“Mga Hunahuna nga Hinumduman: Ang Balay ni Israel,” Dali, Sunod Kanako––Alang sa mga Indibidwal ug mga Pamilya: Daang Tugon 2022 (2021)

“Mga Hunahuna nga Hinumduman: Ang Balay ni Israel,” Dali, Sunod Kanako––Alang sa mga Indibidwal ug mga Pamilya: 2022

Imahe

icon sa mga hunahuna

Mga Hunahuna nga Hinumduman

Ang Balay ni Israel

Diha sa usa ka dapit sa kamingawan sa silangan sa Canaan, si Jacob mabalak-ong nagpaabut sa pakigkita sa iyang kaluha nga igsoong lalaki, si Esau. Ang katapusang higayon si Jacob nakakita ni Esau, mga 20 ka tuig ang milabay, si Esau naghulga sa pagpatay kaniya. Gigahin ni Jacob ang tibuok gabii sa pakigbisog didto sa kamingawan, naninguha og panalangin gikan sa Dios. Isip resulta sa hugot nga pagtuo, paglahutay, ug determinasyon ni Jacob, ang Dios mitubag sa iyang mga pag-ampo. Nianang gabhiona ang ngalan ni Jacob giilisan og Israel, usa ka ngalan nga nagkahulugan og “kay nakigbugno ka sa Dios” (Genesis 32:28, footnoteb; tan-awa usab sa Genesis 32:24–32).¹

Duol sa Suba sa Jabbok, nadawat ni Jacob ang ngalan nga Israel.

Kini ang unang higayon nga ang ngalang Israel makita sa Biblia, ug kini usa ka ngalan nga nagpabilin sa tibuok nga basahon ug sa tibuok nga kasaysayan. Ang ngalan sa wala madugay nagpasabut ngadto sa labaw pa kay sa usa ka tawo lamang. Si Israel may 12 ka anak nga mga lalaki, ug ang ilang mga kaliwat sa kinatibuk-an nailhan isip ang “balay ni Israel,” ang “mga tribo ni Israel,” ang “mga anak ni Israel,” o ang “mga Israelite.”

Sa tibuok kasaysayan, ang mga anak ni Israel naghatag og dako kaayong importansya sa ilang kagikanan gikan sa usa sa napulog duha ka mga tribo ni Israel. Ang ilang kaliwatan usa ka importanting bahin sa ilang ilhanan sa pakigsaad. Mipahayag si Apostol Pablo nga siya “sakop sa banay ni Benjamin” (Mga Taga-Roma 11:1). Sa dihang si Lehi mipadala sa iyang mga anak ngadto sa Jerusalem sa pagkuha sa mga palid nga tumbaga, usa ka rason mao nga ang mga palid naglangkob “sa kagikanan sa iyang mga amahan” (1 Nephi 5:14; tan-awa usab sa 1 Nephi 3:3). Nadiskubrehan ni Lehi nga siya usa ka kaliwat ni Joseph, ug ang pagsabut sa iyang kaliwatan sa ilang koneksyon ngadto sa balay ni Israel nakita nga importante ngadto kanila sa mga katuigang moabut (tan-awa sa Alma 26:36; 3 Nephi 20:25).

Sa Simbahan karon, ikaw makadungog mahitungod sa Israel diha sa mga panultihon sama sa “ang pagpundok sa Israel.” Nagkanta kita mahitungod sa “Manunubos sa Israel,” sa “Paglaum sa Israel,” ug sa “Kamong Elder sa Israel.”² Niini nga mga higayon, kita wala lamang magsulti o magkanta mahitungod sa karaang gingharian sa Israel o sa bag-ong nasud nga gitawag og Israel. Hinoon, kita nagpasabut ngadto niadtong kinsa gipundok gikan sa mga nasud sa kalibutan ngadto sa Simbahan ni Jesukristo. Kita nagpasabut ngadto sa mga tawo kinsa milahutay ngadto sa Dios, kinsa makugihong nagtinguha sa Iyang mga panalangin, ug kinsa, pinaagi sa bunyag, nahimo nga Iyang mga tawo sa pakigsaad.

Ang imong patriyarkal nga panalangin nagpahayag sa imong koneksyon ngadto sa usa sa mga tribo sa balay ni Israel. Kana mas labaw pa kay sa usa ka makapadani nga piraso nga impormasyon sa kasaysayan sa pamilya. Ingon nga kabahin sa balay ni Israel nangahulugan nga ikaw adunay pakigsaad nga relasyon uban sa Langitnong Amahan ug ni Jesukristo. Kini nangahulugan nga ikaw, sama ni Abraham gitakda nga “mahimong usa ka panalangin” ngadto sa mga anak sa Dios (Genesis 12:2; Abraham 2:9–11). Kini nangahulugan, sa mga pulong ni Pedro, nga “kamo maoy usa ka kaliwatan nga pinili, ang kahugpungan sa harianong pagkapari [sacerdote], ang nasud nga balaan, ang katawhan nga iyang kaugalingon sa Dios, aron kamo magamantala sa kahibulongang mga buhat niya nga nagtawag kaninyo gikan sa kangitngit ngadto sa iyang katingalahang kahayag” (1 Pedro 2:9). Kini nangahulugan nga ikaw usa kinsa “nakigbugno sa Dios” samtang ikaw nagtahud sa imong mga pakigsaad uban Kaniya.