« ការណែនាំបន្ថែម » សៀភៅណែនាំពីការអនុវត្តកម្មវិធី EnglishConnect ( ឆ្នាំ ២០២៣ )

« ការណែនាំបន្ថែម » សៀភៅណែនាំពីការអនុវត្តកម្មវិធី EnglishConnect

ការណែនាំបន្ថែម

សេចក្តីជំនឿ ការរាប់អាន និងការរីកចម្រើន

បណ្ដុះឲ្យមានសេចក្តីជំនឿ ការរាប់អាន និងការរីកចម្រើន ។ ជួយបង្កើតបរិយាកាសដែលអ្នករៀនអាចបង្កើនសេចក្ដីជំនឿ ទទួលបទពិសោធន៍នៃការរាប់អាន និងពង្រីកសមត្ថភាពរបស់ពួកគេ ។ អ្នកអាចធ្វើបែបនេះបានដោយហៅគ្រូបង្រៀន ផ្តល់សម្ភារបរិក្ខារ និងធានាឲ្យបានថាអ្នករៀន និងគ្រូបង្រៀនមានធនធានចាំបាច់នានា ។ អ្នកក៏អាចសម្របសម្រួលជាមួយអ្នកដទៃដែលអាចគាំទ្រដល់អ្នករៀន ដូចជាពួកអ្នកផ្សព្វផ្សាយសាសនា និងក្រុមភាពខ្លួនទីពឹងខ្លួនផ្សេងទៀតផងដែរ ។

ថ្នាក់ដឹកនាំបព្វជិតភាព

ប្រឹក្សាជាមួយថ្នាក់ដឹកនាំបព្វជិតភាព ។ ត្រូវប្រាកដថា កម្មវិធីរបស់អ្នកមានការអនុម័ត និងការត្រួតពិនិត្យពីថ្នាក់ដឹកនាំបព្វជិតភាព ។ ថ្នាក់ដឹកនាំបព្វជិតភាពរួមមានអ្នកទាំងឡាយដែលមើលខុសត្រូវកម្មវិធីភាពខ្លួនទីពឹងខ្លួន ថ្នាក់សិក្ខាសាលា និងវិទ្យាស្ថាន ព្រមទាំងកិច្ចខិតខំខាងអ្នកផ្សព្វផ្សាយសាសនាផងដែរ ។ ប្រឹក្សាជាមួយថ្នាក់ដឹកនាំបព្វជិតភាពអំពី ៖

ការដាក់ និងការតាមដានគោលដៅ និងជោគជ័យ ( សូមមើល « EnglishConnect គាំទ្រដល់កិច្ចការនៃសេចក្តីសង្រ្គោះរបស់ព្រះ និងភាពតម្កើងឡើង » ) ។
ការធ្វើឲ្យលទ្ធផលកម្មវិធីប្រសើរឡើង ។
ការហៅគ្រូបង្រៀនថ្មី ( សូមមើល « គ្រូបង្រៀន » ) ។
ការអញ្ជើញអ្នករៀនឲ្យចូលរួមបន្ថែមទៀត ( សូមមើល « ការអញ្ជើញ និងការយល់ដឹង ) ។
ពង្រីកលទ្ធភាពចូលរៀន ( សូមមើល « ទីតាំង និងភាពញឹកញាប់ ) ។
ការអញ្ជើញអ្នករៀនឲ្យស្វែងរកធនធានសាសនាចក្របន្ថែមទៀត ( សូមមើល « ការភ្ជាប់ជាមួយធនធានសាសនាចក្រដទៃទៀត ) ។

សូមរាយការណ៍ទៅថ្នាក់ដឹកនាំបព្វជិតភាព ។ សូមរាយការណ៍ត្រឡប់ទៅថ្នាក់ដឹកនាំបព្វជិតភាពវិញអំពីជោគជ័យ និងឧបសគ្គនានារបស់ក្រុម EnglishConnect ។

ធានាឲ្យបាននូវការអនុលោមតាមច្បាប់ ។ ធានាថាកម្មវិធី EnglishConnect សមស្របនឹងតម្រូវការស្របច្បាប់ក្នុងមូលដ្ឋានដែលមាននៅលើគេហទំព័រ englishconnect.org/leader/approved-locations ។

