O̧kwōj 22

Etke Irooj Ekōņaan Bwe in Ājmour?

Katak im Bujen Ko 89–92

Ko̧o̧njeļ Ippān Doon

Kar tōl jān juon eo uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Priesthood eo an Aron ak Unin Tōl eo an Doulul eo an Jiron̄ ro. Innām tōl juon ekkōnono kōn menin kōnono ko āinwōt in ej ellaajrak, im karōk wāween ko n̄an kōm̧m̧an ekkar n̄an ta eo kwoj kōnono kake (kwomaron̄ kālet ilo iien kweilo̧k an būreejtōnji ewi wōt menin kōnono ko n̄an kōnono kaki):

• Doulul eo ad ak kūlaaj eo ad. Wōn eo ekāal n̄an ward eo ad, im ekōjkan ad maron̄ jipan̄ er en̄jake ruwainene? Ta eo jej kōm̧m̧ane n̄an kōm̧m̧ani bwe iien eo ad ilo kweilo̧k ko an doulul ak kūlaaj eo en ļap tokjen?

• Jerbal ko ak eddo ko ad. Ta jet iaan jerbal ak eddo ko ewōr ippād āinwōt jiron̄ ak likao ro? Ekōjkan an maron̄ em̧m̧anļo̧k ad kakūrm̧ooli?

• Mour ko ad. Ta eo jej kōm̧m̧ane n̄an erom̧ eļapļo̧k āinwōt Jisōs Kraist im bōk kajoor eo An ilo mour ko ad? Ta eo jej kōm̧m̧ane n̄an jipan̄ baam̧le ko ad itok n̄an E?

Ilo jem̧lo̧kin katak eo, n̄e ekkar, kōm̧m̧an laajrak in:

• Kam̧ool kōn katak ko kar katakin kaki.

• Kakeememej ro uwaan doulul ak kūlaaj eo kōn karōk im kūr ko kar kōm̧m̧an ilo iien kweilo̧k eo.

Katakin Katak ko

Kar tōl jān juon ritōl erūtto ak juon jodikdik; tarrin 25-35 minit ko

Kōpooj Eok Make ilo Jetōb

Epidodo n̄an jet armej n̄an ļōmņak kōn Naan in Mālōtlōt, loe ilo Katak im Bujen Ko 89, āinwōt laajrak in men ko kōm̧m̧ane im jab kōm̧m̧ane. Naan in Mālōtlōt elōn̄ ie jet iaan men ko, ak ej barāinwōt pād ie pedped ko n̄an dāpij ājmour eo an ānwbinid. Ej barāinwōt katakin bwe wāween ad kōm̧m̧an n̄an anbwinid ejelōt ājmour eo an kōlmenļo̧kjeņ eo ad, en̄jaake ko ad, im mour in jetōb. Ta kōjeraam̧m̧an ko kwar bōki ilo am̧ kate eok mour juon mour eo ājmour?

Ro uwaan doulul eo ak kūlaaj eo am̧ remaron̄ kar mōj aer ekkatak kōn Naan in Mālōtlōt ilo aer kar riiti Katak im Bujen Ko 89–92 ilo wiik in. Ewi wāween am̧ maron̄ jipan̄ er meļeļe etke kōjeram̧m̧an ko ilo ānbwin im jetōb rej itok jān pokake revelesōn in? Komaron̄ lo ļomņak ko rejipan̄ jān am̧ lale Gospel Topics article “Word of Wisdom” (topics.ChurchofJesusChrist.org) ak “Ājmour ilo Ānbwin im En̄jake” ilo N̄an Kōkajoorļo̧k Jodikdik ro ([2011], 25–27).

Kōjparok ājmour eo an ānbwinid ejelōt ājmour eo an kōļmenļo̧kjeņ eo ad, en̄jaake ko ad, im mour in jetōb.

Ekkatak Ippān Doon

N̄an ijjino̧ juon kōmeļeļe kōn Naan in Mālōtlōt, je naan kein ioon boot eo: Ānbwin, Kōļmenļo̧kijeņ, Jetōb, im Iiaio. Kūr doulul eo ak ro uwaan kūlaaj eo n̄an riiti Katak im Bujen Ko 89:18–21 im ekenono kōn wāween an kallim̧ūr ko ilo eoon ko maron̄ ekkar n̄an eria kein. Ta kōjeraam̧m̧an ko remaron̄ itok jān pokake Naan in Mālōtlōt? Ekōjkan ad kar bōk kōjeraam̧m̧an kein ilo mour ko ad?

• Ro uwaan doulul eo ak kūlaaj eo am̧ remaron̄ ekkatak eļap jān doon jān aer kōm̧m̧ane juon laajrak in men ko rej kōm̧m̧ani n̄an ājmour. Kajimettan doulul eo ak ro uwaan kūlaaj eo n̄an kurūp ko, im leļo̧k n̄an kajjojo iaan kurūp ko n̄an kappukōt ilo juon ak elōn̄ļo̧k iaan eoon ko ilo uwm̧win men eo kein kajuon “Kein Jipan̄ ko rej Rie Katak eo,” kappukōt m̧ool ko kōn ājmour ilo ānbwin. Kōm̧m̧an bwe kajjojo iaan kurūp ko ren kwaļo̧k ta eo raar ekkatak im kelaajrak e ļōmņak ko aer ilo boot eo. Ewi wāween ad naaj kar uwaake kajjitōk ko āinwōt kein: Etke Irooj ej letok n̄an kōj kien ko kōn ājmour ilo ānbwin? Etke jej pokake er?

