Tshisakidilu Tshia C

Bua Tshilongelu tshia Mbedi—Maludiki bua Diba dia Kuimba ne Dileja Bana mu Tshisangilu tshia Biakudia bia Tshijila

Misambu ya tshijila idi tshiamua tshia mudimu tshia bukola bua kuambuluisha bana balonga pa dilongolola dia disanka dia Tatu wa mu Diûlu ne malelela a nshindamenu a lumu luimpa lua Yezu Kilisto. Padi bana bimba misambu ya nshindamenu ya lumu luimpa, Nyuma wa Tshijila neajadika bua bulelela buayi. Miaku ne misambu nebishala mu meji ne mitshima bia bana mu matuku a moyo abu.

Keba diambuluisha dia Nyuma pawudi udilongolola bua kulongesha lumu luimpa kupitshila ku misambu. Fila bujadiki bueba bua malelela awudi wimba. Ambuluisha bana bua bamona mushindu udi misambu ifuanangana ne bidibu balonga ne bibidila nabi ku nzubu ne mu tulasa tua Tshilongelu tshia Mbedi.

Maludiki bua Dileja Bana mu Tshisangilu tshia Biakudia bia Tshijila.

Ku bulombodi bua muepiskopo, dileja bana mu tshisangilu tshia biakudia bia tshijila didi bulelela dienzeka munkatshi mua ngondu isatu ya ndekelu wa tshidimu. Bu bulombodi bukulu bua Tshilongelu tshia Mbedi ne muludiki wa misambu, kuatayi mudimu ne mufidi wa mibelu mu buepiskopo udi utangila Tshilongelu tshia Mbedi bua kulongolola Dileja.

Dileja didi mua kuanyishila bana bua kuleja bobu ne mêku abu bidibu balonga ku Dilongesha ne Bipungidi mu dîku ne mu Tshilongelu tshia Mbedi, biangata misambu ya Bana idibu bimba munda mua tshidimu tshijima. Panudi nulongolola dileja, elayi meji pa mushindu udidi mua kuambuluisha bantu ba Ekelezia bua kuimanyina pa Mupandishi ne malongesha enda.

Bikongu bidi ne bana bakesa bidi mua kupangadika mishindu idi bidimba bia dîku mua kuenza pamua ne bana babu. Tshidimba tshia buepiskopo tshidi mua kujikija tshisangilu ne difila tulema tukesa.

Pawudi ulongolola dileja, vuluka maludiki â:

• Meba a didilongolola kaena mua kuangata diba kupita tulasa tua Tshilongelu tshia Mbedi anyi mêku.

• Dienzela bintu bidi bileja, bivualu, ne maleja a pa nshinga kabiena bianyishibua mu tshisangilu tshia biakudia bia tshijila.

Tangila Mukanda Munena wa Maludiki: Disadila mu Ekelezia wa Yezu Kilisto wa Bansantu ba Matuku a Ndekelu, 12.2.1.2, Tshisangi tshia Lumu Luimpa.

Maludiki bua Diba dia Kuimba

Minuta 5 (bulombodi bukulu bua Tshilongelu tshia Mbedi): Disambila dia ntuadijilu, mufundu ne tunungu tua ditabuija, ne muyuki.

Minuta 20 (Mulombodi wa misambu): Diba dia Kuimba

Bulombodi bukulu bua Tshilongelu tshia Mbedi ne mulombodi wa misambu badi basungula misambu bua ngondu yonsu bua kukolesha nshindamenu idi bana balonga mu tulasa tuabu ne ku nzubu. Lista wa misambu idi ikolesha nshindamenu eyi udi muela mu buludiki ebu.

Pawudi ulongesha bana misambu, babikila bua kuamba bikadibu balonga pa miyuki ne nshindamenu ya dilongesha idi musambu ulongesha. Bikila bana bua kuamba ngenyi ne ngumvuilu pa malelela adi mapeta mu misambu.

Mukanda wa misambu ya Bana udi tshiambuluishi tshia misambu ya Tshilongelu tshia Mbedi. Misambu ya mu mukanda wa misambu ne misambu ya mu Mulunda idi kabidi ikumbana. Dienzela dia musambu mukuabu kudi Tshilongelu tshia Mbedi didi ne bua kuikala dianyishibua kudi buepiskopo (tangila Mukanda Munena wa Maludiki, 12.3.4).

