Kajjitōk ko Emakijkij Kajjitōk Kaki: Oktoba 6, 2018

Juon jekjek ekāāl ikōtaan kōmeļeļe ko an gospel eo ilo m̧weeo im ilo Kabun̄ eo

Ko̧o̧njeļ eo an Būreejtōnji eo Kein Kajuon im Doulul eo an Jon̄oulruo Rijilōk ro raar kōmālim juon bun̄ten eo eaorōk kōn juon jekjek ekāāl ikōtaan kōmeļeļe ko an gospel eo ilo m̧weeo im ilo Kabun̄ eo. Jibadbad ko im kōjeraam̧m̧an ko rej pād ilo okoktak in im oktak ko jet im̧aanļo̧k ekoba kein rej ellaajrak:

Kam̧wilaļļok oktakļo̧k eo n̄an Jemedwōj Ilan̄ im Irooj Jisōs Kraist im kōkajoorļo̧k tōmak ilo Er.
Kōkajoorļo̧k kajjojo armej im baam̧ļe ko kōn laajrak in kein katakin eo rie an pedped ilo m̧weo, Kabun̄ eo me ej kōketak n̄an mour lan̄lōn̄ kōn gospel eo.
Kautiej raan in Jabōt, kōn juon ellowetak ilo kain̄i eo an kwojkwoj eo.
Jipan̄ aolep ajri ro nejin Jemedwōj Ilan̄ ilo jim̧or turejet ko an rōn̄ōl eo kōn jerbal in mijenede im bōk kain̄i ko im bujen ko im kōjeraam̧m̧an ko an tampeļ eo.

Jinoe jān Jānwōde 2019, jikejuuļ eo an Jabōt naaj ļoore ilo aolepen Kabun̄ in naaj kobaik 60-minit in kweilo̧k in kwojkwoj kajjojo Jabōt, im ālkin 10-minit diwōjļo̧k, im 50-minit kūlaaj.

Jabōt Jikejuuļ Jinoe Jānwōde 2019
60 minit	Kweilo̧k in kwojkwoj
10 minit	Diwōjļo̧k n̄an kūlaaj ko
50 minit	Kūlaaj ko n̄an rūtto ro	Kūlaaj ko n̄an jodikdik ro	Būraimere

50 minit in kūlaaj n̄an jodikdik im rūm̧m̧an ded ro enaaj bōk jikin kajjojo Jabōt ekkar n̄an jikejuuļ in ilaļ:

Jabōt juon im jilu: Jabōt Jikuuļ.
Jabōt ruo im emān: Doulul ko an priesthood, Doulul eo an Kōrā ro, im Doulul eo an Jiron̄ ro.
Jabōt ļalem: kweilo̧k ko an jodikdik im rūm̧m̧an ded ro enaaj ium̧win tōl eo an bisop eo. Bisop eo ej kāleti unin katak eo n̄an kwaļo̧ke, rūkaki ak rikatak ro (ekkā ro uwaan ward ak stake), im men̄e jodikdik ak rūm̧m̧an ded ro, likao im jiron̄ ro, likao im jiron̄ ro remaron̄ jenoļo̧k ak ippān doon.

Būraimere enaaj kōm̧m̧an kajjojo Jabōt ium̧win 50 minit im ekoba iien al im kūlaaj.

Oktak in Jikejuuuļ eo an Jabōt ekōm̧m̧an bwe, membōr ren kōm̧m̧ane, nokon in jota im n̄an ekkatak jen gospel eo ilo m̧weeo ilo Jabōt—ak iien ko jet āinwōt kālet jen kajjojo im baam̧le ko. Juon m̧akūtkūt in jota an baam̧ļe maron̄ kōm̧m̧an ilo Jabōt ak ilo iien ko jet. Kōn un in, ritōl ro rej aikuj wōnm̧aanļo̧k wōt n̄an dāpij wōt an ejjeļo̧k jabdewōt kweilo̧k im m̧akūtkūt ko ilo jo̧teen M̧ande ko. Ijoke, iien kōm̧m̧an nokon in jota, ekkatak gospel eo ilo m̧weeo, im m̧akūtkūt ko n̄an baam̧le ko im armej kajjojo kar jikejuuļi ekkar n̄an jekjek ko an kajjojo armej.

