« ២៣. ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( ឆ្នាំ ២០២០ ) ។
« ២៣. ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
២៣.
ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ
២៣.០
សេចក្ដីផ្ដើម
ការអញ្ជើញមនុស្សទាំងអស់ឲ្យទទួលយកដំណឹងល្អ គឺជាផ្នែកមួយនៃកិច្ចការនៃសេចក្តីសង្រ្គោះ និងភាពតម្កើងឡើង ( សូមមើល ១.២ នៅក្នុងក្បួនខ្នាតនេះ; ម៉ាថាយ ២៨:១៩–២០ ) ។ ការណ៍នេះរួមមាន ៖
-
ការចូលរួមនៅក្នុងកិច្ចការផ្សព្វផ្សាយសាសនា និងការបម្រើជាអ្នកផ្សព្វផ្សាយសាសនា ។
-
ការជួយដល់សមាជិកថ្មី និងសមាជិកដែលត្រឡប់មកសកម្មឡើងវិញឲ្យរីកចម្រើននៅលើផ្លូវនៃសេចក្តីសញ្ញា ។
២៣.១
ចែកចាយដំណឹងល្អ
២៣.១.១
ស្រឡាញ់
យើងទាំងអស់គ្នាគឺជាបុត្រាបុត្រីរបស់ព្រះវរបិតាសួគ៌ ដែលស្រឡាញ់បុត្រាបុត្រីរបស់ទ្រង់យ៉ាងឥតខ្ចោះ ។ ទ្រង់ប្រទានឱកាសដល់មនុស្សគ្រប់រូបឲ្យបានពោរពេញដោយសេចក្ដីស្រឡាញ់របស់ទ្រង់តាមរយៈព្រះយេស៊ូវគ្រីស្ទ និងដំណឹងល្អរបស់ទ្រង់ ( សូមមើល យ៉ូហាន ៣:១៦; នីហ្វៃទី២ ២៦:២៤–២៨; អាលម៉ា ២៦:៣៧; មាត្រានៃសេចក្ដីជំនឿ ១:៣ ) ។
របៀបមួយដែលយើងបង្ហាញសេចក្ដីស្រឡាញ់របស់យើងចំពោះព្រះ គឺតាមរយៈការស្រឡាញ់ និងការបម្រើបុត្រាបុត្រីរបស់ទ្រង់ ( សូមមើល ម៉ាថាយ ២២:៣៦–៣៩; ២៥:៤០ ) ។ យើងខិតខំស្រឡាញ់ និងបម្រើដូចជាព្រះយេស៊ូវគ្រីស្ទបានធ្វើដែរ ។ សេចក្ដីស្រឡាញ់នេះបំផុសគំនិតយើងឲ្យឈោងទៅជួយមនុស្សមកពីគ្រប់ទាំងសាសនា ពូជសាសន៍ និងវប្បធម៌ ( សូមមើល កិច្ចការ ១០:៣៤; នីហ្វៃទី២ ២៦:៣៣ ) ។
២៣.១.២
ចែកចាយ
ដោយសារយើងស្រឡាញ់ព្រះ និងបុត្រាបុត្រីរបស់ទ្រង់ នោះយើងតែងចង់ចែកចាយពរជ័យទាំងឡាយ ដែលទ្រង់បានប្រទានដល់យើង ( សូមមើល យ៉ូហាន ១៣:៣៤–៣៥ ) និងជួយប្រមូលផ្ដុំអ៊ីស្រាអែល ។ យើងព្យាយាមជួយមនុស្សទូទៅឲ្យមានអារម្មណ៍នៃសេចក្ដីអំណរ ដែលយើងមាន ( សូមមើល អាលម៉ា ៣៦:២៤ ) ។ ក្នុងនាមជាសិស្សរបស់ព្រះយេស៊ូវគ្រីស្ទ យើងលើកពន្លឺរបស់ទ្រង់ឡើង ( សូមមើល នីហ្វៃទី៣ ១៨:២៤–២៥ ) ។ យើងនិយាយដោយបើកចំហអំពីព្រះអង្គសង្គ្រោះ និងព្រះចេស្ដារបស់ទ្រង់នៅក្នុងជីវិតរបស់យើង ( សូមមើល គោលលទ្ធិ និង សេចក្ដីសញ្ញា ៦០:២ ) ។ យើងចែកចាយសេចក្ដីស្រឡាញ់ ពេលវេលា បទពិសោធន៍ និងកម្មវិធីក្នុងសាសនាចក្រទាំងឡាយដើម្បីផ្ដល់ពរជ័យដល់បុត្រាបុត្រីរបស់ព្រះ ហើយជួយពួកគេឲ្យខិតទៅកាន់តែជិតព្រះអង្គសង្គ្រោះ ។ យើងចែកចាយអ្វីៗទាំងនេះតាមធម្មតា និងពីធម្មជាតិ ដែលជាផ្នែកមួយនៃការប្រាស្រ័យទាក់ទងផ្ទាល់ខ្លួន តាមអនឡាញ និងតាមរបៀបផ្សេងទៀត ។
២៣.១.៣
អញ្ជើញ
ព្រះអង្គសង្គ្រោះអញ្ជើញមនុស្សទាំងអស់ឲ្យទទួលយកដំណឹងល្អ និងរៀបចំខ្លួនសម្រាប់ជីវិតដ៏អស់កល្បជានិច្ច ( សូមមើល អាលម៉ា ៥:៣៣–៣៤ ) ។ ក្នុងនាមជាសិស្សរបស់ទ្រង់ យើងធ្វើតាមគំរូរបស់ទ្រង់ តាមរយៈការអញ្ជើញមនុស្សទាំងអស់ឲ្យ « មករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ » ( មរ៉ូណៃ ១០:៣២ ) ។
