“18. Stap Mekem Ol Odinens mo Ol Blesing blong Prishud,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“18. Stap Mekem Ol Odinens mo Ol Blesing blong Prishud,” Jeneral Hanbuk.
18.
Stap Mekem Ol Odinens mo Ol Blesing blong Prishud
18.0
Fas Toktok
Ol odinens mo ol blesing oli ol tabu aksen we oli hapen tru long atoriti blong prishud mo long nem blong Jisas Kraes. Taem we olgeta we oli holem prishud oli mekem ol odinens mo ol blesing, oli stap folem eksampol blong Sevya blong stap blesem ol nara man. Ol prishud odinens mo blesing oli givim rod blong yusum paoa blong God (luk long Doktrin mo Ol Kavenan 84:20).
Ol odinens mo ol blesing ia, oli mas mekem wetem fet long Papa long Heven mo long Jisas Kraes, mo folem wanem we Tabu Spirit i talem. Ol lida oli mas meksua we oli mekem olgeta wetem stret apruvol (taem i nid), mo wetem prishud atoriti we i nid, long stret fasin, mo olgeta we oli tekpat oli klin inaf (luk long 18.3).
Long saed blong ol polisi long saed blong ol prishud odinens mo blesing, luk long 38.2.
18.1
Ol Odinens blong Fasin blong Sevem Man mo Fasin blong Kam Olsem Wan God
Prishud ia i tekem atoriti blong mekem ol odinens blong gospel we i nid blong mekem blong sevem man mo kam olsem wan god. Ol pipol oli mekem ol tabu kavenan wetem God taem we oli kasem olgeta odinens ia. Ol odinens blong fasin blong sevem man mo fasin blong kam olsem wan god oli stap long lis andanit ia:
-
Baptaes
-
Konfemesen mo presen we i Tabu Spirit
-
Pasem Melkesedek Prishud mo odinesen long wan ofis (blong ol man)
-
Endaomen blong tempol
-
Tempol Siling
Blong kasem moa infomesen abaot wei blong mekem ol odinens ia blong olgeta we oli gat ol disabiliti long saed blong tingting, luk long olgeta ia:
-
Blong baptaes mo konfemesen (38.2.8.1)
-
Blong odinesen long wan ofis blong Melkesedek Prishud (38.2.9.7)
-
Blong tempol endaomen mo tempol siling (27.2.1.3 mo 27.3.1.2
Sapos wan pikinini, we i bon insaed long kavenan, i ded bifo hem i gat 8 yia, i no nid blong mekem ol odinens. Sapos pikinini ia i no bin bon insaed long kavenan, bae hem i nidim wan odinens ia nomo, we i blong hem i siling long papa mo mama blong hem. From Atonmen blong Sevya, evri pikinini we oli ded bifo oli gat 8 yia, “Lod i sevem olgeta oli go long selestial kingdom blong heven” (Doktrin mo Ol Kavenan 137:10; luk tu long Moronae 8:8–12).
18.2
Ol Nara Odinens mo Blesing
Ol nara odinens mo blesing oli mekem se i posibol blong ol pikinini blong God oli kasem paoa, hiling, kamfot mo daereksen blong Hem. Ol odinens mo ol blesing ia, oli stap long lis andanit ia:
-
Stap givim ol nem mo blesing long ol pikinini
-
Sakramen
-
Pasem o givim Aronik Prishud mo odinesen long wan ofis (blong ol yang man mo ol man)
-
Stap setem apat ol memba blong givim seves long ol koling
-
Stap Konsekretem Oel
-
Stap givim blesing long olgeta we oli sik
-
Ol blesing blong kamfot mo kaonsel, we i tekem tu blesing blong papa
-
Stap dediketem ol hom
-
Stap dediketem ol gref
-
Ol petriakel blesing we i kam long ol petriak we oli odenem olgeta
18.3
Tekpat long Wan Odinens o Wan Blesing
Olgeta we oli mekem, o oli tekpat long wan odinens o wan blesing oli mas gat stret prishud atoriti mo oli mas klin inaf. Plante taem, standet blong stap klin inaf i go wetem fasin blong holem wan tempol rekomen. Be, olsem we Spirit i talem mo folem ol instraksen long japta ia, ol bisop mo ol stek presiden oli save letem ol papa mo ol hasban we oli holem stret prishud blong oli mekem o tekpat long samfala odinens mo blesing, i nomata se oli no klin inaf fulwan blong go long tempol. Wan we i holem prishud we i no stretem ol series sin blong hem, i no mas tekpat.
Plante taem, olgeta prishud lida nomo, mo ol nara man we oli holem prishud we oli ol memba blong famli we oli kolosap, mo ol fren we oli kolosap oli tekpat long wan odinens o wan blesing.
Hem we i kasem odinens, wetem ol memba blong famli, mo wetem ol prishud lida, oli kaonsel tugeta blong faenemaot se huia mo hamas bae oli tekpat. Desisen ia, bae oli mas mekem bifo oli mekem odinens ia.
Taem we i gat tu (2) man nomo we oli holem prishud oli tekpat, wanwan long tufala i putum tufala han slo nomo antap long hed blong man o woman. Taem we i gat plante moa i tekpat, oli stanap long wan sekol raon long hem we i kasem odinens o blesing ia. Wanwan i putum raet han blong hem slo nomo long hed blong hem we i kasem odinens (o andanit long bebi we i kasem blesing) mo lef han blong hem i stap antap long solda blong brata ia we i stap long lef saed blong hem. Wan i toktok blong mekem odinens o givim blesing ia.
Long saed blong mekem o kasem samfala odinens mo blesing, bae i nid blong wan prisaeding lida we i holem ol stret prishud ki, i givim raet from (luk long 3.4.1). Taem we i nid, raet i save kam long wan kaonsela we hem i givim raet long hem. Luk long ol jat we oli kam afta. Taem oli tokbaot ol stek presiden, hemia i minim ol misin presiden tu. Ol refrens long ol bisop i minim tu ol branj presiden.
?Wijwan Lida i Holem Ol Ki blong Givim Raet blong Mekem o Kasem Ol Odinens blong Fasin blong Sevem Man mo Fasin blong Kam Olsem Wan God?
|
Odinens |
Huia I Holem Ol Ki |
|---|---|
Odinens Baptaes | Huia I Holem Ol Ki Bisop (blong ol pikinini we oli gat 8 yia mo ol memba blong rekod we oli gat 9 yia i go antap, we oli seftem baptaes blong olgeta from oli gat disabiliti long saed blong tingting) Misin presiden (blong ol konvet) |
Odinens Konfemesen mo presen we i Tabu Spirit | Huia I Holem Ol Ki Bisop (blong ol pikinini we oli gat 8 yia mo ol memba blong rekod we oli gat 9 yia i go antap, we oli seftem baptaes blong olgeta from oli gat disabiliti long saed blong tingting) Misin presiden (blong ol konvet) |
Odinens Pasem Melkesedek Prishud mo odinesen long wan ofis (blong ol man) | Huia I Holem Ol Ki Stek presiden |
Odinens Endaomen blong tempol | Huia I Holem Ol Ki Bisop mo stek presiden |
Odinens Tempol Siling | Huia I Holem Ol Ki Bisop mo stek presiden |
?Wijwan Lida i Holem Ol Ki blong Givim Raet blong Mekem o Kasem Ol Nara Odinens mo Blesing?
|
Odinens o Blesing |
Huia I Holem Ol Ki |
|---|---|
Odinens o Blesing Stap givim ol nem mo blesing long ol pikinini | Huia I Holem Ol Ki Bisop |
Odinens o Blesing Sakramen | Huia I Holem Ol Ki Bisop |
Odinens o Blesing Pasem o givim Aronik Prishud mo odinesen long wan ofis (blong ol yang man mo ol man) | Huia I Holem Ol Ki Bisop |
Odinens o Blesing Stap setem apat ol memba blong givim seves long ol koling | Huia I Holem Ol Ki Luk long 30.8 |
Odinens o Blesing Stap Konsekretem Oel | Huia I Holem Ol Ki No nidim apruvol |
Odinens o Blesing Stap givim blesing long olgeta we oli sik | Huia I Holem Ol Ki No nidim apruvol |
Odinens o Blesing Ol blesing blong kamfot mo kaonsel, we i tekem tu blesing blong papa | Huia I Holem Ol Ki No nidim apruvol |
Odinens o Blesing Stap dediketem ol hom | Huia I Holem Ol Ki No nidim apruvol |
Odinens o Blesing Stap dediketem ol gref | Huia I Holem Ol Ki Prishud lida we i stap prisaed ova long seves |
Odinens o Blesing Ol petriakel blesing | Huia I Holem Ol Ki Bisop |
18.4
Ol Odinens blong Ol Pikinini we Oli No Kasem 18 Yia
Ol gaedlaen blong kasem apruvol blong ol papa mo mama o hem we i lukaotem pikinini we i no kasem 18 yia, blong save kasem ol odinens mo blesing, insaed long ol seksen we oli mekem lis blong hem andanit ia:
Long saed blong ol kwestin abaot ol raet folem loa blong ol papa o mama o hem we i lukaotem pikinini, bisop o stek presiden i askem advaes blong Jos Ofis blong Jeneral Kaonsel, o long eria ofis (luk long 38.8.23).
