“27 ni June. E Rawa Vakacava Niu Vakavakarau Oqo ni Tutaka e dua na iTikotiko Yavutaki va-Karisito? Vunau kei na Veiyalayalati 67–70,” Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa: Ulutaga Vakaivunau 2021 (2020)
“27 ni June. E Rawa Vakacava Niu Vakavakarau Oqo ni Tutaka e dua na iTikotiko Yavutaki va-Karisito?” Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa: Ulutaga Vakaivunau 2021
The Lord Jesus Christ, mai vei Del Parson
27 ni June
E Rawa Vakacava Niu Vakavakarau Oqo ni Tutaka e dua na iTikotiko Yavutaki va-Karisito?
Veivakasalataki Vata
Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti
Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):
-
Noda kuoramu se kalasi. O cei e vou tu ki na noda tabanalevu, ka da na veivuke vakacava mera vakataukeitaki? Na cava eda sa cakava tiko me vakaibalebale kina na noda gauna ena kuoramu se kalasi?
-
Noda itavi se icolacola. Na itavi kei na icolacola cava so e tiko vei keda vakacauravou kei na goneyalewa? E rawa vakacava ni da vakataucokotaki ira vinaka?
-
Noda bula. Na cava eda sa cakava tiko meda vakataki Jisu Karisito vakalevu cake ka ciqoma na Nona kaukauwa ena noda bula? Na cava eda sa cakava tiko me vukea na noda matavuvale me lako mai ki Vua?
Ena itini ni lesoni, ke veiganiti, cakava na ka oqo:
-
Vakadinadinataka na ivakavuvuli eso sa vakatavulici.
-
Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.
Vakavulica na iVunau
Liutaki mai vua e dua na iliuliu itabaqase se itabagone; rauta ni 25-35 na miniti
Vakarautaki Iko Vakayalo
Vunau kei na Veiyalayalati 68 e oka kina na ivakasala vei ira na itubutubu ena sega beka ni ganita sara na lewe ni kuoramu se kalasi (raica na tikina e 25–28). Ia, baleta ni ra rawa ni veivakayarayarataki vakalevu sara ki na nodra matavuvale oqo kei na gauna mai muri, na ivakasala qo sa rawa ni vukei ira oqo. Na sala vinaka duadua me ra vakarautaka kina e dua na itikotiko yavutaki va-Karisito ena gauna mai muri oya mera “lako vakadodonu ena matana na Turaga” nikua (tikina e 28).
Na veivakalougatataki cava so esa basika ki na nomu matavuvale baleta ni o muria na ivakavuvuli ni iVakabula? E rawa vakacava ki na lewe ni kuoramu se kalasi mera vukea na nodra matavuvale ni tauyavutaka e dua na itikotiko yavutaki va-Karisito? Me vakarautaki na veivakavulici, sa rawa ni o railesuva na itukutuku i Peresitedi Henry B. Eyring “Na Vale e Tiko kina na Yalotabu ni Turaga” (Liaona, Me 2019, 22–25) kei “Na Matavuvale: Ai Vakaro ki Vuravura Raraba” (ChurchofJesusChrist.org).
Sa rawa ni da vakila na loloma levu ena noda matavuvale ni da yavutaka na noda itikotiko vei Karisito.
Vulica Vata
Me vukei ira na lewe ni nomu kuoramu se kalasi ni raica na Vunau kei na Veiyalayalati 68:25–28 e kovuti ira , sa rawa ni o kerea mera vola e dua na vakamacala lekaleka ni ka era vinakata na nodra bula vakamatavuvale mai muri me na vakataka. O sa rawa ni kerei ira ni wasea na ka era a vola ke ra gadreva. Sa rawa ni ra qai wilika na Vunau kei na Veiyalayalati 68:25–28 ka vakaraica na ivakavuvuli ni kosipeli eso e rawa ni vukei ira ni tara cake na matavuvale yalododonu ena gauna oqo kei na veisiga ni mataka. Sa rawa ni vukei ira na veitaviqaravi e ra ni kila deivaki na sala me na usutu kina ni nodra matavuvale o Karisito.