យើងអធិស្ឋានសូមការបំផុសគំនិត និងការណែនាំពីរបៀបដើម្បីអញ្ជើញមនុស្សដទៃឲ្យ ៖
-
មក ហើយមើលឃើញពរជ័យដែលមានតាមរយៈព្រះយេស៊ូវគ្រីស្ទ ដំណឹងល្អរបស់ទ្រង់ និងសាសនាចក្ររបស់ទ្រង់ ( សូមមើល យ៉ូហាន ១:៣៧–៣៩, ៤៥–៤៦ ) ។
-
មក ហើយជួយយើងដើម្បីបម្រើមនុស្សដែលខ្វះខាត ។
-
មក ហើយជាកម្មសិទ្ធិក្នុងសាសនាចក្រនៃព្រះយេស៊ូវគ្រីស្ទដែលបានស្ដារឡើងវិញនេះ ។
នៅពេលការអញ្ជើញរបស់យើងផ្អែកទៅលើតម្រូវការ និងចំណាប់អារម្មណ៍របស់បុគ្គលម្នាក់ នោះគាត់ ឬនាងទំនងជាទទួលយកការអញ្ជើញទាំងនោះជាង ។ ជារឿយៗ ការអញ្ជើញមានន័យសាមញ្ញថា ការរាប់បញ្ចូលគ្រួសារ មិត្តភក្ដិ និងអ្នកជិតខាងរបស់យើងនៅក្នុងសកម្មភាពដែលយើងកំពុងធ្វើ ។ ឧទាហរណ៍ យើងអាចអញ្ជើញពួកគេឲ្យ ៖
-
ចូលរួមសកម្មភាពជាមួយនឹងយើងនៅក្នុងផ្ទះរបស់យើង ។
-
ចូលរួមនឹងយើងនៅក្នុងការថ្វាយបង្គំ និងការរៀនសូត្រដំណឹងល្អ ។
-
ចូលរួមក្នុងព្រឹត្តិការណ៍ពិសេសៗ ដូចជាការប្រសិទ្ធពរទារក ឬពិធីបុណ្យជ្រមុជទឹក ។
-
ចូលរួមក្នុងសកម្មភាព ឬការបម្រើក្នុងវួដ និងសហគមន៍ រួមមានគម្រោងដែលបានរៀបចំឡើងតាមរយៈ JustServe ( នៅកន្លែងណាដែលមាន ) ។
-
ចូលរួមនៅក្នុងកម្មវិធី និងសកម្មភាពរបស់សាសនាចក្រ ។ សកម្មភាពទាំងនេះអាចរួមមាន សកម្មភាពអង្គការបឋមសិក្សា សកម្មភាពយុវវ័យ ពង្សប្រវត្តិ វគ្គសិក្សាភាពខ្លួនទីពឹងខ្លួន BYU–Pathway Worldwide និងវគ្គសិក្សាអក្ខរកម្ម និងភាសាអង់គ្លេស ។
-
ជួបនឹងពួកអ្នកផ្សព្វផ្សាយសាសនាពេញម៉ោង ហើយស្ដាប់សារលិខិតរបស់ពួកគេ ។
សម្រាប់គំនិត និងធនធានបន្ថែមទៀត សូមមើលគេហទំព័រ share.ChurchofJesusChrist.org និង « ការចែកចាយដំណឹងល្អ » នៅក្នុងបណ្ណាល័យដំណឹងល្អ ។
គោលការណ៍នៃការស្រឡាញ់ ការចែកចាយ និងការអញ្ជើញអនុវត្តចំពោះការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញផងដែរ ។
២៣.២
ពង្រឹងសមាជិកថ្មី
ការចូលរួមក្នុងសាសនាចក្រគឺជារឿងដ៏អស្ចារ្យផង និងជាការសាកល្បងផងសម្រាប់មនុស្សជាច្រើន ។ វានាំមកនូវពរជ័យដ៏អស្ចារ្យ ប៉ុន្ដែវាក៏តម្រូវឲ្យមានការកែតម្រូវតាមជំនឿថ្មី ទម្លាប់ថ្មី និងទំនាក់ទំនងថ្មីផងដែរ ( សូមមើល ថែស្សាឡូនិច ទី១ ១:៦ ) ។
សមាជិកថ្មីម្នាក់ៗត្រូវការមិត្តភាព ឱកាសដើម្បីបម្រើ និងការចិញ្ចឹមបីបាច់ខាងវិញ្ញាណ ។ ក្នុងនាមជាសមាជិកនៃសាសនាចក្រ យើងផ្ដល់សេចក្ដីស្រឡាញ់ និងការគាំទ្ររបស់យើងទៅដល់សមាជិកថ្មី ( សូមមើល ម៉ូសាយ ១៨:៨–១០ ) ។ យើងជួយពួកគេឲ្យមានអារម្មណ៍ថាចូលចុះក្នុងសាសនាចក្រនេះ ។ យើងជួយពួកគេឲ្យរីកចម្រើនលើផ្លូវនៃសេចក្ដីសញ្ញា ហើយកាន់តែ « បានប្រែចិត្តជឿដល់ព្រះអម្ចាស់ » យ៉ាងស៊ីជម្រៅ ( អាលម៉ា ២៣:៦ ) ។ យើងជួយពួកគេឲ្យបាន « ចិញ្ចឹមបីបាច់ដោយព្រះបន្ទូលដ៏ល្អនៃព្រះ ដើម្បីរក្សាពួកគេឲ្យនៅក្នុងផ្លូវត្រូវ … ដោយពឹងផ្អែកទៅលើតែព្រះគុណនៃព្រះគ្រីស្ទ » ( មរ៉ូណៃ ៦:៤ ) ។
