babaye nga nagtuon sa mga kasulatan

Pagkakabig Mao ang Atong Tumong

Ang katuyoan sa tanang pagkat-on ug pagtudlo sa ebanghelyo mao ang paglig-on sa atong pagkakabig ngadto sa Langitnong Amahan ug ni Jesukristo ug sa pagtabang kanato nga mas mahisama Kanila. Tungod niini nga rason, kon magtuon kita sa ebanghelyo, wala lamang kita mangita og bag-ong impormasyon; gusto kitang mahimong “bag-o [nga] binuhat” (2 Mga Taga-Corinto 5:17). Nagpasabot kini sa pagsalig diha sa Langitnong Amahan ug ni Jesukristo aron matabangan kita sa pag-usab sa atong mga kasingkasing, sa atong mga pagtan-aw, sa atong mga lihok, ug sa ato gayod nga mga kinaiya.

Apan ang matang sa pagkat-on sa ebanghelyo nga makapalig-on sa atong hugot nga pagtuo ug makagiya ngadto sa milagro sa pagkakabig dili mahitabo dihadiha dayon. Kini molugway lapas sa usa ka klasehanan ngadto sa atong mga kasingkasing ug mga panimalay. Nagkinahanglan kini og kanunay, inadlaw-adlaw nga mga paningkamot sa pagsabot ug pagpuyo sa ebanghelyo. Ang pagkat-on sa ebanghelyo nga naggiya ngadto sa tinuod nga pagkakabig nagkinahanglan sa impluwensiya sa Espiritu Santo.

Ang Espiritu Santo naggiya kanato ngadto sa kamatuoran ug nagsaksi niana nga kamatuoran (tan-awa sa Juan 16:13). Naglamdag Siya sa atong mga hunahuna, naghait sa atong mga salabotan, ug nagtandog sa atong mga kasingkasing uban sa pagpadayag gikan sa Dios, ang tinubdan sa tanang kamatuoran. Ang Espiritu Santo naghinlo sa atong mga kasingkasing. Nagdasig Siya kanato og tinguha sa pagpuyo sa kamatuoran, ug naghunghong Siya kanato og mga paagi sa pagbuhat niini. Sa tinuod, “ang Espiritu Santo … magatudlo [kanato] sa tanang butang” (Juan 14:26).

Tungod niini nga mga rason, sa atong mga paningkamot sa pagsunod, pagkat-on, ug pagtudlo sa ebanghelyo, kita kinahanglan una ug labaw sa tanan sa pagtinguha sa pakig-uban sa Espiritu. Kini nga tumong kinahanglang modumala sa atong mga pagpili ug mogiya sa atong mga hunahuna ug mga lihok. Kinahanglan nga tinguhaon nato ang bisan unsa nga nagdapit sa impluwensiya sa Espiritu ug sa pagsalikway sa bisan unsa nga nag-abog niana nga impluwensiya—kay nasayod kita nga kon makahimo kita sa pagpakatakos sa presensya sa Espiritu Santo, makahimo usab kita sa pagpakatakos sa pagpuyo diha sa presensya sa Langitnong Amahan ug sa Iyang Anak, si Jesukristo.