25.

Katiteuanaakiia Utu ibukin te Maiu ae Akea Tokina rinanon te Mwakuri n te Tembora ao Rongorongon te Utu

25.0

Kabwarabwaraana

Te tembora bon Ana auti te Uea. Otenanti ao berita aika tabu n te tembora a kakabwaiaia natin Tamara are i Karawa. Tamara are i Karawa E kaoiia natina ni kabane bwa a na tau ibukin ao ni karekei taian otenanti n te tembora.

Katiteuanakiia utu ibukin te maiu ae akea tokina bon mwakoron Ana mwakuri te Atua ibukin te kamaiuaki ao te karietataaki (taraa 1.2). Te mwakuri n te tembora ao rongorongon te utu bon ibukin katiteuanakiia ao kabaeakiia utu ibukin te maiu ae akea tokina. (taraa Mataio 16:19). Te mwakuri aei e raonaki ma:

• Karaoan berita aika tabu ngkana ti karekei oin ara otenanti n te tembora (taraa Itaia 55:3; Reirei ao Berita aika Tabu 84:19–23).

• Kakaen araia ara bakatibu ake a tia ni mate ao karaoan otenanti ibukiia n te tembora bwa a aonga ni karaoi berita ma te Atua (taraa Maraki 4:5–6; 1 I-Korinto 15:29; Reirei ao Berita aika Tabu 128:15–18).

• Te nakon te tembora n tainako, ngkana e kona, n taromauriia te Atua ao ni karaoi otenanti ibukiia ara bakatibu (taraa Ruka 24:52–53; Reirei ao Berita aika Tabu 109:13–14).

Irakin waaki ni mwakuri aikai e uoti kakabwaia aika a korakora. Ngkai a karaoi ao ni kawakin berita aika tabu membwa, a karekea mwaakan te Atua. A kunea te kimwareirei n ana auti te Uea n tei ibukiia aia bakatibu.

Te mwakoro aei e kairiia taan kairiiri ao membwa n te Ekaretia n aroia ni katiteuanaia utu ibukin te maiu ae akea tokina rinanon te mwakuri n te tembora ao rongorongon te utu. Rongorongona riki a kona n reke n “Tembora,” “Proxy Baptism,” and “Family History” (Topics and Questions, Gospel Library).

25.1

Aia Iwawaaki Membwa ao Taan Kairiiri ni Katiteuanaakiia Utu ibukin te Maiu ae Akea Tokina

Membwa n te Ekaretia iai tibwangaia ao tabeia ni buoka katiteuanakiia aia utu ibukin te maiu ae akea tokina. A katauraoiiaa ni karaoi berita aika tabu ngkana a karekei taian otenanti n te tembora. A botumwaaka ni kawakin berita aika tabu akanne.

A buokiia naba kaain te utu n ataia, ni karekea, ao ni kekeiaki ni kawakin berita n te tembora. Iai tabeia kaaro ni buokiia natiia bwa a na namakina te kimwareirei ao kakabwaia man karaoan berita aika tabu bon ibukiia ao karaoan otenanti n tei ibukiia aia koraki ake a tia ni mate (taraa 2.1.3).

Membwa n te Ekaretia a kaungaaki bwa a na kinaia aia utu ake a tia ni mate ake a tuai karekei otenanti n te tembora. Membwa ngkanne a karaoi otenanti ibukiia aia utu aikanne (taraa Reirei ao Berita aika Tabu 128:18). N te aonaaba n tamnei, aomata n tatabemaniia ake a tia ni mate a kona ni butimwaai ke n totokoi otenanti ake a tia ni karaoaki ibukiia.

A kaungaaki naba membwa bwa a na ukori rongorongoia aia bakatibu, are na kona ni kanakoraoi taneiai ni karaoan otenanti n tei ibukiia aia bakatibu. Membwa a kaoiia tabeman bwa a na karaoa naba anne.

A tauraoi bwaai ni mwakuri ibukin buokaia membwa ni karaoa aia mwakuri n te tembora ao rongorongon te utu. Tabeua mai buakon aikai a kabwarabwaraaki n 25.4.1 ao 25.4.2.

25.1.1

Tabeia n Tatabemaniia Nako Ibukin Te Nebonebo n te Tembora

A na iangoia bon irouia membwa bwa n ningai ke maanra tain te nebonebo inanon te tembora. Taan kairiiri aki katei kouru ke kawai ibukin ribotinakin mwaitin te Nebonebo n te tembora.

Membwa n tatabemaniia nako ao utu aika a tuai bane tain aia beeba ni kariaia nakon te tembora a kona n nakon te tembora are a tangiria. A kona ni kabaea aia tai ibukin nakoia nakon te tembora. Taraa temples.ChurchofJesusChrist.org ibukin te reitaki ibukin tembora n tatabeua nako.

25.1.2

Tain Mwanangaia Uoote ao Titeiki Nakon te Tembora

Ana iunite te Ekaretia n tatabeua nako e anganaki te tembora n te mwakoro. Kawarakin tembora irouia uoote ke titeiki itinanikun te tembora n te mwakoro are e a tia ni baireaki aki kaungaaki.

Ibukin mwamwanangan te uoote ao te titeiki nakon te tembora a riai ni kabaea aia tai ma te tembora. Taraa temples.ChurchofJesusChrist.org ibukin te reitaki ibukin tembora n tatabeua nako.

