“19. Miusik,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“19. Miusik,” Hanbuk.
Pikja
wan woman mo pikinini i stap plei piano
19.
Miusik
19.1
Stamba Tingting blong Miusik insaed long Jos
Long wan revelesen we i go long Profet Josef Smit, Lod i talem se: “From we sol blong mi i glad tumas long singsing we i kam long hat; yes, singsing blong ol stret mo gud man, hem i wan prea we i kam long mi, mo bambae mi ansa long hem wetem wan blesing long hed blong hem” (Doktrin mo Ol Kavenan 25:12). Hem i talem tu se: “Olgeta we oli stret mo gud … bambae oli kam long Saeon, mo oli stap singsing ol singsing blong wan glad we i no gat en” (Doktrin mo Ol Kavenan 45:71).
Tabu miusik i mekem fet long Jisas Kraes i kam moa bigwan. Hem i invaetem Spirit blong tijim doktrin. Hem i krietem filing ia tu blong stap revren, mekem ol memba i kam wan, mo i givim wan wei blong wosipim Papa long Heven mo Jisas Kraes.
19.2
Miusik insaed long Hom
Tru long ol profet blong Hem, Lod i leftemap tingting blong wanwan man mo woman mo ol famli blong yusum ol miusik we i leftemap spirit blong olgeta long evri dei laef blong olgeta. Blong stap singsing mo lisin long tabu miusik i save invaetem wan spirit we i naes mo spirit blong pis. Hem i mekem lav mo yuniti long medel blong ol memba blong famli tu i kam moa bigwan. Ol hym i save helpem wanwan man mo woman blong kasem strong tingting mo stanap strong agensem temtesen.
Ol rekoding blong Jos miusik i stap long ol ples ia:
Jos i givim olgeta risos ia blong helpem wanwan man mo woman mo famli blong lanem ol besik skil blong miusik. Yu save faenem olgeta long music.ChurchofJesusChrist.org (luk tu long 19.6). Blong stap developem ol miusik skil i mekem ol janis blong ol memba i kam moa bigwan, blong givim seves long hom mo insaed long Jos.
19.3
Miusik insaed long Ol Miting blong Jos
Tabu miusik i wan stamba pat blong sakramen miting mo ol narafala miting blong Jos. Hem i gat paoa blong invaetem Spirit, mo karem wanwan man mo woman i kam moa kolosap long God. “Sam long ol toktok long jos we oli moa gud bitim ol narawan oli prijim tru long singsing blong ol hym.” (Luk long Hymns, ix.)
19.3.1
Mekem Plan blong Miusik blong Ol Miting blong Jos
Ol miusik kodineta blong wod mo stek oli wok wetem ol prishud lida blong planem miusik blong ol wosip seves. Oli jusum miusik we i pulum spirit blong wosip insaed long ol miting.
Oli yusum ol hym blong evri kongregesen oli singsing long hem long ol wosip seves. Oli save yusum ol hym mo ol narafala miusik we oli jusum olsem prilud mo poslud miusik, kwaea miusik mo ol miusik presentesen blong wan man nomo o smol grup. Evri miusik insaed long ol miting blong Jos, oli mas presentem long wan spirit blong wosip long Papa long Heven mo Jisas Kraes, mo no olsem wan presentesen blong soemaot talen blong miusik nomo.
Ol miusik we oli jusum i mas go stret wetem spirit blong wosip blong ol hym. Oli mas tijim gospel wetem paoa mo klin fasin.
Tabu miusik we oli raetem o singsing long hem long wan defren stael we i folem ol defdefren kalja i save help blong mekem ol kongregesen oli kam wan. Ol miusik kodineta mo ol prishud lida oli save putum tu ol defdefren kaen stael blong miusik we i pulum ol memba long ol defdefren ples.
19.3.2
Miusik insaed long Sakramen Miting
Ol memba oli kam tugeta long sakramen miting blong tingbaot Jisas Kraes taem oli tekem mo kakae sakramen. Oli kam tugeta blong bildimap fet mo testemoni mo blong wosipim Papa long Heven mo Jisas Kraes. Oli mas jusum miusik we i help blong winim ol stamba tingting ia.