ចំណាំ៖ ធនធាន EnglishConnect ត្រូវបានការពារដោយច្បាប់រក្សាសិទ្ធិថតចម្លង និងមិនគួរត្រូវបានកែប្រែដោយគ្មានការអនុញ្ញាតឡើយ ។

ភាពជាដៃគូក្នុងបេសកកម្ម

ដាក់ផែនការប្រើ EnglishConnect ដើម្បីចែកចាយដំណឹងល្អ ។ EnglishConnect អាចក្លាយជាផ្នែកដ៏សំខាន់មួយនៃផែនការបេសកកម្មវួដ ។ ក្រុម EnglishConnect អាច ៖

បង្កើនឱកាសស្វែងរក និងបង្រៀនសម្រាប់ពួកអ្នកផ្សព្វផ្សាយពេញម៉ោង ។
ពង្រឹងទំនាក់ទំនងរវាងសមាជិក មិត្តភក្ដិនៃសាសនាចក្រ និងពួកអ្នកផ្សព្វផ្សាយសាសនា ។
ជួយពួកអ្នកផ្សព្វផ្សាយសាសនាឲ្យបង្រៀនសមាជិក ឬអ្នកដែលត្រឡប់មកវិញសម្របខ្លួនចូលទៅក្នុងវួដមួយ ។
សូមជួយសមាជិកអនុវត្តគោលការណ៍នៃសេចក្តីស្រឡាញ់ ចែកចាយ និងអញ្ជើញ ( សូមមើល ក្បួនខ្នាតទូទៅ ២៣.១ ) ។

កិច្ចខិតខំដែលដឹកនាំដោយសមាជិក គាំទ្រដោយពួកអ្នកផ្សព្វផ្សាយសាសនា នឹងជួយឲ្យសម្រេចបានលទ្ធផលទាំងនេះល្អបំផុត ។ នៅពេលដែលសមាជិកដឹកនាំក្រុម EnglishConnect អ្នកចូលរួមទំនងជានឹងកសាងមិត្តភាពជាមួយសមាជិក និងចែកចាយបទពិសោធន៍ដែលស្ថាបនាសេចក្ដីជំនឿ ។ ពួកអ្នកផ្សព្វផ្សាយសាសនា ថ្នាក់ដឹកនាំបេសកកម្ម និងគណៈកម្មការភាពខ្លួនទីពឹងខ្លួនគួរតែប្រឹក្សាជាមួយគ្នា ដើម្បីធ្វើឲ្យក្រុម EnglishConnect ក្លាយជាកន្លែងមួយដែលការចែកចាយ និងការរស់នៅតាមដំណឹងល្អមានភាពសាមញ្ញ និងតាមធម្មជាតិ ។

អញ្ជើញពួកអ្នកផ្សព្វផ្សាយសាសនាឲ្យជួយ ។ នៅក្នុងតំបន់ដែលស្តេក ឬវួដកំពុងផ្តល់ជូនក្រុម EnglishConnect សូមអញ្ជើញពួកអ្នកផ្សព្វផ្សាយសាសនាឲ្យជួយដោយ ៖

ចូលរួមក្រុម និងអនុវត្តជាមួយអ្នករៀនអំឡុងពេលធ្វើសកម្មភាព ។
ការអនុវត្តជាមួយអ្នករៀនក្នុងក្រុមសន្ទនានានា ។
ការបង្រៀនមេរៀនមួយចំនួនតាមតម្រូវការ ។

