere te ’episekōpo ’aore rā te hō’ē tauturu tei fa’auehia i te uiuira’a nō te parau fa’ati’a nō te hiero ’e te melo, nō te hōro’a i te hō’ē parau fa’ati’a ’āpī.

26.2.4

Te feiā e mau nei i te parau fa’ati’a, ’aita e ora nei i te mau fa’aturera’a o te ti’a-mā-ra’a

Mai te mea e fa’aoti te ’episekōpo ē, ’aita te hō’ē melo e mau nei i te parau fa’ati’a mana e ora nei i te mau fa’aturera’a o te ti’a-mā-ra’a (hi’o 26.3), e tītau ’oia i te parau fa’ati’a i te melo. E fa’a’ohipa ’oia te DDG nō te fa’a’ore i te parau fa’ati’a. Mai te mea ’aita e vai ra teie fa’anahora’a, e fārerei atu te ’episekōpo i te piha tōro’a o te hiero nō te fa’a’ore i te parau fa’ati’a.

26.3

Te mau arata’ira’a rahi nō te hōro’ara’a i te mau parau fa’ati’a o te hiero

Nā te feiā fa’atere o te autahu’ara’a i ha’amanahia e rave i te mau uiuira’a, hou te hō’ē melo e fāri’i ai i te hō’ē parau fa’ati’a nō te hiero. Tei roto te mau arata’ira’a i te DDG. E hōro’a te feiā fa’atere o te autahu’ara’a i te hō’ē parau fa’ati’a mai te mea noa e pāhono ti’a te melo, i te mau uira’a nō te parau fa’ati’a o te hiero.

E fa’ati’a te mau uiuira’a nō te parau fa’ati’a nō te hiero i te mau melo ’ia fa’a’ite mai ē, e ’itera’a pāpū tō rātou ’e tē tūtava nei rātou i te ha’apa’o i te mau fa’auera’a a te Atua ’e i te pe’e i tāna mau peropheta. E ha’apāpū ato’a te feiā fa’atere o te autahu’ara’a, nā roto i te uiuira’a, e mea ti’a-mā te melo.

’Eiaha e rū noa te mau uiuira’a nō te parau fa’ati’a nō te hiero. ’Ia vai ’ōmo’e noa rātou e ti’a ai. Terā rā, e nehenehe te ta’ata e uiuihia ra e ani i te tahi atu ta’ata pa’ari ’ia haere ato’a mai. E nehenehe te hō’ē feiā ’āpī e ani i te hō’ē metua ’aore rā i te hō’ē ta’ata pa’ari ’ia haere ato’a mai i roto i te hō’ē uiuira’a nō te parau fa’ati’a.

’Eiaha te feiā fa’atere o te autahu’ara’a e tu’u i te tahi atu mau tītaura’a maori rā tei fa’a’itehia i roto i te buka o te parau fa’ati’a nō te hiero. ’Eiaha ato’a rātou e ’īriti i te tahi atu mau tītaura’a. Terā rā, ’ia hōro’a-ana’e-hia te parau fa’ati’a i te feiā ’āpī, e fa’atano te feiā fa’atere i te mau uira’a i te matahiti ’e i te huru orara’a o te feiā ’āpī.

I te tahi taime e mau uira’a tā te mau melo i roto i te hō’ē uiuira’a nō te parau fa’ati’a nō te hiero. E nehenehe te ti’a fa’atere o te autahu’ara’a e fa’ata’a mai i te mau parau tumu niu o te ’evanelia. E nehenehe ato’a ’oia e tauturu i te mau melo ’ia māramarama i te mau uira’a nō te parau fa’ati’a nō te hiero, mai te mea e hina’arohia. Terā rā, ’eiaha ’oia e vauvau atu i tōna iho mau ti’aturira’a, tāna mau mea e au, ’aore rā tāna mau tātarara’a ’ei ha’api’ira’a tumu ’aore rā ’ei fa’aturera’a nā te ’Ēkālesia.