Miusik insaed long sakramen miting i tekem tu ol kongregesen we oli singsing ol hym blong openem mo klosem miting mo bifo oli blesem mo pasem sakramen. Ol kongregesen hym i givim wan janis blong ol memba oli kam wan taem oli tekpat blong stap wosip tugeta. Sakramen hym i mas tokbaot sakramen nomo, o sakrifaes blong Sevya. Blong gat moa infomesen, luk long “Hymns for Congregations,” Hymns, 380–81.
Oli plei prilud miusik taem ol memba oli kam tugeta bifo miting. Stamba tingting blong hem i blong mekem wan ples blong wosip we i invaetem Spirit. Afta long klosing prea, oli plei wan poslud miusik we i nogat singsing long hem taem ol memba oli aot long miting. Oli save jusum ol hym o ol narafala tabu miusik blong stap olsem ol prilud mo poslud miusik.
Wan sakramen miting i save tekem tu, wan moa kongregesen hym we oli singsing long hem long medel blong wan miting—eksampol, bitwin ol mesej we oli serem. O i save tekem wan o moa narafala miusik we oli jusum. Ol kwaea (luk long 19.3.7), wan man o woman we i singsing o i plei wan miusik tul, o ol smol grup oli save presentem. Ol sakramen miting, oli no save givim i go long han blong ol miusik grup aotsaed.
Oli save yusum piano, ogan, o wan narafala miusik tul we bisoprik i apruvum blong i go wetem singsing blong hym insaed long sakramen miting (luk long 19.3.6).
Ol miusik kodineta mo ol bisoprik i traem blong faenem wan balens bitwin ol hym we oli save mo olgeta we oli no save tumas. Ol miusik we oli jusum we wod kwaea o narafala i presentem, i save helpem ol memba blong kam blong save moa ol hym we oli no save tumas.
19.3.3
Miusik insaed long Ol Klas mo Ol Narafala Miting blong Wod
Blong singsing ol hym i wan gud wei blong introdiusum o mekem ol gospel prinsipol i kam strong bakegen. Ol lida oli mas leftemap tingting blong ol tija blong yusum ol hym mo ol narafala tabu miusik blong sapotem tijing blong olgeta.
Blong statem ol Sandei miting blong kworom mo ol klas, oltaem i no stat wetem wan hym blong openem.
19.3.4
Miusik insaed long Stek Konfrens
Miusik blong stek konfrens oli mas plan blong mekem fet mo testemoni i kam strong moa. I mas folem olgeta prinsipol we oli stap long 19.3.1. Prisaeding atoriti i luklukbak long evri miusik singsing we oli jusum; oli mekem hemia long taem we oli stap plan from konfrens.
Plante taem miusik blong stek konfrens i tekem kongregesen hym we oli singsing long hem mo ol narafala miusik we oli jusum long wan kwaea, wan man nomo i singsing, o ol smol grup. Plante taem kongregesen i singsing long wan hym long medel blong miting. Ol stek presidensi oli save apruvum wan man blong singsing mo ol narafala miusik tul we i go wetem we i no piano o ogan (luk long 19.3.6).
19.3.5
Ol Nara Miusik insaed long Japel
Wanwan taem, oli save yusum japel blong mekem ol art blong kalja we i gat ol miusik olsem ol konset, miusik program, mo ol nara presentesen. Oli no stap klap long taem blong ol wosip seves, be oli save mekem long ol program olsem.
Ol lokol prishud lida oli stretem o oli givim ansa abaot ol kalja aktiviti we oli mekem insaed long japel. Luk long 35.5 blong gat moa infomesen abaot stret wei blong yusum ol miting haos.
19.3.6
Ol Tul blong Miusik
Ol laef miusik tul, plante taem oli yusum blong plei ol prilud mo poslud miusik mo blong sapotem hym insaed long ol miting blong Jos. Taem i gat mo ol memba oli save plei long hem, ol ogan mo ol piano oli ol standet miusik tul. Ol bisoprik i save apruvum blong oli yusum ol nara miusik tul blong sapotem singsing blong kongregesen, blong prilud mo poslud miusik, mo long ol nara miusik we oli jusum.
Ol miusik tul oli mas givimaot wan filing blong wosip mo blong ol plei long hem i kipim spirit blong miting i stap.
Sapos i no gat piano, organ, o i no gat wan blong plei we i stap, oli save yusum ol rekoding (luk long 19.2).
