7–13 abril: “Taqsihomaq xyaabʼ eekux … re xchʼolobʼankil lin evangelio”

Tzolʼlebʼ ut Sumwank 30–36

Jun po chaq rokik laj Parley P. Pratt jo’ komon sa’ li Iglees naq kib’oqe’ chi xik “sa’ li yamyoookil ch’och’” re xjultikankil li evangelio (Tzol’leb’ ut Sumwank 32:2). Ka’ch’in wi’chik xhoonal laj Thomas B. Marsh jo’ komon chiru a’an naq kiyehe’ re, “xwulak xhoonal aataqlanb’il k’anjel” (Tzol’leb’ ut Sumwank 31:3). Laj Orson Pratt, laj Edward Partridge, ut naab’aleb’ chik toje’ ke’kub’e xha’ naq ke’b’oqe’ sa’ xtaqlanb’il k’anjel. Maare wan junaq na’leb’ choq’ qe anajwan sa’ li eetalil a’in: wi tz’aqal aanawom re xk’ulub’ankil li evangelio li k’ojob’anb’il wi’chik rik’in li kub’iha’, tz’aqal aanawom re xwotzb’al rik’in laa was aawiitz’in. Yaal naq junelik naqaj xnimob’resinkil li qanawom chirix li evangelio, a’b’an li Dios maajun wa naxb’ay rib’ chixb’oqb’al li ani “moko tzolb’il ta” chixjultikankil lix evangelio (Tzol’leb’ ut Sumwank 35:13). Relik chi yaal, a’an nokoxb’oq chiqajunil, “Taate xtz’uumal aawe re xch’olob’ankil lin evangelio” (Tzol’leb’ ut Sumwank 30:5). Ut naqab’aanu a’in chi chaab’il, moko rik’in ta li qanawom ut li qanumsihom, rik’in b’an “lix wankil li Musiq’ej” (Tzol’leb’ ut Sumwank 35:13).

Chi’ilmanq ajwi’ “La fe y la caída de Thomas Marsh,” “Ezra Thayer: de escéptico a creyente,” “Llamamiento de Orson Pratt a servir,” sa’ Revelaciones en contexto, 58–74.

Li na’leb’ re tzolok sa’ li ochoch ut sa’ li iglees

Tzolʼlebʼ ut Sumwank 30–36

B’oqb’ilin chi wank choq’ aj yehol nawom chirix li Jesukristo.

Ma wan malaj maak’a’ junaq aab’oqb’al jo’ misioneer, naru nakatwan choq’ aj yehol nawom chirix li Jesukristo “sa’ chixjunil hoonal, ut sa’ chixjunil li k’a’aq re ru, ut sa’ chixjunil li na’ajej” (Mosiah 18:9). Naq taatzol Tzol’leb’ ut Sumwank 30–36, tz’iib’a li nakatzol chirix laa hoonal wan re xjultikankil li evangelio. Naru nakatz’iib’a li k’a’aq re ru naxpatz’ aawe li Qaawa’ ut taatz’iib’a ajwi’ lix yeechi’ihom li Qaawa’ choq’ reheb’ li neke’wotzok re li evangelio (jo’ eetalil, chi’ilmanq Tzol’leb’ ut Sumwank 30:8; 31:3–5; 32:1, 5; 35:13–15, 24). Naru ajwi’ nakasik’eb’ na’leb’ li tate’xtenq’a chixwotzb’al li evangelio. K’a’ru nakataw li naxwaklesi aach’ool “chixch’olob’ankil li sahil esilal re nimla sahil ch’oolejil”? (Tzol’leb’ ut Sumwank 31:3).

Li Elder Gary E. Stevenson kixk’ut naq lix jultikankil li evangelio “naru nab’aanuman rik’in kok’ na’leb’ moko ch’a’ajeb’ ta li ak xe’k’utman chiqu chalen chaq qasaajilal: rahok, wotzok, ut b’oqok” (“Rahok, wotzok, b’oqok,” Jolomil ch’utub’aj-ib’ re abril 2022). Naru nakattzolok sa’ li raatin naq taak’oxlaheb’ xk’ab’a’ li nakanaweb’ ru, laa wamiiw, ut eb’ laa junkab’al. K’a’ru li na’leb’ neke’chal sa’ laa k’a’uxl chirix chan ru naru nakawotz rik’ineb’ a’an “li nawulak chawu chirix lix evangelio li Jesukristo”? Chan ru naru nakab’oqeb’ chi “chalk ut chirilb’al,” “chi chalk ut chi tenq’ank,” ut “chi chalk ut chi kanaak”? Naq taab’icha malaj taawab’i “Tinxik bʼar taawaj naq tinxik” (Eb’ li B’ich, 174) malaj jalan chik li b’ich, maare taapatz’ aawib’, “K’a’ru naraj li Qaawa’ naq tinye ut chan ru naraj naq tinwanq re naq tinwotz lix evangelio?”