I roto i te mau titi, nā te hō’ē melo nō te peresidenira’a titi ’aore rā te hō’ē pāpa’i parau o te titi e ha’amana i te parau fa’ati’a nō te hiero i roto te DDG i muri a’e i te hōro’ara’ahia te reira. I roto i te mau mata’eina’a, nā te hō’ē melo nō te peresidenira’a misiōni ’aore rā nā te hō’ē pāpa’i parau o te misiōni e ha’amana i te parau fa’ati’a. E ha’amanahia te mau parau fa’ati’a nō te mau bāpetizora’a ’e te mau ha’amaura’a nā roto i te monora’a, ’ia nene’i-ana’e-hia te reira e te hō’ē melo o te ’episekōpora’a ’aore rā e te peresideni ’āma’a. E fa’a’ohipa ’oia te DDG nō te nene’i i te mau parau fa’ati’a.

26.3.1

Te mau uiuira’a nō te parau fa’ati’a nō te hiero nō te mau melo i roto i te mau pāroita ’e te mau ’āma’a

I roto i te hō’ē pāroita, e arata’i te ’episekōpo ’aore rā te hō’ē tauturu tei fa’auehia i te mau uiuira’a nō te parau fa’ati’a nō te hiero ’e e hōro’a i te mau parau fa’ati’a i te feiā ti’a-mā. I roto i te hō’ē ’āma’a, nā te peresideni ’āma’a ana’e e fa’atere i te mau uiuira’a nō te parau fa’ati’a nō te hiero ’e e hōro’a i te mau parau fa’ati’a.

I roto i te hō’ē pāroita, e uiui te ’episekōpo iho i te mau melo e :

• Fāri’i i tō rātou iho ’ōro’a hiero (hi’o 27.1 ’e 27.2).

• Tā’atihia i te hō’ē hoa fa’aipoipo (hi’o 27.3).

I te mau taime rū ’aita te ’episekōpo e vata, e nehenehe ’oia e fa’ati’a i te hō’ē o tōna nā tauturu ’ia fa’atere i teie mau uiuira’a.

I roto i te mau pāroita nā te feiā ’āpī pa’ari ’ōtahi, e nehenehe te mau ’episekōpo e fa’ati’a i te mau tauturu ’itera’a ra, ’ia fa’atere i teie mau uiuira’a.

Hou ’a hōro’ahia ai te hō’ē parau fa’ati’a nō te hō’ē o te mau tupura’a i fa’ahitihia i ni’a nei, e hi’opo’a te ’episekōpo i te parau melora’a nō te ha’apāpū ē, ’aita e vai ra te mau tāpa’opa’ora’a nō ni’a i te mau tā’ōti’ara’a o te ti’ara’a melo i roto i te ’Ēkālesia. Nō te mau melo e fāri’i i tō rātou iho ’ōro’a hiero ’aore rā e tā’atihia i te hō’ē hoa fa’aipoipo, e ara ato’a ’oia ē :

• ’Ua tāpa’ohia te bāpetizora’a ’e te ha’amaura’a o te ta’ata i ni’a i te parau melora’a.

• ’Ua fāri’i te mau taea’e i te autahu’ara’a a Melehizedeka.

I te tahi taime, ’aita i tāpa’ohia te mau tai’o mahana nō te bāpetizora’a ’e te ha’amaura’a o te hō’ē melo ’aore rā te fa’atōro’ara’a i te autahu’ara’a a Melehizedeka. I roto i teie mau tupura’a, e ti’a i te mau ’ōro’a ’ia hi’o-maita’i-hia ’e ’ia pāpa’ihia, ’ia ha’amanahia, ’aore rā ’ia rave fa’ahouhia (hi’o 38.2.6).

