26.

Beba ni Kariaia nakon te Tembora

26.0

Kabwarabwaraana

Te rin n ana auti te Uea bon te tibwanga ae tabu. Taan kairiiri n te uoote ao titeiki a na kaungaiia membwa ni kabane bwa a na riai n tau ao ni karekei aia beeba ni kariaia nakon te tembora ae tuai bane taina e ngae ngke akea te tembora ae e kaan mangaiia.

A na karaoa aia kabanea ni kona taan kairiiri n te Ekaretia n taraia bwa ni kabane ake a rin n ana auti te Uea a tau nako iai (taraa Taian Areru 24:3–5). Taan kairiiri n te nakoanibonga ake a tia n anganaki te kariaiakaki a kairi intawiu ibukin beba ni kariaia nakon te tembora ao n tiaainai nakoia membwa ake a tia ni kaekai titiraki aika a riai ao a koaua ibukin te intawiu (taraa 26.3 E berita te Uea bwa ngkana a itiaki nanoia naake a rin n Ana auti, ao E na mena ikekei (taraa Reirei ao Berita aika Tabu 97:15–16).

A riai membwa ake 8 aia ririki ao ake a ikawai riki n iai irouia aia beba ni kariaia nakon te tembora ae tuai bane taina n rin te tembora. A riai ni bwabetitoaki ao ni kamatoaki bwa a na tau ni karekea te kariaia.

Ataei ake a bwaka iaan 8 te ririki ake a nang kabaeaki nakoia aia karo ke n matakuakina kabaeakiia tariia ao mwaneia nakoia aia karo a aki kainnanoa te karaiaia (taraa 27.4.1 ao 27.4.5). E ngae n anne, a na kaota koauan rongorongo aikai aia karo rinanon Otenanti ni katauraoi i nanon te LCR (taraa 27.1.2).

Te mwakoro aei e katauraoi kaetieti ibukiia taan kairiiri ake a karaoi beba ni kariaia nakon te tembora. Te bitiobi e na reitaki ma ana beretitenti n te titeiki ngkana iai ana titiraki ibukin kanakoan rekomente n te tembora ake aki kaekaaki n te mwakoro aei. E na reitaki te beretitenti n te titeiki ma aia Aobiti te Moan Beretitentii ma taian titiraki.

26.1

Aekakin Beba ni Kariaia nakon te Tembora

Te beba ni kariaia ae tuai bane taina e na angan te membwa te kona n rin n tembora nako. Taan kairiiri n te nakoanibonga a na ataia raoi bwa a reke aia beba ni kariaia ae eti ni kaeti ma aroia. Iai teniua aekakin beba ni kariaia:

1. Beeba ni kariaia nakon te tembora ibukin bonomwi ni bwabetito ao kamatoa n tei ibukin temanna. Beeba ni kariaia aikai bon ibukiia membwa ake a tuai n entaau ake a na karaoa te mwakuri ni bwabetito ao ni kamatoa ibukiia tabeman. A na karaoaki nakoia membwa rinanon te Leader and Clerk Resources (LCR). E bon nakon ana rinerine temanna bwa e na karekea te kariaia n te beebwa ke te kariaia n ana tareboon.

   Ibukin rongorongona riki, taraa 26.3.1.

2. Beeba ni kariaia nakon te tembora ibukiia membwa ake a tia n entaute. Beba ni kariaia aikai bon ibukiia membwa ake a kaman entaaute mai imwaaina. A na anga te kariaia nakoia membwa ake a tia n entaau bwa a na karaoi taian otenanti ni kabane n te tembora ibukin te mate. A karaoaki nakoia membwa rinanon te LCR. E bon nakon ana rinerine temanna bwa e na karekea te kariaia n te beebwa ke te kariaia n ana tareboon.

   Ibukin rongorongona riki, taraa 26.3.2.

3. Beeba ni kariaia nakon te tembora ibukin otenanti ibukiia aika a maiu. Kariaia aikai bon ibukiia membwa ake a karekea oin aia entaumente ke ake a kabaeaki ma buuia, aia karo, ke natiia. A karaoaki ibukiia rinanon Otenanti ni Katauraoi i nanon te LCR. A kabongana te Otenanti ni Katauraoi taan kairiiri n te Nakoanibonga n kanakoa te kariaia ae tabwanin nakon te tembora ike e na karaoaki iai te otenanti.