យើងក៏អាចជួយសមាជិកថ្មីឲ្យ ៖
-
រៀនសូត្រ និងដកពិសោធន៍សេចក្ដីអំណរនៃការធ្វើជាសិស្សរបស់ព្រះយេស៊ូវគ្រីស្ទ ។
-
រៀនស្គាល់ការបំផុសគំនិតពីព្រះវិញ្ញាណ ។
-
បង្កើតទម្លាប់ក្នុងការអធិស្ឋាន និងការសិក្សាព្រះគម្ពីរជាលក្ខណៈផ្ទាល់ខ្លួន និងជាគ្រួសារ ។
-
ចែកចាយដំណឹងល្អជាមួយគ្រួសារ និងមិត្តភក្តិរបស់ពួកគេ ។
-
ស្វែងរកឈ្មោះរបស់បុព្វការីជន ហើយរៀបចំទទួលពិធីបរិសុទ្ធក្នុងព្រះវិហារបរិសុទ្ធសម្រាប់ពួកគាត់ ។
-
រីកចម្រើនតាមរយៈការបំពេញតាមការចាត់តាំងក្នុងសាសនាចក្រ និងការចូលរួមក្នុងឱកាសជាច្រើនផ្សេងទៀត ដែលសាសនាចក្រផ្ដល់ឲ្យ ។
២៣.៣
ពង្រឹងសមាជិកដែលត្រឡប់មកសកម្មឡើងវិញ
សមាជិកមួយចំនួនជ្រើសរើសដើម្បីឈប់ចូលរួមនៅក្នុងសាសនាចក្រ ។ ព្រះអង្គសង្រ្គោះបានមានបន្ទូលថា « ដ្បិតចំពោះអ្នកនោះហើយដែលត្រូវធ្វើការងារបម្រើ ដ្បិតអ្នករាល់គ្នាពុំដឹងថាដល់ពេលណាទេ ដែលអ្នកនោះនឹងត្រឡប់មកវិញ ហើយប្រែចិត្ត ហើយមករកយើងដោយអស់ពីដួងចិត្ត ហើយយើងនឹងប្រោសឲ្យគេបានជា ហើយអ្នករាល់គ្នានឹងទៅជាមធ្យោបាយក្នុងការនាំមកនូវសេចក្តីសង្រ្គោះដល់គេ » ( នីហ្វៃទី៣ ១៨:៣២ ) ។ ព្រះបន្ទូលទាំងនេះអនុវត្តចំពោះមនុស្សទាំងអស់ ដែលត្រូវការការងារបម្រើជាបន្ដបន្ទាប់ដោយសារមូលហេតុណាមួយ ។
សមាជិកដែលមិនចូលរួមពេញលេញ ទំនងជានឹងត្រឡប់មកវិញ ប្រសិនបើពួកគេមានទំនាក់ទំនងដ៏រឹងមាំជាមួយនឹងសមាជិកសាសនាចក្រ ។ សេចក្ដីស្រឡាញ់ និងការគាំទ្ររបស់យើងអាចជួយពួកគេឲ្យយកឈ្នះលើឧបសគ្គទាំងឡាយបាន ។ ដូចជាសមាជិកថ្មីដែរ ពួកគេត្រូវការមិត្តភាព ឱកាសដើម្បីបម្រើ និងការចិញ្ចឹមបីបាច់ខាងវិញ្ញាណ ។ ការយល់ពីស្ថានភាព និងឧបសគ្គរបស់ពួកគេអាចជួយយើងឲ្យផ្ដល់ការងារបម្រើដល់ពួកគេដោយមានការប្រុងប្រយ័ត្ន និងពេញដោយសេចក្ដីស្រឡាញ់ ។
២៣.៤
ថ្នាក់ដឹកនាំស្តេក
២៣.៤.១
គណៈប្រធានស្តេក
ប្រធានស្តេកកាន់កូនសោទាំងឡាយនៅក្នុងស្ដេកសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ គាត់ និងទីប្រឹក្សារបស់គាត់ផ្ដល់ការដឹកនាំទូទៅដល់កិច្ចខិតខំទាំងនេះ ។ គាត់ត្រូវធ្វើឲ្យប្រាកដថា កិច្ចការនេះបានពិភាក្សានៅក្នុងការប្រជុំស្ដេកជាទៀងទាត់ ។
ជាធម្មតា ប្រធានស្ដេកជួបនឹងប្រធានបេសកកម្មរៀងរាល់ខែ ដើម្បីសម្របសម្រួលកិច្ចខិតខំរបស់ថ្នាក់ដឹកនាំស្ដេក និងវួដ ព្រមទាំងរបស់ពួកអ្នកផ្សព្វផ្សាយសាសនា ។ អ្នកដទៃទៀតដែលអាចចូលរួម រួមមាន ៖
-
ទីប្រឹក្សានៅក្នុងគណៈប្រធានស្តេក និងគណៈប្រធានបេសកកម្ម ។
-
ទីប្រឹក្សាជាន់ខ្ពស់ដែលបានចាត់តាំង ។
-
ប្រធានសមាគមសង្រ្គោះស្តេក ។
-
អ្នកផ្សព្វផ្សាយសាសនាដែលបានចាត់តាំងដោយប្រធានបេសកកម្ម ។
២៣.៤.២
គណៈកម្មការភាពជាអ្នកដឹកនាំមជ្ឈិមវ័យស្តេក
គណៈកម្មការភាពជាអ្នកដឹកនាំមជ្ឈិមវ័យស្តេករួមមាន ៖
-
គណៈប្រធានស្តេក ។
-
គណៈប្រធានសមាគមសង្រ្គោះស្តេក ។