Ilo alikkar, im āinwōt kar ejake jen ro raar kōņaan, rūm̧m̧an ded ro, rūtto ro, ripālele ro ejjeļo̧k pāleer, ro uwaan baam̧le ko, membōr ro rekāāl, im ro jet maron̄ in kuk ippān doon n̄an ippān doon im n̄an kōkajoorļo̧k doon kōn ekkatak gospel in.

Juon kein jipan̄ ekāāl, Itok, Ļoor Eō—N̄an Kajjojo im Baam̧le ko, enaaj leļo̧k jipan̄ n̄an rie ekkatak gospel eo ilo m̧weeo.

Bar jet meļeļe repād ilo Sabbath.lds.org im ilo kajjitōk im uwaak ko ilaļ.

1. Elmen ad kōkm̧anm̧anļo̧k ekkatak gospel eo im mour kake ilo m̧weeo im ilo mour ko ad make?

Ritōl ro an Kabun̄ rej rōjan̄ aolep n̄an bōk kūņaer ilo raan in Jabōt—im ilo aolep wiik—n̄an ekkatak gospel eo, ko̧o̧njeļ ko an baam̧le, nokon in jota, menmenbwij an baam̧le im jerbal in tampeļ, jerbal in karejar, kabun̄jar an juon make, im lem̧ōņōņō an baam̧le.

Ekkatak gospel eo ilo m̧weeo ej kapen ļo̧k oktak eo n̄an Jemewōj Ilan̄ im ilo Irooj Jisōs Kraist n̄an kōkajoorļo̧k baam̧le ko ad. Ekkatak jeje ko rekwojarjar, kar rie jen kein jipan̄ eo ekāāl Itok, Ļoor Eō—N̄an Kajjojo im Baam̧le, ej kakkobaba eo n̄an ekkatak gospel eo ilo m̧weeo. Kein katak in ej letok juon kilen ekkatak an kajjojo im baam̧le kōm̧m̧ani n̄an iokļo̧k kein katak eo an Jabōt Jikuuļ im Būraimere n̄an ekkatak m̧weeo.

Kajjojo im baam̧le ko, ijoke, pukot tōl ilo aer kālet n̄an ekkatak ta eo enaaj em̧m̧antata n̄an tōpar aikuj ko aer. Rej lukkun ļōmņake āinwōt Bok in Mormon im jon̄ok in jerbal ko jet, ennaan ko jen kweilo̧k eo eļap, māākjin ko an Kabun̄ in, meļeļe ko repād ilo LDS.org, im kein katak ko jet kar kobaiktok jen ritōl ro routiej ak ijo jokwe ie. Ejjeļo̧k kōtmene ke aolep membōr ro renaaj ekkatak aolepen, ak aolepen, kein katak in ilo jabdewōt iien.

2. Ta jekjek ko n̄an kweilo̧k ko an Jabōt?

Kweilo̧k ko an kwojkwoj naaj kōm̧m̧an 60 minit im rej pedped wōt n̄an kapen oktakļo̧k n̄an Jemedwōj Ilan̄ im Irooj Jisōs Kraist n̄an kōkajoorļo̧k tōmak ilo Er. Ekōm̧m̧an bwe kain̄i eo an kwojkwoj en io̧lepen kwojarjar in kabun̄jar eo an membōr ro ilo Jabōt en tiljek karōke, ekoba jon̄an kōjjeļā ko im oraņ rikōnono ro, al, im al in kakkije ko. Kuwaer ko an ward maron̄ in bōk jikier n̄e ekkar. Kweilo̧k ko an kwojkwoj ren ijjino im jem̧ļo̧k kōn al im jar. Al ej kōm̧m̧an kōm̧m̧an m̧okta jen kōjeraam̧m̧an kwojkwoj eo.

Ālkin kweilo̧k in kwojkwoj eo enaaj 10 minit in diwōjļo̧k n̄an kūlaaj ko.