25.2

Taan Kairiiri n te Uoote

25.2.1

Bitiobiriki

Bitiobiriki a ikarekebai ma beretitentii n te kooram n unimwane ao te Bootaki n Aine ngkai a kaira ana mwakuri te uoote n te tembora ao rongorongon te utu, ake a ibuobuoki n katiteuanakiia utu ibukin te maiu ae akea tokina. Taan kairiiri aikai a reitaki ni marooro ni katoa tai.

Te bitiobiriki iai rakan tabena n aron aikai:

• Tarai ao anga te kariaia nakon ana babaire te uoote iaon te tembora ao rongorongon te utu (taraa 25.2.6

• Kakoaua bwa te mwakuri n te tembora ao n rongorongon te utu a kaai ni baireaki inanon bowiin te kauntira n te uoote ao n aia kauntira kairake.

• Tararua te kiraati ibukin te katauraoi nakon te tembora (taraa 25.2.8).

• Anga te beba ni kariaia n rin n te tembora (taraa mwakoro 26).

Te bitiobiriki e na marooro ma te beretitenti n te titeiki ni bairea riain wetean te tia kairiiri n te tembora ao rongorongon te utu (taraa 25.2.3 ibukin rongorongona ae bwanin).

25.2.2

Beretitentii n te Kooram n Unimwaane ao te Bootaki n Aine

Beretitentii n te kooram n unimwaane ao n te Bootaki n Aine a kaira te mwakuri n te tembora ao rongorongon te utu n te uoote n te bong teuana ma teuana, are e buoka katiteuanaakiia utu ibukin te maiu ae akea tokina (taraa 8.2.4 ao 9.2.4). Te beretitentii n te kooram n unimwaane a kairii mwakuri aikai ibukiia membwa n te kooram ni unimwaane. Te beretitentii n te Bootaki n Aine a kairii mwakuri aikai ibukiia membwa n te Bootaki n Aine. A mwakuri ni ikotaki ni kairii mwakuri aikai ma kain te bowi ni kauntira n te uoote, iaan ana babaronga te bitiobi.

Taan kairiiri aikai iai katabeakia n aron aikai:

• Buoka te kauntira n te uoote ni karikirakea ao ni mwakuriia te babaire n te tembora ao n rongorongon te utu n te uoote (taraa 25.2.6

• Tuanga te tia rabakau ibukin te tembora ao n rongorongon te utu n te uoote bwa e na buokiia membwa aika a onoti ni kakaei ao ni katauraoi araia aia bakatibu ibukin aia otenanti n te tembora (taraa 25.4.1). Mwakuri aikai a boboto riki i aoia naake a tibwa karekea weteaia man te mition ao naake a tuai n entaau.

• Kakoaua bwa te mwakuri n te tembora ao rongorongon te utu e baireaki ao n ribotinaki inanon bootakin te kauntira n te uoote ao n te bowi ni babaire ibukin te tembora ao n rongorongon te Utu.

• Kaira ana mwakuri te tia kaira te mwakuri ibukin te tembora ao rongorongon te utu n te uoote. Ngkana e aki weteaki te tia kairiiri aei, te membwa n te beretitentii n te kooram n unimwaane e na kanoa te nwakuri aei (taraa 25.2.3

• Ngkana e riai, rineia taan ibuobuoki ibukin mwakurin tembora ao rongorongon te utu n te uoote bwa a na beku n te tienta ibukin te FamilySearch (taraa 25.3.6).

Te beretitenti n aia kooram unimwaane ao te Bootaki n Aine a na mwiokoa te membwa n te beretitentii ni ibuobuoki ni kaira te mwakuri ibukin te tembora ao rongorongon te utu n te uoote. Membwa n te beretitentii aika uoman aikai a na botaki ni mwakuri. A na kakoaua bwa a karaoaki bowi ni babaire ibukin te tembora ao rongorongon te utu (taraa 25.2.7).

25.2.3

Te Tia Kairiiri Ibukin te Tembora ao n Rongorongon te Utu n te Uoote

Te bitiobiriki e na reitaki ma te beretitenti n te titeiki ni iangoia ngkana e na weteaki te tia kairiiri ibukin te tembora ao rongorongon te utu n te uoote. Ngkana a baireia bwa a kanakoa te wewete aio, te bitiobiriki e marooro ma te beretitenti n te kooram n unimwaane ao n te Bootaki n Aine ni iangoia bwa antai ae a na weteia. Te aomata aei e riai ni iai irouna te Nakoanibonga ae te Merekitereka. Ngkana e aki weteaki te tia kairiiri aei, te membwa n te beretitenti n te kooram n unimwaane e na kanoa te nakoa aei.

Te tia kairiiri n te uoote ibukin te mwakuri n te tembora ao rongorongon te utu a boutoka te beretitentii n aia kooram unimwaane ao te Bootaki n Aine ni katabeaia ibukin te tembora ao rongorongon te utu. Iai naba mwiokoana n aron aikai:

• Bairei mwakuri n te tembora ao n rongorongon te utu ma taan kairiiri n te uoote, n raonaki ma beretitentii n te kooram ni kairake ao te kiraati.

• Kairi bowi ni babaire ibukin te tembora ao n rongorongon te utu n te uoote (taraa 25.2.7).

• Irii bootakin te kauntira n te uoote ngkana e kaoaki.

• Buoka te kauntira n te uoote ni karikirakea ao ni mwakuriia te babaire n te tembora ao n rongorongon te utu n te uoote (taraa 25.2.6).

