Pedped ko Raorōk ilo Katakin im Ekkatak Ko̧jpeļ eo

Kōttōpar ko an Jemenere ko im Institute ko an Kabun̄

Kōttōpar eo ad ej n̄an jipan̄ jodikdik ro im rūm̧m̧an ded ro meļeļe im pedped wōt ioon katak ko im Pinmuur eo an Jisōs Kraist, karbab n̄an kōjeram̧m̧an ko an tampeļ, im kōpooj er make, baam̧le ko aer, im ro jet n̄an mour indeeo ippān Jemāer ilo Lan̄.

Katakin

1. Jej katakin rijikuuļ ro katak ko im pedped ko an ko̧jpeļ eo āinwōt aer waļo̧k ilo jeje ko rekwojarjar im naan ko an rikanaan ro.

2. Katak kein im pedped kein rej katakin ilo juon wāween eo me ej leļo̧k meļeļe im m̧ōņōņō.

3. Jej jipan̄ rijikuuļ ro kakūrm̧ool eddo eo aer ilo jerbal in ekkatak im kōpooj er n̄an katakin ko̧jpeļ eo n̄an ro jet.

N̄an jipan̄ bōk jibadbad in katakin ko an kōttōpar in, rūkaki ro im rijikuuļ ro ilo jemenere im institute an kabun̄ in rej lukkuun rōjan̄ n̄an kōjerbal Pedped ko Raorōk ilo Katakin im Ekkatak Ko̧jpeļ eo.

Rūkaki im rijikuuļ ro rej aikuj in—

• Katakin im ekkatak jen Jetōb eo.

• Ejaake juon mejatoto in ekkatak ilo iakwe, kautiej, im kōttōpar.

• Katak jeje ko rekwojarjar aolep iien, im riiti peba eo n̄an kooj eo.

• Meļeļe peļaakin im meļeļe eo an eoon ko im naan ko an rikanaan ro.

• Kakkileni, meļeļe, en̄jake m̧ool im aorōk eo an, im kōjerbal katak ko im pedped ko an ko̧jpeļ eo.

• Kōmeļeļeiki, kwaļo̧k, im kam̧ool kōn katak ko im pedped ko an ko̧jpeļ eo.

• Tijem̧ļo̧k kōn eoon ko raorōk im Katak ko rej Pedped ko Im̧aantata.

Pedped kein, kamālmel, im waļo̧k ko rej ekkejel. Eļan̄n̄e ejejjet kōjerbali im rainōm̧m̧an ippān kajjojo, pedped kein raorōk rej leto letak n̄an maron̄ eo an rijikuuļ ro n̄an meļeļe eoon ko im katak ko im pedped ko ilowaer. Pedped kein raorōk rej barāinwōt rōjan̄ rijikuuļ ro n̄an bōk juon eddo ilo aer ekkatak ko̧jpeļ eo im ej kōļapļo̧k maron̄ eo an rijikuuļ eo n̄an mour kōn ko̧jpeļ eo im n̄an katakin ro jet kake.

© 2010, 2012 jen Intellectual Reserve, Inc. Aolep Jim̧we rej pād ippān. Kōmālim ilo kajin Pālle: 3/12. Kōmālim an ukook: 3/12. Ukook eo an Fundamentals of Gospel Teaching and Learning. Marshallese. PD50021993 874