3. Elmen an naaj membōr ro jeļā ta kweilo̧k ko renaaj kōm̧m̧an im ta unin kōnono ko renaaj ekkatak ilo Jabōt eo?

Ilo wiik eo, ritōl ro rej rōjan̄ n̄an karuwaineneik membōr n̄an kabun̄jar ippān doon ilo Jabōt. Remaron̄ jilkinļo̧k juon karuwainene ilo emāāļ, jeje, ak social media, ak meļeļe ko jet, kakeememej membōr ro kōn kweilo̧k eo kar jikejuuļi n̄an Jabōt eo juon, ekoba unin kōnono ko n̄an kōnono kake. Kakeememej in emaron̄ in pidodo āinwōt “Wiik in jenaaj kōm̧m̧an Jabōt Jikuuļ. Jenaaj ekkatak Luk 2 im Matu 2.”

Ilo Jabōt Jikuuļ, doulul ko, Doulul eo an Kōrā Ro, im Doulul eo an Jiron̄ Ro, ritōl ro im rikaki ro renaaj kakeememej ro uwaan kūlaaj eo kōn Itok, Ļoor Eō—N̄an Kajjojo im Baam̧le ko kein ekkatak ko ippānļo̧k jeje ko aer rekwojarjar rej ekkatak kaki ilo m̧weeo. Kakeememej in emaron̄ in waļo̧k ilo jeje, naan, ak jim̧or.

4. Ta jekjek eo n̄an jodikdik ro im rūm̧m̧an ded ro n̄an kūlaaj ko an Jabōt Jikuuļ?

50 minit n̄an kūlaaj in Jabōt Jikuuļ n̄an jodikdik ro im rūm̧m̧an ded ro, ilo Jabōt juon im jilu. Kein katakin ko repād ilo Itok, Ļoor Eō—N̄an Jabōt Jikuuļ. Ekkatak in ej iokļo̧k kein katakin eo an Būraimere im kein katak eo n̄an kajjojo im baam̧le ko.

Āinwōt aikuji, m̧okta jen an jinoe kūlaaj in Jabōt Jikuuļ ko, ritōl ro jān Doulul eo an Jiron̄ Ro, Doulul eo an Kōrā Ro, im priesthood doulul ko remaron̄ kwaļo̧k kōjjeļā ko rekadu. Ālkin juon karuwainene im kakeememej ekadu Itok Ļoor Eō—N̄an Kajjojo im Baam̧le katak kein katak eo ilo m̧weeo ilo raan eo im ilo wiik eo tok juon, im kōm̧m̧ani jabdewōt jerbal, rikaki eo eaikuj in jino katak in im kōnono. Kūlaaj ko an Jabōt Jikuuļ reban ijjino kōn al ak jar ak renaaj kilōk kōn jar.

Ilo an kūlaaj ko an Jabōt Jikuuļ kōm̧m̧an ļo̧kkin ruo wiik, ritōl im rikaki ro naaj aikuj in jeļā kein katak ko aer, eo kiiō ekoba katak ko an kajjojo wiik ilo iiō in. Ilo an kajjojo im baam̧le ko riit wōt ilo m̧weeo ekkar n̄an jikejuuļ eo kajjojo wiik ilo Itok Ļoor Eō—N̄an Kajjojo im Baam̧le ko, ritōl ro an Jabōt Jikuuļ im rikaki ro renaaj aikuj in kālet kein jipan̄ eo jān juon ak elōn̄ļo̧k katak ko n̄an ekkeijeļo̧k wōt ippān kein jipan̄ eo an kajjojo im baam̧le ko. N̄an bōbrae tarpok, būreejtōnji eo an Jabōt Jikuuļ maron̄ in rōjan̄ rikaki ro im ro uwaan kūlaaj eo kōn oktak ko juon wiik m̧oktaļo̧k. N̄an eļapļo̧k meļeļe maron̄ loi ilo ComeFollowMe.lds.org.

5. Ta jekjek eo n̄an kweilo̧k in doulul ko an Aaronic im Melkesidek Priesthood?

50 minit in doulul in kweilo̧k ko an Aaronic Priesthood, ilo Jabōt ruo im emen, pedped ioon katakin gospel loi ilo Itok, Ļoor Eō—N̄an Aaronic Priesthood. Ritōl ro im rikaki ro renaaj etal wōt im kālet laajrak in katak eo ilo ComeFollowMe.lds.org ak ilo Itok, Ļoor Eō—N̄an Aaronic Priesthod bok in katak eo em̧ōj an prin me emaron̄ em̧m̧antata n̄an tōpar aikuj ko an ro uwaan doulul eo.