   Ibukin riniia n te tembora, membwa ake a nang koro aia ririki 12 ke i aona n tokin te ririki n te tai are e na karaoaki iai te otenanti a riai naba n iai irouia teuana man aekan karaiaia irarikin te kariaia n taian otenanti ibukiia aika a maiu. Ngkana e kainnanoaki, a kona taan kairiiri n te nakoanibonga ni karaoa teuana man taian kariaia ao te kariaia ibukin taian otenanti ibukiia aika maiu n tain naba te intawiu. Ibukin rongorongona riki, taraa 26.3.3.

   Ibukin rongorongo riki iaon karaoan otenanti ibukiia aika a maiu, taraa mwakoro 27.

26.2

Kamanoan Beba ni Kariaia nakon te Tembora

26.2.1

Taan Kairii n Nakoanibonga A Kamanoi Beeba ni Kariaia nakon te Tembora

Taan kariiri n te nakoanibonga ake a tia ni kariaiakaki bwa a na anganaki booki ibukin beba ni kariaia nakon te tembora a riai ni kamanoi raoi. Bon akea riki temanna ae a na kona n roko iai. Ngkana te Ekaretia e kabooui booki ibukin beba ni kariaia nakon te tembora, taan kairiiri a na karenakoi booki ake a bane taia.

Taan kairiiri n te nakoanibonga a na taraia raoi bwa aomata ake akea kariaiakaia a na aki nori rongorongon te beebwa ni kariaia ibukin te tembora inanon LCR.

26.2.2

Beba ni kariaia Aika Bua ke A Iraeaki

E riai te bitiobi n tuangia membwa bwa a na kaongoa n te tai ae waekoa ngkana e bua ke e kimoaki te beba ni kariaia. Ngkana e teimatoa n tau te membwa, te bitiobi ke te kauntira are e mwiokoaki ke te kiraaka e na rinnako nakon te LCR ni bwereetia te beeba ni kariaia. E na bane tain te beeba ni kariaia ae boou ni bongin te nanwakaina n aron are n te moan.

N tabetai te membwa are e bua ana beeba ni kariaia ke e iraeaki e aki maiuakina te kainibaire ibukin te kororaoi. Inanon kangaanga aikai, te bitiobi e na kamaunaa te beeba ni kariaia anne n te tai ae waekoa (taraa 26.2.3).

26.2.3

Naake Iai Aia Beba ni Kariaia Ake A Aki Maiuakin Kainibaire Ibukin te Kororaoi

Ngkana e taku te bitiobi bwa e aki maiunakina te aro ae tau te membwa ae iai kariaiakana ae tuai bane taina (taraa 26.3), e na kabonganaa te LCR ni kamaunaa te kariaia. Ngkana e aki tauraoi te tititem aei, e na reitaki te bitiobi ma aobitin te tembora bwa e na kamaunaa te beba ni kariaia. Ngkana iai ana beebwa ni karaiaia te membwa, e na tuatua te bitiobi bwa e na anaia mairouna.

26.3

Kainibaire ni Kabuta Ibukin Karaoan Beba ni Kariaia Nakon te Tembora

A kairi intawiu taan kairiiri n te nakoanibonga are a tia n anganaki te kariaiakaki i mwaain ae reke ana beeba ni kariaia nakon te tembora te membwa. Kaetieti a mena i nanon LCR. A riai taan kairiiri n te nakoanibonga ni karaoa te beba ni kariaia tii ngkana e kaekai titiraki aika a tau te membwa ibukin te beba ni kariaia nakon te tembora.

Intawiu ibukin te beba ni kariaia nakon te tembora a anganiia membwa te kariaia ni kaotia nakoia bwa iai aia kakoaua ao a kataia n ongeaaba n ana tua te Atua ao n Iriira Ana burabeti. A na kamatoa naba taan kairiiri n te nakoanibonga, rinanon te intawiu, bwa e tau te membwa.

Taraa 26.4 ibukin rongorongon karaoan intawiu ibukin te kariaia nakon te tembora.

26.3.1

Karaoan Beeba ni Kariaia nakon te Tembora ibukin Bwabetito ao Kamatoa n Tei ibukiia Tabeman

Beeba ni kariaia nakon te Tembora ibukin bwabetito ao kamatoa n tei ibukiia tabeman e anga te kariaia nakoia membwa ni karaoi bwabetito ao kamatoa ibukin te mate. A karekeaki nakoia membwa ake a tuai n entaau ake a tia ni bwabetitoaki ao n kamatoaki.

A na aki anganaki te kariaia membwa ake a tia n entaau n tei ibukiia mate n bwabetito ao n kamatoa.

