“Fakahinohino Vave Tahá: Ko Hono Tali ʻEku Ngaahi Fehuʻi ʻi he Ongoongoleleí—Lēsoni Fakalotu 280,” Fakahinohino Vave Tahá: Ko Hono Tali ʻEku Ngaahi Fehuʻi ʻi he Ongoongoleleí—Lēsoni Fakalotu 280 (2022)

“Fakahinohino Vave Tahá,” Fakahinohino Vave Tahá: Ko Hono Tali ʻEku Ngaahi Fehuʻi ʻi he Ongoongoleleí—Lēsoni Fakalotu 280 (2022)

Fakahinohino Vave Tahá

Ko Hono Tali ʻEku Ngaahi Fehuʻi ʻi he Ongoongoleleí—Lēsoni Fakalotu 280

Talateu

Ko Hono Tali ʻEku Ngaahi Fehuʻi ʻi he Ongoongoleleí ko ha kalasi ʻinisititiuti makehe ia ʻoku lava ke fili ai ʻe he kau akó ʻa e ngaahi tefito fekauʻaki mo e ongoongoleleí ʻoku nau pehē ʻoku felāveʻi mo kinautolu pea ʻoku nau fie aleaʻí. ʻOku ʻikai fie maʻu ia ke hoko ʻa e kau faiakó ko ha kau mataotao ʻi he ngaahi tefito ʻoku fili ʻe he kau akó. Kā ʻe ako fakataha ʻa e kau akó mo e kau faiakó. ʻE fakaʻaongaʻi ʻe he kau faiakó ha founga ako ʻoku fakatefito ʻi he tefitoʻi moʻoní, ʻa ia ʻe lava ʻo tokoni ke fakafaingofuaʻi ʻa e fealēleaʻaki tauʻatāiná, faitotonú, mo fakamāmá.

Ko Hono Kamataʻi

Kimuʻa pea kamata hoʻo kalasi mo e kau akó, feinga ke ke maheni mo e fokotuʻutuʻu ʻo e kalasí. ʻE lava ʻe hoʻo fakahoko ʻa e ngaahi fuofua sitepu ko ʻení ʻo fakapapauʻi ʻokú ke kamata mo hoʻo kau akó ʻa e kalasí ʻi he hala totonú pea ʻi ha tuʻunga mālohi:

Sitepu 1: Ko e Vakai Fakalūkufuá.Toe vakaiʻi ʻa e fakahokohoko ʻo e tohí pea lau ʻa e talateú. Hili iá pea lekooti ʻa e meʻa ʻokú ne fakaʻaiʻai lahi taha koe fekauʻaki mo e kalasi ko ʻení mo ha ngaahi meʻa pē ʻokú ke hohaʻa ki ai.

Sitepu 2: Ko e Ngaahi Ola ʻo e Akó.Kumi ʻa e ngaahi ola ʻo e akó ʻi he lēsoni 1, pea fakakaukau ki he founga ʻe lava ke fakamālohia ai ʻe hono muimuiʻi kinautolú ʻa e tui ʻa hoʻo kau akó kia Sīsū Kalaisi mo Hono Siasi kuo fakafoki maí.

Sitepu 3: Ngaahi Tefitoʻi Moʻoni Fakahinohinó.Toe vakaiʻi ʻa e ngaahi lēsoni 1–3, pea kumi ʻa e ngaahi tefitoʻi moʻoni mahuʻinga naʻe akoʻi ʻi he ngaahi lēsoni ko ʻení. Hili iá peá ke fakalaulauloto ki he founga ʻe lava ai ʻe hono fakaʻaongaʻi ʻo e ngaahi tefitoʻi moʻoni ko ʻení ʻo pukepuke hoʻomou ngaahi fealēleaʻaki fakakalasí ʻi ha tuʻunga mālohi ʻi he taimi ʻoku aleaʻi ai ʻa e ngaahi tefito faingataʻá.

Sitepu 4: Ko ha Sīpinga ki he Akó.ʻAlu ki he lēsoni 4 pea feinga ke ʻiloʻi ʻa e “sīpinga ki he akó” te ne tataki hoʻomou ngaahi fealēleaʻaki fakakalasí. Fakakaukau ki he ʻuhinga ʻe mahuʻinga ai ke akoako fakahoko ʻa e sīpinga ko ʻení lolotonga hono akoʻi ʻo e ngaahi lēsoni 4–6, kimuʻa pea kamata fili ʻe hoʻo kau akó ʻenau ngaahi tefito ʻi he ngaahi lēsoni 7–14.

Sitepu 5: Ngaahi Ako Konga Īkí.Lau ʻa e fakafeʻiloaki ki he ngaahi ako konga īkí ʻi he Fakamatala Fakalahi A. ʻAi ke ke maheni mo e ako iiki takitaha. Fakalaulauloto ki he founga mo e taimi te ke fakaʻaongaʻi ai kinautolu ke fakatupulaki ʻa e aʻusia fakaako hoʻo kau akó.

Mou Talanoaʻi Ia

Fokotuʻu ha taimi ke ke talanoa ai mo hoʻo kouʻotineitá pe talēkita ʻo e ʻinisititiutí fekauʻaki mo e kalasi ko ʻení. Vahevahe mo ia hoʻo ngaahi fehuʻí mo e ngaahi meʻa ʻokú ke hohaʻa ki aí. ʻI he kotoa ʻo e kalasí, fetuʻutaki ki hoʻo kouʻotineitá pe talēkita ʻo e ʻinisititiutí ʻo ka fie maʻu.