50 minit in doulul in kweilo̧k ko an em̧m̧aan ro, ilo Jabōt ruo im emen, pedped ioon ennaan ko jān kweilo̧k eo eļap ej kab jem̧ļo̧k. Kakkobaba in katak ko rej waļo̧k ilo ennaan ko ilo Māe im No̧bemba ilo Ensign im Liahona, ilo LDS.org, im ilo Gospel Library app n̄an mobile devices. Jabōt Juon enaaj bōjrak kweilo̧k ko an ko̧o̧njeļ; ijoke, eļan̄n̄e aikuji, doulul ko an em̧m̧aan ro remaron̄ kōjerbal jidik in doulul in kweilo̧k eo n̄an kapilōk doon kōn unin kōnono eo ekkar.

Rikabwijer ro an Aaronic im Melkesidek Priesthood reban bar kweilo̧k ippān doon ak renaaj kuk ippān doon ilo doulul in kweilo̧k ko aer make. Ālkin an juon membōr in doulul eo an būreejtōnji kōm̧m̧ani kōjjeļā ko rekkadu, kakeememej ro membōr kōn Itok, Ļoor Eō—N̄an Kajjojo im Baam̧le ko katak kein katak eo ilo m̧weeo ilo raan eo im ilo wiik eo tok juon, im kōm̧m̧ani jabdewōt an doulul eo jerbal, rikaki eo eaikuj in jino katak in im kōnono. Kweilo̧k ko an doulul reban jino kōn al ak jar ak renaaj kilōk kōn jar.

Emaron̄, n̄e juon aikuj eo ewaļo̧k, kūlaaj ko an Aaronic Priesthood ro maron̄ kuk ippān doon jidik m̧okta jen an ro uwaan kūlaaj eo etal n̄an kūlaaj in kweilo̧k ko aer.

6. Ta jekjek eo n̄an kweilo̧k ko n̄an Doulul eo an Kōrā Ro?

50 minit in kweilo̧k eo an Doulul eo an Kōrā ro, ilo Jabōt ruo im emān, pedped wōt ioon ennaan ko jān kweilo̧k eo eļap ej kab jem̧ļo̧k. Kakkobaba in katak ko rej waļo̧k ilo ennaan ko ilo Māe im Nobemba ilo Ensign im Liaona, ilo LDS.org, im ilo Gospel Library app n̄an mobile devices. Jabōt Juon enaaj bōjrak kweilo̧k ko an ko̧o̧njeļ; ijoke, eļan̄n̄e aikuji, Doulul eo an Kōrā Ro remaron̄ kōjerbal jidik Jabōt in kweilo̧k eo n̄an kapilōk doon kōn unin kōnono eo ekkar.

Ālkin an juon membōr in doulul eo an būreejtōnji kōm̧m̧ani kōjjeļā ko rekkadu, kakeememej ro membōr kōn Itok, Ļoor Eō—N̄an Kajjojo im Baam̧le ko katak kein katak eo ilo m̧weeo ilo raan eo im ilo wiik eo tok juon, im kōm̧m̧ani jabdewōt jerbal, rikaki eo eaikuj in jino katak in im kōnono. Kweilo̧k ko an Doulul eo an Kōrā ro reban jino kōn al ak jar ak renaaj kilōk kōn jar. Al emaron̄ in kōm̧m̧an bwe en ļap kilaan katak eo n̄e ekkar. Doulul eo an Kōrā ro im jiron̄ ro reban kweilo̧k ippān doon ilo iien kōpeļļo̧k ak renaaj kuk ippān doon ilo kweilo̧k ko aer make.

7. Ta jekjek in kweilo̧k ko n̄an Jiron̄ ro?

50 minit in kweilo̧k eo an Jiron̄ Ro, ilo Jabōt ruo im emān, pedped wōt ioon unin katak ko an gospel kajjojo allōn̄ loi ilo Itok, Ļoor Eō—N̄an Jiron̄ Ro. Ritōl ro im rikaki ro renaaj etal wōt im kālet laajrak in katak eo ilo ComFollowMe.lds.org ak ilo Itok, Ļoor Eō—N̄an Jiron̄ Ro bok in katak eo em̧ōj prin me emaron̄ em̧m̧antata n̄an tōpar aikuj ko an ro uwaan kūlaaj eo.