គ្រូបង្រៀន

តួនាទីរបស់គ្រូបង្រៀន

គ្រូបង្រៀនមានតួនាទីយ៉ាងសំខាន់ក្នុងការអញ្ជើញព្រះវិញ្ញាណ និងបណ្ដុះឲ្យមានសេចក្ដីជំនឿ ការរាប់អាន និងការរីកចម្រើននៅក្នុងក្រុម EnglishConnect ។ ពួកគេមិនចាំបាច់ជាអ្នកជំនាញខាងភាសាអង់គ្លេស ឬមានបទពិសោធន៍ក្នុងការបង្រៀននោះទេ ។ ពួកគេមិនចាំបាច់និយាយភាសាដូចគ្នានឹងអ្នករៀនទេ ។ មេរៀន EnglishConnect ត្រូវបានរចនាឡើងដោយប្រើគោលការណ៍ដែលបានបញ្ជាក់អំពីការរៀនភាសា ហើយគ្រូបង្រៀននឹងទទួលបានជោគជ័យនៅពេលដែលពួកគេណែនាំអ្នករៀនដោយក្ដីស្រឡាញ់តាមរយៈមេរៀនទាំងនោះ ។ គ្រូបង្រៀនជួយអ្នករៀនឲ្យខិតកាន់តែជិតព្រះតាមរយៈការរៀនភាសាអង់គ្លេស ។

គុណសម្បត្តិគ្រូបង្រៀន

គ្រូបង្រៀនល្អមាន ៖

ចិត្តសាទរ រំភើប និងមានចំណង់ក្នុងការបង្រៀនភាសាអង់គ្លេស ។
សេចក្ដីស្រឡាញ់ និងការអត់ធ្មត់ចំពោះអ្នករៀន និងមានបំណងចង់ឃើញពួកគេទទួលបានជោគជ័យជាខ្លាំង ។
អាកប្បកិរិយាវិជ្ជមាន និងសុទិដ្ឋិនិយម ។
ភាពអាចពឹងផ្អែកបាន និងមានពេលដើម្បីដឹកនាំក្រុម ។

ហៅគ្រូបង្រៀន ។ ដោយសារតែអ្នករៀន EnglishConnect អាចរួមមានទាំងអនីតិជន នោះថ្នាក់ដឹកនាំបព្វជិតភាពក្នុងមូលដ្ឋានគួរតែសម្ភាសគ្រូបង្រៀនដែលមានសក្តានុពលម្នាក់ៗ និងពិនិត្យមើលកំណត់ត្រាសមាជិកភាពរបស់ពួកគេថាមានចំណារចារអ្វីឬអត់ មុននឹងផ្ដល់ការហៅ ។ ក្រុមដែលមានអនីតិជនត្រូវតែមានវត្តមានមជ្ឈិមវ័យពីរនាក់ និងធ្វើតាម គោលនយោបាយសាសនាចក្រសម្រាប់ការការពារយុវវ័យ ។ មានអនុសាសន៍ថា ក្រុមដែលមិនមែនជាក្រុមយុវវ័យក៏ត្រូវមានគ្រូបង្រៀនពីរនាក់ផងដែរ ដើម្បីពួកគេអាចបង្រៀនជាមួយគ្នា ឬបង្រៀនជំនួសគ្នាទៅវិញទៅមក ប្រសិនបើគ្រូបង្រៀនម្នាក់នៅឆ្ងាយ ឬឈឺ ។

បំពាក់បំប៉នគ្រូបង្រៀន ។ អ្នកអាចបំពាក់បំប៉នគ្រូបង្រៀនដោយប្រើ EnglishConnect សម្រាប់គ្រូបង្រៀន និងធនធាននានានៅលើគេហទំព័រ englishconnect.org/teacher ។ អ្នកក៏គួរតែឲ្យគ្រូបង្រៀនថតចម្លងសៀវភៅសិក្សា និងសៀវភៅលំហាត់របស់អ្នករៀនផងដែរ ( សូមមើល « សម្ភារ » ) ។ គ្រូបង្រៀនក៏ត្រូវបានលើកទឹកចិត្តឲ្យជួបគ្នាជាទៀងទាត់ ដើម្បីប្រឹក្សាយោបល់ជាមួយគ្នា ចែកចាយការអនុវត្តដ៏ល្អបំផុត ឆ្លើយសំណួររបស់គ្នាទៅវិញទៅមក និងពិនិត្យមើលសម្ភារសម្រាប់បំពាក់បំប៉ន ។