A tau membwa n karekei kariaia aikai ni moan Tianuare n te ririki are a na koro iai 12 aia ririki. E riai ni katabuaki nakon aobitin te nakoanibonga te mmwane ae kaain te Ekaretia imwaain ae konaa n karekea te kariaia nakon te tembora.

N te uoote, e na karaoa te intawiu ma membwa aika tuai entaute te bitiobi ke te kauntira are e katabeaki ibukin te beeba ni kariaia nakon te tembora ibukin karaoan te bwabetito ao kamatoa n tei ibukiia maate. N te mwaanga, bon tii te beretitenti n te mwaanga ae kaira te intawiu ibukin beba ni kariaia nakon te tembora. (Ibukin baika a butimwaeaki, taraa 23.6.1.)

Te tia kairiiri are e karaoa te intawiu e na ira te kainibaire i nanon 26.4. A riai beba ni kariaia nakon te tembora n aki kataweaki. A riai n onoti. Ma, e kona te aomata are e karaoaki te intawiu ma ngaia ni kaoa ana karo ke temanna te ikawai bwa e na raoniia.

E na karaoa te kariaia te tia kairiiri rinanon te LCR ngkana e tau te membwa. Beeba ni kariaia aikai a bon ti kainnanoa aia tiaaina te membwa ke te membwa n te bitiobiriki ke te beretitenti n te mwaanga.

Kariaia ibukin bwabetito ao kamatoa n tei ibukiia maate a kabouaki n te LCR iroun te membwa n te bitiobiriki ke te beretitenti n te mwaanga.

Ibukin rongorongon riki karaoan kariaia nakoia membwa ake a tauraoi ni karekea aia entaumente ke ni kabaeaki nakoia buuia, aia karo, ke natiia, taraa 26.3.3.

26.3.2

Karaoan Beeba ni Kariaia nakon te Tembora ibukiia Membwa aika a Tia n Entaau

Kariaia nakon te tembora ibukiia aika a tia n entaau e anga te kariaia nakoia membwa bwa a kona ni karaoi taian otenanti n te tembora ibukin te mate. A karaoaki ke ni kanakoaki nakoia membwa ake a tia n kaman entaau mai mwaaina. (Ibukiia membwa ake a na karekei aia entaumente, taraa 26.3.3.)

N te uoote, e karaoa te intawiu te bitiobi ke te kauntira are e mwiokoaki ibukin karekean te kariaia nakon te tembora ao ni anga taian kariaia. N te mwaanga, bon tii te beretitenti n te mwaanga ae kaira te intawiu ibukin te beba ni kariaia nakon te tembora ao e tiainai beba ni kariaia.

Te tia kairiiri are e karaoa te intawiu e na ira te kainibaire i nanon 26.4. A riai beba ni kariaia nakon te tembora n aki kataweaki. A riai n onoti. E ngae n anne, e kona te aomata are e intawiunaki ni kaoa kainabana, ana karo, ke temanna te ikawai bwa e na raonna.

E anga te kariaia te tia kairiiri rinanon te LCR ngkana e tau te membwa.

Imwiin te intawiu mairoun temanna te membwa man te bitiobiriki ke te beretitenti n te mwaanga, te membwa n te beretitentii n te titeiki e na intawiuniia membwa ake a maeka n te titeiki. E tiainaa aia beba ni kariaia naake a tau. Temanna te membwa n te beretitentii n te mition e na kaira te kauoua n intawiu ibukiia membwa ake a maeka n te mwakoro. E na tiainaa naba aia beba ni kariaia naake a tau. Te beretitenti n te mwakoro e aki intawiuniia membwa ibukin te beba ni kariaia nakon te tembora ti ngkana e kariaiakaki mairoun te Moan Beretitentii.

Inanon taian titeiki, te membwa n te beretitentii n te titeiki ke te kiraaka n te titeiki e na kabooua karaoan te kariaia nakon te tembora n te LCR. Inanon taian mwakoro, te membwa n te beretitentii n te mition ke te kiraaka n te mition e na kaotia ae e a kona ni kabonganaaki te beba ni kariaia.

Ibukin rongorongon riki karaoan kariaia nakoia membwa ake a tauraoi ni karekea aia entaumente ke ni kabaeaki nakoia buuia, aia karo, ke natiia, taraa 26.3.3.

26.3.3

Karaoan Beeba ni Kariaia n te Tembora n Otenanti ibukiia ake a Maiu

Beeba ni kariaia nakon te tembora ibukin otenanti ibukiia aika maiu a karekeaki nakoia membwa ake a tauraoi n:

• Karekei oin aia entaunmente (taraa 27.2).