18.5
Stap Mekem Ol Odinens: I Kam long, mo blong Olgeta we Oli Gat Disabiliti
18.6
Stap Givim Ol Nem mo Blesing long Ol Pikinini
“Evri memba blong jos ia blong Kraes we oli gat ol pikinini, oli mas tekem olgeta i kam long ol elda long fored blong jos, mo ol elda ia bae oli putum han blong olgeta antap long hed blong ol pikinini ia long nem blong Jisas Kraes, mo bae oli blesem olgeta long nem blong hem” (Doktrin mo Ol Kavenan 20:70
Plante taem, oli stap givim nem mo blesem ol pikinini long taem blong wan fast mo testemoni miting insaed long wod ia we papa mo mama i stap laef long hem. Hemia i tru tumas i nomata se papa mo mama blong pikinini i mared o no. Sapos papa mo mama oli nomo stap laef tugeta, odinens ia, plante taem bae oli mekem insaed long wod ia we pikinini bae i laef long hem oltaem.
Ol eksepsen long stret taem mo ples blong givim blesing long pikinini, bae bisop nao i givim raet from. Ol eksepsen we i posibol i ol blesing we oli no givim long wan fast Sandei, speseli long ol wod we i gat plante niu bebi, mo ol blesing long ol nara wod ia we ol bubu o plante memba blong famli oli stap long hem. Bisop i save givim raet long olgeta we oli kasem Melkesedek Prishud blong oli blesem pikinini ia insaed long hom. Wan memba blong bisoprik i prisaed.
Blong infomesen abaot fasin blong givim nem mo givim blesing long ol pikinini we oli stap long ol spesel situesen, luk long 38.2.7.
18.6.1
Huia I Givim Blesing
Odinens ia blong stap givim nem mo blesing long wan pikinini, olgeta we oli holem Melkesedek Prishud nao oli mekem we i folem stret wanem we i stap long Doktrin mo Ol Kavenan 20:70. Ol prishud lida oli mas talemaot hemia long ol memba bifo oli givim nem mo blesing long ol pikinini blong ol memba ia. Ol lida oli mas traehad evriwan blong mekem se wanwan man, woman mo famli oli no sem, o oli no harem nogud.
Wan man, woman, o famli we i wantem se wan pikinini i kasem wan nem mo wan blesing, i kodinetem odinens ia wetem bisop. Hem i holem ol ki blong prishud blong givim nem mo blesing long ol pikinini insaed long wod.
Wan bisop i save letem wan papa we i holem Melkesedek Prishud blong givim nem mo wan blesing long ol pikinini blong hem, iven sapos papa ia i no klin inaf evriwan blong go long tempol (luk long 18.3). Ol bisop oli leftemap tingting blong ol papa blong oli mekem olgetawan oli rere blong blesem ol stret pikinini blong olgeta.
Blong stap olsem voes blong blesem wan pikinini, wan we i stap aotsaed long stret wod blong hem i mas soem tempol rekomen blong hem we i laef i stap i go long prisaeding lida. O hem i save soem wan Rekomen blong Mekem Wan Odinens we wan memba blong bisoprik blong hem i saenem.
18.6.2
Ol Instraksen
Anda long daereksen blong bisoprik, olgeta we oli holem Melkesedek Prishud oli kam tugeta long wan sekol blong givim nem mo blesem wan pikinini. Oli putum han blong olgeta andanit long bebi, o oli putum han blong olgeta slo nomo antap long hed blong wan pikinini we i bigwan finis. Nao, wan i stap olsem voes:
-
I toktok long Papa long Heven olsem long wan prea.
-
I talem blesing we hem i stap mekem tru long atoriti blong Melkesedek Prishud.
-
I givim wan nem long pikinini.
-
I toktok i go long pikinini.
-
I givim wan blesing long pikinini olsem we Spirit i talem long hem.
-
I endem long nem blong Jisas Kraes.
18.6.3
Fom blong Rekod mo Blesing Setifiket blong Pikinini
Bifo oli blesem wan pikinini, klak i yusum sistem blong Risos blong Lida mo Klak (RLK) blong mekem rere wan Fom blong Rekod blong Pikinini. Afta long blesing, hem i krietem membasip rekod insaed long sistem ia, mo i rere wan Blesing Setifiket. Setifiket ia, bisop i saenem mo i givim i go long papa mo mama blong pikinini, o olgeta we oli stap lukaot long pikinini.
Nem long membasip rekod mo setifiket i mas stret folem bon setifiket, bon setifiket we i stap long sivil rejista, o i folem nem we i stap folem loa.
18.7
Baptaes
Baptaes andanit long wota hem i wan mas blong wan we i gat atoriti i mekem, blong wan man o woman i save kam wan memba blong Jos mo kasem Tabu Spirit. Evriwan we i wantem blong kam olsem wan god i mas folem eksampol blong Sevya taem hem i kasem olgeta odinens ia. (Luk long Matiu 3:13–17; Jon 3:3–7; Ol Wok 2:37–38; 2 Nifae 31:5–21.)
Blong gat moa infomesen abaot baptaes long spesel situesen, luk long 38.2.8.
18.7.1
Apruvol blong Wan I Kasem Baptaes mo Konfemesen
18.7.1.1
Ol Pikinini we Oli Ol Memba blong Rekod
Bisop nao i holem ol ki blong prishud blong baptaesem ol memba blong rekod we oli gat 8 yia, insaed long wod. Ol pikinini ia, oli mas kasem baptaes mo konfemesen long stret dei o i no longtaem afta we oli kasem namba 8 betdei blong olgeta Doktrin mo Ol Kavenan 68:27). Hemia i blong olgeta we Jos membasip rekod blong olgeta i stap finis ( luk long 33.6.2). Taem ol pikinini oli kasem 8 yia, bisop i meksua se ol pikinini ia oli kasem evri janis blong akseptem gospel mo kasem baptaes mo konfemesen.
Blong kasem infomesen abaot baptaes mo konfemesen blong wan we i gat disabiliti long tingting, luk long 38.2.4 mo 38.2.8.1.
Bisop, o wan kaonsela we hem i givim wok ia long hem, i intaviu ol pikinini blong rekod blong oli kasem baptaes mo konfemesen. Ol instraksen oli stap long 31.2.3.1.
Blong kasem sam infomesen long fasin blong fulumap Baptaes mo Konfemesen Rekod, luk long 18.8.3.
Ol bisop oli lukluk speseli long olgeta pikinini we oli gat 7 yia, we oli stap insaed long wod, mo meksua se papa mo mama blong olgeta, ol lida mo tija blong Praemeri blong olgeta, mo olgeta we oli gat wok ia blong givhan long ol famli blong olgeta, oli mas helpem ol pikinini ia blong oli kasem baptaes mo konfemesen. Ol lida blong Melkesedek Prishud mo Rilif Sosaeti tu, oli leftemap tingting blong ol papa mo ol mama blong oli mekem ol pikinini blong olgeta oli rere blong kasem olgeta odinens ia.
18.7.1.2
Ol Konvet
Misin presiden i holem ol prishud ki blong baptaesem ol konvet insaed long misin. From risen ia, ol fultaem misinari oli mekem intaviu blong ol konvet blong oli kasem baptaes mo konfemesen. Ol instraksen oli stap long 31.2.3.2.
Blong kasem sam infomesen long fasin blong fulumap Baptaes mo Konfemesen Rekod, luk long 18.8.3
18.7.1.3
Ol Pikinini we Papa mo Mama blong Olgeta Oli No Mared (Hemia i tekem Olgeta We Oli Divos tu)
Long saed blong ol gaedlaen abaot fasin blong baptaesem mo konfemem ol pikinini we oli no kasem 18 yia yet, luk long 38.2.8.2
18.7.2
Seves blong Baptaes
Ol seves blong baptaes oli mas simpol, sot mo i leftemap man long saed blong spirit. Insaed i save gat olgeta samting ia:
-
Wan fas miusik
-
Wan sot welkam we i kam long brata ia we i stap kondaktem seves.
-
Wan fas hym mo prea
-
Wan o tufala sot toktok long saed blong ol topik blong gospel, olsem baptaes mo presen we i Tabu Spirit.