I muri a’e i te uiuira’a a te hō’ē melo o te ’episekōpora’a ’aore rā a te peresideni ’āma’a, e uiui te hō’ē melo o te peresidenira’a titi i te mau melo e ora ra i roto i te hō’ē titi. E tārima ’oia i te parau fa’ati’a a te feiā tei ti’a-mā. Nā te hō’ē melo o te peresidenira’a misiōni e arata’i i te piti o te uiuira’a nō te mau melo e ora ra i roto i te hō’ē mata’eina’a. E tārima ato’a ’oia i te mau parau fa’ati’a a te feiā ti’a-mā. E’ita te hō’ē peresideni mata’eina’a e arata’i i te mau uiuira’a nō te parau fa’ati’a nō te hiero, maori rā e parau fa’ati’a nā te Peresidenira’a Mātāmua.

E uiui te peresideni titi ’aore rā misiōni iho i te mau melo e :

• Fāri’i i tō rātou iho ’ōro’a hiero.

• Tā’atihia i te hō’ē hoa fa’aipoipo.

Mai te mea e’ita te peresideni titi e vata, e nehenehe ’oia e fa’ati’a ’ia fa’atere tōna nā tauturu i teie mau uiuira’a.

E nehenehe te hō’ē peresideni misiōni e fa’ati’a i tōna nā tauturu ’ia fa’atere i teie mau uiuira’a, mai te mea e hina’arohia.

I roto i te hō’ē titi feiā ’āpī pa’ari ’ōtahi, e nehenehe te peresideni titi e fa’ati’a i tōna nā tauturu ’ia fa’atere i teie mau uiuira’a.

26.3.2

Te mau uiuira’a nō te parau fa’ati’a nō te hiero, nō te mau melo i te mau vāhi mo’emo’e

Tē ora nei vetahi mau melo i te mau vāhi e tītauhia te ha’amau’ara’a rahi nō te rātere ’aore rā e mea fifi roa nō te fārerei i te hō’ē melo nō te peresidenira’a titi ’aore rā misiōni. I roto i teie mau tupura’a, e nehenehe te hō’ē peresideni hiero e uiui i te reira ta’ata ’e e tārima i te parau fa’ati’a. Hou ’oia ’a fa’atere ai i te uiuira’a, e paraparau ’oia ’e te peresideni titi ’aore rā misiōni. Nā mua a’e rā, ’ua uiuihia te melo ’e ’ua tārimahia te parau fa’ati’a e te ’episekōpo, hō’ē tauturu i fa’auehia, ’aore rā e te peresideni ’āma’a.

E tano ato’a teie fa’aturera’a nō te mau melo i roto te nu’u fa’ehau i te mau vāhi ātea. E ti’a ’ia uiuihia rātou nā mua a’e e te ’episekōpo nō tā rātou pāroita tumu ’aore rā te ’āmuira’a e ha’apa’o ra i te vāhi tei reira rātou.

26.4

Hōro’ara’a i te parau fa’ati’a nō te hiero i te mau melo tei ’ore ā i rave i tō rātou iho ’ōro’a hiero

26.4.1

Te mau arata’ira’a rahi

I roto i te hō’ē pāroita, nā te ’episekōpo ’aore rā nā te hō’ē tauturu tei fa’auehia, e uiui i te mau melo tei ’ore ā i rave i tō rātou iho ’ōro’a hiero, nō te parau fa’ati’a nō te hiero. I roto i te hō’ē ’āma’a, nā te peresideni ’āma’a ana’e e fa’atere i te mau uiuira’a nō te parau fa’ati’a nō te hiero. E pe’e te ti’a fa’atere i te mau arata’ira’a i roto te 26.3. E hōro’a ’oia i te hō’ē parau fa’ati’a mai te mea ’ua ti’a-mā te ta’ata.

E hōro’ahia te mau parau fa’ati’a nō te hiero i te mau melo tei ’ore ā i rave i tō rātou ’ōro’a hiero, mai teie i muri nei :

• Nō te mau melo e 11 matahiti ’e hau atu, ’o tē bāpetizohia ’e ’o tē ha’amauhia nā roto i te monora’a nō te feiā i pohe. (E ti’a i te feiā ’āpī tamāhine ’e i te feiā ’āpī tamāroa tei fa’atōro’ahia i te autahuara’a, ’ia fāri’i i te hō’ē parau fa’ati’a nō te hiero, i te ha’amatara’a o te ’āva’e Tēnuare i te matahiti e ra’ehia ai tō rātou e 12 matahiti.)

