Nzambi Mmukumanya ne Mukunanga

Kudi Mukulu Ulisses Soares

Wa mu Mpuilu wa Bapostolo Dikumi ne Babidi

Bulelela butuishibua ne bua tshiendelela budi ne Tatu wa mu Diûlu mmutunanga ne kakutupua moyo anyi kutulekela nansha.

Nansha kumpala kua baledi banyi kubuela mu Ekelezia wa Yezu Kilisto wa Bansantu ba Matuku a Ndekelu, bakalongesha bana betu ba baluma basatu ne mema pa Nzambi ne Yezu Kilisto. Mvua misangu yonsu mumanya ne Nzambi udi koku ne mmummanya ne mmunnanga. Tshivua mua kuela mpata pa tshiotshi nansha.

Bu muakapita bidimu, diumvua dianyi ne bujadiki buanyi bua mushindu muimpa udi Nzambi mummanya ne mushindu udiyi munnanga bia bungi biakashindama. Lelu, bu Mupostolo wa Yezu Kilisto, Ndi njadika ne Nzambi mmumanya ne munanga bana Benda bonsu.

Ndi musua bua kunubikila bua kusanka nanyi pa dibenesha dia ndondu dia diumvua mushindu udi Nzambi mukumanya ne mukunanga mu ndondu.

Nzambi uvua mukumanya ne mukunanga katshia ku ntuadijilu.

Mukalenga wakambila muprofete Yelemiya, “Diambedi tshiyi muanji kukufuanyisha munda mua mamu webe nakakumanya” (Yelemiya 1:5). Bidi bilelela bua muntu yonsu—nansha wewa.

Nzambi udi Tatu weba wa mu Dîulu. Mmukumanya ntanta mula. Bulelela, uvua “ku tshibangidilu ne Tatu” (Dilongesha ne Bipungidi 93:23). Bu umua wa ku bana Benda ba nyuma, uvua koku mu tshipangu mu diûlu muvua Tatu wa mu Diûlu muleja bulongolodi bunena Buenda bua disanka. Muprofete Joseph Smith wakalongesha ne bulongolodi bua Nzambi budi bupesha yonsu wa kutudi “diesa dia kutanta bu [Yeya] nkayenda [ne] … kuikala muzanjikibua [N’enda].” Tatu wa mu Diûlu uvua musua bua wewa wikala ne diesa ne mmukupesha tshipolu tshia kusungula bua kulua bu Yeya.

Bualu bonsu budi Tatu wa mu Diûlu muenza ne budiyi wenza mu matuku alualua a bulongolodi bunena Buenda bua disanka budi dileja dia dinanga dikezuka buetu. Udi ne bujima bua disanka ne musua bua tuetu tuikala ne bujima bua disanka kabidi. Bu “bua muana wa baluma anyi wa bakaji wa nyuma wa baledi ba mu diûlu,” tudi ne bukola bua ku diûlu budi bututuangaja ne Tatu wa mu Diûlu ne busonga mushindu udiyi Utumona.

Tatu wa mu Diûlu udi mûla tenta ne dinanga didi kadiyi ndekelu, diakana, dia tshijila, ne dikezuka bueba wewa didi kadiyi kumvuija. Udi ne mushinga kudiyi bualu udi muanenda. Dinanga Dienda bueba diakabangisha mu tshiendelela kala kumpala kua wewa kuledibua. Ne didi ditungunuka kupitshila mu moyo weba wa tshifuaka ne tô ne mu tshiendelela.

Nzambi Mmukumanya ne Mukunanga

Mu tshifuaka tshivulukilu tshietu tshia moyo wa kumpala kua diledibua tshidi tshibuikidija tshilamba mu lusa, mu kutuanyishila bua tuenda mu ditabuja ne tuenzela budisuila buetu mu dipetangana ne bulongolodi buakana bua Tatu wa mu Diûlu. Kadi Tatu wa mu Diûlu udi uvuluka. Kena anu uvuluka tshituvua bikala, kadi udi kabidi mumanya malu onsu pa tuetu mpindiewu.

Mmumanya bikondu bionsu bia mioyo yetu, mateta etu, masanka, ne tunyinganyinga. Udi umua udi mumanya meji etu ne majinga a mitshima yetu (tangila Dilongesha ne Bipungidi 6:16). Mukulu Ronald A. Rasband wa mu mpuilu wa Bapostolo Dikumi ne Babidi mmulongesha, “Kakuena muntu udi mukumanya biakana anyi ukutabelela biakana kupita mushindu udi [Tatu wa lu Diûlu] wenza.”

Bualu Mmutumanya ne ututabelela bia bungi kupita muntu yonsu, Tatu wa mu Diûlu udi utangila bitupa bionsu bia moyo bitudi tupitshila pa buloba. Mmumanya bantu bonsu batuambuluisha bua kukumbaja bukola buetu bua bunzambi bu Muanenda wa baluma anyi wa bakaji. Kupita mushindu utudi mua kuela meji, Mmusua bua tuetu tukumbaja kipatshila ketu ka ku diûlu—kupingana ku dîku dietu dia ku diûlu.

Nansha mutudi bonsu tuenza bilema, Mmunanga yonsu wa kutudi biakana. Kudi mushindu umua udi Tatu wa mu Diûlu muleja patoka ne mu ndondu ditabelela Dienda dia dinanga: “Bualu bua Nzambi wakatamba kusua ba pa buloba, Yeya wakatuma Muanenda umuepele, bua ewu yonsu wamuitaba kafua biandi, kadi ikala ne moyo wa tshiendelele ” (Yone 3:16).