-
Wan spesel miusik namba
-
Baptaes
-
Wan kwaet taem blong stap revren taem we olgeta we oli bin tekpat long baptaes oli go jenis oli werem ol drae klos (oli save plei ol hym, o ol Praemeri singsing, o oli save singsing long taem ia)
-
Konfemesen blong ol pikinini we oli gat 8 yia we oli ol memba blong rekod; konfemesen blong ol konvet, bae bisop nao i talem wetaem i hapen mo hu bae i mekem (luk long 18.8)
-
Ol niu konvet oli talem testemoni blong olgeta sapos oli wantem.
-
Wan las hym mo prea
-
Las miusik
Taem wan pikinini blong rekod i stap rere blong kasem baptaes, wan memba blong bisoprik mo Praemeri presidensi i kaonsel wetem famli blong mekem plan mo putum taem blong wan seves blong baptaes. Wan memba blong bisoprik i lidim seves ia. Sapos moa long wan pikinini bae i kasem baptaes long semmak manis, oli save serem wan seves blong baptaes.
Long ol stek we i gat plante pikinini blong rekod, ol pikinini blong ol defdefren wod i save serem wan seves blong baptaes. Long ol situesen olsem, wan memba blong stek presidensi o stek Praemeri presidensi o wan hae kaonsela i kaonsel wetem ol famli blong ol pikinini we bae oli kasem baptaes, blong mekem plan mo putum taem blong ol seves blong baptaes. Wan memba blong stek presidensi, o wan hae kaonsela we i kasem wok ia, i lidim seves ia. Ol wod mo ol famli oli save mit wanwan blong wan smol pat blong seves blong mekem se oli luksave wanwan pikinini. Eksampol, hemia i save blong odinens blong baptaes, konfemesen, o wan toktok we i kam long wan wod o memba blong famli. Wan memba blong bisoprik i lidim pat blong seves ia.
Ol baptaes seves blong ol konvet oli mas putum taem blong olgeta stret afta we oli mitim ol kwalifikesen blong baptaes we i stap long 31.2.3.2. Oli no sapos blong seftem dei blong baptaes blong ol memba blong famli i go kasem taem we papa i save kasem prishud mo mekem baptaes ia hemwan.
Folem rod we bisoprik i soem, wod misin lida (sapos oli singaotem wan i stap) o memba blong kworom presidensi blong ol elda we i lidim misinari wok insaed long wod i mekem plan mo i lidim ol seves blong baptaes blong ol konvet. Oli kodinetem wetem ol fultaem misinari.
18.7.3
Huia I Mekem Odinens
Odinens blong baptaes, wan pris o wan we i holem Melkesedek Prishud i mekem. Hem we i mekem baptaes, bisop i mas givim raet long hem from (o misin presiden i givim raet sapos wan fultaem misinari i mekem baptaes).
Wan bisop i save letem wan papa we i wan pris o i holem Melkesedek Prishud blong mekem baptaes blong pikinini blong hem, iven sapos papa i no klin inaf fulwan blong go long tempol (luk long 18.3). Ol bisop oli leftemap tingting blong ol papa blong oli mekem olgetawan oli rere blong blesem ol stret pikinini blong olgeta.
Blong mekem wan baptaes, wan we i stap aotsaed long stret wod blong hem i mas soem tempol rekomen blong hem we i laef i stap i go long prisaeding lida. O hem i save soem wan Rekomen blong Mekem Wan Odinens we wan memba blong bisoprik blong hem i saenem.
18.7.4
Weaples blong Mekem Odinens
Ol baptaes oli mas mekem insaed long wan ples blong baptaes sapos i gat wan i stap. Sapos i no gat wan ples blong baptaes, bae oli save mekem insaed long wan ples we i gat wota long hem. Ples ia i mas bigwan inaf blong hem we i mekem odinens i stanap wetem hem we i kasem baptaes. Oli no stap dediketem wota blong mekem ol baptaes.
Sapos oli yusum wan ples blong baptaes, oli putum taem blong yusum ples ia tru long wan memba, insaed long wod blong bisop we i lukaot long japel ia, we i kasem wok blong lukaot long yus blong ples blong baptaes.
Blong mekem se ol samting oli sef i stap, wan adalt we i responsibol i mas stap taem oli stap fulumap ples blong baptaes mo i mas stap kasem taem we ples ia i emti mo i sef. Ples blong baptaes ia oli mas emti aot mo oli mas klinim stret afta long wanwan seves blong baptaes. Ol doa blong ples blong baptaes oli mas lokem gud taem we oli no yusum.
18.7.5
Ol Klos
Wan we i stap mekem baptaes mo wan we i stap kasem baptaes oli werem ol waet klos we oli no luktru taem we klos i wetwet. Wan we i endao i werem tempol gamen andanit long klos ia taem hem i mekem baptaes. Ol lokol yunit oli mas pem ol klos blong baptaes wetem bajet mane mo oli no mas askem mane blong oli stap yusum ol klos ia.
18.7.6
Ol Witnes
I gat tufala witnes, we prisaeding lida i givim raet long tufala, blong tufala i luklukgud wanwan baptaes mo mekemsua se baptaes i hapen long stret fasin. Ol memba blong Jos we oli kasem baptaes, wetem ol pikinini mo ol yut tu, oli save stap olsem ol witnes.
Oli mas ripitim ol toktok blong baptaes sapos oli no talemaot ol toktok stret olsem we oli stap long Doktrin mo Ol Kavenan 20:73. Oli mas ripitim tu sapos pat blong bodi, hea, o klos i no draon fulwan andanit long wota.
18.7.7
Ol Instraksen
Blong mekem odinens blong baptaes, wan pris o wan we i holem Melkesedek Prishud:
-
I stanap long wota wetem hem we bae i kasem baptaes.
-
I holem fored blong raet han blong hem we i baptaes wetem lef han blong hem (blong mekem se i stret mo blong sefti). Hem we i kasem baptaes i holem fored blong lef han blong prishud we i mekem baptaes wetem lef han blong hem.
-
Man we i mekem baptaes i leftemap raet han blong hem i skwea.
-
I talem ful nem blong hem we i kasem baptaes, mo i talem: “From Jisas Kraes i givim raet long mi, mi baptaesem yu long nem blong Papa, mo long nem blong Pikinini, mo long nem blong Tabu Spirit. Amen” (Doktrin mo Ol Kavenan 20:73).
-
Taem hem we i kasem baptaes i holem nus blong hem wetem raet han blong hem (blong i stret); nao man we i mekem baptaes i putum raet han blong hem long bak blong hem we i kasem baptaes mo i draonem hem fulwan, hemia wetem ful klos blong hem. Blong draon fulwan i isi moa sapos hem we i kasem baptaes i benem ol ni blong hem.
-
Helpem hem we i kasem baptaes blong kam antap mo kamaot long wota.
18.7.8
Rekod blong Baptaes
Blong kasem infomesen long saed blong fasin blong mekem rekod blong wan baptaes, luk long 18.8.3.
18.8
Konfemesen mo Presen we I Tabu Spirit
Afta we wan man o woman i kasem baptaes, bae oli konfemem hem i kam wan memba blong Jos mo bae hem i kasem Tabu Spirit tru long fasin blong putum han antap long hed blong man (luk long Doktrin mo Ol Kavenan 20:41; Ol Wok 19:1–6). Wan man o woman i kam wan memba blong Jos afta nomo we oli komplitim ol odinens blong baptaes mo konfemesen, mo oli rekodem long stret fasin (luk long Jon 3:5; Doktrin mo Ol Kavenan 33:11; 3 Nifae 27:20).
Blong gat ol infomesen abaot konfemesen long ol spesel situesen, luk long 38.2.8.
Bisop nao i holem ol ki blong prishud blong konfemem ol memba blong rekod we oli gat 8 yia, insaed long wod blong hem. Misin presiden i holem ol ki blong konfemem ol konvet insaed long wan misin (blong save mining blong wan baptaes blong konvet, luk long 31.2.3.2).
Bisop nao i lukluk ova long wok ia blong mekem ol konfemesen. Ol pikinini we oli gat 8 yia, oli stap konfemem olgeta long dei ia we oli kasem baptaes. Ol konvet, oli stap konfemem olgeta long eni sakramen miting insaed long wod ia we oli stap laef long hem, speseli nao long Sandei afta we oli baptaes. Be, bisop i save letem blong konfemesen i tekem ples long wan seves blong baptaes, hemia olsem wan eksepsen.
Wan memba blong bisoprik i mas folem ol gaedlaen we oli stap long 29.2.1.1 taem oli stap presentem ol niu memba.
18.8.1
Huia I Mekem Odinens
Odinens blong konfemesen, olgeta we oli holem Melkesedek Prishud nao bae oli mekem. Hem we i stap olsem voes, bisop i mas givim raet long hem from (o misin presiden i givim raet sapos wan fultaem misinari i mekem konfemesen).
Wan man we i kasem Melkesedek Prishud mo i klin inaf blong go long tempol, hem nomo i save stap olsem voes blong wan konfemesen. Be, bisop i save letem wan papa we i holem Melkesedek Prishud blong i stanap long sekol blong konfemesen blong pikinini blong hem, iven sapos papa ia i no klin inaf blong go long tempol (luk long 18.3).
