« ថ្ងៃទី ១–៧ ខែ កញ្ញា ៖ ‹ សម្រាប់សេចក្ដីសង្គ្រោះនៃស៊ីយ៉ូន › ៖ គោលលទ្ធិ និងសេចក្តីសញ្ញា ៩៤–៩៧ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )
« គោលលទ្ធិ និងសេចក្តីសញ្ញា ៩៤–៩៧ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
Kirtland Temple [ ព្រះវិហារបរិសុទ្ធខឺតឡង់ ] ដោយ អល រ៉ោនស៍
គោលលទ្ធិ និង សេចក្តីសញ្ញា ១–៧ ៖ « សម្រាប់សេចក្តីសង្គ្រោះនៃស៊ីយ៉ូន »
គោលលទ្ធិ និងសេចក្តីសញ្ញា ៩៤–៩៧
កាលពីបុរាណព្រះអម្ចាស់បានបញ្ជាឲ្យ ម៉ូសេសង់រោងឧបោសថ « តាមគំរូដែល [ ទ្រង់ ] បានបង្ហាញនៅឯលើភ្នំ » ( ហេព្រើរ ៨:៥ សូមមើលផងដែរ និក្ខមនំ ២៥:៨–៩ ) ។ រោងឧបោសថជាកន្លែងដ៏សំខាន់នៃជំរំក្នុងទីរហោស្ថានរបស់សាសន៍អ៊ីស្រាអែល ( សូមមើល ជនគណនា ២:១–២ ) ។
ក្នុងឆ្នាំ ១៨៣៣ ព្រះអម្ចាស់បានបញ្ជាដល់ យ៉ូសែប ស្ម៊ីធ ឲ្យសង់ព្រះវិហារបរិសុទ្ធ « ពុំមែនតាមរបៀបនៃពិភពលោកទេ » ប៉ុន្តែផ្ទុយទៅវិញ « តាមរបៀបដែលយើងនឹងបង្ហាញ » ( គោលលទ្ធិ និងសេចក្តីសញ្ញា ៩៥:១៣–១៤; សូមមើលផងដែរ ៩៧:១០ ) ។ ដូចរោងឧបោសថនៅក្នុងទីរហោស្ថានដែរ ព្រះវិហារបរិសុទ្ធគឺជាកន្លែងដ៏សំខាន់នៅក្នុងទីក្រុងខឺតឡង់ ( សូមមើល គោលលទ្ធិ និងសេចក្ដីសញ្ញា ៩៤:១ ) ។
បច្ចុប្បន្ននេះ ព្រះវិហារបរិសុទ្ធនៅពាសពេញពិភពលោក ។ ទោះបីជាវាមិននៅចំកណ្តាលទីក្រុងរបស់យើងក៏ដោយ ក៏ព្រះវិហារបរិសុទ្ធទាំងនោះនាំយើងទៅរកព្រះគ្រីស្ទ ដែលទ្រង់ជាអង្គដ៏សំខាន់នៃជីវិតរបស់យើង ។ ទោះបីជាព្រះវិហារបរិសុទ្ធមានរូបរាងខុសៗគ្នាក្ដី ប៉ុន្តែនៅក្នុងនោះយើងរៀនអំពីលំនាំដ៏ទេវភាពដូចគ្នា—អំពីផែនការនៃស្ថានសួគ៌ ដែលនាំឲ្យយើងអាចត្រឡប់ទៅកាន់វត្តមានរបស់ព្រះវិញបាន ។ ពិធីបរិសុទ្ធពិសិដ្ឋ និងសេចក្តីសញ្ញាភ្ជាប់យើងទៅកាន់ព្រះគ្រីស្ទ និងពង្រឹងក្រុមគ្រួសាររបស់យើង « ពុំមែនតាមរបៀបនៃពិភពលោកនេះទេ » ប៉ុន្តែគឺតាមរយៈគំរូដែលព្រះបានបង្ហាញយើង ។
សូមមើល ពួកបរិសុទ្ធ ១:១៦៩–១៧០, « A House for Our God » Revelations in Context ទំព័រ ១៦៥–១៧៣ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ
គោលលទ្ធិ និងសេចក្តីសញ្ញា ៩៤; ៩៧:១០–១៧
ខ្ញុំអាចធ្វើជា « ពិធីឆ្លងថ្វាយដល់ព្រះអម្ចាស់ » ។
នៅក្នុង គោលលទ្ធិ និងសេចក្តីសញ្ញា ៩៤ ព្រះអម្ចាស់ប្រទានការណែនាំអំពីការសង់អគាររដ្ឋបាលនៅក្នុងទីក្រុងខឺតឡង់—ជាការិយាល័យ និងរោងបោះពុម្ព ។ តើអ្វីដែលធ្វើឲ្យបងប្អូនចាប់អារម្មណ៍អំពីអ្វីដែលព្រះអម្ចាស់មានព្រះបន្ទូលអំពីអគារទាំងនេះនៅក្នុង គោលលទ្ធិ និងសេចក្តីសញ្ញា ៩៤:២–១២ ? តើវាប្រៀបធៀបទៅនឹងអ្វីដែលទ្រង់មានបន្ទូលអំពីព្រះវិហារបរិសុទ្ធនៅក្នុង ៩៧:១០–១៧ យ៉ាងដូចម្តេច ?