ជួយអ្នករៀនឲ្យរីកចម្រើនដើម្បីធ្វើជាគ្រូបង្រៀន ។ គ្រូបង្រៀនអាចរកអ្នករៀននៅក្នុងក្រុមដែលអាចត្រៀមខ្លួនបង្រៀនក្រុមមួយនៅពេលអនាគត ។ ការបង្រៀនជួយអ្នករៀនបន្តរីកចម្រើន និងពង្រីកការចូលទៅកាន់កម្មវិធីនេះ ។

សម្ភារ

ផ្តល់សម្ភារឲ្យអ្នករៀន ។ អ្នករៀននឹងត្រូវចូលទៅកាន់ EnglishConnect ១ សម្រាប់អ្នករៀន ឬ EnglishConnect ២ សម្រាប់អ្នករៀន ទាំងឌីជីថលក្នុងបណ្ណាល័យដំណឹងល្អ ឬសៀវភៅបោះពុម្ពតាមរយៈហាងអនឡាញរបស់សាសនាចក្រនៅគេហទំព័រ store.ChurchofJesusChrist.org ។ ក៏មានធនធានបន្ថែមដើម្បីបង្កើនការរៀនសូត្ររបស់ពួកគេ ដែលរួមមានសៀវភៅលំហាត់ និងសកម្មភាពអនឡាញផងដែរ ។ សម្រាប់ការពិពណ៌នាអំពីធនធានទាំងអស់ដែលមានសម្រាប់អ្នករៀន សូមមើល « តើសម្ភារសិក្សាសម្រាប់អ្នករៀន និងគ្រូបង្រៀនសម្រាប់ EnglishConnect មានអ្វីខ្លះ ? » ក្នុងផ្នែក « សំណួរដែលចោទសួរញឹកញាប់ » ។

ធនធានបោះពុម្ព

ប្រសិនបើអ្នកផ្តល់ធនធានបោះពុម្ព នោះអង្គភាពក្នុងមូលដ្ឋានគាំទ្រកិច្ចខិតខំនេះជាមួយនឹងថវិកាដែលមានស្រាប់របស់ពួកគេ ។ ប្រសិនបើអ្នកត្រូវការមូលនិធិ ប្រធានស្តេកគួរតែធ្វើតាមដំណើរការដែលបានអនុម័តដើម្បីស្នើសុំមូលនិធិ ។ កុំគិតថ្លៃចូលរួមណាមួយពីអ្នករៀនឡើយ ។ ប្រសិនបើអ្នករៀនត្រូវបានរំពឹងឲ្យទិញធនធានបោះពុម្ពដោយខ្លួនឯង នោះពួកគេអាចធ្វើដូចនោះបានតាមរយៈមជ្ឈមណ្ឌលចែកចាយក្នុងមូលដ្ឋាន ឬហាងអនឡាញរបស់សាសនាចក្រ ។

ចំណាំ ៖ សៀវភៅសិក្សាអាចត្រូវការពេលដល់ទៅប្រាំមួយសប្តាហ៍បានមកដល់ ។

ផ្តល់សម្ភារឲ្យគ្រូបង្រៀន ។ គ្រូបង្រៀនគួរសិក្សា EnglishConnect សម្រាប់គ្រូបង្រៀន ក្នុងបណ្ណាល័យដំណឹងល្អ ព្រមទាំងធនធានបំពាក់បំប៉នផ្សេងទៀតនៅលើគេហទំព័រ englishconnect.org/teacher ។

បទបង្ហាញមេរៀនអនឡាញ

គ្រូបង្រៀនអាចប្រើធនធានបទបង្ហាញ EnglishConnect ដើម្បីជួយណែនាំក្រុមសន្ទនាតាមអនឡាន ។ បទបង្ហាញមេរៀនគឺអាចរកបាននៅគេហទំព័រ englishconnect.org/resources/teaching-materials ។