• Kairiia taan mwakuri n te tembora ao n rongorongon te utu. Bairei aia mwakuri bwa a na buokiia membwa ni kakaei araia aia bakatibu ao n tei ibukiia ni karaoi aia otenanti n te tembora.

• Mwakuri ma te tia kairiiri n te mition n te uoote ao mitinare ni buokiia naake a reiakina te euangkerio, membwa aika boou, ao membwa aika a oki aika a tabe ma te mwakuri n te tembora ao n rongorongon te utu.(taraa 23.2 ao 23.3).

25.2.4

Taan Rabakau ibukin te Tembora ao Rongorongon te Utu n te Uoote

Taan rabakau n te tembora ao n rongorongon te utu n te uoote a beku iaan a na kairiiri te tia kairiiri n te tembora ao n rongorongon te utu. Te bitiobi e weteiia membwa aikai ni beku. Ikawai ao roronrikirake a kona ni weteaki. Beretitenti n te kooram n unimwaane, te Bootaki n Aine ao Ataeinnaine a kona n anga araia aika a kona ni beku.

Taan ibuobuoki a reireiniia tabeman kawai aika a bebete bwa a na kanga n ira te mwakuri n te tembora ao rongorongon te utu, ake a katiteuanaiia utu ibukin te maiu ae akea tokina. A kabanei riki nanoia i aoia kairake, membwa aika a boou ao ake a oki, taari aine ao taari mwaane ake a tuai n entaau. Iai tabeia taan rabakau n aron aikai:

• Buokiia membwa ni katauraoia ni karekea aia otenanti n te tembora ao ni karaoi berita aika tabu.

• Buokiia membwa bwa a na taneiai ma kakabwaia ni kakaeakiia aia bakatibu ao ni karaoi otenanti n te tembora ibukiia.

• Irii bootaki ibukin te tembora ao rongorongon te utu (taraa 25.2.7

• Beku n te tienta n te tabo ibukin te FamilySearch ngkana e anganaki (taraa 25.3.6).

Bwaai n ibuobuoki ni buokiia membwa ao taan rabakau ibukin te tembora ao rongorongon te utu a karinanaki inanon 25.4.1 ao 25.4.2.

25.2.5

Kauntira n te Uoote

Membwa n te kauntira n te uoote a tataro mwaaka ibukin karikirakean ao karaoan te babaire ibukin te tembora ao rongorongon te utu n te uoote. Ibukin rongorongon te babaire, taraa 25.2.6.

E kona te bitiobi ni kaoa te tia kaira mwakurin tembora ma rongorongon te utu nakon bowin kauntiran te uoote.

Membwa n te kauntira ni uoote iai tabeia n aron aikai:

• Buokiia membwa n tatabemaniia ni katauraoiia ni karaoi berita aika tabu ma te Atua man karekean taian otenanti n te tembora (taraa 27.1

• Kaungaiia kairake ni kabane ao membwa aika a ikawai, n ikotaki ma membwa aika a boou bwa a na karekei aia beeba ni kariaia nakon te tembora ae tuai bane taina (taraa 26.0).

• Kaungaiia membwa bwa a na nebonebo inanon ana auti te Uea n tainako ngkana e angaraoi irouia.

• Kaoiia aomata n tatabemaniia ao utu n reiakina te tua ao kakabwaia n iriiran te mwakuri ibukin katiteuanaakiia utu ibukin te maiu ae akea tokina. Te mwakuri aei e kaairaki ma reiakinan rongorongoia bakatibu ao karaoan otenanti n te tembora n tei ibukiia.

• Boutokaia kaaro n reireinaia natiia tuan te mwakuri ibukin katiteuanaakiia utu ibukin te maiu ae akea tokina. Aei e kaairaki ma kakabwaia ibukin berita aika tabu n te tembora ao otenanti ao ibukin karaoan otenanti n te tembora ibukiia aia bakatibu ake a tia ni mate.

• Reiakin tuua ibukin te mwakuri aei n taainako n tain bootakin te Ekaretia.

Taraa mwakoro 26ibukin rongorongon te beba ni kariaia n rin n te tembora.

25.2.6

Te Babaire ibukin te Tembora ao Rongorongon te Utu n te Uoote

Uoote n tatabeua nako a riai n iai aia babaire ae bebete ibukin te tembora ao rongorongon te utu. Te baire aei e buokiia membwa n te uoote, n raonaki ma ataei ao kairake, ni katauraoiia n nebonebo i nanon ana auti te Uea ao n ira waakin te mwakuri ibukin rongorongon te utu n tainako ngkana e angaraoi irouia.

Beretitenti n te kooram n unimwaane ao te Bootaki n Aine a na buoka te kauntira n te uoote ni karaoa te babaire. Te tia kairiiri ibukin te tembora ao rongorongon te utu n te uoote a na ibuobuoki naba. Ni karaoan te babaire, a na:

• Tataromwaaka iangoi kainnanoia membwa ao bwaai n ibuobuoki ake a tauraoi.

• Katauraoi waaki aika a na karaoaki n te ririki anne.

• Iangoia bwa ko na kanga ni karaoa te babaire ao ni karaoi mwakuri aikanne.

Katooto n aron bwaai aika a na karinaki n te babaire a kaotaki inano:

• Buokiia membwa aika a onoti n atai kakabwaia ibukin te nebonebo n ana auti te Uea.

