« 1. Te fa’anahora’a a te Atua ’e tā ’outou ’ohipa i roto i te ’ohipa nō te fa’aorara’a ’e te fa’ateiteira’a », Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei (2020).

« 1. Te ’ohipa nō te fa’aorara’a ’e te fa’ateiteira’a », Buka arata’i rahi.

Te fa’anahora’a a te Atua ’e tā ’outou ’ohipa i roto i te ’ohipa nō te fa’aorara’a ’e te fa’ateiteira’a

1.0

’Ōmuara’a

’Ua pi’ihia ’outou nō te tāvini i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei. Māuruuru nō tā ’outou tāvinira’a. E ha’amaita’i ’outou i te mau orara’a ’e e fāri’i ho’i i te ’itera’a ’a tāvini ai ’outou ma te ha’apa’o maita’i.

E tauturu teie buka arata’i ia ’outou ’ia ha’api’i mai i te mau parau tumu o te ’ohipa tāvinira’a mai te Mesia te huru, ’e ’ia hāro’aro’a i tā ’outou mau hōpoi’a. E maita’i atu tā ’outou ’ohipa mai te mea e fa’atū’ati ’outou i tā ’outou ’ohipa tāvinira’a i roto i te ’Ēkālesia i ni’a i te ’ohipa a te Atua te Metua ’e tāna tamaiti ’o Iesu Mesia. E tauturu teie pene ia ’outou ’ia roa’a te hō’ē ’itera’a i :

Te fa’anahora’a nō te ’oa’oa a te Atua.
Te ’ohipa nō te fa’aorara’a ’e te fa’ateiteira’a.
Te fā a Te ’Ēkālesia a Iesu Mesia i te Feiā Mo’a i te mau Mahana Hope’a nei

1.1

Te fa’anahora’a nō te ’oa’oa a te Atua

’Ua hōro’a mai te Metua i te ao ra i te fa’anahora’a nō te ’oa’oa ’ia ti’a ia tātou ’ia fāna’o i te tā’āto’ara’a o tāna mau ha’amaita’ira’a. Tāna ohipa ’e tōna hanahana « ’ia fa’atupu i te tāhuti ’ore ’e te ora mure ’ore o te ta’ata nei » (Mose 1:39). Te tāhuti ’ore ’o te orara’a ïa e a muri noa atu ma te hō’ē tino tāhuti tei ti’afa’ahou. Te ora mure ’ore ’aore rā te fa’ateiteira’a ’o te rirora’a ïa mai te Atua te huru ’e ’ia ora ’ei ’utuāfare i mua i tōna aro e a muri noa atu.

E’ita e roa’a ia tātou te tāhuti ’ore ’e te ora mure ’ore ’aita ana’e te tauturu a te Atua. I roto i teie orara’a, e hara tātou ’e e pohe ho’i, e nā te reira e fa’ata’a ’ē ia tātou i te Metua i te ao ra, ’e e tāpe’a tātou ’eiaha ’ia riro mai iāna te huru.

’O Iesu Mesia te pū ’o te fa’anahora’a a te Atua. Maoti te here fāito ’ore o te Metua i te ao ra ia tātou, ’ua tono mai ’oia i tāna Tamaiti nō te fa’aora ia tātou i te hara ’e i te pohe nā roto i tāna tusia tāra’ehara (hi’o Ioane 3:16). Nā roto i tāna tāra’ehara, ’ua ha’apāpū mai Iesu Mesia ē, e ti’afa’ahou tātou tāta’itahi tei fānauhia i ni’a i te fenua nei, ’e e fāri’i ho’i i te tāhuti ’ore. Nā roto ato’a i tāna tāra’ehara, e ti’a ia tātou ’ia tāmāhia i te hara ’e ’ia tauihia tō tātou ’ā’au, ’ia ti’a ho’i ia tātou ’ia fāri’i i te ora mure ’ore ’e i te ’īra’a o te ’oa’oa.