I mas gat wan memba blong bisoprik we i tekpat long odinens ia. Taem ol elda we oli ol misinari oli tijim wan konvet, bisop i sapos blong invaetem tufala blong tekpat.
Blong stap olsem voes blong odinens ia, wan we i stap aotsaed long stret wod blong hem i mas soem tempol rekomen blong hem we i laef i stap i go long prisaeding lida. O hem i save soem wan Rekomen blong Mekem Wan Odinens we wan memba blong bisoprik blong hem i saenem.
18.8.2
Ol Instraksen
Anda long daereksen blong bisoprik, wan o moa long wan we i kasem Melkesedek Prishud i save tekpat long wan konfemesen. Oli putum han blong olgeta, slo nomo, antap long hed blong man o woman ia. Nao, wan i stap olsem voes:
-
Singaotem man o woman ia long ful nem blong hem.
-
I talem se odinens ia, oli mekem tru long atoriti blong Melkesedek Prishud.
-
I konfemem man o woman ia i kam wan memba blong Jos Ia blong Jisas Kraes blong Ol Lata-dei Sent.
-
I yusum ol toktok ia: “Yu kasem Tabu Spirit” (i no talem “yu kasem presen we i Tabu Spirit”).
-
I givim wan blesing olsem we Spirit i talem long hem.
-
I endem long nem blong Jisas Kraes.
18.8.3
Baptaes mo Konfemesen Rekod mo Setifiket
Bifo oli mekem intaviu blong baptaes blong wan pikinini we i memba blong rekod, klak blong wod i yusum sistem blong RLK blong mekem rere wan Fom blong Rekod blong Baptaes mo Konfemesen. Bisop o wan kaonsela we hem i givim wok ia long hem i lidim intaviu mo i saenem fom. Afta long baptaes mo konfemesen, wan klak i yusum fom ia blong apdeitem membasip rekod blong wan pikinini insaed long sistem blong RLK.
Taem wan fultaem misinari i intaviu long wan konvet we bae i baptaes, hem i fulumap fom blong Rekod blong Baptaes mo Konfemesen, mo i yusum Eria Buk Plana (EBP) ap. Afta long baptaes mo konfemesen, ol misinari oli rekodem infomesen insaed long EBP o ABP long Inglis, mo oli sendem i go long wod klak onlaen nomo. Klak blong wod i luklukbak long infomesen we i stap long RLK mo i krietem membasip rekod.
Afta we oli krietem wan membasip rekod, wan klak i rere wan Baptaes mo Konfemesen Setifiket. Setifiket ia, bisop i saenem mo i givim long man, woman o pikinini ia.
Nem long membasip rekod mo setifiket i mas stret folem bon setifiket, bon setifiket we i stap long sivil rejista, o i folem nem we i stap folem loa.
18.9
Sakramen
Ol memba blong Jos oli mit long Sabat blong wosipim God mo tekem mo kakae sakramen (luk long Doktrin mo Ol Kavenan 20:75; 59:9; Moronae 6:5–6). Long taem blong tabu odinens ia, oli tekem mo kakae bred mo wota blong tingbaot sakrifaes blong Sevya we i givim bodi mo blad blong Hem, mo blong oli riniu ol kavenan blong olgeta (luk long Matiu 26:26–28; Josef Smit Translesen, Mak 14:20–25; Luk 22:15–20; 3 Nifae 18; Moronae 6:6). Evriwan i mas stap kwaet mo revren long taem we oli blesem mo pasem sakramen.
18.9.1
Stap Givim Raet blong Blesem mo Pasem Sakramen
Bisop nao i holem ol prishud ki blong blesem mo pasem sakramen insaed long wod. Evriwan we i tekpat blong rere, blesem, mo pasem sakramen, oli mas kasem raet blong bisop o wan we i stap anda long daereksen blong hem.
Sapos ol memba blong wod blong hem oli no save go long sakramen miting from se oli mas stap long hom nomo, long wan kea senta, o hospital, nao bisop i save givim raet long sam we oli holem prishud blong oli rere, oli blesem, mo oli pasem sakramen long ol memba ia. Hem i save givim raet blong hemia i hapen iven sapos ol memba ia oli stap aotsaed long baondri blong hem blong sot taem. Be, hem i no save givim raet blong oli blesem mo pasem sakramen long ol memba we oli stap aotsaed long baondri blong wod blong hem long ol nara situesen.
I gat samfala situesen nomo, we i no hapen oltaem, we oli no save holem sakramen miting blong wan longfala taem. Long ol situesen olsem, wan bisop i save givim raet long sam we oli holem prishud, insaed long wod blong hem, blong oli rere mo blesem mo pasem sakramen long hom blong olgeta long evri Sabat dei. Ol bisop oli save givim raet long olgeta blong oli rere mo blesem mo pasem sakramen long ol memba blong wod we oli no gat man we i holem prishud insaed long hom blong olgeta.
Taem we bisop i givim raet blong oli mekem rere mo blesem mo pasem sakramen aotsaed long ol standet seves blong Jos, instraksen we i stap long 18.9.2 abaot huia i mekem odinens, bae oli stil yusum.
18.9.2
Huia I Mekem Odinens
-
Ol tija, ol pris mo olgeta we oli holem Melkesedek Prishud oli save rere long sakramen.
-
Ol pris mo olgeta we oli holem Melkesedek Prishud nao oli save blesem sakramen.
-
Ol dikon, ol tija, ol pris mo olgeta we oli holem Melkesedek Prishud oli save pasem sakramen.
Taem we i gat inaf man we i kasem Aronik Prishud, nao olgeta ia nao oli mekem olgeta diuti ia. Taem we i no gat inaf dikon blong pasem sakramen, presiden blong kworom blong ol dikon i kaonsel wetem bisop abaot huia blong invaetem blong save help. Plante taem, hem i askem ol tija mo ol pris blong help bifo oli askem ol elda mo ol hae pris.
18.9.3
Ol Gaedlaen blong Sakramen
From sakramen i wan tabu samting, ol prishud lida oli mas lukaotgud mo rere gud blong meksua se i gat oda mo respek. Ol tebol klos blong sakramen oli mas waet, klin mo oli aeanem olgeta. Oli mas kipim ol trei blong sakramen oli klin. Ol trei mo kap blong sakramen oli mas stap oda long olgeta i kam stap longtaem bifo oli yusum.
Olgeta we oli blesem mo pasem sakramen oli mas mekem hemia long wan fasin we i gat bigfala hae respek, mo oli mas stap luksave se oli stap ripresentem Lod. Bisoprik i leftemap tingting blong olgeta blong tingting hevi long Atonmen blong Sevya taem oli stap rere, blesem, mo pasem sakramen.
Olgeta we oli blesem mo pasem sakramen oli mas dresap long wan stret fasin mo oli mekem gud fes mo bodi blong olgeta, mo oli mas klin. Oli no mas werem ol klos o ol flas samting we i save pulumaot tingting long taem blong wosip mo long taem blong mekem kavenan, we hemia nao i stamba tingting blong sakramen. Sapos bisop i nid blong givim kaonsel long wan we i holem prishud long saed ia, hem i mas mekem wetem lav. Mo tu, hem i mas lukluk se man ia i strong o i no strong insaed long Jos.
Taem oli pasem sakramen, oli mekem long wan nomol fasin mo i no blokem man, i no wetem strong fes, o fes we i series tumas. Eksampol, samfala aksen (olsem blong putum lef han i gobak biaen long baksaed) o fasin blong lukluk (olsem blong dresap semsemmak), i no wan samting we i mas olsem.
Kongregesen i singsing sakramen hym taem we oli stap brekem bred. Man o woman we i singsing hemwan, o miusik we i no gat toktok, i no save tekem ples blong hym ia. I no mas gat miusik i stap plei long taem we oli stap pasem sakramen, mo i no mas gat miusik afta we oli pasem sakramen.
Sapos ol memba oli no save kakae samfala kaekae o gluten, oli save toktok wetem wan memba blong bisoprik long wanem samting blong stretem long sakramen. Olsem we i nid, bisoprik i save jenisim fasin blong pasem bred long olgeta ia.
Plante taem, oli brekem bred olsem pat blong odinens blong sakramen. Be, blong mekemsua long helt mo sefti blong wan memba we i nogud long wan kaekae, bae memba ia i save karem wan bred we hem i save kakae mo putum insaed long wan bag o kontena we i gat lid. Oli givim long wan we i holem prishud blong hem i putum long wan trei we i seperet. Bisoprik i helpem olgeta we oli pasem sakramen blong oli save wijwan memba blong pasem spesel bred ia long olgeta.
Luk long disability.ChurchofJesusChrist.org blong kasem ol gaedlaen abaot olgeta we oli no save kakae eni kaen kaekae.