តើវាមានន័យយ៉ាងណាចំពោះបងប្អូនដើម្បី « ពិធីឆ្លងថ្វាយដល់ព្រះអម្ចាស់ » ?
ព្រះអម្ចាស់ទ្រង់វាយផ្ចាលអ្នកទាំងឡាយដែលទ្រង់ស្រឡាញ់ ។
នៅពេលវិវរណៈនៅក្នុង កណ្ឌទី ៩៥ បានទទួល ប្រហែលប្រាំខែបានកន្លងផុតទៅចាប់តាំងពីព្រះអម្ចាស់បានបញ្ជាពួកបរិសុទ្ធឲ្យសង់ដំណាក់របស់ព្រះ ( សូមមើល គោលលទ្ធិ និងសេចក្តីសញ្ញា ៨៨:១១៧–១១៩ )—ហើយពួកគេពុំទាន់ចាប់ផ្ដើមនៅឡើយ ។ សូមកត់សម្គាល់អំពីរបៀបដែលព្រះអម្ចាស់បានកែតម្រូវពួកគេនៅក្នុងវិវរណៈនេះ ។ បងប្អូនថែមទាំងអាចបង្កើតបញ្ជីគោលការណ៍មួយ ដែលបងប្អូនរកឃើញសម្រាប់ផ្តល់ការកែតម្រូវដោយបំផុសគំនិត ។ តើបងប្អូនរៀនអ្វីខ្លះអំពីព្រះអម្ចាស់មកពីរបៀបទ្រង់បានកែតម្រូវពួកបរិសុទ្ធរបស់ទ្រង់ ?
សូមមើលផងដែរ គោលលទ្ធិ និងសេចក្តីសញ្ញា ១២១:៤៣–៤៤; ឌី ថត គ្រីស្តូហ្វឺសិន « As Many as I Love, I Rebuke and Chasten » Liahona ខែ ឧសភា ឆ្នាំ ២០១១ ទំព័រ ៩៧–១០០ ។
ព្រះស្រឡាញ់កូនចៅរបស់ទ្រង់
គោលលទ្ធិ និងសេចក្ដីសញ្ញា ៩៥:៨, ១១–១៧; ៩៧:១០–១៧
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។
បន្ទាប់ពីត្រូវបានវាយផ្ចាលដោយសារការមិនបានសាងសង់ដំណាក់នៃព្រះអម្ចាស់នៅក្នុងទីក្រុងខឺតឡង់ ថ្នាក់ដឹកនាំទាំងឡាយរបស់សាសនាចក្របានជ្រើសរើសដីស្រែក្នុងទីវាលស្រូវសាលីមួយកន្លែង ដែលពួកគេនឹងសាងសង់ ។ ហៃរុម ស៊្មីធ ជា បងប្រុសរបស់ព្យាការីបានរត់ទៅយកកណ្តៀវភ្លាមដើម្បីចាប់ផ្តើមសម្អាតវាលស្រែ ។ លោកបានមានប្រសាសន៍ថា « យើងរៀបចំដើម្បីសាងសង់ដំណាក់ព្រះអម្ចាស់ ហើយខ្ញុំប្តេជ្ញាថា នឹងធ្វើជាមនុស្សទីមួយ ដែលមកធ្វើការ » ( នៅក្នុង Teachings of Presidents of the Church: Joseph Smith [ ឆ្នាំ ២០០៧ ] ទំព័រ ២៧១, ២៧៣ ) ។ តើបងប្អូនគិតថា ហេតុអ្វីបានជា ហៃរុម មានចិត្តចង់សង់ព្រះវិហារបរិសុទ្ធខ្លាំងម្ល៉េះ ? សូមជញ្ជឹងគិតអំពីការណ៍នេះពេលបងប្អូនអាន គោលលទ្ធិ និងសេចក្តីសញ្ញា ៩៥:៨, ១១–១៧; ៩៧:១០–១៧ ។