• Buokiia membwa ni katauraoia bwa aonga ni karekei kakabwaia ibukin otenanti n te tembora.

• Buokiia membwa ni kabonganai Otenanti ake a Tauraoi ni uota aran aia bakatibu nakon te tembora (taraa 25.4.1).

• Buokiia membwa bwa a na kabongana te webutiaite ibukin te FamilySearch ke te app ni karin baike a atai ibukin rongorongoia aia koraki ake a tia ni mate ake a kainnanoa aia otenanti (taraa 25.4.1).

• Kairekerekeia membwa aika boou ao aika tibwa oki, kairake ao ataei n te mwakuri ibukin te mwakuri n te tembora ao rongorongon te utu. Te Ibuobuoki ibukin Aran te Utu bon te kawai ae bebete ibukiia taan kairiiri ni buokiia membwa aikai ni katauraoi araia aia utu bwa aonga ni karekei aia otenanti (taraa 25.4.1).

• Buokiia ataein te Moanrinan ni katauraoia bwa a na karekea aia rekomente nakon te tembora ao n nebonebo n ana auti te Uea ni katoa tai ngkana e angaraoi. E riai te beretitentii n te Moanrinan ni karaoi boowi ni Katauraoi ibukin te Tembora ao te Nakoanibonga ni katoa ririki (taraa 12.1.7 ao 12.2.4).

Ana baire te uoote ibukin te tembora ao rongorongon te utu aki katei kouru ke kawai ibukin ribotinakin mwaitin te Nebonebo n te tembora (taraa 25.1.1).

Te bitiobi e rinanona ao ni kariaia te babaire. Kaain te kauntira n te uoote a na kaira te waaki ni karaoana. A ribotin aia kekeiaki n tain botakin te kauntira n te uoote. A na rinanon naba te babaire ngkana e kainnanoaki.

25.2.7

Bootaki ni Babaire ibukin te Tembora ao n Rongorongon te Utu n te Uoote

Bowi aika kimototo ibukin mwakurin tembora ao rongorongon te utu n te tembora a karaoki n taia. Te tia kairiiri ibukin te tembora n te uoote ao rongorongon te utu e na kairi bootaki aikai.

Tabeman ake a weteaki n aron aikai:

• Katabeia membwa n te Bootaki n Aine, te kooram n unimwaane, ao beretitentii n te Moanrinan.

• Te tia ibuobuoki n aia kooram ibonga (ke te beretitenti man aia kooram tia reirei ke rikan ngkana akea te ibonga n te uoote).

• Te membwa n te beretitentii ae te kabanea n ikawai n aia kiraati Ataeinnaine.

• Te tia rabakau n te tembora ao n rongorongon te utu.

Ni kabane ake a roko, n raonaki ma kairake, a na uaia ni marooro ae ti te arona ngaiia ngkai a iria. Bootaki aikai a boboto riki i aon kainnaoia aomata n tatabemaniia ao a kanga ni kona ni kakabwaiaaki ngkai a ira waakin te mwakuri n te tembora ao n rongorongon. A kabanei riki nanoia i aoia kairake, membwa aika a boou ao ake a oki, taari aine ao taari mwaane ake a tuai n entaau. Bootaki aikai a taneiai n rinanoi atuu n reirei aikai:

• E kanga aron karinan babaire ibukin te tembora ao rongorongon te utu n te uoote (taraa 25.2.6).

• Aron buokakiia membwa n te uoote aika onoti bwa a na katauraoi ni karekei otenanti n te tembora.

• Aron buokakiia membwa n te uoote ae onoti ma aia mwakuri n te tembora ao n rongorongon te utu.

A na karaoaki bootaki aikai ma temanna te aomata ke n taabo aika raroanako. Te boowi n reitaki e kona naba n riki ni kawai riki tabeua, ni ikotaki ma tareboon, ke tekiti n te kurubu.

Kataia n irii reirei ibukin mwakuri ao bukintaeka inanon 4.4.5. Te aomata are e mena n te boowi e kona ni katabeaki bwa e na taua mwiin ao ni kauringa te kurubu ibukin mwakuri ake a tia ni baireaki.

A kona mwaanga aika a uarereke n rineia ni karaoa te ikarekebai ni mwakuri ibukin te tembora ao n rongorongon te utu inanon kauntira n te mwaanga.

25.2.8

Te Reirei ibukin te Katauraoi Nakon te Tembora

Iaan ana kaetieti te bitiobi, te reirei ibukin te katauraoi nakon te tembora e kona ni baireaki bwa e na buokiia membwa ni katauraoia ni karaoi berita aika tabu ngkana a karekei otenanti n te tembora. A karaoaki reirei aikai itinanikun tain bootaki n te Tabati ae tataneiai te aba iai n te tai are e angaraoi ibukiia membwa. A kona ni karaoaki n te autinibotaki ke inanon te mwenga.

Membwa n ana kauntira te uoote a tataro mwaaka n rineia membwa ae a na kaoia bwa a na irii reirei aikai. A kona reirei aikai n ti ibuobuoki ibukiia aomata aikai:

• Membwa aika boou

• Membwa aika a katauraoia ni karekei oin aia entaunmente ke ni kabaeaki

• Membwa aika a oki nakon ana waaki ni kakukurei te Ekaretia

• Membwa aika a tia n entaunte aika a tuai kaboui aia beeba ni kariaia nakon te tembora ibukin manga kananauakin riki aia tai

Te bitiobiriki e na wetea temanna ke e raka riki taan reirei iaon te katauraoi nakon te tembora. Reirei ao kaetieti ibukin bairean te reirei a kona n noraki inanon Bwaintangiraaki man ae Rietata: Ana Bokinreirei te Tia Reirei ibukin te Tieminaa n te Katauraoi ibukin te Tembora. Taan iria a anganaki katotoon te Preparing to Enter the Holy Temple Ibukin te kamatebwai i bon iroum ao bwaai n ibuobuoki n te reirei, taraa temples.ChurchofJesusChrist.org.