-
Nai kavitu ni parakaravu ni “Na Matavuvale: Ai Vakaro ki Vuravura Raraba” e umani tu kina na dina eso e rawa ni vukea na lewe ni kuoramu se kalasi ni yavutaka na nodra matavuvale ena iVakabula. Sureti ira ni wilika na parakaravu oqo ka raica na ivakavuvuli eso ena vukea e dua na matavuvale me bula marau. O na rairai vinakata ni vola oqo ena papa ka kerei ira o vakavulica mera veivosakitaka na vuna era na vukea yadua kina e dua na matavuvale me bula marau. Ena rairai vinakata na lewe ni kuoramu se kalasi mera wasea na sala era sa raica kina na veivakavuvuli oqo ni tutaki ena nodra matavuvale se so tale. Vakauqeta mera vakasamataka vakatitobu na sala era rawa ni tutaka kina e dua madaga vei ira na ivakavuvuli ki na nodra bula ena gauna oqo. Vakadeitaka tale vei ira ni sa rawa mera cakava me usutu ni nodra bula o Jisu Karisito, se vakacava na ituvaki ni matavuvale era lako mai kina.
-
Sa rawa ni ra veivosakitaka na lewe ni kuoramu se kalasi na veika e dei tu kina na iVakabula me usutu ni noda itikotiko kei na veika e tarovi Koya me mai usutu tiko ni noda itikotiko. O na via kerea na tamata yadua se ilawalawa lalai mera railesuva e dua vei ira na wase ni tukutuku i Peresitedi Henry B. Eyring “Na Vale e Tiko kina na Yalo ni Turaga” (Liaona, Me 2019, 22–25) me ra raica na ivakavuvuli eso e rawa ni vukea ni cakava na noda itikotiko me yavutaki va-Karisito. Sureta na lewe ni kuoramu se kalasi me ra wasea na ka era sa vulica ka digitaka e dua na ka era na cakava ena macawa lako mai me caka kina na nodra itikotiko me vakabibitaki cake vei Jisu Karisito kei na Nona ivakavuvuli.
-
De na rawa ni o taroga e dua se sivia na lewe ni kuoramu se kalasi me lagata se wilika e dua na sere me baleta na itikotiko kei na matavuvale, vaka na “Home Can Be a Heaven on Earth” (Hymns, no. 298) se “Love Is Spoken Here” (Children’s Songbook, 190). Sa rawa ni ra vakarorogo na kena vo ki na ka e vakavulica na sere ena kena caka e dua na itikotiko me vanua ni marau. Sureti ira ni wasea e dua na ka era sa sotava era a yalo marau kina baleta ni a vakaraitaki vei ira na loloma se gauna era a veivuke kina ni vakalevutaka na loloma ena nodra itikotiko.
Cakacaka ena Vakabauta
Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.
iVurevure Veitokoni
-
Mosaia 4:14–16; Vunau kei na Veiyalayalati 88:119; 121: 41–46 (Na sala me tauyavutaki kina e dua na itikotiko yalododonu)
-
“What Can I Do to Help Ease Family Tension?” from Face to Face with Elder Rasband, Sister Oscarson, and Brother Owen (worldwide youth broadcast, Jan. 20, 2016), “Two Brothers Apart,” “Through Small Things,” “More Diligent and Concerned at Home” (vidio), ChurchofJesusChrist.org
Veivakavulici ena iVakarau ni iVakabula
A vakaraitaka na iVakabula na Nona loloma vei ira na tani ena tutaki ni veiqaravi. Era a saumaki mai na tamata vakayadua ka sa veisau na bula mai na Nona caka vinaka. E rawa vakacava ni o vakatotomuria na ivakarau oqo vaka e dua na iliuliu? O rawa vakacava ni vukei ira na itabagone ni gadreva me ra muria na ivakaraitaki ni veiqaravi ni iVakabula ena nodra dui matavuvale?