ទីតាំង និងភាពញឹកញាប់

សម្រេចចិត្តថាតើអ្នកនឹងបង្រៀនក្រុមដោយជួបផ្ទាល់ ឬតាមអ៊ិនធឺណេត ។ ក្រុមជួបផ្ទាល់នៅក្នុងអគារសាសនាចក្រត្រូវបានផ្តល់អនុសាសន៍ឲ្យផ្ដល់ឱកាសនៃការរាប់អាន ។ ប្រសិនបើការទៅកាន់អគារសាសនាចក្រជាឧបសគ្គមួយសម្រាប់អ្នកចូលរួម សូមពិចារណាផ្តល់ក្រុមអនឡាញ ។ « ការណែនាំដើម្បីដឹកនាំក្រុមអនឡាញ » និង « ការណែនាំសម្រាប់អ្នកចូលរួមក្រុមអនឡាញ » អាចជួយថ្នាក់ដឹកនាំ គ្រូបង្រៀន និងអ្នករៀនបង្កើតបរិយាកាសរៀនសូត្រដែលបំផុសគំនិតតាមអនឡាញ ។ បទបង្ហាញមេរៀនអនឡាញអាចរកបាននៅគេហទំព័រ englishconnect.org/resources/teaching-materials ។

សម្រេចចិត្តថាតើក្រុមទាំងនោះនឹងជួបគ្នាញឹកញាប់ប៉ុនណា ។ ក្រុមភាគច្រើនជួបគ្នាម្ដង ឬពីរដងក្នុងមួយសប្តាហ៍ ប៉ុន្តែមេរៀនត្រូវបានសរសេរឡើងដើម្បីឲ្យក្រុមអាចជួបគ្នាកាន់តែញឹកញាប់ប្រសិនបើចង់បាន ។ សូមចងចាំថា អ្នករៀនត្រូវការពេលវេលាដើម្បីបំពេញសកម្មភាពសិក្សាផ្ទាល់ខ្លួនមុនមេរៀននីមួយៗ ។

សម្រេចចិត្តថាតើក្រុមទាំងនោះនឹងជួបគ្នាពេលណា និងរយៈពេលប៉ុន្មាន ។ ជ្រើសរើសថ្ងៃ និងពេលវេលាដែលល្អបំផុតសម្រាប់អ្នករៀន និងគ្រូបង្រៀន ។ ក្រុមភាគច្រើនជួបគ្នារយៈពេល ៩០ នាទី ប៉ុន្តែក្រុមអាចជួបគ្នាក្នុងរយៈពេលផ្សេងពីនេះប្រសិនបើចង់បាន ។

សម្រេចរយៈពេលរបស់ក្រុម និងជំពូកណាខ្លះដែលពួកគេនឹងរៀន ។ ក្រុមជាច្រើនកំពុងបន្ត មានន័យថា ពួកគេចាប់ផ្តើមមេរៀនទី១ម្ដងទៀត នៅពេលដែលពួកគេបញ្ចប់សៀវភៅសិក្សានោះ ។ ក្រុមផ្សេងទៀតរៀនតាមសៀវភៅសិក្សាម្តង ឬរៀនតែផ្នែកមួយនៃជំពូកនានានៅក្នុងសៀវភៅសិក្សា ។

សូមមើលផ្នែក « ឧទាហរណ៍ » សម្រាប់របៀបដែលថ្នាក់ដឹកនាំបានរៀបចំក្រុមទាំងឡាយ ។

ការចុះឈ្មោះ និងវិញ្ញាបនបត្រ ( QuickReg )

បង្កើត និងគ្រប់គ្រងក្រុមនៅក្នុង QuickReg ។ QuickReg គឺជាឧបករណ៍ដែលសាសនាចក្របានអនុម័តដើម្បីគ្រប់គ្រងក្រុមភាពខ្លួនទីពឹងខ្លួនទាំងឡាយ ។ បង្កើតក្រុមក្នុង QuickReg ដោយចូលទៅកាន់គេហទំព័រ quickreg.englishconnect.org ។ បន្ទាប់មក សូមបន្តប្រើប្រាស់ QuickReg ដើម្បី ៖

ផ្សព្វផ្សាយអំពីក្រុមទាំងឡាយ ។
ផ្លាស់ប្តូរកាលបរិច្ឆេទ ពេលវេលា និងទីតាំងរបស់ក្រុម ។
បោះពុម្ពវិញ្ញាបនបត្រអ្នកចូលរួម ។
ផ្លាស់ប្ដូរស្ថានភាពរបស់អ្នករៀន ។
បញ្ចប់ក្រុម ។

