Ekekot Nnyin man Inam Eti-ŋkpɔ

Etop otode Elder Ronald A. Rasband

Eke Eboho mme Apostle Duopeba

Nnyin ibɔp obio-ubɔŋ Abasi ke nte nnyin inamde ŋkpɔ inɔ mben efen, iminede uŋwana nnyin ke enyɔŋ, inyuŋ ida inɔ uwɔrɔ ufin edu-ukpono.

Gideon ama ɔdiɔŋɔ nsu-nsu ukpep-ŋkpɔ ke ini enye okokopde. Enye ama ebemiso okop enye kiso Edidem Noah ye mme oku esie—mme oku “emi ekemenere idem ke ntaŋidem esit mmɔ” ye “ekeŋwamde ke ifu mmɔ, ye ke ukpono-ndem mmɔ, ye ke ido-akpara mmɔ, oto ke mme unyik-etibe emi edidem Noah ekefikde odot ɔnɔ ikɔt esie” (Mosiah 11:5–6).

Ndiɔk-nkan, Edidem Noah ama ɔnɔ uyo ete ewot prophet Abinadi ndien oyom ndisobo Alma ye mbon ikɔ Abasi esie (se Mosiah 17; 18:33--34). Man editre oruk ibak oro, Gideon ama ɔŋwɔŋɔ nditre edidem, emi enye ɔkɔsuhɔde kpɔt oto ke ntak edidi-enwan eke mme Lamanite (se Mosiah 19:4–8).

Ekem, Gideon enehede asua ɔnɔ mme oku Noah ke edimen nditɔ iban Lamanite Edip-ye-inaŋ nyɔŋ. Enye edikut ke prophecy eke Abinadi kabaŋa mbon owo ama ediwɔrɔ osu koro mmɔ ema esin ndikabare esit. (Se Mosiah 20:17–22.) Enye ama aŋwam ndinyaŋa mbon Limhi, emi ekedude ke ufin enɔ mme Lamanite (se Mosiah 22:3–9).

Idahaemi ama ɔkɔsɔŋ ke isua, inikiet efen Gideon akaŋwana ntaŋidem ye ibak mbiba nte enye adade kiso Nehor, emi akadade edinam-ifɔt esin kotu mbon owo. Nehor ama “awana ekɔŋ ye ufɔk Abasi” onyuŋ oyom ndida mbon owo mkpɔŋ usuŋ. (Se Mosiah 1: 3, 3, 7; se nko 2 Nephi 26:29.)

Ndikama ikɔ Abasi nte ŋkpɔ-ekɔŋ esie, enyene-uko Gideon ama asua-ɔnɔ Nehor kabaŋa ibak esie. Ke iyatesit, Nehor ama aŋwana onyuŋ owot Gideon ye akaŋkaŋ esie. (Se Alma 1:7–9.) Ntem eketre mme usen eke “edinen owo kiet” emi “akanamde ediwak nti ŋkpɔ kotu ikɔt esie” (Alma 1:13).

Ukperedem usen eke nnyin idude ɔnɔ nnyin akamba nti ifet ndikpebe Gideon nte “ŋkpɔ-utom kiet ke ubɔk Abasi” (Alma 1:8) ke ndi “sin unwam” (Mosiah 22:4) nnɔ mbon efen, ndida nnɔ edinen ido, ye ndikan ndik nnɔ uwɔrɔ-ufin nnyin man ikpono inyuŋ inam ŋkpɔ inɔ Abasi. Nte nnyin itienede nti uwutŋkpɔ Gideon, nnyin nko imikeme ndinam ediwak nti ŋkpɔ.

Ediana-kiet ke Utom-unwam

Akpa Presidency eketiŋ ete, “Nte mme anditiene [Andinyaŋa], nnyin iyom ndima Abasi ye mbɔhiduŋ nnyin ke ofuri ererimbot.” “Ufɔk Abasi Jesus Christ mme Ndisana Owo ke Ukperedem Usen enyene udɔŋ man ediɔŋ mbon efen enyuŋ enwam mbon emi edude ke unana. Nnyin imibɔ edidiɔŋ ke edinyene ukeme, ŋkpɔ-unwam, ye nti ŋkpɔ-ebuana ke ekondo ndida nam nsasana ubiɔŋ-utom emi.”¹

Ami mmenem esit nnɔ ntat-ubɔk utom-unwam ye edinwam emi mbon Ufɔk Abasi enɔde ke mme temple nnyin ye ke mme ward, branch, ye mme stake mmɔ. Ami nko mmenem esit ke mbon Ufɔk Abasi enɔ unwam ke anana-ibat obio, mme nka ufɔkŋwed, ye eke-ima ndien ke mmɔ ebuana ke mme tɔsin utom eke ufɔn-uwem owo ke ofuri isua, enamde ata ediwak ini mfɔn-utom ke esimde mme idut ye isɔŋ-ukara Ikie Iba.²

