“iKuri ni iVakamacala,” Me iSakisaki ni iTabagone: iDusidusi ni Vakayaco Digidigi (2022)
“iKuri ni iVakamacala,” Me iSakisaki ni iTabagone
iKuri ni ivakamacala
Dua na sala mo na raica kina na nomu toso ki liu e na salatu ni veiyalayalati sa ikoya mo vakasamataka vakatitobu na vei taro e so ka toka e ra. Sa ira oqo na taro o na vakatarogi kina mo ciqoma e dua na ivolatara ni valetabu, ia kakua ni waraka na veivakatarogi. Vakayacora madaga na nomu dikevi iko vakayalo. Na iToko ni Goneyalewa, na iToko ni Kuoramu ni Matabete i Eroni, kei na iVunau e Tini e rawa talega ni veivuke e na nomu vakadidike vakai iko.
Taro ni ivolatara ni valetabu me baleti ira na itabagone
O vakabauta ka vakadinadinataka li na Kalou, na Tamada Tawamudu; kei na Luvena, o Jisu Karisito; kei na Yalo Tabu?
E dua tiko li na nomu ivakadinadina ni Nona Veisorovaki o Jisu Karisito kei na Nona itavi vaka nomu iVakabula ka Dauveivueti?
E dua tiko li na nomu ivakadinadina ni kena Vakalesui mai na kosipeli i Jisu Karisito?
O tokona beka na Peresitedi ni Lotu i Jisu Karisito ni Yalododonu Edaidai ni parofita, daurairai, ka dauvakatakila ka sa ikoya duadua ga na tamata e vuravura e vakadonui me vakayagataka na idola kece sara ni matabete? O tokoni ira beka na lewe ni Mataveiliutaki Taumada kei na Kuoramu ni iApositolo Le Tinikarua ni ra sa parofita, daurairai, ka dauvakatakila. O tokoni ira li na Vakaitutu Raraba kei ira na iliuliu ni Lotu e na noda veivanua.
Sa kaya na Turaga na ka kecega me “caka vakasavasava” e Matana (Vunau kei na Veiyalayalati 42:41). O dau saga beka na bula savasava vakayalo ena nomu vakanananu kei na itovo? O bulataka tiko li na lawa ni tiko savasava?
O dau muria tiko beka na ivakavuvuli ni Lotu i Jisu Karisito e na nomu itovo sega ni laurai kei na itovo e matanalevu vei ira e na nomu matavuvale kei ira talega na tani?
O dau tokona se tutaka beka e dua na ivakavuvuli, ivalavala, se ivunau e veisaqasaqa kei na kena e na Lotu i Jisu Karisito ni Yalododonu Edaidai?
O dau saga beka mo vakatabuya na Siga ni Vakacecegu, mai vale ka vakakina e na lotu; lakova na nomu soqoni, vakavakarau ka vakayagataka na sakaramede ena bula kilikili, ka bula muria na lawa kei na ivakaro ni kosipeli?
O dau saga beka mo dina e na ka kecega o cakava?
Ko sa sauma vakadodonu tiko li na nomu ikatini?
O kila ka muria tiko li na Vosa ni Vuku?
E sa tu beka e so na ivalavala ca bibi e na nomu bula ka dodonu me tusanaki vei ira na matabete vakatulewa ena veivutuni?
O nanuma beka ni sa kilikili mo curu ki na vale ni Turaga ka vakaitavi e na veicakacaka vakalotu ni valetabu?
iToko ni Goneyalewa
O au e dua na luvena yalewa lomani na itubutubu vakalomalagi, e na ituvaki vakalou kei na icavacava tawamudu.
Ni‘u dua na tisaipeli i Jisu Karisito, au sa sasagataka me’u vakataki Koya. Au vakasaqara ka cakacakataka na noqu vakatakila ka qaravi ira na tani e na Yacana tabu.
Au na tu me‘u ivakadinadina ni Kalou e na veigauna kecega kei na veika kecega kei na veivanua kecega.
Ni‘u sasagataka me’u rawata na bula vakalou, au vakamareqeta na isolisoli ni veivutuni ka saga me’u vinaka tikoga e na veisiga. E na vakabauta, au na vakaqaqacotaka na noqu itikotiko kei na matavuvale, vakayacora ka muria na veiyalayalati tabu, ka ciqoma na veicakacaka vakalotu kei na vei vakalougatataki ni valetabu.
Na iToko ni Kuoramu ni Matabete i Eroni
O au e dua na luvena tagane na Kalou, ka tiko na Nona cakacaka me‘u cakava.
Au na lomana na Kalou, e na lomaqu, igu, vakasama kei na kaukauwa taucoko, maroroya noqu veiyalayalati, ka vakayagataka na Nona matabete me‘u qaravi ira kina na tani, me tekivu e na noqu vuvale.
Ni‘u gumatua e na veiqaravi, cakacakataka na vakabauta, veivutuni, ka torocake tikoga e na veisiga yadua, sa na rawa ni‘u ciqoma na veivakalougatataki ni valetabu kei na rekitaki ni kosipeli.
Au na vakavakarau me‘u daukaulotu gugumatua, tagane vakawati yalodina, ka tama dauloloma ni‘u sa tisaipeli dina i Jisu Karisito.
Au na veivuke e na kena vakarautaki na vuravura ki na Nona lesu mai na iVakabula e na nodra sureti na tamata kece ga me ra lako mai vei Karisito ka ciqoma na veivakalougatataki ni Nona Veisorovaki.
Na iVakaro e Tini
Me kakua vei iko na kalou tani, koi au duadua ga.
Mo kakua ni cakava vei iko e dua na matakau ceuceu.
Mo kakua ni cavuta walega na yaca i Jiova na nomu Kalou.
Mo nanuma na siga ni vakacecegu, mo vakatabuya.
Mo vakarokorokotaki rau na tamamu kei na tinamu.
Mo kakua ni laba.
Mo kakua ni ia na veibutakoci.
Mo kakua ni butako.
Mo kakua ni beitaka vakailasu na kai nomu.
Mo kakua ni kocova.
Raica na Lako Yani 20:3–17.