• Nō te mau melo mai te 8 ē tae atu i te 20 matahiti, e tā’atihia i tō rātou nā metua. ’Aita e tītauhia te parau fa’ati’a nō te mau tamari’i i raro mai i te 8 matahiti, nō te tā’ati atu i tō rātou nā metua (hi’o 26.4.4).

• Nō te mau melo mai te 8 ē tae atu i te 20 matahiti, nō te hi’o i te mau tā’atira’a o tō rātou mau taea’e ’e mau tuahine ora, te mau taea’e ’e mau tuahine ho’ovai ’aore rā te taea’e ’e tuahine ’āfa i tō rātou nā metua.

’Aita te mau melo tei rave a’e na i tō rātou iho ’ōro’a hiero, e fāri’i i te hō’ē o teie mau parau fa’ati’a i fa’ata’ahia i roto i teie tuha’a.

Te hō’ē melo tāne nō te ’Ēkālesia, tei nāva’i te pa’ari nō te mau i te autahu’ara’a, e ti’a ’ia fa’atōro’ahia ’oia i te hō’ē tōro’a o te autahu’ara’a, hou ’oia ’a fāri’i ai i te hō’ē parau fa’ati’a nō te hiero.

’Ia hōro’a-ana’e-hia te hō’ē parau fa’ati’a nō te hiero, e uiui te hō’ē melo o te ’episekōpora’a ’aore rā te peresideni ’āma’a i te ta’ata tāta’ihō’ē. Terā rā, e nehenehe te ta’ata e uiuihia ra e ani i te hō’ē metua ’aore rā i te tahi atu ta’ata pa’ari, ’ia ’āmui ato’a mai.

26.4.2

Parau fa’ati’a nō te hiero nō te mau melo i bāpetizo-’āpī-hia

E uiui te ’episekōpo i te mau melo ’āpī e matahiti tano nō te fāri’i i te hō’ē parau fa’ati’a nō te hiero, nō te mono noa i te mau bāpetizora’a ’e te mau ha’amaura’a. E fa’atere ’oia i teie uiuira’a ma’a taime noa i muri mai i te ha’amaura’a o te melo, te ti’ara’a mau i roto iho i te hepetoma (hi’o 26.4.1). Nō te mau taea’e, e nehenehe teie uiuira’a e ravehia ’ei tuha’a nō te uiuira’a nō te fāri’i i te autahu’ara’a a Aarona. ’Ia fa’atōro’ahia te mau melo tāne o te ’Ēkālesia i te hō’ē tōro’a o te autahu’ara’a, hou ’oia ’a fāri’i ai i te hō’ē parau fa’ati’a nō te hiero.

E nehenehe te mau melo pa’ari ti’a-mā e fāri’i i tō rātou iho ’ōro’a hiero, hō’ē matahiti i muri a’e i tō rātou ha’amaura’ahia ’ei melo nō te ’Ēkālesia (hi’o 27.2.1.1).

26.4.3

Parau fa’ati’a nō te hiero nō te mono noa i te mau bāpetizora’a ’e te mau ha’amaura’a

’Ia hōro’ahia te mau parau fa’ati’a nō te hiero nō te mono noa i te mau bāpetizora’a ’e i te mau ha’amaura’a, nō te reira ana’e tumu. E nene’ihia teie mau parau fa’ati’a ma te fa’a’ohipa te DDG. E tītau noa te reira te mau tārimara’a a te melo ’e a te hō’ē melo o te ’episekōpora’a ’aore rā a te peresideni ’āma’a.

Nō te mau ha’amāramaramara’a nō ni’a i te tārenara’a i te mau bāpetizora’a ’e te mau ha’amaura’a nō te feiā i pohe, hi’o 28.2.1.