Nzambi wakatamba kutunanga—kutunanga bikola ne menamena—Yeya wakatuma Yezu Kilisto, Muanenda Muanabuta, “Muanenda Munanga ne Musungula katshia ku tshibangidilu” (Mose 4:2), bua kuikala Muanenda Umuepela ne mupandishi wa buloba. Mulambu wa bupikudi wa Yezu Kilisto udi dileja dishema ne dia butumbi bonsu dia dinanga dia Tatu buetu ne bua bana bonsu Benda.

Yezu Kilisto wakalua bua kuenza disua dia Tatu. Ne ditukija ne didipuekesha dia mutshima, Wakapueka muinshi mua bintu bionsu (tangila Dilongesha ne Bipungidi 122:8) ne kuenza mulambu Wenda wa bupikudi bua kukumbaja bulongolodi bua disanka bua tatu. Wakatshimuna bubi ne lufu bua ne bonsu babika ku lufu ne bikala ne diesa dia kukudimuna mutshima ne kupeta dibuikidila. Udi ufila bipungidi bidi bitupesha “diesa ku ngikadilu wa dinanga ne lusa bia pabuabi” ne tshipolu tshia kupeta moyo wa tshiendelela ne “bionsu bidi [Tatu] n’abi” (Dilongesha ne Bipungidi 84:38).

Suaku uvuluka ne “bionsu bidi [Tatu] n’abi” kabiyi anu mabenesha Adiyi utupa bulelela panyima pa moyo ewu kadi dibenesha Didiyi utupesha mpindiewu kabidi. Udi “utukuba ku dituku ne ku dituku” (Mosiya 2:21), mu mishindu ya pabuayi idi itukumbayina ne mu bikondu bitudi tupitshila.

Patudi tusemena pabuipi Nenda ne Muanenda, patudi tusambila kudi Tatu mu dina dia Muana, ne patudi tulama mikenji Yabu “udi utubenesha katataka” (Mosiya 2:24) ne mabenesha a bungi.

Mu moyo ewu, Nzambi “kena kula n’etu” (Bienzedi 17:27).

Ndi ngenda pamua ne muenenu wa Mukulu Neal A. Maxwell (1926–2004), wakitaba ne “dituku dimua dila nedimueneka bitoka bu lelu ne Tatu wetu wa dinanga udi wenza muenda monsu bua kutuambuluisha!”

Nzambi Neakumanya ne Akunanga bua Kashidi

Bantu batudi beyemena bikola mu moyo ewu badi bantu batudi bamanya biakana, badi batumanya biakana, badi batunanga ne bikala ne majinga etu mu mitshima, ne badi batutuishisha ne badi bantu ba kueyemena. Bualu bua Tatu wetu wa mu Diûlu mmutumanya biakana, mutunanga bia bungi, mmuenza ne udi wenza bia bungi buetu, ne udi muakana ne kayi ushintuluka, tudi mua kumueyemena misangu yonsu.

Tutu misangu mikuabu tusangana ditabuja dietu dikankakana anyi? “Tukatuku bambula bujitu bua kanyinganyinga anyi ?” Njila udi kumpala udi umueneka kayi mutoka anyi? Kudi ntatu idi imueneka kayiyi ijika nansha tuetu benza muetu monsu anyi tuetu basambila bikola bua diambuluisha anyi? Kudi mabenesha atudi batekemena ne basambidila adi kâyi makumbana anyi?

Ndi njadika ne Nzambi kakukupua moyo to; anyi kakutulekela nansha. Mmutumanya ne mumanya bidi biakana buetu mu tshikondu tshionsu mu moyo wetu. Udi umona ndekelu ku ntuadijilu. Mu tshikondu tshitudi tuakula etshi mmumanya malu atudi nawu, ngumvuilu yetu, ne majinga etu a nyuma ne a mubidi, nansha majinga a muntu yonsu udi mutunyunguluka.

Bidi bia mushinga bua kumvua ne mabenesha adi alua bilondeshela ku disua, mushindu ne tshikondu bienda. Tshikondu Tshienda tshidi mua kuikala tshishilangana ku bietu, kadi mabenesha Enda adi alua. Mueyemena bia bungi bua “wimana talalâ, ne umanye ne [Udi] Nzambi” (Misambu 46:10), ne Mmumanya malu onsu, ne mumanya bidi bitufikila. Patudi tumueyemena, dinanga Dienda didi mua kutubuikijija bujima. Mmulaya ne tudi mua kupingana kudiyi bua diambuluisha ne buludiki diba dionsu. Neatumanya ne Atunanga bua kashidi.

Ndi njadika ne patudi tuteka dieyemena dietu mu Tatu wa mu Diûlu wa dinanga ne Muanenda munanga, tulama bipungidi bietu, ne tunanukila mu ditabuja tô ne ku ndekelu, netusanke ne milayi ya Tatu, udi wenza malu onsu mu bukola Buenda bua kutuambuluisha bua tupingana ku mesu Kuenda dituku dikuabu. Ne patudi tuenza nunku, Ndi ndaya ne netuikale bakumbane bua kujadika, bu muakenza muprofete Yeshaya tshikondu tshila tshishala, bua “bunena bua luse lujalama lua [Nzambi]” (Yeshaya 63:7).

Tatu wa mu Diûlu udi mutumanya ne mutunanga misangu yonsu. Mmutunanga ne udi koku buetu mpindiewu. Ndi njadika ne udi misangu yonsu mudisuila bua kuandamuna masambila etu. Tumvua misangu yonsu mushindu udiyi mutumanya bia bungi, mutunanga, ne mudisuila bua kutuambuluisha ne kutubenesha—mpindiewu ne bua kashidi.

© 2026 by Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, October 2026. Tshiluba. 20059 760