ឧបសម្ព័ន្ធ ៖ ការជ្រើសរើសអ្នកឧបត្ថម្ភ

« ឧបសម្ព័ន្ធ ៖ ការជ្រើសរើសអ្នកឧបត្ថម្ភ » ការព្យាបាលតាមរយៈព្រះអង្គសង្គ្រោះ ៖ កម្មវិធីព្យាបាលការញៀន មគ្គទេសក៍ព្យាបាល ១២ ជំហាន ( ឆ្នាំ ២០២៣ )

« ការជ្រើសរើសអ្នកឧបត្ថម្ភ » កម្មវិធីព្យាបាលការញៀន មគ្គទេសក៍ព្យាបាល ១២ ជំហាន

ការជ្រើសរើសអ្នកឧបត្ថម្ភ

ការធ្វើការជាមួយនឹងអ្នកឧបត្ថម្ភ អាចពន្លឿនការជាសះស្បើយរបស់អ្នក ។ អ្នកឧបត្ថម្ភអាចគាំទ្រដល់អ្នកនៅក្នុងការរីកចម្រើន និងការតាំងចិត្តរបស់អ្នកដើម្បីយកឈ្នះលើឧបសគ្គ ការពឹងផ្អែក ឬឥរិយាបថញៀននានាដែលអ្នកកំពុងជួបប្រទះ ។ នៅក្នុងដំណើរនៃការជាសះស្បើយរបស់អ្នក អ្នកមិនឯកោនោះទេ អ្នកឧបត្ថម្ភគឺជាមនុស្សម្នាក់ដែល « យល់ព្រម … កម្សាន្ដទុក្ខដល់អស់អ្នកណាដែលកំពុងត្រូវការកម្សាន្ដទុក្ខ ហើយឈរជាសាក្សីដល់ព្រះ » ( ម៉ូសាយ ១៨:៩ ) ។ សូមពិចារណាធ្វើការជាមួយអ្នកឧបត្ថម្ភម្នាក់ឲ្យបានឆាប់បំផុតតាមដែលអាចធ្វើបាន ។

តើអ្នកឧបត្ថម្ភគឺជានរណា ?

អ្នកឧបត្ថម្ភគឺជាមនុស្សម្នាក់ដែលទទួលបានការព្យាបាល តាមរយៈការឆ្លងកាត់ជំហានទាំង ១២ នេះ ។ ពួកគេអាចយល់ពីឧបសគ្គជាក់លាក់ ដែលទាក់ទងនឹងការជាសះស្បើយ ទោះបីជាអ្នកអាចមិនស្គាល់ឧបសគ្គទាំងនោះក្តី ។ អ្នកឧបត្ថម្ភមិនចាំបាច់ជាមិត្តភក្ដិជិតស្និទ្ធបំផុតរបស់អ្នក ឬជាអ្នកជំនាញខាងសុខភាពផ្លូវចិត្តនោះទេ ។ ប៉ុន្ដែ តួនាទីរបស់អ្នកឧបត្ថម្ភគឺដើម្បីជួយអ្នកឲ្យឆ្លងកាត់ជំហានទាំងឡាយនៃការជាសះស្បើយ ។

ការស្វែងរកអ្នកឧបត្ថម្ភ

នៅក្នុងកម្មវិធីព្យាបាលការញៀនរបស់សាសនាចក្រ អ្នកមិនត្រូវបានចាត់តាំងឲ្យមានអ្នកឧបត្ថម្ភជាក់លាក់នោះទេ ។ អ្នកអាចទទួលបានការឧបត្ថម្ភតាមរបៀបមួយ ដែលស័ក្ដិសមនឹងបទពិសោធន៍ តម្រូវការ និងអត្តចរិតរបស់អ្នករៀងៗខ្លួន ។ ការឧបត្ថម្ភគឺជាការសម្រេចចិត្តរួមគ្នារវាងអ្នក អ្នកឧបត្ថម្ភ និងព្រះអម្ចាស់ ។