Chi’ilmanq ajwi’ Marcos A. Aidukaitis, “Waklesi aawaam ut chisaho’q sa’ aach’ool,” Jolomil ch’utub’aj-ib’ re abril 2022; Temas y preguntas, “Invitar a todos a recibir el Evangelio de Jesucristo,” “Ministrar como lo hace el Salvador,” Biblioteca del Evangelio; “Invitar a todos a venir a Cristo: Compartir el Evangelio” (video), Biblioteca del Evangelio.

Inviting All to Come unto Christ: Sharing the Gospel

Tzolʼlebʼ ut Sumwank 31:1–2, 5–6, 9, 13

Li Qaawa’ naru tinixtenq’a sa’ lin wanjik rik’in lin junkab’al.

Juntaq’eet naab’al reheb’ li ch’a’ajkilal ke’xk’ul li junkab’alej sa’ 1830 rik’in li neke’xk’ul li junkab’alej sa’ li kutan a’in. K’a’ru li na’leb’ ut li yeechi’ihom kixk’e li Qaawa’ re laj Thomas B. Marsh chirix lix junkab’al sa’ Tzol’leb’ ut Sumwank 31? (mas wi’chik eb’ li raqal 1–2, 5–6, 9, 13). Chan ru naq li raatin naru tatxtenq’a rik’in laa junkab’al laa’at?

Re xtawb’al xkomon li na’leb’ chirix laj Thomas B. Marsh, chi’ilmanq Santos, 1:79–80, 119–20.

Tzolʼlebʼ ut Sumwank 32–33; 35

Li Qaawa’ nikinixkawresi choq’ re li k’anjel naraj naq tinb’aanu.

Li tzolok chirix lix yu’ameb’ li kristiaan na’aatinak wi’ Tzol’leb’ ut Sumwank 32–33; 35 naru nakatxtenq’a chixk’eeb’al reetal chan ru naq li Qaawa’ yoo chakawresinkil choq’ re lix k’anjel. Qayehaq, naru nakawil resil lix wanjik laj Parley P. Pratt rik’in laj Sidney Rigdon sa’ “Eb’ li xyaab’ kuxej re li k’ojob’ank wi’chik: Eb’ laj paab’anel sa’ xtiklajik chaq li Iglees.” Chan ru naq li wanjik a’in kirosob’tesiheb’ li ralal xk’ajol li Dios? (chi’ilmanq Tzol’leb’ ut Sumwank 35).

Arin wan jun chik eetalil: Laj Ezra Thayer kixtz’iib’a naq rub’elaj lix kub’ik xha’ kiwan jun xk’utb’esinb’il matk’ b’ar wi’ “kichal jun li winq ut kixk’am chaq we jun b’orol li hu ut kixk’ut chiwu, ut jun ajwi’ li trompeet, ut kixye we naq tinyaab’asi. Kinye re naq maajun sut inyaab’asihom junaq trompeet. Kixye we: Laa’at tatruuq, yal xb’aanunkil. … Xchaq’al ru li son ki’eek’an jo’ maajun wa wab’ihom” “Revelation, October 1830–B, Revelation Book 1,” historical introduction, josephsmithpapers.org). Naq laj Jose Smith chirix chik a’an kixk’ul jun k’utb’esinb’il na’leb’ choq’ re laj Ezra Thayer ut laj Northrop Sweet, li natawman anajwan sa’ Tzol’leb’ ut Sumwank 33, laj Ezra kixtaw ru naq li k’utb’esinb’il na’leb’ a’an li b’orol chi hu kiril sa’ lix k’utb’esinb’il matk’. Chan ru naq li Qaawa’ yoo chaq chixkawresinkil laj Ezra choq’ re li k’anjel kixk’e re sa’ Tzol’leb’ ut Sumwank 33:1–13?

K’a’ru li eetalil nakawil naq li ruq’ li Qaawa’ kiwan sa’ xyu’ameb’ li xb’eenil aj paab’anel sa’ li Iglees? Ani xk’ehom li Qaawa’ sa’ laa yu’am re aatenq’ankil chi chalk rik’in li Kristo? Chan ru yoo chakawresinkil a’an re rosob’tesinkileb’ laa was aawiitz’in rik’in laa tiikilal, laa rahom, ut laa b’oqom?

Chi’ilmanq ajwi’ “Una misión a los lamanitas,” sa’ Revelaciones en contexto, 49–53.

Tzol’leb’ ut Sumwank 33:12–18

Wi tinkab’la lin yu’am sa’ xb’een lix evangelio li Kolonel, ink’a’ tint’ane’q.

Kik’ehe’ li aatin sa’ Tzol’leb’ ut Sumwank 33 re laj Northrop Sweet ut laj Ezra Thayer, wiib’ li ak’ komon sa’ li Iglees. Laj Northrop ki’el chaq sa’ li Iglees moko najt ta chirix naq kik’ehe’ li k’utb’esinb’il na’leb’ a’in. Laj Ezra kik’anjelak chi tiik xpaab’aal chiru jun hoonal, a’b’an a’an ajwi’ ki’el chaq. Rilb’al resilaleb’ a’an sa’ li tasal a’in naru naxwaklesi aach’ool chixk’oxlankil ma tz’aqal k’ojob’anb’ilat chi kaw “sa’ xb’een li saqoonaq” (raqal 13) re li evangelio. B’ar wankeb’ li na’leb’ sa’eb’ li raqal a’in li naru tate’xtenq’a chi kanaak chi tiik aapaab’aal chiru li Kolonel?