Usuŋ kiet emi Ufɔk Abasi etatde nti ifet utom-unwam ke mme nsio-nsio idut oto ke JustServe.org. Emi Ufɔk Abasi enamde edi odu ɔnɔ owo ekededi emi oyomde edidiɔŋ mbon efen, JustServe.org “adian mme unana eke anam mfɔn-utom eke obio ye mme anam mfɔn-utom” emi “ɔsɔŋɔke nti uwem ke obio.”³

Ufɔk Abasi ye mbon mmɔ nko ediana kiet ye mme nka utom-unwam ke ofuri ererimbot. Ufɔk Abasi, ekɔm enyene mbon mmɔ, ekedi mkpon-nkan nka Red Cross kiet andisɔŋɔ ndɔŋ unɔ-iyip ke isua 2022.” Ndidian do, mmi-mmi emi Ufɔk Abasi ema enɔ million $8.7 esɔk nka Red Cross.⁴

Ufɔk Abasi nko ebuana ye mme nka ndida nsasana mmɔŋ ye utom usana-idem eka mme ebiet ke ofuri ererimbot. Ke isua 2022, Ufɔk Abasi ema ebuana mme oruk utom Ikie-ye-aba-ye-efurekiet oro.⁵ Nnyin nko imidiana ye inyuŋ inɔ mme nka efen emi edade unwam esɔk nditɔ Abasi emi ebɔde ndutuhɔ.⁶

President Henry B. Eyring, Udiana Ɔnɔitem ke Akpa Presdency ete, “Ini emi nnyin idiande ubɔk man inwam mbon owo emi edude ke unana,ke Jehovah eyedian esit nnyin edi kiet.”⁷

Emenede Unwana Mbufo Ke Enyɔŋ

Nte mme mbet Andinyaŋa, nnyin nko imidiɔŋ mbɔhiduŋ nnyin ke nte nnyin inimde ediomi nnyin inyuŋ idu mbiet-uwem eke Christ. Ŋwed Mormon ekpep ke mbon ufɔk Abasi inaha nte emek edinen ido kpɔt edi nko eyenam ekop ndinen uyo mmɔ edieke mmɔ eyomde Jehovah ekpeme onyuŋ anam mmɔ eforo (se Alma 2:3–7; se nko Mosiah 29:27). Jehovah oyom nnyin ete ibuana mbuɔtidem nnyin ye se inimde ke akpanikɔ inyuŋ imenede unwana nnyin ke enyɔŋ. “Sese Ami ndi unwana emi mbufo edimenede ke enyɔŋ” (3 Nephi 18:24).

President Dallin H. Oaks, Akpa Ɔnɔitem ke Akpa Presidency ete ke, “Nnyin inamke-ŋkpɔ Andinyaŋa ɔfɔn edieke nnyin ibak-de owo ikan Abasi.” Enye adian ete, “Ekekot nnyin ete iwuk ibet Abasi, idihe ke editiene ererimbot.”⁸

Mme ke ufɔkŋwed, itie-utom, mme mbre, ke nduɔk-odudu, ke edimehe-ufan, mme ke ŋkpɔ-ofim, mme mbet Jehovah ikopke “buut ke edida enyiŋ Christ ndori ke idem mmɔ” (Alma 46:21). Otode ke ikɔ ye utom nnyin, nnyin imikut ke Abasi odu uwem ndien ke nnyin itiene Eyen Esie.

“Mbuɔtidem nnyin inyeneke ubahare, mme ke akpanikɔ ikpinaha enyene. Paul Lambert, ata-ifiɔk owo Latter-day Saint ke mbuha edu-ukpono eketiŋ ete, Mbuɔtidem idihe kpɔt inɔ ufɔk Abasi, enye idihe kpɔt inɔ ufɔkiduŋ, idihe kpɔt inɔ [ufɔkŋwed].” “Oro edi ɔnɔ ofuri ŋkpɔ se afo anamde.“⁹

Nnyin idiɔŋɔke odudu emi ikɔ ntiense, nti uwutŋkpɔ, nti edinam nnyin ekemede edinyene nnɔ mbon efen. Edi nte nnyin idade inɔ akpanikɔ inyuŋ imenede unwana Andinyaŋa ke enyɔŋ, mme owo eyefiɔk nnyin ndien heaven eyetiŋ eti edian nnyin.