សូមមើលការបង្រៀន QuickReg នៅលើគេហទំព័រ englishconnect.org/leader ដើម្បីទទួលបានការបំពាក់បំប៉ន ។

ចំណាំ ៖ ដើម្បីប្រើ QuickReg សមាជិកត្រូវ (១) មានការហៅមួយក្នុងសាសនាចក្រ (២) ការហៅរបស់ពួកគេត្រូវបានកត់ត្រានៅក្នុងធនធានសម្រាប់ថ្នាក់ដឹកនាំ និងស្មៀន ។

បោះពុម្ព និងប្រគល់វិញ្ញាបនបត្រពី QuickReg ។ គ្រូបង្រៀន និងអ្នកជំនាញខាងភាពខ្លួនទីពឹងខ្លួនអាចបោះពុម្ព និងផ្តល់វិញ្ញាបនបត្រការចូលរួមដល់អ្នករៀនដែលបានចុះឈ្មោះក្នុង QuickReg ។

ការអញ្ជើញ និងការយល់ដឹង

ប្រើសម្ភារសម្រាប់ផ្សព្វផ្សាយ ។ សម្ភារផ្សព្វផ្សាយមាននៅលើហាងអនឡាញរបស់សាសនាចក្រនៅគេហទំព័រ store.ChurchofJesusChrist.org និងនៅ englishconnect.org/resources/leader#publicity ។

អញ្ជើញអ្នករៀន ។ អ្នកអាចប្រើបណ្ដាញទំនាក់ទំនងធម្មតាដើម្បីផ្សព្វផ្សាយពីក្រុម EnglishConnect ដូចជាបងប្អូនប្រុសស្រីដែលផ្ដល់ការងារបម្រើ និងពួកអ្នកផ្សព្វផ្សាយសាសនា ក្ដារប្រកាសព័ត៌មានរបស់វួដ ខិត្តប័ណ្ណជាដើម ។ នៅកន្លែងដែលត្រូវបានអនុញ្ញាត និងផ្តល់មូលនិធិដោយអង្គភាពក្នុងមូលដ្ឋាន ក្រុមក៏អាចពិចារណាអំពីការផ្សព្វផ្សាយនៅលើប្រព័ន្ធផ្សព្វផ្សាយសង្គម ឬទំព័ររបស់ស្តេក ឬវួដក្នុងមូលដ្ឋានផងដែរ ។ មុននឹងផ្តួចផ្តើមវិធីសាស្ត្រផ្សព្វផ្សាយណាមួយទាំងនេះ សូមពិនិត្យឡើងវិញនូវគោលការណ៍ណែនាំច្បាប់មូលដ្ឋាននៅលើគេហទំព័រ englishconnect.org/leader/approved-locations ។

ស្វាគមន៍អ្នករៀន ។ បង្កើតផែនការមួយសម្រាប់របៀបដែលអ្នកនឹងស្វាគមន៍អ្នករៀន នៅពេលពួកគេចុះឈ្មោះសម្រាប់ក្រុមនេះ ។

អញ្ជើញមិត្តដែលមានជំនឿផ្សេងទៀត ។ អ្នកត្រូវបានលើកទឹកចិត្តឲ្យបញ្ចូលមនុស្សមកពីសាវតាជំនឿផ្សេងគ្នា ។ សូមបង្ហាញការគោរពចំពោះជំនឿរបស់អ្នកដទៃជានិច្ច ខណៈចែកចាយសេចក្ដីជំនឿរបស់អ្នកដោយបើកចំហថា ព្រះអាចជួយអ្នកចូលរួមរៀនភាសាអង់គ្លេស ។