នៅសម័យរបស់យើង ព្រះអម្ចាស់ « កំពុងបង្កើនល្បឿនឲ្យយើងសាងសង់ព្រះវិហារបរិសុទ្ធនានា » ( រ័សុល អិម ណិលសុន « ផ្ដោតទៅលើព្រះវិហារបរិសុទ្ធ » លីអាហូណា ខែវិច្ឆិកា ឆ្នាំ ២០២២ ទំព័រ ១២១ ) ។ ប្រសិនបើនរណាម្នាក់សួរបងប្អូនថា ហេតុអ្វីបានជាសាសនាចក្រនៃព្រះយេស៊ូវគ្រីស្ទសង់ព្រះវិហារបរិសុទ្ធច្រើនយ៉ាងនេះ តើបងប្អូននឹងនិយាយយ៉ាងណា ? រកចម្លើយដែលអាចមាននៅក្នុង ៖
-
សារលិខិតរបស់ប្រធាន រ័សុល អិម ណិលសុន ដែលប្រកាសអំពីព្រះវិហារបរិសុទ្ធថ្មី ( ដូចជា « ឥឡូវគឺជាពេលវេលា » Liahona ខែ ឧសភា ឆ្នាំ ២០២២ ទំព័រ ១២៦ ) ។
-
« Why Latter-day Saints Build Temples » ( temples.ChurchofJesusChrist.org ) ។
-
វីដេអូ « Temples » ( នៅលើបណ្ណាល័យដំណឹងល្អ ) ។
What Is a Temple?
បងប្អូនអាចប្រៀបធៀបការខិតខំរបស់ពួកបរិសុទ្ធក្នុងការសង់ព្រះវិហារបរិសុទ្ធ ខឺតឡង់ ទៅនឹងការខិតខំរបស់បងប្អូនដើម្បីរៀបចំសម្រាប់បទពិសោធន៍ដ៏មានន័យជាមួយនឹងព្រះអម្ចាស់នៅក្នុងព្រះវិហារបរិសុទ្ធ ។ តើបងប្អូនអាចបង្ហាញអារម្មណ៍ដូចគ្នានៃភាពបន្ទាន់ដែល ហៃរុម ស្ម៊ីធ មានអារម្មណ៍ចំពោះដំណាក់ដ៏បរិសុទ្ធរបស់ព្រះអម្ចាស់យ៉ាងដូចម្ដេច ? ឧទាហរណ៍ តើបងប្អូនអាចធ្វើអ្វីបានដែលដូចជាការបោសសម្អាតវាលដូច ហៃរុម បានធ្វើ ? តើការលះបង់អ្វីខ្លះដែលបងប្អូនមានអារម្មណ៍ថា ព្រះអម្ចាស់ចង់ឲ្យបងប្អូនធ្វើ ? ( សូមមើល គោលលទ្ធិ និងសេចក្តីសញ្ញា ៩៧:១២ ) ។
សូមមើលផងដែរ « Holy Temples on Mount Zion » ទំនុកតម្កើង ល.រ. ២៨៩; Topics and Questions « Temples » នៅលើបណ្ណាល័យដំណឹងល្អ ។
ហៃរុម ស៊្មីធ សម្អាតទីធ្លាសម្រាប់ធ្វើព្រះវិហារបរិសុទ្ធខឺតឡង់ ។
គោលលទ្ធិ និងសេចក្ដីសញ្ញា ៩៧:៨–៩
« ពួកគេត្រូវបានទទួលដោយយើងហើយ » ។
សូមគិតអំពីពេលវេលាដែលបងប្អូនត្រូវបានទទួលយក—ឬមិនត្រូវបានទទួលយក—ចូលទៅក្នុងក្រុមមួយ ។ តើវាស្រដៀង ឬខុសគ្នាពីអ្វីដែល គោលលទ្ធិ និងសេចក្តីសញ្ញា ៩៧:៨–៩ បង្រៀនអំពីអត្ថន័យនៃការទទួលយកព្រះអម្ចាស់ដោយរបៀបណា ? តើបងប្អូនគិតថាអ្វីដែលព្រះអម្ចាស់កំពុងព្យាយាមបង្រៀនបងប្អូនជាមួយនឹងពាក្យប្រៀបធៀបនៅក្នុង ខទី ៩ ?