Eda enɔ Uwɔrɔ-ufin Edu-ukpono

Mbre-ifɔt eke eyo emi, ye anyan-ini nkaiso eke mme nka emi enwanade ye mbon mbuɔtidem, ikpuhɔkede ikpɔŋ eke mme ini eke Ŋwed Mormon. Uyo eke mbon emi efaŋake ye akpan ntak ufɔn eke edu-ukpono ke anwa-anwa ye mme itie mbre-ukara ke ɔkɔkɔri ɔsɔŋ uyo. Ikpɔ mbon ererimbot ye mbon ukara-isɔŋ, esinede ediwak ufɔkŋwed ye ufɔkŋwed nta-ifiɔk, ke efefik edinam ye edikwɔrɔ oburɔbɔt-ido, editre edinim ke edu-ukpono, ye ndiɔi ukpepŋkpɔ.

Eŋwan ye uwɔrɔ ufin edu-ukpono eyekut unen edieke nnyin midahake-ida inɔ mme unen eke edu-ukpono nnyin. Ami nkekpep mmi-mmi-emi ke, “Nte ufɔk Abasi, nnyin idiana ye mme edu-ukpono efen ndikpeme ofuri mme okpono-Abasi ye mkpe-ubɔk ye unen mmɔ nditiŋ se mmɔ enimde ke akpanikɔ.”¹⁰

Ema eŋwana eŋwan ke heaven ke ntak edimek unen—unen nnyin ndimek. Ndikpeme unen nnyin ndimek oyom ete nnyin inyene ntiŋ-enyin ke edikpeme uwɔrɔ ufin edu-ukpono nnyin.

Ntuak-nda ke mbuɔtidem edu-ukpono ɔsɔsɔŋɔ onyuŋ ekpeme mme ufɔkemana, obio, ye idut. Enye ɔsɔsɔŋɔ edikop-item nnɔ mbet, owuk ukpono ɔnɔ uwem ye inyene, onyuŋ ekpep ata-ima, edinam-akpanikɔ, ye eti edu-uwem—nti ido emi eyomde man edi-nam eti, ɔwɔrɔ-ufin, ye obio emem odu ebighe. Akananam nnyin idiyomke edikpe-ubɔk kabaŋa mbuɔtidem nnyin.

Ukeme utom ukwɔrɔ-ikɔ nnyin, nda-nnɔ utom nnyin ke mme temple, ukeme nnyin ke ndibɔp obio-ubɔŋ Abasi, ye ata inemesit nnyin oyom ete nnyin ikpeme mbuɔtidem edu-ukpono ye uwɔrɔ-ufin. Nnyin ikemeke ndinana uwɔrɔ-ufin oro ke minanake mme uwɔrɔ-ufin efen.

Prophet Joseph Smith ekpep ete, “Enye edi ima ubɔhɔ emi ɔsɔŋɔke ukpɔŋ mi—ubɔhɔ eke obio ye ido Abasi ɔnɔ ofuri ubon owo.”¹¹ Ubɔhɔ ido Abasi nko eyesɔŋɔ mme ukpɔŋ nnyin ke nte nnyin itienede item eketode mme adausuŋ eke Ufɔk Abasi.

“Esɔp edikop etop kabaŋa mme akpan ŋkpɔ eke obio, ndien ekem esioro-uyo etiŋ ke uko ye nsuhɔre-ibuot.”¹²
“Eti ke mbiara uwɔrɔ ufin eke edu-ukpono eyenehede anwana ye nti-ifet nnyin ke edikɔri ke odudu ye ifiɔk ikɔ Abasi, emi nsasana edinam-ikɔ Abasi akanamde odu, ye edibuɔt-idem ke Jehovah ndida Ufɔk Abasi usuŋ.”¹³
“Edaha-eda enyuŋ etiŋ ikɔ ndisɔŋɔ ke Abasi odu ke uwem ndien ke edi ata akpanikɔ ete ke ema ewuk ibet Esie enim.”¹⁴
“Efaŋa mme ewuhɔ emi edibiatde unen nnyin ke edi-nam ido mbuɔtidem eke nnyin.”¹⁵
“Eka ke ererimbot man enam nti-ŋkpɔ, man esɔŋɔ mbuɔtidem ke Akwa Abasi, ndien man enwam ndida mbon efen nkesim ebiet akwa inemesit.”¹⁶
Ekot ŋkpɔ unwam religiousfreedom.ChurchofJesusChrist.org ye ke religiousfreedomlibrary.org/documents.

Nnyin ibɔp obio-ubɔŋ Abasi ke nte nnyin inamde ŋkpɔ inɔ mbon efen, iminede uŋwana nnyin ke enyɔŋ, inyuŋ ida inɔ uwɔrɔ ufin edu-ukpono. Yak Abasi ɔdiɔŋ nnyin ke ukeme nnyin ndinam “akwa ufɔn” kotu mme ufɔkemana, obio, ye idut nnyin.

© 2024 eketode Intellectual Reserve, Inc. Ekpan kpukpru unen ndimiŋ nwed emi. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop Liahona, Ɔyɔhɔ Ɔfiɔŋ Inaŋ 2024. Efik. 19347 553