Chi’ilmanq ajwi’ Helaman 5:12.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 30:1–2

Tento tinjayali wib’ sa’eb’ li k’a’aq re ru re li Dios chiru li k’a’aq re ru re ruchich’och’.

• Maare taawulaq chiruheb’ laa kok’al xyalb’al xb’aanunkil wiib’ li k’anjel sa’ jun ajwi’ li hoonal, jo’ xyeeb’al raatinul jun li b’ich ut yooqeb’ ajwi’ chixtz’iib’ankil xk’ab’a’eb’ lix junkab’al. K’a’ut naq ch’a’aj xb’aanunkil wiib’ li k’anjel sa’ jun ajwi’ li hoonal? Chirix a’an naru nekeril Tzol’leb’ ut Sumwank 30:1–2. B’ar wankeb’ junjunq li “k’a’aq re ru re li ruchich’och’” li neke’risi li qak’a’uxleb’aal chiru xjultikankil li Jesukristo ut lix evangelio? Chan ru naru naqajayali li qilob’aal rik’in a’an?

Tzol’leb’ ut Sumwank 33:2–3, 6–10

Naru ninwotz lix evangelio li Jesukristo.

• Re xtenq’ankileb’ laa kok’al chixtawb’al ru Tzol’leb’ ut Sumwank 33:8–10, naru nakapatz’ reheb’ naq te’xyal xyeeb’al jun ch’ol aatin chi tz’aptz’ookeb’ li re ut laa’at malaj xkomoneb’ chik laa kok’al te’xq’ehi k’a’ru yoo chixyeeb’al. Ileb’ li raqal 8–10 ut patz’ reheb’ naq te’xte li re rajlal sut naq taaye li ch’ol aatin “Tehomaq xtz’uumal eere.” K’a’ut naq li qaChoxahil Yuwa’ naraj naq taqate li xtz’uumal qe ut taqawotz li evangelio rik’ineb’ li qas qiitz’in? K’a’ru naru naqaye reheb’ li qakomon ut eb’ li qamiiw chirix li Kolonel malaj lix evangelio? Naru ajwi’ nekeb’icha jun li b’ich chirix xwotzb’al li evangelio, jo’ “Taqakʼam raatin li Qaawaʼ” (B’ichleb’aal choq’ reheb’ li Kok’al, 92–93).

• Naru nakawotz aanumsihom li wankeb’ rilom rik’ineb’ li na’leb’ malaj li yeechi’ihom wankeb’ sa’ Tzol’leb’ ut Sumwank 30–34. K’a’ru xatzol malaj xaweek’a chirix laa Kolonel ut lix k’anjel naq yookat chi k’anjelak chiru?

Wankeb’ naab’al li hoonal re xwotzb’al li evangelio.

Ch’olob’ xyaalaleb’ li osob’tesihom yeechi’inb’il. Naq nakak’e xb’oqb’aleb’ li kok’al chixyu’aminkil junaq na’leb’ re li evangelio, naru nakawotz li yeechi’ihom li naxk’e li Dios reheb’ li neke’xyu’ami li na’leb’ a’an. Qayehaq, naru nakawotz lix nawom aach’ool chirixeb’ li osob’tesihom naxk’e qe naq naqate xtz’uumal qe ut naqawotz li evangelio.

Tzol’leb’ ut Sumwank 33:12–13

Naru ninkab’la lin yu’am sa’ xb’een lix evangelio li Jesukristo.

• Naru nakak’ameb’ laa kok’al chirix kab’l re te’ril lix k’ub’elal li rochocheb’ malaj li Iglees ut taapatz’ reheb’ naq te’xch’olob’ li neke’ril. K’a’ut naq aajeleb’ ru li kawil k’ojleb’aal sa’ jun li nimla kab’l? Chirix a’an il Tzol’leb’ ut Sumwank 33:12–13 rik’ineb’ a’an, ut wotzomaq cherib’il eerib’ k’a’ru nekereek’a chirix naq li Qaawa’ naraj naq taqakab’la li qayu’am sa’ lix evangelio. K’a’ut naq “saqoonaq” a’an jun chaab’il aatin re xch’olob’ankil li evangelio? Chan ru naru naqakab’la li qayu’am sa’ xb’een xpekil li evangelio? (chi’ilmanq ajwi’ Mateo 7:24–29).

Re xtawb’al xkomon chik li na’leb’, chi’ilmanq li hu Amigos re li po a’in.

Ayu sa’ li yamyookil ch’och’, xb’aan laj Robert T. Barrett