25.3

Taan Kairiiri n te Titeiki

25.3.1

Beretitentii n te Titeiki

Te beretitenti n te titeiki iai irouna kiing ibukin Ana mwakuri te Atua ibukin te kamaiuaki ao te karietataaki n te titeiki. Ngaia ma ana kauntira iai tabeia bwa a na ibuobuoki ni katiteuanaia utu ibukin te maiu ae akea tokina:

• Buokiia membwa ni katauraoia ni karaoi berita aika tabu ngkana a karekei aia otenanti n te tembora.(taraa 27.1

• Kaungaia membwa ni kabane, moarara riki taari aine ao taari mwaane aika a tuai n iein ao naake a tuai n entaau, ni karekea te beeba ni kariaia ae tuai bane taina ao n nebonebo n ana auti te Uea ngkana e angaraoi ma aroia.

• Kakoaua bwa tua ao kakabwaia ibukin katiteuanaakiia utu ibukin te maiu ae akea tokina (n aron ae kabwarabwaraaki inanon 1.2.4) a reiakinaki n taainako inanon boowin te titeiki.

• Kaungaiia membwa bwa a na reirei taekaia aia bakatibu ao karaoi otenanti n te tembora ibukiia.

• Karaoi intawiu ibukin karekean beba ni kariaia n rin n te tembora (taraa mwakoro 26

I nanon ana boowi ni katoa tai ma beretitenti n te kooram n unimwaane n tatabemaniia, te membwa n te beretitentii n te titeiki e na maroroakina taekan ana mwakuri te uoote ni katiteuanaia utu ibukin te maiu ae akea tokina rinanon te mwakuri n te tembora ao rongorongon te utu (taraa 8.3.1). Kauntira n te beretitentii n aia kooram unimwaane ao te kauntira ae rietaata are e katabeaki nakon te kooram a kona n iria.

25.3.2

Te Komete Ni Kairiiri Irouia Ikawai n te Titeiki

Te komete ni kairiiri ibukiia ikawai n te titeiki kaina bon:

• Te titeiki beretitentii.

• Te beretitentii n te Bootaki n Aine n te titeiki.

• Kauntira aika rietaata a katabeaki bwa a na mwakuri ma kooram n unimwaane.

Taan kairiiri aikai a anga reirei ao boutokaiia beretitentii n te kooram n unimwaane ma te Bootaki n Aine n tabeia ni mwakurin tembora ao rongorongon te utu (taraa 25.2.2). Waaki ni kaetieti a kona ni karaoaki n te kurubu ke nakon ti temanna. Taan kaira mwakurin tembora ao rongorongon te utu n te uoote a kaoaki ni karekea te reirei aei.

Ibukin rongorongon riki te bowi ni komete aei, taraa 29.3.8.

25.3.3

Kauntira aika Rietata

Te beretitentii n te titeiki e kona ni katabeia kauntira aika rietaata bwa a na reireiniia ao ni boutokaia aomata aikai n tabeia ni katiteuanakiia utu ibukin te maiu ae akea tokina n te tembora ao n rongorongon te utu:

• Beretitentii n aia kooram unimwaane

• Taan kairiiri ibukin te tembora ao n rongorongon te utu n te uoote

• Taan rabakau n te tembora ao n rongorongon te utu

• Te kooteneita ibukin te FamilySearch tienta

Temanna ke e raka riki kauntira aika rietaata a kona ni katabeaki bwa a na kairi mwakuri aikai. E ngae n anne, kauntira ni kabane aika a rietaata iai tabeia aikai ibukiia uoote ao kooram ake a katabeaki iai.

Kauntira aika rietaata a kona ni buokiia beretitentii n te kooram n unimwaane ao taan kairiiri ibukin te tembora ao n rongorongon te utu a na reireiniia taan rabakau ibukin te tembora ao rongorongon te utu n te uoote. A kona kauntira aika rietaata ni buokaki irouia taan rabakau n te tembora ao n rongorongon te utu.

E kona te beretitentii n te titeiki n rinea te kauntira ae rietaata n tararuai ana mwakuri n anganano te titeiki ibukin rongorongon te utu (taraa 25.4.3). E na mwiokoaki teuanne ke te kauntira temanna ae rietaata bwa e na taraa te mwakuri i nanon tienta n te FamilySearch (taraa 25.3.6).

25.3.4

Beretitentii n te Bootaki n Aine n te Titeiki

Iaan ana kaetieti te beretitenti n te titeiki, te beretitentii n te Bootaki n Aine n te titeiki e na reirei ao ni boutoka te beretitentii n te Bootaki n Aine n te uoote n tabeia ibukin te mwakuri n te tembora ao n rongorongon te utu (taraa 9.2.4).