Nō te fāri’i i te ora mure ’ore, tītauhia ia tātou ’ia « haere mai i te Mesia ’e ’ia maita’i roa ’outou iāna » (Moroni 10:32). Nō te mau ta’ata ato’a teie anira’a, tei ora na, ’aore rā, ’o tē ora a muri a’e i ni’a i te fenua nei. Tē hina’aro nei te Metua i te ao ra ’ia mā’iti tāna mau tamari’i ato’a ’ia ho’i i pīha’i iho iāna.

1.2

Te ’ohipa nō te fa’aorara’a ’e te fa’ateiteira’a

’A haere mai ai tātou i te Mesia ra ’e e tauturu ho’i ia vetahi ’ē ’ia nā reira ato’a, tē ’āmui ra ïa tātou i roto i te ’ohipa nō te fa’aorara’a ’e te fa’ateiteira’a a te Atua. E piti nā fa’auera’a rahi e arata’i nei i teie ’ohipa : te here i te Atua ’e te here i tō tātou ta’ata tupu (hi’o Mataio 22:37-39) E fa’a’ite tātou i tō tātou here i te Atua ’ia ha’apa’o ana’e tātou i tāna mau fa’auera’a ’e ’ia tāvini ana‘e tātou i tāna mau tamari’i (hi’o Ioane 14:15).

Tē fa’atumu nei te ’ohipa nō te fa’aorara’a ’e te fa’ateiteira’a i ni’a e maha hōpoi’a hanahana i fa’ata’ahia. ’Ua fa’a’itehia te reira i raro nei.

E tauturu teie buka arata’i ’ia ’outou ’ia hāro’aro’a i teie nā maha huru ’ohipa a te Atua. E arata’i te Vārua Maita’i ia ’outou mai te mea e rave ’outou i tā ’outou tuha’a nō te fa’aotira’a i te reira (hi’o 2 Nephi 32:5).

1.2.1

Te orara’a i te ’evanelia a Iesu Mesia

Teie te mau mea i roto i te orara’a i te ’evanelia a Iesu Mesia :

Te fa’a’ohipara’a i te fa’aro’o i te Mesia, te tātarahapara’a i te mau mahana ato’a, te ravera’a i te mau fafaura’a ’e te Atua ’a fāri’i ai tātou i te mau ’ōro’a nō te fa’aorara’a ’e te fa’ateiteira’a, ’e te rohi-tāmau-ra’a e tae noa atu i te hope’a nā roto i te ha’apa’ora’a i te reira mau fafaura’a (hi’o 3.5.1).
Te ha’api’ira’a mai ’e te ha’api’ira’a atu i te ’evanelia a Iesu Mesia i te fare ’e i te fare purera’a.
Te fa’arava’ira’a iāna iho nā roto i te ’imira’a i te maita’i nō tātou iho ’e nō tō tātou ’utuāfare, i te pae vārua ’e i te pae tino.

1.2.2

Te ha’apa’ora’a i te feiā nava’i ’ore

Teie te mau mea i roto i te ha’apa’ora’a i te feiā nava’i ’ore :

Te tāvinira’a ’e te aupurura’a i te ta’ata hō’ē, te ’utuāfare, ’e te huira’atira.
Te ’ōperera’a i te mau rāve’a tauturu, tae noa atu i te tauturu a te ’Ēkālesia, nō te feiā nava’i ’ore.
Te tauturura’a ia vetahi ’ē ’ia rava’i rātou ia rātou iho.

1.2.3

Te anira’a i te mau ta’ata ato’a ’ia fāri’i i te ’evanelia

Teie te mau mea i roto i te anira’a i te mau ta’ata ato’a ’ia fāri’i i te ’evanelia :

Te ’āmuira’a mai i roto i te ’ohipa misiōnare ’e te tāvinira’a ’ei misiōnare.
Te tauturura’a i te mau melo ’āpī ’e te mau melo e ho’i mai nei i te ’Ēkālesia ’ia haere i mua i ni’a i te ’ē’a nō te fafaura’a.