-
ទីប្រឹក្សាជាន់ខ្ពស់ដែលបានចាត់តាំងឲ្យធ្វើការជាមួយកូរ៉ុមអែលឌើរ ។
ថ្នាក់ដឹកនាំទាំងនេះណែនាំ និងគាំទ្រដល់គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ នៅក្នុងកិច្ចការចែកចាយដំណឹងល្អ និងពង្រឹងសមាជិកថ្មី ក៏ដូចជាសមាជិកដែលត្រឡប់មកសកម្មឡើងវិញផងដែរ ( សូមមើល ២៣.៥.២ ) ។ ការណែនាំអាចធ្វើឡើងជាក្រុម ឬបុគ្គល ។ អ្នកដឹកនាំបេសកកម្មវួដអាចត្រូវបានអញ្ជើញឲ្យចូលរួមក្នុងការណែនាំនេះផងដែរ ។
សម្រាប់ព័ត៌មានបន្ថែមស្ដីពីការប្រជុំរបស់គណៈកម្មការនេះ សូមមើល ២៩.៣.៩ ។
២៣.៤.៣
ទីប្រឹក្សាជាន់ខ្ពស់
គណៈប្រធានស្តេកអាចចាត់តាំងទីប្រឹក្សាជាន់ខ្ពស់ឲ្យណែនាំ និងគាំទ្រដល់គណៈប្រធានកូរ៉ុមអែលឌើរ និងអ្នកដឹកនាំបេសកកម្មវួដបាន ។ ទីប្រឹក្សាជាន់ខ្ពស់ម្នាក់ ឬច្រើននាក់អាចត្រូវបានចាត់តាំងឲ្យដឹកនាំកិច្ចខិតខំទាំងនេះ ។ ទោះជាយ៉ាងណាក្តី ទីប្រឹក្សាជាន់ខ្ពស់ទាំងអស់មានទំនួលខុសត្រូវទាំងនេះសម្រាប់វួដ និងកូរ៉ុមដែលពួកគាត់ត្រូវបានចាត់តាំង ។
២៣.៤.៤
គណៈប្រធានសមាគមសង្រ្គោះស្តេក
នៅក្រោមការដឹកនាំរបស់ប្រធានស្តេក នោះគណៈប្រធានសមាគមសង្រ្គោះស្តេកណែនាំ និងគាំទ្រដល់គណៈប្រធានសមាគមសង្រ្គោះវួដ នៅក្នុងការទទួលខុសត្រូវរបស់ពួកគាត់ដើម្បីចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។
២៣.៥
ថ្នាក់ដឹកនាំវួដ
២៣.៥.១
គណៈប៊ីស្សព
គណៈប៊ីស្សពសម្របសម្រួលជាមួយនឹងគណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ កាលពួកគាត់ដឹកនាំកិច្ចខិតខំរបស់វួដដើម្បីចែកចាយដំណឹងល្អ និងពង្រឹងសមាជិកថ្មី ក៏ដូចជាសមាជិកដែលត្រឡប់មកសកម្មឡើងវិញ ។ ថ្នាក់ដឹកនាំទាំងនេះប្រឹក្សាជាមួយគ្នាជាប្រចាំ ។
គណៈប៊ីស្សពត្រូវប្រាកដថា កិច្ចខិតខំទាំងនេះបានពិភាក្សា និងសម្របសម្រួលនៅក្នុងការប្រជុំក្រុមប្រឹក្សាវួដ និងក្រុមប្រឹក្សាយុវវ័យវួដ ។ គណៈប៊ីស្សពក៏ធ្វើការពិនិត្យមើល និងអនុម័តលើផែនការរបស់វួដសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញផងដែរ ( សូមមើល ២៣.៥.៦ ) ។
គណៈប៊ីស្សពពិភាក្សាជាមួយប្រធានស្តេក ដើម្បីកំណត់ថាតើត្រូវហៅអ្នកដឹកនាំបេសកកម្មវួដឬអត់ ( សូមមើល ២៣.៥.៣ សម្រាប់ព័ត៌មានបន្ថែម ) ។
ប៊ីស្សពសម្ភាសសមាជិកថ្មីដែលគ្រប់អាយុ ដើម្បីទទួលប័ណ្ណចូលព្រះវិហារបរិសុទ្ធដែលមានកំណត់ការប្រើប្រាស់ ( សូមមើល ២៦.៣.១ និង ២៦.៤.២ ) ។ គាត់ក៏ធ្វើការសម្ភាសបងប្អូនប្រុសដែលគ្រប់អាយុ ដើម្បីទទួលបព្វជិតភាពអើរ៉ុនផងដែរ ( សូមមើល ៣៨.២.៥.២ ) ។ ជាធម្មតា គាត់ដឹកនាំការសម្ភាសទាំងនេះក្នុងរយៈពេលមួយសប្តាហ៍ក្រោយពីពិធីបញ្ជាក់របស់សមាជិកនោះ ។