I nomata we sakramen i blong ol memba blong Jos, yumi no mas stopem ol narawan blong oli tekem mo kakae sakramen.
18.9.4
Ol Instraksen
-
Olgeta we oli blesem mo pasem sakramen oli mas wasem han blong olgeta wetem sop o ol nara samting blong klinim han.
-
Bifo long miting, ol tija, ol pris o olgeta we oli holem Melkesedek Prishud oli meksua se i gat ol trei wetem bred we oli no brekem yet, ol trei wetem ol kap we oli fulap long klin wota, mo i gat klin tebol klos i stap.
-
Taem we ol memba blong wod oli stap singsing long sakramen hym, olgeta we bae oli blesem sakramen, oli stanap kwaet, oli karemaot klos we i kavremap ol trei blong bred, mo oli brekem bred long pisis we i naf long wan man i kakae.
-
Afta long hym, hem we i blesem bred i nildaon mo i talem sakramen prea blong bred (luk long Doktrin mo Ol Kavenan 20:77).
-
Bisop i mekemsua se oli talemaot ol toktok blong sakramen prea i klia, i stret evriwan, mo oli talem wetem respek. Sapos hem we i blesem sakramen i mekem wan mistek long toktok, be i stretem hemwan, bae i no nid blong talemaot prea bakegen. Sapos hem i no stretem wan mistek blong hem, bisop i talemaot se bae i ripitim prea ia i stret, long wan kaen fasin. Taem hem i askem blong talem prea bakegen, bisop i mekem hemia long wan kwaet fasin. Hem i meksua se taem hem i mekem hemia, i no mekem man i sem, o i no mekem se tingting i aot long odinens ia. Wan narawan we i stap long sakramen tebol i save help sapos i nid.
-
Afta long prea, olgeta we oli holem prishud ia, long wan fasin we i kwaet mo i gat respek, oli pasem bred i go long ol memba. Prisaeding lida i tekem bred ia faswan, mo afta long hem, i no gat wan stret oda blong man i tekem mo dring wota. Taem oli givim trei i go long ol memba, oli save pasem i go long wan nara memba.
-
Ol memba oli tekem mo kakae sakramen wetem raet han blong olgeta taem i posibol.
-
Taem we oli pasem bred finis i go long evri memba, olgeta we oli stap pasem sakramen oli tekem ol trei i gobak long sakramen tebol. Olgeta we oli mekem wok long sakramen tebol oli putum klos o kaliko ova long ol trei blong bred, mo oli karemaot kaliko long ol trei blong wota.
-
Hem we i blesem wota i nildaon mo i talem sakramen prea blong wota (luk long Doktrin mo Ol Kavenan 20:79). Hem i yusum toktok ia, wota long ples blong waen.
-
Afta long prea, olgeta we oli holem prishud ia, long wan fasin we i kwaet mo i gat respek, oli pasem wota i go long ol memba. Prisaeding lida i tekem wota ia faswan, mo afta long hem, i no gat wan stret oda blong man i tekem mo dring wota.
-
Taem we oli pasem wota finis i go long evri memba, olgeta we oli stap pasem sakramen oli tekem ol trei i gobak long sakramen tebol. Olgeta we oli mekem wok long sakramen tebol oli putum klos o kaliko ova long ol trei blong wota, mo olgeta we oli blesem mo pasem sakramen, long wan kwaet fasin we i gat respek, oli gobak long jea blong olgeta.
-
Afta long miting, olgeta we oli stap rere long sakramen oli klinap, oli foldem ol tebol klos, mo oli karemaot eni bred we oli no bin yusum.
18.10
Stap Givim o Pasem Prishud mo Stap Odenem Wan long Wan Ofis
I gat tufala ples insaed long prishud: Aronik Prishud mo Melkesedek Prishud (luk long 3.3; Doktrin mo Ol Kavenan 107:1, 6). Taem we oli pasem prishud i go long wan man, oli stap odenem hem tu i go long wan ofis insaed long prishud ia. Afta we oli pasem finis wan long tufala prishud ia long wan man, i nid nomo blong oli odenem man ia long ol nara ofis insaed long prishud ia.
Blong gat ol infomesen abaot prishud odinesen long ol spesel situesen, luk long 38.2.9.
18.10.1
Melkesedek Prishud
Stek presiden i lukluk ova long wok blong givim Melkesedek Prishud mo ol odinesen long ol ofis blong elda mo hae pris. Be, bisop nao i statem wok blong sendem ol nem blong olgeta blong kasem ol odinesen ia.
18.10.1.1
Ol Elda
Ol brata we oli klin inaf oli save kasem Melkesedek Prishud mo oli save odenem olgeta oli kam ol elda; hemia taem we oli gat 18 yia o moa. Folem ol situesen blong wanwan, bisop i faenemaot sapos oli sapos blong givim nem blong odenem wan yang man i kam wan elda stret afta long namba 18 betdei blong hem, o bae i stap yet long kworom blong ol pris blong sam moa taem. Ol situesen ia oli tekem ol defren samting ia long wan yang man:
-
Testemoni mo sapos hem i raep long tingting.
-
Graduesen long skul.
-
Wantem blong gohed wetem ol fren.
-
Go long Yunivesiti.
Taem hem i mekem desisen ia, bisop i toktok faswan wetem yang man ia mo wetem papa mo mama blong hem o olgeta. Ol man we oli klin inaf, oli sapos blong odenem olgeta i kam elda taem oli kasem 19 yia, o bifo oli aot long hom blong go long yunivesiti, go long wan fultaem misin, mekem seves long ami, o akseptem fultaem wok.
Ol man we oli jes baptaes, we oli gat 18 yia i go antap, oli odenem olgeta oli kam elda, afta we:
-
Oli kasem Aronik Prishud mo givim seves olsem ol pris.
-
Oli developem inaf andastaning long saed blong gospel.
-
Oli soem se oli klin inaf.
I no gat wan spesifik taem blong stap olsem wan memba blong Jos, bifo oli save kam elda.
18.10.1.2
Ol Hae Pris
Oli odenem ol man oli kam hae pris taem we oli singaotem olgeta long wan stek presidensi, wan hae kaonsel, o wan bisoprik. Mo tu, oli save odenem olgeta long sam nara taem olsem we stek presiden i disaed, tru long strong prea mo tru long insperesen.
18.10.1.3
Blong Mekem Ol Intaviu mo Sastenem Man
Wetem raet blong stek presidensi, bisop i intaviu ol brata folem ol instraksen we oli stap long Odinesen Rekod blong Melkesedek Prishud. Afta, wan memba blong stek presidensi tu i intaviu long hem. Wetem raet blong misin presiden, distrik presiden i save intaviu wan brata blong i kam wan elda (luk long 6.3). Blong save ol gaedlaen long saed blong ol intaviu ia, luk long 31.2.6.
Afta long intaviu, stek presidensi i askem hae kaonsel blong sastenem desisen blong odenem brata ia. Wan memba blong stek presidensi i presentem hem blong oli sastenem hem long jeneral sesen blong stek konfrens (luk long 18.10.3). Wetem raet blong misin presiden, wan distrik presiden i save presentem wan brata blong oli sastenem hem blong oli odenem hem i kam elda (luk long 6.3).
18.10.2
Aronik Prishud
Bisop i holem ol ki blong prishud blong pasem Aronik Prishud mo stap odenem man long ol ofis blong dikon, tija, mo pris. Ol brata we oli klin inaf, oli stap odenem olgeta long ol ofis ia folem ol yia ia, be i no bifo long hemia:
-
Dikon, long stat blong yia we oli kasem 12 yia
-
Tija, long stat blong yia we oli kasem 14 yia
-
Pris, long stat blong yia we oli kasem 16 yia
Bisop, o wan kaonsela we hem i givim wok ia long hem, i intaviu olgeta we bae oli odenem olgeta oli kam dikon o tija, blong faenemaot sapos oli reregud long saed blong spirit. Bisop i intaviu ol brata we bae oli odenem olgeta oli kam pris.
Bifo hem i intaviu long wan yang man blong wan prishud odinesen, Bisop i kasem raet long papa mo mama, o wan we i gat raet blong lukaot long yang man ia. I no nidim blong kasem raet blong wan papa o mama o hem we i lukaotem yangfala, we i no gat raet folem loa blong no agri long aksen ia.
Sapos brata ia, oli faenem se hem i klin inaf, tru long wan intaviu, nao wan memba blong bisoprik i presentem hem blong oli sastenem hem long wan sakramen miting (luk long 18.10.3).
Blong gat infomesen long saed blong stap odenem ol brata we oli jes baptaes, luk long 38.2.9.1.