26.4.4

Parau fa’ati’a nō te hiero nō te tā’atira’a i te mau tamari’i ora i te mau metua

E hōro’ahia te parau fa’ati’a nō te hiero, i te mau melo mai te 8 ē tae atu i te 20 matahiti tei ’ore ā i rave i tō rātou ’ōro’a hiero, mai teie i muri nei :

• ’Ia tā’atihia i tō rātou nā metua

• Nō te hi’o i te tā’atira’a o tō rātou mau taea’e ’e tuahine ora, te mau taea’e e tuahine ho’ovai ’aore rā ’āfa taea’e ’e tuahine i tō rātou nā metua

Te feiā tei hōro’ahia te parau fa’ati’a nō te hiero nō te ’āmui atu i roto i te mau tā’atira’a, ’ia uiuihia rātou e te hō’ē melo nō te ’episekōpora’a ’aore rā e te peresideni ’āma’a. E uiui-ato’a-hia rātou e te hō’ē melo nō te peresidenira’a titi ’aore rā misiōni.

Nā te hō’ē melo nō te ’episekōpora’a ’aore rā nā te peresideni ’āma’a e nene’i i teie mau parau fa’ati’a ma te fa’a’ohipa te DDG. E nehenehe te parau fa’ati’a nō te hiero nō te mau tā’atira’a e hōro’ahia nō te tamari’i tāta’itahi ’aore rā nō te hō’ē pupu tamari’i nō te hō’ē ā ’utuāfare. E nehenehe e fa’a’ohipa hō’ē ā parau fa’ati’a nō te tāpura i te mau tamari’i e tā’atihia ’e rātou e hi’o ra.

’Aita e tītauhia te parau fa’ati’a nō te mau tamari’i i raro mai i te 8 matahiti, ’ia tā’atihia i tō rātou nā metua. ’Aita ato’a e tītauhia te parau fa’ati’a nō te hi’o i te tā’atira’a o tō rātou mau taea’e ’e mau tuahine, tō rātou mau taea’e ’e tuahine ho’ovai ’aore rā ’āfa taea’e ’e tuahine i tō rātou nā metua.

E nehenehe te mau melo mai te 21 matahiti ’aore rā hau atu e tā’atihia i tō rātou nā metua ’aore rā e hi’o i te hō’ē tā’atira’a mai te mea noa ē, ’ua rave (1) rātou i tō rātou iho ’ōro’a hiero ’e (2) e parau fa’ati’a mana tā rātou nō te hiero.

Hi’o 27.4.4 ’e 38.4.2 nō te tahi atu mau fa’aturera’a nō ni’a i te hi’ora’a i te mau tā’atira’a ’e ’ia tā’atihia i nā metua.

26.5

26.5.1

’Ua hōro’ahia te mau arata’ira’a nō te hōro’ara’a i te hō’ē parau fa’ati’a i te hō’ē ta’ata ’o tē fāri’i ra i tōna iho ’ōro’a hiero, i roto i te buka parau fa’ati’a nō te hiero 2. Nō te mau melo ti’a-mā e hina’aro nei e fāri’i i tō rātou iho ’ōro’a hiero, e nehenehe rātou e fāri’i i te reira ’a ha’apa’o ai rātou i te mau tītaura’a ato’a i muri nei :

• E 18 a’e matahiti tō rātou.

• ’Ua fa’aoti ’aore rā ’aita rātou e haere fa’ahou ra i te ha’api’ira’a tuarua, ’aore rā te ha’api’ira’a ’aifāito.

• ’Ua ma’iri hō’ē matahiti mai tō rātou ha’amaura’ahia ’ei melo.

• ’Ua tupu i roto ia rātou te hina’aro ’ia fāri’i ’e ’ia auraro i te mau fafaura’a o te hiero i te roara’a o tō rātou orara’a.