1.2.4

Te tāhō’ēra’a i te mau ’utuāfare nō te tau a muri atu

Teie te mau mea i roto i te tāhō’ēra’a i te mau ’utuāfare nō te tau a muri atu :

Te ravera’a i te mau fafaura’a ’a fāri’i ai tātou i tō tātou iho mau ’ōro’a nō te hiero.
Te ’imira’a i tō tātou mau tupuna i pohe ’e te ravera’a i te mau ’ōro’a nō rātou i roto i te hiero ’ia nehenehe ho’i ia rātou ’ia rave i te mau fafaura’a i mua i te Atua.
Te haere-tāmau-ra’a i te hiero, i te vāhi e nehenehe, nō te ha’amori i te Atua ’e nō te rave i te mau ’ōro’a nō tāna mau tamari’i.

1.3

Te fā a te ’Ēkālesia

’Ua fa’ati’a Iesu Mesia i tāna ’Ēkālesia ’ia ti’a i te ta’ata ’e te mau ’utuāfare ’ia rave i te ’ohipa nō te fa’aorara’a ’e te fa’ateiteira’a (hi’o Ephesia 4:11–13 ; hi’o ato’a tuha’a 2.2). Nō te tauturu ’ia fa’aoti i teie fā hanahana, ’ua hōro’a mai te ’Ēkālesia ’e tōna feiā fa’atere i :

Te ha’amanara’a ’e te mau tāviri o te autahu’ara’a.
Te mau fafaura’a ’e te mau ’ōro’a.
Te arata’ira’a a te peropheta.
Te mau pāpa’ira’a mo’a
Te pāturura’a nō te ha’api’i mai ’e nō te ha’api’i atu i te ’evanelia.
Te mau rāve’a nō te tāvinira’a ’e te fa’aterera’a.
Te autahira’a o te feiā mo’a.

1.3.1

Te ha’amanara’a ’e te mau tāviri o te autahu’ara’a

Nā roto i te autahu’ara’a, e fa’aoti te Atua i te ’ohipa nō te fa’aorara’a ’e te fa’ateiteira’a. Te ha’amanara’a ’e te mau tāviri o te autahu’ara’a i tītauhia nō te fa’atere i te ’ohipa a te Atua i ni’a i te fenua nei, ’ua fa’aho’ihia mai ïa e te peropheta Iosepha Semita (hi’o Te Ha’api’ira’a Tumu ’e te mau Fafaura’a 110:11–16 ; 112:30 ; hi’o ato’a 3.1). Te mau nei te feiā fa’atere o te ’Ēkālesia i te reira mau tāviri i teie mahana. E pi’i rātou ’e e fa’ati’a ho’i ia vetahi ’ē ’ia tauturu i roto i te ’ohipa a te Atua (hi’o Te Ha’api’ira’a Tumu ’e te mau Fafaura’a 107:8, 65–67).

1.3.2

Te mau fafaura’a ’e te mau ’ōro’a

I roto i te fa’anahora’a a te Metua i te ao ra, e rave tātou i te mau fafaura’a ’a fāri’i ai tātou i te mau ’ōro’a nō te fa’aorara’a ’e te fa’ateiteira’a, mai te bāpetizora’a (hi’o Ioane 3:5 ; hi’o ato’a pene 18). E mea tītauhia teie mau fafaura’a ’e teie mau ’ōro’a nō tātou nō te riro hau atu mai te Atua te huru ’e nō te ho’i e pārahi i pīha’i iho iāna (hi’o Te Ha’api’ira’a Tumu ’e te mau Fafaura’a 84:19–22).

1.3.3

Arata’ira’a a te peropheta

Nā roto i tāna mau peropheta mā’itihia, e heheu mai te Atua i te parau mau ’e e hōro’a mai i te arata’ira’a ’e te mau fa’a’arara’a fa’auruhia (hi’o Amosa 3:7 ; Te Ha’api’ira’a Tumu ’e te mau Fafaura’a 1:4). E tauturu teie mau arata’ira’a ia tātou ’ia tomo ’e ’ia vai noa i te ni’a i te ’ē’a e tae atu ai i te ora mure ’ore.