ពិចារណាពីការអញ្ជើញយុវវ័យ ។ អ្នកអាចរៀបចំក្រុមសម្រាប់តែយុវវ័យ ឬអ្នកអាចអញ្ជើញយុវវ័យឲ្យចូលរួមជាមួយមជ្ឈិមវ័យ ។ នៅក្នុង EnglishConnect ជំនាន់ដែលកំពុងពេញវ័យរៀនពីរបៀបទទួលបានជំនួយពីព្រះដើម្បីរៀនភាសាអង់គ្លេស ។ មេរៀនទាំងនេះអាចជួយពួកគេឲ្យមានជំនឿថា ព្រះនឹងជួយពួកគេនៅគ្រប់ផ្នែកនៃជីវិតរបស់ពួកគេ ។

ធ្វើតាម គោលនយោបាយសាសនាចក្រសម្រាប់ការការពារយុវវ័យ។ អនីតិជន ( អាយុ ១៨ ឆ្នាំ ឬតិចជាងនេះ ហើយរស់នៅក្នុងផ្ទះ ) ត្រូវតែមានទម្រង់បែបបទយល់ព្រមពីឪពុកម្ដាយដែលបានចុះហត្ថលេខាមុននឹងចូលរួមក្នុងក្រុមនេះ ។ ទម្រង់បែបបទមានជាច្រើនភាសានៅលើគេហទំព័រ englishconnect.org/resources/leader ។ លើសពីនេះទៀត ក្រុម EnglishConnect ត្រូវតែធ្វើតាមគោលនយោបាយសាសនាចក្រជានិច្ចថា យ៉ាងហោចណាស់មជ្ឈិមវ័យដែលមានការទទួលខុសត្រូវពីរនាក់ត្រូវមានវត្តមានគ្រប់ពេលក្នុងអំឡុងពេលប្រជុំក្រុម ។ គោលនយោបាយទាំងនេះត្រូវតែអនុវត្ត ទោះបីជាក្រុមនេះកំពុងជួបគ្នាតាមអនឡាញក៏ដោយ ។

ការរីកចម្រើនទៅកាន់កម្រិតបន្ទាប់

បង្រៀនអ្នករៀនអំពី EnglishConnect និង BYU–Pathway Worldwide និង អាជីពវិជ្ជាជិវៈ ។ EnglishConnect និង BYU–Pathway Worldwide ផ្តល់ផ្លូវមួយសម្រាប់អ្នករៀនដើម្បីទទួលបានជំនាញថ្មីនៅក្នុងបរិយាកាសនៃការរាប់អាន និងសេចក្ដីជំនឿ ។ អ្នកអាចស្វែងរកធនធានបាននៅគេហទំព័រ byupathway.org/englishconnect ។

ជួយអ្នករៀនឲ្យចុះឈ្មោះចូលរៀន EnglishConnect ៣ ។ សូមមើលផ្នែក « ភ្ជាប់អ្នករៀនទៅនឹងក្រុម EnglishConnect ៣ » ។

ភ្ជាប់ទំនាក់ទំនងជាមួយពួកអ្នកផ្សព្វផ្សាយសាសនាផ្នែកសេវាកម្ម BYU–Pathway Worldwide ក្នុងមូលដ្ឋានរបស់អ្នក ។ ពិភាក្សាអំពីវិធីដើម្បីគាំទ្រដល់អ្នករៀន នៅពេលដែលពួកគេផ្លាស់ប្តូរពី EnglishConnect ៣ ទៅ BYU–Pathway Worldwide ។

ការភ្ជាប់ជាមួយធនធានសាសនាចក្រដទៃទៀត

ភ្ជាប់ជាមួយធនធានបន្ថែមរបស់សាសនាចក្រ ។ សូមធ្វើផែនការភ្ជាប់អ្នកចូលរួមជាមួយនឹងធនធានសាសនាចក្របន្ថែមទៀត ដូចជាក្រុមភាពខ្លួនទីពឹងខ្លួនផ្សេងៗទៀត សកម្មភាពយុវវ័យ និងឱកាសដើម្បីរៀនបន្ថែមអំពីដំណឹងល្អរបស់ព្រះយេស៊ូវគ្រីស្ទ ។ សូមមើលទំព័រ « ធនធានផ្នែកផ្លូវចិត្ត អប់រំ និងការងារ » នៅលើគេហទំព័រ ChurchofJesusChrist.org សម្រាប់ព័ត៌មានបន្ថែមទៀត ។