Hau atu, e ti’a ’ia mau te hō’ē tāne i te autahu’ara’a a Melehizedeka, hou ’oia ’a fāri’i ai i tōna ’ōro’a hiero. Nō te mau ha’amāramaramara’a nō ni’a i te mau melo e fa’aineine ra nō te fāri’i i tō rātou iho ’ōro’a hiero, hi’o 25.2.8. Nō te mau ha’amāramaramara’a nō ni’a i te feiā e nehenehe e fāri’i i te ’ōro’a hiero, hi’o 27.2.1.

26.5.2

Te mau melo i bāpetizo-’āpī-hia

E nehenehe te mau melo ta’ata pa’ari ti’a-mā e fāri’i i tō rātou iho ’ōro’a hiero, hō’ē matahiti i muri a’e i tō rātou ha’amaura’ahia ’ei melo nō te ’Ēkālesia (hi’o 27.2.1.1). E ha’apāpū te feiā fa’atere o te autahu’ara’a ē, te tai’o mahana e fāri’i ai te melo i te ’ōro’a hiero, ’ua rae’ahia hō’ē a’e matahiti ti’a i muri mai i te tai’o mahana nō tōna ha’amaura’ahia, ’eiaha rā te tai’o mahana nō tōna bāpetizora’ahia. Nā te Peresideniraʼa Mātāmua anaʼe e fa’ati’a i te mau haere’a hapa.

E ti’a ’ia hōro’ahia i te mau melo ti’a-mā ’āpī te hō’ē parau fa’ati’a nō te hiero, nō te mau bāpetizora’a ’e i te mau ha’amaura’a noa nā roto i te monora’a (hi’o 26.4.2).

26.5.3

Hou te hō’ē misiōnare taure’are’a ’a fa’aoti ai i tāna tāvinira’a i te fenua ātea, e rave te peresideni misiōni i te hō’ē uiuira’a nō te parau fa’ati’a nō te hiero. Mai te mea ’ua ti’a-mā te misiōnare, e hōro’a ’oia i te parau fa’ati’a. Nā te peresideni misiōni e tu’u i te tai’o mahana ’e e ha’amana te parau fa’ati’a, ’ia nehenehe te reira e hope e toru ’āva’e i muri iho i te tai’o mahana i ho’i ai te misiōnare i te fare.

E uiui te ’episekōpo i te mau misiōnare tei ho’i mai, nō te hōro’a i te parau fa’ati’a ’āpī nō te hiero, ’ia fātata ana’e nā ’āva’e e toru i te hope. I te mau taime rū ’aita te ’episekōpo e vata, e nehenehe ’oia e fa’atia i te hō’ē o tōna nā tauturu ’ia fa’atere i teie mau uiuira’a.

I roto i te mau pāroita rahi nā te feiā ’āpī pa’ari ’ōtahi, e nehenehe te mau ’episekōpo e fa’ati’a i te mau tauturu ’ia fa’atere i teie mau uiuira’a.

E fārerei atu te mau misiōnare tei ho’i mai i muri iho, i te hō’ē melo o tō rātou peresidenira’a titi nō te hō’ē uiuira’a nō te parau fa’ati’a nō te hiero.

I roto i teie mau uiuira’a nō te parau fa’ati’a nō te hiero, e hi’o fa’ahou ato’a te ’episekōpo ’e te melo o te peresidenira’a titi i te mana’o tauturu i hōro’ahia i roto i te uiuira’a nō te ha’amāuruurura’a i te misiōnare (hi’o 24.8.2). E ’āparau rātou nō ni’a i te nu’ura’a i mua o te misiōnare tei ho’i mai, tōna aumaita’ira’a o te tino ’e tōna pi’ira’a i teienei i roto i te ’Ēkālesia. E fa’aitoito ato’a rātou iāna ’ia tāmau noa i te haere nā ni’a i te ’ē’a nō te tupura’a i te pae vārua ’e i te tāvinira’a i te roara’a o tōna orara’a.