Aolep jiron̄ ro reban kweilo̧k ippān doon ak renaaj kuk ippān doon ilo kweilo̧k ko aer make. Ālkin an juon membōr in kūlaaj būreejtōnji eo kōm̧m̧ane juon kōjjeļā ekadu, kakeememej membōr ro kōn Itok, Ļoor Eō—N̄an Jiron̄ ro katak kein katak eo ilo m̧weeo ilo raan eo im ilo wiik eo tok juon, im kōm̧m̧ani jabdewōt jerbal, rikaki eo eaikuj in jino katak in im kōnono. Kūlaaj ko reban jino kōn al ak jar ak renaaj kilōk kōn jar. Al emaron̄ in kōm̧m̧an bwe en ļap kilaan katak eo n̄e ekkar.

Emaron̄, n̄e juon aikuj eo ewaļo̧k, kūlaaj ko an Doulul eo an Jiron̄ ro maron̄ kuk ippān doon jidik m̧okta jen an ro uwaan kūlaaj eo etal n̄an kūlaaj in kweilo̧k ko aer.

8. Ta jekjek ko n̄an kweilo̧k ko n̄an Būraimere?

50 minit in kweilo̧k ko an Būraimere naaj kōm̧m̧an aolep Jabōt, ļoor jikejuuļ in ilaļ

25 minit

Jar, jeje ko rekwojarjar ak eoon kōn tōmak, kōnono (5 minit)

Al: al eo me jipan̄ eoon in ekkatak eo ilo kūlaaj (20 minit)

5 minit

Diwōjļo̧k n̄an kūlaaj ko

20 minit

Kūlaaj ko: katak jān Itok, Ļoor Eō—N̄an Būraimere ro

Kakeememej: Eļan̄n̄e uwaan Būraimere ro kōjenoļo̧k er n̄an junior im seniory Būraimere, jikejuuļ in ilōn̄ emaron̄ in oktak n̄an jimettan in ajri ro im iien eo maron̄ oktak n̄e aikuji. Junior Būraimere maron̄ jino al ilo an senior Būraimere ro jino kūlaaj ko—ak vice versa.

Al enaaj pedped wōt ioon al eo ejipan̄ jeje ko rekwojarjar ko me ajri ro rej ekkatak ilo kūlaaj ko aer. Ilo Elaajrak in Sharing Time eo enaaj bōjrak. N̄an meļeļe eļapļo̧k kōn al ilo Būraimere enaaj loe ilo Primary.lds.org im ilo ComeFollowMe.lds.org. Būraimere enaaj jino kōn juon jar, juon eoon ak katak kōn tōmak, im juon katak jen ajri eo. Ijoke, eļan̄n̄e al eo ej kōm̧m̧an ālkin an ajri ro pād ilo kūlaaj ko aer, enaaj jem̧ļo̧k kōn jar.

Ilo kūlaaj, ajri ro renaaj pedped wōt ioon juon eoon in ekkatak jen jeje ko rekwojarjar iokļo̧k kein katak eo an Jabōt Jikuuļ im n̄an kajjojo im baam̧le ko. Kein katakin ko repād ilo Itok, Ļoor Eō—N̄an Būraimere. Eļan̄n̄e kūlaaj ko rej kōm̧m̧an m̧okta jen al, ren jino kōn jar. Eļan̄n̄e rej kōm̧m̧an ālkin al, ren kilōke kōn jar.

9. Jej ke kōm̧m̧an ko̧o̧j ko jet ilo iien jar ilo Jabōt?

Jino jen Jānwōde 2019, kūlaaj in Katakin Gospel eo enaaj bōjrak. Ward im mijenede ro rej jerbal aolep raan naaj katakin kajjojo im baam̧le ko katak ko loi ilo jepta 3 in Preach My Gospel: Juon Tōl n̄an Jerbal in Mijenede ilo m̧weeo ak ilo im̧ōn jar ko, m̧okta ak ālkin peptaij. Ilo Jabōt, aolep membōr im ro m̧ōtta ilo Kabun̄ in rej ruwainene in pād ilo kūlaaj ko an Jabōt Jikuuļ im doulul ko an Aaronic im Melkisedek Priesthood, Doulul eo an Kōrā Ro, ak kūlaaj ko an Doulul eo an Jiron̄ Ro ippān rūm̧m̧an ded ro ak jodikdik ro ilo ward eo.