18.10.3
Stap Presentem Wan Memba blong Oli Sastenem Hem bifo Oli Odenem Hem
Afta we oli intaviu long wan brata mo faenem se hem i klin inaf blong oli odenem hem long wan ofis blong prishud, oli presentem hem blong oli sastenem hem (luk long Doktrin mo Ol Kavenan 20:65, 67). Ol brata we bae oli odenem olgeta oli kam elda, o hae pris, wan memba blong stek presidensi i presentem hem long jeneral sesen blong stek konfrens (luk long 6.3 blong kasem ol instraksen long saed blong ol distrik presiden). Ol brata we bae oli odenem olgeta oli kam ol dikon, ol tija, o ol pris, wan memba blong bisoprik i presentem olgeta long wan sakramen miting.
Hem we i lidim sastening ia, i askem brata ia blong i stanap. Hem i anaonsem tingting blong givim Aronik o Melkesedek Prishud (sapos i nid) mo blong odenem brata ia long wan ofis blong prishud. Afta, hem i invaetem ol memba blong oli sastenem tingting ia. Eksampol. Blong presentem wan brata blong oli odenem olsem wan elda, hem i save yusum ol toktok olsem ia:
“Mifala i proposem se [nem] i kasem Melkesedek Prishud mo blong oli odenem hem i wan elda. Olgeta we oli agri, oli save soem taem oli leftemap han. [Stop smol taem.] Olgeta we oli no agri, sapos i gat, oli save soem tu. [Stop smol taem.]”
Memba ia we oli presentem hem, hem tu i mas tekpat long sastening ia. Sapos oli stap presentem moa long wan man, bae oli sastenem olgeta olsem wan grup.
Sapos wan memba we i stap gud insaed long Jos i agensem odinesen ia, prisaeding lida o wan nara prishud lida we oli givim wok ia long hem i mit wetem hem long wan praevet miting afta long miting. Lida ia i traem blong andastanem from wanem oli agensem memba ia. Hem i askem sapos memba ia i save abaot wan aksen o fasin we i save mekem se bae oli no save odenem man ia long prishud ofis ia.
Olgeta memba we oli stap gud insaed long Jos nomo oli save tekpat blong sastenem ol nara memba. Be, sapos wan memba i no stap gud insaed long Jos, o wan we i no memba i agensem aksen ia, bisop o stek presiden i save harem hem long wan praevet miting aotsaed long miting.
Long sam kes, bae i nid blong oli mas odenem wan elda o hae pris bifo oli presentem hem long stek konfrens. Taem hemia i hapen, oli presentem hem long wod sakramen miting blong hem bifo oli sastenem hem. Afta, oli presentem hem long nekis stek konfrens blong oli mekem odinesen ia i kam ofisol (mo oli stretem rod blong sastening, olsem oli putum antap ia.). Hemia i tekem tu blong givim ol memba blong stek wan janis blong sastenem o agensem aksen ia.
18.10.4
Huia I Mekem Odinens
Stek presiden o wan we i holem Melkesedek Prishud we i stap anda long daereksen blong hem i save odenem wan man i go long ofis blong elda. Wetem raet blong misin presiden, distrik presiden o wan anda long daereksen blong hem, i save mekem odinesen ia (luk long 6.3). Olgeta we oli holem Melkesedek Prishud nomo, oli save stanap long sekol ia.
Stek presiden o wan hae pris anda long daereksen blong hem, i save odenem wan man i go long ofis blong hae pris. Ol hae pris nomo oli save stanap long sekol ia.
Wan man we i odenem wan nara man long wan ofis blong Melkesedek Prishud i mas klin inaf blong go long tempol. Stek presiden o wan we hem i jusum i mas stap.
Wan pris o wan we i holem Melkesedek Prishud i save odenem wan brata long ofis blong dikon, tija, o pris. Bisop i mas givim raet long hem. Bisop o wan we hem i jusum i mas stap.
Blong tekpat long odinesen blong wan Aronik Prishud, wan man i mas stap olsem wan pris o wan we i holem Melkesedek Prishud.
Wan bisop i save letem wan papa we i wan pris o wan we i holem Melkesedek Prishud blong odenem boe blong hem long ofis blong dikon, tija, o pris iven sapos papa ia i no klin inaf evriwan blong go long tempol (luk long 18.3). Ol bisop oli leftemap tingting blong ol papa blong oli mekem olgetawan oli rere blong odenem ol stret boe blong olgeta.
Blong stap olsem voes blong odinens ia, wan we i stap aotsaed long stret wod blong hem i mas soem tempol rekomen blong hem we i laef i stap i go long prisaeding lida. O hem i save soem wan Rekomen blong Mekem Wan Odinens we wan memba blong bisoprik blong hem i saenem.
18.10.5
Ol Instraksen
Blong pasem o givim prishud mo odenem wan long wan ofis blong prishud, wan o moa long wan we i holem prishud mo oli givim raet long hem, i putum han blong olgeta slo antap long hed blong man ia. Nao, wan i stap olsem voes:
-
I singaotem man ia we bae i kasem prishud long ful nem blong hem.
-
I talem atoriti we hemwan i yusum blong mekem odinesen ia (we i Aronik Prishud o Melkesedek Prishud).
-
I givim Aronik Prishud o Melkesedek Prishud, be nomo sapos oli bin givim finis.
-
I odenem man ia long wan ofis insaed long Aronik mo Melkesedek Prishud, mo i givim ol raet, ol paoa, mo atoriti blong ofis ia. (Oli no stap givim ol prishud ki taem oli givim prishud o stap odenem wan long ol ofis ia blong prishud, be nomo taem oli odenem wan man i kam wan bisop.)
-
I givim wan blesing olsem we Spirit i talem long hem.
-
I endem long nem blong Jisas Kraes.
Blong odenem wan man i go long wan ofis insaed long prishud afta we hem i bin kasem stret prishud finis, man ia we i mekem odinesen i skipim step 3.
Wan odinesen i wan janis blong givim wan blesing. Ol ditel kaonsel mo instraksen abaot diuti blong wan, oli givim bifo o afta long odinesen. Oli no mas lukluk tumas long blesing. I no nid blong gat ol prea, ol testemoni, o instraksen taem oli odenem wan.
18.10.6
Rekod mo Setifiket blong Odinesen
Bifo oli mekem intaviu long wan man blong oli odenem hem i go long wan ofis insaed long Melkesedek Prishud, wan klak i yusum RLK blong i rere long wan Melkesedek Prishud Odinesen Rekod. Stek presiden o wan kaonsela we oli givim wok ia long hem i holem intaviu ia mo i saenem fom sapos man ia i mitim evri kondisen blong stap klin inaf.
Afta long odinesen, stek presiden o ol ripresentativ blong hem we hem i givim wok long olgeta oli komplitim fom mo oli givim i gobak long klak. Hem i rekodem odinesen insaed long RLK mo hem i mekem rere wan odinesen setifiket. Setifiket ia, stek presiden i saenem mo i givim long hem we i kasem odinesen.
Bifo oli mekem intaviu blong wan brata blong oli odenem hem i go long wan ofis insaed long Aronik Prishud, wan klak i yusum sistem blong RLK blong i rere long wan Aronik Prishud Odinesen Rekod. Bisop o wan kaonsela we oli givim wok ia long hem i holem intaviu ia mo i saenem fom sapos brata ia i mitim evri kondisen blong stap klin inaf.
Afta long odinesen, bisop o wan kaonsela we hem i givim wok ia long hem, i komplitim fom ia mo i givim i gobak long klak. Hem i rekodem odinesen insaed long RLK mo hem i mekem rere wan odinesen setifiket.
Oli yusum nem we brata ia i yusum folem loa; nem ia nao bae i stap long odinesen rekod mo setifiket.
18.11
Stap Setem Apat Ol Memba blong Givim Seves long Ol Koling
Ol memba we oli singaotem olgeta mo sastenem olgeta long ol posisen insaed long Jos, oli mas setem olgeta apat blong givim seves long posisen ia (luk long Jon 15:16; Doktrin mo Ol Kavenan 42:11; luk tu long 3.4.3.1 insaed long hanbuk ia). Long taem blong setem apat, oli givim long hem we oli singaotem (1) atoriti blong mekem wok long koling ia, mo (2) ol toktok blong blesing olsem we Spirit i talem.
Ol stek presiden, ol bisop, mo ol presiden blong kworom nomo oli kasem ol ki blong presidensi taem oli stap setem olgeta apat (luk long 3.4.1.1). Be, toktok ia, ol ki oli no mas yusum taem oli stap setem apat ol memba blong givim seves long ol nara koling, mo tu, ol koling olsem kaonsela insaed long ol presidensi.
Blong kasem moa infomesen abaot fasin blong stap singaotem, odenem mo setem apat ol bisop, luk long 30.7.
18.11.1
Huia I Stap Setem Apat
Wan we i holem Melkesedek Prishud nao i mekem ol set apat. Hem i mas kasem apruvol o raet we i kam long lida ia we i holem ol stret prishud ki. Olgeta we oli kasem raet blong mekem wan set apat, yu save faenem insaed long 30.8. Wan elda i no mas stap olsem voes, o stanap insaed long sekol taem we oli stap setem apat wan brata long wan koling we bae i nidim hem blong stap olsem wan hae pris.