• A na kabaeaki nakon kainnabaia (taraa 27.3).

• A na kabaeaki nakoia aia karo (taraa 27.4).

• A na kabaeaki ma natiia (taraa 27.4).

Ibukin riniia n te tembora, membwa ake a nang koro aia ririki 12 ke i aona n tokin te ririki n te tai are e na karaoaki iai te otenanti a riai naba n iai irouia te kariaia ibukin bwabetito ao kamatoa n tei ibukiia mate ke te kariaia ibukiia membwa ake a entaau. Ngkana e kainnanoaki, a kona taan kairiiri n te nakoanibonga ni karaoa teuana man taian kariaia ao te kariaia ibukin taian otenanti ibukiia aika maiu n tain naba te intawiu.

E na intawiu te bitiobi ke te beretitenti n te mwaang ao te beretitenti n te titeiki ma membwa ake a katauraoi ni karekei taian otenanti man te tembora.

Ni keiti aika kataweaki ngkana akea te bitiobi ke te titeiki beretitenti, e kona ni kariaia temanna ana kauntira ni karaoi intawiu aikai. N te mwaanga, bon tii te beretitenti n te mwaanga ae kona n kaira taian intawiu aikai.

N aia uoote kairake aika tuai n iein aika mwaiti kaaina ao n titeiki, a kona bitiobi ao beretitenti n titeiki n anga te kariaia nakoia aia kauntira bwa a na rinanon karaoan intawiu aikai.

N te mwaanga, e na karaoi intawiu aikai te beretitenti n te mition ke te kauntira are e mwiokoaki. A na aki karaoi intawiu aikai beretitenti n te mwakoro ma ti ngkana e anga te kariaia te Moan Beretitentii nakoia n karaoi kariaia nakon te tembora.

Te tia kairiiri are e karaoa te intawiu e na ira te kainibaire i nanon 26.4. A riai beba ni kariaia nakon te tembora n aki kataweaki. A riai n onoti. E ngae n anne, e kona te aomata are e intawiunaki ni kaoa kainabana, ana karo, ke temanna te ikawai bwa e na raonna.

Imwain kanakoan ke karekean te kariaia ibukin otenanti ibukiia aika maiu, a na rinanon ana rekooti te membwa te bitiobi ke te beretitenti n te mwaanga n kakoaua raoi bwa akea kanikina ni kaota taian totoko nakon te membwa n te Ekaretia. E na rinanoa naba rongorongon te membwa man kabonganaan te Ordinance Preparation [Katauraoi nakon Karaoan Otenanti] i nanon te LCR. E na tiainaa te kariaia i aon te kaombiuta ibukin otenanti nakoia ake a maiu ngkana e tau te membwa ao n tauraoi ni karekei otenanti n te tembora. E na kanakoa ngkanne nakon te titeiki ke te beretitenti n te mition man kabonganaan te Ordinance Preparation [Katauraoi nakon Karaoan te Otenanti i nanon te LCR.

E na itawiu ma te membwa imwiina te beretitenti n te titeiki ke temanna man te beretitentii n te mition. E na tiainaa te karaiaia i aon te kaombiuta ngkana e tau te membwa ao n tauraoi ni karekei taian otenanti n te tembora. E na kanakoa imwiina nakon te tembora man kabonganaan te Ordinance Preparation [Katauraoi ni Karaoan te Otenanti] i nanon te LCR. Ngkana e kainnanoaki, e na tiainaa naba te kariaia ibukin te membwa ibukiia membwa ake a tia n entaau (taraa 26.3.2).

Ibukin rongorongon taekan aia katauraoi membwa ni karekean otenanti n te tembora, taraa 27.1.1 ao 27.1.2.

Ibukin rongorongon taekan aia katauraoi membwa ni karekean aia entaumente, taraa 27.2.

Ibukin rongorongon taekaia membwa ake a katauraoi bwa a na kabaeaki ma buuia, taraa 27.3.

Ibukin rongorongon taekaia membwa ake a katauraoi ni kabaeaki ma aia karo, taraa 27.4.

Taraa 27.4.5 ao 38.4.2 ibukin taian kaetieti riki iaon kainibaire ibukin te mataku n taian kabaebae ao te kabaeaki nakoia kaaro.