ការស្វែងរកនរណាម្នាក់ដើម្បីឧបត្ថម្ភដល់អ្នក អាចមានអារម្មណ៍ថាគួរឲ្យខ្លាច ប៉ុន្ដែអ្នកដទៃអាចជួយអ្នកបាន ។ របៀបដ៏ល្អបំផុតដើម្បីរកបានអ្នកឧបត្ថម្ភម្នាក់ គឺការចូលរួមក្នុងកិច្ចប្រជុំពីការព្យាបាលជាសះស្បើយ ។ អស់អ្នកដែលមានឧបសគ្គស្រដៀងគ្នា ជារឿយៗមានសមត្ថភាពយ៉ាងខ្លាំងដើម្បីបង្ហាញចិត្តសណ្ដោសដល់ការពុះពាររបស់អ្នក ។ គំនិតខាងក្រោមនេះអាចមានប្រយោជន៍នៅក្នុងការសម្រេចចិត្តអំពីអ្នកឧបត្ថម្ភត្រឹមត្រូវម្នាក់ ៖

ស្វែងរកការណែនាំខាងវិញ្ញាណមកពីព្រះវរបិតាសួគ៌ តាមរយៈការអធិស្ឋាន និងការតមអាហារអំពីមនុស្សដែលអាចធ្វើជាអ្នកឧបត្ថម្ភដល់អ្នកបាន ។
ពិចារណាជ្រើសរើសនរណាម្នាក់ដែលចំណាយពេលវេលាច្រើននៅក្នុងការព្យាបាល និងបានឆ្លងកាត់ជំហានទាំង ១២ ។
សូមស្ដាប់ នៅពេលមនុស្សចែកចាយបទពិសោធន៍របស់ពួកគេនៅក្នុងការព្យាបាល ហើយពិចារណាពីមនុស្សដែលអ្នកភ្ជាប់ជាមួយបាន ។
អ្នកដឹកនាំក្រុម និងអ្នកសម្របសម្រួលអាចណែនាំអ្នកឲ្យស្គាល់បេក្ខជនដែលត្រឹមត្រូវ និងស្ម័គ្រចិត្តបាន ។
សួរមនុស្សដែលអ្នកមានអារម្មណ៍ថាស័ក្ដិសម ។
អ្នកគួរតែជ្រើសរើសអ្នកឧបត្ថម្ភម្នាក់ ដែលមានភេទដូចគ្នានឹងអ្នក ( លើកលែងតែអ្នកឧបត្ថម្ភនោះគឺជាសាច់ញាតិម្នាក់ ) ។
នៅពេលអ្នកចាប់ផ្ដើមដំណើរការនៃការផ្លាស់ប្ដូរនេះ អ្នកអាចងាយនឹងរងការឈឺចាប់ខាងផ្លូវកាយ ផ្លូវចិត្ត និងខាងវិញ្ញាណ ។ សូមប្រុងប្រយ័ត្ន ដើម្បីកុំបង្កើតទំនាក់ទំនងមួយដែលពឹងផ្អែកលើអ្នកឧបត្ថម្ភឡើយ ។
អ្នកអាចសុំនរណាម្នាក់ឲ្យធ្វើជាអ្នកឧបត្ថម្ភដល់អ្នកក្នុងរយៈពេលបណ្ដោះអាសន្នបានជានិច្ច ។ អ្នកអាចប្ដូរអ្នកឧបត្ថម្ភបានគ្រប់ពេលវេលាទាំងអស់ ។