19.3.6.1
Kasem o Pem Ol Miusik Tul
Plante taem, insaed long ol bilding blong Jos bae i gat wan ogan, ol piano, o wan lektronik miusik kibod i stap. Ol lida oli save kontaktem lokol fasiliti maneja blong infomesen abaot olsem wanem blong kasem ol niufala tul blong miusik, mo ol wei blong riplesem olgeta.
19.3.6.2
Stap Lukaot Gud long Ol Tul blong Miusik
Ol piano oli stretem ol miusik ki blong hem mo oli mentenem ol ogan oltaem. Bisop o stek bilding ripresentativ i save kontaktem fasiliti maneja sapos oli gat ol kwestin. Olsem we i nidim, hem i save givim wan rikwes long Facility Issue Reporting (FIR) blong mentenem o riperem ol piano mo ogan (luk long 35.4.2).
19.3.7
Ol Kwaea
Stat long ol taem blong OlTesteman, ol pikinini blong God oli bin singsing long ol kwaea blong presem God. Ol Jos kwaea i givim glori i go long God, i jenisim mo mekem ol Jos memba oli kam wan, mo i givim glad long olgeta we oli tekpat mo ol kongregesen.
Taem i gat inaf memba, ol wod oli save oganaesem ol kwaea blong singsing insaed long sakramen miting oltaem. Bisoprik i save singaotem wan kwaea daerekta mo kwaea help (luk long 19.4.3.3).
Ol wod memba oli save volontia blong singsing long kwaea. Oli save invaetem ol memba mo ol narawan tu blong tekpat. Oli no stap mekem ol tes blong miusik.
Oli leftemap tingting blong ol kwaea blong yusum ol hym blong Jos. Blong singsing ol hym, i invaetem Spirit mo i helpem olgeta we oli tekpat long kwaea mo kongregesen blong lanem gospel (luk long Hymns, 381–83). Sapos oli jusum blong yusum ol narafala tabu miusik we oli jusum, oli mas folem ol gaedlaen we oli stap long 19.3.1 .
Ol kwaea praktis oli no mas bitim wan aoa.
Sapos wan wod kwaea i nidim pepa blong miusik, oli save pem wetem bajet blong wod (luk long 19.7.1). Oli leftemap tingting blong ol wod kwaea blong serem ol miusik we oli pem wetem ol narafala kwaea long stek. Blong mekem kopi blong ol miusik we oli printim o rekodem, mo no kasem raet blong ol ona blong ol kopi raet ia, i agensem ol polisi blong Jos (luk long 38.8.11).
Antap long kwaea blong wod, oli save invaetem ol famli mo ol grup blong woman, man, yut o ol pikinini oli save singsing insaed long ol miting blong Jos.
Wetem raet blong ol lida blong stek o eria, oli save oganaesem ol kwaea blong stek mo maltistek blong ol stek konfrens mo ol narafala program olsem ol komuniti taem. Afta long miting o taem, bae kwaea i go wanwan kasem taem wan nara taem i kam blong oli singsing long hem.
19.4
Miusik Lidasip insaed long Wod
19.4.1
Bisoprik
Bisop i responsibol long wod miusik. Hem i save givim responsabiliti ia long wan long ol kaonsela blong hem. Ol bisoprik oli gat olgeta responsabiliti ia:
Singaotem mo setem apat ol memba blong givim seves long ol koling blong miusik we oli tokbaot insaed long 19.4.2 mo 19.4.3 olsem we i nid.
Wok wetem wod miusik kodineta blong mekem plan blong miusik blong ol sakramen miting (luk long 19.3.1).
Tijim hamas i impoten blong stap wosip tru long miusik long ol miting. Leftemap tingting blong ol memba blong tekempat long kongregesen singsing. Leftemap tingting blong ol memba speseli ol yut, blong yusum miusik we i leftemap tingting long evri dei laef blong olgetawan (luk long 19.2).
Disaed wanem miusik tul we i no piano o ogan we oli save yusum long ol miting blong Jos (luk long 19.3.6).
Sapotem wod kwaea taem yu leftemap tingting blong ol memba blong oli tekempat.
19.4.2
Wod Miusik Kodineta
Wod miusik kodineta i givim seves anda long daereksen blong bisoprik. Hem i gat olgeta responsabiliti ia:
Stap olsem wan risos blong bisoprik mo ol narafala wod lida long saed blong miusik. Go long wod kaonsel sapos bisop i invaetem, blong help blong kodinetem ol miusik long wod.