26.3.4

Karaoan Beeba ni Kariaia nakon te Tembora ibukiia Membwa n Aono ake a Tionako

Tabeman membwa a maeka n taabo aika e na karika te kabanemwane n te mwamwananga ke e rang kangaanga te kaitibo ma te membwa n te titeiki ke te beretitentii n te mition. Inanon kangaanga aikai, te membwa n te beretitentii n titeiki ke n te mition e na bon riai ni kaitibo n te aonrain ma te membwa are e na karaoa te intawiu ibukin te beeba ni kariaia (taraa 31.4).

E na karaoa te kariaia te tia kairiiri ngkana e tau te membwa. Ngkana e tangira te kariaia are te beebwa te membwa, a na kaotinakoa te kariaia te membwa temanna man te bitiobiriki ke te beretitenti n te mwaanga.

Te kaetieti aei e kaineti naba nakoia membwa n te tanga ni buaka ake a mena n aono aika a tionako.

26.4

Karaoan te Intawiu ibukin te Beeba ni Kariaia nakon te Tembora

Te tembora bon Ana auti te Uea. Te rinnako inanon te tembora ao n ibuobuoki ni karaoan otenanti ikekei bon te tai ae tabu aika a kona n reke iai. Bwaai aikai a kawakinaki ti nakoia naake a tauraoi tamneia ao ni kekeiaki ni maiuakin ana kainibaire te Uea, are e baireaki irouia taan kairiri ake iai te kariaiakaki irouia n te Nakoanibonga.

Ni karaoan nanon aei, taan kairiiri n te nakoanibonga a intawiuna te membwa ni kabonganai titiraki aika oti inano. Aki riai taan kairiiri ni karin ke ni kanakoi bwaai aika a kainnanoaki. E ngae n anne, a kona ni bitii titiraki nakon aia ririki ao aroaroia membwa.

N tabetai iai aia titiraki membwa n tain te intawiu ibukin te beba ni kariaia nakon te tembora. E na kona ni kabwarabwara te tia kairiiri moan reirei n te euangkerio. E kona naba ni buokiia membwa ni kamatataia ibukin titiraki iaon beba ni kariaia nakon te tembora ngkana e kainnanoaki. E ngae n anne, e na riai n aki kaoti ana koaua aika a onoti rongorongona ke ana rairairi n ana reirei te Ekaretia ke ana tua.

A riai beba ni kariaia nakon te tembora n aki kataweaki. A riai n onoti. E ngae n anne, e kona te aomata are e intawiunaki ni kaoa kainabana, ana karo, ke temanna te ikawai bwa e na raonna.

26.4.1

Titiraki n Intawiu Ibukin te Beeba ni Kariaia nakon te Tembora

1. Iai am onimaki inanom ao am koaua iroun te Atua, te Tama ae Akea Tokina; Natina, Iesu Kristo; ao te Tamnei ae Raoiroi?

2. Iai am koaua ibukin Ana Mwakuri ni Kamaiu Iesu Kristo ao n Ana beku ngkai am Tia Kamaiu ao te Tia Kabooira?

3. Iai am koaua ibukin Kaokan ana euangkerio Iesu Kristo?

4. Ko kamatoa te Beretitenti n ana Ekaretia Iesu Kristo ibukiia Aika Itiaki ni Boong aika Kaitira bwa te burabeti, te tia mamata, te tia karekei kaotioti ao bon tii ngaia te aomata i aon te aonaaba ae e kariaiakaki ni kamwakuri kiingin te nakoanibonga ni kabane?

   Ko kamatoaia kaain te Moan Beretitentii ao te Kooram n Abotoro n te Tengaun ma Uoman bwa burabeti, taan mamata, ao taan karekei kaotioti?

   Ko kamatoaia Mataniwi ni Kabuta ake tabeman ao mataniwi n te tabo n te Ekaretia?

5. E a tia te Uea n taekinna bwa bwaai nako ana bane ni “karaoaki n te itiaki” i Matana (Reirei ao Berita aika Tabu 42:41).

   Ko kekeiaki ibukin ataakin te itiaki n am iango ao n anuam?

   Ko kawakina tuan te itiaki?

6. Ko iriira ana reirei ana Ekaretia Iesu Kristo n anuam aika aki noraki ao aika noraki ma am utu ao tabeman?

7. Ko boutokai ao ni kaungai taian reirei, mwakuri, ke koaua aika a kaitara ma ake n ana Ekaretia Iesu Kristo ibukiia Aika Itiaki ni Boong aika Kaitira?