• Ro uwaan doulul eo ak kūlaaj eo am̧ remaron̄ kar m̧ōj kajjitōk ippāer etke rejjab idaak dānin kadōk, kōbataat, ak bōk uno ko rekkajoor. Ewi wāween aer uwaake kajjitōk kein? Remaron̄ lale “Ājmour ilo Ānbwin im En̄jake” ilo N̄an Kōkajoolo̧k Jodikdik ro (peij ko 25–27) im kappukōt naan in kipel ko im kōjeraam̧m̧ān ko kar kallim̧ūr kaki me remaron̄ kwaļo̧k ippān ro jet. Ekōjkan an jekjek eo kōm̧m̧an n̄an anbwinid jelōt jemjerā eo ad ippād Anij? Ewi wāween an doulul eo ak ro uwaan kūlaaj eo kar bōk naan in kam̧ool ko bwe kōjparok Naan in Mālōtlōt ej kōjeraam̧m̧an mour ko aer?

• En̄jake ko me rej kwaļo̧k kōjeraam̧m̧an ko jān kōjparok e Naan in Mālōtlōt eo emaron̄ im̧we doulul eo ak ro uwaan kūlaaj eo ļapļo̧k aer m̧ool ilo mour kōn kien in. Kwomaron̄ kwaļo̧k juon en̄jake jān mour eo am̧ ak en̄jake eo an Būreejtōn Thomas S. Monson ekar kwaļo̧k ilo enaan eo an “Principles and Promises” (Liahona, Nov. 2016, 78–79). Pija in alooj eo “Leave the Party” (ChurchofJesusChrist.org) epād ie bar juon waanjon̄ok. Komaron̄ rojan̄ doulul eo ak ro uwaan kūlaaj eo n̄an kwaļo̧k en̄jake ko aer.

• N̄an ijjino juon kōmeļeļe kōn wāween ad kōjekdoon kapo ko n̄an kakkure Naan in Mālōtlōt, komaron̄ kwaļo̧k n̄an doulul eo ak kūlaaj eo juon mo̧o̧r (ak juon pijaan m̧o̧o̧r). Ewi wāween an mo̧o̧r in en̄od eo kabwebweik ek ko? Uwaak ko n̄an kajjitōk in maron̄ loi ilo pija in alooj eo “You Will Be Freed” (ChurchofJesusChrist.org; bar lale M. Russell Ballard, “O That Cunning Plan of the Evil One,” Liahona, Nov. 2010, 108–10). Ewi wāween an mo̧o̧r ko āinwōt ta eo Setan ej kōm̧m̧ane n̄an kabwebweik ak aujiidi kōj? Ta enaan eo Būreejtōn Ballard ej ba n̄an ro reko̧jōk ilo an̄ūrlep? Ewi wāween ad maron̄ jipan̄ juon eo ej edodo kōn kapo oktakļo̧k n̄an Rilo̧mo̧o̧r? (lale eoon ko ilo bullet eo kein karuo um̧win “Kein Jipan̄ ko rej Rie Katak eo”).

Jerbal kōn Tōmak

Rōjan̄ ro uwaan doulul ak kūlaaj eo n̄an kejo̧kļo̧kjeņ im je ta eo renaaj kōm̧m̧ane n̄an jerbal ekkar n̄an im̧we ko me rekar en̄jaki rainin. Ewi wāween an katak eo an rainin iookļo̧k kōttōbar ko an juon make me rekar kōm̧m̧ani? Eļan̄n̄e rekōņaan, ro uwaan doulul ak kūlaaj eo remaron̄ kwaļo̧k ļōmņak ko aer.

Kein Jipan̄ ko rej Rie Katak eo

• Daniel 1:3–20; 1 Korint 6:19–20; Katak im Bujen Ko 88:124; 89:5–21 (Wāween ad kōjparok ābwinid ej aorōk n̄an Irooj)

• Mosaia 7:33; Alma 13:27–29; Ether 12:27 (Kōjatdikdik n̄an ro rej en̄taan kōn an̄ūrlep)

• Māākjin in Okwo̧j 2019 eo an New Era im Ensign (juon māākjiin aorōk kōn ānbwin)

Katakin ilo Wāween eo an Rilo̧mo̧o̧r

Ilo aolep jekjek, Rilo̧mo̧o̧r eo ekar juon waanjon̄ak im rūkaki. Ilo am̧ m̧aanjabpopo n̄an katakin, ļōmņak kōn wāween an Irooj kōnono ippān ro jet im wāween am maron̄ kenono ilo juon jekjek eo me ej kōketak im rojan̄ ro kwoj katakin er.