Mai te mea ’aita tō te misiōnare tei ho’i mai e pi’ira’a i roto i te ’Ēkālesia, e ha’apāpū te ’episekōpo ’e te peresideni titi ē, e hōro’ahia te reira. E nehenehe te mau misiōnare tei ho’i mai e anihia ’ia tāvini ’ei rave ’ohipa nō te mau ’ōro’a hiero, ’aore rā ’ei mau rave ’ohipa e hōro’a noa i tō rātou taime, mai te mea tei pīha’i iho noa te hō’ē hiero (hi’o 25.5).

26.5.4

Mai te mea ’aita hō’ē melo i ora tāmau noa i roto hō’ē ā pāroita hō’ē a’e matahiti te maoro, e hi’o te ’episekōpo i te parau melora’a o te melo nō te ha’apāpū ē, ’aita e tāpa’opa’ora’a nō te mau tā’ōti’ara’a o te ti’ara’a melo o te ’Ēkālesia i roto.

E fārerei atu te ’episekōpo ’aore rā te hō’ē tauturu tei fa’auehia i te ’episekōpo nā mua atu, hou ’oia ’a fa’atere ai i te hō’ē uiuira’a nō te parau fa’ati’a nō te hiero. Mai te mea e fārerei atu te hō’ē tauturu i te ’episekōpo nā mua atu ’e e parauhia mai iāna ē tē vai ra te tahi mau ha’amāramaramara’a ’ōmo’e, e fa’aoti ’oia te ’āparaura’a i reira iho. E fa’aara ’oia i tōna ’episekōpo ’ia fārerei atu i te ’episekōpo nā mua atu, hou te uiuira’a.

26.5.5

I muri a’e te fa’ata’ara’a, te ta’ara’a ’aore rā te fa’a’orera’a i te fa’aipoipora’a

E nehenehe te ’episekōpo ’e te peresideni titi e fa’auruhia ’ia uiui i te hō’ē melo tei fa’ata’ahia, ’aore rā tei ta’a ’ia au i te ture ’aore rā tei fa’a’orehia te fa’aipoipora’a, mai te taime hope’a ’a fāri’i ai ’oia i te hō’ē parau fa’ati’a nō te hiero. I roto i teie uiuira’a, e tauturu rātou i te ha’apūai i te melo i te pae vārua. E hi’o ato’a rātou i te ti’a-mā-ra’a tāmau o te melo nō te haere i te hiero.

26.5.6

Te mau melo e fēti’i tō rātou e pāto’i ’ū’ana nei i te ’Ēkālesia i mua i te huira’atira ’aore rā e melo rātou nō te mau pupu tāiva

E ara maita’i te mau ’episekōpo ’e tō rātou nā tauturu ’ia hōro’a ana’e rātou i te mau parau fa’ati’a i te mau melo e fēti’i tō rātou e pāto’i ’ū’ana nei i te ’Ēkālesia i mua i te huira’atira ’aore rā e melo rātou nō te mau pupu tāiva ’Eiaha te mau melo i roto i teie huru orara’a e fa’atupu i te mana’o ē, e’ita rātou e nehenehe e fāri’i i te parau fa’ati’a nō te hiero, te tumu nō tā rātou paera’a fēti’i. E ti’a ’ia fa’aitoitohia rātou ’ia tāmau noa i te here i tō rātou mau feti’i piri. E nehenehe rātou e fāri’i i te hō’ē parau fa’ati’a nō te hiero, mai te mea e pāhono ti’a rātou ’e ma te ’ā’au tae i te mau uira’a ato’a nō te parau fa’ati’a hiero.

26.5.7

Te mau melo e mana’o nei ’ua hape tō rātou ’āpeni

Te mau melo ti’a-mā e mana’o nei ’ua hape tō rātou ’āpeni, ’aita rā i rave i te mau tauira’a nā roto i te rāpa’aura’a, te tāpūra’a ’aore rā te tauira’a i tō rātou ihota’ata tōtiare nō te pāto’i i te ’āpeni o tō rātou fānaura’ahia mai (« tauira’a o te ’āpeni »), e nehenehe rātou e fāri’i i te parau fa’ati’a nō te hiero ’e te mau ’ōro’a o te hiero.