25.3.5

Te Tia Rabakau n te Tembora ao n Rongorongon te Utu

Taan rabakau ibukin te tembora ao n rongorongon te utu n te titeiki a boutoka te mwakuri n te tembora ao n rongorongon te utu rinanon te titeiki. A beku iaan ana kaetieti te beretitentii n te titeiki ao temanna ke e raka riki kauntira aika rietaata a katabeaki nakon te mwakuri n te tembora ao n rongorongon te utu.

Taan rabakau aikai a boutokaia kauntira aika a rietaata ao te beretitentii n te Bootaki n Aine n te titeiki n aia kekeiaki n reireiniia tabeman n te mwakuri n te tembora ao n rongorongon te utu (taraa 25.3.3 ao 25.3.4). A kona naba n anganaki mwakuri aikai:

• Ibuobuoki n reireiniia ao ni boutokaia membwa n taian wewete n te tembora ao n rongorongon te utu n te uoote.

• E ibuobuoki ni bairei mwakuri n anganano (taraa 25.4.3).

• Beku n tienta ibukin te FamilySearch (taraa 25.3.6).

25.3.6

Tienta ibukin te FamilySearch

Ngkana a tauraoi bwaai n ibuobuoki, e kona te titeiki ni katea teuana ke e raka riki tienta ibukin te FamilySearch. Tienta aikai a na buokiia iruwa aika roko ni kakaea, karekei rongorongon, ao n katiteuanaia kaain te utu aika maiu ao ake a tia ni mate rianon taian otenanti n te tembora. A bane ni butimwaeaki aomata ni kabonganai tienta aikai.

Te beretitenti n te titeiki e na wetea te kooteneita n te FamilySearch tienta bwa e na tararuai mwakuri n te FamilySearch tienta n tatabeua nako. Tienta n tatabeua nako a kainaki irouia taan rabakau n te titeiki ao n te tembora ao n rongorongon te utu n te uoote ake a tia n rineaki. A riai tienta n te FamilySearch ni kaukaki n taai aika a angaraoi. FamilySearch teinta ake a kaan ma te tembora a kona ni kangaraoa aia tai ma tain te tembora n te aba.

E kariaiakaki, bwa a na tararuaaki tabeua tienta n te FamilySearch aika bubura irouia kaain te Beretitentii n te Aono.

25.3.7

Te Kooteneita ibukin te FamilySearch Tienta

Te kooteneita n te FamilySearch center e na bairea naba butin raoi te mwakuri ni katoa bong ibukin te FamilySearch. Teuanne ke neienne e na beku iaan ana kairiiri te beretitenti n te titeiki ke te kauntira are e mwiokoaki. A kaairaki mwioko inanon karinan aika inano aikai.:

• Buokiia membwa ni katauraoi araia aia utu bwa a aonga ni karaoi taian otenanti inanon ana auti te Uea.

• Bairei waaki ni kakaukurei n te tienta ni buokiia membwa n te Ekaretia ao iruwa n te kaomiuniti ni kuneia aia bakatibu.

• Mwakuri ma (1) te kauntira ae rietaata are e mwiokoaki bwa e na boutoka te mwakuri n te tembora ao rongorongon te utu ao (2) te tibetioriti ibukin rabakau aika boou n te titeiki ni butimwaai kainnanon te tienta ni kanakoraoan te mwakuri ao ni kateimatoai ana bwai n ibuobuoki.

Te FamilySearch Center Operations Guide e katauraoa te kairi bwa ko na kanga ni kamwakura te FamilySearch tienta.

25.3.8

Aetuaitia n te Tembora ao n Rongorongon te Utu n te Uoote

A kona Beretitentii n te Aono ni weteiia aetuwaitia n te tembora ao rongorongon te utu. Ngkana e angaraoi ma aroia, te aomata temanna ke te taangana a kona ni weteaki ibukin te kauntira ni babaire n tatabeua nako. Aetuwaitia a bon ti beku ibukin teniua ke nimaua te ririki.

Te aomata ke taanga aika aetuwaitia n te aono a kona n rineaki bwa a na boutoka aia mwakuri aetuwaitia riki tabeman n te aono ake a mwiokoaki ibukin babairean kauntira n te aono.

E konaa te Beretitentii n te Aono ni mwiokoa te Itingaun n te Aono bwa e na bairea kairan aia mwakuri aetuwaitia aikai inanon te kauntira ni babaire. Aia mwakuri aetuaitia e riai ni boraoi ma ana nonori te aono.

N aron aia kaetieti Beretitentii n te Aono ke te Itingaun n te Aono are e mwiokoaki, aetuwaitia a buokiia beretitenti n te titeiki ni kakoroa bukin mwiokoaia ni buoka katiteuanaakiia utu ibukin te maiu ae ake tokina rinanon te mwakuri n te tembora ao n rongorongon te utu (Taraa 25.3.1). Aetuwaitia a buokiia beretitenti n te titeiki n reireiniia aomata ake a beku inanon nakoa aikai ibukin mwiokoaia.:

• Kauntira aika rietaata

• Beretitentii n te Bootaki n Aine n te Titeiki

• Te komete ni kairiiri irouia ikawai n te titeiki

• Taan rabakau n te tembora ao n rongorongon te utu

• Te Kooteneita ibukin te FamilySearch tienta

E kona ni mwiokoaki te atuwaitia ni buokiia te beretitentii n te titeiki ni katauraoia membwa ibukin te nebonebo n aia tembora ae boou n aia aono. Tabeua katabeaia a kona ni kaairaki ma kairaia taan kairiiri n te titeiki iaon taian reirei ao mwakurin te tembora ao rongorongon te utu. A raonaki ma:

• E kanga buokaia membwa ma aia moan taneiai ma mwakuri ni bonomwi ni karaoan te bwabetito n te tembora (taraa 23.2).