Anda long daereksen blong prisaeding lida, wan o moa long wan we i kasem Melkesedek Prishud i save tekpat long wan set apat. Oli setem apat ol presiden bifo oli setem apat ol kaonsela blong olgeta.
Wan prisaeding lida i save letem wan hasban o papa we i holem Melkesedek Prishud blong i stanap insaed long sekol blong set apat blong waef o pikinini blong hem, iven sapos hem i no klin inaf evriwan blong save go long tempol (luk long 18.3).
18.11.2
Ol Instraksen
Wan o moa long wan we i holem Melkesedek Prishud i putum han blong hem slo antap long hed blong huia i kasem wok. Nao, wan i stap olsem voes:
-
Singaotem man o woman ia long ful nem blong hem.
-
I talem se hem i stap mekem wok ia wetem atoriti blong Melkesedek Prishud.
-
I setem apat man o woman ia long stret koling, insaed long stek, wod, kworom, o klas.
-
I givim ol ki sapos man ia i gat raet blong kasem olgeta.
-
I givim wan blesing olsem we Spirit i talem long hem.
-
I endem long nem blong Jisas Kraes.
Wan set apat i no mas stap olsem wan ofisol miting we i gat ol prea o ol testemoni. Mo tu, i no wan taem blong givim ol ditel instraksen. Ol instraksen, oli givim long taem blong trening, be i no pat blong blesing.
18.12
Stap Konsekretem Oel
Ol brata we oli holem Melkesedek Prishud oli mas konsekretem olif oel bifo oli yusum blong anoentem olgeta we oli sik o stap harem nogud (luk long Jemes 5:14). Oli no save yusum wan narafala oel.
Ol memba oli no sapos blong dring oel we oli konsekretem, mo tu, oli no mas yusum blong putum long ol pat blong bodi we i soa.
18.12.1
Huia I Mekem Odinens
Wan brata o moa long wan brata we oli holem Melkesedek Prishud oli save konsekretem oel. Oli no nid blong askem apruvol blong wan prishud lida.
18.12.2
Ol Instraksen
Blong konsekretem oel ia, wan we i holem Melkesedek Prishud i:
-
Holem wan kontena we i open, we insaed i gat olif oel.
-
I toktok long Papa long Heven olsem long wan prea.
-
I talem se hem i stap mekem wok ia wetem atoriti blong Melkesedek Prishud.
-
I konsekretem oel (i no kontena o botel) mo i setem oel ia apat blong anoentem mo blesem olgeta we oli sik mo olgeta we oli stap harem nogud.
-
I endem long nem blong Jisas Kraes.
18.13
Stap Givim Blesing long Olgeta we Oli Sik
Plante taem, blong blesem wan sikman, bae oli mekem taem hem we i sik i askem blesing ia, o taem ol narawan we oli wari oli askem, blong mekem se blesing ia bae i folem fet blong olgeta (luk long Jemes 5:14; Doktrin mo Ol Kavenan 24:13–14; 42:43–44, 48–52).
Blong blesem ol sikman,”tru long fasin blong putum han antap long hed blong man” i gat tu pat long hem: anoenting wetem oel, mo silim anoenting ia wetem wan blesing. Sapos i no gat oel we oli konsekretem i stap, oli save givim wan blesing tru long atoriti blong Melkesedek Prishud, mo i no gat anoenting.
Sapos wan i askem moa long wan blesing from semfala sik, bae i no nidim blong anoentem sikman wetem oel afta long fasfala blesing. Be, brata ia we i holem prishud i givim blesing taem hem i putum han blong hem antap long hed blong sikman, mo tru long atoriti blong Melkesedek Prishud. Be, oli save mekem wan nara anoenting.
Olgeta we oli holem Melkesedek Prishud we oli stap visitim ol hospital oli no mas askem sam janis blong blesem ol sikman.
18.13.1
Huia I Givim Blesing
Olgeta we oli holem Melkesedek Prishud nomo, oli save givim blesing long olgeta we oli sik, o olgeta we oli stap harem nogud. Oli no nid blong askem apruvol blong wan prishud lida. Wan papa we i holem Melkesedek Prishud i blesem ol memba blong famli blong hem we oli sik, sapos i posibol.
Plante taem, tu o moa long tu brata we oli holem Melkesedek Prishud oli givim blesing long olgeta we oli sik. Be, wan nomo i save mekem anoenting mo siling semtaem.
18.13.2
Ol Instraksen
Blong blesem ol sikman, i gat tu pat long hem: anoenting wetem oel, mo silim anoenting ia.
Anoenting ia wetem oel, wan we i holem Melkesedek Prishud nao i mekem. Hem i:
-
Putum wan drop blong oel we oli konsekretem antap long hed blong sikman.
-
Putum han blong hem slo antap long hed blong sikman, mo i talem ful nem blong sikman ia.
-
I talem se hem i stap mekem wok ia wetem atoriti blong Melkesedek Prishud.
-
Talem se hem i stap anoentem sikman ia wetem oel we oli bin konsekretem finis blong anoentem mo blesem olgeta we oli sik mo olgeta we oli stap harem nogud.
-
I endem long nem blong Jisas Kraes.
Blong silim anoenting, wan o moa long wan brata we i holem Melkesedek Prishud i putum han blong hem slo antap long hed blong sikman. Afta, hem we i silim anoenting i:
-
Singaotem man o woman ia long ful nem blong hem.
-
Talem se hem i stap silim anoenting ia tru long atoriti blong Melkesedek Prishud.
-
I givim wan blesing olsem we Spirit i talem long hem.
-
I endem long nem blong Jisas Kraes.
18.14
Ol Blesing blong Kamfot mo Kaonsel, we I Tekem Tu Blesing blong Papa
18.14.1
Huia I Givim Blesing
Olgeta we oli holem Melkesedek Prishud, oli save givim tu ol blesing blong kamfot mo kaonsel long ol nara memba blong famli, mo tu, long ol narawan we oli askem. Ol blesing ia, ol memba blong famli nao oli stap givim, wetem ol givhan brata, o ol prishud lida.
Wan papa we i holem Melkesedek Prishud, plante taem i save givim blesing blong wan papa i go long ol pikinini blong hem. Ol blesing ia, oli save help taem ol pikinini oli stap go long skul, go long misin, oli mared, mo oli go insaed long militeri seves, o taem oli fesem ol spesel jalenj. Ol papa mo mama oli leftemap tingting blong ol pikinini blong olgeta blong lukaotem blesing blong papa blong olgeta long ol taem blong nid. Oli save rekodem ol blesing blong papa blong olgeta, blong olgetawan i stap yusum.
Wan brata we i holem Melkesedek Prishud, i no nid blong askem raet long wan prishud lida blong givim wan blesing blong kamfot mo kaonsel, o blesing blong wan papa.
18.14.2
Ol Instraksen
Blong givim blesing blong papa, o wan nara blesing blong kamfot mo kaonsel, wan o moa long wan man we i kasem Melkesedek Prishud, oli putum han blong olgeta slo antap long hed blong hem we i kasem blesing. Nao, wan i stap olsem voes:
-
Singaotem man o woman ia long ful nem blong hem.
-
I talem blesing we hem i stap mekem tru long atoriti blong Melkesedek Prishud.
-
I givim ol toktok blong blesing, kamfot, mo kaonsel olsem we Spirit i talem.
-
I endem long nem blong Jisas Kraes.
18.15
Stap Dediketem Ol Hom
Ol memba blong Jos oli save mekem se oli dediketem hom blong olgeta tru long atoriti blong Melkesedek Prishud. Ol hom ia, i no nid blong wan i ona blong hem, o i nomo gat kaon long saed blong haos ia blong oli save dediketem. Hemia i no olsem ol bilding blong Jos; oli no stap konsekretem ol hom i go long Lod.
18.15.1
Huia I Mekem Dedikesen
Wan brata we i holem Melkesedek Prishud i dediketem wan hom. Sapos i no gat wan we i holem Melkesedek Prishud insaed long hom:
-
Wan famli i save invaetem wan gudfala fren blong hem, wan famli, o wan givhan brata we i holem Melkesedek Prishud blong i dediketem hom blong hem. Hem we i haos blong hem, i no nid blong askem raet long wan prishud lida.
-
Wan famli i save kam tugeta mo i givim wan prea olsem we Spirit i talem long hem. Prea ia i save tekem ol samting we oli tokbaot insaed long 18.15.2, namba 3.
18.15.2
Ol Instraksen
Blong dediketem wan hom, wan brata we i holem Melkesedek Prishud i:
-
I toktok long Papa long Heven olsem long wan prea.
-
I talem se hem i stap mekem wok ia wetem atoriti blong Melkesedek Prishud.