8. Ko kekeiaki ni kawakina te bong ae te Tabati n tabuia, ni mweengam ao n te taromauri, ni kaekaei am bootaki, ni katauraoiko nakon ao ni kororaoi n anaa te toa; ao ni maiuakina maium ni kabooraoia ma tuua ao tuan te euangkerio?

9. Ko kekeiaki bwa ko na kokoaua ni bwaai ni kabane aika ko karaoi?

10. Ko kakabwaka am kabwianibwai n ae e bwanin?

    Ibukiia membwa ake a ukora te beeba ni kariaia ni karaoi oneanimwi ni bwabetito ao kamatoa: Ko tauraoi ni ongeaba n tuan te kabwaka kabwianibwai?

11. Ko mataata ao n ongotaeka nakon Tuan te Mauri?

12. (E katukaki te titiraki aio ngkana e karaoaki te intawiu ibukin te ataei ke te kairake.) Iai katabeam n te mwane ke bwaai riki tabeua nakon kaainabam mai mwaina ke nakoia natim?

    Ngkana iai, ko teimatoa ni kakoroi nanon katabeam akanne?

13. (E katukaki te titiraki aio ngkana e karaoaki te intawiu ibukin te membwa are e tuai n entaau.) Ko kawakin am berita aika tabu ake ko karaoi inanon te tembora?

14. (E katukaki te titiraki aio ngkana e karaoaki te intawiu ibukin te membwa are e tuai n entaau.) Ko karinea tibwangam ae tabu ni bwaina te kamenti n aron ae baireaki inanon te moan waaki ibukin taian otenanti? (Wareka “Bwainakin te Kamenti n te Tembora” ae oti inano, nakoia membwa n tatabemaniia nako.)

15. Iai am bure aika a kakaiaki inanon maium ae ko riai ni kaitiaki ma mataniwi n te nakoanibonga bwa mwakoron am rairannano?

16. N am iango ko tau n rin n ana auti te Uea ao ni karaoi otenanti n te tembora?

26.4.2

Bwainakin te Kamenti n te Tembora

E a tia te Moan Beretitentii ni katauraoa te kairi ibukin bwainakin te kamenti:

“Te kamenti ibukin te nakoanibonga ae tabu e kauringiira ibukin te rabuna n te tembora, ao te rabuna anne bon te kanikinaa ibukin Iesu Kristo. Ngkana ko bwaina te kamenti, ko katokaa iaom te kanikinaa ae tabu ibukin Iesu Kristo. Bwainakina bon kaotana mai itinanikum am motinnano inanom ni kan Iriiria. Te kamenti bon te kauring naba ibukin am berita aika tabu n te tembora. Ko riai ni bwaina te kamenti n te ngaina ao n te bong ni maium ae bwanin. Ngkana e na riai buutakina ibukin waaki ni kakukurei aika e aki riai kabonganakin kamenti iai, taraia bwa ko na manga bwainna n te tai ae waekoa. Ngkai ko kawakin am berita aika tabu, n raonaki ma arom ae tabu ni bwaina te kamenti n aron ae baireaki i nanon moan wakinan taian otenanti, ko na waekoa ni karekea ana nanoanga, kamanomano, kakorakora, ao mwaakan te Tia Kamaiu.”

Ngkana iai aia titiraki membwa ibukin bwainakin te kamenti, kanakoia nakon 38.5.

26.4.3

Kawaina riki Tabeua

Te tia kairiiri n te nakoanibonga e kamatata nakon te membwa kainnanoan kamanoan ana rekomente teuanne ke neienne. E na aki kona n tangoaki iroun temanna ao e na ribootinaki n te tai ae waekoa nakon are e kanakoa ngkana e bua ke e kimoaaki.

26.5

Kanakoan Beeba ni Kariaia nakon te Tembora ni Kangaanga aika Onoti

26.5.1

Membwa Aika A Tibwa Bwabetitoaki

E intawiu te bitiobi ma membwa ake a boou ake a roko n te ririki ae tau n karekea te kariaia nakon te tembora ibukin karaoan bwabetito ao kamatoa n tei ibukiia maate (taraa 26.3.1). E karaoa te intawiu aio n te tai ae tawe imwiin kamatoakin te membwa, i nanon teuana te wiiki mwiin te kamatoa. Ibukiia mwaane, te intawiu aio e na riki naba bwa mwakoron te intawiu ibukin karekean te Nakoanibonga ae te Aaron. E kona te bitiobi ke te beretitenti n te mwaanga n katabea temanna mairouia aia kauntira bwa e na karoa te intawiu aei. Mwaane aika membwa n te Ekaretia a riai ni katabuaki nakon aobitin te nakoanibonga i mwaain reken ana beeba ni kariaia nakon te tembora.

