Mau mana’o nō te fa’aitoitora’a i te tuatāpapara’a ta’ata hō’ē ’e te tuatāpapara’a ’utuāfare

Teie te tahi mau mana’o nō te tauturu ia ’oe ’ia fa’aitoito i te mau pīahi ’ia tuatāpapa i te parau a te Atua i te fare ’ei ta’ata hō’ē ’e ’ei ’utuāfare. ’A ara maita’i, e’ita e nehenehe i te tā’āto’ara’a o te mau pīahi ’ia tuatāpapa i te mau pāpa’ira’a mo’a ’e tō rātou mau ’utuāfare (’ei hi’ora’a, tē ora nei te tahi mau pīahi ’o rātou ana’e ’e ’aore rā i roto i te mau ’utuāfare e ’ere te tā’āto’ara’a i te melo nō te ’Ēkālesia).

• E ani i te mau pīahi ’ia fa’a’ite mai i te mau mea i tupu nō rātou ’a tuatāpapa ai rātou i te mau pāpa’ira’a mo’a i te fare. ’Ei hi’ora’a, e nehenehe tā ’oe e ani ia rātou ’ia fa’a’ite mai i te hō’ē ’īrava tei ha’aputapū ia rātou ’e ’ia fa’ata’a mai nō te aha ’ua tāpe’a mai rātou i te reira.

• ’A ani i te mau pīahi ’ia hōro’a mai i te mau hi’ora’a nō te mau mea tā rātou e rave nei nō te fa’ariro i te tuatāpapara’a pāpa’ira’a mo’a a te ta’ata hō’ē ’e a te ’utuāfare ’ei ’ohipa faufa’a roa. (E nehenehe te tahi mau mana’o e ’itehia i raro a’e i te « Mau mana’o nō te ha’amaita’i i tā ’oe iho tuatāpapara’a pāpa’ira’a mo’a » ’e te « Mau mana’o nō te ha’amaita’i i tā te ’utuāfare tuatāpapara’a pāpa’ira’a mo’a » o te Mai, pe’e mai—nō te ta’ata hō’ē ’e te ’utuāfare.)

• E tītau manihini i te mau pīahi ’ia fa’a’ite mai nāhea tō rātou ravera’a i te mau mana’o tei tae mai i roto i tā rātou iho tuatāpapara’a pāpa’ira’a mo’a ’aore rā te tuatāpapara’a pāpa’ira’a mo’a a te ’utuāfare.

• E rave i te tahi minuti nō te fa’a’ite i te mau pīahi i te tahi o te mau mātēria tauturu tei hōro’ahia mai e te ’Ēkālesia nō te tauturu i te mau pīahi ’ia tuatāpapa i te ’evanelia, mai te mau tauturu tuatāpapara’a pāpa’ira’a mo’a e ’itehia i ni’a ia scriptures.ChurchofJesusChrist.org ; te « Mau ’ā’amu o te mau pāpa’ira’a mo’a » e ’itehia i ni’a ia children.ChurchofJesusChrist.org ; te mau mātēria nā te feiā ’āpī i ni’a ia youth.ChurchofJesusChrist.org ; te mau buka ha’api’ira’a nā te seminaire ’e te institut ; ’e te mau video, te mau haruharura’a fa’aro’o, ’e te mau hōho’a e ’itehia i ni’a ia medialibrary.ChurchofJesusChrist.org. E rave rahi o teie mau mātēria e ’ite-ato’a-hia i roto i te fa’anahora’a Vaira’a buka ’evanelia.

• ’A rave i te tahi minuti nō te fa’ata’a nāhea i te fa’a’ohipa i te fa’anahora’a Vaira’a buka ’evanelia, ’e nāhea e tāpa’o i te mau ’īrava ’e e pāpa’i i te mau mana’o e tae mai.

• E ani i te hō’ē ’e ’aore rā i te tahi mau pīahi ’ia fa’a’ite mai nāhea rātou i te ha’api’ira’a i te hō’ē parau tumu ta’a ’ē i tō rātou ’utuāfare.