សូមមើលផងដែរ អ៊ីរីច ដបុលយូ. កូពីសឆ្កេរ « Being Accepted of the Lord » Liahona ខែ ឧសភា ឆ្នាំ ២០១៣ ទំព័រ ១០៤–១០៦ ។
សូមបង្កើតបរិយាកាសខាងវិញ្ញាណសម្រាប់ការរៀន និងការបង្រៀន ។ ព្រះយេស៊ូវបានសន្យាថា « ព្រះវិញ្ញាណបរិសុទ្ធនឹងបង្រៀនអ្នករាល់គ្នា ពីគ្រប់សេចក្ដីទាំងអស់ » ( យ៉ូហាន ១៤:២៦ ) ។ ដូច្នេះ មិនថាបងប្អូនកំពុងរៀនដោយខ្លួនឯង ឬជាមួយអ្នកដទៃទេ សូមធ្វើវាជាអាទិភាពដើម្បីអញ្ជើញយាងព្រះវិញ្ញាណ ។ តន្ត្រីពិសិដ្ឋ ការអធិស្ឋាន និងការប្រាស្រ័យទាក់ទងដោយក្ដីស្រឡាញ់ អាចជួយបង្កើតកន្លែងសុខសាន្តខាងវិញ្ញាណ ដែលព្រះវិញ្ញាណបរិសុទ្ធអាចបង្រៀនបងប្អូនអំពីសេចក្ដីពិត ។
គោលលទ្ធិ និងសេចក្ដីសញ្ញា ៩៧:១៨–២៨
ស៊ីយ៉ូន « ជាអ្នកដែលមានចិត្តល្អសុទ្ធសាធ » ។
ចំពោះពួកបរិសុទ្ធនៅទសវត្សរ៍ឆ្នាំ ១៨៣០ ស៊ីយ៉ូនគឺជាកន្លែងមួយ ។ នៅក្នុងវិវរណៈនៅក្នុង កណ្ឌទី ៩៧ ព្រះអម្ចាស់បានពង្រីកនិយមន័យដើម្បីពិពណ៌នាអំពីប្រជាជន—« ជាអ្នកដែលមានចិត្តល្អសុទ្ធសាធ » ( ខទី ២១ ) ។ នៅពេលបងប្អូនអាន ខទី ១៨–២៨ បងប្អូនអាចជំនួសនិយមន័យនេះ នៅពេលបងប្អូនអានពាក្យ ស៊ីយ៉ូន ។ តើចិត្តល្អសុទ្ធសាធមានន័យបែបណាចំពោះបងប្អូន ?
សូមមើលផងដែរ ម៉ូសេ ៧:១៨ ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
គោលលទ្ធិ និងសេចក្ដីសញ្ញា ៩៥:៨; ៩៧:១០–១៧
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។
-
សម្រាប់សាវតារមួយចំនួនពី កណ្ឌទី ៩៥ និង ៩៧ បងប្អូនអាចចែកចាយជាមួយកូនៗរបស់បងប្អូន « ព្រះវិហារបរិសុទ្ធខឺតឡង់ » នៅក្នុង ដំណើររឿងព្រះគម្ពីរគោលលទ្ធិ និងសេចក្ដីសញ្ញាសម្រាប់អ្នកអានតូច ( បណ្ណាល័យដំណឹងល្អ សូមមើលផងដែរ ពួកបរិសុទ្ធ ១:២១០ ) ។ កូនៗរបស់បងប្អូនអាចរីករាយនឹងការសម្តែងថា ពួកគេកំពុងជួយសាងសង់ព្រះវិហារបរិសុទ្ធខឺតឡង់ ( អារឈើ ដំដែកគោល លាបថ្នាំជញ្ជាំង ។ល។ ) ។ បងប្អូនក៏អាចបង្ហាញពួកគេនូវរូបភាពនៃព្រះវិហារបរិសុទ្ធខឺតឡង់ ដូចជារូបភាពនៅក្នុងមេរៀននេះ ខណៈពេលដែលបងប្អូនអាន គោលលទ្ធិ និងសេចក្តីសញ្ញា ៩៥:៨ ផងដែរ ដើម្បីបង្រៀនកូនៗរបស់បងប្អូនអំពីមូលហេតុដែលព្រះអម្ចាស់ចង់ឲ្យយើងសាងសង់ព្រះវិហារបរិសុទ្ធ ។
The Kirtland Temple
-
បន្ទាប់ពីអានជាមួយគ្នានូវ គោលលទ្ធិ និងសេចក្តីសញ្ញា ៩៧:១៦–១៦ មក បងប្អូន និងកូនៗរបស់បងប្អូនអាចចែកចាយជាមួយគ្នាអំពីមូលហេតុដែលព្រះវិហារបរិសុទ្ធពិសេសសម្រាប់បងប្អូន ។ បងប្អូនក៏អាចច្រៀងចម្រៀងមួយបទរួមគ្នាដើម្បីជួយកូនៗឲ្យមានគារវភាពចំពោះដំណាក់របស់ព្រះអម្ចាស់ ដូចជាបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) ។ ហេតុអ្វីព្រះវិហារបរិសុទ្ធពិសិដ្ឋ ?