គណៈប៊ីស្សពសម្របសម្រួលជាមួយនឹងថ្នាក់ដឹកនាំផ្សេងទៀតដើម្បីធ្វើឲ្យប្រាកថាថា សមាជិកថ្មី និងសមាជិកដែលត្រឡប់មកសកម្មឡើងវិញមានឱកាសដើម្បីបម្រើ ។ ឱកាសបែបនោះអាចជួយសមាជិកទាំងនេះឲ្យរីកចម្រើនខាងវិញ្ញាណ និងទទួលអារម្មណ៍ពីព្រះចេសា្ដរបស់ព្រះអម្ចាស់នៅក្នុងជីវិតរបស់ពួកគេ ។ ការបម្រើក៏អាចជួយសមាជិកឲ្យមានអារម្មណ៍អំណរ និងបង្កើតចំណងមិត្តភាពដ៏ជិតដិតជាមួយសមាជិកផ្សេងទៀតក្នុងវួដផងដែរ ។ ឱកាសទាំងនេះគួរតែផ្អែកទៅលើតម្រូវការ និងសមត្ថភាពរបស់សមាជិកនោះ ។ នៅក្នុងករណីខ្លះ ការផ្តល់ការហៅបម្រើមួយគឺសមរម្យ ។ នៅក្នុងករណីផ្សេងទៀត ការចាត់តាំងមិនសូវផ្លូវការមួយគឺល្អបំផុត ។
២៣.៥.២
គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ
គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះដឹកនាំកិច្ចខិតខំជាប្រចាំរបស់វួដ ដើម្បីចែកចាយដំណឹងល្អ និងពង្រឹងសមាជិកថ្មី ក៏ដូចជាសមាជិកដែលត្រឡប់មកសកម្មឡើងវិញ ( សូមមើល ៨.២.៣ និង ៩.២.៣ ) ។ គណៈប្រធានកូរ៉ុមអែលឌើរដឹកនាំកិច្ចខិតខំទាំងនេះសម្រាប់សមាជិកនៃកូរ៉ុមអែលឌើរ ។ គណៈប្រធានសមាគមសង្រ្គោះដឹកនាំកិច្ចខិតខំទាំងនេះសម្រាប់សមាជិកនៃសមាគមសង្រ្គោះ ។ នៅក្រោមការសម្របសម្រួលពីប៊ីស្សព ពួកគាត់ធ្វើការរួមគ្នាដើម្បីដឹកនាំកិច្ចខិតខំទាំងនេះជាមួយនឹងក្រុមប្រឹក្សាវួដ ។
ថ្នាក់ដឹកនាំទាំងនេះមានទំនួលខុសត្រូវដូចខាងក្រោម ៖
-
ជួយបំផុសគំនិតសមាជិកឲ្យស្រឡាញ់បុត្រាបុត្រីរបស់ព្រះ ចែកចាយដំណឹងល្អ និងអញ្ជើញមនុស្សដទៃឲ្យទទួលយកពរជ័យរបស់ព្រះអង្គសង្គ្រោះ ( សូមមើល ២៣.១ ) ។
-
ប្រឹក្សាជាមួយសមាជិកកូរ៉ុម ឬសមាគមសង្គ្រោះអំពីរបៀបដើម្បីចែកចាយដំណឹងល្អ ។ ពិភាក្សាពីរបៀបដើម្បីស្វែងរកមនុស្សឲ្យអ្នកផ្សព្វផ្សាយសាសនាបង្រៀន និងរបៀបដើម្បីគាំទ្រដល់មនុស្សដែលទទួលការបង្រៀននោះ ។ ប្រឹក្សារួមគ្នាអំពីសេចក្ដីត្រូវការរបស់សមាជិកថ្មី និងសមាជិកដែលត្រឡប់មកសកម្មឡើងវិញ ព្រមទាំងរបៀបដើម្បីផ្ដល់ការគាំទ្រ ។
-
ចាត់តាំងបងប្អូនប្រុស និងបងប្អូនស្រីដែលផ្ដល់ការងារបម្រើឲ្យបម្រើដល់សមាជិកថ្មី និងសមាជិកដែលត្រឡប់មកសកម្មឡើងវិញ ( សូមមើល ២១.២.១ ) ។ បងប្អូនប្រុស និងបងប្អូនស្រីដែលផ្ដល់ការងារបម្រើក៏អាចចាត់ឲ្យទៅបម្រើមនុស្ស ដែលអ្នកផ្សព្វផ្សាយសាសនាកំពុងបង្រៀនផងដែរ ( ការណ៍នេះធ្វើឡើងដោយមានការសម្របសម្រួលជាមួយនឹងអ្នកផ្សព្វផ្សាយសាសនា ) ។ ប្រសិនបើអាចធ្វើបាន ថ្នាក់ដឹកនាំចាត់តាំងសមាជិកដែលមាន ឬអាចសាងមិត្តភាពដ៏ជិតដិតជាមួយនឹងបុគ្គលទាំងនេះ ។ ថ្នាក់ដឹកនាំលើកទឹកចិត្តបងប្អូនប្រុស និងបងប្អូនស្រីដែលផ្ដល់ការងារបម្រើ ឲ្យផ្តល់សេចក្ដីស្រឡាញ់ និងការគាំទ្រដូចជាព្រះគ្រីស្ទ ។
-
ផ្ដល់ឱកាសដល់សមាជិកថ្មី និងសមាជិកដែលត្រឡប់មកសកម្មឡើងវិញឲ្យបម្រើជាបងប្អូនប្រុស ឬបងប្អូនស្រីដែលផ្ដល់ការងារបម្រើ ។ សម្រាប់ព័ត៌មានបន្ថែមអំពីការងារបម្រើ សូមមើល ជំពូកទី ២១ ។
-
ជួយក្រុមប្រឹក្សាវួដឲ្យបង្កើតផែនការមួយសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញផងដែរ ( សូមមើល ២៣.៥.៦ ) ។
-