Ko̧o̧j ko jet, āinwōt kōkajoorļo̧k m̧are im baam̧le, keppopo n̄an tampeļ, keppopo n̄an mijinede, im menmenbwij an baam̧le, eban kōm̧m̧an ilo awa ko ruo. Ijoke, ilo kālet eo an bisop im pedped wōt ioon aikuj ko an ijo jokwe ie, ko̧o̧j kein maron̄ in kwaļo̧kki ilo iien ko jet n̄an kajjojo, baam̧le ko, ak kūrup ko.

10. N̄āāt rūkaki ro renaaj pād ilo kweilo̧k in ko̧o̧njeļ an rikaki?

Rikaki ro rej pād ilo kweilo̧k in ko̧o̧njeļ an rikaki kajjojo kuwōta ilowaan 50 minit in kūlaaj. Kweilo̧k in ko̧o̧njeļ ko rej kōm̧m̧an ekkar n̄an jikejuuļ in ilaļ:

Priesthood, Doulul eo an Kōrā Ro, Doulul eo an Jiron̄ Ro maron̄ pād ilo Jabōt juon ak jilu, āinwōt kālet jen ritōl ro.
Rikaki ro an Jabōt Jikuuļ maron̄ pād ilo Jabōt juon ak emen, āinwōt kālet jen ritōl ro.
Rikaki in Būraimere ro maron̄ pād ilo jabōt Jabōt, āinwōt kālet jen ward Būraimere ak būreejtōnji ro an Jabōt Jikuuļ. Eļan̄n̄e ekkar, rikaki ro an Būraimere maron̄ jenoļo̧k jān ritō ro jet n̄an kapilōk kōn aikuj ko rejejjet n̄an katakin ajri ro. Elōn̄ jen juon ko̧o̧njeļ maron̄ kōm̧m̧an ilo juon kuwōta n̄an rikaki ro an Būraimere me aolep reban jako jen kūlaaj ko an Būraimere ilo iien eo wōt.

11. Ta jerbal eo an juon rikaki?

Jisōs Kraist ej Maajta in Rikaki eo. Membōr ro an Kabun̄ in kar kūr er im kar kōjenoļo̧k er n̄an jerbal āinwōt rikaki ro kar bōk juon lōke ekwojarjar im eddo n̄an ļoor waanjon̄ok eo An im jipan̄ ajri ro nejin Anij n̄an kalōk tōmak eo aer ilo Jemedwōj Ilan̄ im Rilo̧mo̧o̧r im n̄an erom̧ āinwōt Er. Rikaki ro kar kūr er rej katakin kōn kajoor im mālim an Anij.

Kōttōpar eo an aolep rikaki ej n̄an kwaļo̧k katak eo ejejjet an gospel in. Katakin maron̄ bar tōl kōnono ko reim̧we; ijoke, ebar koba elōn̄ eddo in katak ko jet me rejjab āinwōt an ritōl kōnono. Eddo eo ekwojarjar an juon rikaki rej pād ilo Teaching in the Savior’s Way (lale ComeFollowMe.lds.org). Kōn un in, kōmij karuwaineneik ritōl ro im membōr ro n̄an kōjerbal tōōm̧ in rikaki (im jab ritōl in katakin, rikōpeļaak, ak rikōnono) n̄e ej iokļo̧k ro em̧ōj kar kūr im kōjenoļo̧k n̄an katakin ilo priesthood im doulul ko an radik ko an Kabun̄ in.

12. Ta jikejuuļ eo an Jabōt n̄an ward ko ak branch ko rej kōjerbal juon wōt m̧ōņjar?

Stake būreejtōn eo ej ļōmņak iien an membōr ito-itak, jokne, im aikuj ko jet n̄e kweilo̧k ko an Jabōt naaj kōm̧m̧an n̄an im̧ōņjar ko n̄an elōn̄ ļo̧k jen juon ward ak branch. Kakkobaba rebar pād ilo “Kālet ko an Jikejuuļ ko an Jabōt” (Sabbath.lds.org), ak kajjitōk kein—ekoba kakkobaba kein—ekoba iien jinoe an kweilo̧k eo—eaikuj in tōpar aikuj ko rem̧m̧antata an kajjojo iunit.