Dienzela Luaku, Undonde—Bua mu Dîku ne mu Ekelezia

Tshiambuluishi Etshi Ntshia Nganyi?

Luaku, Undonde udi bua ewu yonsu udi musua kulonga kupitshila ku mifundu—bua muntu, bua dîku, ne mu tulasa tua Ekelezia. Pawikala kuyi mulonga mifundu bimpa kala, tshiambuluishi etshi tshidi mua kukuambuluisha bua kubanga. Pawikala ukadi ne tshibidilu tshimpa tshia kulonga mifundu, tshiambuluishi etshi tshidi mua kukuambuluisha bua kuikala ne dimanya divula.

Bantu ne Mêku ku Nzubu

Nzubu, udi muaba wa nsongu wa kulonga lumu luimpa. Balongeshi benu ku Ekelezia badi mua kunukuatshisha, ne nudi mua kupeta dikankamika dia kudi bidimba bikuabu bia tshikongu. Kadi bua nsombelu wa mu nyuma, wewa ne dîku dieba nudi ne dijinga ne tshiakudia tshia dituku dionsu ku “dîyi dimpa dia Nzambi” (Moloni 6:4; tangila kabidi Russell M. Nelson, “Opening Remarks,” Liahona, Ngondu wa Dikumi ne Umua 2018, 6–8).

Enzela tshiambuluishi etshi mu mushindu wa ne tshikala tshikuambuluisha. Bifundu binena bidi bileja amua malelela a tshiendelela adi asanganyibua mu Dipungila Dikulukulu. Adi aleja kabidi ngenyi ne bibilu bua kukuambuluisha mu dilonga dia mifundu nkaya, ne dîku dieba, anyi ne balunda beba. Pawudi ubala, londa buludiki bua Nyuma bua kupeta malelela a tshiendelela adi ne mushinga kuwudi. Keba mikenji ya Nzambi bueba, ne londa meji awudi upeta pa lukasa.

Balongeshi ne Balongi mu Ekelezia

Luaku, Undonde—Bua mu Dîku ne mu Ekelezia udi buludiki bua tulasa tua Mbedi tua Dialumingu, tua Tshilongelu tshia Dialumingu tua nsonga ne tua bakulumpa, tulasa tua Nsongakaji ne bisangilu bia mpuilu ya Buakuidi bua Alona. Wewa ulongesha mu umua wa ku miaba eyi, tudi tukukankamika bua kuenzela bifundu mu tshiambuluishi etshi bua dilonga dieba pawudi udilongolola bua kulongesha. Bangila ku dipeta mamanya eba nkayeba mu mifundu. Didilongolola dieba dia mushinga nedienzeka pawudi ukeba mifundu ne dikeba dia kupeta meji a Nyuma wa Tshijila. Keba malelela a tshiendelela adi mua kukuambuluisha bua ufuanangana menamena ne Tatu wa mu Diûlu ne Yezu Kilisto. Luaku, Undonde udi mua kukuambuluisha bua kumona amua a ku malelela ne kumvua mushindu wa mifundu.

Kuata mu meji ne dilonga dia lumu luimpa, mu buimpa, didi diteka nzubu munkatshi ne Ekelezia muambulushi. Mu miaku mikuabu, bujitu bueba bunena budi bua kukuatshisha bantu baudi ulongesha mu didienzeja diabu bua kulonga ne kuteka lumu luimpa mu tshienzedi ku nzubu. Kanudiabakenyi bua kuikala ne bintu bimua bia kubapesha mu kalasa. Pananku, bapesha mishindu ya kuabanyangana mamanya abu, ngenyi, ne nkonku pa bitupa bia mifundu bivuabu babala ku nzubu. Babikila bua kuabanyangana malelela a tshiendelela adibu bapeta. Etshi tshidi ne mushinga muvula kupita dijandula bintu bia bungi bia malonga.

Tulasa tua Dialumingu tua Bansonga ne tua Bakulumpa

Kamua ka ku tubingila tutudi tudisangisha mu tulasa tua Dialumingu kadi ka kukuatshishangana ne kukoleshangana umua ne mukuabu patudi tudienzeja bua kulonda Yezu Kilisto. Mushindu mupepela bua kutshienza udi wa kuela lukonku bu “Tshinyi tshidi Nyuma wa Tshijila mukulongesha lumingu elu pauvua ulonga mifundu?” Mandamuna ku lukonku elu adi mua kulombola ku diyukilangana dimpa didi dibaka ditabuja mu Yezu Kilisto ne mu lumu luimpa Luenda.

Pashisha udi mua kubikila diyukilangana dishindamena pa bidi bileja bia kulonga mu Luaku, Undonde. Tshilejilu, lungenyi lua dilonga ludi mua kuleja dikeba Yeshaya 53, dikeba miaku idi yumvuija mudimu wa Mupandishi. Udi mua kukonkesha bidimba bia kalasa bua bifila ngenyi kampanda anyi ngumvuilu idi miaku eyi mifila meji kudibu. Anyi nudi mua kupitshisha diba mu dilonga dia miaku bu kalasa.