ការធ្វើជាអ្នកឧបត្ថម្ភដ៏មានប្រសិទ្ធភាព

ការធ្វើជាអ្នកឧបត្ថម្ភគឺជាសកម្មភាពបម្រើដ៏អស្ចារ្យមួយ នៅពេលអ្នកចែកចាយបទពិសោធន៍ សេចក្ដីជំនឿ និងសេចក្ដីសង្ឃឹមរបស់អ្នកផ្ទាល់ ដែលអ្នកបានទទួល ពេលឆ្លងកាត់ជំហានទាំង ១២ នៃការព្យាបាល និងការជាសះស្បើយតាមរយៈព្រះអង្គសង្គ្រោះព្រះយេស៊ូវគ្រីស្ទ ។ អ្នកឧបត្ថម្ភសួរសំណួរដែលបានគិតគូរ ចង្អុលបង្ហាញធនធាននានា ប្រាប់ពីជំនួយជាក់ស្ដែងស្ដីពីរបៀបឆ្លងកាត់ជំហានទាំងនេះ ហើយលើកទឹកចិត្តអ្នកដែលពួកគេឧបត្ថម្ភឲ្យចូលរួមការប្រជុំការព្យាបាល ។ អ្នកឧបត្ថម្ភយល់ថា អ្នកដទៃអាចដើរតួមួយនៅក្នុងដំណើរជាសះស្បើយរបស់បុគ្គលម្នាក់ ហើយនឹងមិនអន់ចិត្តឡើយ ប្រសិនបើមនុស្សដែលពួកគេឧបត្ថម្ភនោះស្វែងរកការគាំទ្រពីមនុស្សដទៃ ឬជ្រើសរើសដើម្បីផ្លាស់ប្តូរអ្នកឧបត្ថម្ភ ។ ខាងក្រោមនេះគឺជាគោលការណ៍មួយចំនួនដើម្បីធ្វើជាអ្នកឧបត្ថម្ភដ៏មានប្រសិទ្ធភាព ៖