Wok wetem bisoprik blong mekem plan blong miusik blong ol sakramen miting (luk long 19.3.1 mo 19.3.2).
Givim mo lukaotem miusik trening insaed long wod, sapos i nid (luk long 19.6). Helpem ol memba blong faenem ol janis blong developem mo yusum ol miusik talen blong olgeta insaed long wod.
Olsem we bisoprik i askem, givim ol nem blong memba blong givim seves long ol wod miusik koling. Lidim olgeta we oli givim seves long ol koling ia, givim sapot, instraksen, mo trening olsem we i nid.
Givim seves long ol narafala wod miusik koling sapos oli no singaotem ol narawan.
Kaonsel wetem stek miusik kodineta blong kasem trening mo sapot olsem we i nid.
Long ol wod we oli bigwan inaf, bisoprik i save singaotem ol memba blong givim seves long ol koling ia. Oli save singaotem ol yut mo olgeta blong nara fet. Ol bisoprik i save jenisim ol koling ia olsem we i nid blong ansa long ol nid blong wod blong olgeta.
19.4.3.1
Wod Miusik Lida
Miusik lida i lidim ol kongregesen hym blong sakramen miting mo blong ol narafala wod miting olsem we oli askem.
19.4.3.2
Wod Help
Wod help i givim prilud mo poslud miusik blong ol hym long taem blong sakramen miting mo ol narafala miting blong wod, olsem we oli askem. Taem i gat nid, hem we i help i save help long kwaea o givim seves olsem hem we i plei piano blong Praemeri.
Taem i no gat wan long wod we i save plei piano o ogan, ol tingting ia oli stap:
Wan memba i save plei wan nara miusik tul we bisop i apruvum (luk long 19.3.6).
I gat ol dijitol piano mo ogan we i plei ol hym we i stap long wan program finis long hem, long sam mitinghaos (luk long 19.3.6.1).
Ol memba oli save yusum ol rekoding long ol risos ia:
Wod kwaea daerekta i givim miusik we kwaea bae i singsing, i daerektem ol praktis blong kwaea, mo i lidim kwaea long sakramen miting (luk long 19.3.7).
Wod kwaea help i plei miusik blong ol kwaea praktis mo taem kwaea i singsing long ol sakramen miting.
Blong sam moa infomesen abaot fasin blong lidim ol kwaea, luk long lesenbuk ia Conducting Course, ol pej 73–83.
Bisoprik i save singaotem ol speselis blong oli help wetem miusik trening insaed long wod (luk long 19.6).
19.5
Miusik Lidasip insaed long Stek
19.5.1
Stek Presidensi
Stek presiden i lukluk ova long miusik. Hem i save givim ol responsabiliti ia long wan long ol kaonsela blong hem o wan memba blong hae kaonsel:
Singaotem mo setem apat ol memba blong givim seves long ol koling blong miusik we oli tokbaot insaed long 19.5.2 mo 19.5.3 olsem we i nid.
Kaonsel wetem stek miusik kodineta blong mekem plan blong miusik blong ol stek konfrens mo ol narafala stek taem (luk long 19.3.1, 19.3.4, mo 19.3.7.2).
Tijim hamas i impoten blong stap wosip tru long miusik long ol miting. Leftemap tingting blong ol memba blong tekempat long kongregesen singsing. Leftemap tingting blong ol memba blong yusum miusik we i leftemap tingting long evri dei laef blong olgetawan (luk long 19.2).
Disaed wanem miusik tul we i no piano o ogan we oli save yusum long ol miting blong stek (luk long 19.3.6).
19.5.2
Stek Miusik Kodineta
Anda long daereksen blong stek presidensi, stek miusik kodineta i gat olgeta responsabiliti ia:
Hem i stap olsem wan risos blong stek presidensi mo ol narafala lida blong stek long saed blong miusik.
Kaonsel wetem stek presidensi blong mekem plan blong miusik blong stek konfrens mo ol narafala taem blong stek (luk long 19.3.1, 19.3.4, mo 19.3.7.2).
Hem i givim tingting mo i supavaesem ol miusik trening program insaed long stek (luk long 19.6).
Olsem we stek presidensi i askem, hem i givim ol nem blong memba blong givim seves long ol stek miusik koling. Lidim olgeta we oli stap givim seves long ol koling ia. Givim sapot, instraksen, mo trening olsem we i nid.
