“Alama 18: Alama Muana udi Ukudimuna Mutshima,” Miyuki ya mu Mukanda wa Molomo (1997), 49–52
“Alama 18: Alama Muana udi Ukudimuna Mutshima,” Miyuki ya mu Mukanda wa Molomo, 49–52
Shapita 18
Alama Muana udi Ukudimuna Mutshima
Mfumu Mosiya wakateka Alama mulombodi wa Ekelezia mu Zalahemela. Nunku Alama wakasungula bakuabu bantu bua kumuambuluisha bua kulongesha Bena Nefi.
Alama ne Mfumu Mosiya, bakapampakana bualu aba bavua kabayi bitaba bavua bakengesha bidimba bia Ekelezia bua ditabuija diabu.
Alama uvua ne muana wa balume dina diende divua Alama. Alama Muana kavua muitabuija malongesha a tatuenda to, ne wakalua muntu mubi.
Alama Muana ne bana banayi balume ba Mfumu Mosiya bavua baluisha Ekelezia. Bakasaka bantu babungi bua kumbuka mu Ekelezia ne bua balua bantu babi.
Alama wakasambila bua muanenda wa balume amanya bulelela ne akudimuna mutshima.
Alama Muana ne bana ba balume ba Mfumu Mosiya bakatungunuka ne dibutula Ekelezia.
Dituku dikuabu muanjelu wakabamuenekela. Muanjelu wakakula mu dîyi dikola divua dinyungisha buloba.
Bansongalume batanu aba bakazakala ne bakakuluka panshi. Kumpala kabakumvua bivua muanjelu muikala wakula to.
Muanjelu wakalua kupitshila ku masambila a bidimba bia Ekelezia. Muanjelu wakakonka Alama Muana: bua tshinyi uvua muikala uluisha Ekelezia.
Buloba buakakanka pavua muanjelu wambila Alama Muana bua alekela kubutula Ekelezia.
Alama Muana ne bana baluma ba Mosiya bakakuluka kabidi panshi. Bakamona muanjelu, ne bakamanya se bukola bua Nzambi ke buvua bukankisha buloba.
Alama Muana wakakema bikola bualu kavua ne mua kuakula to. Wakashala mutshioka ne kavua nansha mua kunyungisha bianza biende to.
Bana ba balume ba Mosiya bakafikisha Alama Muana kudi tatuende ne bakamuambila bionsu bivua bibafikila.
Alama uvua ne disanka. Wakamanya se Nzambi uvua muandamuna ku masambila ende.
Alama wakakunguija bantu babungi bua bamona tshivua Mukalenga muenzela muanende wa balume ne bana ba balume ba Mosiya.
Alama ne bakuabu balombodi ba Ekelezia, bakenza tshijila ne bakasambila bua kulomba Nzambi bua ambuluisha Alama Muana bua yeya apeta makanda kabidi.
Panyima pa matuku abidi ne butuku, Alama Muana wakakumbana bua kuakula ne kunyungakana.
Wakambila bantu se: uvua mukudimuna mutshima wende ne Nzambi uvua mumubuikidila mibi yende.
Wakalongesha bua se: muntu yonsu udi ne bua kuikala mujalama bua kubuela mu bukalenga bua Nzambi. Wakabambila kabidi bua kusama kukola kuvuaye naku bua bualu bua mibi yende.
Alama Muana uvua ne disanka bualu uvua mukudimuna mutshima ne Nzambi uvua mumubuikidila mibi yende. Uvua mumanya ne Nzambi mmumunanga.
Alama Muana ne bana ba balume ba Mosiya bakabangisha kulongesha bulelela mu bulaba bujima, bambila bantu bonsu bivuabu bamona ne bumvua.
Bakateta bua kuakaja mâlu onsu mabi avuabu benza. Bavua bumvuija mifundu kudi bantu ne babalongesha bua Yezu Kilisto.
Nzambi wakabenesha Alama Muana ne bana ba balume ba Mosiya bualu bavua balongesha lumu luimpa. Bantu babungi bavua babateleja ne bitabuija.