ដឹកនាំកិច្ចការរបស់អ្នកដឹកនាំបេសកកម្មវួដ ។ ប្រសិនបើអ្នកដឹកនាំនេះមិនត្រូវបានហៅទេ នោះសមាជិកមួយរូបនៃគណៈប្រធានកូរ៉ុមអែលឌើរបំពេញតួនាទីនេះ ( សូមមើល ២៣.៥.៣ ) ។
ប្រធានកូរ៉ុមអែលឌើរ និងប្រធានសមាគមសង្រ្គោះម្នាក់ៗ ចាត់តាំងសមាជិកម្នាក់ក្នុងគណៈប្រធានរបស់ខ្លួនឲ្យជួយដឹកនាំកិច្ចខិតខំទាំងនេះ ។ សមាជិកនៃគណៈប្រធានទាំងពីររូបនេះធ្វើការជាមួយគ្នា ។ ពួកគាត់ចូលរួមការប្រជុំសម្របសម្រួលរាល់សប្ដាហ៍ ( សូមមើល ២៣.៥.៧ ) ។
២៣.៥.៣
![]()
រូបភាពរូបសញ្ញាគោលការណ៍ណែនាំសម្រាប់ការសម្របសម្រួល
គណៈប៊ីស្សពពិគ្រោះយោបល់ជាមួយប្រធានស្តេក ដើម្បីកំណត់ថាតើត្រូវហៅអ្នកដឹកនាំបេសកកម្មវួដឬអត់ ។ ប្រសិនបើពួកគាត់សម្រេចចិត្តថាត្រូវផ្ដល់ការហៅនេះ នោះគណៈប៊ីស្សពប្រឹក្សាជាមួយប្រធានកូរ៉ុមអែលឌើរ និងប្រធានសមាគមសង្គ្រោះដើម្បីកំណត់ថាតើត្រូវហៅនរណា ។ បុគ្គលរូបនេះគួរតែជាអ្នកកាន់បព្វជិតភាពមិលគីស្សាដែក ។ ប្រសិនបើអ្នកដឹកនាំនេះមិនត្រូវបានហៅទេ នោះសមាជិកមួយរូបនៃគណៈប្រធានកូរ៉ុមអែលឌើរបំពេញតួនាទីនេះ ។
អ្នកដឹកនាំបេសកកម្មវួដគាំទ្រដល់គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះក្នុងការទទួលខុសត្រូវលើការផ្សព្វផ្សាយសាសនារបស់ពួកគាត់ ។ គាត់ក៏មានការទទួលខុសត្រូវដូចខាងក្រោមផងដែរ ៖
-
សម្របសម្រួលកិច្ចការរបស់សមាជិក និងថ្នាក់ដឹកនាំវួដ អ្នកផ្សព្វផ្សាយសាសនាវួដ ក៏ដូចជាអ្នកផ្សព្វផ្សាយសាសនាពេញម៉ោងដែរ ។ ការណ៍នេះអាចរួមមានការសម្របសម្រួលកិច្ចខិតខំក្នុងការបង្រៀន កម្មវិធីបុណ្យជ្រមុជទឹក និងកិច្ចខិតខំដើម្បីពង្រឹងសមាជិកថ្មី ។ វាក៏អាចរួមមានការដាក់ផែនការ ស្ដីពីរបៀបដើម្បីជួយសមាជិកវួដឲ្យចែកចាយដំណឹងល្អផងដែរ ។
-
ដឹកនាំការប្រជុំសម្របសម្រួលរាល់សប្ដាហ៍ ( សូមមើល ២៣.៥.៧ ) ។
-
ចូលរួមការប្រជុំក្រុមប្រឹក្សាវួដ នៅពេលមានការអញ្ជើញ ។
-
ជួយក្រុមប្រឹក្សាវួដឲ្យបង្កើត និងអនុវត្តតាមផែនការវួដសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញផងដែរ ( សូមមើល ២៣.៥.៦ ) ។
-
នៅកន្លែងដែលមានការអនុញ្ញាត សូមរៀបចំឲ្យអ្នកផ្សព្វផ្សាយសាសនាពេញម៉ោងបានបរិភោគអាហារជាមួយនឹងសមាជិក ។ ប្រសិនបើអាចធ្វើបាន សូមស្វែងរកឱកាសដើម្បីឲ្យអ្នកផ្សព្វផ្សាយសាសនាបានបរិភោគអាហារជាមួយនឹងក្រុមគ្រួសារដែលមានអ្នកខ្លះជាសមាជិក ខ្លះមិនមែនជាសមាជិក និងជាសមាជិកមិនសូវសកម្ម ។ លើកទឹកចិត្តពួកគេឲ្យចែកចាយសារលិខិតនៃដំណឹងល្អជាមួយក្រុមគ្រួសារទាំងនេះ ។
-
ធ្វើការជាមួយអ្នកដឹកនាំ និងអ្នកប្រឹក្សាផ្នែកព្រះវិហារបរិសុទ្ធ និងពង្សប្រវត្តិវួដដើម្បីជួយអ្នកដែលកំពុងរៀនដំណឹងល្អ សមាជិកថ្មី និងសមាជិកដែលត្រឡប់មកសកម្មឡើងវិញ ឲ្យចូលរួមនៅក្នុងកិច្ចការព្រះវិហារបរិសុទ្ធ និងពង្សប្រវត្តិ ។
២៣.៥.៤
អ្នកផ្សព្វផ្សាយសាសនាវួដ