I nanon tain te intawiu, e kona te bitiobi n kabonganaa te Family Name Assist ni buokiia membwa aika boou n kaotinakoa aran aia utu ae mate are e kona te membwa ae boou ni karaoi otennati n te tembora ibukina (taraa “Family Name Assist” in 25.4.1).

Membwa ikawai aika a tau a kona ni karekei oin aia entaumente teuana te ririki ae bwanin imwiin kamatoakiia bwa kaain te Ekaretia (taraa 27.2.1.1). Taan kairiiri n te nakoanibonga a na kakoaua raoi bwa bongin te namwakaina are e reke iai ana entaumente te membwa bon teuana te ririki ae bwanin imwiin bongin te namwakaina are e kamatoaki iai teuanne ke neienne, tiaki bongin namwakaina are e bwabetitoaki iai. Ti te Moan Beretitentii ae a kona n anga te kariaia ngkana e na aki iraki te tua anne.

26.5.2

Mitinare Kairake ake a Oki man aia Mwakuri ae Raroanako man Mweengaia

I mwaain banen ana tai te mitinare ae kairake are e beku n te tabo ae raroanako ma mweengana, e na kaira te intawaiu te beretitenti n te mition ibukin te beeba ni kariaia nakon te tembora. Ngkana e tau te mitinare, e na karaoa ana beba ni kariaia. Te beretitenti n te mition e na korea bongin namwakaina ao ni kamwakura te beba ni kariaia bwa e na bane taina teniua namwakaina imwin rokon te mitinare ni mweengana.

Te bitiobi e intawiuniia mitinare ake a bane aia tai ni manga karaoa aia beba ni kariaia nakon te tembora ae boou ni kaniia tokin te teniua n namwakaina are e na bane iai taina. Ni keiti aika kataweaki ngkana akea te bitiobi, e na kona ni kariaia temanna ana kauntira ni kairi intawiu aikai.

Ni uoote aika a bubura ibukiia kairake n ikawaki aika a tuai ni iein, a na kona Bitiobi n anga aia kariaia nakoia kauntira ake a mwaatai ni kairi intawiu aikai.

Mitinare ake a bane aia tai ngkanne a na kawara temanna kaain te beretitentii n te titeiki ibukin karaoan ana intawiu ibukin ana beeba ni kariaia nakon te tembora.

Inanon intawiu aikai ibukin beba ni kariaia nakon te tembora, te bitiobi ao temanna kaain te beretitentii n te titeiki e na maroroakin reirei ake a taekinaki n ana kabanea n intawiu te mitinare (taraa 24.8.2). A maroroakina rikiraken te mitinare, mweeraoina, ao nakoana n te Ekaretia. A kaunga naba teuanne ke neienne n reitinako inanon maiuna n reitinako n rikirake ni maiun tamneina ao ana mwakuri n ibuobuoki.

Ngkana akea nakoan te mitinare ae bane ana tai aei n te Ekaretia, a na kakoaua te bitiobi ao te beretitenti n te titeiki bwa e na anganaki te wewete. A kona ni kariaiakaki ake a tia n oki man karaoan aia mwakuri ni mitinare bwa a na beku bwa taan mwakuri n te tembora ngkana e kaan te tembora (taraa 25.5).

26.5.3

Membwa Ake a Tia n Aki Maeka n te Uoote Tao Teuana te Ririki

Ngkana e aki maeka te membwa n te uoote naba anne n reitinako tao nakon teuana te ririki , te bitiobi e na rinanoa ana rekooti te membwa ni kakoaua raoi bwa e aki taekinaki tianakin ao taian totoko n te membwatibu rekooti n te Ekaretia.

Te bitiobi ke te kauntira are e katabeaki e na reitaki ma te bitiobi are mai imwaaina imwaain karaoan te intawiu ibukin te beba ni kariaia nakon te tembora. Ngkana te kauntira e ataia bwa iai te rongorongo ae kainaki, e na motika te marooro. E tuanga ana bitiobi bwa e na reitaki ma te bitiobi are mai imwaaina imwaain te intawiu.

26.5.4

Imwiin te Raure, Te Maenako, ke te Kamaunaaki

Te bitiobi ao te beretitenti n te titeiki a na bae n namakina ae a na intawiuna te membwa are e a tia n raure ke a tia ni maenako iaan te tua ke e a tia ni kamaunaai ana mare n te kabanea n tai are e reke iai ana beba ni kariaia nakon te tembora. N tain te intawiu aei, a buoka ni kakorakora maiun tamnein te membwa. A kakoaua naba bwa te membwa e teimatoa n tau ibukin te tembora.