ដាក់អាទិភាពលើព្រះ មុនអ្នកណាផ្សេងទៀតទាំងអស់ ។ ចងចាំដល់ព្រះជានិច្ច ហើយជួយមនុស្សដែលអ្នកឧបត្ថម្ភឲ្យពឹងផ្អែកលើទ្រង់ ។ ប្រយ័ត្នប្រយែងដើម្បីកុំឲ្យមនុស្សដែលអ្នកឧបត្ថម្ភមានការពឹងផ្អែកខ្លាំងពេកលើអ្នក ។ ការទទួលខុសត្រូវរបស់អ្នកក្នុងនាមជាអ្នកឧបត្ថម្ភ គឺត្រូវលើកទឹកចិត្តអ្នកដទៃឲ្យងាកទៅរកព្រះវរបិតាសួគ៌ និងព្រះអង្គសង្គ្រោះដើម្បីទទួលបានការណែនាំ និងអំណាច ។ តួនាទីរបស់អ្នកគឺត្រូវចែកចាយបទពិសោធន៍របស់អ្នកអំពីសេចក្ដីជំនឿ និងសេចក្ដីសង្ឃឹម ដើម្បីជួយបុគ្គលដែលអ្នកគាំទ្រ ឲ្យទទួលអារម្មណ៍ថាបានស្រឡាញ់ និងគាំទ្រដោយព្រះ ។
ធ្វើជាអ្នកចូលរួមដ៏សកម្មនៅក្នុងការព្យាបាល អ្នកឧបត្ថម្ភត្រូវស្ថិតនៅក្នុងការជាសះស្បើយរយៈពេលចាំបាច់មួយ មុនពេលអាចឧបត្ថម្ភនរណាម្នាក់បាន ( ជាទូទៅ ១២ ខែឡើង ) ហើយចូលរួមយ៉ាងសកម្មនៅក្នុងការអនុវត្ត និងការសិក្សាគោលការណ៍នៃការព្យាបាល ។ អ្នកអាចមានអារម្មណ៍ថាមានសម្ពាធបន្ថែមនៅក្នុងដំណើរជាសះស្បើយរបស់អ្នកផ្ទាល់ នៅពេលអ្នកចាប់ផ្ដើមឧបត្ថម្ភអ្នកផ្សេងទៀត ។ សូមប្រយ័ត្នកុំបង្កគ្រោះថ្នាក់ដល់ការជាសះស្បើយរបស់អ្នកផ្ទាល់ ដោយសារការឧបត្ថម្ភដល់អ្នកផ្សេងឡើយ ។ អ្នកឧបត្ថម្ភអនុវត្តការថែទាំខ្លួនឯង និងសុំជំនួយ ឬការគាំទ្រនៅពេលចាំបាច់ ។
សូមមានចិត្តរាបសា ។ ក្នុងនាមជាអ្នកឧបត្ថម្ភ តួនាទីរបស់អ្នកគឺដើម្បីប្រើកម្លាំងរបស់អ្នកដើម្បីផ្ដល់ការគាំទ្រ និងការណែនាំ ។
សូមគោរពដល់សិទ្ធិជ្រើសរើសរបស់អ្នកដទៃ និងរៀនមានចិត្តអំណត់ ។ ការឧបត្ថម្ភដ៏មានប្រសិទ្ធភាពកើតមាន « ដោយការលួងលោម ដោយការអត់ធ្មត់ ដោយការទន់ភ្លន់ និងការស្លូតបូត និងដោយការស្រឡាញ់ស្មោះត្រង់ប៉ុណ្ណោះ ដោយចិត្តល្អ និងដោយការចេះដឹងពេញទី » ( គោលលទ្ធិ និងសេចក្ដីសញ្ញា ១២១:៤១–៤២ ) ។ សូមចៀសវាងពីការព្យាយាមកែតម្រូវអ្នកដទៃតាមរបៀបណាមួយ ។ សូមជួយអ្នកដទៃឲ្យពិចារណាពីគោលការណ៍ និងការអនុវត្តនានា រួចហើយគាំទ្រដល់ពួកគេ នៅពេលពួកគេធ្វើការសម្រេចចិត្តដោយខ្លួនឯង ។ សូមគោរពដល់សិទ្ធិជ្រើសរើសរបស់ពួកគេ និងមានសង្ឃឹមថា ព្រះអម្ចាស់នឹងជួយដល់ពួកគេ នៅពេលពួកគេងាកទៅរកទ្រង់ ។ បុគ្គលដែលអ្នកកំពុងជួយ អាចមិនទាន់ត្រៀមខ្លួនជាស្រេចដើម្បីឆ្ពោះទៅមុខទេ ។ គាត់អាចប្រព្រឹត្តឥរិយាបថមិនល្អឡើងវិញ ឬយឺតយ៉ាវក្នុងការធ្វើតាមគោលការណ៍ និងការអនុវត្តនានានៃការផ្លាស់ប្ដូរស្មោះត្រង់ ។ អ្នកឧបត្ថម្ភត្រូវតែមានចិត្តអំណត់ជាមួយអ្នកដទៃ នៅពេលពួកគេធ្វើដំណើរឆ្ពោះទៅរកការជាសះស្បើយ ។