Misambu bua Diba dia Kuimba

Ngondu wa Kumpala

• “Follow the Prophet,” Mukanda wa Misambu ya Bana, 110–11

• “Search, Ponder, and Pray,” Mukanda wa Misambu ya Bana, 109

Ngondu Muibidi

• “Dare to Do Right,” Mukanda wa Misambu ya Bana, 158

• “A Child’s Prayer,” Mukanda wa Misambu ya Bana, 12–13

Ngondu Muisatu

• “Every Star Is Different,” Mukanda wa Misambu ya Bana, 142

• “When I Am Baptized,” Mukanda wa Misambu ya Bana, 103

Ngondu Muinayi

• “When He Comes Again,” Mukanda wa Misambu ya Bana, 82–83

• “Did Jesus Really Live Again?,” Mukanda wa Misambu ya Bana, 64

Ngondu Muitanu

• “‘Give,’ Said the Little Stream,” Mukanda wa Misambu ya Bana, 236

• “Shine On,” Mukanda wa Misambu ya Bana, 144

Ngondu Muisambombu

• “The Holy Ghost,” Mukanda wa Misambu ya Bana, 105

• “I Want to Be a Missionary Now,” Mukanda wa Misambu ya Bana, 168

Ngondu wa Muanda Muteketa

• “Stand for the Right,” Mukanda wa Misambu ya Bana, 159

• “He Sent His Son,” Mukanda wa Misambu ya Bana, 34–35

Ngondu wa Muanda Mukulu

• “I’m Trying to Be like Jesus,” Mukanda wa Misambu ya Bana, 78–79

• “I Feel My Savior’s Love,” Mukanda wa Misambu ya Bana, 74–75

Ngondu wa Tshitema

• “I Love to See the Temple,” Mukanda wa Misambu ya Bana, 95

• “To Think about Jesus,” Mukanda wa Misambu ya Bana, 71

Ngondu wa Dikumi

• “Family History—I Am Doing It,” Mukanda wa Misambu ya Bana, 94

• “The Church of Jesus Christ,” Mukanda wa Misambu ya Bana, 77

Ngondu wa Dikumi ne Umua

• “Keep the Commandments,” Mukanda wa Misambu ya Bana, 146

• “To Be a Pioneer,” Mukanda wa Misambu ya Bana, 218–19

Ngondu wa Dikumi ne Muibidi

• “I Am a Child of God,” Mukanda wa Misambu ya Bana, 2–3

• “O Little Town of Bethlehem,” Hymns, no. 208

Dienzela Misambu bua Kulongesha Dilongesha

Diba dia kuimba didi ne kipatshila ka kuambuluisha bana bua kulonga malelela a lumu luimpa. Ngenyi idi ilonda eyi idi mua kukupesha meji a nyuma pawudi ulongolola mishindu ya kulongesha nshindamenu ya lumu luimpa mipeta mu misambu ne misambu ya Tshilongelu tshia Mbedi.

Bala mifundu idi ipetangana. Bua misambu ya bungi ya mu Mukanda wa Misambu ya Bana ne mukanda wa misambu, idi ipetangana ne mifundu idi mitela. Ambuluisha bana bua kubala imua ya ku mifundu eyi, ne akula pa mushindu udi mifundu ipetangana ne misambu. Udi kabidi mua kufunda tshikebelu tshia mifundu ku tshibasa ne kubikila bana bua kutuangaja tshifundilu tshionsu ku musambu anyi kanungu ku musambu.

Uwuja mu muaba mutupu. Funda kanungu ka musambu ku tshibasa ne mêyi a mushinga adi mapangika. Pashisha lomba bana bua bimba misambu, kumvua miaku ya kuwuja mu miaba mitupu Padibu buwuja miaba mitupu, yukilangana pa tshidi nshindamenu ya lumu luimpa luwudi ulonga ku miaku mipangika.

Jadika. Fila bujadiki kudi bana pa malelela a lumu luimpa mapeta mu misambu ya Bana. Ambuluisha bana bua bumvua ne kuimba kudi mushindu umua udibu mua kufila bujadiki buabu ne kumvua Nyuma.

Imana bu mujadiki. Bikila bana bua kuimana muntu ku muntu ne kufila bidibu balonga ku misambu idibu bimba ne mushindu udibu bumvua pa malelela malongesha mu musambu. Bebeja mushindu udibu bumvua padibu bimba musambu, ne bambuluisha bua kujandula buenzeji bua Nyuma wa Tshijila.

Enzela bimfuanyi. Lomba bana bua bakuambuluisha bua kupeta anyi kuenza tshimfuanyi tshidi tshipetangana ne miaku ya mushinga anyi biambilu mu musambu. Babikila bua kuleja mushindu udi bimfuanyi bipetangana ku musambu ne tshidi musambu ulongesha. Tshilejilu, pawudi ulongesha musambu “When He Comes Again” (Mukanda wa Misambu ya Bana, 82–83), udi mua kuteka bimfuanyi mu tshibambalu bidi bileja miaku ya mushinga mu musambu (bu mudi banjelu, dibungi ne mutoto). Balomba bua kusangisha bimfuanyi ne kubiteka mu mulongo padibu bimba musambu pamua.

Leja tshintu tshia dilongesha. Udi mua kuenzela tshintu bua kufila meji a nyuma mu diyukila pa musambu. Tshilejilu, panudi nuimba musambu “‘Give,’ Said the Little Stream” (Mukanda wa Misambu ya Bana, 236), udi mua kuleja bana tshimfuanyi tshia bintu bu mudi musulu, bisonsa, mvula, anyi bilongu. Etshi tshidi mua kutuala ku muyuki pa mushindu udi bienzedi bikesa bia disadila mua kubenesha bakuabu mu mishindu ya mushinga.

Bikila bua difila mamanya a nkaya. Ambuluisha bana bua kutuangaja nshindamenu milongesha mu musambu ne mamanya adibu bapeta mu nshindamenu eyi. Tshilejilu, kumpala kua kuimba musambu pa ntempelo, udi mua kulomba bana bua kujula bianza biabu padibu bamona ntempelo. Babikila, padibu benda bimba, bua kuela meji pa mushindu udibu bumvua padibu bamona ntempelo.

Ela nkonku. Kudi nkonku ya bungi iwudi mua kuela pawudi wimba musambu. Tshilejilu, udi mua kuebeja bana tshidibu balonga ku kanungu konsu mu musambu. Udi kabidi mua kulomba bua kuela meji pa nkonku idi musambu wandamuna. Etshi tshidi mua kutuala ku muyuki pa malelela adi malongesha mu musambu.

Enzela bienzedi bipepela bia bianza. Bikila bana bua kuela meji a bienzedi bipepela bia bianza bua kubambuluisha bua kuvuluka miaku ne mikenji ya musambu. Tshilejilu, pawudi wimba “Search, Ponder, and Pray” (Mukanda wa Misambu ya Bana, 109), udi mua kubikila bana bua kutua munu pa mêsu abu padibu bimba pa dikeba dia mifundu, kutua munu pa mitu yabu padibu bimba pa dinanyina dia meji, ne kuvunga maboku padibu bimba pa disambila.