26.5.5

Membwa Ake iai aia Utu ni Kaan ake a Kaitara te Ekaretia ke a Kaaini Kurubu ake a Kitana te Koaua

Bitiobi ao aia kauntira a riai n rangi ni kakauongo nakon aia namakin ngkana a karaoi beba ni kariaia nakoia membwa ake aia utu ni kaan a kaitaraa te Ekaretia ke a kaaini kurubu ake a kitana te koaua. Membwa inanon aro aikai a riai n aki reke aia namakin are e aki kona n reke aia beba ni kariaia nakon te tembora ibukin irekerekeia ma kaain aia utu aikai. A riai ni kaungaaki bwa a na kateimatoa te reitaki n tangira ma aia utu ni kaan. E na kona ni karaoaki aia beba ni kariaia nakon te tembora ngkana a bane ni kaekai raoi taian titiraki akana inanon te beba ni kariaia ma te nano ni koaua.

26.5.6

Aomata Ake A Kinaaki Ake A Bitii Aroia ni Mwaane ao n Aine

Otenanti n te tembora a butimwaeaki ni kaineti nakon moan rikin te aomata ngke e bungiaki. Membwa ake a tau ake a aki karaoa te korokoro, bwain aoraki, ke ni bitiia nakon bon oin rikiia are ngke a moan bungiaki a kona n reke aia beeba ni kariaia nakon te tembora ao otenanti. (Ibukin nanon te taeka ae bita rikim ni kan riki bwa te mwaane ke te aine, taraa 38.6.23.)

Membwa ake a bitiia n okira aron rikiaia ni mwaane ke aine ngke a bungiaki ao a bon tau ao a kawakin ana tua te Atua a kona ni karekea te beeba ni kariaia ao otenanti n te tembora.

A riai bitiobi ni marooro ma te beretitentii n te titeiki ni maroroakina ana kangaanga te aomata n aki ekanako ana namakin ao ni kaota ana tangira Kristo. A ukori taeka n reirei beretitenti n te titeiki ao n te mition mairouia kaain te Beretitenti n te Aono.

Ibukin rongorongo riki tabeua, taraa 38.6.23

26.5.7

Membwa Ake A Tia Ni Karaoa te Bure Ae Kakaiaki

Te membwa are e a tia ni karaoa te bure ae kakaiakaki e na aki kona ni karekea te beba ni kariaia nakon te tembora ni karokoa e a tia neienne ke teuanne n raira nanoia (taraa 32.6). Te tai n tataninga imarenan te bure ae karaoaki ao karaoan te kariaia bon taben ke ana babaire te bitiobi ao te beretitenti n te titeiki. E riai n tau kakoauana raoi bwa e a tia te aomata n raira nanona ma te koaua.

26.5.8

Membwa Ake a Tia ni Manga Kaokaki imwiin Butakin ke Kamaunaakin aia Membwatibu

26.5.8.1

Membwa Ake A Tuai n Entaunte Mai Imwaaina

Imwiin manga kaokana man te bwabetito ao te kamatoaaki te membwa are e tuai n entaute mai imwaaina, te bitiobi e na intawiuna teuanne ke neienne ni karekea ana beeba ni kariaia nakon te tembora ibukin te onomwi ni bwabetito ao kamatoaaki (taraa 26.4.2). Te intawiu aei e karaoaki inanon teuana te wiiki n tain kamatoaakin te membwa. Mwaane aika membwa n te Ekaretia a riai ni katabuaki nakon te nakoa n te nakoanibonga imwaain reken aia beeba ni kariaia nakon te tembora.

Membwa aikai aki konaa ni karekeaki aia beba ni kariaia ibukin karekean aia entaumente ni karokoa e bane teuana te ririki imwiin te tai are a manga oki iai nakon te Ekaretia man te bwabetito ao te kamatoaki.

26.5.8.2

Membwa Ake a Kaman Entaute

Aki kona membwa aikai n anganaki aia beba ni kariaia, n ikotaki ma beba ni kariaia ae katauaki taina, ni karokoa a manga kaokaki aia kakabwaia man te tembora rinanon te otenanti ni kaokan kakabwaia (taraa 32.17.2). Ngkana a kaokaki aia kakabwaia, a kona ni karaoaki aia beeba ni kariaia nakon te tembora ibukiia membwa aika tia n entaute.