អ្នកផ្សព្វផ្សាយសាសនាវួដជួយសមាជិកវួដឲ្យដកពិសោធន៍អំណរក្នុងការចែកចាយដំណឹងល្អដូចបានរៀបរាប់នៅក្នុង ២៣.១ ។ ពួកគេបម្រើនៅក្រោមការដឹកនាំរបស់អ្នកដឹកនាំបេសកកម្មវួដ ឬសមាជិកមួយរូបនៃគណៈប្រធានកូរ៉ុមអែលឌើរ ដែលបំពេញតួនាទីនេះ ។ ប្រធានកូរ៉ុមអែលឌើរ និងប្រធានសមាគមសង្គ្រោះអាចផ្ដល់យោបល់អំពីសមាជិកដែលអាចបម្រើបាន ។
អ្នកផ្សព្វផ្សាយសាសនាវួដបង្រៀនតាមរយៈពាក្យសម្ដី និងតាមរយៈគំរូអំពីរបៀបដើម្បីស្រឡាញ់មនុស្សដទៃ ចែកចាយសេចក្ដីជំនឿរបស់ពួកគេ និងអញ្ជើញមនុស្សដទៃឲ្យទទួលបានពរជ័យនៃដំណឹងល្អ ។ ពួកគេក៏ជួយសមាជិកវួដឲ្យផ្ដល់ការងារបម្រើដល់សមាជិកថ្មី និងសមាជិកដែលត្រឡប់មកសកម្មឡើងវិញផងដែរ ។
អ្នកផ្សព្វផ្សាយសាសនាវួដចូលរួមការប្រជុំសម្របសម្រួលរាល់សប្ដាហ៍ ( សូមមើល ២៣.៥.៧ ) ។
២៣.៥.៥
ក្រុមប្រឹក្សាវួដ និងក្រុមប្រឹក្សាយុវវ័យវួដ
ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ គួរតែត្រូវបានពិភាក្សានៅក្នុងការប្រជុំក្រុមប្រឹក្សាវួដជាទៀងទាត់ ។ ប៊ីស្សពអាចសូមឲ្យប្រធានកូរ៉ុមអែលឌើរ ឬប្រធានសមាគមសង្គ្រោះដឹកនាំការពិភាក្សាទាំងនេះ ដែលគួរតែផ្ដោតទៅលើបុគ្គលម្នាក់ៗ ។ ប៊ីស្សពអាចអញ្ជើញអ្នកដឹកនាំបេសកកម្មវួដឲ្យចូលរួមក្នុងការប្រជុំក្រុមប្រឹក្សាវួដបាន ។
ក្រុមប្រឹក្សាអាចពិភាក្សាអំពីផែនការរបស់វួដសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ ពួកគាត់ក៏ពិភាក្សាពីការចាត់តាំងនានា ដែលចាំបាច់ដើម្បីសម្របសម្រួលទូទាំងអង្គការផងដែរ ។ ទម្រង់បែបបទដូចខាងក្រោមនេះអាចជួយដល់ការពិភាក្សាទាំងនេះបាន ៖
-
កំណត់ហេតុការរីកចម្រើនរបស់អ្នកផ្សព្វផ្សាយសាសនា ។ អ្នកផ្សព្វផ្សាយសាសនាពេញម៉ោងប្រើប្រាស់ទម្រង់បែបបទនេះ ដើម្បីរាយការណ៍អំពីការរីកចម្រើនរបស់បងប្អូន ដែលពួកគេកំពុងបង្រៀន ។ ទម្រង់បែបបទនេះជួយអ្នកផ្សព្វផ្សាយសាសនា និងសមាជិកឲ្យសម្របសម្រួលកិច្ចការរបស់ពួកគេ ។ នៅតំបន់ណាដែលអ្នកផ្សព្វផ្សាយសាសនាប្រើកម្មវិធី Area Book Planner នោះទម្រង់បែបបទនេះអាចឲ្យថ្នាក់ដឹកនាំវួដចូលមើលនៅក្នុងធនធានសម្រាប់ថ្នាក់ដឹកនាំ និងស្មៀន ( ធ.ថ.ស. ) និងកម្មវិធីឧបករណ៍សមាជិកបាន ។ នៅតំបន់ផ្សេងទៀត អ្នកផ្សព្វផ្សាយសាសនាពេញម៉ោងប្រើប្រាស់ច្បាប់ចម្លងក្រដាស ។
-
ដំណើរការរីកចម្រើនរបស់សមាជិកថ្មី និងសមាជិកដែលត្រឡប់មកសកម្មឡើងវិញ ។ ថ្នាក់ដឹកនាំវួដប្រើប្រាស់ទម្រង់បែបបទនេះ ដើម្បីដាក់ផែនការស្ដីពីរបៀបដើម្បីជួយសមាជិកឲ្យរីកចម្រើនខាងវិញ្ញាណ ។ វាមាននៅក្នុង ធ.ថ.ស. ។
សម្រាប់ព័ត៌មានបន្ថែមអំពីក្រុមប្រឹក្សាវួដ សូមមើល ២៩.២.៥ ។
នៅក្នុងការពិភាក្សាអំពីតម្រូវការរបស់យុវវ័យនៅក្នុងវួដ នោះក្រុមប្រឹក្សាយុវវ័យវួដផ្ដល់ការយកចិត្តទុកដាក់ជាពិសេសដល់សមាជិកថ្មី និងសមាជិកដែលត្រឡប់មកសកម្មឡើងវិញ ព្រមទាំងដល់យុវវ័យដែលបានបង្រៀនដោយអ្នកផ្សព្វផ្សាយសាសនាផងដែរ ។ ក្រុមប្រឹក្សាក៏អាចពិភាក្សាអំពីរបៀប ដែលយុវវ័យអាចចូលរួមក្នុងផែនការរបស់វួដសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញផងដែរ ។ សម្រាប់ព័ត៌មានបន្ថែមអំពីក្រុមប្រឹក្សាយុវវ័យវួដ សូមមើល ២៩.២.៦ ។
