15.

Eb’ li seminario ut instituto

15.0

Xtikibʼankil

Li molam re Seminarios ut Institutos (S&I) naxtenq’aheb’ li na’b’ej yuwa’b’ej ut eb’ laj jolominel sa’ li Iglees chixtenq’ankileb’ li saaj, li toj wankeb’ sa’ rochocheb’ ut li ak xe’el sa’ rochocheb’, chixnimob’resinkil lix paab’aaleb’ chirix li Jesukristo ut lix evangelio li k’ojob’anb’il wi’chik.

Choq’ re li junjunq chi oqech, wan jun aj k’anjenel re S&I li k’eeb’il xtaqlankil re xtenq’ankileb’ laj jolominel chixk’anjelankileb’ li k’anjel re S&I.

15.1

Li seminario

Li seminario a’an jun tzoleb’aal li na’ux chiru kaahib’ chihab’, b’ar wi’ eb’ li saaj neke’xtzol lix evangelio li Jesukristo jo’ natawman sa’eb’ li loq’laj hu ut sa’ li raatineb’ li yo’yookil profeet. Neke’wulak sa’ li seminario li saaj li 14–18 chihab’ xyu’ameb’.

Li obiispil, eb’ laj jolominel reheb’ li saaj, ut eb’ li awa’b’ejil reheb’ li molam ut li tzoleb’aal neke’xwaklesi xch’ool li junjunq chi saaj re taatz’aqonq sa’ li seminario.

15.1.1

Eb’ laj k’utunel

Tento naq eb’ laj k’utunel re seminario a’anaqeb’ komon sa’ li Iglees li wankeb’ xpaab’aal chirix li Qaawa’ Jesukristo ut xnawomeb’ xch’ool chirix lix evangelio li k’ojob’anb’il wi’chik. Tento naq te’xyu’ami li na’leb’ li yookeb’ chixk’utb’al, ut naq te’k’utuq chi us ut te’wanq sa’ chaab’ilal rik’ineb’ li saaj. Wi naru, us naq eb’ laj k’utunel taawanq lix recomendacion re li santil ochoch.

Jun komon sa’ li awa’b’ejil re oqech malaj jun komon re li taqenaqil ch’utam li k’eeb’il xtaqlankil naxb’oqeb’, naxxaqab’eb’ sa’ xk’anjel, ut naxk’e xraqik xk’anjel li ani te’k’anjelaq choq’ aj k’utunel re seminario jo’ ajwi’ laj k’amol b’e re seminario sa’ li oqech.

Re xkolb’aleb’ rix laj k’utunel ut eb’ li saaj li yookeb’ chi tzolok, aajel ru naq te’wanq wiib’ li komon ak ninqeb’ sa’ li ch’utleb’aal malaj sa’ li ochoch li yoo wi’ chi uxk li tzolok sa’ seminario.

15.1.2

Chan ru naru na’ux li tzoleb’aal

Mas us wi’chik wi eb’ li komon re li seminario naru neke’ch’utla rik’in laj k’utunel wulaj wulaj chiru li xamaan. Wan naq a’in ink’a’ naru xb’aan li xiwxiwil, xnajtil li b’eek, ut xkomoneb’ chik li na’leb’.

Eb’ laj jolominel re li Iglees neke’xk’uub’ xna’leb’ rik’in laj k’anjenel re S&I re xsik’b’al k’a’ru taab’aanumanq, re:

• Xtenq’ankileb’ li tzolom chixtzolb’al li evangelio ut chi nimank sa’ musiq’ej.

• Xkolb’aleb’ rix li tzolom.

• Naq ink’a’ taach’a’ajko’q chiruheb’ li junkab’al chi maak’a’ rajb’al.

Ink’a’ naru neke’wan li tzoleb’aal sa’ li domingo.

15.1.3

Eb’ li na’ajej, li k’anjeleb’aal, ut li hu

Eb’ laj jolominel re oqech ut teep neke’xk’e reetal naq taawanq jun na’ajej choq’ reheb’ li tzoleb’aal re seminario, jo’ jun ch’utleb’aal malaj rochoch jun komon.

Laj k’anjenel re S&I naxk’eheb’ li k’anjeleb’aal choq’ reheb’ laj k’utunel ut li komon sa’ li junjunq chi tzoleb’aal. Tento naq eb’ li tzolom te’xk’ameb’ chaq li loq’laj hu, chi huhil malaj sa’ kok’ ch’iich’.

15.1.5

Li credito ut li graduacion

Eb’ li tzolom sa’ li seminario mas wi’chik neke’tzolok ut neke’jale’ xch’ool wi neke’wulak ut neke’tz’aqon rajlal sa’ li tzoleb’aal, ut wi neke’xtzoleb’ li loq’laj hu naq moko wankeb’ ta sa’ li tzoleb’aal. Naq neke’xb’aanu li k’a’aq re ru a’in, naru neke’xk’ul li credito re seminario rajlal chihab’, ut naru neke’wulak toj sa’ xraqik li seminario.

Re wulak toj sa’ xraqik li seminario, tento naq jun tzolom tixk’ul li credito chiru kaahib’ chihab’, ut naq taak’ulub’aaq xb’aan jun komon sa’ lix obiispil.

15.2

Li instituto

Sa’ li instituto wankeb’ li tzoleb’aal chirix li evangelio chiru li xamaan, re xkawob’resinkil li paab’aal ut li xnawom ch’oolej chirix li Jesukristo ut chirix lix evangelio li k’ojob’anb’il wi’chik. Chixjunileb’ li saaj komon li maji’ neke’sumla ut 18–30 xchihab’eb’ aajel ru naq te’waklesiiq xch’ool chi wulak sa’eb’ li tzoleb’aal re instituto, maak’a’ naxye ma wankeb’ sa’ jun nimla tzoleb’aal malaj ink’a’.

15.3

Eb’ li ninqi tzoleb’aal re li Iglees ut li Sistema Educativo de la Iglesia

Re xtawb’al li na’leb’ chirixeb’ li tzoleb’aal primaria ut secundario re li Iglees, BYU–Pathway Worldwide, ut eb’ li universidad, chi’ilmanq CES.ChurchofJesusChrist.org. Natawman ajwi’ aran chan ru xb’aanunkil li k’ulub’ank rik’ineb’ laj jolominel choq’ reheb’ li ani te’raj ok sa’eb’ li ninqi tzoleb’aal a’in.

Jo’kan ajwi’, natawman li na’leb’ chirix li k’ulub’ank re trab’ajik sa’eb’ li ninqi tzoleb’aal a’an li k’eeb’il xb’aan CES Ecclesiastical Clearance Office sa’ help.ChurchofJesusChrist.org.