បម្រើដោយមិនគិតពីខ្លួនឯង ។ ការបម្រើដោយមិនគិតពីខ្លួនឯង តម្រូវឲ្យផ្ដល់ឲ្យដោយឥតសង្ឃឹមថាចង់បានអ្វីតបវិញឡើយ ។ អ្នកឧបត្ថម្ភគួរតែមានសមត្ថភាពខ្ពស់ដើម្បីយល់ចិត្ត និងស្ម័គ្រចិត្តលះបង់ពេលវេលា និងកិច្ចខិតខំសម្រាប់មនុស្សដែលពួកគេឧបត្ថម្ភ ។ ចៀសវាងការចង់បានការសរសើរ ការស្ញប់ស្ញែង ភក្ដីភាព ឬរង្វាន់ខាងសតិអារម្មណ៍ផ្សេងទៀតមកពីមនុស្សដែលអ្នកឧបត្ថម្ភ ។
គោរពការបេ្ដជ្ញាចិត្តផ្ទាល់ខ្លួនរបស់អ្នក ។ ការធ្វើជាអ្នកឧបត្ថម្ភមិនមានន័យថា មនុស្សដែលអ្នកឧបត្ថម្ភគួរតែមានសិទ្ធិដោយគ្មានព្រំដែនដើម្បីប្រើប្រាស់ពេលវេលា និងធនធានរបស់អ្នកនោះទេ ។ អ្នកអាចធ្វើជាគំរូមួយនៃសារៈសំខាន់នៃការដាក់ព្រំដែនដែលមានសុខុមាលភាព តាមរយៈការគោរពដល់ការប្ដេជ្ញាចិត្តផ្សេងទៀតរបស់អ្នក រួមមានការប្ដេជ្ញាចិត្តចំពោះគ្រួសាររបស់អ្នក សាសនាចក្រ ការងាររបស់អ្នក និងពេលវេលាផ្ទាល់ខ្លួនរបស់អ្នក ។ សូមចាំពីការប្រឹក្សាដែលស្ដេចបេនយ៉ាមីនបានផ្ដល់ឲ្យនៅក្នុង ម៉ូសាយ ៤:២៧ ៖ « ហើយចូរឲ្យឃើញថា គ្រប់ការណ៍ទាំងនេះត្រូវបានប្រព្រឹត្តឡើងក្នុងប្រាជ្ញា និងរបៀបរៀបរយ ដ្បិតមិនត្រូវឲ្យអ្នកណារត់លឿនជាងកម្លាំងដែលគេមាននោះឡើយ » ។
អធិស្ឋានជានិច្ច រាល់ពេលដែលអ្នកជ្រើសរើសដើម្បីឧបត្ថម្ភនរណាម្នាក់ សូមស្វែងរកការណែនាំពីព្រះអម្ចាស់ដើម្បីដឹងថា តើគោលការណ៍ ឬការអនុវត្តមួយណាដែលនឹងមានប្រយោជន៍បំផុតសម្រាប់តម្រូវការបច្ចុប្បន្នរបស់បុគ្គលនេះ ។ សូមអធិស្ឋានជានិច្ច នៅពេលអ្នកពិចារណាពីរបៀបដើម្បីបម្រើ ហើយសូមខិតខំដើម្បីឲ្យព្រះវិញ្ញាណដឹកនាំអ្នកជានិច្ច ។
ថ្លែងទីបន្ទាល់អំពីសេចក្ដីពិត អ្នកអាចមានអារម្មណ៍បំផុសឲ្យចែកចាយបទពិសោធន៍ ដើម្បីអនុញ្ញាតឲ្យអ្នកដទៃដឹងថា អ្នកអាចយល់បាន ។ អ្នកក៏អាចថ្លែងទីបន្ទាល់អំពីព្រះអង្គសង្គ្រោះ និងព្រះចេស្ដាព្យាបាលរបស់ទ្រង់បានផងដែរ ។ សេចក្ដីពិតដែលថា ព្រះគឺជាព្រះនៃអព្ភូតហេតុ គឺជាគន្លឹះ ( សូមមើល មរ៉ូណៃ ៧:២៩ ) ។ ការចែកចាយទីបន្ទាល់របស់អ្នកអំពីសេចក្ដីមេត្តាករុណា និងព្រះគុណរបស់ទ្រង់អាចជាការបម្រើដ៏សំខាន់បំផុតមួយ ដែលអ្នកអាចផ្ដល់ឲ្យបាន ។
រក្សាការសម្ងាត់ ក្នុងនាមជាអ្នកឧបត្ថម្ភម្នាក់ អ្នកមានការទទួលខុសត្រូវមួយដើម្បីការពារឯកជនភាពរបស់អ្នកដទៃ ។ ភាពអនាមិក និងការសម្ងាត់គឺជាគោលការណ៍ស្នូលដ៏សំខាន់នៅក្នុងការពង្រឹងសមត្ថភាពរបស់អ្នកដើម្បីឧបត្ថម្ភ និងជួយដល់អ្នកដទៃ ។