• Ko na kanga ni buokiia membwa ake a katauraoi ni karekei oin aia entaumente ke ni kabaeaki (taraa 25.2.8, 27.2, 27.3, ao 27.4).

• E kanga barongaan mwakuri n te tembora ao rongorongon te utu n te titeiki ao uoote (taraa 25.2).

• E kanga boutokaiia beretitentii n te kooram n unimwaane ma te Bootaki n Aine iaon katabeaia (taraa 25.2.2

• E na kanga irakin te mwakuri aei ni kakabwaiaia ataei ao te roronrikirake (taraa 10.2.4, 11.2.4, and 12.2.4).

• E kanga aron karaoan bootaki ni babaire aika a nakoraoi (taraa 25.2.7).

• E kanga aron buokaia taan kairiiri n te uoote ni katea te babaire ae nakoraoi ibukin te tembora ao rongorongon n te utu n te uoote (taraa 25.2.6).

Ibukin kaetieti ni kaineti ma te mwakuri aei, taraa Temple and Family History Leadership Instruction.

25.4

Bwaai n Ibuobuoki n Rongorongon te Utu

25.4.1

Bwaai n Ibuobuoki n te Aonraain

Te FamilySearch e katuraoi bwaai n ibuobuoki ibukin buokaia membwa ni kinaia ao ni katauraoi araia aia utu bwa a aonga n ira waakin karaoan taian otenanti ibukiia aia bakatibu ake a tia ni mate. Otenanti aikai a katiteuanaia utu ibukin te maiu ae akea tokina. Bwaai n ibuobuoki ibukin te FamilySearch a kaairaki ma aikai:

• FamilySearch.org. Aei bon ana webutiaite te Ekaretia ibukin buokaia membwa ni kakaei ao ni katauraoi araia aia bakatibu ibukin taian otenanti n te tembora.

• Family Tree app. Angiin mwakuri iaon ana webutiaite te FamilySearch a tauraoi naba n te mobile app aei.

• A Tauraoi Otenanti. Te bwai ni mwakuri aei e katauraoa te kawai ae bebete ni karekei araia utu ke aara riki tabeua ake a na uotaki nakon te tembora. E tauraoi ni kauoua i aon FamilySearch.org ao n te Family Tree app.

• Te Ibuobuoki ibukin Araia Utu. Taan kairiiri a kabongana te bwai ni mwakuri aei n te aonraain ni buokiia membwa aika a boou ao ake a oki, n aroia naba kairake, a waekoa n tauraoi ao ni boreeti taian kaati ibukin araia utu ibukin bonomwi ni bwabetito ao te kamatoaaki.

• Memories app. Te mobile app aei e buokiia aomata ao utu ni kunea, tibwaua, ao ni kamanoi rongorongoia ao tamneia bakatibu.

Taraa FamilySearch apps ibukin apps ni kabane ake a tauraoi.

25.4.2

Au Utu: Karaki Ake A Uotiira ni Katiteuanaira

Te bokirete ae uarereke ae My Family: Stories That Bring Us Together e buokiia aomata n ikoti ao ni kawakin araia ao rongorongoia aia utu. E kona naba ni buokiia membwa ni moani katauraoan araia aia utu ibukin taian otenanti n te tembora.

A kona n otanaki katotongana booki aika uarereke n te store.ChurchofJesusChrist.org.

25.4.3

Taan Anganano ibukin Waaki ni Kakukurei n Rongorongon te Utu

Te Get Involved app ke te Get Involved menu i aon FamilySearch.org e kariaia taan anganano n iri waaki ni kakukurei aikai:

• Te intekiting, bon karinan te rongorongo man te rekooti are koreaki nakon te taatabeiti are e kona n reke n te FamilySearch.org.

• Rinanoakin rekooti ibukin kaetana.

• Kanakoaraoan kaetan te Riki ibukin te Utu.

Naake a irii waaki aikai e na kabebetea naba karaoana irouia tabeman ni kuneia aia bakatibu ao ni karaoi aia otenanti n te tembora ibukiia.

A kona n iri aomata n tatabemaniia n iri waaki n anganano man kabonganaan te Get Involved app ke te Get Involved menu i aon FamilySearch.org. E kona n riki aei bwa kakoroan nanon te taneiai ibukin bwaai aikai:

• Kairake

• Kairake ni ikawai

• Membwa ake a bon aki kona n ira ana botaki te Ekaretia n taainako

• Membwa aika boou

• Botan aomata

Te beretitentii n te titeiki e kona ni mwiokoa te tia rabakau n te tembora ao n rongorongon te utu ke te kauntira ae rietaata n tararua te mwakuri aei.

25.5

Rineakiia ao Weteakiia Taan Mwakuri n te Tembora

25.5.1

Rineakiia Taan Mwakuri n te Tembora

Taan mwakuri n te tembora aika a tauraoi a kinaaki n te kawai aei:

• Membwa ake a kinaki iroun te bitiobi ke te tia kairiiri riki temanna

• Membwa aika a nakon te bitiobi ibukin te beku

• Membwa aika a kariaiakaki iroun te beretitenti n te tembora, te meituron, ke te tia kairiiri riki temanna n te tembora

• Kaain te aro ake a kakatauraoi ke a tibwa oki man aia mitinare (taraa mwakoro 24)

Araia taan mwakuri n te tembora aika a tauraoi a kanakoaki man kabonganakin te Recommend Temple Worker tool. Te bwai ni mwakuri aei a tauraoi nakoia bitiobi, beretitenti n te titeiki, ao beretitentii n te tembora. Aron kanakoan aara a kabwarabwaraaki inano.