1.3.4

Te mau pāpa’ira’a mo’a

I raro a’e i te arata’ira’a a te mau peropheta ’e te mau ’āpōsetolo a te Fatu, e hōro’a mai te ’Ēkālesia ’e e fa’aherehere ho’i i te parau a te Atua mai te ’itehia i roto i te mau pāpa’ira’a mo’a. E fa’a’ite pāpū teie mau pāpa’ira’a mo’a nō te Mesia, e ha’api’i i tāna ’evanelia, ’e e tauturu ia tātou ’ia fa’a’ohipa i te fa’aro’o iāna (hi’o Iakoba 7:10–11 ; Helamana 15:7).

1.3.5

Te pāturura’a nō te ha’api’i mai ’e nō te ha’api’i atu i te ’evanelia

E pāturu te ’Ēkālesia i te ta’ata hō’ē ’e i te mau ’utuāfare i roto i tā rātou hōpoi’a ’ia ha’api’i mai i te mau parau mau o te ’evanelia ’e ’ia ha’api’i atu i te reira mau parau mau i te mau melo o te ’utuāfare ’e ia vetahi ’ē (hi’o Te Ha’api’ira’a Tumu ’e te mau Fafaura’a 88:77–78, 118 ; hi’o ato’a 2.2.3).

1.3.6

Te mau rāve’a tāvinira’a ’e te fa’aterera’a

Nā roto i te mau pi’ira’a ’e te mau fa’auera’a ’ohipa i roto i te ’Ēkālesia, e hōro’a mai te Atua i te mau melo i te mau rāve’a nō te tāvini ’e nō te fa’atere. E hōro’a mai te ’Ēkālesia i te fa’anahora’a nō te tauturu i te ha’apa’ora’a i te mau melo nava’i ’ore ’e nō te tauturu ia vetahi ’ē (hi’o Mosia 18:27–29).

1.3.7

Te autahira’a o te feiā mo’a

’Ei autahira’a o te feiā mo’a, e putuputu tāmau te mau melo o te ’Ēkālesia nō te ha’amori i te Atua ’e nō te ha’amana’o i te Fa’aora nā roto i te ravera’a i te ’ōro’a mo’a (hi’o Moroni 6:4–6 ; Te Ha’api’ira’a Tumu ’e te mau Fafaura’a 20:77). E ha’apa’o ato’a te mau melo ’e e aupuru ho’i i te tahi ’e te tahi (hi’o Ephesia 2:19).

1.4

Ta ’outou ’ohipa i roto i te ’ohipa a te Atua

’Ei ta’ata fa’atere i roto i te ’Ēkālesia, ’ua pi’ihia ’outou nō te ha’api’i ’e nō te pāturu i te feiā tā ’outou e tāvini, ’a ’āmui mai ai rātou i roto i te ’ohipa nō te fa’aorara’a ’e te fa’ateiteira’a (hi’o 1.2). E hōpoi’a nā ’outou ’ia rave fa’aoti i tō ’outou pi’ira’a ’e ’ia « ha’api’i… i te parau a te Atua ma te itoito mau » (Iakoba 1:19). Te ravera’a i te ’ohipa ’e te Fatu i roto i tāna ’ō vine, e hōro’a mai te reira i te ’oa’oa rahi ia outou (hi’o Iakoba 5:70–72).

Te roa’ara’a te hāro’aro’ara’a pāpū nō te ’ohipa a te Atua, i te mea tāna i ani mai ia ’outou ’ia rave, ’e i te fā o tāna ’Ēkālesia, e tauturu te reira ia ’outou ’ia rōtahi i ni’a i tā ’outou mau tauto’ora’a nō te arata’i mai i te mau vārua i te Mesia ra. Te tāpe’ara’a i teie ’itera’a i roto i tō ’outou ferurira’a, e fa’atū’ati te reira ia ’outou i te Fa’aora ra, ’e e arata’i i te mau mea ato’a tā ’outou e rave ’ei ta’ata fa’atere i roto i te ’Ēkālesia.

Hi’o pinepine i te mau parau tumu i roto i teie pene. Nā roto i te pure, ’a ’imi ’ia ’ite e nāhea e nehenehe ai ia ’outou ’ia tauturu i te fa’atupura’a i te mau fā a te Atua i roto i te orara’a o te feiā tā ’outou e tāvini nei. E arata’i te Atua ia ’outou nā roto i te mau muhumuhu o te Vārua Maita’i.