Fakaʻosí

ʻI heʻetau aʻu mai ki he ngataʻanga ʻo e fakahinohino ko ʻení, ʻoku mau fakamoʻoni kuo teʻeki ai ke tau aʻu ki he ngataʻanga ʻo e fononga toputapú ni. ʻI heʻemau fuofua haʻu ki he ngaahi fakataha fakaakeaké, naʻa mau fakakaukau ko e mana maʻongoʻonga taha te mau teitei aʻusiá ko ʻemau fakaakeake mei he maʻunimaá. Ko kitautolu ko ia ʻoku tau aʻusia e tāpuaki ko ʻení ʻoku tau ʻiloʻi ʻoku ʻi ai ha meʻa lahi ange—ha ngāue lahi ange ke fakahoko mo ha ngaahi mana mo e ʻaloʻofa lahi ange ke aʻusia. “ʻOku teʻeki ai mamata ʻe ha mata, pe fanongo ʻe ha telinga, pea ʻoku teʻeki ai hū ki he loto ʻo ha tangata, ʻa e ngaahi meʻa ʻa ia ʻoku teuteu ʻe he ʻOtuá maʻanautolu ʻoku ʻofa kiate iá” (1 Kolinitō 2:9).

Ko kimautolu kuo mau fakahoko e ngaahi sitepu ko ʻení mo maʻu e fakaakeaké, ʻoku mau fakaʻamu mo lotua ʻe tāpuekina foki koe ʻaki ha fakaakeake kakato, ʻo tānaki atu ki ai ʻa e ngaahi tāpuaki ʻo e kau fakaʻaufuli ki he Siasí. Ko e maʻá mo e tauʻatāina mei he fakaakeaké ko e kamataʻanga ia ʻo hono tali e meʻa kotoa ʻoku maʻu ʻe he ʻEikí maʻatautolú.

ʻOku kau hotau niʻihi ki he polokalamá, ʻo fakakaukau kuo fakamoʻui kitautolu, pea ʻikai toe kau ki ai, pea toe foki leva ki he anga motuʻá. ʻOku maʻu ʻe ha niʻihi e fakaakeaké ka ʻoku nau taʻofi ʻoku teʻeki ke nau maʻu e ngaahi tāpuaki ʻo e mālohi kakato ʻi he Siasí. Kuo mau ʻilo ʻoku kau ʻi ha fakaakeake fakaʻaulilikí hono kumi ha potupotutatau mo e fehokotaki ʻi he vahaʻa ʻo e ngaahi sitepu ʻe 12 ʻo e fakaakeaké pea mo e ongoongolelei ʻo Sīsū Kalaisí.

ʻOku tau hoko ko e kakai foʻou ʻia Kalaisi, pea ʻi heʻene peheé, te tau lava ʻo hoko ko ha ngaahi meʻangāue maʻongoʻonga ke tokoni ki he ʻEikí ʻi he ongo tafaʻaki fakatouʻosi ʻo e veilí (vakai, 2 Kolinitō 5:17). ʻOku mau fakamoʻoni ki he ivi lahi ange ʻoku tau maʻu ʻi he hokohoko atu ʻetau fakahoko e ngaahi tefitoʻi moʻoni ko ʻeni ʻo e ongoongoleleí ʻi he tapa kotoa ʻo ʻetau moʻuí, kau ai ʻetau mālohi ʻi he Siasí. ʻOku tokoni e ngaahi tefitoʻi moʻoni ʻoku tau moʻui ʻaki ʻi he fakaakeaké, ngaahi lēsoni ʻoku tau akó, mo e ngaahi aʻusia ʻoku tau maʻú, ke tau haʻu kakato ange kia Kalaisi pea taki kitautolu ke tau ngāue ʻo fakatatau ki he palani ʻa e ʻEikí. ʻOku tau hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku “femoʻuekina … ʻi he holi lahi” (Tokāteline mo e Ngaahi Fuakava 58:27).

Kuo tāpuekina kitautolu ʻe he ʻEikí ʻi heʻetau fakaʻaongaʻi e ngaahi meʻangāue ne fokotuʻu mai ʻi he fakahinohino ko ʻení. Ka neongo ia, ko e Siasi ʻo Sīsū Kalaisí ko e fale tukuʻanga koloa ia ki he ngaahi meʻangāue kotoa ʻoku fiemaʻu ke pukepuke ʻaki ʻetau tauʻatāina mei he maʻunimaá pea tupulaki mo fakalakalaka ʻi he hala ʻo e fuakavá. ʻI heʻemau aofangatuku e fakahinohino ko ʻení, ʻoku mau fakaafeʻi ʻa kinautolu kotoa pē ʻoku kau ki he Polokalama Fakaakeake mei he Maʻunimaá ʻa e Siasí ke mou “vivili atu ki muʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa, mo ha ʻofa ki he ʻOtuá mo e kakai fulipē” (2 Nīfai 31:20). ʻI heʻetau fai iá, ʻoku foaki mai kiate kitautolu ʻa e maʻongoʻonga taha ʻi he ngaahi talaʻofa kotoa ʻa e ʻEikí: “Te mou maʻu ʻa e moʻui taʻengatá” (veesi 20).

Ko hono fakaʻosí, ʻoku mau tuku atu ʻemau fakamoʻoní ʻoku ʻi ai e ʻamanaki lelei ki he fakaakeaké ʻo fakafou ʻi he Fakamoʻui ko Sīsū Kalaisí pea mo e ngaahi tefitoʻi moʻoni ko ʻení. Kuo mau kau ki he ongoongoleleí mo fakahoko e ngaahi sitepu ko ʻení, pea ʻoku mau ʻilo ʻoku ngāue ia. ʻOku mau fakaafeʻi kimoutolu ke mou lotua ʻa e loto-holi mo e loto-fiemālie ke hokohoko atu e ngāué ni, ʻo fakaʻatā e ʻaloʻofa taʻefakangatangata ʻa Sīsū Kalaisí ke ne fakakakato hoʻo fakaakeaké. Fakatauange ke tāpuekina koe ʻe he ʻOtuá ʻi hoʻo fonongá.