E fāri’ihia te mau ’ōro’a hiero ’ia au i te ’āpeni i fānauhia ai te ta’ata. Nō te reira tumu, e’ita te mau melo i muri nei e nehenehe e fāri’i i te hō’ē parau fa’ati’a nō te hiero, e tae noa atu i te parau fa’ati’a nō te bāpetizora’a ’e nō te ha’amaura’a nā roto i te monora’a :

• Te mau melo tei rave i te tauira’a ’āpeni nā roto i te ravera’a i te rā’au ’aore rā, te tāpūra’a nō te tāmata i te tauira’a

• Te mau melo tei taui i tō rātou ihota’ata tōtiare nō te pāto’i i te ’āpeni o tō rātou fānaura’ahia mai.

E ti’a i te peresideni titi e fārerei atu i te peresidenira’a ārea nō te ’āparau i te mau tupura’a tāta’itahi ato’a ma te ’ā’au aupuru ’e te aroha Mesia (hi’o 38.6.23 ’e 38.7.7).

26.5.8

Te mau melo tei rave i te hō’ē hara rahi

E’ita te hō’ē melo tei rave i te hō’ē hara rahi e fāri’i i te parau fa’ati’a nō te hiero, ’aita ana’e ’oia i tātarahapa mau (hi’o 32.6). Te taime i roto i te hara ’e te hōro’ara’a i te hō’ē parau fa’ati’a, e vaiihohia te reira i roto i te ihi’ōre’a [discretion] o te ’episekōpo ’e o te peresideni titi. E nava’i noa te reira nō te fa’ata’a ē, ’ua tātarahapa mau te ta’ata.

26.5.9

26.5.9.1

Te mau melo ’aita i rave na i tō rātou ’ōro’a hiero

I muri mai i tō te hō’ē melo tei ’ore i rave na i tōna ’ōro’a hiero, ’o tei fāri’i-fa’ahou-hia nā roto i te bāpetizora’a ’e i te ha’amaura’a, e nehenehe te ’episekōpo e uiui iāna nō te fāri’i i te hō’ē parau fa’ati’a nō te hiero, nō te mau bāpetizora’a ’e te mau ha’amaura’a nā roto i te monora’a (hi’o 26.4.2). Te tanora’a mau e tupu teie uiuira’a i roto i te hepetoma i muri mai i te ha’amaura’a o te melo. E ti’a i te mau melo tāne o te ’Ēkālesia ’ia fa’atōro’ahia i te hō’ē tōro’a o te autahu’ara’a, hou rātou e fāri’i ai i te hō’ē parau fa’ati’a nō te hiero.

E’ita e hōro’ahia i teie mau melo te parau fa’ati’a nō te rave i tō rātou iho ’ōro’a hiero, ē tae roa ’ia rae’ahia hō’ē matahiti i muri a’e i tō rātou fāri’i-fa’ahou-ra’a-hia i roto i te ’Ēkālesia, nā roto i te bāpetizora’a ’e te ha’amaura’a.

26.5.9.2

Te mau melo ’o tei rave a’ena i tō rātou ’ōro’a hiero

E’ita te mau melo tei rave a’ena i tō rātou ’ōro’a hiero e fāri’i i te hō’ē noa atu parau fa’ati’a nō te hiero, maori rā ’ua fa’aho’ihia mai tō rātou mau ha’amaita’ira’a hiero nā roto i te ’ōro’a nō te fa’aho’i-fa’ahou-ra’a mai o te mau ha’amaita’ira’a (hi’o 32.17.2). ’Ia oti tō rātou mau ha’amaita’ira’a i te fa’aho’i-fa’ahou-hia mai, e nehenehe rātou e fāri’i i te parau fa’ati’a nō te hiero, nō te mau melo tei rave a’ena i tō rātou mau ’ōro’a hiero.