-
Dediketem hom se i wan tabu ples we Tabu Spirit i save stap long hem mo i givim ol nara toktok olsem we Spirit i lidim. Eksampol, hem i save blesem hom blong i stap wan ples we ol memba blong famli oli save wosip long hem, faenem sefti aot long wol ia, groap long saed blong spirit, mo rere blong gat ol famli rilesensip we oli no save finis.
-
I endem long nem blong Jisas Kraes.
18.16
Stap Dediketem Ol Gref
18.16.1
Huia I Dediketem Gref
Wan we i stap dediketem wan gref i mas holem Melkesedek Prishud, mo hem i mas gat raet long prishud lida we i lidim seves.
Sapos famli i wantem, oli save mekem nomo wan prea long saed blong gref, be i no wan dedikesen prea. Eniwan we famli i jusum i save mekem prea ia.
Blong stap olsem voes blong dediketem wan gref, wan we i stap aotsaed long wod blong hem i mas soem tempol rekomen blong hem we i laef i stap i go long prishud lida we i stap prisaed long seves ia. O hem i save soem wan Rekomen blong Mekem Wan Odinens we wan memba blong bisoprik blong hem i saenem.
18.16.2
Ol Instraksen
Blong dediketem wan gref, brata we i holem Melkesedek Prishud:
-
I toktok long Papa long Heven olsem long wan prea.
-
I talem se hem i stap mekem wok ia wetem atoriti blong Melkesedek Prishud.
-
I dediketem mo konsekretem ples we bae oli berem dedman olsem ples blong bodi blong dedman i spel long hem.
-
I prea se ples ia bae i wan tabu ples we bae oli protektem kasem taem long Laef bakegen long ded (taem we i stret).
-
I askem Papa long Heven blong givim kamfot long famli, mo i talemaot ol tingting olsem we Spirit i lidim hem.
-
I endem long nem blong Jisas Kraes.
Sapos oli bonem bodi blong wan memba blong Jos, prisaeding lida i yusum jajmen blong hem blong dediketem o no, ples ia we bae ol asis oli stap long hem. Hem i tingting long wanem we famli i wantem mo i lukluk long ol lokol kastom mo ol loa. Brata we i stap olsem wan voes i stretem ol instraksen blong stap dediketem wan gref.
18.17
Ol Petriakel Blesing
Evri memba we i klin inaf mo i baptaes, i gat raet mo i sapos blong kasem wan petriakel blesing, we i givim daereksen we i kam tru long insperesen, mo daereksen ia i kam long Papa long Heven (luk long Jenesis 48:14–16;49; 2 Nifae 4:3–11). Ol lida blong Jos, ol papa mo mama oli leftemap tingting blong ol memba blong stap rere long saed blong spirit blong oli kasem petriakel blesing blong olgeta.
Bisop, o wan kaonsela we hem i givim wok ia long hem, i intaviu long ol memba we oli wantem blong kasem petriakel blesing. Sapos wan memba i klin inaf, hem we i mekem intaviu i givim mo i saenem wan Rekomen blong Kasem Wan Petriakel Blesing. Hem i sendem hemia tru long Petriakel Blesing Sistem long ChurchofJesusChrist.org.
Hem we i givimaot Rekomen blong Kasem Petriakel Blesing ia, i meksua se memba ia, i save gud gospel blong hem i andastanem bigfala mining blong blesing ia, mo save se blesing ia i tabu tumas. Bae i gud tumas se memba ia i yangfala inaf blong mekem se i help long plante impoten desisen long laef, we i stap long fored yet; Be, oli stap leftemap tingting blong ol nara adalt we oli bigwan finis blong oli kasem petriakel blesing blong olgeta. Ol prishud lida oli no mas putum wan minimom yia blong wan memba i kasem wan petriakel blesing.
Wan niu konvet i mas andastanem gud ol besik doktrin blong gospel bifo hem i kasem wan petriakel blesing.
Blong gat infomesen abaot ol petriakel blesing long ol spesel situesen, luk long 38.2.10.
18.17.1
Stap Kasem Wan Petriakel Blesing
Afta we hem i kasem wan rekomen, memba i kontaktem petriak blong setemap wan apoenmen blong kasem wan petriakel blesing. Long dei blong apoenmen, memba ia i mas go long petriak wetem wan fasin blong gat prea long hat blong hem, mo i dresap long ol Sandei klos. Ol memba oli save livim kaekae, be i no nid blong livim kaekae.
Wanwan petriakel blesing i tabu, i konfidensiol, mo i blong wanwan man o woman. From hemia, oli givim long wan praevet ples, mo i save gat wan smol namba blong memba blong famli nomo i stap.
Hem we i kasem wan petriakel blesing i mas holemtaet ol toktok blong hem, i tingting hevi long ol toktok ia, mo i mas laef klin inaf blong kasem ol promes blesing long laef ia mo long taem we i no save finis.
Ol memba blong Jos oli no mas komperem ol blesing blong olgeta, mo oli no sapos blong serem olgeta, be wetem ol stret memba blong famli nomo. Oli no mas ridim ol petriakel blesing insaed long ol miting blong Jos o long ol nara pablik ples we man i kam tugeta.
Sapos, insaed long wan petriakel blesing, i no gat wan toktok we i talem laen we wan i kamaot long hem, petriak i save talem hemia long wan nara taem we oli ademap long blesing.
18.17.2
Kasem Ol Kopi blong Ol Petriakel Blesing
Wan we i bin kasem wan petriakel blesing i mas lukaotgud blong holemtaet wan kopi we oli printim taem hem i kasem blesing ia. Be, sapos kopi ia i lus o i kam nogud, wan i save askem wan niuwan. Hem i save mekem rikwes ia long Ol Petriakel Blesing long ChurchofJesusChrist.org. Sapos hemia i no posibol, hem i save toktok wetem bisop blong hem blong kasem sam help.
18.17.3
Moa Infomesen
Blong kasem moa infomesen abaot ol petriakel blesing, luk long 38.2.10 mo “Ol Petriakel Blesing.”
18.18
Ol Tempol Endaomen mo Siling
Blong gat moa infomesen long saed blong ol odinens blong tempol endaomen mo tempol siling, luk long japta 27.
18.19
Jat blong Ol Odinesen
|
Ofis |
Hu I Sendem Nem |
Hu I Apruvum |
Hu I Sastenem |
Hu I Intaviu mo Odenem |
|---|---|---|---|---|
Ofis Petriak | Hu I Sendem Nem Stek presidensi | Hu I Apruvum Kworom blong Olgeta Twelef Aposol | Hu I Sastenem Ol memba insaed long stek konfrens | Hu I Intaviu mo Odenem Stek presiden, afta we hem i kasem raet we i kam long Kworom blong Olgeta Twelef Aposol; o wan memba blong Fas Presidensi, o blong Kworom blong Olgeta Twelef Aposol |
Ofis Hae pris | Hu I Sendem Nem Bisop mo stek presidensi | Hu I Apruvum Stek presidensi mo hae kaonsel | Hu I Sastenem Ol memba insaed long stek konfrens | Hu I Intaviu mo Odenem Bisop i intaviu, mo stek presiden o wan kaonsela we hem i givim wok long hem i intaviu; oli odenem anda long daereksen blong stek presiden |
Ofis Elda | Hu I Sendem Nem Bisop | Hu I Apruvum Stek presidensi mo hae kaonsel | Hu I Sastenem Ol memba insaed long stek konfrens o distrik konfrens | Hu I Intaviu mo Odenem Bisop i intaviu, mo stek presiden o wan kaonsela we hem i givim wok long hem i intaviu (insaed long wan distrik, wan memba blong misin presidensi, o distrik presiden i intaviu sapos i kasem wok ia (luk long 6.3) Oli odenem anda long daereksen blong stek presiden (long wan distrik, hem i anda long daereksen blong misin presiden, o distrik presiden sapos hem i kasem wok ia) |
Ofis Bisop | Hu I Sendem Nem Stek presidensi, i yusum RLK | Hu I Apruvum Fas Presidensi mo Kworom blong Olgeta Twelef Aposol | Hu I Sastenem Ol Memba long sakramen miting | Hu I Intaviu mo Odenem Stek presiden afta we hem i kasem apruvol we i kam long Fas Presidensi (luk long 30.7). |
Ofis Pris | Hu I Sendem Nem Bisop | Hu I Apruvum Bisoprik | Hu I Sastenem Ol Memba long sakramen miting | Hu I Intaviu mo Odenem Bisop i intaviu; oli odenem anda long daereksen blong bisop |
Ofis Tija o dikon | Hu I Sendem Nem Bisop | Hu I Apruvum Bisoprik | Hu I Sastenem Ol Memba long sakramen miting | Hu I Intaviu mo Odenem Bisop i intaviu, o wan kaonsela we hem i givim wok long hem i intaviu; oli odenem olgeta anda long daereksen blong bisop |