២៣.៥.៦
ផែនការវួដសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ
វួដនីមួយៗគួរតែមានផែនការសាមញ្ញមួយសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ វាអាចជួយដឹកនាំការប្រជុំ ការបម្រើ និងសកម្មភាពនានាបាន ។ វាអាចរួមមានផែនការ និងគំនិតនានាដើម្បី ៖
-
ជួយមនុស្សគ្រប់គ្នាឲ្យមានអារម្មណ៍ទទួលស្វាគមន៍មកក្នុងការប្រជុំ និងសកម្មភាពវួដ ។
-
ជួយសមាជិកឲ្យដកពិសោធន៍សេចក្ដីអំណរក្នុងការចែកចាយដំណឹងល្អ ។
-
គាំទ្រមនុស្សដែលរៀនជាមួយនឹងអ្នកផ្សព្វផ្សាយសាសនា ។
-
ជួយដល់សមាជិកថ្មី និងសមាជិកដែលត្រឡប់មកសកម្មឡើងវិញឲ្យរីកចម្រើនខាងវិញ្ញាណ ។
ប្រធានកូរ៉ុមអែលឌើរ និងប្រធានសមាគមសង្គ្រោះជួយក្រុមប្រឹក្សាវួដឲ្យបង្កើតផែនការនេះ ។ អ្នកដឹកនាំបេសកកម្មវួដក៏ជួយផងដែរ ។ ប៊ីស្សពពិនិត្យមើល និងអនុម័តលើផែនការនេះ ។
សមាជិកនៃក្រុមប្រឹក្សាវួដជាអ្នកនាំមុខនៅក្នុងការអនុវត្តផែនការនេះ ។ ពួកគាត់រាយការណ៍អំពីការរីកចម្រើននៅក្នុងការប្រជុំក្រុមប្រឹក្សាវួដ ។ ពួកគាត់ក៏ធ្វើបច្ចុប្បន្នភាពផែនការនេះតាមតម្រូវការផងដែរ ។
២៣.៥.៧
ការប្រជុំសម្របសម្រួល
រៀងរាល់សប្ដាហ៍ ការប្រជុំខ្លីមិនផ្លូវការមួយអាចធ្វើឡើង ដើម្បីសម្របសម្រួលកិច្ចខិតខំក្នុងការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ ប្រសិនបើអ្នកដឹកនាំបេសកកម្មវួដត្រូវបានហៅ នោះគាត់ដឹកនាំការប្រជុំទាំងនេះ ។ បើមិនដូច្នោះទេ សមាជិកម្នាក់នៃគណៈប្រធានកូរ៉ុមអែលឌើរអាចបំពេញតួនាទីនៃការដឹកនាំនេះបាន ។
អ្នកផ្សេងទៀតដែលត្រូវបានអញ្ជើញឲ្យចូលរួម រួមមាន ៖
-
សមាជិកនៃគណៈប្រធានសមាគមសង្គ្រោះ និងគណៈប្រធានកូរ៉ុមអែលឌើរដែលបានចាត់តាំង ។
-
អ្នកផ្សព្វផ្សាយសាសនាវួដ ។
-
ជំនួយការមួយរូបនៅក្នុងកូរ៉ុមសង្ឃ ( ឬប្រធានកូរ៉ុមគ្រូ ឬប្រធានកូរ៉ុមឌីកុន ប្រសិនបើពុំមានកូរ៉ុមសង្ឃនៅក្នុងវួដទេនោះ ) ។
-
សមាជិកម្នាក់នៃគណៈប្រធានថ្នាក់ក្រុមយុវនារីដែលមានវ័យច្រើនជាងគេ ។
-
អ្នកផ្សព្វផ្សាយសាសនាពេញម៉ោង ។
ពួកគេអាចពិភាក្សាអំពី ៖
-
ការអនុវត្តផែនការរបស់វួដសម្រាប់ការចែកចាយដំណឹងល្អ និងការពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ ពួកគេសម្របសម្រួលផែនការនេះជាមួយនឹងផែនការ និងគោលដៅរបស់អ្នកផ្សព្វផ្សាយសាសនាពេញម៉ោង ។
-
ការចាត់តាំងដែលបានផ្ដល់នៅក្នុងការប្រជុំមុនៗ ។
-
របៀបដើម្បីគាំទ្រអ្នកដែលរៀនជាមួយនឹងអ្នកផ្សព្វផ្សាយសាសនា ។
-
ផែនការសម្រាប់កម្មវិធីបុណ្យជ្រមុជទឹកបន្ទាប់ទៀត និងការអញ្ជើញសមាជិកឲ្យចូលរួម ។
ការប្រជុំទាំងនេះអាចធ្វើឡើងដោយផ្ទាល់ ឬពីចម្ងាយ ។ ការសម្របសម្រួលក៏អាចកើតឡើងតាមរបៀបផ្សេងទៀតផងដែរ រួមមានការទូរសព្ទ ការផ្ញើសារ និងអ៊ីម៉ែល ។