គោលលទ្ធិ និងសេចក្ដីសញ្ញា ៩៧:១–២, ៨–៩, ២១
ស៊ីយ៉ូន « ជាអ្នកដែលមានចិត្តល្អសុទ្ធសាធ » ។
-
ដើម្បីជួយកូនៗរបស់បងប្អូនយល់អំពីអត្ថន័យនៃពាក្យ សុទ្ធសាធ នៅក្នុង គោលលទ្ធិ និងសេចក្តីសញ្ញា ៩៧:២១ បងប្អូនអាចមើលកែវទឹកស្អាតជាមួយគ្នា ហើយបន្ថែមអ្វីមួយទៅក្នុងទឹកដែលធ្វើឲ្យវាមិនបរិសុទ្ធ ( ដូចជា ដី ឬម្រេច ) ។ ហេតុអ្វីបានជាវាសំខាន់ដែលទឹកត្រូវតែបរិសុទ្ធ ? បន្ទាប់មក កូនៗរបស់បងប្អូនអាចអាន ខទី ២១ និងដាក់ម្រាមដៃរបស់ពួកគេនៅលើពាក្យ សុទ្ធសាធ ។ តើការធ្វើឲ្យចិត្តយើងបានល្អសុទ្ធសាធមានន័យដូចម្ដេច ? ខទី ១–២ និង ៨–៩ អាចផ្ដល់ជាគំនិតមួយចំនួន ។ តើព្រះអង្គសង្គ្រោះជួយធ្វើឲ្យចិត្តយើងល្អសុទ្ធសាធដោយរបៀបណា ?
ព្រះវរបិតាសួគ៌ចង់ឲ្យខ្ញុំមានចិត្តល្អសុទ្ធសាធ ។
គោលលទ្ធិ និងសេចក្ដីសញ្ញា ៩៧:៨–៩
ព្រះអម្ចាស់ប្រទានពរដល់មនុស្សដែលគោរពតាមសេចក្ដីសញ្ញាជាមួយទ្រង់ ។
-
តើកូនចៅរបស់បងប្អូនដឹងថាយើងធ្វើសេចក្ដីសញ្ញាអ្វីខ្លះជាមួយនឹងព្រះអម្ចាស់ ពេលយើងទទួលបុណ្យជ្រមុជទឹក ឬនៅក្នុងព្រះវិហារបរិសុទ្ធដែរឬទេ ? សូមពិចារណាពិនិត្យមើលសេចក្ដីសញ្ញាទាំងនោះជាមួយពួកគេដោយការអាន ម៉ូសាយ ១៨:៩–១០, ១៣ ឬ ក្បួនខ្នាតទូទៅ, ២៧.២ ។ សូមចែកចាយគ្នាអំពីរបៀបដែលបងប្អូនកំពុងព្យាយាម « យល់ព្រមគោរពតាមសេចក្ដីសញ្ញា [ របស់បងប្អូន ] ដោយការបូជា » ( គោលលទ្ធិ និងសេចក្តីសញ្ញា ៩៧:៨ ) ។
-
បងប្អូនអាចអញ្ជើញកូនៗរបស់បងប្អូនឲ្យគូររូបភាពអំពីអ្វីដែល គោលលទ្ធិ និងសេចក្តីសញ្ញា ៩៧:៩ ពិពណ៌នា ។ នៅពេលពួកគេចែកចាយរូបភាពរបស់ពួកគេ សូមនិយាយអំពីរបៀបដែលព្រះអម្ចាស់បានប្រទានពរដល់បងប្អូនសម្រាប់ការគោរពតាមសេចក្តីសញ្ញារបស់បងប្អូន ។ តើពរជ័យទាំងនោះដូចជា « ដើមឈើដែលមានផ្លែច្រើនមួយដើម ដែលបានដាំ … នៅក្បែរស្ទឹង » ដោយរបៀបណា ?
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