Givim trening mo sapot blong ol wod miusik kodineta olsem we i nid blong mekem.
Givim seves olsem miusik lida mo kwaea daerekta long ol stek miting sapos oli no singaotem ol narawan.
Oli save singaotem ol stek miusik speselis olsem we i nid. Hemia i save tekem tu, wan stek kwaea daerekta, stek miusik lida, mo stek help. Oli save givim wok tu long ol stek miusik speselis blong givim miusik trening (luk long 19.6).
19.6
Miusik Trening mo Ol Risos
Blong lanem ol besik blong miusik i mekem ol memba oli rere blong yusum talen blong olgeta blong givim seves insaed long jos. Ol risos ia i save helpem olgeta wetem ol koling blong miusik. Oli save helpem tu evri memba we oli intres blong developem ol samting we oli save mekem wetem miusik.
Ol besik tul blong miusik trening i stap long seksen blong “Using the Hymnbook” insaed long Hymns mo seksen blong “Using the Songbook” insaed long Children’s Songbook.
Oli risos ia tu i save help:
Wan laebri blong miusik pepa mo ol miusik rekoding blong yusum long hom mo long jos, i stap long Sacred Music ap mo onlaen long music.ChurchofJesusChrist.org. Blong stap lisin long ol rekoding i save helpem ol memba blong save moa ol hym.
Kompiuta miusik pleia long ChurchofJesusChrist.org i save helpem olgeta we oli stap lukaotem blong lanem niu miusik o developem ol miusik skil.
Basic Music Course i save helpem ol memba blong lanem olsem wanem blong ridim mo plei long miusik. Hemia i tekem yu Conducting Course Kit mo Keyboard Course Kit. Yu save pem ol risos ia long store.ChurchofJesusChrist.org.
Oli bin stanemap wan Music Education Fund long ol hedkwota blong Jos blong givim ol kibod, trening tul, mo instraksen blong ol memba we oli stap lukaotem blong developem miusik skil. Blong kasem moa infomesen abaot mane ia, luk long musicfund.ChurchofJesusChrist.org.
Ol stek mo wod miusik kodineta oli save oganaesem ol besik miusik trening lesen blong ol miusik lida, ol kwaea daerekta, mo ol help. Olgeta we oli tekempat i save olgeta we oli stap givim seves long miusik koling o ol narafala adalt, yut mo pikinini we oli intres. Ol miusik kodineta o speselis oli save tijim ol lesen ia. Ol miusik kodineta oli save givim nem blong ol instrakta we oli kwalifae, blong givim trening ia.
Taem i gat inaf memba, ol miusik kodineta oli save toktok wetem ol prishud lida mo givim tingting blong oganaesem ol stek o maltistek trening woksop. I no gat fi blong pem blong ol trening we Jos i stap oganaesem.
19.7
Sam Moa Polisi mo Gaedlaen
19.7.1
Stap Karem mo Yusum Miusik
Oli givim ol hymbuk long ol niufala mitinghaos. Oli save pem sam moa hymbuk, kwaea miusik, mo nara miusik wetem mane blong bajet blong stek o wod.
19.7.2
Yus blong Ol Miusik Tul blong Mitinghaos blong Praktis, Praevet Lesen, mo Miusik Program
Taem i no gat wan gudfala nara wei, ol prishud lida oli save givim raet blong oli yusum ol piano mo organ blong mitinghaos blong save praktis, blong piano lesen we oli pem i tekples, mo blong ol kwaea oli praktis, hemia taem ol memba blong ol yunit oli stap tu long ol praktis ia. Raet ia i wan eksepsen olsem we oli tokbaot insaed long 35.5.6.1. I no mas gat eni fi we Jos i mekem olgeta ia oli pem blong mekem ol praktis.
19.7.3
Ol Komuniti Kwaea
Ol komuniti kwaea we oli gohed blong wan longfala taem, we ol memba blong Jos oli stap daerektem mo oli memba blong ol kwaea ia, Jos i no stap sponsarem olgeta. Olgeta kwaea ia oli no mas yusum eni samting o toktok we bae i joenem olgeta long Jos insaed long nem blong kwaea.
Sapos stek presidensi i apruvum, ol komuniti kwaea oli save yusum ol Jos bilding blong praktis mo mekem ol presentem olgeta. Oli mas folem ol standet mo polisi blong Jos we i abaot ol mitinghaos (luk long 35.5).