Ngkana te membwa n te beretitentiii n te tembora e kakoaua bwa bon ngaia te tia mwakuri n te tembora ae tauraoi, a na anga aran te aomata nakon te bitiobi ni kabonganakin te Recommend Temple Worker tool.

Ngkana te bitiobi e kinaa te tia mwakuri n te tembora ke ni karekea te kariaiakaki mairoun te beretitenti n te tembora, e na reirei ma te membwa ibukin reken ana tai ni beku. E na rinanon bwaai ake a kainnanoaki ibukiia taan mwakuri n te tembora (taraa 25.5.2). Ngkana te bitiobi ao te membwa a namakinna bwa e na nakoraoi taina, te bitiobi e na katia ao ni kanakoa te kariaia man kabonganakin te Recommend Temple Worker tool. E riai te membwa n ataia bwa te beeba ni kariaia are e a tia ni kanakoaki e aki kakoaua ae teuanne ke neienne e na weteaki ke ni mwiokoaki bwa te tia mwakuri n te tembora.

Te rinerine imwiina e na rinanoaki iroun te beretitenti n te titeiki. Ngkana e na kariaia te tabeka te beretitenti n te titeiki ke miltion, e na uotiarake nakon te beretitenti n te tembora ibukin rinanoana man kabonganan te Recommend Temple Worker tool.

Membwa ake a weteaki ke ni mwiokoaki bwa taan mwakuri n te tembora n tainako a motikia mai inanoia bwa a na beku n te tembora ni katoa wiiki. A riai taan kairiiri n totokoa anganakiia riki te nakoa are e na kona n roota te membwa ana kona ni beku n te tembora.

Te Recommend Temple Worker tool e kaotia naba nakoia bitiobi ao beretitenti n te titeiki araia membwa n aia uoote ke titeiki aika a beku bwa taan mwakuri n te tembora.

25.5.2

Bwaai aika Kainnanoaki ibukiia Taan Mwakuri n te Tembora

Taan mwakuri n te tembora a ibuobuoki ni karaoi otenanti ke ni ibuobuoki ma mwakurin te tembora, n aron te aobiti, te uaati, ke mwakuri ibukin tararuaan aontano. N te aro bwa ko na kariaiakaki n riki bwa te tia mwakuri n te tembora, e riai te membwa n iai irouna bwaai aikai:

• E maeka n te mwakoro are iai te tembora are e na beku iai teuanne ke neienne.

• N tia n entaute, e karinei berita aika tabu n te tembora, ao iai ana beeba ni kariaia nakon te tembora ae tuai bane taina.

• Iai ana koaua ae matoa n ana euangkerio Iesu Kristo ae kaokaki.

• E na marurung ao ni korakora ni karaoa ana mwakuri teuanne ke neienne are e mwiokoaki iai i nanon te tembora. Te tia mwakuri are e buoka te beituron ke ni babairea karaoan taian otenanti a riai ni marurung man tau rabwataia ni karaoa te mwakuri n aki kainnanoa te ibuobuoki.

• E tau ni karineaki n te Ekaretia ao n te komiuniti.

• Nakoraoi ni mwakuri ma aomata tabeman.

• E na onimakinna bon irouna ao n raoiroi marurungina.

• Akea kabwarabwarakina n ana rekooti teuanne ke neienne.

Irarikin anne, ao e na kakoauai bwaai aikai te bitiobi:

• Ngkana e a tia ni kainaki ana membwatibu te aomata anne, e kona teuanne ke neienne ni kariaiakaki bwa e na riki bwa te tia mwakuri n te tembora n aki waekoa imwain nimaua te ririki mai imwiin kainaomatakina. (Taraa 32.11.3 ao 32.16.1

• Ngkana e butaki ana membwatibu te aomata are e tuai n entaute, ke ngkana e kamauna ana membwatibu te aomata, e kona teuanne ke neienne n rineaki bwa te tia mwakuri n te tembora n aki waekoa imwain koron nimaua te rirki imwiin are e a manga kaokaki nakon te Ekaretia. (Taraa 32.11.4, 32.14.9, 32.16.1, ao 32.16.2.)

• Ngkana e butaki ana membwatibu te aomata are e a tia n entaute, ke ngkana e kamauna ana membwatibu te aomata, e kona teuanne ke neienne n rineaki bwa te tia mwakuri n te tembora n aki waekoa imwain koron nimaua te ririki imwiin manga reken kaokan kakabwaia. (Taraa 32.11.4, 32.14.9, ao 32.17.2.)

25.5.3

Weteakiia ao Kamatoakiia Taan Mwakuri n te Tembora

Imwiin ae karekea te kariaia te beretitenti n te tembora ibukin temanna bwa e na beku bwa te tia mwakuri n te tembora, te membwa n te beretitentii n te tembora ke temanna are e mwiokoia e na intawiuna te aomata anne. Ngkai e kairaki mai ieta, te aomata are e kaira te intawiu e na weteia naake a kona ni beku bwa taan mwakuri n te tembora ao ni kamatoaia.