Mpuilu ya Buakuidi bua Alona ne Tulasa tua Bansonga Bakaji

Padi mpuilu ya Buakuidi bua Alona ne tulasa tua Bansonga Bakaji badisangisha mu Dialumingu, kipatshila kabu kadi kashilangana ne ka kalasa ka Tshilongelu tshia Dialumingu. Mu dikumbaja ku diambuluisha umua ne mukuabu badi balonga lumu luimpa lua Yezu Kilisto, bisumbu ebi bidi bidisangisha kabidi bua kubelangana pa dikumbaja dia mudimu wa lupandu ne wa dizanjikibua (tangila Mukanda Munena wa Maludiki, 1.2). Badi babienza ne buludiki bua malombodi makulu a kalasa ne a mpuilu.

Bua kabingila aka, tshisangilu tshionsu tshia mpuilu anyi tshia kalasa tshidi ne tshia kubanga ne tshidimba tshia bulombodi bukulu tshilombola diyukilangana pa madienzeji, tshilejilu, kuteka lumu luimpa mu tshienzedi, kusadila bantu badi mu dijinga, kutangalaja lumu luimpa, anyi kubuela mu mudimu wa ntempelo ne muyuki wa dîku.

Panyima pa diba edi dia dibelangana pamua, mulongeshi udi ulombola kalasa anyi mpuilu mu dilongesha lumu luimpa pamua. Balombodi bakulumpa anyi bidimba bia kalasa anyi bia mpuilu bidi mua kupeshibua bujitu bua kulongesha. Bulombodi bukulu bua kalasa anyi bua mpuilu, mu dipetangana ne balombodi bakulumpa, badi mua kuenza midimu eyi.

Bantu badi ne bujitu ebu badi mua kudilongolola mu kubala ngenyi ya mua kulongesha mu ndongamu wa ku lumingu wa Luaku, Undonde. Mu tshifundu tshionsu, ikone ewu udi uleja tshibilu tshidi tshisunguluka tshikala ne mushinga bua bansonga. Nansha nanku, bionsu bia ku bidi bileja mu tshifundu bidi mua kuenzela bu tshibilu tshia dilonga dia bansonga.

Bua kakanda ka njila ka bisangilu bia mpuilu ne tulasa, tangila tshisakidilu D.

Tshilongelu tshia Mbedi

Didilongolola dieba bua kulongesha kalasa ka Mbedi didi dibanga pawudi ulonga mifundu nkayeba ne dîku dieba. Pawudi utshienza, ikala munzuluka ku ngumvuilu wa nyuma ne ngenyi ya kudi Nyuma wa Tshijila pa bana mu kalasa keba ka Mbedi. Ikala musambidi, ne Nyuma udi mua kukupesha meji ne ngenyi bua kubambuluisha bua kulonga lumu luimpa lua Yezu Kilisto.

Pawudi udilongolola bua kulongesha, udi mua kupeta meji a nsakidilu ku dijingulula dia ngenyi ya kulongesha mu Luaku, Undonde—Bua mu Dîku ne mu Ekelezia. Tshifundu tshionsu mu tshiambuluishi etshi tshidi ne tshitupa ne tshiena bualu tshia “Ngenyi bua Dilongesha Bana.” Ela meji pa ngenyi eyi bu bidi bikupesha bua kutokesha meji eba. Udi mumanya bana ba mu kalasa ka Mbedi keba—ne neubamanya bimpa paudi uyukilangana nabu mu kalasa. Nzambi mmubamanya kabidi, ne neakupesha meji ne mushindu muimpa bua kubalongesha ne kubabenesha.

Bidi mua kuenzeka ne bana ba mu kalasa keba nebikala bakadi benza tshimua tshia ku bibilu mu Luaku, Undonde ne mêku abu. Bidi bimpa. Diambulula didi dimpa. Ela meji bua kubikila bana bua babanyangana bivuabu balonga mu dîku—kadi udi kabidi mua kulongolola mishindu bua bana kudibuikamu nansha bobu kabayi balonga ku nzubu. Bana badi balonga malelela a lumu luimpa bikola menamena padi malelela â alongeshibua ku diambulula ku bibilu bishilangana. Pawudi usangana ne tshibilu tshia dilongesha tshidi tshimpa bua bana, ela meji bua ditshiambulula, sungasunga pawudi ulongesha bana batantamana. Udi kabidi mua kumonanuna tshibilu tshia ku dilongesha dishala.

Mu ngondu idi ne Dialumingu itanu, balongeshi ba tulasa tua Mbedi mbalombibua bua kushintulula kabala matuku ka Luaku, Undonde ka tshifundu mu Dialumingu ditanu ne tshimua anyi bibilu bia bungi bia dilonga mu “Tshisakidilu B: Bua Tshilongelu tshia Mbedi—Dilongolola Bana bua Diba dia moyo wabu mujima bikala mu Njila wa Bipungidi ne Nzambi.”